Post: #1 Title: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 00:00 AM
عمكم اللقرُوّب راجل حاااار، وسُخُن، هارش ناس الفريق لحدهم وموقِفُن علي فد كُرآع. مافي زول بيقدر يقول بِغِم في حضرتو. لكن بس بالرغم من دا كللللو بيخاف مووووت من الجرآقِيّس. أها، يوم في جماعة عندهم بِكا في الحِلّة، وعمنا اللقروب لآزم يمشي يعزي، بس المُشكلة الناس ديل عندهم جرقاس ختري شديد. شرس لدرجة. أها، عمنا لفّ عِمتو، وطبق عكازو المضبب في أباطو ومرق عليهم. كو،كو، كو، دقّ الباب. شافعة سغيرة فتحت الباب، ومع فتحتا للباب الـكـلـب جا دآفر زي قذيفة المُدفع، وعمنا اللقروب قام صُووووف، والجرقاس ورآهو. أها، في نسوان بيردن فوق البير، ومعاهِن رآجل بينشلهِن شافو عمنا فاكي البيرق. الرآجل قال للنسوان حاج اللقروب دا زول فارس، دحين زغرِتن عشان يقبّل علي الجرقاس دا بعاصتو يوضبو. النسوان ما صدقن كللللهن زغرتن بصوت وآحد. عمنا اللقروب عرّج علي النسوان والـكـلبـ ورآهو، وكت بِقا قُصادِن هزّ فوقِن بعصاتو وهو جاري وقال لهِن: أبِشرن، أبِشرن، علي الطلآق كان جرى لي حولُو ما يلحقني...
Post: #2 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 00:02 AM Parent: #1
أُمنا دي طالعة الشارع بتطالب بسخينة لأيتام جِياع،
Post: #3 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 00:04 AM Parent: #2
وابزرد دا يرقص، ولسان حالو يردد علي الطلآق تثورو لحولكم ما تقلبوها!!!!!!!!!
Post: #4 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 00:15 AM Parent: #3
طريقة عمل السخينة. إعدآد الشيف الختير ود المدير: شِوية وآقود + حلّة + بصلة + موية + مِلح إن وُجِد. ضعي الحلة علي النار كان ولّعت، ثمّ كُبي فيها الموية، نضفي البصلة وارميها في الموية، ولو شعرت إنو السخينة ممكن تقصّر أرمي البصلة بي قشرتا. اتركي البصلة حتي تغلي جيداً في الموية ثمّ رُشيها علي الكِسرة إن وُجدت، وإن لم تكن الكِسرة موجودة وطبعاً دا الإحتمال الوآرد، ادي السخينة للأيتام يتغرغروها، ويِطمو ينوموا عشان سيدي الرئيس ما فايق ليكم، وهو مهموم بالمشروع الإسلآمي وتطبيق شرع الله. والله صحي...
Post: #6 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 00:20 AM Parent: #4
ثانِيَ اثنين إذ هُما في السُلطة دا قال ماهيتو كم ؟؟؟ بخِت وِليدآتو، هسّع يكونو إيديهم للكوع غاتسات في السخينة. والله صحي...
Post: #5 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية عبيد الصائم Date: 07-04-2012, 00:17 AM Parent: #3
ابو النسب الدغرى سلام
الناس فترت فترت شن الراى
لعلك وام المقداد والولاد بخير
تحيات عمك عبيد وخالتك
Post: #7 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 00:27 AM Parent: #5
الزول دا كان ما أخاف الكِضِب سمعتو قبل كم يوم قال عندو كم بيت ومزرعة. إستغفر الله العظم. غايتو ما عارف يمكن يكون القال الكلآم دا زولاً تاني.
سُئل أعرابي، ما رآيك في إبليس؟؟؟ قال: أسمع الناس يقولون عنه الكثير، والله أعلم بسريرته.
