ما عارف لكن انا حا اشاتر شوية ياخي اصلو ما عجـــبني غناء ناسي والاغنية دي تحديدة ما تنفع الا بي صوت مصطفى رحمه الله الاحساس مختلف شديد يا حبيب
Post: #16 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-03-2012, 01:47 PM Parent: #15
هارون لك التقدير هل انت حقا طربان لهذه البهدلة وبتساهم في نشرها الزولا دى لاحافظة النص ولافاهماهو ومابتبعرف حتى تنطقو ناهيك عن اللزمات الموسيقية والوقفات المصاحبة للحن العندها دلالاتها تكون نانسى فنانة غير مسؤلية لوكانت موافقة على ان تبث تلك البهدله لعم عبدالرحيم عبر الاذاعة المذكورة ... عم عبدالرحيم من الاعمال الخالدة والنادرة في تاريخ الغناء السودانى ومسيرة مصطفى ولايمكن تناولها بهذا الشكل الموشوه الغير مسؤل ....
Post: #17 Title: Re: بين عم عبد الرحيم ......ونانسي عجاج....حيكومات تغور( ابداع) Author: nabielo Date: 01-03-2012, 02:12 PM Parent: #16
الجميل هارون كل عام وانت بالف خير وكل عم عبدالرحيم وكمين بشر بالف خير وكل ملح الارض بخير وتحياتي لكل من مرة بهذا البوست النافذة للوطن الكبير المجرووووووووووووح في كل شبر
Post: #22 Title: Re: بين عم عبد الرحيم ......ونانسي عجاج....حيكومات تغور( ابداع) Author: singawi Date: 01-03-2012, 07:52 PM Parent: #19
الأخ هارون ورفاق النغم
السلطانة نانسي عجاج ... كتب اسمها اعلاه وصمت اكتر من تلت ساعة بفتش لمدخل لما اريد قوله طيب خليني ادخل من باب اهل التصوف وانقل قولهم : حسنات الابرار سيئات المقربين واتكئ على مقلوبه واقول سيئات المقربين حسنات الابرار بتأدب المريد مع شيخه اقول السلطانة لم توفق في اداء عم عبد الرحيم مقارنة بالراحل المقيم مصطفى سيد احمد لم توصل الإحساس والوجع الكامن في مفاصل الحروف والمعاني . لم تصل للعمق الكان بغوص فيهو مصطفىفي عم عبد الرحيم احتاج لغسل اذني من هذا الاداء بالعودة للسلطانة في شقي ومجنون او ولى المساء او حتى اندرية تحياتي
Post: #23 Title: Re: بين عم عبد الرحيم ......ونانسي عجاج....حيكومات تغور( ابداع) Author: nabielo Date: 01-03-2012, 11:13 PM Parent: #22
سلام يا بدر الدين
Quote: الزولا دى لاحافظة النص ولافاهماهو ومابتبعرف حتى تنطقو
في تقديري انو اي نقد ما بكون مبني علي فكره هو نقد انطباعي و هدام ما عارف كيف عرفت انو هي ما حافظه النص وما فاهماهو ؟؟ هل دي قرايه لي دواخل الناس ولا بنيت كلامك علي شنو؟
نانسي قدمت الاغنيه بي طريقه متميزة في تقدير ناس كتار ومن الطبيعي انو طريقتها ما تعجب كل الناس لانو المساله مسالة اختلاف اذواق في المقام الاول
وفي تقديري انو من المفترض التقيم يكون بعيد عن التعصب والقدسيه لي مصطفي كشخص وكتجربه ولو اتعاملنا مع التجارب الابداعيه بالطريقه دي ما كنا سمعنا غنا حقيبه ولا كنا سمعنا غنا تراث
Quote: الاذاعة المذكورة ...
اسمها اذاعة كدنتكار
تحياتي هارون و شكرا علي هذا الابداع
Post: #27 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-04-2012, 06:22 PM Parent: #23
الاخ نبيل لك التقدير
Quote: ما عارف كيف عرفت انو هي ما حافظه النص وما فاهماهو ؟؟ هل دي قرايه لي دواخل الناس ولا بنيت كلامك علي شنو؟
ياسيدى عم عبدالرحيم عمل ملحمى درامى كبير وصعب وقد سكب فيه مصطفى روحه تجربته في التلحين والتطريب واستخدم فيه كل مساحات موهبته الصوتية لذا تناوله يحتاج لملكات صوتية لا اخالها متوفر لدى نانسى عجاج ناهيك عن استعجالها وعدم معايشتها للنص وهى ماكانت بتغى في النص بقدر ماكانت بتسمع فيه وحتى التسميع غلط شابه العديد من الاخطاء اناهيك عن الاجزاء الفطتها و الجزء الاخير المبتور من النص وهذا في تقديرى تشويه اكثر منه تناول لتجربة متاحة لكل الناس ودونك النص وقارن وبجيك برايط الاغنية بصوت مصطفي وبالمناسبة دى المرة التانية البتتناول فيها ناسى عمل لمصطفى بشكل متعجل ومشوه من قبل كانت لمحتك في حفل هنا بالدوحة .....
