قالوا عن المرأة .. ( ربما هو بوست غير موفق )

قبل حوالي اسبوع تلقيت اتصالا هاتفيا من الصديقة اخلاص عمر الصحفية بجريدة الأخبار.
تكرمت عليّ بطلب رأيي كأديب كما ادعت هي في مقولة لتوماس مان الكاتب الأماني الشهير عن المرأة.
توماس مان هو أحد الكتاب المفضلين لشيخي نجيب محفوظ .. و هذه ميزة عندي لا تقدر بثمن.

قالت لي الصحفية اخلاص ان الاستاذ منصور خالد يحتفي دوما بمقولة لتوماس مان تقول :
الرجال هم الرجال .. لكن المرأة هي الانسان.

تخيل أن هذه الصديقة تظنني اديبا و تطلب رأيي في مقولة للاديب العالمي الحائز على نوبل توماس مان و يقدر هذه المقولة و يحتفي بها الاستاذ منصور خالد.
يمكنك أن تفهم ما شعرت أنا به في تلك اللحظة من اطراء و غرور.
و بعد أن استعذت بالله من الشيطان و شكرتها على حسن ظنها قلت كعادتي اشياء غريبة.
لقد ادعيت ان هذه العبارة بمفردها ربما لا تكون واضحة المدح للمرأة بل هي حمالة أوجه.
ثم تملصت من ذلك بمقولة للاستاذ العقاد أن الفلاسفة يجعلون اوجاعهم الشخصية مناهج للبشرية و احكاما عامة.
و ادعيت أن عددا كبيرا من الفلاسفة و المفكرين ( ان لم يكن اغلبهم ) كان له نظرة سيئة في المرأة و نطقوا و كتبوا كلمات رنانة في ذم المرأة من باب تجاربهم السيئة.
فمنهم من كان متزوجا من امرأة هي الجحيم بعينه ..
و منهم من كانت له ام تجعلك تكفر بالأمومة و النساء ..
و منهم من كان مثليا ..
لكن جميعهم لم يعتبروا ما حدث لهم مواقف خاصة بل اخذوا منها احكاما عامة كما يقول الاستاذ العقاد.

لم أر استطلاع اخلاص عمر هذا منشورا رغم انها ادعت انه نشر.
و هكذا فات عليّ أن افرح امي برؤية اسمي منشورا على صفحات الجرائد.
فأمي بلا شك ككل أم تحب أن تقرأ اسم ابنها منشورا و بعده كلام يوحي بالعمق و المعرفة.. و قد تكلمت عن شوبنهاور و العقاد و غيرهما.
للاسف ضاعت هذه الفرحة على امي. لكني اعدها بتعويضها يوما ما.

الاخ حمور زيادة
تحياتي
قال شكسبير
اين الكاتب الذي يرينا جمالا مثل الذي نراه في عين المراة

التفكير في كلمة توماس مان التي ذكرتها لي الاستاذة اخلاص و بعض العبارات المأثورة التي قلتها لها في اجابتي ( و التي بلا شك زينت التحقيق باعتباري انا صاحبها ) جعلتني افكر في موقف كثير من الفلاسفة و المفكرين عن المرأة.
فرغم اني ضعيف في علوم الجندر و مفاهيم الانثوية الا اني بحكم الاطلاع وقفت على اراء كثيرة سيئة في المرأة.
و تعجبت اني لم اطلع على نقد لهذه الاراء على حده.
فعلى حين وقفت كثيرا على نقد لايات قرانية و احاديث نبوية يظن منتقدها انها تهين المرأة و ذم لأمثال سودانية تحط من قدر المرأة الا اني لم اطلع على نقد خاص لكثير من كلمات الفلاسفة و المفكرين السيئة في حق المرأة.
بل كثيرا ما تجد لها التبريرات كما فعلت انا نفسي حين قلت ان الفيلسوف يمر بتجربة سيئة مع امرأة فيعمم الحكم.
هذا قول فيه شئ من الاعتذار عن رأي الفيلسوف السئ في المرأة.
هنا - في هذا البوست - احاول ان اخرج رؤوس بعض الفلاسفة و المفكرين للمقصلة النسوية.
سأورد اقوال و امثال لفلاسفة و شعوب اروربية مسيئة للمرأة.
هل احتاج ان اقول اني لا اوافق على هذه الأقوال و ادينها بشدة ؟
حسنا .. بوضوح انا لا اتفق مع كل ما سأنقله هنا.
و في تقديري هي اراء سيئة و لو تجاوزنا فيها فسنقول ان لها ظروفها الشخصية. لكن لا يصح اطلاقها على النساء عامة.

عليه :
فانا انقل هنا اقوال سيئة لا اتفق معها.
و اغلبها ليس منقولا من مصادره الأم بل نقلا عن اخرين عن القائل و بها ترجمة.
و سيسعدني ان استفيد من ردود المتداخلين على القائلين لا عليّ أنا.
كما ارجو افادتي بمدى صحة نسبة الاقوال الى اصحابها ممن لهم اطلاع على الأصول.


باختصار :
هذه الأقوال على مسئولية اصحابها.

الأخ عمر ..
تحياتي .
شكرا لافتتاحك البوست بمقولة في مدح المرأة لشكسبير.
لكن دعني اشاغب .
هل يصح أن نحتكر المرأة في الجمال الذي يبدو في عينيها ؟
اشك ان نوال السعداوي لن تحب كلمة شكسبير هذه.

قال أبقراط :

المرأة هي المرض


أبقراط هو أول من دون الطب الحديث و يشتهر بأنه أول من خلص الطب من الفلسفة و ظلمات السحر.
و قسمه الطبي الشهير يؤديه الاطباء في انحاء العالم مع بعض التعديلات .

قال سقراط :

المرأة مصدر كل شر


سقراط شيخ فلاسفة اثينا.
و هو صاحب الميتة الشجاعة المشهورة في التاريخ. و من تلامذته افلاطون شيخ ارسطو.

قال سيجموند فرويد :

إن السؤال الكبير الذي لم يُجب عنه بعد و الذي لم أقدر بعد على الإجابة عنه على الرغم من قضائي ثلاثين عاما في البحث في الروح النسوي هو :
ما الذي تريده المرأة ؟


فرويد عالم نمساوي صاحب مدرسة شهيرة في علم النفس و يعتبر مرجعا مهما في هذا العلم.

قال مونترلان :

المرأة هي الاشمئزاز و فقدان النطق و الجهالة العنيدة.


هنري دي مونترلان كاتب فرنسي وصف بانه عميق الكتابة و يكشف جوهر الاشياء بكلمات مختصره.
يقال انه احسن فهم الطبيعة البشرية في رواياته.

حمور يا حمور ..

السياق الذى وردت فيه كلمات الفلاسفة مهم ...
بل هو عصب التقييم ..













ــــــــــــ
ما تعمل لينا لاتقربوا الصلاة دى !! مش امكن
يضربوا لينا ناس الجريدة ؟ البلد دى مافيها ضمان ..
ازيك ياخ .. شكلو (موفق) ..

انا ضد الشاعر الذي يقول

لا تامن المراة زمانك كله وان حلفت يمينا تكذب

واحب قول الشاعر
وما التانيث لاسم الشمس عيبا ولا التذكير فخرا للهلال

وضد الذي يقول

لو ابتلع الشيطان امراة لتعسر في الهضم

واحب مقولة
المراة كالشعلة ان عرفت من اين تمسكها اضاءت لك الطريق وان اخطات في مسكها حرقت يديك.

وضد مقولة

المراة كانت بقت فاس ما بتكسر الراس


وسؤال هل صحيح مقولة
ان المراة اذا كانت على حبل المشنقة وطلب منها ان تتمنى لتمنت ان تصلح زينتها. وان المراة لا تستطيع الجلوس يوما كاملا بدون مراة.

قال برنارد شو :

المرأة تترقب الرجل .. لكن كما تترقب العنكبوت الذبابة .

جورج برنادرد شو .. الكاتب الايرلندي الشهير .
كان مؤمنا بنظرية التطور و الوصول الى الانسان السوبر مان.

قال توما الاكويني :

المرأة انسان ناقص التكوين و كائن عرضي .


توما الاكويني قسيس ايطالي . هو أحد معلمي الكنيسة الكاثوليكية. و له مدرسة فلسفية اثرت على الفكر الحديث سواء بالموافقة او الاعتراض.
و يعتبر فيلسوف الكنيسة الأعظم لذك سميت باسمه مؤسسات تعليمية عديدة.

راجع ترجمته هنا :
ترجمة توما الاكويني

Quote: تخيل أن هذه الصديقة تظنني اديبا و تطلب رأيي في مقولة للاديب العالمي الحائز على نوبل توماس مان و يقدر هذه المقولة و يحتفي بها الاستاذ منصور خالد.

إعجابى بتوماس وإحترامى لمنصور خالد لا أجده مبرر لهذا التواضع الذى يضيع الحقوق .. أنت ليس مقارنة بل إضافة وتجديد .. ياخى أنت كل ما يأتى ذكرك أحرص أن أخبر الجميع بأن لنا "تواصل" هاتفى .. يعنى ما مرة واحدة

المرأة أراها "الحياة" تسعدك وتتعسك بدون فواصل وسابق إنذار

مش قلت غير موفق؟؟

قالوا عن المرأة:
فى سن 20 ككرةالقدم يركض خلفها22رجلا

وفي سن30 ككرةالسلة يركض خلفها10رجال

وفي سن40 ككرة البيسبول يركض خلفها رجل واحد

وفي سن50 ككرة التنس كل رجل يرميها للآخر

أما في سن 60 ككرة القولف تقذف إلى الحفرة

Quote: السياق الذى وردت فيه كلمات الفلاسفة مهم ... بل هو عصب التقييم ..

دينا خالد ( بتاعة الايسكريم كما قيل )
ازيك ..
فعلا كتير من العبارات دي قد تكون منتزعه من سياقا.
بل لو لاحظتي بعضها لروائيين فممكن تكون جات في نص رواية ما معبرة عن رأي الكاتب.
لكن هي كلمات اشتهرت على السنة الناس.
هسه ظللي اي جملة من ديل و خشي قوقل.
تتخلعي.
بوستات و مقالات كتيرة في مواقع و منتديات تنقل هذه العبارات باعتبار قال فلان . خلاص.
اتمنى ان اسمع مناقشة لهذه الكلمات بطريقة ممنهجه.
يعني فلان قال كذا لأنو ظروفو كده و كده.
فلان قال كذا في رواية على لسان بطل.
فلان لم يقل كذا قط.
فلان قال كذا و هو غلطان و بالغ كلو كلو.

نخطئ حين نقبل بالجملة او نهاجم بالجملة.

يا عمر ..
انت ضد الشاعر و ضد القائل وله ضد بيت الشعر و ضد المقولة ؟
لو بقينا ضدهم على الاطلاق شوف حتخسر كم اسم مهم انا نقلت عنهم هنا ؟
او يكون قصدك انك ضد الشاعر في كلمتو او موقفو او فكرتو.
دي صاح و الله.
اها رايك شنو ؟
نعتذر عنهم وله نشلتم وله نقبل حقهم في الخطأ في حق المرأة ؟

الحبيب الامدرماني رأفت ..
مشتاقين كتير و الله.

Quote: المرأة أراها "الحياة" تسعدك وتتعسك بدون فواصل وسابق إنذار

مقولة جميلة تستحق الاحتفاء بها.


خليك قريب مني انا خايف من زميلات المنبر جنس خوف هسه.
بالجد بوست غير موفق.

مداخلة خطأ سببها الرعب حين رأيت اسماء اماني و شادية و عزاز في مداخلات ادناه .
لم اقرأها بعد لكن الله يستر.

Quote: قالوا عن المرأة: فى سن 20 ككرةالقدم يركض خلفها22رجلا وفي سن30 ككرةالسلة يركض خلفها10رجال وفي سن40 ككرة البيسبول يركض خلفها رجل واحد وفي سن50 ككرة التنس كل رجل يرميها للآخر أما في سن 60 ككرة القولف تقذف إلى الحفرة

مداخلة غير موفقة يا دكتور .
شاحد ربي الزميلات يقطعنها ليك فوق راسك.

حمور ياحمور :

تصدق لاتدهشني هذه المقولات ..!!

فقد علمت أنه في العام 586 بعد الميلاد عقد الفرنسيون اجتماعا
لبحث أمر هو: هل المرأة إنسان؟!!!!!!!
وكانت خلاصة أو محصلة المؤتمر أن المرأة إنسان خلق لخدمة الرجل...!!.


علي ضوء المعلومه أعلاه لايدهشني ما يعتقده الرجال عن المرأه,
حتي لو كانوا فلاسفه ومفكرين ..

والله أنا بس خايفة عليك من الباد أبروتش

آدي طوبتي ..

جاياك برواقة يا حمور ......

أستاذ حمور سلامات


المرأة

سُخر منها فى الجاهلية

وهاجمها نابليون

وزاد ضراوة فى الهجوم عليها إيراهيم الكوني الكاتب الليبي

وأنصفها وأكرمها رسول الله صلى الله عليه وسلم

واتنمى عقول نيرة تؤتيها مكانتها ولا تُنقصها شئيا

Quote: فعلى حين وقفت كثيرا على نقد لايات قرانية و احاديث نبوية يظن منتقدها انها تهين المرأة و ذم لأمثال سودانية تحط من قدر المرأة الا اني لم اطلع على نقد خاص لكثير من كلمات الفلاسفة و المفكرين السيئة في حق المرأة

Good point

thank you Hamor, waiting for the rest of the post

Quote: ثم تملصت من ذلك بمقولة للاستاذ العقاد أن الفلاسفة يجعلون اوجاعهم الشخصية مناهج للبشرية و احكاما عامة.

العزيز ,, حمور
تحية طيبة,,
اولا ماهى الفلسفة ,, واذا توصلنا لتعريف الفلسفة استطعنا من باب اولى ان نعرف الفيلسوف . ليس لدى تعريف جامع مانع للفلسفة ,, سواء بمعناها الفنى او اللغوى لذلك اترك الباب مفتوحا قصدا.

واريد من ذلك ان اصل الى السؤال التالى: هل كل فلسفة بالضرورة صادرة عن فيلسوف ?,, وهل كل مايصدر عن الفيلسوف يعتبر فلسفة.?
هل تطلق الفلسفة ويقصد بها الحكمة?
لأن هناك اقوالا تصدر عن اناس ينظر اليهم على انهم من غمار الناس وتسير باقوالهم الأزمان ويحتج بها الناس ولاتسمى اقوال فلاسفة وربما لايعرف اول من اطلقها وربما سميت امثالا ,, وفى بعض الاحيان تخلد اقوال وتنسب الى اعراق بعينها كالأقوال التى تنسب الى الرباطاب فى السودان مثلا ,, اذاقارنت الأقوال هذه والأمثال بما يطلق عليه الفلسفة او اقوال الفلاسفة تعجز عن تبين الخيط الذى يزعمه من يميزون قول الفيلسوف عن غيره بل ربما اطلق البعض على ماينسب الى الرباطاب مساخة والبعض يقول انها سرعة بديهة .
وذلك يقودنى الى التساؤل:
هل صار القول عقيدة ومنهجا للبشرية لأنه صدر عن فيلسوف اسقط اوجاعه الشخصية على البشرية كما قال حمور عن العقاد ام لان القول يستمد قوته من معانيه ومبانيه بغض النظر عن قائله? واين الشعر من الفلسفة .
واظن ان تحديد هذه الاشياء يجعلنا نقول للنساء ليس كل قول سالب حقيقة لاتقبل الشك ,, فهى اقوال لاتعدو كونها احباطات من تجارب شخصية كما ذهب الى ذلك الاديب حمور بذكاء عندما المح الى تجرؤ البشر على نقد كلام الله فى حين يسلم بعضهم بدقة وصدق كلام بشر سموهم الفلاسفة وجعلوهم لله اندادا.

اذن لما كان يجب ان يكون لكل قول حقيقة لنأخذ قول سقراط هذامثالا:

Quote: المرأة مصدر كل شر

فماهى حقيقة هذا القول وماهو الدليل الذى يسنده ,, انه قول فى رايي ينقصه الدليل وبقليل من الخيال اجده لايخرج عن كونه كلام صادر من انسان فى لحظة زهجة من امرأة فنسب مانسب لكل النساء.

Quote: الرجال هم الرجال .. لكن المرأة هي الانسان.

واذا عملناالنقد فى هذا القول مجردا من مقصود قائله نجده قولا يناقض طبيعة الأشياء اذ خلق الله المرأة والرجل وجعلهم جنسا واحدا هو الإنسان وجعل من الجنس نوعين , ذكر وانثى فطالما اشتركا فى الجنس فالقول بانسانية المرأة دون الرجل قول يجافى طبيعة الخلق .
ولكن اذا تعاملنا مع القول بحسب مقصود القائل الذى اراد الإنسانية كمعنى يدخل فيه الرأفة والحنان وسائر القيم النبيلة نجده ايضا نقيض واقع الحياة فالأنسانية بهذا المعنى ليست قصرا على النساء دون الرجال.

Quote: هل يصح أن نحتكر المرأة في الجمال الذي يبدو في عينيها ؟

Quote: اشك ان نوال السعداوي لن تحب كلمة شكسبير هذه.

اذا وجهنا هذا السؤال للنساء تجد الأمر يجاب عليه بنسبية لااملك لها احصاءا ولكنى تحدثت الى بعض النساء فمنهن من ترحب ومنهن من ترفض وتعتبر انه امر فيه اهدار لكرامة المرأة واعتبار جسمها بهذا المفهوم سلعة تباع فى سوق الشهوة الذى يؤمه الرجال عادة.


كن بخير

رب ما

اها ياحمور بعد قلنا ليك كلام النقاش الفوق داك
زهجان ومشنق طاقيتى ومارق للمشاكل وبس كدى خلى واحدة تجى تنشبك معاى
يعنى الليلة الزميلات ديل احدر ليهن فى الضلمة وقول واحد:

Quote: وان المراة لا تستطيع الجلوس يوما كاملا بدون مراة.

لا هى فى الحقيقة مابتقدر تقعد بدون مرارة ,,
عشان تفقعها,,
تخصص.

Quote: آدي طوبتي .. جاياك برواقة يا حمور ......

طبعا انا لقيت البوست سيدو مافى فلازم اقدل ,,
اها ياعزاز
جايا فقع مرارة ولا هرى فشفاش ,, ولا جايانا بينيران شقيقة.
انا الخلانى اقول الكلام ده كلمة (برواقة دى)
رواقتكن انا خابرها.

اهلين يا اماني ..
طبعا موضوع اجتماع عام 586 م ده موضوع ديني شوية.
فالاجتماع كان اجتماع كنسي لقساوسة في مجمع باسون في فرنساو ناقش معضلة "دينية " هل المرأة لها روح ؟ و هل لو لها روح هي روح انسانية ان روح حيوانية ؟
وخلص المجمع الى النتيجة التي قلتيها ان المرأة مخلوقة لخدمة الرجل.
لكن للاسف هنا احاول ان لا اناقش فكرة المرأة في الدين أيا كان الدين.


لكن ربما قادت مثل هذه المداخلة الى سؤال مهم ..
ان كانت المسيحية ( او على الاقل قرارات المجمع الكنسي ) تهين المرأة.
و الاسلام يهين المرأة ( بحسب فهم من يوردون في ذلك ايات و احاديث ).
و الفلاسفة و الادباء يهينون المرأة ( بحسب امثال هذه النقولات ).
فهل كل هؤلاء ظلموا المرأة ؟
سيكون من العجيب ان نقول ان المرأة تكاتف على اهانتها الاديان و الفلاسفة.
فاما ان يكون هناك خلل في فهمنا لهذه النصوص او ان نقول ان ما قيل من اهانات هو فعلا وضع المرأة.
و هذا الأخير لا يمكن ان يقوله عاقل.

Quote: والله أنا بس خايفة عليك من الباد أبروتش

أنا ذاتي خايف يا شادية

Quote: آدي طوبتي .. جاياك برواقة يا حمور ......

