Post: #1
Title: يارب ... رمضان يقع السبت
Author: النصرى أمين
Date: 07-19-2012, 05:06 AM
هذا البوست للمتجرسين فقط.....
طبعا رمضان (واقصد برمضان رمضان العطش والجوع) هو اليوم الاول ...
بعد داك ..الباقى ساهل.....29 يوم تمر زى السحاب......
اها اليوم الاول لو وقع لينا جمعة واطاتنا اصبحت .....
الدنيا عندنا صيف ودرجة الحرارة مضاف اليها عمل الرطوبة تصل لاربعين درجة
الفطور الساعة 9:45 مساء ..الامساك 3:45 صباحا ..
لو وقع سبت ....منقة بس .....
السبت اجازة...نقضى اليوم كله فى البيت ..
دعواتكم
|
Post: #2
Title: Re: يارب ... رمضان يقع السبت
Author: النصرى أمين
Date: 07-19-2012, 05:55 PM
Parent: #1
يبدو ان اول يوم فى رمضان سيكون غدا الجمعة 20 يوليو 2012
رمضــان كريــــم ... وربنا يتقبل منا ومنكم صالح الاعمال
|
Post: #3
Title: Re: يارب ... رمضان يقع السبت
Author: اسامه خليفه
Date: 07-19-2012, 06:06 PM
Parent: #2
سلام يا نصري وكل عام وانتم بخير
غايتو نحن عندنا هنا تاكد يوم السبت ....
كدي فتشوا ليكم شيخ كارب كده يصومكم في الوكد اند بس ..
وبمناسبة الفطور المتاخر عندكم دا انت ممكن تسحر في كندا وتفطر في ماليزيا..
كل عام والجميع بخير ..
اضافة اقتراح
|
Post: #4
Title: Re: يارب ... رمضان يقع السبت
Author: النصرى أمين
Date: 07-19-2012, 07:00 PM
Parent: #3
سلام اسامة
كان ملاحظ ان كتبت "يبدو" انه يوم السبت
لانه فى احتمال كبير جماعتنا هنا وهم تحت منظمة اسمها اتحاد مسلمى اميركا الشمالية
وتختصر ب isna ..اها الجماعة ديل مرات كتيرة بعملو الفى راسهم وما بشتغلو بباقى العالم...
لو قررو رمضان السبت فيدخلونا فى مشكلة...
هل نصوم مع اهلنا فى السودان والسعودية وباقى العالم الاسلامى ولا نصوم مع جماعتنا هنا
فى مدينتنا الكندية؟
فى الماضى انا كنت مقرر اصوم مع اول دولة تعلن رمضان حتى لو كانت الدولة الوحيدة فى العالم
الصايمة....
دلوقت مجهجه شوية...
|
Post: #5
Title: Re: يارب ... رمضان يقع السبت
Author: النصرى أمين
Date: 07-19-2012, 07:05 PM
Parent: #4
الساعة دلوقت عندنا فى كالقرى غرب كندا اتناشر نص النهار
يعنى تانى 8 او 9 ساعات من الجهجهة......
غالبا منظمة الاسنا تعلن رمضان السبت ...
وغالبا ما نشتغل بكلامهم....
|
Post: #6
Title: Re: يارب ... رمضان يقع السبت
Author: الزبير صالح الزبير
Date: 07-19-2012, 08:05 PM
Parent: #5
النصري رمضان كريم ونصوم وتفطر علي خير
ما تتجرس أصعب الرمضانات ولت زمان ايام تستات نفخو واحمد الحاج
أتخيل رمضان ومعاو تست من زي ديل
ما تعرف تشيل هم ياتو فيهم رمضان ولا التست
رمضان ثبت انو جمعه( في ارض الشرق البعيدة عنكم ) وعقبال عندكم
|
Post: #7
Title: Re: يارب ... رمضان يقع السبت
Author: ناذر محمد الخليفة
Date: 07-19-2012, 08:57 PM
Parent: #6
|
Post: #8
Title: Re: يارب ... رمضان يقع السبت
Author: النصرى أمين
Date: 07-20-2012, 06:41 AM
Parent: #7
ياالزبير ده كان زمان
دلوقت المكنة خفت ..والعذاب والشقى هدا مروتنا الفضلت ....