Post: #8 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 00:31 AM Parent: #7
سخينة شنو؟؟؟ دي مرا مجنونة. علي الطلآق الشعب السوداني دا أكتر شعب شبعان، وما شافو الشبع إلا في ظل الإنقاذ بتاعتنا دي.
Post: #9 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: عامر باضاوي Date: 07-04-2012, 00:45 AM Parent: #8
.
Post: #10 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 01:06 AM Parent: #9
الشعب يريد سخينة.
بالله عليكم أطلقوا علي أحد جُمع ثورتكم (جُمعة السخينة) تضامناً مع أُمنا دي، وكل من اصابته مسغبة جرآ هذا الحُكم الجائر الظالم...
Post: #11 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 07:26 AM Parent: #10
Post: #12 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: aydaroos Date: 07-04-2012, 07:26 AM Parent: #10
Quote: عرّج علي النسوان والـكـلبـ ورآهو، وكت بِقا قُصادِن هزّ فوقِن بعصاتو وهو جاري وقال لهِن: أبِشرن، أبِشرن، علي الطلآق كان جرى لي حولُو ما يلحقني...
الله يجازي محنك يا ودالمدير
سلام وتحية
Post: #13 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-04-2012, 01:05 PM Parent: #12
Quote: ابو النسب الدغرى سلام
الناس فترت فترت شن الراى
لعلك وام المقداد والولاد بخير
تحيات عمك عبيد وخالتك
سلآمات يا ابو النسب، وعبرك التحايا للعم عبيد والخالة.
يا أخي والله الناس ديل بقو أبداً ما بيختشو.
Post: #14 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-05-2012, 05:19 AM Parent: #13
عامر باضاوي، سلآمات.
يا أخي والله العظيم نُقطة القطآرة دي زآتا وقفوها، وكت الناس إحتجو قالوا عليهم شُذاذ أفاق، !!! فتأمّل يا قول ملآسي، الله يطراهو بالخير.
تحياتي...
Post: #15 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: جمال المنصوري Date: 07-05-2012, 05:29 AM Parent: #14
Quote: ممكن تقصّر أرمي البصلة بي قشرتا
ود المدير كيف حالك
عفيت منك يالكلس، قلت لي داير ترمي القشرة..(صحيح ود المدير) والله صحي .. ياخ حرام الليك، قشرة البصلة دي بي تدي السخينة لون بني كمده لزوم القرشة( مش برضو بقولو كده) وبعدين بي تطفح بي فوق، تشوفها زي مصارين الكمونية.. ياخ انت طلعت (شيف) مثقف (والله صحي) محبتي
Post: #16 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: ناصر احمد الامين Date: 07-05-2012, 07:52 AM Parent: #15
Quote: (صحيح ود المدير) والله صحي .. ياخ حرام الليك، قشرة البصلة دي بي تدي السخينة لون بني كمده لزوم القرشة( مش برضو بقولو كده) وبعدين بي تطفح بي فوق، تشوفها زي مصارين الكمونية.. ياخ انت طلعت (شيف) مثقف (والله صحي)
ليهو حق (الريس) يقول عليهم (شذاذ افاق) يا المنصوري ههههه
Post: #17 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-05-2012, 12:18 PM Parent: #16
Quote: الله يجازي محنك يا ودالمدير
سلام وتحية
عيدروس، السلآم يغشاك، وعبرك لجميع الأهل في السيالة القديمة، والنِمر، والسيالة الجديدة، والكريماب، والعمرت، والسارة، والكراراب، وخليوة والدآخلة، وحِلة نبرو. سلللللللللللم عليهم عليك الله، وقولهم بالحيل مشتاقين.
الله يقطع الحيكومة يا بركة من جعل محمد نبي...
Post: #18 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-05-2012, 01:14 PM Parent: #17
Quote: ود المدير كيف حالك
عفيت منك يالكلس، قلت لي داير ترمي القشرة..(صحيح ود المدير) والله صحي .. ياخ حرام الليك، قشرة البصلة دي بي تدي السخينة لون بني كمده لزوم القرشة ( مش برضو بقولو كده) وبعدين بي تطفح بي فوق، تشوفها زي مصارين الكمونية.. ياخ انت طلعت (شيف) مثقف (والله صحي) محبتي
أريت حالك زين يا جمال المنصوري.