لو سمحتي يا عزاز ممنوع الفليق في هذا البوست.
طوبتك دي لو رفعتيها عليّ حيبقى عنف ضد الرجل.
بل كمان يمكن يكون تهديد لكائنات معرضة للانقراض باعتبار انو الحروب تستهلك الرجال و يجب الحفاظ عليهم.
فبالله ناقشي لينا المراحيم الفوق ديل بهدوء و اوعك ثم اوعك تستعملي طوبتك.
حذرتك.

محمد الجيلي ..
ما لقيته المرأة من عنت يفوق الوصف ..
اتمنى افادتي بموضوع ابراهيم الكوني .. لم اطلع على شئ كهذا من قبل و للاسف اطلاعي على الكوني ضعيف نوعا ما.

نون ..
شكرا للمرور العاطر ..
و للبوست بقية و للكلام ذيل

استاذ الفاضلابي ..
مداخلات دسمة تفتح محاور عدة لنقاش.
فقط اعلق اكثر عن مقولة سقراط.
كان سقراط ميلا الى المثلية الجنسية كما يقال.
و كان يعشق غلاما اسمه اليسباديس . بل حين كان سقراط نفسه تلميذا كان عشيقا لاستاذه.
فمن الطبيعي أن يكره من هذه حالته المرأة.
لكن - دعني أعجب مرة اخرى - أن سلوكا كهذا و اراء على هذه الشاكلة لم تنقص من قدر سقراط لدى الكثيرين.
اضافة الى سقراط طبعا كان أرسطو ايضا كان مثليا.بل كان ارسطو يشمئز من النساء و يمنع دخولهن الى مدرسته.


لكن .. هل هذه اعذار ام عيوب و اهانات ؟؟؟

أشرف طه ..
فهل هو ؟

Quote: محمد الجيلي .. ما لقيته المرأة من عنت يفوق الوصف .. اتمنى افادتي بموضوع ابراهيم الكوني .. لم اطلع على شئ كهذا من قبل و للاسف اطلاعي على الكوني ضعيف نوعا ما.

أستاذنا حمور

الزول ده من المستميتين فى العداوة ضد المرأة

وجدت له عدة نصوص ومؤلفات لكن خانتني ذاكرتي فى إيرادها

فقط أذكر منها :

Quote: - يجد الرجل السعادة في رفيقة الحياة .. التي وجد فيها الرجل ..(وليس المرأة). - نحيا سعداء إلى جوار قرينة وجدنا فيها سجية الأنثى، وروح الرجل .. - البطولة ليس أن يهزم الرجل رجلا .. البطولة أن يهزم الرجل امرأة. بالنار يمتحن معدن الذهب .. وبالذهب يمتحن معدن المرأة .. وبالمرأة يمتحن معدن الرجل. * لا يفلح من أسقط من حسابه المرأة. *لا يفلح أيضاً من سلم زمام أمره للمرأة. * من عرف حقيقة المرأة لا يصير عدواً للمرأة بقدر ما تصير المرأة عدوه. * تؤثر المرأة رجلاً يوافقها في ما تقول، ولكنه يفعل عكس ما تقول، على رجل لا يوافقها في ما تقول، ولكنه يفعل ما تقول.

الفوق دى شوية إقتباسات بسيطة من كتاباتو ..

الأراء الواردة أعلاه فى ذمة قائلها وأنا عامل ساتر من أى فليق ولا طوب

قدلة يامولاى
تقعد مع المرأة عشرين سنة بحلوها ومرها
يحدث الطلاق
تتزوج باخرى (لم يسبق لها الزواج)
تقدل فرحان عامل فيها الولد كاشف اسرار النسوان
تضع خطة مبنية على تجربتك السابقة
تلقى الجديدة مغيرا ليك القفلة .
فلســــــفة
كل مرأة عندها قفلة غير قفلة الأخرى
الفيلسوف
الفاضلابى ـ كده ينفع?

قال شوبنهاور :

الحب وردة .. و المرأة هو شوكتها .




ارثر شوبنهاور فيلسوف الماني شهير يعتبر الحياة كلها شر.
فلسفته تقوم على الربط بين العقل و الارادة.

قال هوميروس :

المرأة نصف الحياة .. اذا كانت مخلصة لزوجها.


هوميروس مؤلف ملحمتي الالياذة و الأودسة.
شاعر اغريقي و هو ابو الادب الاغريقي و ربما العالمي كله.

قال جان جاك روسو :

المرأة كائن طويل الشعر .. قصير التفكير.



جان جاك روسو فيلسوف من اصل فرنسي من أهم كتاب عصر العقلانية الأوروبية. B]

Quote: لكن - دعني أعجب مرة اخرى - أن سلوكا كهذا و اراء على هذه الشاكلة لم تنقص من قدر سقراط لدى الكثيرين.

ماذا قال ابليس?
قال:
لأقعدن لهم صراطك المستقيم
يعنى ماقال لاقعدن لهم فى باب الخمارة
فهؤلاء لايرون فى سلوك كهذا عيبا لانهم كفوا ابليس شر القتال
فكيف تعجب فيمن اتخذ الهه هواه?
خارج النص
تعرف ياحمور انا قايلك مافى قمت اتفسحت فى البوست
بقت على حكاية الحرامى اللى دخل على العزابة قايلهم نايمين
بعد خمخم وجاء مارق لقى السراير فاضية وقف فى نص الحوش وضرب الكواريك:
ياجماعة انا حرامى
اها انا هسع ماخايف منك انت انا خايف من جندريات البوست
الله يطراك بالخير ياتراجى وكت بقت مافيشه اللنوم قفا.

Quote: قالوا عن المرأة: فى سن 20 ككرةالقدم يركض خلفها22رجلا وفي سن30 ككرةالسلة يركض خلفها10رجال وفي سن40 ككرة البيسبول يركض خلفها رجل واحد وفي سن50 ككرة التنس كل رجل يرميها للآخر أما في سن 60 ككرة القولف تقذف إلى الحفرة

ignorance

مع إحترامى ليك ، الفلاسفة بتاعنك ديل مامحترمين














.........
ياخى المرأة هي : الحياة

قال محمد احمد
المره كان بقت فاس بتفرتق الراس











تضامنوا مع حمور في محنته
هههههههههههه

Quote: المرأة كائن طويل الشعر ..

امانة يا جاك جان ما اتلومت ...

الاخ حمور

تحية طيبه

ابدا البوست موفق لانك لم لم يكن موفق لما كتبته او حرصت عليه

وهو جيد لمعرفة موقفنا من المراة الانسان


وانا بالنسبة لي كرامة الحياة في اكرام المراة

وعلينا نقد ما تعلق بدونيتها وتصويرها بصور غير كريمه

علينا الدعوة لانتزاع حقوقها كاملة

وان تتساوي معنا

من ناحيتي اشرك المراة في حياتي اشراكا كاملا حتي في الشهادة والميراث

لا تساوي المراة نصفي

ولا تساوي ربع راجل بالدعوة للتعدد وعدم مساواتها بنا



اتمني معرفة راي الاديب حمور في المراة الان في الالفية التالته


وهو بوست موفق لان ميزان التقدم او عدمه

مكانة المراة في الذهن الذكوري

مثلما اسئلة اخري اريد لها بوستات غير موفقه مثل هذا حسب ما تقول انت

عن الدين ؟؟؟

والهوية ؟؟؟

لك التحية والاجلال

توجد امثال كثيره تحط من كرامة المراة وانسانيتها وايضا احاديث ضعيفة او قوية

Quote: وانا بالنسبة لي كرامة الحياة في اكرام المراة

اول مرة تقول ليك كلام كويس

Quote: فهل كل هؤلاء ظلموا المرأة ؟ سيكون من العجيب ان نقول ان المرأة تكاتف على اهانتها الاديان و الفلاسفة. فاما ان يكون هناك خلل في فهمنا لهذه النصوص او ان نقول ان ما قيل من اهانات هو فعلا وضع المرأة. و هذا الأخير لا يمكن ان يقوله عاقل.

السؤال الأصح ياحمور هو هل تلام المرأه علي عدم فهم الرجال لها؟
عبر التاريخ مرت مكانة المرأه وحقوقها بفترات تذبذب وتأرجح غلب عليها الاضطهاد ..
والسبب أن المجتمع بتطوره وتغيراته كان وما يزال ذكوري بحت ..
فمنذ الصينيين القدماء والهنود والفراعنه واليونانيين باعتبارهم الحضارات القديمه علي الأرض,
كانت المرأه تحظي أحيانا بمكانه جيده "ملكات النوبه العظيمات كمثال وملكات الفراعنه الي ملكة سبأ وغيرهن.."
وأحيانا تعاني من مظاهر السيطره الذكوريه كاستعبادها لخدمة الرجل, أو حرقها حيه مع زوجها اذا توفي "كما كان عند الهنود",
أو دفنها حيه "كما كان عند الصينيين" أو وأدها طفله كما في الجاهليه ..

علي ضوء كل هذه الممارسات اللانسانيه لا أري أن المرأه ملامه علي افتراء حتي الفلاسفه والمفكرين عليها ..
فهم جزء من مجتمعاتهم ومفاهيمها المغلوطه ..
ومامرت به المرأه علي مر العصور هو بالضبط مثل فكرة الاستعمار للدول الضعيفه بواسطة الدول الأقوي,
استغلال واستعباد وفرض سيطره واخضاع للسلطه قسرا وتحكم في المصير !!
المرأه مازالت تسعي للاستقلال والمجتمع مازال ذكوري سلطوي مترفع !!

لاتلم المرأه عن ماقالوه عنها ياحمور, لمهم علي جهلهم بها, وان كانوا علماء في زمانهم ..

Quote: ياخى المرأة هي : الحياة

الطاهر بس عشان الدنيااول شهر وعندك قروش
...

سلامات يا حمور
كيف عامل بوستيك في السلك

مشكلتك جمعت الاقوال السالبة.

في فلاسفة كتار وكتاب عندهم اراء ممتازة عن المرأة...

الرجل الوحيد الذي تعد له المرأة اعدادا كاملا بواسطة نساء اخريات
هو الرجل السوداني..
عندي مشكلة كيبورد الكلام دا عايز ليه اندياح شديد..
عشان الناس ما تخلي الموضوع الاصلي وتقعد بتعرفي تكتبي واعدي..
انظرني الى حين وصول الكيبورد الجديد...امانة ما وقع حمور..

لعن الله الهكر















______________________

حمور اتخارج انا بعمل ليك ساتر

ح تجي عليك رياح يمينيه ويساريه هوجاء

سجيمان زاتو ماح يقدر بتضامن معاك

غايتو انا بورررررررررررررره

احب المرأه(انا طارق اللمين) افرزن كويس سمح؟

عجبني ليك(الليله جوهو وكيه للساطوهو)

حفل التضامن مع حمور_ بيت الفنون_ 30 بونيو

هيي يكا

انت ماكان تعزل كلام فلاسفه سمح تغزغزو في النص

دقشميه مليون غنيه عن المراه تكسر القلب

تقوم تفطهم كلهم تمشي لحدي القرون الوسطي

عشان تلملم قوالات الرجال البايرين ديل

اسي في ذمتك سقراط دا لو كان مجكس واحده خريجه الاحفاد سايكولوجي

ماكان لحس كلامو الفوق دا

النصيحه ياحمور انت كمان ختيت

يلا قطعن لحمو

خلونا نفرزو بالنضارات

هيي يكا

غايتو تحسباً
أنا جاياك
بالمناديل

وهذه طرفة سوف أحكيها لك يوماً
وحسب الطرفة
فالمناديل سلاح ذو حدين
وكل حد أسن من الثاني

حمور صباح الخير و معليش جيتك بالمهلة،
أرضا سلاح ... طوبة أرضا ...
تعالو مارقين يا حمور و عبدالعزيز فضلابي
وفي وردة بتفتح و تنور فوق لاني ما لقيت علم ابيض

انا جاية الليلة زولة (حوار) ما دواس ... (اصبرو لي بس)
________

أولا بالتبادي يا اخوي، و اخوي دي جاكتة بلا ظهر القيها عليك و على من تلوك في التداخل
واضيف ليها فيونكة للاخوات المتداخلات ...

أول ما تبادر على ذهن عند قراءة البوست هو مقولة سيمون دي بوفوار (لا تولد المرأة امرأة ، وإنما هي تصير كذلك)
وفي الأغلب هي تولد (انسان) فيُصيرها المجتمع امرأة،
والتصيير لا علاقة له بالدور الفيسيولوجي بل الجانب السيكولوجي ...

كتر الله خير توماس مان و كل من تكرم و أضاف سطرا في الكتب سائدة الرواج عن المرأة، ولكن هل نحن – معشر النساء بحاجة إلى إفادات عنا؟

للحق يا حمور لا احتفي كثيرا بما يقوله الرجل في حق المرأة،
كان ذلك الرجل نيتشه أو محمد احمد (محمد احمد طاقية فري سايز لاي رجل) لانه بلا شك،
كليهما نيتشه و محمد احمد سيصفان (امرأة) لا أعرفها وقد تشبهني وقد لا تشبهني ...
تحضرني قصة العميان الأربعة وقيل الخمسة و قيل الستة، العدد بحسب التساهيل و غرض الراوي
المهم العميان دايرين يتعرفو على الفيل .. دخلوهم غرفة وكل واحد منهم مسك جزء من جسم الفيل .. واختلفوا في وصفه
القال الفيل زي العمود لانو مسك رجلو و القال انو الفيل حائط لان يده جات على بطن الفيل و القال انو الفيل مكنسة لانو مسك ذيلو ...

الشاهد، الرجل و كل المفكرين المرصوصين أعلاه واللي حيترصو أدناه، عميان بيوصفو في فيل ...
كل بحسب ما رأي ويسر له من تجربة و فهم و مقدرة على التحليل ...

كون سقراط الله بلاهو بزوجة نكده ما بيديهو الحق يختزل النساء في شخصها
ولكن هو الرجل (الطفل الكبير) البيحرد و يدق رجولو في الارض مين يقدر يقولو لأ؟
عاد النحدسك ...في البداية البتولدو امراة
و البتربيهو امرأة
و البيحبها و تشلهت روحو امرأة
و البتلهمو برضو امراة ...

اقعدو انتو يا المفكرين لنوع ده ... حتنقرضو قريب بالطريقة دي ..!!

نجي للحتة بتاعة التوطئة الخاتيها لي في نهاية كل مقولة (سالبة عن المرأة)
وبشكل بريء يشي انك نفضت كتفينك و مسحت طرف انفك وقلت انا مالي؟!؟
ناقل الكفر ليس بكافر بس خلو بالكم فرويد القدر يفصفص النفس البشرية النسوان غلبنو تب ...
هوي فتحو عيونكم ... انا ما قاصد التحريش بس المهم انتو خليكم منتبهين ..!!

يا حمور ... انت فاكرني مواليد 20001 ؟

ونرد علي الناس الكتبت الكلام ده من سنة دو لشنو و علشان شنو؟ هو كوننا نساء مطالبين نصحح الفهم ده بأثر رجعي ولا نعاين لقدام و نقدم بيان بالعمل ؟؟

عارف انا كرهتي في الدنيا دي الناس الشايلة الغبية زي صخرة سيزيف و تدور في طواف حول المرارات ..
صحيح المراة اتعصرت لمن زيتها طلع بس انحنا حسي عرفنا الداء، و لينا القدرة على رفع البلا ..

خلاص نرمي لقدام موش نقعد نحفر محلنا شفقانين من القالوهو زمان ...

اما الجزئية الخاصة بالدين دي فاسمح لي شديد اختلف معاك جدا ...

الدين هو البيشكل وعي الانسان – رجل او امرأة ... و نظرة الرجل للمرأة انها شر مسستطير لو تبعت الحبل بتلاقيهو مارق من قفطان الدين ... لا فكاك .. ماااااااااابيحلك تقول ما داير اناقش الدين ...
في النوبة مثلا، المرأة مكانتها و شأنها قوامو الدين، على كون الآلهة مؤنثة، و ايقونات الآلهة الانثوية خارج المعابد
علشان كده كانت كنداكة ... والولد باسمها
و الأرض باسمها
وهي بوابة القوة و الجاه ... و
و جات المسيحية و رفعت شأن المرأة أكثر لمكانة السيدة مريم، ...
و جاء الإسلام ...و اسكت عن الكلام المباح علشان انا دايرة ارجع اتغدى في البيت ...
صورة المرأة السالبة في الوجدان الإنساني على مر العصور مرتبط ارتباط وثيق بالدين، و القائمين على الدين ...

Quote: المرأة تترقب الرجل .. لكن كما تترقب العنكبوت الذبابة

انا في كاتب واجعني شديد كلامو وهو الكاتب البريطاني برنارد شو خاصة انو ليهو مسرحية فيمينست اسمها باجمليون و اعتقد انو كبقية حبات العقد الفريد كان زعلان مع الجكس في توقيت كتابة رأيه ... وهو العنكبوتة و الضبانة بتكون العميانة الحبتو ...

اما بالنسبة لحكاية نقد الأقوال بشكل مؤسس، فأحب ابشرك انو خالتي سيمون دي بوفوار قادت حملة مؤسسة ضد اللغة و كونها متعالية على المرأة ضمن حركة لغوية نسوية منتصف القرن الماضي ...
كدي خلينا انحنا في المرة لو فاس ما بتكسر الراس و الحلة بصل و المرة كرعين ...

انا لسه ما تميت النقة ... بجي تاني ...

اركز يا حمور
واستعن بالاصدقاء


(السؤال الأصح ياحمور هو هل تلام المرأه علي عدم فهم الرجال لها؟)

نعم تلام جزئيا
فالافهام مسئولية اثنين
المرسل والمستقبل

دي طوبتي التانية

Quote: اهلين يا اماني .. طبعا موضوع اجتماع عام 586 م ده موضوع ديني شوية. فالاجتماع كان اجتماع كنسي لقساوسة في مجمع باسون في فرنساو ناقش معضلة "دينية " هل المرأة لها روح ؟ و هل لو لها روح هي روح انسانية ان روح حيوانية ؟ وخلص المجمع الى النتيجة التي قلتيها ان المرأة مخلوقة لخدمة الرجل. لكن للاسف هنا احاول ان لا اناقش فكرة المرأة في الدين أيا كان الدين. لكن ربما قادت مثل هذه المداخلة الى سؤال مهم .. ان كانت المسيحية ( او على الاقل قرارات المجمع الكنسي ) تهين المرأة. و الاسلام يهين المرأة ( بحسب فهم من يوردون في ذلك ايات و احاديث ). و الفلاسفة و الادباء يهينون المرأة ( بحسب امثال هذه النقولات ). فهل كل هؤلاء ظلموا المرأة ؟ سيكون من العجيب ان نقول ان المرأة تكاتف على اهانتها الاديان و الفلاسفة. فاما ان يكون هناك خلل في فهمنا لهذه النصوص او ان نقول ان ما قيل من اهانات هو فعلا وضع المرأة. و هذا الأخير لا يمكن ان يقوله عاقل.

هناك فرق بين توصيف حالة وإن كانت تبدو اهانة و بين وضع مفروض وبين حقيقة
تفتكر ليه الفلاسفة و رجال الدين كلهم رجال؟
وليه مافي نفس القدر من االتوصيف الدقيق للرجل وبالذات التوصيف السالب؟
ليه الراجل ما ليهو مانيوال ولا كتالوج؟؟

اسئلة القيها في اليم ... و بعدين نجي نشوف غمزت شنو

حمور جيتك تاني..
لأنه عزاز كالعاده لما تقول الكلام الفي رأسي تماما بتريحني من الشرح..
حأستدل بعبارات عزاز والكلام ليك ياحمور :
أول هام :

Quote: اما الجزئية الخاصة بالدين دي فاسمح لي شديد اختلف معاك جدا ...

من غير الممكن فصل الدين عن أي جزئيه من جزئيات المجتمع ..
الدين بينعكس علي ثقافة المجتمع وقناعاته,
وتذبذب وجود الدين وقوة تأثيره مقياس حساس لمفاهيم المجتمع وثوابته ومتغيراته ..
أقصد الدين هنا بطرفيه: الأصل اللي بيهذب السلوك وبيطوره, ورجال الدين اللي في أغلب الأوقات بينفروا المجتمع وبيثيروا الخلاف ..

