Post: #1
Title: 1983م رحلتي للفاشر أبو زكريا ... ذكرياااااااات جميلة
Author: خال فاطمة
Date: 06-12-2012, 02:38 PM
الذكريات صادقة ونبيلة مهما تجافينا بنقول حليلهااااا
الاجازة المدرسية ... ( الصف الأول ثانوي ) والعمر 17 سنة (عمر الزهور عمر الهنا)
قلت يا ولد ... أحسن شي تمشي تزور أختك في الفاشر .. ( أم فاطمة )
قلت لجدي وأبوي (عليهم رحمة الله ويجعل الجنة مثواهم) ... مفكر اقضي الأجازي دي في الفاشر بزيارة أختي
قالوا لي كويس .. تشوف الغرب ..
بس أبوي قال لي بوصيك ما تأكل لحم الصيد ... لانو جديد عليك ...
المهم كلمت عمي يعمل لي تصريح (عمي مراجع في الجزيرة بورد) ...
والتصريح ... دا ... شي متعارف عليه بين هئية سكك السودان .. والقطاع الحكومي ..
بخفض ليك التذكرة ... يعني تدفع ربع المبلغ ...
المهم ... عملت كل التجهيزات للسفر ... والوالده (الله يرحمها ويغفر لها ويجعل الجنة مثواها) ...
عملت كل الزواده ... الكعك والخبيز ... بالكراتين ... عشان ما امشي لأختي يدي فاضيات ..
وطبعاً يا أخونا دي .. أول مره أركب فيها القطر ... وأول مره اعدي ود مدني ...
المهم يوم الاثنين .. ركبت التاكسي من المسلمية .. ومشيت الحصاحيصا ... عشان أركب القطر منها ..
وفي التاكسي قابلت واحد بلدياتنا ... وزول سفر كتير للغرب ... المهم سألني ماشي وين قلت ليو ..
ماشي نيالا بالقطر ... قال لي .. شوف خلي اخلاقك في نخرتك وخليك قطيم في القطر ...
لانو الزول المسكين حقو بروح في القطر ... المهم سمعتا كلامو ...
المهم وصلنا الحصاحيصا .. ونزلت مع صحبانا ... واتغديت معاهم ..
لانو القطر بتحرك الساعة 3 ظهرا وطبعا الوالد الله يديو العافية ...
كان موصي لي وكيل بريد الحصاحيصا( بلديتنا من المسلمية ) .. عشان يكلم لي ناظر المحطة ...
المهم عمنا الوكيل كلم ... ناظر المحطة ... والراجل ماقصر ... بالذات كانت في زحمة
شديدة لانو في الاسبوع في رحلتين لنيالا ... والظاهر رحلة الخميس اتلغت لعطل في القطار ...
الساعة 3 ظ ... ركبت القطر .. في القمرة المجاوره لمكتب الكماسرة .. والسواقيين ......
وتحرك القطر من محطة الحصاحيصا ..
نوااااااااااااااااااااصل ...
_________________
العيون لو شافت تاني ما بتنسا
والقلوب لو حبت تاني ما بتقسا
---
لمن يفارق زول عيون غاليات عليهو كتير خلاص وبحبهاالعيون لو شافت تاني ما بتنسا
|
Post: #2
Title: Re: 1983م رحلتي للفاشر أبو زكريا ... ذكرياااااااات جميلة
Author: حافظ انقابو
Date: 06-12-2012, 02:50 PM
Parent: #1
| Quote: الاجازة المدرسية ... ( الصف الأول ثانوي ) والعمر 17 سنة (عمر الزهور عمر الهنا) |
خال فاطنة
انت زول ضـــــرس
اسمح لي القول ليك يا عم او يا خال
المهم تختار واحدة
صراحة التاريخ دا اكبر من اخواني الاتنين الاكبر مني
__________
واصل
وادينا صورة للفاشر ابو زردية
في الزمن الما عشناه .. لنقارن
تحياتي واحترامي الاكيد
|
Post: #3
Title: Re: 1983م رحلتي للفاشر أبو زكريا ... ذكرياااااااات جميلة
Author: أنور أدم
Date: 06-12-2012, 03:08 PM
Parent: #2
يا سلام عليك ... ده البوست ولا بلاش بالله يا تجيب ليك كم صورة كده عشان تخلي الواحد يتذكر
1. قهوة البنابر
2. سوق ام دفسوا
3. حجر قدو
4. البحيرة
..................