الصورة التحت دى بتورى الموقف عندنا دلوقت الساعة 11 مساء الخميس
<>
ناس الاسنا حددو الصيام يبدا يوم الجمعة
منظمة مسلمى بريتش كولومبيا قالو الصيام السبت ..معاهم منظمة تانية اسمها مراقبة الهلال
فى ناس لسه ما قررو بعد وهم المركز الاسلامى وجمعية الشيعة فى بريتش كولومبيا
----------
شكرا يا ناذر على الاغنية
|
Post: #9
Title: Re: يارب ... رمضان يقع السبت
Author: elhilayla
Date: 07-20-2012, 08:25 AM
Parent: #8
السلام عليكم
النصري وضيوفه
الأكارم
رمضان كريم
المسلمون في مونتريال
اول ايام رمضان هو
السبت حسب الاجتماع
الذي انعقد بالأمس
وحضره كل أئمة المساجد
الحليلة
|
Post: #10
Title: Re: يارب ... رمضان يقع السبت
Author: الزبير صالح الزبير
Date: 07-20-2012, 04:14 PM
Parent: #9
Quote:
ناس الاسنا حددو الصيام يبدا يوم الجمعة
منظمة مسلمى بريتش كولومبيا قالو الصيام السبت ..معاهم منظمة تانية اسمها مراقبة الهلال
فى ناس لسه ما قررو بعد وهم المركز الاسلامى وجمعية الشيعة فى بريتش كولومبيا
|
طيب يا النصري دي ما فرصة انت تقول ليهم احتجاجا علي عدم توافقكم علي رأي واحد فاني احتج وبشدة وستكون صورة احتجاجي هي عدم اتباع أيا منكم
وبهذا يكون عندك عذر شرعي
|
Post: #11
Title: Re: يارب ... رمضان يقع السبت
Author: اميرة السيد
Date: 07-20-2012, 04:22 PM
Parent: #10
احسن حل ليك يا النصري تصوم مع ناس كوريا الجنوبية.. وهم اعلنوا ان الصيام عندهم يوم السبت
والله يديك العافية.. وما تنسى ان الصيام في البلاد الغربية وامريكا وكندا بيعتبر نزهة وترفيه مقارنة بالصيام في السودان
ودول المهجر العربي حيث السخانة بتقد النافوخ والناس تشعر بالعطش الساعة خمسة صباحا..
|
Post: #12
Title: Re: يارب ... رمضان يقع السبت
Author: النصرى أمين
Date: 07-20-2012, 05:03 PM
Parent: #11
والله يا الزبير جاتنى صحية الساعة ستة صباحا لقيت روحى عطشان عطش والغرفة مسخنة
نار منقد بس ... شلت هم ال13 ساعة المتبقية....
واصلت النوم ..صحيت حوالى الساعة عشرة لقيت المؤقف مطمئن والزلعة راحت ....
|
Post: #13
Title: Re: يارب ... رمضان يقع السبت
Author: النصرى أمين
Date: 07-20-2012, 05:07 PM
Parent: #12
سلام يا الحليلة
انت ناس مونتريـال ديل ما تابعين للاسنا؟
اتخايل لى الناس ديل ببنو قرارتهم على ظروف اخرى غير رؤية الهلال فقط....
فعيد فى نهاية الاسبوع يختلف عن عيد فى وسطه من ناحية تاجير صالات وباركنق وخلافه...
يعنى حسى انت بتكون بتفطر ليك بفول كارب بالشطة والليمون !
|
Post: #14
Title: Re: يارب ... رمضان يقع السبت
Author: النصرى أمين
Date: 07-20-2012, 05:13 PM
Parent: #13
| Quote: وكندا بيعتبر نزهة وترفيه مقارنة بالصيام في السودان |
يا اميرة لو فى الشتاء معليش ..لانو اليوم عندنا زى اربعة ساعات كده...
لكن ما تنسى حاجة مهمة..
الناس هناك والنظام كله بتخفض الانتاج وساعات العمل والبلد كلها بترخى...
هنا مافى تغيير نفس ساعات العمل... نفس العذاب والشقى...
برضو رمضان فى الصيف عندنا اصعب من السودان لانه اليوم طويل جدا قد تصل الزيادة
الى 5 او 6 ساعات ودرجة الحرارة لاتختلف كثيرا باضافة عامل الرطوبة.....
يديك الصحة والعافية (وهى جملة يستخدمها عثمان اخوى دائما)
|
Post: #15
Title: Re: يارب ... رمضان يقع السبت
Author: عزالدين محمد عثمان
Date: 07-20-2012, 05:15 PM
Parent: #11
الاكرم النصري كل عام والجميع بخير تصوم وتفطر مع الاسرة الكريمة
وانتم بالف خير ولكل ضيوفك في البوست.. ياخي الجرسة في شنو كلنا في الهوا سوا..قبل
كم يوم كان الجو حار جدا ورطوبه عاليه لكن اليوم الجمعه ومنذ منتصف ليل امس الخميس
الجو تغير والسماء متروسه سحاب ورزاز مره مره كده وهذا من فضل الله في هذا الشهر
المبارك والفضيل..عقبال ناس السودان وقلوبنا معاكم..