فتّاح يا عليم رزّاق يا كريم صلى على عجل همهم همهمة حصّن للعباد وهوزز سبحتو دنقر للتراب هم فوق هم هما صنقع لى السما وكان فى الجو فى غيم وكم نجمات بُعاد وكان الدنيا صيف لا قالتلوا كيف كيف أصبحت .كيف لا لمسة وداد لا لمسة حنان لا رمشة طِريف من قلباً وفى زى أيام زمان أيام الدِفِى كانت ماها فِى كانت فى المراح شدَّتلو الحمار تحلب الغنم لى شاى الصباح والطير ما نضم ما رسـّل نغم
عم عبدالرحيم إتوكـّل نزل فى المُشرَع لِقَى زُملان الشقا الجا من الجريف الجا من الجبل علْ الناس بخير صبّح هاظرُمْ نقْنقْ ناقَرُمْ غاظوهو نعَل عم عبدالرحيم ما بخَبِر زعل كل الناس هنا ما بتخبِر زعل تزعل من منو تزعل فوق شنو كل الناس الناس هِنا كل الناس صِحَابْ كل الناس أهَل والماهُم قُرَاب قرّبـُمْ العمل
الطاق اليَطُقْ عشتْ أبوالزَمَل با الحال العليك بالفال بالأمل عم عبدالرحيم كُتْ فلاح فى يوم فى إيدك تنوم على كيفك تقوم لا دفتر حضور لا حصة فطور تزرع بالقمر تقرع بى النجوم لكن الزمن دوّار آ بِدُوم
عم عبدالرحيم ماشى على الشغل فى البال القديم إنعارض عار تكل تنشايح جِراح يا كيف الغُسُل الدِنيِا أم صلاح تبدا من التُكُل من حِجـّة صباح فى حق المُلاح في اللبس الجديد في القسط القديم وبيناتم عشم في الفرع البعيد أمونة الصباح قالتو النعال والطرقى إنهرن شيلن يا الحبيب غشهن النقلتى والترزى القريب بس يا ام الحسن طقهن آبيزيد طفهن آبفيد وانطفن زمن وان طق الزمن لازمك توب جديد وبى اية تمن غصبا للظروف والحال الحرن عشان يا ام الرحوم ماتنكسفى يوم لوجاراتنا جن مارقات لي صفاح او بيريك نجاح ده الواجب اذن وايه الدنيا غير لمة ناس في خير او ساعة حزن عبد الرحيم يا حُر ماكا حُر يا ريت التمر ياريت لو يشيل كلِّ تَلاتْ أشـُرْ ولاّ أيام زمان كانت ما تمُر كان ماجاك هوان ما لاقاكى ضـُر كان لا ضقتى ضيق لاانغرغر صبر ولا شابيت غريق ولا طلوحْ فقُر كان ماكان .كان أكسيكى دُر حيكومات تجى وحيكومات تغور تحكم بالحِجِى با لدجل الكِجُور ويوم بإسم النبى تحكمك القبور ومرة العسكرى كسار الجبور تعرف ياصبى مرة تلف تدور ولا تقول برى او تحرق بخور هِم يا الفنجرى يا الجرف الصبور كل السقتو ما ت باقى على التِمور وأرضك راقدِى بور لا تيراب وصل لا بابور يدور والماهية أُفْ عيشة هاك وكُف فى هذا الزمن تـُف يادنيا تـُف يا العَبِد الشقى ما أتعوّدْ شكى لكن الكفاف فوقك منتكى السوق فيك يسوق حالك ما بتسـُر إِلا كمان فى ناس فايتاك بى الصبُر ساكنين با لإيجار لا طين لا تمُر وواحدين بالإيجار ما لاقين جُحُر سِلعـتمْ الضُراع والعرق اليخُر عمال المدن كلاّت الموانى الغُبُش التعانى بحّارة السُفُن حشّاشة القصوب لقاطّة القطن الجالب الحبال الفِطن الفُرُن الشغلانتو نار والجو كيف سُخُن فرقا شتى بين ناسا عيشا دين مجرورة وتجر عيشُنْ كمّهو .وديشُن هان قَدُر وناساً حالا زين مصنع مصنعين طين فى طين ووين ما مرابا مُر بارد همها لا يعرق جبين لا وشاً يصُر عين والله عين كلها كمها وهمها وعزها هان قدُر فى الجنة أم نعيم فى الجنة أم قُصُر يا عبد الرحيم إلا ورا القبُر ويلكد فى الحمار لاتسرح كتر فتاح يا عليم وإن كان الفقر يا عبدالرحيم أشبه بالكُفُر
ونقرط لى الحمار نقريط الحمار لاتنسى النِعال الطِرقِى الخدار للِّبِس الجديد تصريح السفر للماشى الصّعيد ماشى الدّيش نَفَر والبال إشتغَل با لأبا ما يعِيد ... الحول ما أشتغل الغُبُن الشديد السابا ورحَل الضيق المحَل والفرج القريب الجا وما وصَل زى الحال ده يوم لا كان لا حصَل والبال إشتعل والبا إشتعل السكة الحديد يا عمو القَطَر يا عبدالرحيم قدامك قطر
وسال الدم مطر وطارت دمعتين وإنشايح وتر يا طاحن الخبر ما بين القضا ومَرْحاكة القدر الشِّهدوا الدموم والدمع الهَدَر إيدُمْ فى التُراب والعين فى القطر عارفين الحصل عارفين فى حذر الخبر اليقين بوّخ وإنتشر أطفال القرى وعمال الحضَر أدوهو الطيور ودنوا البحر إنصاعت سحاب وإنْدافَقْ مطر عم عبد الرحيم فى الشارع عَصر لى تالا اليسار متفادى الكَجر دورية الكجر عربية الكجر جفّلت الحُمار .وطلوَح زى حجر وعم عبد الرحيم إتلافا القطر فتاح يا عليم سال الدم مطر جرتق بالتُراب منشور بى كتاب روشتّة .وجواب مفتاح أب غرااب أورنيقين سَهَر جنب لِبدة حُمار مقطوعين ضَهر عم عبد الرحيم ..يا كمِّين بشر صحِّى الموت سلام ما يغشاك شر ..
Post: #28 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-04-2012, 06:40 PM
Post: #62 Title: Re: بين عم عبد الرحيم ......ونانسي عجاج....حيكومات تغور( ابداع) Author: haroon diyab Date: 01-11-2012, 06:24 AM Parent: #23
سلامات يانبيلو
وسعيد بمرورك
وعبرت عن الكثيرين
بهذه المداخلة
Quote: في تقديري انو اي نقد ما بكون مبني علي فكره هو نقد انطباعي و هدام ما عارف كيف عرفت انو هي ما حافظه النص وما فاهماهو ؟؟ هل دي قرايه لي دواخل الناس ولا بنيت كلامك علي شنو؟
نانسي قدمت الاغنيه بي طريقه متميزة في تقدير ناس كتار ومن الطبيعي انو طريقتها ما تعجب كل الناس لانو المساله مسالة اختلاف اذواق في المقام الاول
وفي تقديري انو من المفترض التقيم يكون بعيد عن التعصب والقدسيه لي مصطفي كشخص وكتجربه ولو اتعاملنا مع التجارب الابداعيه بالطريقه دي ما كنا سمعنا غنا حقيبه ولا كنا سمعنا غنا تراث
وماعارف ليه انا حاسي اذا نانسي قدمتها كاملة
ستكون جميلة وتقنع الكثيرين
مودتي
Post: #24 Title: Re: بين عم عبد الرحيم ......ونانسي عجاج....حيكومات تغور( ابداع) Author: خالد العبيد Date: 01-03-2012, 11:19 PM Parent: #22
نانسي ابدعت واعطت عمنا عبدالرحيم بعدا سماويا لا حدود له
شكرا لهارون ونايف وشكر عميق لمبارك
Post: #25 Title: Re: بين عم عبد الرحيم ......ونانسي عجاج....حيكومات تغور( ابداع) Author: nadus2000 Date: 01-03-2012, 11:45 PM Parent: #24
أنا شخصيا بحمد لأي فنان أن يخوض مغامرة اختيار أغاني الراحل الجميل مصطفى، وتبقى المغامرة اكبر حين اختيار اغنية كعم عبدالرحيم، ولا مجال للمقارنة بين اي مغني وبين مصطفى ، ولهذا لا اخضع اي مقلد مهما كان مع مصطفى، ولا اتفق معك يا صديقي بدرالدين، فان اغنيات مصطفى وكل الفنانين الخالدين غير قابلة للبهدلة كل ما نستطيع ان نقوله ان نانسي قد نجحت في تقديم اغنية عم عبدالرحيم أم فشلت، فان فشل المقلد (نانسي) يكون بهدل نفسه وتظل اغنية عم عبدالرحيم وكل الأغنيات الخالدة في الحفظ والصون وغير قابلة للبهدلة..