يا حافظ انقابو
اسمها ابوزكريا!!!!!!!!!!!!!!!! ابوزردية دي لمن تكون مسخن و كده
|
Post: #7
Title: Re: 1983م رحلتي للفاشر أبو زكريا ... ذكرياااااااات جميلة
Author: خال فاطمة
Date: 06-13-2012, 02:53 PM
Parent: #3
الحبيب أنور ادم سلام
ياخ ذكرتنا .. ايااااااااام يا زمان
|
Post: #4
Title: Re: 1983م رحلتي للفاشر أبو زكريا ... ذكرياااااااات جميلة
Author: خال فاطمة
Date: 06-12-2012, 04:23 PM
Parent: #2
Quote:
اسمح لي القول ليك يا عم او يا خال
|
يا زول انداح على كيفك هسي العبد لله ماشي علي مشروع جدو ( مفكر قريب إن شاء الله اعرس لولدي )
كدي سطح معنا في القطر دا.
|
Post: #5
Title: Re: 1983م رحلتي للفاشر أبو زكريا ... ذكرياااااااات جميلة
Author: معتصم احمد صالح
Date: 06-12-2012, 04:53 PM
Parent: #1
الاخ خال فاطمةاو خال فاطنة كما هو الحال في ابوزكريا...
ما أروع هذا البوست وما أجمل زكرياتك،، انا اول شئ انبسطت من الكلمات الحنينة التي زيلت به بوستك(العيون لو شافت تاني ما بتنسا
والقلوب لو حبت تاني ما بتقسا--- لمن يفارق زول عيون غاليات عليهو كتير خلاص وبحبهاالعيون لو شافت تاني ما بتنسا) وثاني شئ مضي عليّ عقد ونيف من الزمان أن ازور الفاشر، ولذلك سرحت بخيالي بعيدا أتزكر احداث لا يمكن نسيها، وأنا على فكرة درست في الفاشر الثانوية ، ولأن العيون لو شافت تاني ما بتنسى ، يمر بخاطري هذه اللحظات الفاشر أبو زكريا..
طبعا يوم الخميس بالنسبة لطلاب الفاشر الثانوية أهم يوم في الدنيا، ولو زرت الفاشر الثانوية يوم الخميس الظهر لرأيتها قد لبست ثوب شديد البياض، وهذا طبعا لزوم الغسيل استعداد للذهاب الى (البلد) والبلد مصطلح يستخدمه طلاب الفاشر الثانوية كناية لمدينة الفاشر حيث ان المدرسة تبعد بضعة كيلومترات عن المدينة، ويطلق طلاب دارفور الثانوية لطلاب الفاشر بنين لقب ( القوَّازة) اي ابناء القوز او الريف..
ونواصل معاك ..بعد ما تصل تندلتي وقبل ما تغادر للرهد اب دكنة
مودتي..
|
Post: #6
Title: Re: 1983م رحلتي للفاشر أبو زكريا ... ذكرياااااااات جميلة
Author: خال فاطمة
Date: 06-12-2012, 08:00 PM
Parent: #5
كنا ... داخل القمرة .. 11 شخص ... والقمرة تتكون من 4 سراير زي ...
سراير الداخلية ... كل اثنين فوق بعض ... يعني القمرة .. معموله لعدد 4 أشخاص ..
المهم ... كان معنا عم عثمان (عثمان دا في عمري ... وبقا صاحبي) ...
عم عثمان عشان مريض .. وعامل عملية (شايل اللوز) .. الجماعة قالوا ...
يشيل السرير الفوق ... باقي 3 سراير ... على طول ما كضبت ...
واتذكرت كلام بلدياتنا (خليك قطيم) .. طلعت السرير الفوق ... واحتليتو ...
وطلعت كتاب (الف ليلة ولية) كان معاي .. وبديت أقرأ فيو ... عملية تكسير للوقت ...
المهم خليت صاحبي عثمان يشاركني السرير .. وباقي السريرين ..فيهم ال 8 أشخاص ..
كل 4 في سرير طبعا مصنقرين .. وكلهم تجار .. بتاجروا بين الخرطوم وغرب السودان ...
