تدشين رواية (الكونج) لـ حمور زيادة , بمقر المركز , الاحد 26 ديسمبر .

الصالون الادبى

بمركز الخاتم عدلان للإستنارة والتنمية البشرية
يستضيف فعالية تدشين رواية الاديب حمور زيادة (الكونج) , وذلك يوم الاحد 26 ديسمبر 2010 فى السابعة والنصف مساءً .
يتحدث فى الأمسية الأستاذ نادر السمانى , وعدد من النقاد .
مقر المركز بالعمارات ش 57 , من جهة ش محمد نجيب , جوار السفارة التشادية .
مرحباً بالجميع .

الأحبة في مركز الخاتم عدلان..

كل الأشواق، والتقدير...
لجهودكم الكبيرة، في نشر الوعي، والإستنارة..

والله سعداء بالتدشين، ولاشك حمور كاتب ومبدع مميز، ومثابر، وغارق في معاناة البلاد، بكل تجالياتها، فألف مبروك للقارئي مقدما..
يظهر أني ما محظوظ، لأني سأحج للبلد يوم 27 ديسمبر، إن شاء الله، ولكن للقلب شئون في حضور مؤلف يسقي شريان الإبداع في بلادي..



عميق محبتي..
ولي قدام..

..

خالص التقدير والمودة
أ/ عبدالغنى
وليتك كنت معنا .
توصل البلد بالسلامة .

شكراً مركز الخاتم عدلان على تقليدي هذا الشرف ..
و الشكر للأصدقاء في الخرطوم الذين سعوا و نسقوا هذه الاحتفالية.
وددت أيضا أن اكون بينكم .. قاتل الله الغربة.
تحياتي يا عبد الغني و شكراً لكلماتك الجميلة.

Quote: ولاشك حمور كاتب ومبدع مميز، ومثابر، وغارق في معاناة البلاد، بكل تجالياتها، فألف مبروك للقارئي مقدما..

مع تمنياتي نجاح اليوم

والتحية لك الاديب المبدع حمور زيادة
ولكل المبدعين فى اى مكان .

كاتلنها لو ربك سهل.

بمناسبة انو نحن جايين وكدة هل الكلام ممكن ولا للنقاد والمختصين فقط عشان نلم خشمنا ده علينا؟؟

نسيت احي المركز
والتمنيات الطيبة للكونج ولحمور

شكرا مركز الخاتم

تحياتنا وليد عبداللطيف .

مبروك للاخ حمور صدور الرواية ..

حبابك عشرة قمر بوبا

Quote: بمناسبة انو نحن جايين وكدة هل الكلام ممكن ولا للنقاد والمختصين فقط عشان نلم خشمنا ده علينا؟؟

الكلام فى كل فعاليات المركز لمن يرغب فى الكلام .
فى انتظارك .

Quote: وددت أيضا أن اكون بينكم .. قاتل الله الغربة.

يا فنان
ياخى مصر دى بتسميها غربة ؟
كان تخنف كراعك وتجى مغربية وترجع تحصل العشا هناك