تاني هام:

Quote: نجي للحتة بتاعة التوطئة الخاتيها لي في نهاية كل مقولة (سالبة عن المرأة) وبشكل بريء يشي انك نفضت كتفينك و مسحت طرف انفك وقلت انا مالي؟!؟ ناقل الكفر ليس بكافر بس خلو بالكم فرويد القدر يفصفص النفس البشرية النسوان غلبنو تب ... هوي فتحو عيونكم ... انا ما قاصد التحريش بس المهم انتو خليكم منتبهين ..!!

سيان عندي كما أسلفت لك ان كان قائل المقوله سقراط أو فرويد أو أيا كان ..
هو في النهايه رجل تأثر بمجتمعه ومفاهيمه, ويفتي في حدود تجاربه وخبرته ..
وكلها معايير أصبحت الان باليه كما هو زمانها ..
ولكن المحير في الأمر هو نقطه مضيئه أراها داخل عقلك الان تحتفي نوعا ما بهذه المقولات ...
أري لك ابتسامه تبرق أحيانا طربا بهذا القول, أراها حين تمجد لي قائلي المقولات هذه وتعدد صفاتهم ومكانتهم ..
أراها حين تمتدحهم وكأنك تخبرنا أنهم لم يكونوا مختلي العقل أو فاشلين !!
كانوا رموزا للعقل والنجاح والحكمه في زمانهم وخلصوا الي مثل هذا القول ..

أنت تشير بطرف خفي أن انظروا ماذا قال العظماء عن المرأه ..
فأيهما تصدقون المرأه أم مفكري الانسانيه ..؟!!!


بجيك راجعه ..

Quote: تفتكر ليه الفلاسفة و رجال الدين كلهم رجال؟

يفترض ان تكون اجابة هذا السؤال لدى المرأة

Quote: أنت تشير بطرف خفي أن انظروا ماذا قال العظماء عن المرأه .. فأيهما تصدقون المرأه أم مفكري الانسانيه ..؟!!!

ارجى الراجيك يا صديقي حمور

عارف يا صاحبي عين المنبر حوصه ...
ان كان الموضوع عن المرأة او سواها
لا يُلقى بالا الا لما يهاجم به الاسلام .. فيحتفى به وتفتح له البوستات الفرعية

اشارتك واضحة يا صديقي لكن تجاوها الجميع وركزوا على المنقول منك ثم البسوك قفازات خفية تشير الى غير مقصدك
وبعد قليل ستصبح قفازاتك الخفية هي الواقع وينسى حديثك في اول البوست عن عدم اتفاقك مع الاقوال المنقولة

سيتم تجاهل سقراط وانشتاين وغيره من الذين اوردت مقولاتهم ... وستذم انت يا صديقي بسبب مقطتفاتك التي اوردت وكانك من قلتها


مقصدك من البوست واضح عندي ان كنت فهمتك
واعتقد انك تقصد - ان كنت محقاً- لماذا التركيز على ما تعتقدونه يحط من قدر المرأة في الاسلام وتتجاهلون غيره

سيتم تجاهل غيره يا صديقي فهذا هو تيار المنبر هذا العام ... وستكون ان موضوع هذا البوست لا الاقوال التي اوردتها .. ولا المرأة وما قيل فيها

هلا يا وليد:

Quote: (السؤال الأصح ياحمور هو هل تلام المرأه علي عدم فهم الرجال لها؟) نعم تلام جزئيا فالافهام مسئولية اثنين المرسل والمستقبل

هذا اذا افترضنا تكافؤ العلاقه وعدلها ..
المرأه كانت ومازالت تحت سلطة وسيطرة الرجل التامه, المرأه ليست حره ياوليد ..
مازالت حائره تستجدي انسانيتها وحقوقها تاره وتنتزعهما تاره أخري !!
الرجل استمرأ استخدام قوته الجسديه لقهر المرأه ثم أطلق عليها الأحكام ليزين لنفسه ويبرر انتهاك حقوقها ..

استخدم جميع الحيل المشروعه وغير المشروعه لابقاءها تحت سيطرته, ثم قال هي من ألهمتني ذلك !!

مرحب اماني

Quote: هذا اذا افترضنا تكافؤ العلاقه وعدلها .. المرأه كانت ومازالت تحت سلطة وسيطرة الرجل التامه, المرأه ليست حره ياوليد .. مازالت حائره تستجدي انسانيتها وحقوقها تاره وتنتزعهما تاره أخري !! الرجل استمرأ استخدام قوته الجسديه لقهر المرأه ثم أطلق عليها الأحكام ليزين لنفسه ويبرر انتهاك حقوقها .. استخدم جميع الحيل المشروعه وغير المشروعه لابقاءها تحت سيطرته, ثم قال هي من ألهمتني ذلك !!

ولماذا ذلك يا اماني ؟

ظهور شقي الجنس البشري على الارض كان متزامنا وفي وقت واحد
ما هو سبب تميز الرجال على النساء ؟
ولماذا كان للرجال سلطة وسيطرة تامة على النساء ولماذا المرأة ليست حرة وهي التي ظهرت على الاض مع الرجل في زمن واحد ؟
لماذا تستجدي المرأة انسانيتها وحقوقها منذ ظهورها على البسيطة وحتى الان ؟
وما الحكمة من ان الرجال جسمانيا اقوى من النساء ؟
وهل قوة الرجال الجسدية منتزعة كباقي حقوق النساء ام هي منحة ربانية ؟!

وما هو سبب تميز الرجل فكريا فجل الفلاسفة والمفكرين والمؤرخين وواضعي النظريات علمية كانت ام ادبية رجال ؟

وليد تاني مره:
قبل أن تخلص الي قولك هذا :

Quote: اعتقد انك تقصد - ان كنت محقاً- لماذا التركيز على ما تعتقدونه يحط من قدر المرأة في الاسلام وتتجاهلون غيره

هل قرأت مداخلة حمور هذه:

Quote: لكن للاسف هنا احاول ان لا اناقش فكرة المرأة في الدين أيا كان الدين

وهنا

Quote: هل كل هؤلاء ظلموا المرأة ؟ سيكون من العجيب ان نقول ان المرأة تكاتف على اهانتها الاديان و الفلاسفة. فاما ان يكون هناك خلل في فهمنا لهذه النصوص او ان نقول ان ما قيل من اهانات هو فعلا وضع المرأة. و هذا الأخير لا يمكن ان يقوله عاقل.

قريتهم يا اماني
لكن هل

انت قريتي ده

Quote: فرغم اني ضعيف في علوم الجندر و مفاهيم الانثوية الا اني بحكم الاطلاع وقفت على اراء كثيرة سيئة في المرأة. و تعجبت اني لم اطلع على نقد لهذه الاراء على حده. فعلى حين وقفت كثيرا على نقد لايات قرانية و احاديث نبوية يظن منتقدها انها تهين المرأة و ذم لأمثال سودانية تحط من قدر المرأة الا اني لم اطلع على نقد خاص لكثير من كلمات الفلاسفة و المفكرين السيئة في حق المرأة.

واهما شي وكت اشرتي للايداي الخفية
قريتي ده

Quote: هل احتاج ان اقول اني لا اوافق على هذه الأقوال و ادينها بشدة ؟ حسنا .. بوضوح انا لا اتفق مع كل ما سأنقله هنا. و في تقديري هي اراء سيئة و لو تجاوزنا فيها فسنقول ان لها ظروفها الشخصية. لكن لا يصح اطلاقها على النساء عامة.

اماني عافية منك .....



اعملي تغطية انا ماشة اجتماع سريع و جاية امسك منك (الفاس)
نكمل تكسير حطب المقولات دي لووووووووووووووول ... طيع راس ما معانا


وليد .. شايفاك وقفت تخطب في الناس و ويا قوم انه المنبر ذلك الذي
دائما لا يكون إلا بما ينبغي ...

كدي قول بسم الله و خت الرحمن في قلبك ... اللعب نظيف مغسول بآريال برائحة العبير

Quote: وليد .. شايفاك وقفت تخطب في الناس و ويا قوم انه المنبر ذلك الذي دائما لا يكون إلا بما ينبغي ... كدي قول بسم الله و خت الرحمن في قلبك ... اللعب نظيف مغسول بآريال برائحة العبير

ومالو يا عزاز ..؟!
فقط خطبتم قبلنالشهور في هذا المنبر وما قلنا بغم

بسم الله والرحمن في قلبي وعقلي

واللعب النضيف يا عزاز ما بلبس حمور - بافتراض - كلام ما قاله ولا اشار ليه بل نفاه في بداية البوست

قرتي ده

Quote: عليه : فانا انقل هنا اقوال سيئة لا اتفق معها. و اغلبها ليس منقولا من مصادره الأم بل نقلا عن اخرين عن القائل و بها ترجمة. و سيسعدني ان استفيد من ردود المتداخلين على القائلين لا عليّ أنا. كما ارجو افادتي بمدى صحة نسبة الاقوال الى اصحابها ممن لهم اطلاع على الأصول. باختصار : هذه الأقوال على مسئولية اصحابها.

وكت كتبتي ده

Quote: أنت تشير بطرف خفي أن انظروا ماذا قال العظماء عن المرأه .. فأيهما تصدقون المرأه أم مفكري الانسانيه ..؟!!!

؟؟؟؟
!!!!

وليد:

Quote: وما الحكمة من ان الرجال جسمانيا اقوى من النساء ؟ وهل قوة الرجال اجسدية منتزعة كباقي حقوق النساء ام هي منحة ربانية ؟! وما هو سبب تميز الرجل فكريا فجل الفلاسفة والمفكرين والمؤرخين وواضعي النظريات علمية كانت ام ادبية رجال ؟

شوف ياسيدي..
ربنا لما خلق المرأه والرجل خلقهم مختلفين ولابد من انهم يكملوا بعضهم البعض لاعمار الأرض,
بمعني خلق المرأه ضعيفه حنونه عاطفيه, والرجل مادي قوي عقلاني ..
اجتماع الرجل والمرأه في اسره يجعل الاسره متكاملة الأطراف تحوي كل العناصر المطلوبه لانجاحها,
لأنهم ان كانوا متشابهين لتنافروا ولم يتجاذبوا,
ربنا خلقهم مختلفين وقال اعمروا الأرض ولم يحدد الية الاعمار, فقط جعل كل واحد من الطرفين أقدر علي بعض المهام دون الاخر,
ليظلوا في حوجه لبعض فهما نصفي الوجود البشري..
الرجل شعر بقوته الجسمانيه فاستخدمها لغير خدمة المرأه وقضاء حوائجها,
وانما لاخضاعها لسيطرته وجبروته,
لاحظ أن أول من استخدم القوه والغدر في الأرض رجل ( قصة قابيل وهابيل) ..
الرجل أراد الأرض مستعمره خالصه له,
وسواه من نساء وحيوانات وثمار ومعادن وطاقه وثروات و.. و.. و..
طوعها لاسعاده وامتاعه,
الرجل لم يستطع تقبل فكرة شراكة المرأه له فجعلها عبده: أداه لخدمته ورفاهيته ..
وبرر لذلك بتفوقه العقلي والجسماني وأطلق عليها الأحكام المجحفه والظالمه ..

ياوليد زي مالدول المتقدمه مسئوله عن تخلف الدول الناميه وجهلها بواسطة الاستعمار والسيطره لخدمة أنفسهم في المقام الأول,
الرجل مسئول عن تأخر المرأه وانزواءها في ركن قصي في ملكوت الله ..



----

عزاز مالك اتأخرتي كده (: (: (:

سلام للمتداخلين و الشامتين و المتعاطفين و المتشاجرين ..
ابداكم من اول واحد واحد ..
بسم الله

سلام للمتداخلين و الشامتين و المتعاطفين و المتشاجرين ..
ابداكم من اول واحد واحد ..
بسم الله

استاذ الفاضلابي ..

Quote: ماذا قال ابليس? قال: لأقعدن لهم صراطك المستقيم يعنى ماقال لاقعدن لهم فى باب الخمارة

عجبني الإيراد ده شديد.

اتفسح يا استاذ البوست بوستك ما عليك بغيابي او حضوري.

سناء و مداخلتين كلسعات النحل ..
أكيد بتجي تاني ..
مش ؟

استاذنا الطاهر ساتي ..

Quote: مع إحترامى ليك ، الفلاسفة بتاعنك ديل مامحترمين

الطاهر ساتي يقول أن فرويد و برناردشو و سقراط غير محترمين.
و الله دي فيها حلاة عنوان مقال.

رغيم الشبل ..
تضامنك ما بناباهو ..
لكن كان ترجى المحنة تسخن

Quote: Quote: المرأة كائن طويل الشعر .. امانة يا جاك جان ما اتلومت ...

عليه يا ريهان أنصح أي امرأة يضايقها هذا التصنيف أن تحرج روسو بحلاقة شعرها.

اخونا الاستاذ صبري الشريف ..
شكرا لاعتبارك البوست موفقا ..
و اعجبني حقا قولك ان كرامة الحياة في اكرام المرأة ..
لكن هل يعني قولك هذا انها الكائن الاضعف الذي يحتاج من الرجل الى اكرام ؟
هل يصح ان نقول على لسان النساء : كرامة الحياة في اكرام المرأة ؟
ألا ترى في قولك هذا انقاصا لدرجتها عن درجة الرجل و جعلها متلقية للاكرام و محتاجة للتعاطف ؟

Quote: وعلينا نقد ما تعلق بدونيتها وتصويرها بصور غير كريمه

لا فظ فوك ..
فها هي الأقوال التي تقول بدونيتها فابدأ بنقدها و انا استمع لك بكل انصات :

Quote: قال أبقراط : المرأة هي المرض

Quote: قال سقراط : المرأة مصدر كل شر

Quote: قال سيجموند فرويد : إن السؤال الكبير الذي لم يُجب عنه بعد و الذي لم أقدر بعد على الإجابة عنه على الرغم من قضائي ثلاثين عاما في البحث في الروح النسوي هو : ما الذي تريده المرأة ؟

Quote: قال مونترلان : المرأة هي الاشمئزاز و فقدان النطق و الجهالة العنيدة.

Quote: قال برنارد شو : المرأة تترقب الرجل .. لكن كما تترقب العنكبوت الذبابة .

ها هي أقوالهم بين يديك تهين المرأة .. ابدأ بنقدهم و انا معك مستحسن لفعلك.
و ما ارودتهم الا لينتقدوا فاكرمني بان تفعل.



رأيي الذي سألت عنه عن المرأة في الألفية الثالثة هو ذات الاحترام للمرأة في الألفية الأولى و قبل الميلاد و عصور ما قبل التاريخ.
و احترم المرأة سواء المهندسة او راعية الابل في صحراء بيوضة او راقصة معبد دلفي.
لا اربط احترامي لها ككائن حي بمكتسبات التعليم و العمل و الا لاحتقرت المرأة البدوية الجاهلة او الزنجية ساكنة الاحراش التي تصنع الكاسافا.
و استغرب من السؤال عن الموقف عن المرأة كأنها كائن ادنى درجة يحتاج منا الى بحث حوله كأننا نعيد المجمع الكنسي الذي ناقش هل للمرأة روح ؟
هل يصح أن اسألك من موقفك من الرجل في العام 600 ميلادية ؟

ازيك يا اماني ..

Quote: عبر التاريخ مرت مكانة المرأه وحقوقها بفترات تذبذب وتأرجح غلب عليها الاضطهاد .. والسبب أن المجتمع بتطوره وتغيراته كان وما يزال ذكوري بحت .. فمنذ الصينيين القدماء والهنود والفراعنه واليونانيين باعتبارهم الحضارات القديمه علي الأرض, كانت المرأه تحظي أحيانا بمكانه جيده "ملكات النوبه العظيمات كمثال وملكات الفراعنه الي ملكة سبأ وغيرهن.." وأحيانا تعاني من مظاهر السيطره الذكوريه كاستعبادها لخدمة الرجل, أو حرقها حيه مع زوجها اذا توفي "كما كان عند الهنود", أو دفنها حيه "كما كان عند الصينيين" أو وأدها طفله كما في الجاهليه

كلامك ده زي فيو اضطراب شوية ..
الوقائع التاريخية سليمة ..
لكن هل بيبقى الحكم انو المجتمع كان و ما يزال ذكوري ؟
ليه ما اعتبرتي بناء على السرد التاريخي ده انو المجتمع بينصف المرأة لكن بيحصل ليو انتكاس في فترات ؟
هل المجتمعات التي ملكت المرأة عليها هذه كانت مجتمعات ذكورية ام تغير تصنيفها الى مجتمعات غير ذكورية ؟
متى بدأ التغيير فيها ؟
هل تملكت النساء في النوبة صدفة ؟ ام ان المجتمع النوبي لم يكن مجتمع ذكوري منذ البداية ؟
هل تملكت حتشبسوت لأن المجتمع الفرعوني لم يكن مجتمعا ذكوريا ؟
هل مكانة المرأة في المجتمع مرتبطة بان تكون ملكة ؟
البغاء ألا يعتبر اهانة للمرأة ؟ هل توقف البغاء في طيبة حين حكمتها حتشبسوت ام كن فتيات المعابد يقدمن الخدمات الجنسية للشعب في اهانة عظيمة للمرأة ؟
هل و هل و هل .. ؟؟؟

و برضو ما رديتي لي على الناس الفوق ديل.
انا ما مختلف معاك.
انا وانتي مختلفين مع سقراط.
ردي لي على سقراط بالله.

دكتورة بيان ..

Quote: مشكلتك جمعت الاقوال السالبة. في فلاسفة كتار وكتاب عندهم اراء ممتازة عن المرأة...

لكن يا دكتورة فكرة البوست اساسا الأقوال السالبة دي !!!
يعني البوست ما عن كل ما قيل عن المرأة.
عشان كده حرصت على وضع تراجم مختصرة للقائلين. لتوضيح من هم هؤلاء الذين ينتقدون المرأة و حتى يرد عليهم الناس عن بينة.
انا كايس رد على الأقوال السالبة دي.
صلحي كيبوردك و تعالي طقطقي لي برناردشو

Quote: الرجل الوحيد الذي تعد له المرأة اعدادا كاملا بواسطة نساء اخريات هو الرجل السوداني..

ما اظن الكلام ده دقيق يا دكتورة.
كدي شوفي الهند و غانا و موريتانيا..ديل المتذكرم هسه بيعملوا نفس عمايل السودانيين.

و الله يا طارق عجبني تفكيرك.
فعلا انا الهكر.
حمور ما ممكن يكتب كلام زي ده خالص. لكن انا قلت اورط ليك حنانو زاتو عشان تاني ما يعمل فيها بتاع و هناي.

Quote: اسي في ذمتك سقراط دا لو كان مجكس واحده خريجه الاحفاد سايكولوجي ماكان لحس كلامو الفوق دا

ما هي المشكلة شكلها انو سقراط كان مجكس استاذو و بعد داك زحلقو و جكس تلميذو.

عزاز بدون طوبة ..
كدي دقيقة بجيك براك بس امر على وليد و اماني و ذو اليد ديل
سمح ؟

وليد يا شفت ..
قلت لي الناس دي بتقرا الدايراهو بس ؟
لووووول
تعرف - في شكل قطيعة جانبية بعيد من البنات ديل - المشكلة الناس بتناقشك انت ما بنتاقش كلامك.
انت بتناقش القائل في مرحلة تالية لمناقشة نقاطو الجابا.
يعني هسه الكلام الاتقال ده كلو جميل و لطيف و حوار لذيذ لكنو لا يغير من حقيقة انو سقراط قال عن المرأة شنو.