ما عدا .. واحد ... من رجل الفولة في غرب السودان ... كان قادم من العراق ...
ديل الجماعة السفرهم الرئيس السابق نميري .. لمسانده نظام صدام في حربه مع ايران ...
واذكر اسمهو (جمعة) كان شخص معتز بلبسه العسكري .. والظاهر ما داير يغيرو ...
حتى يصل لبلده ويشوفوا أهل بلده بلبسه العسكري ... وأنا اقول لنفسي ديل ذنبهم شنو ..
يسافروا للعراق ويحاربوا لجانب صدام .. وفي النهاية يرجعوا بلس عسكري ... وحلة كتوش ...
طبعا أخونا جمعة اشترى حلة (كتوش) شايلها لاهلو ... طبعا حلة (الكتوش) دي حلة بتتعمل من ..
صب الفضه ... وهي حلة جيدة لعمل اللقمة (العصيدة) بتخليها تنجض بطريقة كويسة وما بتمسك ...
اللقمة في الحلة ... وايضاً بتسمى حلة (الزايعات) ..المهم الحلة دي نفعتنا في الميز الذي عملناهو .. في القمرة ...
نواااااااااااااااااااااصل .... إن شاء الله ...
_________________
العيون لو شافت تاني ما بتنسا
والقلوب لو حبت تاني ما بتقسا
---
لمن يفارق زول عيون غاليات عليهو كتير خلاص وبحبها
العيون لو رادوا ما بعرفوا يضاروا
الصـــــــــــــــــــبر بس.
|
Post: #8
Title: Re: 1983م رحلتي للفاشر أبو زكريا ... ذكرياااااااات جميلة
Author: سيف اليزل برعي البدوي
Date: 06-13-2012, 09:01 PM
Parent: #6
الرجل الحكاي والكتاب خال فاطمة
في شوق لكتاباتك من قصة البوكس بتاعك المرق في كسلا وانا اتاوق يمكن..
حمد لله علي السلامة ياخ
ويا ابوزكريا ياخي ما تقول لي
دارفور بعيدة علي
سيف
|
Post: #13
Title: Re: 1983م رحلتي للفاشر أبو زكريا ... ذكرياااااااات جميلة
Author: خال فاطمة
Date: 06-14-2012, 01:33 PM
Parent: #8
الغالي سيف اليزل برعي البدوي
يعني اتا متابعني من الشرق للغرب
اها خليك معاي وسطح معنا في قطر نيالا دا.
|
Post: #9
Title: Re: 1983م رحلتي للفاشر أبو زكريا ... ذكرياااااااات جميلة
Author: خال فاطمة
Date: 06-14-2012, 08:38 AM
Parent: #5
الحبيب معتصم أحمد صالح
خليك متابع كان طلعت من السكة بالله الكزني
|
Post: #10
Title: Re: 1983م رحلتي للفاشر أبو زكريا ... ذكرياااااااات جميلة
Author: أنور أدم
Date: 06-14-2012, 10:58 AM
Parent: #9
نرفع البوست قبل ان ياتي خريف بكري ( الارشفة) و يضيعو لينا
بالله عليك يا خال فاطنة
تمشي بطريق النص عشنان تمر بأهلنا في
1.0 جبرة الشيخ
2. مرورا بدار حامد و عبورا بداركبابيش للانجمامة في سودري ( so dry) و يا ريت لو اديتنا حكوة من حكاوي سجنها الشهير و بوسطتها الرائعة
3. و بعدين لما توصل ام بادر البس تقيل من برد دارحمر
4. و لما تحل بالنهود بالله عليك تنزل صورة الهجليج و ما تنسي تزور استراحتها
5. و لما تغادروا اتجاه ود بندة بالله ما تنسي تجيب صورة بابور الصهريج الانجليزي
6. و في الدم جمد احكي لينا قصتها
7. و لما تركبوا 17 قوز بالله ما تنسي جهد الانجليز في تنمية تلك المناطق النائية عن مركز السلطة و الجاه.