Post: #26 Title: Re: بين عم عبد الرحيم ......ونانسي عجاج....حيكومات تغور( ابداع) Author: عماد شمت Date: 01-04-2012, 00:46 AM Parent: #25
كل عام وانت بالف خير ياعمو هارون
هي مجرد تجربة من الفنانه نانسي واعتقد
انها جريئه في اداءها لهذه الاغنية لصعوبتها
في التوصيل لوجدان المستمع (وليس صعوبة الاداء للاغنية) لذا نجد صوت الفنان
الراحل المقيم مصطفي فيه هنات واهات دون الكلمات فيها ايحات فيها صور تجسد
وتوصل وتصل الي المشاعر والاحاسيس وتلمس فينااوتار
وهذا الصوت نتج عن تمارين طويلة كان يقوم بها الاستاذ مصطفي
في مرة من المرات قالي انه بتمرن احيانا 12 ساعة
علي كل حال هي تجربة واكيد الصورة مابتبقي ذي الاصل..
رحم الله الفنان مصطفي سيداحمد وجعل مقامه الفردوس
التحيه للفنانه نانسي وبقول ليها الاغنيه دي عايزه معايشه طويله
حتي تخرج بصورة اجمل وايضا المؤثرات الصوتيه لها اثر كبير في اخراجها
Post: #67 Title: Re: بين عم عبد الرحيم ......ونانسي عجاج....حيكومات تغور( ابداع) Author: haroon diyab Date: 01-19-2012, 07:01 AM Parent: #26
عماد شمت ياقريبي
سلامات واشواق بالكوم
Quote: كل عام وانت بالف خير ياعمو هارون
هي مجرد تجربة من الفنانه نانسي واعتقد
انها جريئه في اداءها لهذه الاغنية لصعوبتها
في التوصيل لوجدان المستمع (وليس صعوبة الاداء للاغنية) لذا نجد صوت الفنان
الراحل المقيم مصطفي فيه هنات واهات دون الكلمات فيها ايحات فيها صور تجسد
وتوصل وتصل الي المشاعر والاحاسيس وتلمس فينااوتار
وهذا الصوت نتج عن تمارين طويلة كان يقوم بها الاستاذ مصطفي
في مرة من المرات قالي انه بتمرن احيانا 12 ساعة
علي كل حال هي تجربة واكيد الصورة مابتبقي ذي الاصل..
رحم الله الفنان مصطفي سيداحمد وجعل مقامه الفردوس
التحيه للفنانه نانسي وبقول ليها الاغنيه دي عايزه معايشه طويله
حتي تخرج بصورة اجمل وايضا المؤثرات الصوتيه لها اثر كبير في اخراجها
بصورة اجمل لك مني التحيه
والتحيه لاذعة كدنتكار الفتيه
شكرا ياالحضري
وكلام تمام التمام
للمرة الثانية تختار نانسي الصعب من
اغنيات مصطفي المرة الاولي في : لمحتك
والان مع : عم عبد الرحيم.... وهذا يدل
علي ثقتها التامة بامكانياتها ...وهذا يحمد لها
اما تقبل المتلقي للعمل بصوتها فهذا شأن الملتلقي
بالنسبة لي عاصرت الراحل طيلة مدة وجوده في الدوحة
واتفق معك في حرصه علي اخراج اعماله بصورة ترضيه
في المقام الاول .
بالنسبة للبي الاحمر :
قال راجع
Post: #30 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-04-2012, 08:48 PM Parent: #25
Quote: أنا شخصيا بحمد لأي فنان أن يخوض مغامرة اختيار أغاني الراحل الجميل مصطفى،
الصديق العزيز نادوس كيف انك وفي هذا الراى يتفق معك مصطفى نفسه اذكر مرة كنا معك في سيارتك وشغلت انت لنا اغنية يامطر عز الحريق والمفاجأة انها كانت بصوت الفان صديق سرحان ضحك مصطفى من الاعماق وقال العربى دا جرىء يغنى لمصطفى والوقت كان بداية التسعينات وقبضت (التتار) الكيزان كانت في عز بطشها وتنكيلها واذكر ان مصطفى علق بقوله ان اي فنان يغنى لفنان اخر هو بخدم الفنان الاخر اكثر ممايخدم نفسة وموهبته طبعا صديق لم يغنى المقطع البودى خلف القضبان (أي من الواسوق ابت تطلع من الافرول ابت تطلع من الاقلام ابت تطلع من المدفع طلع خاذوق خواذيق البلد زادت) تلك اغنية خفيفة وفيها كثير من التلقائية شعر وموسيقا ولحن ويمكن لاى فنان بشوية بروفات وقليل من المعايشة ان يؤاديها لكن مثلا اغنية زى لمحتك للشاعر الكتيابى نص من النصوص النادره في الغنا الرومانسى الحديث في السودان الناطق بالعربية ولحنها الموسيقار الراحل بدرالدين عجاج وغناها مصطفى وتربعت على وجدان كل محب للغناء الجميل ناهيك عن كونها جمعت بين الكتيابى وعجاج ومصطفى وكل منهم علم جات نانسى للدوحة مع فرقة موسيقية هى نفسها ماكانت مقتنعة بها وبعد بروفتين ادت هذه الاغنية على خشبة المسرح (بهدلتها شعر وموسقى واداء) لانها لم تعايشها لاشغر لالحن لاموسيقى واداء ولم نسكت وقلنا لنانسى من حقك انتغنى لمصطفى من الحان والدك وغيره بس ادى نفسك فرصة للمعايشة مصطفى حتى قبل رحيله ابايم كان بغنى اغانى الاخرين بس بعد معايشة وحب وتجويد
Quote: كل ما نستطيع ان نقوله ان نانسي قد نجحت في تقديم اغنية عم عبدالرحيم أم فشلت، فان فشل المقلد (نانسي) يكون بهدل نفسه وتظل اغنية عم عبدالرحيم وكل الأغنيات الخالدة في الحفظ والصون وغير قابلة للبهدلة..