مسألة تجاهل البعض لمثل هذه المقولات على حين يركزون على نقد ما يظنونه متوهما اهانة للمرأة في الاسلام ما بقدر الزم بيها كل متداخل.
مثلا ممكن اقولا لصبري الشريف لأنو بيظن انو الاسلام بيعتبر المرأة نصف الرجل في الميراث (و هو غير صحيح طبعا ) و بالتالي دي اهانة ( و هو غير منطقي طبعا برضو ) و اتكلم عن الموضوع ده كتير و انتقد.
فممكن امسكو اقول ليو اشمعنى لما كان الموضوع حديث انت انتقدتو بعنف و لما بقى سقراط مريت كالنسيم ؟
لكن ده ما بقدر اقولو مثلا لاماني او عزاز.
لكني بظل اطلب منهم رايم في الاقوال و قائليها.
مناقشة العموميات جميلة لكنها مخلة.
و بيجيك مثل في ردي على اماني ادناه باذن الله.

سوق يا اخي في الذكورة ( اصلها جاطت خلينا نسوط حنانا ) لكن ما تعصر على اخواتنا ديل شديد.
حاول معاي تطلع برد منهم على الاقوال اعلاه و كده يبقى ميه ميه يا عمك.

لماذا المرأة عند الفلاسفة فقط يا حمور


كيف حال المرأة عند الشاعر والاديب السياسي (محمد احمد محجوب)

وكان لسان حاله واضحا عند وصفه فى قصيدة الفردوس المفقود

مرحب اماني

تسلمي ستي

اول كلامك هو مربط الفرس
العلاقة بين الرجل والمرأة علاقة مشاركة وليست علاقة منافسة

لكنك شترتيها وانت توردين قصة هابيل وقابيل ..
فان كان الامر كذلك لماذا تجاهلتي قصة ادم وحواء والطرد من الجنة ؟!

لكلا منا عيوبه يا اماني .. وانتم السابقون

يا سيدتي قد يبرر حديثك عاليه تفوق الرجال على مسستوى البدن والقوة الجسدية ... لكن ما هو تبريرك على تفوق الرجال على مستوى العقل والنقل .. والميدان فيه ليس ميدان ابدان وقوة جسد ؟!

فلاسفة .. مفكرين .. منظرين .. واضعي قوانين .. واضعي اُسس .. كُتاب .. عباقرة ... الخ

اين موضع القوة الجسدية هنا ؟

المرأة هي من اخضعت نفسها للرجل ثم ما طفقت تحاسبه على ما اختارته هي !!!!

Quote: ياوليد زي مالدول المتقدمه مسئوله عن تخلف الدول الناميه وجهلها بواسطة الاستعمار والسيطره لخدمة أنفسهم في المقام الأول, الرجل مسئول عن تأخر المرأه وانزواءها في ركن قصي في ملكوت الله ..

لالالالالالالا
الدول المتقدمة ماهي المسئول الاول عن تخلف الدول النامية
ولا الرجل هو المسئول الاول عن تخلف المرأة

الدولة النامية هي المسئولة عن تخلفها .. لانها كسلت وركنت عندما كانت الدول متساوية .. فجدت امم وسعت .. حين كسلت اخرى وركنت
فتباينت القوى بعد حين لصالح من سعي وعمل بجد

نعم
هنالك مسئولية تحتم على الدول المتقدمة الاخذ بناصية اخواتها المتأخرة
لكن هذا لا يعني انها المسئولة عن تخلفها وتأخرها

اين كانت الدول المتأخرة .. عندما تقدمت الدول المتقدمة ؟

واين كانت المرأة عندما سعى الرجل ليعزز تميزه ؟

اخر الكلام

العلاقة بين الرجل المرأة هي علاقة مشاركة وليسة علاقة منافسة
ان صارت علاقة منافسة
تخسر المرأة

قريت ياوليد ..
ايراد المقوله مبتوره عن سياقها,
ثم الاسراف في تعديد محاسن الفيلسوف أوالمفكر ومزاياه ومكانته في زمانه,
ألبس البوست ثوب الذم بما يشبه المدح ..
أو النفي بما يشبه الاثبات ..

الأيادي الخفيه هي ماشعرت به من صياغة حمور لفكرته ..

هلا ياوليد:

Quote: فان كان الامر كذلك لماذا تجاهلتي قصة ادم وحواء والطرد من الجنة ؟!

قصة ابني ادم مذكوره نصا في القران, من أتيت بفكرة أن حواء هي من أخرجت ادم من الجنه؟

Quote: المرأة هي من اخضعت نفسها للرجل ثم ما طفقت تحاسبه على ما اختارته هي !!!!

معقوله بس؟
بعدين السيطره كانت مصدرها القوه الجسمانيه تاره, ورجال الدين وتفاسيرهم المغلوطه تاره,
ثم الفلاسفه ومقولاتهم المؤثره علي المجتمع وتقبله للمرأه تاره أخري .. وهكذا ..
السيطره كانت محكمه تماما وتنوعت فيها الوسائل ..

Quote: ان صارت علاقة منافسة تخسر المرأة

غير صحيح, أو بالأجدي:
Not any more man, it`s over (: (: (:

مرحب اماني

Quote: قصة ابني ادم مذكوره نصا في القران, من أتيت بفكرة أن حواء هي من أخرجت ادم من الجنه؟

من التراث الشفاهي المنقول على لسان الذكور والاناث
ولا انت ما سمعتيها

ان كانت المصدر المعتمدة في هذا المبوست القرآن فقط

كلمونا
ويسرى هذا الامر على الجميع

Quote: معقوله بس؟ بعدين السيطره كانت مصدرها القوه الجسمانيه تاره, ورجال الدين وتفاسيرهم المغلوطه تاره, ثم الفلاسفه ومقولاتهم المؤثره علي المجتمع وتقبله للمرأه تاره أخري .. وهكذا .. السيطره كانت محكمه تماما وتنوعت فيها الوسائل ..

هو المعقول بعينه

وانا بسأل
ليه الفلاسفة ورجال الدين واخصم منهم الرسل وخاصة الانبيا الذين عبرهم عرفنا كلام الله الذين استشهدتي به لتدعمي حجتك ( القران) جلهم من الرجال ؟
ولو سلمنا جدلا انه السيطرة البدنية سببها تفوق الرجال منحة ربانية على مستوى الجسد
ما هو سبب السيطرة على مستوى المفكرين والفلاسفة وهي سيطرة يحكمها العقل فقط

ممكن نقول برضو دي منحة ربانية !
ولا تكاسل من المرأة على مر العصور ؟

Quote: غير صحيح, أو بالأجدي:

بتابنو الكلام ده

شعرت بيها

رغما عن انه حمور كتب صراحة

Quote: عليه : فانا انقل هنا اقوال سيئة لا اتفق معها. و اغلبها ليس منقولا من مصادره الأم بل نقلا عن اخرين عن القائل و بها ترجمة. و سيسعدني ان استفيد من ردود المتداخلين على القائلين لا عليّ أنا. كما ارجو افادتي بمدى صحة نسبة الاقوال الى اصحابها ممن لهم اطلاع على الأصول. باختصار : هذه الأقوال على مسئولية اصحابها.

!

_______
المهم
حسب ما فهمت - ولو كان فهمي صاح - حمور اورد اقوال الفلاسفة وهو يستنكر تجاهل عموم اهل المنبر اقوالهم السالبه في المرأة مع التركيز على غيرها

اما ايراده واسرافه في ذكر محاسن هؤلا الفلاسفه - اعتقد - قصده كان ان يؤكد مكانتهم التي يحتلونها حتى يبرر استنكاره تجاهل اهل المنبر لاقوالهم

عدنا ...
اعفي لي يا اماني التأخير ..
حمور مالك من الاحتفاء نزلت لينا البيان 4 مرات ؟؟
برااااحة ... احنا ما مستعجلين و برواقة نوصل لفهم
يرضى كلا الأطراف ...

بالتبادي يا اخوانا، حقيقة مسلم بها أن القوي هو الذي يكتب القوانين و التاريخ
و الأطراف العليا دائما و ابدا بتخلق ايديلوجية تخدم مصالحها و تفرض سيطرتها
نطلع برة الإطار لعلاقة الرجل و المرأة، خلينا نشوف الاستشراق و علاقة الغرب و الشرق
و الغرب هو مصدر الاقوال اعلاه، تعامل مع الشرق على اساس انو الآخر Orient هو (الانثوي)
و الـ Occident هو الأقوى و العقلاني وبما أن الشئ يعرف بضده فهو الذكر أو الصورة masculine
للحضارة، و اوتوماتيكلي، اسبغ كل نظرياته المسبقة عن المراة على الشرق، و تعاطى معه على هذا الاساس
و اُستعمرت اوطان و امم و شعوب على هذا الاساس .. و احيلكم يا سادة لكتاب الاستشراق و بدايات التحركات الاستعمارية البريطانية ...

يعني الخلاصة، الفكرة المسوقة عن المرأة (صنعها) الرجل في مرحلة (التمكين) التي تلت اغتصابه للسلطة في المجتمعات الامومية، ولا قبل لي ولا لكم بنقة تاريخ و جنسانية ظهر يوم السبت و درجة الحرارة 52 و عمر الفاروق محذرني من النقة في السخانة لوووووول


المثير للأمر، هو حرص الكتاب بمختلف مشاربهم الادبية على فرض رؤيتهم الخاصة للمرأة و تعميمها
و التي غالبا ما تصب في قالب سالب، أما نماذج النساء الايجابية، فغالبا ما تجير محاسنها للرجل أو تعتريها مسحة من سلبية كالمكر و الدهاء أو كونها فاتنة الجمال ... يعني امرأة عادية الجمال و عاقلة و حكيمة ما بتلمو؟؟؟

شيء عجيب ياخ ...


عارف يا حمور المرأة اكثر تسامحا في تعاملها مع الرجل، تسامح مرده كونها (ام)
بالسليقة، و العنف منها رد فعل لا فعل أصيل ...

فاصل و نواصل ...

مرحب يا ذو اليد ..
المرأة عند الفلاسفة فقط لأني اريد ان اتكلم عن المرأة عند الفلاسفة فقط ..
ظننت ذلك واضحا !!!!

اما محمد احمد محجوب و الفردوس المفقود فلم افهم هل تشير الى القصيدة ام الديوان المسمى باسم القصيدة.
اما الديوان فلا اذكر ما جاء فيه كله طبعا.
لكن القصيدة ليس فيها الا غزل عابر حين يقول :
فتلك دعد سواد الشعر كللها اختي لقيتك بعد الهجر ازمانا
اختي لقيتك لكن اين سامرنا في السالفات فهذا البعد أشقانا

فهل هذا ما تقصد ؟
عموما ارجع معنا لاقوال بعض الفلاسفة السيئة عن المرأة و ناقشها معنا .

اماني ..
تاااني ازيك ..

Quote: هل قرأت مداخلة حمور هذه: Quote: لكن للاسف هنا احاول ان لا اناقش فكرة المرأة في الدين أيا كان الدين وهنا Quote: هل كل هؤلاء ظلموا المرأة ؟ سيكون من العجيب ان نقول ان المرأة تكاتف على اهانتها الاديان و الفلاسفة. فاما ان يكون هناك خلل في فهمنا لهذه النصوص او ان نقول ان ما قيل من اهانات هو فعلا وضع المرأة. و هذا الأخير لا يمكن ان يقوله عاقل.

ما عارف الانتي فهمتيو من المداخلتين ديل شنو ؟
استبعدت الدين باعتبار النقاش الجدلي انو سلمنا يا ناس انو الاديان اهانت المرأة .. خلاص خليها بره القوس ما عاوز اناقشا ..
لكن كمان اجي القى الفلاسفة برضو اهانو المرأة ؟ مش غريبة ؟
عشان كده طرحت الخيارات الشايفك ما اشتغلتي بيها :

Quote: فاما ان يكون هناك خلل في فهمنا لهذه النصوص او ان نقول ان ما قيل من اهانات هو فعلا وضع المرأة. و هذا الأخير لا يمكن ان يقوله عاقل.

و ده ليو علاقة باستنكارك :

Quote: قريت ياوليد .. ايراد المقوله مبتوره عن سياقها, ثم الاسراف في تعديد محاسن الفيلسوف أوالمفكر ومزاياه ومكانته في زمانه, ألبس البوست ثوب الذم بما يشبه المدح .. أو النفي بما يشبه الاثبات .. الأيادي الخفيه هي ماشعرت به من صياغة حمور لفكرته

تعديد محاسن الفيلسوف ما اعجابا بكلامو لكن تذكيرا لمكانتو تأكيدا لحتتي الفوق دي.
اما مسألة مبتورة من سياقا فارجعي لأول البوست بتلقيني قلت :

Quote: فعلا كتير من العبارات دي قد تكون منتزعه من سياقا. بل لو لاحظتي بعضها لروائيين فممكن تكون جات في نص رواية ما معبرة عن رأي الكاتب. لكن هي كلمات اشتهرت على السنة الناس. هسه ظللي اي جملة من ديل و خشي قوقل. تتخلعي. بوستات و مقالات كتيرة في مواقع و منتديات تنقل هذه العبارات باعتبار قال فلان . خلاص. اتمنى ان اسمع مناقشة لهذه الكلمات بطريقة ممنهجه. يعني فلان قال كذا لأنو ظروفو كده و كده. فلان قال كذا في رواية على لسان بطل. فلان لم يقل كذا قط. فلان قال كذا و هو غلطان و بالغ كلو كلو. نخطئ حين نقبل بالجملة او نهاجم بالجملة.

فغريب انك تجي تدينيني بحاجه انا نبهت ليها و اعترضت عليها و طلبت ليها حل.
انا متفق معاك من حيث المنطق العام انو الكلمات دي غالبا بل اكيد كتير منها منتزع من سياقو .. لكن انا وجدتها كده .. تميها لي.
مثال حي كلمة فرويد ..
كلمة فوريد اوردا ايرفينغ والاس في كتابو الجميل " الشبقة و مهووسات اخريات ".
و ما صادفتني في كتب فرويد العندي .. اعمل شنو ؟
انا لا احتج بها عشان تقولي لي منتزعة من السياق.
انا قلت ليك منتزعة من السياق فحليها لي.

اما كلامك ده :

Quote: من غير الممكن فصل الدين عن أي جزئيه من جزئيات المجتمع .. الدين بينعكس علي ثقافة المجتمع وقناعاته, وتذبذب وجود الدين وقوة تأثيره مقياس حساس لمفاهيم المجتمع وثوابته ومتغيراته ..

لأنو ببساطة فرويد كان ملحد و برناردشو ملحد و ما اظن زول اتهم سقراط انو متدين .
الناس الفوق ديل كلهم عندهم راي في الدين ايا كان.
فما ممكن تجي تلغي كل اجتهادم الالحادي عشان تقولي ليهم انتو متأثرين باديانكم الام.
اعتقد انو ده تجني كبير على الناس ديل.
و اعتقد برضو انو دي محاولة هروب من نقاش كلامم لعمومية انو الرجل منذ الازل يهين المرأة و الدين يكرس لهذه الاهانة فالفيلسوف رجل و متأثر بالدين فطبيعي يقول كده.
لأ يا اماني.
برنارد شو ملحد فما متأثر بالدين. و كون انو كفيلسوف يكون اسير لذكورتو و يعبر عنها فلسفيا يبقى سحبتي من تحتو قيمة الفيلسوف و عملتيو مجرد رجل بيتكلم.
اعتقد ده فجور في الخصومة.
يعني برناردشو لما يكتب كلام كويس عن النبي صلى الله عليه و سلم نحتفي بيو و نقول ده العظيم الرفض جائزة نوبل و نفرح. و لما يقول كلمة مسيئة للمرأة يبقى مجرد راجل بيتكلم بمفهومو الذكوري و متأثر بالدين ؟
يعني المعانا حلو و الضدنا ينعل ابوهو ؟
ما منطقي منك.


آخر المسائل معاك يا اماني حتى الان يعني لحدي ما تجي تاني ترشيني هي مسألة اني محتفي و الابتسامة الخفية ..
لو فرضنا جدلا اني محتفي .. جدلا يا اماني .. مش من حقي ؟ ديل عظام و كبار الفلاسفة و لو صدقتهم يبقى لي كامل الحق.
لو الوضع مقارنة ايوه انا افضل ان اصدق سقراط و لا اصدق اماني الامين.
يبقى لو انا محتفي جدلا بالكلام ده مفروض تردي لي عليو.
لكن ما تجي تعايني لي باشمئزاز و تقولي لي راجل محتفي بكلام راجل.ده ما منطق.
قولي حمور خاف و انكمش بكلامك ده .. اها تعملي شنو لزول يعمل سيرش في قوقل بعنوان " الفلاسفة + المرأة " و يلقى الكلام ده و يعجبو ؟
اسقاطك للكلام الذكوري بيعملك امازونية لانو بيلزمك ترفضي كل المنتوج الفلسفي و الفكري ده باعتبارو ذكوري بحت.
فما ممكن تقبلي كلام سقراط عن العدالة و ترفضي كلامو عن المرأة.
و يلزمك بعد شوية ترفضي نظريات فيثاغورث برضو لأنو رجل .. جزو من الجنس المسيطر و مهين للمرأة.
خليك مني يا اماني ..
ابدي لي بكلام الناس ديل بدون عموميات.
بعد تخلصي منهم تعالي للعموميات.
بعد العموميات تعالي رشيني .
انا قااااعد و ما عندي نية اموت خلال التلاتة اسابيع القدامنا دي الا ان يشاء الله غير ذلك.
سمح ؟

اعتقد كده عقبت على كل الناس المرو هنا مش كده ؟
فاضل زول ؟
ما اظن.
خلاص ممكن امشي بعد ده.








أوبس
كنت حانسى عزاز.
سمح .. نشوف عزاز قالت شنو.

Quote: سوق يا اخي في الذكورة ( اصلها جاطت خلينا نسوط حنانا ) لكن ما تعصر على اخواتنا ديل شديد. حاول معاي تطلع برد منهم على الاقوال اعلاه و كده يبقى ميه ميه يا عمك.

انا قلت كم مرة في المنبر ده
آن الاوان لقيام سيداو الرجالية

الاقوال اعلاه موجوده يا حمور العاوز يرد عليها برد ...
انا هنا همي محاولة النسوة الباس تقصيرهن للرجال فقط وان لا يلمن انفسهن ابدا على ذلك...؟
يعني الحنك ده بقى موضه والناس ساقت فيها

فان كانت المرأة هي الام العطوفة
فالرجل هو الاب الكريم
وان كانت هي الاخت الخدومة
فالرجل و الاخ الحنون
وان كانت هي الحبيبة البازلة
فالرجل هو الحبيب المُضحي
وان كانت هي الابن الصبورة
فالرجل هو الابن البار
وان كانت هي الصديقة الصدوقة
فالرجل هو الصديق الوفي

والرجل هو النبي
ولا نساء انبياء
وهو الرسول
ولا نساء رسل
وهو المفكر الذي قدم للبشرية
والنساء في ذلك قلة
والرجل هو الفيلسوف الذي نظر
والنساء في ذلك قلة
والرجل هو الكاتب الذي كتب
ووالنساء في ذلك قلة
و
و


النساء مقصرات وخانعات ولا يلمن في ذلك الا انفسهن اولا ثم غيرهن بعد ذلك
ان لم يستطعن ان يقدمن على مستوى البدن لتفوق الرجال في هذا
كانت وما زالت الطريق مفتوحة امامهن على مستوى العقل لكنهن احجمن حين تقدم لذلك الرجال

لكني بظل اطلب منهم رايم في الاقوال و قائليها.


حمور؟؟؟!!؟؟

انت جادي؟

فاتح لينا بوست حدادي مدادي بأقوال الفلاسفة عن المراة و دايرنا نرد عليهم؟
يعن ينرد على اساس شنو ؟ إذا واحد مرتو جننتو و التاني توجهاتو مثلية و التالث
جاي في عصر لقى المراة فيهو يا غانية يا راهبة .. ولا ابشرك، وكمان ماتو ...
نناقش شنو ليك؟؟

بعدين المعروض ما حاجة كميّة علشان نناقشها علميا .. دي حاجة نوعية، ولا مقاييس لها
زي التوب ابو اربعة امتار و نص و ممكن يلبس بنية (قشة ام روح) او امراة مقاس 56 ...


أماني تعالي استلي يا امي انا ماشة اتغدى وجاية

Quote: لو الوضع مقارنة ايوه انا افضل ان اصدق سقراط و لا اصدق اماني الامين.