يا أخي شيف مثقف ونُص وخمسة، وكمان من السيالة القديمة دِييييك الجنب البحر. بعدينك أنا شيف ما تباخ ثمّ أضف اليها ود مدير. إنت قايلني تباخ من حِلة الصاج؟؟؟ أوّعَ أبو جهينة يجي بجاي. لكن بيني وبينك القشرة تب ما بتترمي في ظل ثورة الإنخاس دي، وقائدها الشاذ أُفُقياً دا. إضافة إلي فوائدها التي ذكرت السبب الذي جعلني أقتنع قناعة تآمة بأنك تباخ عتيق. والله صحي.
سبحان الله. تخيّل الحاجة دي مطالبا كوووولها محصورة في سخينة لأيتام، والأرعن دا يرقص !!!
Post: #19 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: عبدالله احيمر Date: 07-05-2012, 01:33 PM Parent: #17
Quote: طريقة عمل السخينة. إعدآد الشيف الختير ود المدير: شِوية وآقود + حلّة + بصلة + موية + مِلح إن وُجِد.
أتدعو الشـعب للترف يا ود المدير
وريهم طريقة الكسـرة بالموية ( لا محتاجة و يقوت و لا بصل )
يا أخوي الشعب دا أصلو ترفان، واللآ مُترف ما عارف؟؟؟ حتي أسعل السيّد الرئيس، قال صينية الشعب متروسة صحانة وتلآت مرآت في اليوم، وقاعدين يهضمو بالببسي. دايرين تسوها فوقي أنا عشان بدور أعلمكم السخينة !!!؟؟؟ أها، الكسرة عآد دايرين تعوسوها بشنو، صاجات كهرباء؟؟؟ بيئتنا مع الجفاف والتصحر دا، لوّمك بي تب ما تِنضرّ، والبصل الحيكومة بتدور تعمل بدلو بصل الكتروني غير مسيل للدموع عشان عيون الشعب. والله صحي...
Post: #22 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: الزبير صالح الزبير Date: 07-06-2012, 03:25 PM Parent: #21
Quote: يا أخي شيف مثقف ونُص وخمسة، وكمان من السيالة القديمة دِييييك الجنب البحر.
ود المدير كيفنك بااخي من ايام بوست مدير مباحث عطبرة عندي سؤال كنت عاوز أساله ليك لكن الله ما هون ودحين ما دام جبت سيرة السياله النسعلك لدي زميل دراسة من اولاد السياله اسمه عمر مدني عبد الماجد تخرج من قسم الفيزياء بمعهد الكليات دفعة 88 م تقريبا كان معنا بالرياض حوالي 98 م ولكني فقدت أثرة فان كان لك علم به او وسيله اتصال ينوبك ثواب مع تقديري
Post: #23 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-07-2012, 12:09 PM Parent: #22
Quote: ود المدير كيفنك بااخي من ايام بوست مدير مباحث عطبرة عندي سؤال كنت عاوز أساله ليك لكن الله ما هون ودحين ما دام جبت سيرة السياله النسعلك لدي زميل دراسة من اولاد السياله اسمه عمر مدني عبد الماجد تخرج من قسم الفيزياء بمعهد الكليات دفعة 88 م تقريبا كان معنا بالرياض حوالي 98 م ولكني فقدت أثرة فان كان لك علم به او وسيله اتصال ينوبك ثواب مع تقديري
أريت حالك زيّن يا الزبير.
يا أخي عمر مدني دا قريبي دم ولحم، وُلدنا ونشأنا وترعرعنا في السيالة القديمة. فرّقت بيننا سبل الغربة، وإلتقيته آخر مرّة قبل 4 سنين تقريباً في السيالة، وكان وقتها في دولة قطر، وأظنه ما زال هناك. سأحاول جاهداً إن شاء الله أن أتحصل لك علي رقم تلفونه.