في هذا انت قريب من راى حميد في اخر مكالمة بينى وبينه صباح اليوم حميد يرى ان اداء نانسى لعم عبدالرحيم بهذا الشكل (فطير ) وبفتكر ان الخاسر هو نانسى قلت لا الخاسر هو مصطفى ...ومشروعه تامل صاحب البوست جاب مقطع وماقال جابو من وين ومن ثم جا اخر وجاب مقطع مطول ونسبه للاذاعة المذكورة باعتبار ان النص كدا مكتمل المحيرنى انك انت بتفتكر دى هى عم عبدالرحيم ... بعيد عن كون نانسى ماجابية خبر هى بتغنى في شنو اخفقت او نجحت دا موضوع تانى
Post: #31 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-04-2012, 09:14 PM Parent: #30
Quote: اسمها اذاعة كدنتكار
برضو ما فاهم شىء امى بتقول ان والدها قاتل مع المهدى
Quote: حميد يرى ان اداء نانسى لعم عبدالرحيم بهذا الشكل (فطير ) وبفتكر ان الخاسر هو نانسى قلت لا الخاسر هو مصطفى ...ومشروعه
العزيز بدرالدين كيفك و ان شاء الله تمام ياخي حاسي كدة انك لو كنت وسعت كلامك ونقد لاداء نانسي كان ممكن يكون مفيد اكتر و حتي لو الناس مختلفة في قرايتك شخصيا ما عندي اي علاقة بالموسيقي او الغناء كعلم و انما كواحد من البشر ديل غناء نانسي دا اطربني حد السكر ! وزيما بقولوا :مرات ون شوت بحرك الراس و مرات الموضوع كلو ما بحرك ساكن ! و كلو توفيق من ربنا زي ما قال !
و يبدو لي الذائقة و الاذن الموسيقية بتتأثر ببيئة و ثقافة الزول و مرات حاجات شخصية جدا ! زي الشواكيش ! المهم شكلو تهذيب الذائقة الموسيقية عموما بجي بعوامل كتيرة منها النقد - داير اقول انو في النهاية المرجع شنو في تقييم الذائقة الموسيقية بتاعت الفرد ؟ ما عارف لكن بتخيل هو الفرد ذاتو يعني حسع كلام حميد دا ما ح يأثر في انطرابي بشعرة ! و علي العكس ممكن افتكر حميد ذاتو نص عمرو ضائع ! لووول و حتي لو نانسي كانت غنت الغنية دي في حضور الراحل المقيم مصطفي سيد احمد و قام هو قال مثلا نفس كلام حميد و انو هي خربت الغنية -برضو شكلو ما ح يأثر في انطرابي و ممكن اقول ليهو نفس كلامي القلتو لحميد !! اتخيل ! - طبعا كلامي دا كلام عنقالة ساي لكن بتكلم عن حق تقييم الذائقة الموسيقية بذكر مثلا في السنين الجامعة الاولي كنت بسمع لمصطفي عود و اوركسترا - لكن بعد اذني اتعودت علي موسيقي ود الامين بقيت ما قادر اسمع لمصطفي نهائي اوركسترا و بقيت شايفو خرمجة و مؤذية للسماع ! قصدي بتكلم عن كيف ممكن الذائقة او الاذن الموسيقية حتي علي مستوي الفرد ممكن تتغير من فترة لفترة - و في زول ممكن اذنو الموسيقية اتعودت و ادمنت غناء الحقيبة عموما او فنان معين و بعد فترة لعوامل كثيرة ممكن نفس الحاجات دي ما تطربوا نهائي
و في النهاية يظل سؤالي قائم و هو: حق تقييم الذائقة الموسيقية للفرد - دا طبعا غير النقد الفني و الادائي الممكن يتوجه لاي اداء زي كلامك عن نانسي و شايف انك ممكن تساهم في الاجابة علي السؤال دا - ----- عموما انا اعتبرت اداء نانسي فيميل فيرشن بتاع عم عبد الرحيم و خاصة في حتة( تف يا دنيا تف ) الحنينة و هواء بس و مافي سوائل مصحوبة عشان تطفي الغباين الـ في القلب !!
Quote: ياسيدى عم عبدالرحيم عمل ملحمى درامى كبير وصعب وقد سكب فيه مصطفى روحه تجربته في التلحين والتطريب واستخدم فيه كل مساحات موهبته الصوتية لذا تناوله يحتاج لملكات صوتية لا اخالها متوفر لدى نانسى عجاج ناهيك عن استعجالها وعدم معايشتها للنص وهى ماكانت بتغى في النص بقدر ماكانت بتسمع فيه وحتى التسميع غلط شابه العديد من الاخطاء اناهيك عن الاجزاء الفطتها و الجزء الاخير المبتور من النص وهذا في تقديرى تشويه اكثر منه تناول لتجربة متاحة لكل الناس ودونك النص وقارن وبجيك برايط الاغنية بصوت مصطفي وبالمناسبة دى المرة التانية البتتناول فيها ناسى عمل لمصطفى بشكل متعجل ومشوه من قبل كانت لمحتك في حفل هنا بالدوحة .....
عارف البي الاحمر ده المشكلة...!!!!
ياريت نتفق انو نسمع نانسي في اي لحن تاني
وبعدين نسمعه في احدي روائع مصطفي... يمكن المود يفرق...!!!
تحياتي
Post: #65 Title: Re: بين عم عبد الرحيم ......ونانسي عجاج....حيكومات تغور( ابداع) Author: haroon diyab Date: 01-12-2012, 06:03 AM Parent: #24
حبيبنا / خالد
وسلامات ياغالي
Quote: نانسي ابدعت واعطت عمنا عبدالرحيم بعدا سماويا لا حدود له
لانه عمنا عبد الرحيم ولانها نانسي التطريب
لذا وجب الابداع
Post: #57 Title: Re: بين عم عبد الرحيم ......ونانسي عجاج....حيكومات تغور( ابداع) Author: haroon diyab Date: 01-09-2012, 07:04 AM Parent: #22
سلامات ياسنجاوي
Quote: لم توصل الإحساس والوجع الكامن في مفاصل الحروف والمعاني . لم تصل للعمق الكان بغوص فيهو مصطفىفي عم عبد الرحيم احتاج لغسل اذني من هذا الاداء بالعودة للسلطانة في شقي ومجنون او ولى المساء
وهذا دليل علي ان السلطانة لديها مايطرب ويشجي
عليه اتوقع ان ياتي منها الجميل..... حاول الاستماع اكثر
من مرة فربما تقنعك واذا لم يكن فالنحمد لها اجر الاجتهاد .
تحياتي
Post: #53 Title: Re: بين عم عبد الرحيم ......ونانسي عجاج....حيكومات تغور( ابداع) Author: haroon diyab Date: 01-07-2012, 09:48 AM Parent: #19
الحبيب / باسط المكي
سلامات وعوافي
ويامن تجمل الاماكن لك ودي
بلا حدود.... وباذن يندمل جرح الوطن
تحاياي
Post: #37 Title: Re: بين عم عبد الرحيم ......ونانسي عجاج....حيكومات تغور( ابداع) Author: haroon diyab Date: 01-05-2012, 09:12 AM Parent: #16
بدر الدين يامدير
ماتحمر لي كده.....
