Post: #1 Title: بعد ان غادرت اخر طائرة مستاجرة امام مسجد سودانير يطالب بالدعوات .. Author: هشام عباس Date: 07-12-2012, 11:29 AM
الرسالة كما وصلتنى من موظف بسودانير بدون ذكر اسماء
Quote: والله حكاية غريبة بس عايشتها واديك التفاصيل
امس في صلاة الظهر وبعد الصلاة بمسجد سودانير - ش عبيد ختم صلي امام المسجد صلاة الحاجة واكثر من الدعاء ليرد الله عافية الناقل الوطني ,... استغرب معظم الناس للحدث الا للذين يعملون بالشركة ... بعدها علمنا بان اخر طائرة غادرت اليوم (امس ) الي موطنها بعد ان عجزت الشركة سداد الايجار واليوم سيرت الشركة قرابة ال 40 رحلة بطائرات مستاجرة بالرحلة ( يعني بالمشوار ) لالتزامها نحو حاملي التذاكر والحجوزات . . هكذا ردت الينا ناقلنا الوطني بعد استلموها بطائرات ذات سعات عريضة وخطوط في المشرق والمغرب العربي واوربا . عرفت البلد دي تدار كيف ياهشام
Post: #2 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: هشام عباس Date: 07-12-2012, 11:32 AM Parent: #1
انتو شنو حكاية الدجل الماشة فى البلد اليومين ديل ؟؟؟ رئيس يطلع يقول للناس الازمة الاقتصادية اتسبب فيها ربنا وسودانير تصلى صلاة الحاجة وتطالب بالدعاء لانقاذ الناقل الوطن بعد الدمار يا جماعة يعنى انتو تنهبوا فلوس البلد وربنا ينزل ليكم طير ابابيل من السماء بدل طائراتكم دى ؟؟ الحكاية شنو بالضبط
Post: #3 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: هشام عباس Date: 07-12-2012, 11:35 AM Parent: #2
معقولة انسان باقى فيه ذرة عقل او احساس او ضمير او اخلاق لا زال يؤيد هذه الحكومة ؟؟؟ باقى شنو يعنى عشان نحكم على الحكومة دى بالفشل باقى شنو عشان نقول دا الفساد باقى شنو عشان الناس تسعى للتغير اقسم بالله لو كانت الجمادات تتحرك وتعبر لما رضت بهذا الواقع الذى نعيشه
Post: #4 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: Hani Arabi Mohamed Date: 07-12-2012, 11:48 AM Parent: #3
يا أخي أكتب إليك والألم يملأني. وأنا أرى الوطن يتمزق والكفاءات تشرد والسمعة تخرب والمساكين ما بين سلخ وشواء وتشريد ونزوح واغتصاب
لا حول ولا قوة إلا بالله.
Post: #5 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: هشام عباس Date: 07-12-2012, 12:13 PM Parent: #4
Quote: يا أخي أكتب إليك والألم يملأني. وأنا أرى الوطن يتمزق والكفاءات تشرد والسمعة تخرب والمساكين ما بين سلخ وشواء وتشريد ونزوح واغتصاب
لا حول ولا قوة إلا بالله.
هانى اخوى بالله الفاضل شنو تانى ؟؟؟ سبب واحد يخلينى اامل او اتعشم فى الناس دى مافى اقتصاد والحكومة بنفسها تقر انها افلست خدمات والناس بتشكو لطوب الارض فقر ومرض وغلاء تطحن الناس امن والبلد مشتعلة فى كل ركن فيها سيادة والبلد محتلة فى حلايب والفشقة وقوات دولية اكتر من الجيش السودان حريات والناس معتقلة بالعشرات وتتعذب فى المعتقلات والصحف مصادرة تانى السبب البيخلى الناس دى تتمسك بالسلطة شنو ؟؟؟ والسبب البيخلى الناس تدافع عنها شنو
Post: #6 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: مرتضي عبد الجليل Date: 07-12-2012, 01:01 PM Parent: #5
هشام عباس,سلام وتحية: هي لسا شركة عارف الكويتية مسوؤلة من سودانير؟ لأنو قبل كم يوم في النشرة الإقتصادية في قناة العربيةة جابوا خبر طرد شركة عارف من البورصة الكويتية لعدم إلتزام الشركةبالقوائم المالية والشفافية المطلوبة لمواصلة عملها !!
اما حكاية الدعاء دي خليها ساكت !
Post: #7 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: Isa Date: 07-12-2012, 01:28 PM Parent: #6
سـلام ياهشام.. ناسك ديل حتى صلاتهم ودعاهم بنظام علوق الشدة ورزق اليوم باليوم.. فقد نشرت الصحف السودانية كلها تقريبا يوم 26 شهر 6 الخبر دا: من الصحافة هنا
Quote: تعطلت الرحلات الخارجية للخطوط الجوية السودانية "سودانير" بعد خروج طائرتي إيرباص 300 و320 المملوكتين للشركة من الخدمة بسبب أعطال واستحقاقات مالية تخص شركات الصيانة العالمية . واحتجزت طائرة ايرباص 300 تابعة للخطوط الجوية السودانية بالقاهرة بعد أن عجزت سودانير عن سداد تكلفة الصيانة ، بينما تعطلت طائرة ايرباص 320 بمطار جدة . وقال مصدر مطلع لصحيفة "الصحافة" الصادرة بالخرطوم يوم "الثلاثاء" إن شركة "البتراء" الاردنية سحبت طائرتها التي تستأجرها الخطوط الجوية السودانية لتراكم المديونيات وعجزها عن دفع الاموال . ونقلت الصحيفة عن مسافرين عبر الخطوط الجوية السودانية في المحطات الخارجية عن توقف جداول الرحلات الخارجية لسودانير ببسب انعدام الطائرات ، في وقت تكدس فيه مسافرون قادمون الى السودان لقضاء العطلات الصيفية في المطارات العالمية . يذكر أن الخطوط الجوية السودانية تمتلك طائرتين وتقوم باستئجار طائرة اضافية من شركة "البتراء" الأردنية ، بينما خصصت طائرة "فوكرز" للرحلات الداخلية.
Post: #8 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: هشام عباس Date: 07-12-2012, 04:17 PM Parent: #7
مرتضى عيسى
تحياتى
Post: #9 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: Mohamed Abugessisa Date: 07-12-2012, 05:23 PM Parent: #8
شوف الدجل الجدجد في الخبر ده علي الجزيرة مع انو ما جديد
Post: #10 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: حبيب نورة Date: 07-12-2012, 05:31 PM Parent: #9
لا حول ولا قوة
الناقصة تمت
Post: #11 Title: Re: بعد ان غادرت اخر طائرة مستاجرة امام مسجد سودانير يطالب بالدعوات .. Author: هشام عباس Date: 07-12-2012, 08:46 PM Parent: #10
محمد حبيب نورة هو انتو لسع شفتوا حاجة ..ياما فى الجراب يا حاوى