لك كامل مودتي...
Post: #24 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: جمال المنصوري Date: 07-07-2012, 12:18 PM Parent: #23
يا ناصر
عليك امان الله شذاذ افاق دي زاتها قليلة علينا، ما ظنيت الرئيس ده ضاق ليهو جوعة ولا اكل ليهو سخينة زاتو، يكون بيسمعها سمع من ناس علي عثمان (الله يرحم ايام زمان) اللحمة في الملمات والبوش..ومسك فيها..
Post: #25 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: جمال المنصوري Date: 07-07-2012, 12:21 PM Parent: #24
Quote: يا أخي شيف مثقف ونُص وخمسة، وكمان من السيالة القديمة دِييييك الجنب البحر.
حباب ناس السيالة عارف يا ود المدير انا زمان اليوم كلو في حلة الكريماب،، اصلو عندي معاهم لحمي، ان بقيت لعبة معاهم طاب اللمات، اكيد بكون اديتك لتخة، زميلي فيهو كان (هاشم محمد علي الزبير، والحاج، وحيدر احمد صديق) ارقد عافي
Post: #26 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-07-2012, 01:09 PM Parent: #25
Quote: ما ظنيت الرئيس ده ضاق ليهو جوعة ولا اكل ليهو سخينة زاتو،
يا جمال يا اخ داير تجيب لينا الكتاتيح والهبايب، مالك يا اخ !!!؟ ذكرتني القطر لمان نكون مسافرين الخرتوم، والشفع السغار الكانو بيجرو محطتين وتلآتة ورا القطر ويكوركو، كرا، كرا، كرا.... ملعون أبوها دنيا فرندقس.
Post: #27 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: الزبير صالح الزبير Date: 07-07-2012, 07:41 PM Parent: #26
Quote: (هاشم محمد علي الزبير، والحاج، وحيدر احمد صديق)
جمال المنصوري تحياتي هاشم محمد علي الزبير أخوة الأصغر منه اسمه جمال محمد علي طلعني من غرقة في البحر في واحدة من الرمضانات زمان ودة طبعا بعد السارة شخبتت وشي وجسمي وبعد الثلاث غطسات والجماعة المعاي قاموا صوف جارين فله التقدير والاحترام بالمناسبة اعتقد انو جمال محمد علي هو خال الاخ حيدر احمد صديق رغم عدم وجود فارق عمري كبير بينهم ان كانت ذاكرتي لم تخني
Post: #28 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: جمال المنصوري Date: 07-08-2012, 11:08 AM Parent: #27
Quote: بالمناسبة اعتقد انو جمال محمد علي هو خال الاخ حيدر احمد صديق رغم عدم وجود فارق عمري كبير بينهم ان كانت ذاكرتي لم تخني
الزبير
كيف حالك؟ اعلك رايق
نعم حيدر احمد صديق ود اخت ناس جمال وهاشم، وود خالة المرحوم محمد عبد الماجد، وخالد عبد الماجد,,, بخصوص الغراق، الحتة الجنب السنطة الفوق البحر ديك، فيها عرق شديد وناس كتار غرقو هناك، الله يستر بس
Post: #29 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: قرشـــو Date: 07-08-2012, 11:34 AM Parent: #9
طيب نحن نصيبنا وين من النقاط بتاعت القطارة دى
يسمنا ما ضقنا الحبة دى ...