جاييك برواااااااااااااااقة
Post: #45 Title: Re: بين عم عبد الرحيم ......ونانسي عجاج....حيكومات تغور( ابداع) Author: haroon diyab Date: 01-06-2012, 09:11 AM Parent: #16
صباح الخير يامدير
وجمعتك مباركة
وزي ماقلته ليك جاييك برواااااااااااااقة
Quote: هارون لك التقدير هل انت حقا طربان لهذه البهدلة وبتساهم في نشرها الزولا دى لاحافظة النص ولافاهماهو ومابتبعرف حتى تنطقو ناهيك عن اللزمات الموسيقية والوقفات المصاحبة للحن العندها دلالاتها تكون نانسى فنانة غير مسؤلية لوكانت موافقة على ان تبث تلك البهدله لعم عبدالرحيم عبر الاذاعة المذكورة ... عم عبدالرحيم من الاعمال الخالدة والنادرة في تاريخ الغناء السودانى ومسيرة مصطفى ولايمكن تناولها بهذا الشكل الموشوه الغير مسؤل ....
ولمعرفتي التامة بك وخصوصية وعمق العلاقة
التي ربطتك بالراحل المقيم مصطفي ... فقد توقعت هذه المداخلة ....
دعني اختلف معك قليلا مع الاتفاق التام علي قيمة عم عبد الرحيم
كملحمة.... وقيمة الراحل مصطفي كفنان صاحب مشروع لم يكتمل.....
من وجهة نظر شخصية بحتة وبحكم التذوق انا اري بان الفنانة نانسي عجاج
قد قدمت الاغنية بطريقتها الخاصة والمحببة لدي الكثيرين .... وهي لم تحاول
البتة مجاراة مصطفي في طريقة ادائه كما يفعل الكثيرون .
اعجبني اداء نانسي ... ربما كانت الصورة توضح اكثر لو ادتها كاملة وهذا ما اتمناهو
وشخصيا اعتقد بان نانسي من اجمل واعمق الاصوات النسائية التي ظهرت اخيرا .
علما بانني عندما استمع الي عم عبد الرحيم بصوت مصطفي اكون في قمة الطرب.
وتتذكر لما استمعنا ليها في ليلة وداع الاخ جعفر عباس ....!!!!
عموما....
احمد لك حصرك الدائم علي الحفاظ علي هذا الاثر الثمين اتفقنا معك او اختلفنا .
الاخ الكريم بدرالدين الامير كل عام وانت بالف خير عزيزي
كدنتكار اسم المنطقة التي قتل فيها ابناءونا في منطقة سد كجبار
دشنت لاسماع صوتنا صوت الحق ...وهي اذاعة جديده تقوم علي
العون الذاتي يقوم به شباب المنطقه الاجلاء ...
لك التحيه وكثير الاحترامات
Post: #36 Title: Re: بين عم عبد الرحيم ......ونانسي عجاج....حيكومات تغور( ابداع) Author: محمد عبد الله شريف Date: 01-05-2012, 08:54 AM Parent: #34
شكرآ عزيزي عماد شمت لتوصيل معني كدنتكار للاستاذ بدر الدين الامير , والذي اظنه لم يقصد تجاهل اذاعة كدنتكار الفتيه
وانما خوف تفكيك المسمي النوبي للاذاعه حتي لا يقع في حرج اللغه رغم ان مارنجان والتي هو منها كلمه نوبيه بحته وتعني باائع الذره او مكان بيع الذره
والله اعلم ,, يعني بدر الدين الامير دا واحد من اجداده كان من سلالة امراء النوبه ان لم يكن من الملوك ,,
ورغم انه لايفتي في مصطفي في حضرة بدر الدين الامير
والذي رايته في حياتي مرتين الاولي عند ما كان مرافقآ لجثمان الراحل المقيم مصطفي في المطار والثانيه في اربعينية الاستاذ في ود سلفاب ,,
وكنا نتابع عبره ما يفيد عن صحة الاستاذ اوان وجوده في قطر ,, نحن في جمعية اصدقاء مصطفي ,,
يعض الناس تعجبهم في نانسي بلاضافه لانها فتانه انها بتتفنن .. ا
واحمد الله اني ما سمعتها بتغني لمحتك .. لاني كنت حالملم قدرتي الباقيه وبعد داك اليحصل يحصل ,,, لكن اظن ان رشا شيخ الدين واخوتها نجحوا الي حد ما في تقديم لمحتك
دون تشويه ..
بمناسبة الذكري ال16 لرحيل الاستاذ دعونا نطلق حملة ايقاف نانسي من تناول أعمال مصطفي جماهيريا ما لم تقدم عمل ناضج يضيف لا يشوه
Post: #38 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-05-2012, 12:30 PM Parent: #36
Quote: و يبدو لي الذائقة و الاذن الموسيقية بتتأثر ببيئة و ثقافة الزول و مرات حاجات شخصية جدا ! زي الشواكيش ! المهم شكلو تهذيب الذائقة الموسيقية عموما بجي بعوامل كتيرة منها النقد -
هيثم طه ياخى لك الشكر والتقدير ياسيدى من الطبيعى بل والطبيعة بتقول ان الذوق بتنمى ... تتذكر حكاية الشاعر القال للخليفة : انت كالتيس في قرع الخطوب ... وحيتن نقل من تلك البئة قال : عيون المها بين الرصافة والجسر ...... وهل تعلم ياسيدى ان مصطفى قرا في معهد الموسيقى والمسرح تذوق وكل الطالبنو من نناسى وغيرها ان يتريسو ويتذوقو على مهل وبعد داك يعبرو عن نفسهم في علا قتها بذالك الاثر الفنى لمصطفى او غيره ......
Post: #39 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-05-2012, 12:46 PM Parent: #38
Quote: الاخ الكريم بدرالدين الامير كل عام وانت بالف خير عزيزي
كدنتكار اسم المنطقة التي قتل فيها ابناءونا في منطقة سد كجبار
دشنت لاسماع صوتنا صوت الحق ...وهي اذاعة جديده تقوم علي
العون الذاتي يقوم به شباب المنطقه الاجلاء ...