8. و في مرورك ايضا ما تنسي تشوف ناس الفولة و اللعيت و حتي تصل الي ام كدادة لترتوي من ما بئرها القاعر
9. و في الكومة ما تنسي الكسرة باللبن الرائب ، و بعد تعال لمناطق كبير و ادخل او زكريا من صباح و سلم لسكان حي المصانع ( جيدا جيتو حبابكم 10)
و كان عندك زمن امشي لكتم و تعال بالمنقة
|
Post: #11
Title: Re: 1983م رحلتي للفاشر أبو زكريا ... ذكرياااااااات جميلة
Author: على ميرغني
Date: 06-14-2012, 12:34 PM
Parent: #10
حكي جميل
للتأريخ ::::::
بل تصنع من القصدير والرملة .. يعني زهر بتاع قصدير
منتظرنك تواصل يا ابو فاطمة
|
Post: #12
Title: Re: 1983م رحلتي للفاشر أبو زكريا ... ذكرياااااااات جميلة
Author: خال فاطمة
Date: 06-14-2012, 01:23 PM
Parent: #10
الحبيب أنور
Quote: نرفع البوست قبل ان ياتي خريف بكري ( الارشفة) و يضيعو لينا
|
أخوك عامل حسابو شايل الصاجات للرملة ..
رميت حبل البوست في جراب بكري ما تخاف ما بارشيفو هههههههههههههه
ياخ انا زاتي مبسوط من البوست دا رجعني لزمن كيلو كبدة الآلبل بي (5) جنيهات
|
Post: #14
Title: Re: 1983م رحلتي للفاشر أبو زكريا ... ذكرياااااااات جميلة
Author: معتصم احمد صالح
Date: 06-15-2012, 03:56 PM
Parent: #12
الاخ خال فاطنة .. لم تخبرنا بعد تجاوزت الدلنج ولا باقي.. بعدين احنا منتظرين وصولك لنيالا ، لاننا في الحقيقة ناصبين ليك راكوبة في منواشي منتظرينك بالشواشي واللبن "البركِيب" واللبن البِركِيب لمن لا يعرفه هو اللبن في مرحلة "ما قبل عزل السمن وهي مرحلة تسبق اللبن "الروب" والروب هو مرحلة ما بعد عملية اسمها " الخد" او "الخِج" اي تحريك اللبن داخل "البُقسة" والبُقسة" نوع من "القرع" "Pumkin" واللبن البِركِيب بالكسرة" ام كأس" طعمه لا يقاوم والعجب بالعصيدة بدقيق الدخن المعروف بالدقيق الاحمر اي غير منزوع البشرة وغير محمص ودا موضوع آخر سنعود له لما يضل خال فاطنة الضعين..
راجعين ليكم بس شيلوا الصبر
مودتي..
|
Post: #15
Title: Re: 1983م رحلتي للفاشر أبو زكريا ... ذكرياااااااات جميلة
Author: معتصم احمد صالح
Date: 06-18-2012, 07:36 AM
Parent: #14
الاخ خال فاطنة،، القطر دا شكلو إتعطل في الطريق ،، او احتمال الموية شالت السكة حديد(القضيب)
بالله لو داير فزع كلمنا؟
أرقد عافي
|
Post: #16
Title: Re: 1983م رحلتي للفاشر أبو زكريا ... ذكرياااااااات جميلة
Author: معتصم احمد صالح
Date: 07-22-2012, 06:37 AM
Parent: #15
الاخ خال فاطنة.. سلامات
ياخي الحاصل شنو،، ما يكون إعتقلوك في الخجة الحاصلة دي بتهمة الذهاب الى الحركات المسلحة..
نسأل الله ان تكون بخير وعافية، ومنتظرينك بعصيدة ملاح المِرِسْ في الفطور والغداء قُوقُرْ باللبن البِرْكِيب والعشاء بالنيفا ..
ودا كله في اليوم الأول
|
Post: #17
Title: Re: 1983م رحلتي للفاشر أبو زكريا ... ذكرياااااااات جميلة
Author: معتصم احمد صالح
Date: 07-23-2012, 03:40 PM
Parent: #16
ليبقى عاليا حتى تعود
|
Post: #18
Title: Re: 1983م رحلتي للفاشر أبو زكريا ... ذكرياااااااات جميلة
Author: بكري عباس علي
Date: 09-13-2012, 10:04 PM
Parent: #17
خال فاطمة
تعال انحنا راجينك
|
|