بالتوفيق

يا وليد ..
أي بلد تمرق الشارع ما تلقى عربات الأمجاد حايمة و تكسينا الهنتر الأصفر و سواقو العجوز أب جلابية و طاقية خدرتو غامقة يحكي ليك عن انو سايق ليو خمسة و تلتين سنة و كان شغال في النقل المكنيكي و استقال ايام نميري ..
أي بلد ما تلقى في شارعا الحافلات الروزا و الكمساري ببنطلون رمادي و قميص أبيض زرايرو مفتحه و خاتي خمسمية في أضانو و بيكورك عربي عربي عربي ..
أي بلد ما تلقى الناس واقفه قدام كشك الجرايد بيتناقشو في هدف المريخ ان تسلل وله صحيح و الهلالاب بيبخسو ليهم في اخر لاعب اشتروهو ..
أي بلد ما تلقى عسكري الحركة بيقدل في نص الضلط كأنو الحقيقة الوحيدة و باقي العربات حدث عابر ..
أي بلد ما تشوف في شوارعا بنات سمر جميلات كأنهم رشاقة معبأه لافين طرح خفيفه خجوله على رؤوسم و ماشات بدلال لا يخلو من جدية ..
أي بلد ما تسمع فيها عليك النبي و وحات سيدي الحسن و دي امة يرفعو ليها علم و يا فردة و عليك دينك وياخي ..
أي بلد ما فيها ده هي غربة.
غربة مهما كانت حنينة او أليفة أو مرحبة.
و الغربة ما مسافات جغرافية يا وليد.
الغربة وحشة جواك للتفاصيل.
لزقاقات ام درمان .. لصوت البابور عصراوية في البلد .. لبسمة بنية سميحة ملامحا تشتاق لكمرة عصام عبد الحفيظ .. لدوشة بتاع ورنش ماشي فوق راسك كشلو كشلو .. لريحة موية بلاعه غبشا بالصابون لما يكشحا شاب بتريننق أحمر و فنلة حمالات في العصر قدام الباب .. ريحة الحلو مر .. دخان خميس عند الجيران و كبرته ما بتراعي حدود شهادة البحث و حرمان المتلقي ..حر يخلي الدنيا صانة زي الرامية اضانة عايزة تسمع خبر .. نشرة ستة و نص الما يموت فيها زول تعرفو فتحسها كانت بايخة ساي ..
دي البلد و دي الغربة.
ما مسافةساعتين بالطيارة.
عرفت ليه بشكي يا وليد ؟

Quote: عرفت ليه بشكي يا وليد ؟

إنا لله ياخى
والله قومت نفسى عدييييل وأنا بقرأ فى مداخلتك دى ....
وأتاريك ممكون وصابر ....
ووالله العظيم بلدنا دى حلوة ....
بى ناسا وزقاقاتا وســخــانتا ودردرتا وشقاوتا وتعــبا وووو ....
وأى حاجة ....
لكن زى مابقولوا الناس ظروف ....
وإنشاء الكريم الليلة حاضرين ....
ومرة أخرى بالتوفيق يا حمور ومزيد من الإبداع

محمد حسن
تحيات .

الوليد الرشيد
لك الشكر .

حمور يا صديقنا الضليل

اتمنينا لو كنت معانا





حمور في أثناء الإحتفال بتدشين الرواية في القاهرة

يا سامي مالك عايز تفضحني بالسيجار الكوبي ده ياخ ؟
ده ما كان تدشين .. ده أول ما جايني الخبر انو الرواية وصلت من المطبعة و جريت من القهوة و معي الأصدقاء الصحفي حسام محفوظ و الصحفية رحاب لؤي و القاص أحمد سعيد الى دار ميريت للنشر.
و الصورة لي و انا اتصفح أول نسخة ( و امتعض من غلطاتي التي فاتت عليّ في الويرد فظهرت لي في المطبوع ) و أدخن السيجار الذي أهدوه لي بمناسبة الإصدار.


يا وليد السودان سمح بالحيل .. إلا كيزانكم ديل ما بيتعاشرو.



الاخوة في مركز الخاتم عدلان قمر بوبا ده ما تخلوهو ينضم كلو كلو. لو في طريقة أحموهو يخش زاتو.
يا قمر .. أبلغني أمين خالي بتوضيحات لم أكن أحتاجها و الله. الأمر مفهوم لي و معزتك و خضر أكبر من أن يضيعها حوار.

أين "شكراً لمن جعل ذلك ممكناً" التي ما انفكت
تتردد في هذا البورد بمناسبة و بدون مناسبة!

Quote: الكلام فى كل فعاليات المركز لمن يرغب فى الكلام .

هو في الحقيقة ما كلام بالمعني المعروف هم في الحقيقة نقطتين ناقاصات ...وديل ذاتهم عفيناهم...