لك التحيه وكثير الاحترامات
عماد شمت اجزل لك الشكر واكتر لقد علمتنى ما اجهل .... هل تصدق انى صديق مقرب ولعشرات السنين من المهموم بالتراث النوبى والمترجم لنوادره ناهيك عن تاصيله للحرف النوبى صديقى العزيز المهندس والباحث في التراث النوبى الشفيع الجزولى سعيد وانا المقرب منه ومن ابحاثة ومشاريعه وكان معى قبل اسبوع وتناقشنا في تلك التفاصيل لكنه لم يذكر لى ان هناك محطة اذاعة نوبية اناهيك عن اسمها ودلالاته ... ياخى دى خطوة عملية متقدمة والشكر والتقدير على القائمين على امرها ياريت تنشر لنا تردداتها كي نسمعها وندلو بدلونا كمستمعين .....
Post: #40 Title: Re: بين عم عبد الرحيم ......ونانسي عجاج....حيكومات تغور( ابداع) Author: محمد عبد الله شريف Date: 01-05-2012, 04:00 PM Parent: #39
بدر الدين الامير اسف جدا كنت قايلك من مارنجان ليه ما عارف التحيه لاربجي وناسها عبرك
Post: #41 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-05-2012, 04:10 PM Parent: #40
Quote: بدر الدين الامير اسف جدا كنت قايلك من مارنجان ليه ما عارف التحيه لاربجي وناسها عبرك
ياود الشريف تحياتى ياخ
وحاتك عرفت الاشارة واحترت وقلت ياربى دا يكون ود الشريف صديق والدى الكان معانا هنا في قطر ياسيدى مرنجان لى فيها خالات وخيلان ومعة ناهيك عن ابناهم لكن تعرف صديقنا الجزولى سعيد بقول ان كل الجزيرة قبل خمسمئة سنة كانت بترطن اى بتتحدث اللغة النوبية .....
Post: #42 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-05-2012, 04:23 PM Parent: #41
Quote: ماتحمر لي كده.....
جاييك برواااااااااااااااقة
هارون تجيك الكشة انا مابحمر ليك انا داير اخنقك دا انت الكنت عضو لجنة منظمة لاخر حفل لمصطفى
Post: #43 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-05-2012, 04:32 PM Parent: #42
Quote: واحمد الله اني ما سمعتها بتغني لمحتك .. لاني كنت حالملم قدرتي
Post: #44 Title: Re: بين عم عبد الرحيم ......ونانسي عجاج....حيكومات تغور( ابداع) Author: محمد عبد الله شريف Date: 01-06-2012, 07:18 AM Parent: #43
Quote: في تقديرى حين تجرب انت فنان وكل الفنون يامهندس كانت فى البدء تجربة مرت بمراحل الاناوالانت والنحن لكن ان ترتجل ماهو مختزن في الذكرة الجمالية للأخرين عليك ان تكون اكثر حذرا
thankyou
Post: #47 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-06-2012, 09:56 AM Parent: #44
Quote: من وجهة نظر شخصية بحتة وبحكم التذوق انا اري بان الفنانة نانسي عجاج
قد قدمت الاغنية بطريقتها الخاصة والمحببة لدي الكثيرين .... وهي لم تحاول
البتة مجاراة مصطفي في طريقة ادائه كما يفعل الكثيرون .
اعجبني اداء نانسي ... ربما كانت الصورة توضح اكثر لو ادتها كاملة وهذا ما اتمناهو
هارون وعلى قول اهلنا المصريين (دا إسمو كلام) انت لفحت جزء من ملحمة عم عبدالرحيم وجيت قلت دى عم عبدالرحيم بصوت نانسى وفتحت هذا البوست ولم تتريس حتى لعترف هل هذه ملحمة عم عبد الرحيم ام جزء منها وجا شخص تانى وقال دى عم عبدالرحيم كما بثتها الاذاعة المذكورة وبرضو كان النص مبتور قد اعذر الاذاعة والقائمين على امرها انهم لم يسعمو عم عبدالرحيم من قبل ان تؤاديها نانسى لكن تجى انت وبعدك نادوس وتشهدو وتطربو لهذه البهدلة كم انا حزين لهذا
Post: #46 Title: Re: بين عم عبد الرحيم ......ونانسي عجاج....حيكومات تغور( ابداع) Author: عبد الخالق امن الله Date: 01-06-2012, 09:21 AM Parent: #42
اداء نانسي للاغنية اطرب الكثيرين ومن الطبيعي ان لا يجب البعض
المشكلة قي انه في ناس مفتكرين نفسهم هم حراس اغاني مصطفي سيد احمد لان مصطفي قضي شطرا من عمره بينهم!!! لامثالهم اقول مصطفي ده زي ما كان معاكم كان صديق لملايين السودانيين فلا تحاولوا ان تحتكروا اعماله وتبقوا انتو بس التقولو لا ونعم,,,فلا يغني اغاني مصطفي وعلان لا!! يا ناس فوقو مصطفي برضو غني لفنانين وكان عندو الكويس والبطال
او ورونا انه مصطفي كاتب وصية ليكم عشان ما نتكلم تاني
Post: #48 Title: Re: بين عم عبد الرحيم ......ونانسي عجاج....حيكومات تغور( ابداع) Author: nadus2000 Date: 01-06-2012, 01:33 PM Parent: #46
سلامات صديقي العزيز البدر
انا لم يتبادر لحظة الى ذهني ان نانسي قد غنت الاغنية كاملة، وقد سبق ان اوردت علاقتي بهذه الاغنية، وسبق ان ذكر الراحل كيف وصله هذا النص الملحمي كما سميته انت، وهي تسمية اتفق معك فيها وانا على يقين بذاكرتك الدشليون كيلوبايت دي، فالنص يا صديقي سجله حميد لاول مرة وهو. طازج من الورقة التي كتبها عليه في بيت العزابة باركويت، وانا نسخته وفرغته بقصد الاحتفاظ به، وفي نفس العصرية ذهبنا برفقة الصديق زكي منصور، وأي ونسة بين زكي ومصطفى فلابد ان يكون حميد ثالثهما، فسأله يا زكي ان كان قد سمع نصه الجديد عم عبدالرحيم، فنفى مصطفى فاعطاه زكي النص المكتوب بخط يدي، وكان في ظني وظن صديقنا زكي، انه نص لا يمكن ان يغنى، بل لم يخطر ببالنا ان في مقدور اي فنان ولو كان مصطفى ان يتغنى به، رغم ايماننا بعبقرية الراحل الجميل، ولم تمضى على الامر سوى ايام، لنفاجأ بان مصطفى قد عملها، واستمعنا لفكرة اللحن من شريط، كتب عليه (فكرة عم عبدالرحيم) بنفس الطريقة الانت بتعرفها، ثم تحدث عن تصوره لإخراج العمل على يلعب البيانو دور اساسي، وبما انني جاهل تماماً بأبجديات الموسيقى وكنت مشغول بترقيد شعر جلدي كما ذكر احد الاخوان اعلاه...وانت عارف ذاكرتي التي تقف من النقيض، فانا لا احفظ الشعر، ولكن اعرف طول هذا النص، من الجهد الذي بذلته في التفريغ ايام المسجلات العتيقة ديك....