تدنق دنق دنق ( موسيقى تصويرية )

اماني يا زميلة عليك الله اعفي لي
لكن لاذم البوست ده يتخلله قليلا من الجمجرة عشان يبقى مهضوم
وليك على اي حاجة منك بنفس المستوى لي حمور
اضحك حتى تبين نواجزي

حقك محفوظ يالاخت
لكن كلام حمور عجبني شديد
فما تختي فـ بالك

كلامك الفلاسفة ديل مابيختلف جوهرا عن الكلام الكان شاغل الناس هنا ( لسن هن للسرير فقط )
نفس المعنى ، فقط اختلاف فى مظهر الكلام ، لكن شاعرنا طبعا كان قاصد يمدحن ، بس خانو التعبير
يعنى متفوق على الفلاسفة ب : حسن النية

Quote: بعدين المعروض ما حاجة كميّة علشان نناقشها علميا .. دي حاجة نوعية، ولا مقاييس لها زي التوب ابو اربعة امتار و نص و ممكن يلبس بنية (قشة ام روح) او امراة مقاس 56 ...

شكرا عزاز فقد وضحت تحديدا الاشكاليه بتاعت النسوان هن شنو وبحبو شنو و و و...... الخ،،،

إتذكرت قصه باش كاتب كان شغال في صحيفه وكان يومها علي خلاف مع زوجته

وقابلتو عباره (أينما حلت المرأة حل السلام والطمأنينه) فكتب وهو في قمة غيظه(اينما حلت المرأة رحل السلام والطمأنينه).






___________________________________________________________________________________

حمور تحياتنا

اذيك يا عزاز ياخ ..
أبداك من وين انا ؟

[1]
كلمة سيمون الجميلة دي :

Quote: لا تولد المرأة امرأة ، وإنما هي تصير كذلك

الكلمة دي سمحة .. لكن ..
هل هنا الكلمة دي بتربط لفظ او تسمية المرأة باعتبارو شي مهين ؟
تولد انسان كامل الحقوق و لها سايكلوجيه كالرجل ثم تصبح امرأة اي شئ اخر مختلف و يظهر انه اقل درجة ؟
هل ده معنى الكلمة ؟
لو كده معناها سيمون تقول ان تسمية المرأة مرأة في حد ذاتو اهانة .. مش ؟
مالم نقول انها تقصد امرأة بمقاييس العصر او الواقع المهين للمرأة.
طيب مش ممكن نقول كده عن كلمة سقراط برضو ؟
انو سقراط ما حكم على عموم جنس النساء انما حكم على نساء عصرو او مرتو ؟
محتاج اناقشك في كلمة سيمون دي و الله لأنها زي كلمة توماس مان .. ظاهرها المدح لكن انا حسيت فيها نوع من الذم.
و زي كلمة صبري الشريف الفوق دي عن كرامة الحياة هي اكرام المرأة.


[2]

Quote: للحق يا حمور لا احتفي كثيرا بما يقوله الرجل في حق المرأة، كان ذلك الرجل نيتشه أو محمد احمد (محمد احمد طاقية فري سايز لاي رجل) لانه بلا شك، كليهما نيتشه و محمد احمد سيصفان (امرأة) لا أعرفها وقد تشبهني وقد لا تشبهني ...

طيب لو قول نيتشه ده بيشبه امرأة تانية .. هل نحتفي بيو ؟
لو محمد احمد وصف امرأة تعرف نفسها في هذا القول هل تسلم بيو ؟
المقياس شنو ؟
قد افهم انك ما بتؤمني بالقوالب الجاهزة للاقوال التي يتم تجسيد البشر فيها .. معاك و اتفق تماما .. لكن يبقى ما قيل من قوالب مطروح للنقاش لأنو مؤثر على اخرين بشدة.
ماذا نقول لمحب لسقراط يسلم بالتبعية ان المرأة اصل كل الشرور ؟
نقول ليو سقراط وصف امرأة ما بتشبه عزاز ؟
صعبه يا عزاز فمع تقديري ليك قد ما يكون الزول ده بيعرفك ياخ.

[3]

Quote: الشاهد، الرجل و كل المفكرين المرصوصين أعلاه واللي حيترصو أدناه، عميان بيوصفو في فيل ... كل بحسب ما رأي ويسر له من تجربة و فهم و مقدرة على التحليل

فتح الله عليك ياخ ..
لو ما منبر عام كان قمت صفقت ليك في المداخلة دي.
يلا انا عاوز تطبيق النظرية دي على المرصوصين اعلاه.
ليه بطلب الطلب السغيل ده ؟ عشان اي نظرية مفروض تكون مبنية على مشاهدة و تجريب و تفكيك للكليات و تجميع للجزئيات عشان تطلع مختصرة و لطيفة زي كلمتك دي.
لكن مجرد ان نقولها لأنها تعجبنا او تجد هوى في نفوسنا بيبقى ما صاح.
يعني هسه لو قمت انا قلت ليك المرصوصين فوق ديل فلان فيهم كان متزوج و يعيش حية سعيدة و امو مره عسل و اخواتو قديسات و كل علاقتو بالمرأة سوية مش نظريتك بتختل و بتكون مجرد قول مرسل ؟
اثبتي لي نظريتك يا عزاز بنقاش الناس اعلاه ديل عشان ما يكون كلام ساي اي راجل يقول كلام كعب في مره نقول قالوا لأنو مرتو مزهجاهو.
انا ساعدتك في سقراط .. شوفي لي الباقين.
مثلا هوميروس ده انا ما عارفو قال كده ليه و الله.

[4]

Quote: ونرد علي الناس الكتبت الكلام ده من سنة دو لشنو و علشان شنو؟ هو كوننا نساء مطالبين نصحح الفهم ده بأثر رجعي ولا نعاين لقدام و نقدم بيان بالعمل ؟؟

ايوه مطالبين اننا (شفتي اننا دي كيف ) نصحح الفهم ده بأثر رجعي ..
لأنو في زول فكرو و وعيو بيشكلو ليو برنارد شو .. يبقى لما نجي نقدم ليو مثال مختلف حيقول لينا مش دي المرأة القال فيها برنارد شو كده و كده ؟
يبقى نحن مطالبين باننا ننتقد ليو كلمة برنارد شو و نوضح ليو اسباب الخطأ القاد برناردشو للحتة دي بدون ما نخليو يفقد احترامو لمنتوج برناردشو الباقي. لأنو بصراحة لو زول كره برناردشو عشان الكلمة دي و رماهو حيخسر مسرحية سيدتي الجميلة و الكلام ده ما صاح في حقو ياخ.


[5]

Quote: الدين هو البيشكل وعي الانسان – رجل او امرأة ... و نظرة الرجل للمرأة انها شر مسستطير لو تبعت الحبل بتلاقيهو مارق من قفطان الدين

بدون سخرية و بكل جدية يا عزاز سيسرني ان تثبتي لي كيف اثر الدين في مقولة فرويد اعلاه.
اثبتي نظريتك العامة بتتبع الحبل الى اخره.
هل فرويد عندما سأل سؤاله المهين للمرأة باعتبارها كائنا حائرا كان متأثرا بالدين ؟ طلعي لي الكلام ده من بنية عقل فرويد لو سمحتي.


متعبة انتي ياخ و نضامة ( يقال انه شأن النساء في الذهن الذكوري )
حاتم ليك في مداخلة تانية

[6]

Quote: هناك فرق بين توصيف حالة وإن كانت تبدو اهانة و بين وضع مفروض وبين حقيقة تفتكر ليه الفلاسفة و رجال الدين كلهم رجال؟ وليه مافي نفس القدر من االتوصيف الدقيق للرجل وبالذات التوصيف السالب؟ ليه الراجل ما ليهو مانيوال ولا كتالوج؟؟ اسئلة القيها في اليم ... و بعدين نجي نشوف غمزت شنو

جملتك الأولى يا عزاز التحتها خط دي هي المحور القاتل .
لو واصلتي فيها كان حتكون مبحث مهم جدا و هو جزء مما ابحث عنه.
ما عارف ليه خليتيها و مشيتي ورا حاجات تانية.
ارجو انك تفككي العبارة دي لمداخلة كاملة دسمة تستصحب الامثلة اعلاه لتبيين انها توصيف حالة.
اما الفلاسفة رجال و رجال الدين رجال فحاجاوبك على الاولى و اقول ليك ما كلهم. لكن السؤال هو ليه الفيلسوفة او الكاتبة ما بتعمل كاتلوج للراجل كجزء من فهم الطبيعة البشرية بنوعيها ؟
انتي هنا بتوحي انو الحال حال منافسة (برجعك طوالي لمداخلات وليد و اماني ) كأنو الرجال احتكروا الفلسفة و حموا النسوان ما يتعملوا فلسفة.
ممكن اتفق معاك انو الاغلب انو الرجال فلاسفة .. عشان كده العقاد مثلا اعتبر انو ده جزو من طبائع الاشياء و البشر.
انو الرجال بيهتمو منذ بدء الخليقة باشياء غير ما تهتم به النساء.
و للنساء اهتمامات مختلفة.
عشان كده العقاد بيقول انو الرجال صنعتم الشعر و الفلسفة و السياسة من قراءتو لسياق التاريخ.
هنا بنلقى العقاد ما اعتبر المرأة كائن عاجز بل كائن مختلف.
كون انها ما تمارس الحاجات دي ما معناها ما بتقدر لكن معناها اهتماماتا مختلفة.
معروف انو المرأة مثل اقدر على ادراك التفاصيل من الرجل لأنو ذاكرتا بصرية. عشان كده بيشغلو في هوليوود بت في وظيفة فتاة التتبع. بتحفظ اللقطات البينساها المخرج زاتو. صعب تلقي راجل يتذكر ليك انو الممثل في اللقطة الفاتت كان ليقاة قميصو مرفوعة وله لأ. لكن المرأة تحسن لقط هذه التفاصيل.
انتي بتعتبري انو تم اقصاء النساء عمدا.
جدا يا ستي. انا ما برفض كلامك.
لكن بقول انو بيحتاج بحث و امثلة كثيرة جدا.
يعني لما نلقى انو سقراط كان بيمنع دخول النساء لمدرستو ما معناها الجنس الرجالي بيقصي النساء دائما. الخروج باحكام عاوز قراءة لكل التاريخ و الا يبقى هوى ساي,
و انتي ما كده.


[7]

Quote: يعني الخلاصة، الفكرة المسوقة عن المرأة (صنعها) الرجل في مرحلة (التمكين) التي تلت اغتصابه للسلطة في المجتمعات الامومية، ولا قبل لي ولا لكم بنقة تاريخ و جنسانية

برضو كلام حلو لكنو عام يا عزاز ..
عام شديد.
انا ما فتحت بوست قلت النسوان كعبات .. انا فتحت بوست قلت في فلان و فلان من الفلاسفة اهانوا المرأة ردوا لي عليهم ..
كون انو تقولي لي دي فكرة سببا انو الرجل اغتصب السلطة من المرأة و قال فيها كده ده رد عام.
يعني افهم منو انو سقراط اسير لمجتمعو و ذكورتو ؟
طيب كتلوهو ليه ؟ و فلسفتو مبنية على شنو ؟
الارتباط ده عندو حل .. عارفو و متفق معاك عليو سلفا. لكن عاوزو منك و من غيرك من المتداخلين.
فرتقي لي و للقارئ انو كيف ممكن الفيلسوف الثائر التجديدي يقول راي غلط في حاجه اسيرا لمواقف معدة سلفا من غير ما تهدمي لي صنم الفيلسوف.


[8]

Quote: المثير للأمر، هو حرص الكتاب بمختلف مشاربهم الادبية على فرض رؤيتهم الخاصة للمرأة و تعميمها و التي غالبا ما تصب في قالب سالب، أما نماذج النساء الايجابية، فغالبا ما تجير محاسنها للرجل أو تعتريها مسحة من سلبية كالمكر و الدهاء أو كونها فاتنة الجمال ... يعني امرأة عادية الجمال و عاقلة و حكيمة ما بتلمو؟؟؟

كلام سليم شديد و عشان كده انا فوق اعتبرت مدح شكسبير للمرأة فيو نوع من الانتقاص بحسب المفاهيم الجندرية.
و ده البيقودني للسؤال الخالد ..
هل انصاف المرأة مساواتا مع الرجل وله الاعتراف بمكانتا النختلفة الموازية و مميزاتا الانثوية ؟
لكن ده ممكن نناقشو بعد نخلص من الناس المحترمين (غصبا عن استاذ الطاهر ساتي ) القالوا كلامم الفوق ده.
سمح ؟


[9]

Quote: حمور؟؟؟!!؟؟ انت جادي؟ فاتح لينا بوست حدادي مدادي بأقوال الفلاسفة عن المراة و دايرنا نرد عليهم؟ يعن ينرد على اساس شنو ؟ إذا واحد مرتو جننتو و التاني توجهاتو مثلية و التالث جاي في عصر لقى المراة فيهو يا غانية يا راهبة .. ولا ابشرك، وكمان ماتو ... نناقش شنو ليك؟؟ بعدين المعروض ما حاجة كميّة علشان نناقشها علميا .. دي حاجة نوعية، ولا مقاييس لها زي التوب ابو اربعة امتار و نص و ممكن يلبس بنية (قشة ام روح) او امراة مقاس 56 ...

أيوه جادي ..
و جادي شديد كمان.
لأنو لما اتجاهل قول فرويد لأنو رجل و مرتو غالبا جننتو (بدون تفاصيل او تأكيد ) و اقول دي حاجه نوعية بيكون بنفس المنطق اديت حق لزول تاني لما اجيب ليو كلمة جميلة في حق المرأة من رجل انو يقول ده زول بتاع جكس و اكيد مرتو كانت مريحاهو و عاوز يكسب ليو مكانة عند النسوان. او لو كانت كلمة امرأة زي سيمون حيقول ليك مره ولازم تقول كده دفاعا عن جنسها.
يبقى راح المنطق و بيقنا في التصنيف و ده فيو اهدار لحقوق الناس ديل شديد.
طيب ياخ انا رافض كل منتوج برناردشو لأنو ايرلندي. كده كيف ؟
هل ده منطق ؟
انا ما طلبت منك مناقشة قضية المرأة يا عزاز رغم انو البوست بيثيرا ..
انا طلبت في البوست الحدادي المدادي انو نناقش مقولات الناس ديل.
لو الكلام ده ما منطقي .. يبقى فعلا بوست غير موفق.
لكن يظل لمن اتبع برنارد شو عذره لأننا ما وريناهو ليه برنارد شو قال كده و هو زول معجب ببرنارد شو شديد.

المداخلة دي جات هنا بالغلط
Sorry وكدة

الشاهد، الرجل و كل المفكرين المرصوصين أعلاه واللي حيترصو أدناه، عميان بيوصفو في فيل ...
كل بحسب ما رأي ويسر له من تجربة و فهم و مقدرة على التحليل ...

عزاز زاتها يا حمور ما حتلقى ليها مرتكز نسوي عشان ما تنقد على اساسه .. نيتشة ولا سقراط وبرناردشو او فرويد ...
اتحدها تجي تنتقد نقد موضوعي بدون ما تتشهد بكلام ذكر
اتحداها تحدي صريح
طالما انها قالت لا تحتفي بقول الرجال في النساء
عليها ان تبين بطلان كلام الفلاسفة اعلاه وتستند في دفوعاتها على منتوج معرفي نسوي فقط
وما حا تقدر

صحيح تجد انت وتستجد هي اخطاء في المنطق والفهم والشرح
واخطاء كثيره في المنتج الذكوري على مستوى المعرفة

والسبب بسيط
لانه المنتج الذكوري في المعرفة كتير وهو الغالب عشان كده غلطو كتير زيو
وطالما انه الانسان بنتج لابد وان يخطي


لكن النساء شغلات بنظرية الجيش
تشتغل كتير تغلط كتير .. عشان كده اعمل ميت

Quote: كلامك الفلاسفة ديل مابيختلف جوهرا عن الكلام الكان شاغل الناس هنا ( لسن هن للسرير فقط ) نفس المعنى ، فقط اختلاف فى مظهر الكلام ، لكن شاعرنا طبعا كان قاصد يمدحن ، بس خانو التعبير يعنى متفوق على الفلاسفة ب : حسن النية

استاذ الطاهر ..
اذن فليبل الفلاسفة رؤوسهم للحلاقة.
انا المزعلني لحدي هسه انو اخواتنا ديل سابوا الفلاسفة و قبضوا فيني انا.
شفت كيف تفضل المرأة الحيطة القصيرة ؟
رغم اني اطول من برناردشو و الله.

Quote: شكرا عزاز فقد وضحت تحديدا الاشكاليه بتاعت النسوان هن شنو وبحبو شنو و و و...... الخ،،،

سيد المسلمي و المداخلة القاتلة.
يعني يا ابو السيد انت بتسأل اشمعنى عزاز اختارت مثل التوب و بنيت انو عقليتا الانثوية ماشه على الاتجاه ده ؟
همممم .. ما اظن ياخ.

Quote: اتحدها تجي تنتقد نقد موضوعي بدون ما تتشهد بكلام ذكر اتحداها تحدي صريح

يا زول انت رايح ليك تحدي ؟
بالمناسبة ..
هل لو قلت ليك ياخ عيب عليك تتحدى فتاة و مفروض تعاملا باحترام اكتر من كده هل ده بيعتبر تقدير للمرأة وله اهانة ليها ؟
لأنو لو اتحديت راجل ما كان في زول حيقول ليك عيب.

انا ماشي اتغدا و سايب البوست ده وداعة في رعاية ستي مريم الخدرا.
ما بقدر اخليو لسيدي الحسن عشان راجل.

بالله يا جماعة طقطقو لي الناس الفوق ديل خلونا نخلص.
ما ممكن انا من امبارح راجي زول يرد عليهم ما لاقي.
لو طولتو بجي ارد براي لكن بتبقى بايخه اجيب الكلام و ارد عليو .
وين الخوه و الزمالة ؟

Quote: التفكير في كلمة توماس مان التي ذكرتها لي الاستاذة اخلاص و بعض العبارات المأثورة التي قلتها لها في اجابتي ( و التي بلا شك زينت التحقيق باعتباري انا صاحبها ) جعلتني افكر في موقف كثير من الفلاسفة و المفكرين عن المرأة. فرغم اني ضعيف في علوم الجندر و مفاهيم الانثوية الا اني بحكم الاطلاع وقفت على اراء كثيرة سيئة في المرأة. و تعجبت اني لم اطلع على نقد لهذه الاراء على حده. فعلى حين وقفت كثيرا على نقد لايات قرانية و احاديث نبوية يظن منتقدها انها تهين المرأة و ذم لأمثال سودانية تحط من قدر المرأة الا اني لم اطلع على نقد خاص لكثير من كلمات الفلاسفة و المفكرين السيئة في حق المرأة. بل كثيرا ما تجد لها التبريرات كما فعلت انا نفسي حين قلت ان الفيلسوف يمر بتجربة سيئة مع امرأة فيعمم الحكم. هذا قول فيه شئ من الاعتذار عن رأي الفيلسوف السئ في المرأة. هنا - في هذا البوست - احاول ان اخرج رؤوس بعض الفلاسفة و المفكرين للمقصلة النسوية.سأورد اقوال و امثال لفلاسفة و شعوب اروربية مسيئة للمرأة. هل احتاج ان اقول اني لا اوافق على هذه الأقوال و ادينها بشدة ؟ حسنا .. بوضوح انا لا اتفق مع كل ما سأنقله هنا. و في تقديري هي اراء سيئة و لو تجاوزنا فيها فسنقول ان لها ظروفها الشخصية. لكن لا يصح اطلاقها على النساء عامة.