ولكم مودتي
|
Post: #16
Title: Re: يارب ... رمضان يقع السبت
Author: النصرى أمين
Date: 07-20-2012, 05:21 PM
Parent: #15
انت يا عزالدين المقعد بهناك شنو؟
اتخارج يا معلم وتعال بجاى....
اوع تقول لى خلى رمضان ينتهى ...
مرة واحد اخونا كان بفتش لى شغل...لقيت ليهو شغلانة ممتازة جدا جدا ....فاجانى
قل لى خلينى امس السودان اول وبعد داك بجى للوظيفة...
قلت ليهو فى سرى ان الفرص لا تتسكع امام الابواب (الحكمة دى اول مرة اسمعها كان فى
بداية الثمانينات من عادل سالم)
|
Post: #17
Title: Re: يارب ... رمضان يقع السبت
Author: Gamal Abayazid
Date: 07-20-2012, 09:11 PM
Parent: #16
UP
|
Post: #18
Title: Re: يارب ... رمضان يقع السبت
Author: Kabar
Date: 07-21-2012, 03:24 AM
Parent: #17
النصري..حبابك
كل سنة و انت طيب..و تصوم و تفطر على خير..
غايتو دي نكتة من عندنا..و الفطور اللحظة باقي ليهو ساعة و نص بتوقيت كالقري..المهم..
قريبنا واحد اول ما وصل هنا عجبتو ليك حكاية شغل الأوفر تايم.. أي ساعة حايمة بيلقطها..و بيلقط القروش معاها..
اها قام جانا رمضان طويل اليوم..و صاحبنا شبكنا ليك جرسة ياخي اليوم طويل و الشمس سخنة..و كده..قام صديقنا ادورب غتيت كده..صر عينو اليمين استغرابا و قال ليهو:
شغل اوفرتايم تحب.. رمضان اوفر تايم ما تحب..!!!
و كل سنة و الجميع بخير..
كبر
|
Post: #19
Title: Re: يارب ... رمضان يقع السبت
Author: النصرى أمين
Date: 07-21-2012, 08:18 AM
Parent: #18
سلام كبر
والله الليلة كنت شايل هم ...طبعا انت عارف نظام شغلى مرات كتيرة بنكون
قاعدين فى فرن لمدة تمانية ساعات ...
لكن الحمدلله ...ربنا الكريم لطف بينا ....الجو اليوم كله كان مغيم وجميل جدا
جدا ....
دى صورة اخدتها حوالى الساعة 4 عصرا ونزلتها فى الفيسبوك...
شوف الغمام ده بالله ......
برغم ذلك لمن جات الساعة تمانية مساء ..بقيت لا بودى لا بجيب....كاضم.....
وجع راس ووجع ضهر والجسم كله مضبلن .....
الحمدلله اليوم الصعب انتهى ...باقى الايام منقة بس
<>
|
Post: #20
Title: Re: يارب ... رمضان يقع السبت
Author: singawi
Date: 07-21-2012, 09:01 AM
Parent: #19
النصري يا قريبي
كل ثانية وانت وأحبابك طيبين
رمضان كريم تصوم وتفطر على خير
لي كم سنة كدا متابع دراسة بتحدد ليلة القدر بأسانيد شرعية
ومتابعة عملية
ومن حوالي ستة سبعة تمانية سنوات الأمور ماشة تمام
خلاصة الدراسة بتقول ان ليلة القدر ليلة متنقلة في الليالي الوتر من العشرة الأواخر
وثابتة في نفس الوقت لا تتغير ولإزالة التناقض في الثبات والتنقل الدراسة تزعم
أن ليلة القدر هي ليلة الثلاثاء الوتر في العشرة الأواخر
وبهذا تكون ثابتة ليلة الثلاثاء ومتنقلة في ليالي 21 و23 و25 و27 و29 رمضان
وبهذا يستحيل أن يبدأ رمضان بيوم الجمعة لأن ليلة الثلاثاء تكون زوجية
السعودية أعلنت الجمعة أول أيام رمضان وعليه صمنا بالجمعة
ولكن قناعتي أن السبت هو أول أيام رمضان المبارك وليلة القدر هي ليلة الثلاثاء 25 رمضان وليس 26
تحياتي وأطيب أمنياتي
|
|