بالمناسبة يا بدر يبدو انك لم تلاحظ ان الاخ هارون قد ذكر من البداية انه إبداع ناقص، وانا فهمت النقص في انها لم تغني الاغنية بالكامل....وده ممكن يكون يكون بسبب زمن البرنامج، وممكن تكون سجلتها كاملة لكن الاذاعة بثتها ناقصة لاسباب تتعلق بها، وبرضو احتمال سجلتها ناقصة لاسباب تسويقية....
ذهبت استمع لاغنية لمحتك ولكن لم اجد الاغنية وعرفت من بعض المداخلات
بان الاجهزه الصوتيه (الساوندسستم) فيه مشكله ..ودي حقيقة الساوند سستم
هو روح الحفلة وهوالمكمل لاداء الفنان والموسيقي معا ..حتي لوكان الفنان
وردي او محمدالامين سيكون الاداء والغناء سئ بكل المقاييس ...
رجعت واستمعت للفنانه نانسي في بعض الاغاني بحق هي (فنانه) ولها صوت
خاص ذو تطريب وشجن عالي. فأذا كانت تملك غناء خاص بها فهي تكون في مصافي الفنانيين
والفنانات .وهذا شرط يحدد ان كان المغني فنان ام مؤدي لذا وضعت كلمة فنانه بين
قوسيين .لاننا في السودان نطلق علي كل من يغني بفنان وهذا غير صحيح.الفنان من يملك
حقه الخاص ..
علي كل حال هي كمااسلفت تجربه وكل شخص يتذوق بي احساسه
لكم جميعا كثير محبتي
Post: #51 Title: Re: بين عم عبد الرحيم ......ونانسي عجاج....حيكومات تغور( ابداع) Author: ثروت سوار الدهب Date: 01-07-2012, 05:50 AM Parent: #50
منعَم في النغم بطبيعتك يا هارون بس عيبك مريخابي
تشكر يا حبيب
Post: #52 Title: Re: بين عم عبد الرحيم ......ونانسي عجاج....حيكومات تغور( ابداع) Author: بدر الدين الأمير Date: 01-07-2012, 08:16 AM Parent: #51
Quote: رجعت واستمعت للفنانه نانسي في بعض الاغاني بحق هي (فنانه) ولها صوت
العزيز شمت لك التقدير ياسيدى لا احد ينكر على نانسى موهبتها تتسع وتضيق تلك الموهبة حسب ماتقدمه للجمهور وتفاعله مع ماتقدم هناك تجارب فنية كتيرة في وقتها حين قدمت وصفت بانها فاشلة ولفنانين ومؤلفين كبار على مستوى العالم ولان فيها مجهود وفيها صدق فنى بعد فترة نفس الجمهور الرافض لها اقبل عليها بكثير من الاعجاب والانبهار ودا ممكن تسميته بالتجربة السباقة او متقدمة حتى على التذوق في حينه اما الان وفي عصر الانفتاح المعرفى ... انت في كل ثانية من حياتك بتشوف جديد وتسمع جديد لذا ان المتلقى اضحى عندو وسائل تلقى لاحصر لها وماعاد محصور في محطة تلفزيونية بعينها او موجات هذه او تلك الاذاعة ولو عدنا لعم عبد الرحيم التى وزعت عبر الكاست وبطريقة شخصية تفتكر قدر ايه هم السمعوها بصوت مصطفى حتى وهى متاحة الان عبر شبكات التواصل الاجتماعى وبالمقابل قدر ايه هم السودانين البتعاملو مع الانتر نت ولو اخدنا في البال ان نسبة الذين يتعاملون مع الانتر نت في الوطن العربى من مجموع السكان يعادلو 19% وفي مجتمع ذراعى رعوى زى السودان بكونو كم .... ومصطفى الغنا لاكثر من ستين شاعر من السودان وخارجة ولديه اكثر اربعمائة اغنية رحل منذ 16 سنة لكنه كغيره من المجددين في شتى دروب المعرفة المتقنين المجودين الشوافين ظل موجود ومتقد رغم الغياب وحروب والتغيب .... يعنى نانسى في عم عبدالرحيم ومن اخطا النطق البتعكس المعنى من قمة الجمال لقمة القبح تقول (يالعبد الشقى) بفتح العين وتلك تعنى الشخص المسترق اي العب بالدارجية السودانية والاصل هى يالعبد الشقى بكسر الباء اى من عبادة اي ان الشخص بمارس في التسبيح وطلب المغفرة رغم ما هو فيه من ضنك العيش وتلك واحدة من امثلة عديدة تدل على انو نانسى لم تتعايش ولا معنية بذلك كثيرا لو اخدنا في الاعتار تشويهاها من قبل لاغنية لمحتك بنفس العجالة والاستعجال مع النص والموسيقى ولم تاخذ ذلك في الاعتبار ووالدها المسيقار المحلن الراحل لحن ايضا لمصطفى اغنية كيف انساك كلمات محمد مريخة ومصطفي وفي حوار مطول لى معه كان فخور جدا بتجربته اللحنية مع بدرالدين عجاج وقال عنها انها لم تشوبها اى شايبة كما يحدث بين اغلب الفنانين والملحنين نواصل ياحبيب لو احببت ....
Post: #54 Title: Re: بين عم عبد الرحيم ......ونانسي عجاج....حيكومات تغور( ابداع) Author: عبد الدائم سيد أحمد Date: 01-07-2012, 11:05 AM Parent: #52
الاخ هارون والاخوة المتداخلين
معايشة الفنان لاى اغنية يأديها تشكل جزء كبير من نجاحها .... كتير من الاغانى السودانية تحديدا" لما تسمعها تشعر كانها كتبت لهذا الفنان ان يؤديها دون غيره ..... وده سر نجاح الاغانى القديمة او ما نسميه ( الزمن الجميل ) . ....
لست هنا بصدد مقارنة اداء مصطفى او نانسى
ولكن عم عبدالرحيم اغنية غبشاء الملامح ليست بهذه النعومة اغنية تشم فيها ريحة الطين وحش التمر وعرق الترابلة و الغلابة المطحونين
اداء ناسى هنا ادانى احساسى انو عم عبدالرحيم قاعد ليهو فى مطعم بياكل سندوتش همبرغر ....
على نانسى ان تراجع حساباتها و نطقها للحروف وتحديدا" حكاية تشديد حرف ( الجيم ) عشان الصورة تطلح حلووووة .