غايتو كل زول يجيب البعجبو

انا نقلت المداخلة حقت حمر دي للصفحة التانية
واتمنى لو النقاش مشى في الحته دي

.
.
.
كش ملك

ااخوات بي حقهن لكن في جماعه كانت داوشانا
في المنبر الليله لبدت عديييل

عفواً لحظه :

موضوع الدين ما تفوتوا ساي

حمور ممكن برضو تعمل فوكس تاني عليهو

في قادم ردودك





مدخل للخروج :

أنا لم أزل لهفان وانت الابيه....... سنيتي أن تحيي دائما خبيه
لو فى النساء رسل كنت النبيه ......مابسلي ريدك لا وحياة ابيه


الشاعر احمد حسين العمرابى من شعراء الحقيبه من مواليد قرية المطمر
بين الدامر وشندى سنة 1904... ورث مهنة الترزية من والده

..

حمور




طوبتي جنب طوبة عزاز...

(( قال (( سيجموند فرويد)) :
إن السؤال الكبير الذي لم يُجب عنه بعد ((و الذي لم أقدر بعد على الإجابة عنه)) (( على الرغم من قضائي ثلاثين عاما في البحث في الروح النسوي )) هو :
[ ما الذي تريده المرأة ؟] ))

حمور سلامات ...

انت يا اخوي جبت كلام الفلاسفة ديل مخير ولا انحنا قلنا ليك جيبو؟ انحنا ناقشناك انو كلامهم لا يصف وضع المرأة بالمطلق و قامت الصينية مالت و ادردقت منها كبابي و صحون المراة و الرجل و العميان جا شايل المكسر كحالنا دائما و ابدا عندما يدق صيوان فيه شنب و ضفيرة ....
انت عارف سؤالك على كل مقولة ممكن يكلفني كم من الوقت لكلينا لاثبات ما قلته انا أعلاه و تحسبه قولا مرسل بلا سند أو أوتاد؟

يا حمور العقاد نسبت له اسوء أقوال عن المرأة، لم تمنعني يوما من قراءة أعماله، و قراءة أقواله في خلفيتها الظرفية، وهو شأن و دور فردي يقع على عاتق القارئ و الباحث ولا يمكننا تلقيم المعارف و الرؤى بالملاعق ولا تنقيطها نقطة نقطة في عقل عزيزي القارئ...

Quote: ماذا نقول لمحب لسقراط يسلم بالتبعية ان المرأة اصل كل الشرور ؟ نقول ليو سقراط وصف امرأة ما بتشبه عزاز ؟

مخير ... وليس لي أمر في خيار أحدهم مالم يجر ضررا لي، وإن أراد فلا يلزمه سقراط ولا ابقراط، الاقوال دي بتجي زي رشة السكر على وش الغريبة يا حمور يا ، لانو وعينا بالجندر و قيمة (الآخر) بيكون نتاج عوامل كتيرة (محسوسة) و (معاشة)والوصول لمرحلة الأقوال بيكون لتدعيم ما وقر في القلب ...

انت نسيت حاجة مهمة جدا يا حمور، الأدب دائما بيعكس المحيط، لا العكس، ممكن يكرس للقيم السائدة، بس ما بيخلق جديد، بيعيد تدوير ما كان وهو توثيق تاريخي، بالمناسبة دي آخر واجب في القراية ام دق كانت اثبات انو التجربة الشعرية لـ آننا اخمتوفا ، شاعرة روسية، يعد نوع من التوثيق التاريخي لحقبة ستالين و بدايات الثورة في روسيا، و علشان اثبت السطر ده يا حمور قضيت 10 ايام قراءة وحتى هذه اللحظة لم افرغ من المواد، لانو الاثبات يتطلب قراءة التاريخ و تحليل للنصوص و ربطها بالسيرة الذاتية، وما باقدر اقول ببساطة انو هي اتشطبت من رابطة الادباء الروسيين فوق كم لو كان شعرها ما توثيق، لأنو دي ما دروب الحجة، بس الحجة اللي انت طالبني ليها شنو يا ابوي؟ اثبت لمنو وليه انو كلام برنارد شو حقيقة غير مطلقة؟ المحصلة الحقيقة شنو؟ والُمخاطب منو؟

ما شايف انو دي وصاية؟

ممكن يكون دوري عكس صورة المرأة البترضيني، و تجويد وجودي ...و والحق بركب الإنسانية الكز الرجل في كتفوا قول ليهو اهو انا دي سند و عضد (بكامل ارادتي) ما تقيلة ولا شر .... و أشجع الصورة المثلى للمرأة-الإنسان،و اترك الباقي لدورة الحياة ...وللأدب المعاصر يكرس صورة أبهى للمرأة، و نشتغل على الأرض بدل سك الجماجم و الهياكل العظمية ..

محاكمة نصوص قديمة لا يخدم أحد يا حمور، وخاصة انها ما نتاج بيئتنا اصلا .. و دونك محاولات القراءة الوسطية للنصوص الدينية وما تجره من ويلات و إحن ...

البيان بالعمل ... انا ده مبدأي يا حمور ...

Quote: وللأدب المعاصر يكرس صورة أبهى للمرأة، و نشتغل على الأرض بدل سك الجماجم و الهياكل العظمية ..

ماشي الدافنة وجاي يا حمور
توفي احد اقربائنا كان ريسا يوما ما وهو الان بين يدي الرئيس الحق

لي بعدين

احسن الله عزاكم يا وليد و جبر كسركم.

عزاز لامن اجيك تاني برواقة اسمحي لي اني اقول ليك مداخلتك الاخيرة دي خلعتني رسمي.
اصلو ما اتوقعت اسمع كلام زي ده و خصوصا منك.
فهمت منها - و اتمنى اكون غلطان - انو ما يهمك مناقشة رأي رجل سئ في المرأة ايا كان لانو ما شايلاهو معاك و ما شغاله بيو و العاوز يصدق الراجل ده يصدقو دي مشكلتو.
طيب من الصباح بنناقش في شنو يا عزاز ؟
لو انا مؤمن بالكلام ده مش برضو انا مخير و على كيفي ؟
انا جبت الكلام ده عشان يترد عليو بالساعات و بالواحدة و احدة و عارف انو كتير لكن كان نفسي القى فوائد زي دي.
زي ما بلقى النقاش حار و جادي لما اجيب اية قرانية و اقول الاسلام اهان المرأة و جعل ميراثا نصف الرجل رغم انو ده ما حقيقي.
لكن بلقى نقاش و استفاضة و مقولات جميلة و قبيحة.
ليه لما بقت هنا سقراط و برناردشو ما لقيت الكلام ده ؟
؟؟؟؟؟؟؟
و الاغرب القاك انتي بتجي تقولي لي العاوز يصدق كده مخير.
وين المقاومة و مكافحة الافكار السالبة و الوقوف في وجه الافكار المسيئة للمرأة ؟


فكري تاني و تاني بجيك.

ازيكم, ومساء الخير,

Quote: و اعتقد برضو انو دي محاولة هروب من نقاش كلامم لعمومية انو الرجل منذ الازل يهين المرأة و الدين يكرس لهذه الاهانة فالفيلسوف رجل و متأثر بالدين فطبيعي يقول كده.

أول حاجه مامتذكره اني قلت ياحمور انه الدين يكرس لاهانة المرأه,
الدين أو المعتقد بيؤثر علي المجتمع والفرد بيتأثر بالمجتمع وبيأثر فيه ..
ولم أتحدث عن علاقة برناردشو وللا سقراط بالدين,
كل القلتو انه من غير المعقول فصل أو اقصاء وابعاد الدين حين نناقش موضوع المرأه ..
المعتقد والمجتمع ومكانة الأفراد نسيج مغزول بعنايه ومن الصعب نقضه وتجزئته .. هذا ما عنيته ..
ثم ياسيدي مانت نفسك مستشهد لي بي رأي فلاسفة الكنيسه حتي شوف:

Quote: قال توما الاكويني : المرأة انسان ناقص التكوين و كائن عرضي . توما الاكويني قسيس ايطالي . هو أحد معلمي الكنيسة الكاثوليكية. و له مدرسة فلسفية اثرت على الفكر الحديث سواء بالموافقة او الاعتراض. و يعتبر فيلسوف الكنيسة الأعظم لذك سميت باسمه مؤسسات تعليمية عديدة.

طيب:

Quote: فما ممكن تقبلي كلام سقراط عن العدالة و ترفضي كلامو عن المرأة. و يلزمك بعد شوية ترفضي نظريات فيثاغورث برضو لأنو رجل .. جزو من الجنس المسيطر و مهين للمرأة.

عارف ياحمور المشكله انك ماخد الموضوع ك Package واحده,
منو القال ليك انو سقراط قال كلام منزل؟
منو القال ليك انو كلام برناردشو يؤخذ ولايرد؟
مش فرويد العاجبك ده عندو مدرسه في علم النفس لاقت العديد جدا من الانتقادات (موضوع الأطفال والجنس)
ولاتدرس الا ويشار الي اختلاف المدارس الأخري معها وعدم قبولها من النقاد,
وقلت ليك قبل كده انه العديد من النظريات العلميه اللي لاقت رواجا ولاقي أصحابها الاحتفاء كله في زمانهم,
أثبتت عدم صلاحيتها لاحقا, أو عدم صحتها حتي في بعض الأحيان ..
ياحمور عندنا في الScience أي نظريه تقبل وترد لايوجد مايسمي مسلّمات أو حقائق مطلقه,
يبقي لما تجي تقول لي أبقراط قال المرأه مرض, ما حأقول والله طالما قال الكلام ده أبقراط يبقي أنا أماني الأمين الماعاجباك دي حأخرس خالص,
لأنه ده أبقراط واش جاب لي جاب,
لأ ياسيدي لاقداسه في العلم لا للأفراد, ولا للمقولات,
والفلاسفه ديل جزء من منظومه متكامله كانت ومازالت تضطهد المرأه ولاتحترمها,
أنا بقبل من كلام الفلاسفه البتماشي مع عقلي والمنطق والواقع, وماعداه مابتوقف فيه أصلا,
فياسيدي صدق سقراط واحتفي بيه اذا حابي, وقدسه ان شئت,
ولكن العالم لم ولن يتوقف عند ما قاله سقراط وغيره فاغرا فاه بدون حراك,

ولسه برجع ليك ..

Quote: ولكن العالم لم ولن يتوقف عند ما قاله سقراط وغيره فاغرا فاه بدون حراك,

بل توقف يا اماني
ما بين 469 و 399 ق.م عاش بشر كثيرين ذكر لم يذكر منهم الا سقراط وتلاميذه
سقراط نقطة مفصلية وعقدة محورية وشخصية تبنى على افكارها كثيرة من مفاهيم حاضرنا هذا

صحيح سقراط وابقراط كلامهم ليس منزل وقابل للنقدوالنقض
لكن كمان ما كلام ساكت يمر عليه مرور الكلام

ان كان كذلك

لماذا صمدت مقولة سقراط هذه 2500 سنة ووصلت لحدي منبر بكري ده لتناقش ويفتح حولها حوار؟!

وليد انشاء الله البركه فيكم,

ياوليد وياحمور,
الموضوع الماقادرين تفهموا راينا أنا وعزاز فيهو,
حأحاول ألخصوا ليكم ببساطه,
لما تجي لي امرأه عامله ناجحه في سنة 2009 وتشير لكل بنات جنسها بأصابع الاتهام,
وتستدل بانه كل من الدين والفلسفه والعلم اتهموا المرأه وقالوا فيها أقذع الكلم,
مرض ومصدر كل شر وشعر بدون رأس :)
وما الي ذلك, وبعدين عايزنا ندافع عن أنفسنا وننفي الاتهام عنها,
مع انه المرأه أصلا تجاوزت مثل هذا التثبيط والافتراء,
وقفزت في طريق الاعمار والبناء ..
تبقي حابسني في دائرة اتهام أنا خرجت منها أصلا "أنا هنا بقصد بيها المرأه"..
وبعقليتي بتاعة الليله حأرفض مقعد الاتهام أصلا وكمان حأحملك مسئولية حبسي علي مر السنين,
في مقعد الصوره والعقل الفارغ ومصدر الشرور, واستأثارك بالفكر والعلم,
وقبل ما يجي واحد فيكم ويقول لي المنع المرأه من الابداع شنو؟
حأقول ليكم المنعها نفس اللسه مانعها جزئيا,
قيود المجتمع الذكوري الضاربه حولها بشده ولاتجد فكاكا منها ..

ياحمور ووليد دعوا المرأه تبدع بعيدا عن مرارات الماضي,
وقيود الحاضر ومخاوف المستقبل,
وليقل الفلاسفه مايريدون فليس هذا ما سنسعي لنفيه أو اثباته,
فالمرأه عقل وفكر وروح رغما عن أنوفهم ..

احتراماتي..

الله يبارك فيك اماني

Quote: فالمرأه عقل وفكر وروح رغما عن أنوفهم ..

صحيح
رغما عن انوفهم وانوفنا

عن نفسي لا اشك في هذا البته
اختلافي معاك في انه السبب الرئيسي لتأخر ابراز المرأة لامكاناتها المهولة

انت بتقولي الرجال
وانا بقول النسوان انفسهم

لكن ده ما موضوعي ولا مقصدي من التداخل في هذا البوست
عارف ليه
لانه رائ الفلاسفة مع احترامي ليهم ما بتوافق معاي ولا بعنيني

موضوعي هنا

ليه لمن تجي سيرة المراة في الدين الاسلامي تحديدا
يدخل بعض اهل المنبر
ويسهبون ويصفون الاسلام باقذع الاوصاف
وهاك يا مداخلات وبوستات فرعية

الذين اوردهم حمور هنا هم رسل دين العلمانية المبني على التنصل من الدين وجعل العلم دين الدولة
يعني هم جوهر الفكر العلماني وتعبيره الروحي لو جاز التعبير

ليه صبري الشريف جدع ليه كلمتين وشتت تاني ما دخل
لي ناس كتاااااااااااااااااااااار
بتاوقوا في البوست ده وما خشوا وقالوا وثبتو موقف
كانو بصرحوا بيه كتير في بوستات سابقة


؟؟؟؟؟؟؟؟؟؟؟؟؟؟؟؟؟؟؟
!!!!!!!!!!!!!!!

اما رائي في علاقة المرة والراجل قلته قبيل وبعيده
هي علاقة مشاركة وليست علاقة منافسة

A man chases a woman until she catches him. ~American Proverb

وليد كده اتفقنا تماما ياسيدي ..

شكرا علي الحوار الهادئ,
واحترام وجهات النظر ..

تحياتي ..

Quote: محمد الجيلي .. ما لقيته المرأة من عنت يفوق الوصف .. اتمنى افادتي بموضوع ابراهيم الكوني .. لم اطلع على شئ كهذا من قبل و للاسف اطلاعي على الكوني ضعيف نوعا ما.

أستاذنا حمور

الزول ده من المستميتين فى العداوة ضد المرأة

وجدت له عدة نصوص ومؤلفات لكن خانتني ذاكرتي فى إيرادها

فقط أذكر منها :

Quote: - يجد الرجل السعادة في رفيقة الحياة .. التي وجد فيها الرجل ..(وليس المرأة). - نحيا سعداء إلى جوار قرينة وجدنا فيها سجية الأنثى، وروح الرجل .. - البطولة ليس أن يهزم الرجل رجلا .. البطولة أن يهزم الرجل امرأة. بالنار يمتحن معدن الذهب .. وبالذهب يمتحن معدن المرأة .. وبالمرأة يمتحن معدن الرجل. * لا يفلح من أسقط من حسابه المرأة. *لا يفلح أيضاً من سلم زمام أمره للمرأة. * من عرف حقيقة المرأة لا يصير عدواً للمرأة بقدر ما تصير المرأة عدوه. * تؤثر المرأة رجلاً يوافقها في ما تقول، ولكنه يفعل عكس ما تقول، على رجل لا يوافقها في ما تقول، ولكنه يفعل ما تقول.

الفوق دى شوية إقتباسات بسيطة من كتاباتو ..

الأراء الواردة أعلاه فى ذمة قائلها وأنا عامل ساتر من أى فليق ولا طوب[/B

المداخلة بالغلط مشت الصفحة الأولى عشان كدة أعدتها هنا

ازيك يا اماني ..

Quote: أول حاجه مامتذكره اني قلت ياحمور انه الدين يكرس لاهانة المرأه, الدين أو المعتقد بيؤثر علي المجتمع والفرد بيتأثر بالمجتمع وبيأثر فيه .. ولم أتحدث عن علاقة برناردشو وللا سقراط بالدين, كل القلتو انه من غير المعقول فصل أو اقصاء وابعاد الدين حين نناقش موضوع المرأه

لأننا كنا بنتكلم عن اقوال الفلاسفة في المرأة و الأقوال دي سيئة و انتي قلتي انو الدين بيؤثر فلا يمكن عزلو عشان كده أنا فاتكرت انو قصدك رأي الدين السئ هو الادى لرأي الفلاسفة الكعب.
بما انو انتي ما قلتي انو الدين كرس لاهانة المرأة يبقى كلامك عن الدين ما ليو علاقة بحتتنا دي بل هو استطراد فما كان في داعي انا اعلق عليو.. اسف.
يبقى رجعنا للنقطة الاولى ,,
عدد من الفلاسفة المرموقين اهانوا المرأة بماذا نرد عليهم.


بالنسبة لتوما الاكويني فهو فيلسوف مؤثر على المسيحية و ليس راهبا مؤثرا على الفلسفة.
في اقوال لرهبان و قساوسة و مجامع كنسية ضد المرأة كتيرة .. مثلا الكنيسة في انجلترا كانت تمنع المرأة من قراءة الكتاب المقدس . لكن ده موقف ديني ما بيهمني هنا. توما فيلسوف اكثر من قسيس. عشان كده جبتو هنا بصفتو الفلسفية.

Quote: عارف ياحمور المشكله انك ماخد الموضوع ك Package واحده, منو القال ليك انو سقراط قال كلام منزل؟ منو القال ليك انو كلام برناردشو يؤخذ ولايرد؟ مش فرويد العاجبك ده عندو مدرسه في علم النفس لاقت العديد جدا من الانتقادات (موضوع الأطفال والجنس) ولاتدرس الا ويشار الي اختلاف المدارس الأخري معها وعدم قبولها من النقاد, وقلت ليك قبل كده انه العديد من النظريات العلميه اللي لاقت رواجا ولاقي أصحابها الاحتفاء كله في زمانهم, أثبتت عدم صلاحيتها لاحقا, أو عدم صحتها حتي في بعض الأحيان .. ياحمور عندنا في الScience أي نظريه تقبل وترد لايوجد مايسمي مسلّمات أو حقائق مطلقه, يبقي لما تجي تقول لي أبقراط قال المرأه مرض, ما حأقول والله طالما قال الكلام ده أبقراط يبقي أنا أماني الأمين الماعاجباك دي حأخرس خالص, لأنه ده أبقراط واش جاب لي جاب, لأ ياسيدي لاقداسه في العلم لا للأفراد, ولا للمقولات,

ما حاقضي البوست كلو يا اماني ابرر نفسي و اقول ليك انا و انا ..
شرحت كتير فما حارد عليك على ماخدو باكدج او لأ ..
قلتي كلهم يؤخذ من قولهم و يرد ..
كلام حلو ..
اها ردي على قولهم ده.
العملتيو لحدي هسه أحكام عامة . كلام عن الرجل المسيطر و المرأة التي لم تأخذ حقها.
ده في تقديري ما رد على كلام برنارد شنو.
و تاني بتكرري بلفظ مختلف الكلام القلتيو قبل كده :

Quote: والفلاسفه ديل جزء من منظومه متكامله كانت ومازالت تضطهد المرأه ولاتحترمها, أنا بقبل من كلام الفلاسفه البتماشي مع عقلي والمنطق والواقع, وماعداه مابتوقف فيه أصلا, فياسيدي صدق سقراط واحتفي بيه اذا حابي, وقدسه ان شئت,

حالبس ليك ثوب محامي الشيطان للاخر يا اماني و اقول ليك كيف تقولي الفلاسفة معبرين عن منظومة اضطهاد المرأة ؟
طيب منو هم الرواد و اهل الفكر ؟
يعني سقراط شيخ الفلاسفة و استاذ العلم الحديث كلو يبقى عندك جزو من منظومة لا تحترم المرأة ؟
ما ممكن يا أماني نقول كلمة زي دي ( حتى لو صحيحة) بدون اثبات.
فاذا كانت الفلسفة علم يبحث في أصل و جوهر الكون و ماهية الخالق و علاقته بالمخلوق و العقل و الارادة الحرة و سقراط هو الفيلسوف الذي قيل فيه " ان صوت الرب قد أعلن أن سقراط أحكم أهل اليونان " و هو الثائر الذي ازعج اثينا حتى تخلصت منه لشدة حكمته و قوة فلسفته بكل هذا التراكم تجي يا اماني بكل بساطة لمن اجيب قول لسقراط ما يعجبك تقولي لي سقراط جزو من منظومة تهين المرأة ؟
طيب ليه انتي ( ده مثال شخصي ليك ) ممكن ترفضي قول زول بيقول القران جزو من منظومة تهين المرأة برضو ؟
ما كلو كلام مرسل.
اعتقد ان رجل كسقراط يحتاج مجاملة صغيرة بالرد على كلامة بتوسع اكثر من الاكليشيه الجاهز بتاع منظومة ذكورية مهينة للمرأة دي.