Post: #30 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: اسماء الجنيد Date: 07-08-2012, 11:51 AM Parent: #29
ود عمي المدير حبابك يابا سخينة شنو البضوقها الرئيس !!! إتلومت عاد يا خوي السخينة زاتها بتكون زعلت منك !! والله صحي النعمنو السخينة اللتنا نحن برانا والله صحي اللت الناس الغبش الما بخبرو لم القرش يأكلوها قريض ويفكوا بيها الريق لا ضجر لا ضيق المهم يبعدوا من حرام الحكام وسرقة النظام العام واكل السحت وحق الأيتام نبراااااااا منهم ومن جورهم وظلمهم ، ليهم الله وليهم يوم ، يمهل ولا يهمل وحجكمة الله يا معاوية يا خوي الخوف حقهم والجري الليلهم براهم والله صحي هسه ونستنا في الكي بورد دي مرجفاهم في قصورهم والله صحي علا باقيلك عمر الختير بعد رقيصو وحت شراهو في الفارغة ومقدودة ، باقيلك بقى فيهو حيلا يجريهو متل زولكم الفك البيرق من جرقاس ؟ دي ثورة جياع يا ود المدير بتخلي الناس كلها تنبح وتهوهو من الجوع والبطش والفقر وإن قبلوا عليهو ونبحوا علا يحفروا مطمورة هو والمعاهو ويندس متل الفأر ، والله صحي علا بننكتوا وبنمرقوا من ترابو وبنكيل قدييدمو ده تراب والله صحي
سلام ليك ولكل زوارك الحبايب
Post: #31 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-08-2012, 12:52 PM Parent: #30
Quote: حباب ناس السيالة عارف يا ود المدير انا زمان اليوم كلو في حلة الكريماب،، اصلو عندي معاهم لحمي، ان بقيت لعبة معاهم طاب اللمات، اكيد بكون اديتك لتخة، زميلي فيهو كان (هاشم محمد علي الزبير، والحاج، وحيدر احمد صديق) ارقد عافي
الله يعافيك يا جمال. آزول طاب السِيّجة دا امانة ما لعبناهو لِعِب فوق البحر. والله صحي. مرّة كتبت بوست بتاع الشايقي اللآقاني في القطر. أها زي الساعة 4 صباحاً تلفوني ضرب، رديت. الزول بعد سلّم علي قال لي أنا من شُفت كلمة القطر دي دخلت البوست، عاينت للإسم لقيت معاوية المدير، مشيت البروفايل لقيت التلفون إتصلت عليك. تصدق يا جمال الزول دا طلع هاشم أحمد الزبير بعد فرآق قارب العشرين سنة. الغريبة في ونستنا قلت ليهو أنا كنت في السودان، قال لي أنا زآتي كنت في السودان، وحضرت عقد بنت المرحوم أمين عبد المجيد. قلت ليهو أنا زآتي كنت في العقد وقابلت همزة محمود. قال لي أنا كنت مع همزة!!! تصدق أنا في العقد دا قابلت عمر البشير، وغازي صلآح الدين، وما لآقيت هاشم أحمد!!!
يا جماعة نحن انشدهنا في ناس السيالة ونسينا حلّة الرئيس، بارك الله في قرشو وبت الجنيد، أكان ما صاتوها كانت شيّطت، أصلآ مشيّطة. والله صحي...
Post: #32 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-08-2012, 01:54 PM Parent: #31
Quote:
طيب نحن نصيبنا وين من النقاط بتاعت القطارة دى؟؟؟
سلآمات يا قرشو.
لا تسألوا عن أشياء. والله صحي...