Post: #55 Title: Re: بين عم عبد الرحيم ......ونانسي عجاج....حيكومات تغور( ابداع) Author: nabielo Date: 01-07-2012, 11:43 AM Parent: #52
Quote: .وده ممكن يكون يكون بسبب زمن البرنامج،
نعم اخي نادوس تم بث خمسة اغاني ضمن برنامج حواري اجراه معها الزميل عاطف عبدون ضمن برمجة خاصة بمناسبة عيد الاستقلال عبر اذاعة كدنتكار http://www.nubianradio.net/ و اثناء الحوار طلب منها عاطف ان تدندن لنا اغنية عزيزة عليها يعني الاغنية نانسي ما كانت جاهزة ليها ولا اسجلت في استديو
و بالاضافة لي كده نانسي اشارت الي انو الاغنية طويلة و سالت هل زمن البرنامج يسمح انها تغني كل الاغنية فاقترحنا لها ان تغني جزء من الاغنية و لم نكن ننوي رفع الاغنية علي اليوتيوب لان الاغنية ما كاملة و التسجيل ما بروفشنال ولكن احد الاخوة قام بتسجيل جزء من الاغنية من الاذاعة ورفعها علي اليوتيوب و هذا هو الجزء الذي رفعه الاخ هارون في بداية البوست فوصلتنا ايميلات من المستمعين تطلب رفع بقية الاغنية علي اليوتيوب و بجودة صوت افضل من التسجيل الاول فلبينا طلب المستمعين برفع التسجيل الثاني
اعتقد بكون في فرق كبير في الاداء لمن تكون في شكل دندنة اثناء حوار و بين اغنية تكون جاهز ليها و عملت ليها عشرات البروفات و يتم تسجيلها في استديو او في حفلة امام الجمهور
و النقد الموجه لاداء نانسي للاغنية مفروض يضع في الاعتبار كيفية و تحت اي ظرف تم تسجيل الاغنية
اعتقد النقد مفيد (بدون تجريح او شتم )النقد البناء (وليس الهدام )
يطور اي عمل فواصل في النقد حتي يتثني للفنانه نانسي
معرفة مكامن الخلل ,او نقد مااشير اليها من قبل المتداخليين الكرام..
وانا عرفت بانك من المقربيين للراحل المقيم مصطفي سيداحمد وانه جواك بكل احاسيسه المرهفه
وفنه الراقي وتعشقه لدرجة لا توصف كما يقول البعض اصبح كالهواء بالنسبة لك ..
انا احب مصطفي سيداحمد في اخلاقه اكتر من فنه ربنا يرحمه ويجعل مثواه الفردوس
معايشة الفنان لاى اغنية يأديها تشكل جزء كبير من نجاحها ....
عبدالدائم كلامك صحيح ميه في الميه واي عمل بدون معايشه ماحيكون سليم لاي حال من الاحوال
ان كان مسموعا او عمل جديد...زمان زمن الحقيبه الاغنيه كانت تخرج في نفس اليوم للجمهور
يسمعها الفنان من الشاعر بالنهار ويحفظها ويغنيها بالليل ..لكن الاغنيه الحديثه لابد ان
تجري بروفات تقيله وتكون هناك ورشه عمل ولربما ثلاثه شهور واحيانا سنة كاملة حتي تري النور
تسلم يا الامير وعندك الرابط من الاخ الكريم الدكتور نبيل
دمتم عافيه
Post: #58 Title: Re: بين عم عبد الرحيم ......ونانسي عجاج....حيكومات تغور( ابداع) Author: singawi Date: 01-09-2012, 08:45 AM Parent: #56
كتب هارون دياب
Quote: وهذا دليل علي ان السلطانة لديها مايطرب ويشجي
عليه اتوقع ان ياتي منها الجميل.....حاول الاستماع اكثر من مرة فربما تقنعك واذا لم يكن فالنحمد لها اجر الاجتهاد
يا هارون لااااااا ... قريتني غلط ياخي ...
ياخي أنا بقول ليك كتبت اسمها وصمت اكتر من تلت ساعة بتفتش لمدخل لما أريد قوله والمقصود لحبي المفرط لإبداع السلطانة ما قادر أقول تلت التلاتة كم وابدي رأي سالب فيها .. واستدلالي بالمقولة المقلوبة ( سيئات المقربين .. حسنات الأبرار ) بعني بيه وان الاداء دا من فنان عادي مقبول وحسن ولكن من فنان في قامة السلطانة يعتبر من سيئات المقربين ) تقولي شنو ، وتقولي منو .
وانا قاريك صاااااااااااااااااااااح وقصدت بي استمع اليها
مرة اخري ....( عم عبد الرحيم فقط) والاكيد اننا متفقين
في قمة وقامة نانسي عجاج .
المهم....
ياسليم الذوق تسلم
Post: #60 Title: Re: بين عم عبد الرحيم ......ونانسي عجاج....حيكومات تغور( ابداع) Author: MAHJOOP ALI Date: 01-09-2012, 07:31 PM Parent: #59
ياصفوه بتفق معاك في المريخ ونانسي عجاج الا لاكن في (عم عبدالرحيم) طلعت رشاشه عدددديل كده يااخي الغنيه دي بالذات مصطفي سيد احمد بيتخيلوا تربالي ينتمي وناطق رسمي لكل المسحوقين في المليون ميل مربع (سابقا) وبكل (لهجات ....لغات ) المليون ميل (سابقاً) رغم عثرات حميد في بيان (اهل الشمال) الا ان مصطفي ارتقي بالنص الي عوالم بعيدة عن جغرافية وتاريخ حميد الشخص والشاعر هل بمقدور المؤدي ان ان يسمؤ فوق خيلاء الشاعر ؟ مصطفي وحده بغير شريك ، بمقدوره ذلك بالاحساس الصادق والانتماء الذى لا يعرف المخاتله بمقدوره ان يكون مؤدي حزين وشاعر بكل المسحوقين في ماكان مليون مليون ميل وما تبقي منها ..... نعم الذوق نتاج عوامل بئية وطبقيه الا ان الاحساس بالحرف والمعني (كل وجعه تفرهد الاحساس جوايه) ماركه مسجله لخالد الذكر مصطفي سيد احمد
Post: #61 Title: Re: بين عم عبد الرحيم ......ونانسي عجاج....حيكومات تغور( ابداع) Author: haroon diyab Date: 01-10-2012, 06:14 AM Parent: #60
طرب .....
حتي عودة
مودتي
Post: #63 Title: Re: بين عم عبد الرحيم ......ونانسي عجاج....حيكومات تغور( ابداع) Author: singawi Date: 01-11-2012, 08:53 AM Parent: #61
العزيز هارون مشكووووور يا سيدي على التوضيح
اختلفنا مين يحب الثاني أكثر .. وإتفقنا إنِّك أكثر وأنا أكثر من عدد رملِ الصَّحاري .... و من المَطر أكثر وأكثر