بركاتك يا شيخ حمور...اهو ما حنقدر نمشي عندي طيارة قالوا نازلة ستة مساء لحد ما يجوا مارقين سبعة...لحدي مما يصلوا بيتهم ويصروا ويطلقوا علي الشاي بالزلابية الزمن بكون عدا وفات بكونوا وصلوا الرجل
أهو كانت فرصة الزول زي ما قال د.بلة يمثل أول سابقة في نقد الحروف..الزول يشيل قلم شيني ويمشي يعمل فيها باحث لغويات قديمة صدقني كنت بطلعك مستشرق نوبي ساكت

_
اتمنيت احضر التدشين يا حمور...انت عارف السودان...ممكن تكون ماشي تشتري بنطلون البرنامج يقلب يقولوا ليك في زول غرق

عجبني ليك يا قمر ..
اتمنى ان ينبه الأخ قصي مجدي سليم الذي سيستعرض الرواية كما علمت ان كلمة "كونج" تنطق في اللغة النوبية بالجيم المثلثة.
و اعدك ان اذكر هذه المعلومة أيضا في ندوة الرواية هنا في القاهرة الاربعاء القادم باذن الله.
و هي المعلومة التي لم تذكر في الرواية أولا لأني لم اكن أعرفها و ثانيا لا ار بعد ان عرفتها أن هناك داع لها في الرواية.
و قد يتضح لك سببي الثاني يا قمر ان سهل الله لك قراءة الرواية. رغم اني لا اتوقع ان تعجبك ما دمت ترى ان سيدنا الطيب فضح القرية السودانية و ان على من يكتب عن القرية ان يكتب عن فضائلها و امجادها و خيرها و طيبتها.

Quote: اتمنى ان ينبه الأخ قصي مجدي سليم الذي سيستعرض الرواية كما علمت ان كلمة "كونج" تنطق في اللغة النوبية بالجيم المثلثة.

علم يا سيدنا

Quote: رغم اني لا اتوقع ان تعجبك ما دمت ترى ان سيدنا الطيب فضح القرية السودانية و ان على من يكتب عن القرية ان يكتب عن فضائلها و امجادها و خيرها و طيبتها.

حمور...ما تحكها معاي شديد يرضي عليك...لو داير تمسكني بالجنبة وتدرشني أنا كلام الادب ما عندي ليه رقبة...ادرش والله المستعان...بنحمبك برضو.
روايات الطيب صالح تعجبني جدا وروايتك ايضا ستعجبني انشاء الله
أنا رأيي كمتلقي فقط لا يفيد في مسيرة بحجم شخص مثل سيدنا الطيب صالح كما يحلو لك ...أتذكر أنني سمعت أن بعض الناس الذين ينتمي اليهم الراحل الطيب صالح أيضا في الشمال امتعضوا من بعض الشخصيات في روايات الطيب صالح واعتقد (حسب ما سمعت يا حمور) انهم قدموا احتجاج مفاده انه يبالغ في تصوير سوء موجود أو غير موجود لست ادري.
هذا احساس طبيعي يجعل ساكن المنطقة الجغرافية قلقا لتصوير منطقته للآخر بطريقة لا تروقهم.

بالنسبة لإنك تري ان ليس للعنوان بعد هذا معني...اعتقد أن الجميع لم يختلف في المعني...فقط استغربت لرؤيتك الحالية عموما قد تكون لك قراءتك المقعنعة ونرجو ان نستمدها في وقتها.
عموما الرواية علي وصول

_
الاخ قصي...لو حصل اي تلخيص لمادة التدشين ممكن امر بالمركز اشيلها بكرة أو بعده كان في هارد او سوفت كوبي

سلام يا شباب

يا حمور أين يمكننا شراء نسخة من هذه الرواية في السودان؟!

تحياتي للجميع

مبروك للاستاذ حمور صدور روايته وعقبال ما تبقى زي الطيب صالح او زي جابرييل غارسيا ماركيز وتمنياتنا لك بعطاء ادبي ثر والى الامام.
سؤال بسيط كدا يا حمور! خالك امين سمع بالرواية والتكريم ديل؟ وماهي الاحتياطات التي اتختموها كاسرة لدي سماعه بهذه الاحتفالية؟!!!!

بيقدل في نص الضلط كأنو الحقيقة الوحيدة

أتمنى أن احضر تدشين الكتاب .. لعل مركز الخاتم عدلان يتذكر أن لى معه ( شجن) فى مثل هذا الاتجاه..!
تحياتى لأخي حمور .. أنا سعيد بانتصارك..

الكتابة فى هذا الزمن هي الانتصار ..