اخر قول و اخطره :

Quote: لما تجي لي امرأه عامله ناجحه في سنة 2009 وتشير لكل بنات جنسها بأصابع الاتهام, وتستدل بانه كل من الدين والفلسفه والعلم اتهموا المرأه وقالوا فيها أقذع الكلم, مرض ومصدر كل شر وشعر بدون رأس :) وما الي ذلك, وبعدين عايزنا ندافع عن أنفسنا وننفي الاتهام عنها, مع انه المرأه أصلا تجاوزت مثل هذا التثبيط والافتراء, وقفزت في طريق الاعمار والبناء ..

هل يعني ممكن اقول هذا الكلام لأمرأة غير عاملة و غير ناجحة في سنة 2007 ؟
هل يمكن أن اقوله لأم بلينا راعية الإبل في البادية التي ترتدي ثياب وسخة ويسيل القمل و الدهن من ضفيرتها و لا تعرف في الدنيا الا اتباع زوجها حيث حل ؟
مثل ام بلينا كثر و هن نساء لم يقفزن في طريق الاعمار و البناء الحديث بل يفعلن ما كن يفعلنه اسلافهن منذ الاف السنين ..
اها زي دي ما في الحساب يا اماني ؟
هل زي دي تبع المرأة التي قفزت لطريق الاعمار وله دي ممكن اقول ليها سقراط قال ؟

Quote: A man chases a woman until she catches him. ~American Proverb

الرجل يطارد المرأة الى أن تصطاده المرأة.
شكرا للمثل الامريكي يا دكتورة بيان.
اعتقد انه مثل امريكي غير جدير بالاحترام و مهين للمرأة.
كامل تضامني مع المرأة الامريكية في محنتها في تلك الدولة الظالمة التي تنتج مثل هذه الامثال.

Quote: عن نفسي لا اشك في هذا البته اختلافي معاك في انه السبب الرئيسي لتأخر ابراز المرأة لامكاناتها المهولة انت بتقولي الرجال وانا بقول النسوان انفسهم لكن ده ما موضوعي ولا مقصدي من التداخل في هذا البوست عارف ليه لانه رائ الفلاسفة مع احترامي ليهم ما بتوافق معاي ولا بعنيني

تعرف يا وليد ..
دايما بفكر في حاجة مجنونة كده ..
المرأة في القرن التاسع عشر مهانة.
المرأة في القرن السابع مهانة.
المرأة في اثينا مهانة.
المرأة في الكهف مهانة.
المرأة في العصر الطبشوري مهانة.
طيب متى لم تكن المرأة مهانة يا هؤلاء ؟
يقولوا منذ الأزل الا في فترات.
طيب هل المرأة منذ الاذل ثارت ام رضخت و رضيت ؟
يقول ليك ما كان عندها طريقة تثور.
طيب مش يمكن كان رضيانة و ما معتبرا الوضع ده اهانة ؟
ليه انا اجي احكم باثر رجعي على عصور قديمة ؟
يقول ليك لأن التاريخ سجله رجال فأكيد حذف ما لا يعجبه من مكانة المرأة و ثوراتها.
طيب ما دام الرجل المشكوك فيو ده هو الذي كتب التاريخ مش يمكن المرأة دي ما كانت موجوده زاتو و تم اختراعا في عشرينيات القرن الماضي بعد اختراع الكاميرا ؟
وين الدليل انو كان في نسوان في فرنسا في عصر النهضة ؟
ياهو التاريخ الكاتبو الرجل الكعب والصور الرسما الرجل الكعب ؟
ياخ يمكن الرجل ده كان بيتخيل وجود كائن زي ده حتى نجح الامريكان في اختراعو في ديترويت سنة 1920
مش احتمال ؟
كلام مجانين مش ؟

Quote: موضوعي هنا ليه لمن تجي سيرة المراة في الدين الاسلامي تحديدا يدخل بعض اهل المنبر ويسهبون ويصفون الاسلام باقذع الاوصاف وهاك يا مداخلات وبوستات فرعية الذين اوردهم حمور هنا هم رسل دين العلمانية المبني على التنصل من الدين وجعل العلم دين الدولة يعني هم جوهر الفكر العلماني وتعبيره الروحي لو جاز التعبير ليه صبري الشريف جدع ليه كلمتين وشتت تاني ما دخل لي ناس كتاااااااااااااااااااااار بتاوقوا في البوست ده وما خشوا وقالوا وثبتو موقف كانو بصرحوا بيه كتير في بوستات سابقة

تعرف يا وليد سيسرني ان ارى بوست هنا يتحدث عن ظلم الاديان للمرأة حتى اوجه السؤال الذي يؤرقني لصاحبه :
تقول ان الاديان اهانت المرأة و انا اوردت هنا اقوال فلاسفة تهين المرأة .. و انت تدعو لاخراج الدين من حياتنا لأنه مهين للمرأة و انا مثلك الان ادعو لإخراج منتوج هؤلاء المفكرين من حياتنا لانه يهين المرأة.
اها نمرق لا دين لا فلسفة .. نقبل وين ؟
من كفر بمحمد امن بسقراط.
فكيف ان كان لا محمد و لا سقراط ؟

تحياتي يا زميل البوست الغير موفق.

شكر للفوائد يا محمد الجيلي ..
للاسف انا مقصر في تتبع انتاج الاديب الضخم ابراهيم الكوني .. غفر الله لي.

Quote: * من عرف حقيقة المرأة لا يصير عدواً للمرأة بقدر ما تصير المرأة عدوه.

يمكن أن يرد على قول المرأة التي تقول لا اخذ بقول الفيلسوف الفلاني فيني لانه رأي سئ و غير حقيقي يمكن أن يرد عليه بكملة الكوني هذه.
ربما انتَ لا ترفضين الكلمة لأنها سيئة بل لأنها تعبر عن حقيقتك.
لهذا مازلت اصر على ان هذه الأقوال في حاجة الى تفنيد اما لقائليها او لها.
شكرا اخي.

Quote: لأ ياسيدي لاقداسه في العلم لا للأفراد, ولا للمقولات,

تأكيدا لمقولة اماني اعلاه فإن رؤوس الفلاسفة و المفكرين المذكورين في الصفحة الاولى مازالت معروضة تنتظر مقصلة المحاكمة و الرد عليها.
حتى نعرف انه لا كبير على النقد و لا قداسة لأحد.

Quote: سناء و مداخلتين كلسعات النحل .. أكيد بتجي تاني .. مش ؟

المداخلتين ديل نظام warm up , بسخن بيهم الأول بعدين بجي متكشحة في الموضوع



زميلي أيمن حسين كانت تخيفه هذة المقارنة (( كيدهن عظيم)) (( وكان كيد الشيطان ضعيفا))

و كان يقول اذا ما دخل رجل في مكايدة مع امرأة فأنه لابد خاسر

cherchez la femme

بتقري(شوخشي لا فوم)


الكاتب الفرنسي الكسندر دوما و ترجمته: فتش عن المرأة


يفتش عن شنو انا ماعارفة؟؟ المهم ده واحد من الامثال الانا ما بحبها

اهلين يا سناء ..
و مرحب بيك في اي وكت.
تعليق صغير يا سناء ..
طبعا ربنا ما قال كيدهن عظيم دي.
الاية قالت حكاية عن فرعون : قال ذلك من كيدكن ان كيدكن عظيم.
دي حكاية عن فرعون مخاطبا نسوان المدينة السجنو يوسف بمكيدة. و بالجد كان كيدهن عظيم.

Quote: و بالجد كان كيدهن عظيم

كدي نعمل استفتاء حول الحتة دي من قبل الزميلات هنا ناس عزوز و البقية و انا زاتي - و نشوف النتيجة شنو


و قبل ما نشوف البنات نشوف الرجال رأيهم شنو و انت يا حمور اول واحد السؤال موجه ليك

الحبيب حمور سلام

Quote: سيد المسلمي و المداخلة القاتلة. يعني يا ابو السيد انت بتسأل اشمعنى عزاز اختارت مثل التوب و بنيت انو عقليتا الانثوية ماشه على الاتجاه ده ؟ همممم .. ما اظن ياخ.

ياحبيب زي ما داير الناس يحترموا وجهة نظرك كمان حقو تحترم وجهة نظرنا!!

الاخت عزار قالت في ما معناهو إنو المرأة ماحاجه ثابته عشان يقولوا

المرأة بتحب كذا وتكره كذا وكمان فهمت من كلامه إنو الرجل هو زاتو مختلف

يعني بالمختصر العندو مشكله مع زوجتو أكيد إنطباعو عن المرأة ككل بكون سلبي

أتفق معها تماما في ماذهبت إليه وكمان أزيدك من الشعر بيت أنا بعتقد وصف المرأة في قالب محدد فيه تقليل لمكانة المرأة في المجتمع.


_________________________________________________________________________________________
لك الود

Quote: كدي نعمل استفتاء حول الحتة دي من قبل الزميلات هنا ناس عزوز و البقية و انا زاتي - و نشوف النتيجة شنو و قبل ما نشوف البنات نشوف الرجال رأيهم شنو و انت يا حمور اول واحد السؤال موجه ليك

سناء ..
كدي قولي بسم الله ..
رأيي في شنو ؟
في انو نسوة المدينة في مصر الساعدو امرأة العزيز في سجن يوسف عليه السلام ؟
رأيي انو كيدهن الكادو بيو يوسف ده كان كيدا عظيما بلا شك.
انتي شايفة انو هم ما غلطو على سيدنا يوسف يا زولة وله شنو ؟

هسه يا سيد سواتك دي ما كواسة مشاكل ؟
يعني عشان قلت ليك ما اظن ياخ ابقى ما احترمت وجهة نظرك ؟
يا عمك ..
ما أظن
ما أظن
ما أظن
اها الليلة موووت بالمغسة.


نرجع للجد :

Quote: أنا بعتقد وصف المرأة في قالب محدد فيه تقليل لمكانة المرأة في المجتمع.

فعلا يا سيد.
بل كمان ممكن يفتقر للدقة الموضوعية احيانا.

Quote: كش ملك ااخوات بي حقهن لكن في جماعه كانت داوشانا في المنبر الليله لبدت عديييل

شكلو يا ابو عبيدة البوست غير موفق فعلا بالنسبة لناس كتار.
و علينا من اليوم ان نبحث للمرأة عن انصاف في غير الدين و غير الفلاسفة و دعاة الالحاد.
لكن ما عارف نبدا من وين.

حمور

لا تثق فى المقولات المترجمة

هذا ماقاله برناد شو


I dread success. To have succeeded is to have finished one's business on earth, like the male spider, who is killed by the female the moment he has succeeded in his courtship. I like a state of continual becoming, with a goal in front and not behind." -- George Bernard Shaw

لا علاقه له بالمقوله اعلاه اطلاقا

مرحب أحمد الأمين ..
سبق و قلت انا باكرا :

Quote: عليه : فانا انقل هنا اقوال سيئة لا اتفق معها. و اغلبها ليس منقولا من مصادره الأم بل نقلا عن اخرين عن القائل و بها ترجمة. و سيسعدني ان استفيد من ردود المتداخلين على القائلين لا عليّ أنا. كما ارجو افادتي بمدى صحة نسبة الاقوال الى اصحابها ممن لهم اطلاع على الأصول.

لكن ..
ترجمة ما تفضلت بنقله تتحدث عن التشبيه بذكر العنكبوت الذي تقتله انثاه.
و هي كما قلت لا علاقة لها بالمقولة اعلاه اطلاقا.
لذلك تجدني مضطرا لأسأل :
هل هي نفس العبارة ام هي عبارة اخرى ؟

من الصعب ( من حيث المنطق المطلق للاشياء ) أن يكون برنارد شو قد ذكر العنكوب في جملة واحدة في حياته.
العباراتات يبدو انه لا علاقة بينهما الا موضوع العنكبوت.
ارجو ان تواصل الافادة و التأكيد في هذا الشأن .

تضامنو مع حمور في محنته !!!
يعني يا حمور ، تلاته بس من أخواتنا خلو ريحتك طير طير !!! حسي يجوك تلاته تاني و الله بوست إعتذار ما يحلك !!
و بالله و إنت مارق شيل معاك كلمه (ربما ) دي من العنوان ، يمكن تشفع ليك !!!

Quote: تضامنو مع حمور في محنته !!! يعني يا حمور ، تلاته بس من أخواتنا خلو ريحتك طير طير !!! حسي يجوك تلاته تاني و الله بوست إعتذار ما يحلك !! و بالله و إنت مارق شيل معاك كلمه (ربما ) دي من العنوان ، يمكن تشفع ليك !!!

الخال اذ يقرأ باذنيه

Quote: الخال اذ يقرأ باذنيه

حمور عدو المرأه !
و الله قريت بعيوني دي ! لكن إنت بوستك ده لمن ينتهي إضنيك ذاتها ما تلقاها !

Quote: حمور عدو المرأه !

الخال اذ يتجنى على ود اختو.


و الله اكلم ليك امي.

مداخلة دسمة جدا من قارئة بكندا :

Quote: الأخ حمور سلام قريت موضوعك بتاع المرأه والفلاسفه وإتكيفت جداً من ردود عزاز وأماني :) وحبيت أضيف بعض النقاط البسيطه لو ممكن سقراط يقول المرأه (اصل كل الشرور أكيد في وصفه خالفه الصواب شديد فالتاريخ والواقع بقولوا إنو الرجال برضو مسؤليين عن كل المصائب والويلات التي مرت بها البشريه إبتداءاً من قتل هابيل لأخوهو قابيل مروراً بفرعون وكل الجبابره الطغاه من أمثاله وحتى القرن العشرين والواحد وعشرين كهتلر وستالين وويلات الحرب العالميه الأولى والثانيه وما تلاها من حروبات مروراً بحروبات التصفيه العرقيه مثل رواندا ويوغسلافيا و إنتهاءاً بحرب العراق وهدي الإنقاذ أقرب مثل كم من ملايين ماتوا وشردوا منذ 1989 طبعاً مهما كان العبقري أو الفيلسوف مبدع وعنده دور في تطور البشريه سابقاً أم لاحقاً في النهايه هو إنسان ويكن أن يخطي ويصيب ولو إمتلك الحقيقه في جزء ما من المعرفه، دا ما معناهو إنو إمتلك كل لحقيقه وكل المعرفه وأكيد جزء من فلسفته و آرئه دي غلط حتي لو إشتهرت ورددت عبر العصور والازمان وأكيد إنو الإنسانيه ذاتها أستفادت من الصالح والنيير من إنتاجهم وتخلصت من السئ منه خلال مراحل تطورها منذ الأزل و حتي يومنا هذا وهولاء الفلاسفه هم جزء من تلك المجتمعات وثقافاتها وأكيد بعض رؤى الفلاسفه تأثرت الي حد ما بالثقافات السايده في تلك الفترات ونظرتها لمكانة المرأه ووضعها في المجتمع في ذلك الحين وأكيد تجاربهم الشخصيه المره ليها دور برضو والفي يده القلم ما بتكب نفسه شقي لكن ممكن يكتب غيره شقي مافي زول عارف بالضبط عمر الحياه في الأرض، ولكن بقدروها بميئات الملايين وإحتمال البلايين المهم المعروف إنو في عصور قديمه إنو المرأه كانت هي the dominant and the powerful part in the equation وكانت هي القائده المالكه والآمره والناهيه وكانت تتزوج أعداداً من الرجال و ينسب الأطفال إليها ولكن في زمن ما فقدت سلطتها وأصبح الرجل هو the dominant وقام وراها نجوم الليل بالنهار وأها ومن ديك وعيك ودا هوا المدون في زاكرة الإنسانيه الحديثه حتي لو الذاكره دي ترجع للخلف آلاف السنيين وقضت المرأه الكمين ألف سنه الأخيره دي تحاول أن تجد لها مكاناًًً تحت الشمس مره أخرى و لم تجد الفرصه للإبداع أو الإنجاذ وهي مكبله بالقيود وترزح تحت السيطره الكليه للرجل هذا بالإضافه لأهم عامل وهو العامل الأساسي في قلة الإبداع و غياب المرأه عن الحياه العامه هو عامل الزمن والي يومنا هذا فدور المرأه كأم من حمل وإنجاب وتربيه للأطفال وشئون المنزل ممكن ياخد على أقل تقدير من ٣٠ الي ٥٠ سنه من حياتها وبمقارنه مع الرجل فهو يملك الكثيير من الزمن بعد أن يؤدي دوره من أعمال أكل العيش و خلافه بالأضافه لإنو بيملك زمام أمره فهو حر يفعل ما يشاء عشان كده ما ممكن نقول إنو المرأه أقل إبداعاً و contribution بس هي ما لقت الفرص والزمن لإحداثه فالموضوع بتاع المرأه والرجل ما بطلع من حتة ظلم الإنسان لأخيه الإنسان عندما يملك القوه والسلط عندما أصبح الرجل صاحب القوه وأصبحت المرأه هي الجانب الضعيف، تعرضت لشتي صنوف الظلم والإضهاد عبر التاريخ ولكن وبنفس القدر تعرضت كل الفئات الضعيفه من المجتمعات للظلم والإضطهاد بما فيهم الرجال أبسط مثال العنصريه والإستعباد الذي مارسه "الرجل" الأبيض ضد "الرجل" الأسود في جنوب أفريقيا والولايات الأمريكيه لمئات السنيين وبالرغم من إنتهاء زمن العبوديه و العنصريه الأليم إلا ان آثاره السلبيه السيئه على هذه المجتمعات ما زالت وستبقى لمئات السنيين بالإضافه لنظرة المجتمع الأبيض الدونيه لهم حتى اليوم وكل هذا يؤثرسلبياً في التقييم العام لهم و بالتالي يوثر في دورهم كفئه فاعله ومفيده http://racerelations.about.com/od/recognizingmicroinequ...cademicracists_2.htm ودا شبيه بي البحصل للمرأه فالإضطهاد الوقع على المرأه آلاف السنيين محتاج لعشرات السنيين من هنا ولغادي حتى ما تصل النساء to their full potential وغايتو نحنا في طريقنا لإكتساحكم sometimes in the near future وبعداك حتبقوا endangered species :)

Quote: رأيي في شنو ؟ في انو نسوة المدينة في مصر الساعدو امرأة العزيز في سجن يوسف عليه السلام

نسوة المدينة في مصر انا مالي بيهن

انا قصدي النساء ان جنرال , هل لو اردن النيل من الرجل هل دائماً ما يتغلبن عليه أم العكس هو الصحيح؟؟

يعني بالدارجي نحن الاشطر في المكايد و للا الرجال(لمن تكون المكايدة بين رجل و مرأة)

Quote: الخال اذ يقرأ باذنيه

حمور عدو المرأه !
و الله قريت بعيوني دي ! لكن إنت بوستك ده لمن ينتهي إضنيك ذاتها ما تلقاها !

