تحية الشاعر د.محمد بادى للثورة السودانية وشبابها

"نسرينة الأسحار" .. ترنيمة جديدة للشاعر الدكتور محمد بادى .. تحية للربيع السوداني الذي أتى متسربلاً بأثواب الخريف .. وهاهم شباب التغيير يجوبون الحواري والميادين .. ويتنسمون شَذى الربيع الحارِق المِعْطَار.

مِتين الجيّه ... يالمكسِيَه بالأنوار
زَي النَسمَه في الفجْريَه
بلا إستئذان أدُخلي الدار
وإن شُفتِي السَوانْكي عليّه
أطلَعي من شبابيك الفَرَح أقمار
نحْلم بيكِ وإنتي عَصِيّه
في عينيك منابع الدهشه والأسرار
أرحلي فينا في البدريّه
خَلي شذاكِي زي نسْرينة الأسحار

نسمع بيكي من زمن الأماني صبيّه
لامِن شِبنا وإنتي تَََسَوِي في الأعذار
نغنيلِك علي رَزَمِي الذَخيرَه الحيّه
ونَعَرِضْ في دَلالِيك السّما الهدّار
ونمشي عليكي بين نيران موَلقِده حيّه
شموع الفرحه بين إيدينا والأزهار
عليك يا واهِب الأنفاس والحريه
نعيش أحرار ولا نموت مع الأحرار
ضاقت رُوحي بالحاصِل عليك وعليّه
آه من غُلبي وآه من قسْوَة الأقدار
تسلَمي من قيوداً فيكِ وإنتي بَرِيّه
ماكْ شبه القيود يا قِبلَة الأحرار
ولا بتعيشي في الوحل الوَطَاتُو دنيّه
يالمولوده من رحم اللهيب والنار
بُكره تنادي وأولادك يجوكِي سَوِيا
يَبشِروا فيك .. وينزلوا في مَيادِينك نهار وجهار

ومن وين جيتي يا قُمريه
بعد أجدب سماها وجفت الأشجار
بلد منسيه بي شِعَبْ الصبر متكيّه
زي العُود بلا أوراق وزي العود بلا أوتار
وهسع كيف يكون بدل الغنا المرثيه
وكيف الحفله تجمع بين وجوه الشُهداْء والأشرار
ولا تقابلي العواجِيز المَلُونا أسيّه
خَلِي اللُقيا بينِك وبين شباب أطهار

وهَسَّع جِيتي فاجأتينا يا المسْميّة
قُبَال ما نَعَدْل الحال وقُبال ما نَفُرش الدار
وحَات البينا سالمينا وأصبري شوية
خلينا النَصَحِّي الشُعراء والسُمار
ونحشد ليك جموع أَلْفِيَة فوق أَلْفِيّة
ونَمْرُق في ميادينك صُغار وكُبار
هاك الباقي من أعمارنا والذُريّة
بس لو لحظة يغشَانا الرَبيع المَارْ

Quote: وهَسَّع جِيتي فاجأتينا يا المسْميّة قُبَال ما نَعَدْل الحال وقُبال ما نَفُرش الدار وحَات البينا سالمينا وأصبري شوية خلينا النَصَحِّي الشُعراء والسُمار ونحشد ليك جموع أَلْفِيَة فوق أَلْفِيّة ونَمْرُق في ميادينك صُغار وكُبار هاك الباقي من أعمارنا والذُريّة بس لو لحظة يغشَانا الرَبيع المَارْ

تحية كبيرة لصديقنا العكودابي الجسور الدكتور محمد بادي

أحمد الشايقي

تحية...

حين ياتي ود بادي حاملا طورية الشعر ضاربا بها في جوف النهار الحار يكون الكلام دخل ( حوش) الرجال المتحزمين بالهم العاصف ...

لا وقت يا صديقي للالحاف لها بالانتظار بل نحن سيرا خلف مناديل اشاراتها .....وخلف امواجها المانحة لطمي الثورة وبذور اللقاح...

له ولك الاحترام...

Quote: مِتين الجيّه ... يالمكسِيَه بالأنوار زَي النَسمَه في الفجْريَه بلا إستئذان أدُخلي الدار وإن شُفتِي السَوانْكي عليّه أطلَعي من شبابيك الفَرَح أقمار نحْلم بيكِ وإنتي عَصِيّه في عينيك منابع الدهشه والأسرار أرحلي فينا في البدريّه خَلي شذاكِي زي نسْرينة الأسحار نسمع بيكي من زمن الأماني صبيّه لامِن شِبنا وإنتي تَََسَوِي في الأعذار نغنيلِك علي رَزَمِي الذَخيرَه الحيّه ونَعَرِضْ في دَلالِيك السّما الهدّار ونمشي عليكي بين نيران موَلقِده حيّه شموع الفرحه بين إيدينا والأزهار عليك يا واهِب الأنفاس والحريه نعيش أحرار ولا نموت مع الأحرار ضاقت رُوحي بالحاصِل عليك وعليّه آه من غُلبي وآه من قسْوَة الأقدار تسلَمي من قيوداً فيكِ وإنتي بَرِيّه ماكْ شبه القيود يا قِبلَة الأحرار ولا بتعيشي في الوحل الوَطَاتُو دنيّه يالمولوده من رحم اللهيب والنار بُكره تنادي وأولادك يجوكِي سَوِيا يَبشِروا فيك .. وينزلوا في مَيادِينك نهار وجهار ومن وين جيتي يا قُمريه بعد أجدب سماها وجفت الأشجار بلد منسيه بي شِعَبْ الصبر متكيّه زي العُود بلا أوراق وزي العود بلا أوتار وهسع كيف يكون بدل الغنا المرثيه وكيف الحفله تجمع بين وجوه الشُهداْء والأشرار ولا تقابلي العواجِيز المَلُونا أسيّه خَلِي اللُقيا بينِك وبين شباب أطهار وهَسَّع جِيتي فاجأتينا يا المسْميّة قُبَال ما نَعَدْل الحال وقُبال ما نَفُرش الدار وحَات البينا سالمينا وأصبري شوية خلينا النَصَحِّي الشُعراء والسُمار ونحشد ليك جموع أَلْفِيَة فوق أَلْفِيّة ونَمْرُق في ميادينك صُغار وكُبار هاك الباقي من أعمارنا والذُريّة بس لو لحظة يغشَانا الرَبيع المَارْ

التحية لشاعرنا الكبير والمبدع ودبادي

ولك كل الشكر عزيزي اسامه

التحية للشاعر الدكتور محمد ودبادي على هذه الكلمات الجسورة وعلى هذا النفس الشعري الفريد .

Quote: بلد منسيه بي شِعَبْ الصبر متكيّه زي العُود بلا أوراق وزي العود بلا أوتار

غدا سيكتسي هذا العود بالاوراق فقد حان خريف الثورة ، كما سيصدح عود المغني بالغناء العذب لهذا الوطن الجميل .



مع تحياتي.

تحية...

(الربيع المار) يا ود بادي سبق لنا نسج مناديل حنته وقوفا لشبال الرصاص في اكتوبر وزخات حممه العطرية في كتوف الرجال الذي قدموا الدماء الزكية فداءا. ومهرا لعرس الحرية الباذخ..


شعبك يا بلادي سيصنع اعراسه الجديدة ويختال بين الشعوب مضمخا اياديه بما يلزم للفداء ايضا..وللشموس الجديدة ..