Post: #33 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: معاوية المدير Date: 07-09-2012, 00:14 AM Parent: #32
Quote: ود عمي المدير حبابك يابا سخينة شنو البضوقها الرئيس !!! إتلومت عاد يا خوي السخينة زاتها بتكون زعلت منك !! والله صحي النعمنو السخينة اللتنا نحن برانا والله صحي اللت الناس الغبش الما بخبرو لم القرش يأكلوها قريض ويفكوا بيها الريق لا ضجر لا ضيق المهم يبعدوا من حرام الحكام وسرقة النظام العام واكل السحت وحق الأيتام نبراااااااا منهم ومن جورهم وظلمهم ، ليهم الله وليهم يوم ، يمهل ولا يهمل وحجكمة الله يا معاوية يا خوي الخوف حقهم والجري الليلهم براهم والله صحي هسه ونستنا في الكي بورد دي مرجفاهم في قصورهم والله صحي علا باقيلك عمر الختير بعد رقيصو وحت شراهو في الفارغة ومقدودة ، باقيلك بقى فيهو حيلا يجريهو متل زولكم الفك البيرق من جرقاس ؟ دي ثورة جياع يا ود المدير بتخلي الناس كلها تنبح وتهوهو من الجوع والبطش والفقر وإن قبلوا عليهو ونبحوا علا يحفروا مطمورة هو والمعاهو ويندس متل الفأر ، والله صحي علا بننكتوا وبنمرقوا من ترابو وبنكيل قدييدمو ده تراب والله صحي
سلام ليك ولكل زوارك الحبايب
بت الجنيد، نعلك طيّبة والوليدآت؟؟؟
وحات الله يا بت الجنيد مشتهيلنا ونسة لكن ناس الحيكومة السجمانة ديل ما مديننا فرقة. الله يقطعن ويقطع يومهن. آن اوآن السقوط يا بت الجنيد وأهلنا قالوا، كل أوّل ليهو آخر. ثورة الجياع لا تعرف المتاريس، فليذهب البشير وملأه للجحيم. إنّ موعدهم صُبح الحرية، أليس الصبح بقريب ؟؟؟
التحايا ليك وللمعاك...
Post: #34 Title: Re: أبِشرِي يا حآجة، علي الطلآق كان إنتفضتو لحولكُم ما تقلبُوّها... Author: جمال المنصوري Date: 07-09-2012, 08:08 AM Parent: #33
Quote: الزول دا طلع هاشم أحمد الزبير
ود المدير صباحك ابيض ياخوي هاشم احمد الزبير ده يا هو زولنا داك سيد الاسم بتاع ناس (محمد علي الزبير) (الزول الكان زمان تخين ومليان) الرباطابي ولا زولا اخر، ان بقي هو سلم لي عليهو باقي انا طولت بالحيل منو.. اها اجيك صادي لي السخينة والسناسن ام ملح وشطة حمرا.. شفت يا ود المدير الاسلاميين ديل ناس ماكلة ومشربة كويس (والله صحي) تقول لي كيف ؟ اقول ليك زي كدي: في عالم السياسة الجد كل السياسيين في العالم بيسموا ملعب الحوار السياسي والدبلوماسي (طاولة الحوار) عللي جماعتنا ديل مسمنها (مائدة الحوار) والله صحي.. كدي اسمع لي كلامهم ونشرتهم. كان ما سمعهتها بي اضانك دي قول المنصوري كضاب...اها يا سيد عمك مائدة دي في اللغة العربية تعني التربيزة المليانة اكل سمح (والله صحي) اها الافصلها ليك كويس ، اهلنا ناس الخليج بينطقوا ال(ج) (ي) يقول ليك (مايد) يعني ماجد، اها تبقي مائدة يعني ماجدة، وانت ابو العارفين (يذكر المجد كلما ذكروا) المجد ده ما ممكن يكون سخينة، ولا سليقة، ولا عدس، ولا الفول، اكيد المجد ده من نوعية (المن والسلوي) اصلوا الحكايي كلها تأصيل في تأصيل.. في شأن شنو ؟ في شأن نحن ديل كان بقي شنو داك تلقي اكلنا من ( بقلها وقثائها وفومها وعدسها وبصلها ) فوق صينية صغيري كدي..اصلوا نحن (شذاذ افاق) ما بنصبر علي المن والسلوي ، وبعدين (مائدة ) دي عشان نأمن انهم مأصلين الكلمة حسب القرأن (والله صحي) مش في سورة كبيرة في القرأن اسمها سورة المائدة... شفت كيف، ده كله من عمك (احمد علي الأمام) اصلها ليهم علي السكين، ومن ديك وعييك، بقت موائد فتك في عافية