Quote: دايما بفكر في حاجة مجنونة كده .. المرأة في القرن التاسع عشر مهانة. المرأة في القرن السابع مهانة.المرأة في اثينا مهانة. المرأة في الكهف مهانة.المرأة في العصر الطبشوري مهانة. طيب متى لم تكن المرأة مهانة يا هؤلاء ؟ يقولوا منذ الأزل الا في فترات. طيب هل المرأة منذ الاذل ثارت ام رضخت و رضيت ؟ يقول ليك ما كان عندها طريقة تثور. طيب مش يمكن كان رضيانة و ما معتبرا الوضع ده اهانة ؟ ليه انا اجي احكم باثر رجعي على عصور قديمة ؟ يقول ليك لأن التاريخ سجله رجال فأكيد حذف ما لا يعجبه من مكانة المرأة و ثوراتها. طيب ما دام الرجل المشكوك فيو ده هو الذي كتب التاريخ مش يمكن المرأة دي ما كانت موجوده زاتو و تم اختراعا في عشرينيات القرن الماضي بعد اختراع الكاميرا ؟ وين الدليل انو كان في نسوان في فرنسا في عصر النهضة ؟ ياهو التاريخ الكاتبو الرجل الكعب والصور الرسما الرجل الكعب ؟ ياخ يمكن الرجل ده كان بيتخيل وجود كائن زي ده حتى نجح الامريكان في اختراعو في ديترويت سنة 1920 مش احتمال ؟كلام مجانين مش ؟

يعني يا حمور دي تساؤلات ..ساااي كدة ؟ يعني الزول يعتبرها تفكير بصوت عالي ؟...ولا دي أسئلة دي


مستندة لمنطق ؟

Quote: اهلين يا سناء .. و مرحب بيك في اي وكت. تعليق صغير يا سناء .. طبعا ربنا ما قال كيدهن عظيم دي. الاية قالت حكاية عن فرعون : قال ذلك من كيدكن ان كيدكن عظيم. دي حكاية عن فرعون مخاطبا نسوان المدينة السجنو يوسف بمكيدة. و بالجد كان كيدهن عظيم.

أقـــــــــــــــــــبض !!! عدد واحد التفاف!!

ما قبيل قلنا كل كلمة و كل رأي اتقال في سياق context قلت لينا اطلعو من البلد !!!
قبيييييييل قلنا انو ما بنقدر نصادر رأي الأفراد حتى ولو كانو فلاسفة لانهم بيقولو تجربتهم
والداير يعممها بيتكون رايحة ليهو مشكلة مع المراة وجاي يتكل في الحيطة وضل الفلاسفة

الفرق بين الدين و الفلاسفة هي انو الدين ملزم لمعتنقيه أكتر من الفلسفة
والمشرع بيختك بين جنة و نار لو ما اتبعتو ...

قلنا ليك دايرين نتغدى في بيوتنا ... اكتب وفي كي بوردي ماء لوووووووووووولز

بجيك صادة تاني .. ما تشيل طوبتي

"إيرانية كتبت على يديها عبارة "زن=مرد" و تعني امرأة تساوي رجلا في حملة انتخابية لأحد مرشحي الرئاسة الإصلاحيين" إ.ب.أ
المصدر: الصفحة الأولى، الشرق الأوسط،النسخة الورقية لمنطقة الخليج، 31 مايو 2009

**********************************************


والله البوست ده موفق جنس توفيق التقول مولود في التوفيــقــيــة ...


بسم الله نبدأ النقة ...

تكبير .. تهليل ... سكاكين ..

The average woman would rather have beauty than brains, because the average man can see better than he can think. ~Author Unknown

The average woman would rather have beauty than brains, because the average man can see better than he can think. ~Author Unknown

Quote: ربما هو بوست غير موفق

وربما هو(أغبش )..وربما انت يا حمور (الأغبش) في البوست ده .





أو انا في حالة (غباش فكري ) الأيااام دي .




................


دي توابل سااااي ...راجعين كان الله هون .

موفق يا حمور.........موفق....
فقد ادركت من "تملصك" الواضح ...وما فاضح...انك تحاول فقط خلق منهج للنقاش...
أقرب الى الجدلى بنقاش حقيقه خاصه لاستخلاص مبدأ عام....
بادراج المقوله وخلق الجدل حولها..ولكن بالمنهج العلمى عندما ترتبط بالظرف الموضوعى الزمانى والمكانى والشخصي التى قيلت فيه....تدحض تماما..
براحه يا عزوز..الود قصدو خير..حمور ده"تقدمى" ...واللا كيف؟؟
عموما.........
"المرأه...هى المرض"....
أبقراط الذى عاش واهبا لحياته لتطوير علم الطب....460 قبل الميلاد...تاريخ مولده تقريبا...
من الأمراض التى تحدث عنها وكان من أوائل المتطرقين لها...الأمراض المنقوله جنسيا....
وفى زمن لم تشكل فيه المرأه أكثر من وعاء جنسي ..طبيعى ان ترتبط تعاليمه الطبيه بالبعد عن الجنس
للبعد عن المرض....فقد قال أيضا.."محاربة الشهوه أيسر من محاربة العله".........
وهى من أولى العبارات فى تاريخ البشريه التى اشارت الى امكانيات ما سمى لاحقا بالطب الوقائي.....


"المرأه مصدر كل شر"...
سقراط....أمه قابله...أحبها وارتبط بها كثيرا...وتزوج ظنا من ان كل النساء كأمه..(حاله حال كل الرجال)...فاكتشف ان زوجته ثرثاره الى حد رهيب...وسليطة اللسان....حتى أصبح يغادر منزله باكرا ولا يعود الى انصاص الليالى...هائما فى المعابد والشوارع ومختلطا بالناس...
فما تلومو يا حمور.....الراجل واقعه فيهو حيطه....خاصة وان سقراط كان قبيح المنظر...جاحظ العينين
وعندو حبوب فى نخرتو.......يعنى كمان مأزوم...!!..ومن الأزمه ينتج الابداع ..فالمنهج الجدلى السقراطى وتعاليمه لطلابه و فلسفه تحتاج الى وقفه!!

أما نيتشه يا حمور...فهو صاحب فلسفة السوبرمان...شديد العدائيه للمرأه...فهو القائل"..اذا ما ذهبت الى المرأه فلا تنس السوط"...فى رأيه ان الرجل خلق للحرب والمرأه خلقت له...نيتشه ايضا غير ملام يا حمور...فقد عاش وحيدا...هجرته أخته الى الباراغوي...وتلميذته التى عشقها سالوميه وتزوجت بآخر...
والشاكوش قد يفعل أكثر من عدائيه فلسفيه للمرأه...ثم أن اصيب بداء عضال عندما ضاجع احدى البغايا فى شبابه(الزهرى)....ثم ابتعد عن النساء حتى قيل عنه مثليا....
وشدة عدائه للمرأه ليس الا عشقا عميقا...مجنونا...يجتاحه حد الشراسه!!!!!!!!!


....فى رأيي أن نقاش السياق التى قيلت فيه تلك العبارات المجحفه ..يؤخر فعلا ولا يقدم يا حمور ..على قول عزاز....
فتصوير الصراع الاجتماعى كصراع مرأه - رجل مرحله تجاوزناها والعوده اليها لا جدوى من ورائه.....
فهناك آلاف المقولات السالبه عن الرجل...قالتها النساء.....
ولكن لا أتفق مع معظمها ولا تهمنى فى شئ.....

....وامعانا فى توفيق البوست ..سأعود لنقاش المزيد من تلك العبارات....












-------------------
اليومين دى يا حمور اى زول داير بوستيه يتوفق يتكلم عن المرأه!!!
تقبل ودى...

يا سلااام ..
البوست منور الليلة.
نشوف الجماعة الجو ديل واحدة واحدة.

Quote: يعني يا حمور دي تساؤلات ..ساااي كدة ؟ يعني الزول يعتبرها تفكير بصوت عالي ؟...ولا دي أسئلة دي مستندة لمنطق ؟

يا داليا دي مجرد تداعيات على نهج سقراط ..
يعني ممكن تقولي تفكير مجنون بصوت عالي ..
لا منطق لا كلام يترد عليو.
ما تتلككي.
البوست ملااااااان امسكي النجيض و ردي عليو.

Quote: أقـــــــــــــــــــبض !!! عدد واحد التفاف!!

يا عزاز انا عاذرك ..
مع زحمة اليومين دي و الراجل الجايي ما حتكوني ركزتي.

Quote: طبعا ربنا ما قال كيدهن عظيم دي. الاية قالت حكاية عن فرعون : قال ذلك من كيدكن ان كيدكن عظيم.

التعليق كان على لفظ "كيدهن " العام و انو ما موجود في القران بل هو "كيدكن " في خطاب موجه محدد.
دي من الايات المكذوبة المشهورة على لسان الناس.
يقول ليك ربنا قال عن النسوان كيدهن عظيم. رغم انو مافي اية زي دي.
يقول ليك ربنا قال و جعلنا لكل شئ سببا. رغم انو الاية قالت : ثم اتبع سببا. مافي اية قالت و جعلنا لكل شئ سببا.
الشرح بتاع فرعون و نسوة المدينة كان لتوضيح المخاطب في "كيدكن ".

لكن تقري بياتو بال انتي اليومين دي.
اها موضوع الاستديو عملتو فيو شنو ؟

Quote: The average woman would rather have beauty than brains, because the average man can see better than he can think. ~Author Unknown

شكرا دكتورة بيان و هذه ترجمة انجليزية لمثل فرنسي مشهور.
المرأة تفضل أن تكون جميلة اكثر من أن تكون ذكية لأنها تعلم ان الرجل يفضل ان يرى بعينيه اكثر مما يفكر بعقله.

Quote: وربما هو(أغبش )..وربما انت يا حمور (الأغبش) في البوست ده . أو انا في حالة (غباش فكري ) الأيااام دي .

او هو بوست يلقي ببعض الاحجار في بركة لم يحاول أحد ان يصطاد منها من قبل ؟
تحدثوا كثيرا عن الاديان التي تهين المرأة .. فاريد ان اخطو الى الفلاسفة (و رسل العلمانية كما قال وليد ) الذين يهينون المرأة ايضا.
ليس قبولا لهذه الاهانة بل لمعرفة موطئ قدمنا حين نتحدث عن تحرير المرأة.
لكن هذا لا ينفي ان كثير من حديث الجندر لا يروقني.

Quote: لكن هذا لا ينفي ان كثير من حديث الجندر لا يروقني.

أيوااااكدة انت ما أغبش ....طيب ما تخليك واضح يا جميل .

Quote: ما تتلككي. البوست ملااااااان امسكي النجيض و ردي عليو.

حمور


مساءك ورد


يعني أسمي ده شنو ياحمور ..وصاية ؟ ولا توجيه لمسار البوست ؟

طيب أشر لي على الحتة المفروض تتناقش ..او البتفترض انها مفروض تتناقش ..لانو كما اوضحت


سابقا ..فكري مغبش.



.............................



النجيضة خليها للنجيضين ..انا بحب الفارغة !

اتلمن فيك يا صديقي

قاعدين جنب الباب
انت ناقش الموضوعيين
ونحن خلينا لغير الموضوعين




لكن صدقني بوستيك ده حا تكون عنده تاثيرات جانبية في بوستات تانية مستقبلا اكتر من تاثيره الحالي

اها الجماعة نفضوا يدينهم الدين
وهسع انت سايقهم على طريق نفض اياديهم عن العلم لانك جبت ابائه الاولين في عكس ما يشتهون
وهن زاتن حصيلتهم الفكرية على مر التاريخ ضعيفة جدا ولا يرتكز عليها لبناء راي متكامل بغض النظر عن السبب شنو لانو ده مختلف عليه

اما بالنسبة ليك انت
طيااااااااااااارتك حرقت
عاوز ليك سنة عشان تعالج علاقتك مع الجنس اللطيف في المنبر
خصوصا وانك عندك صلعة

تحية احترام وتقدير لكل النساء داخل وخارج المنبر

التحية والاجلال

الاخ حمور والي الجميع
لا ازال اقول البوست موفق
وهو يوضح موقفنا من المراة

والعقل الذكوري وهنا حمور تحديدا والفاضلابي
لا يقران المساواة نسبة لان الدين لا يدعو لذلك

وهنا حمور عندما اتي ببوست الفلاسفة رايه ان يوضع رؤية قد قالها فلاسفة العصر الماضي

ورايهم وليد زمنه وبرضو انا من وجهة نظري لا اقبله


مثلما اقرا النصوص القرانية التي تخاطب انسان ذلك العصر


وانا اتبني المساواة الكاملة للمراة في الحقوق والواجبات

ومقياسي سيداو الان ربما غدا تكون متخلفه عن سقف مطالب المراة

ويحكمني الميثاق العالمي للامم المتحده ومواثيق حقوق الانسان


وهنا حمور في بوست سابق ومعه الاخ الفاضلابي يقفا ضد المساواة بين المراة والرجل


وانا من وجهة نظري ان اجابة سؤال المراة
للمراة او للرجل يعطي مفهوم الفرد فينا اين يقف



ناس ان المراة ضلع اعوج
او انها ما بتكسر الراس


او لم يفلح قوم ولوا امرهم امراة


او ان المراة تقطع الصلاة هي والكلب والحمار

ديل انا لا انتمي لهم \لهن



المحك الحقيقي الصدق حتي في وجهات النظر المختلفة


المراة انسان مثلها مثل الرجل
الاديان في سياق زمنها كانت متقدمه عما قبلها

الان القوانين الموضوعية هي المناسبه للمراة والرجل وهي في متناول التغيير والزيادة والنقصان



القران والسنة لا تساوي المراة الحره بالمراة الغير حرة ؟؟؟؟


عمر بن الخطاب انتهر امراة تلبس زي اخري حرة



الدعوة للرق وملك اليمين تعاني منه المراة

لذا تطوير النصوص والقراءة للتراث الاسلامي واجبه

تطوير قوانين الاحوال الشخصية مهمة

لقد اهينت المراة بوضعها قديما ولا زالت الصورة متواصلة


علينا انتزاع الحقوق كاملة للنساء والرجال

مهمة صعبه هي العمل علي تطوير النصوص لتتماشي مع العصر

لك التحية والاجلال

يا صبري

عمر ابن الخطاب سمعنا رايك فيه دشليون مرة
عاوزين رايك فيما اورده حمور نقلا عن مقولات نسبت
لابقراط وسقراط وفرويد
اساتذة العلم الذي تريدنا ان نبنى عليه


شنو كاتب ليك سطرين مبهمات في كلام الفلاسفة والعلما عن المرأة ومعممه
وطوال قالب توووووووووووووووشك الى عمر ابن الخطاب والدين الاسلامي


اها قلنا ليك رسلك بتاعين العلم عمر ابن الخطاب بالنسبة ليهم ( قاسم امين ) ده مين ؟

عليه وحسب منطقه المعوج
لاتصلح العلمانية لتسوس الناس
لان رسلها ارائهم سلبيه ومتشدده


بطل الشردي بتاعك ده
لمن نحنسك تحنيس
وجيبوا صبري عشان يكتب لانو من زمااااااااااااااااااااااااااان بكتب
جاي كاتب ليك كلمتين في كلام الفلاسفة
وطوالي جاري على عمر ابن الخطاب

عمر ابن الخطاب هنا ما جابو ليه مقوله
قول راي في الجابو ليهم مقولات

وحاة الغالي .... براااااااااااااااحة برااااااااحة بنلف ليك البوست ده في رقبتك
لووووووووووووول كيدنا عظيم و حكمة الله بالغة شن نسوي

Quote: التعليق كان على لفظ "كيدهن " العام و انو ما موجود في القران بل هو "كيدكن " في خطاب موجه محدد. دي من الايات المكذوبة المشهورة على لسان الناس.

تفتكر يا حمور أيهما ابلغ و اصح من الناحية اللغوية وتحديدا فيما يخص الثوابت،
او ما يراد تثبيته كحقيقة، التعميم أم تخصيص الحالة؟
ممكن بكل سهولة تقول النحاس فلز، لانو تحت أي ظرف من الظروف بيكون فلز،
و اثبات انو فلز رهن معادلات ثابتة معلومة لا تتغير بتغير مصدر النحاس
كان من الشيشان كان من مهد الذهب في السعودية .. ولا تغير بيئة التحضير
ولا جنسية المحضر ولا مزاج اهلو يعني متغيراتو محدودة ...

نجي للمراة، اللي تكوينها
و شخصيتها رهن دشلومية عامل و عامل، المجتمع، الجينات، الدين، السمات الفردية ...
داير تختها لي بتلونها و فسيفساء ثرائها (دي حتة مثقفاتية على الماشي كده)
في سرج واحد مع كل الامثلة الواردة؟

ليه ؟ البلد دي حاكمها منو ؟؟؟

Quote: لكن هذا لا ينفي ان كثير من حديث الجندر لا يروقني.

عاد ما سجمك ..!!
حتخم و تصر لمن يبان ليك صاحب لووووووووولز

شيراز ..
كالعادة قريتك بتركيز ..
لكن افضل اعلق بعد تنتهي ..
حانتظرك و نشوف باقي مجايبك عشان التعليقات كلها تكون مع بعض

Quote: يعني أسمي ده شنو ياحمور ..وصاية ؟ ولا توجيه لمسار البوست ؟ طيب أشر لي على الحتة المفروض تتناقش ..او البتفترض انها مفروض تتناقش ..لانو كما اوضحت سابقا ..فكري مغبش.

غايتو لمن تجري شكل يا داليا ما بتغلبي.
ياخ مش انتي سألتي من كوت معين ؟
قلت ليك ده كلام مجنون مني و لا موضوعي امسكي في باقي البوست.
تقومي تعتبري اجابتي على سؤالك وصاية ؟

Quote: لكن صدقني بوستيك ده حا تكون عنده تاثيرات جانبية في بوستات تانية مستقبلا اكتر من تاثيره الحالي اها الجماعة نفضوا يدينهم الدين وهسع انت سايقهم على طريق نفض اياديهم عن العلم لانك جبت ابائه الاولين في عكس ما يشتهون

ما هو يا وليد البوست ده بقى عندو عدة مخرجات.
و من ضمنها طبعا انو اذا زول كان عندو رأي سئ في المرأة ما لازم معناها يكون ظلامي مستند الى ارث ديني.
ممكن يكون مستنير مستند الى الفلاسفة.


غايتو البوست ده داخل على مجاهل عويصه

Quote: ما هو يا وليد البوست ده بقى عندو عدة مخرجات. و من ضمنها طبعا انو اذا زول كان عندو رأي سئ في المرأة ما لازم معناها يكون ظلامي مستند الى ارث ديني. ممكن يكون مستنير مستند الى الفلاسفة.

اها البقنع صبري الشريف شنو ؟

يا حمور يا صديقي

لا مخرج للنساء من هذا البوست الا بافتعال مشكلة معاك وتحميلك ما هو مكتوب فيه
هل انت متصور فيهن واحد ترد بموضوعية على الفلاسفة الجبتهم ديل

الرد المنطقي الوحيد ( كلامهم لا يعنيني ) اي زيادة من كده سيدها بروح شمار في مرقة
الجبتهم ديل اربابها يا حمور ..!
اربابها عديييييل

يعني مافي زول حا يقول ليك ما داك كان فيه كده ولا داك عامل كده

الجبتهم ديل تنقاوات العلم والفلسفة
مافي زول بقدر يقول فيهم بغم
قد يقال بغم في كلامهم وده عاوز ليه زول متمكن عشان يرد باصول الرد او يطقع زينا كده وبلقى المطقعاتية الزيو
لكن فيهم هم ما اظن


ولانو ديدين المنبر ده الحديث عن الافراد وليس الحديث عن الاقوال والمفاهيم
وبما انو مافي اي كلام في سقراط او ابقراط


طياااااااااااااااااااااااااااااارتك حرقت
الكلام حا يكون فيك انت الحيطة المايلة
او كما تفضلت


تاني تجي الحلة
لكن احسن حاجة عملتها
اي زول عامل لينا فيها بتاع منطق في المنبر ده
الليلة افلس
وبقا ماسك في القشور

هاهاهاهاهاهاهاهاهاهاهاهاه
بت الكلب الشعيرية

Quote: لكن هذا لا ينفي ان كثير من حديث الجندر لا يروقني

عزاز و داليا ..
الغريب انو ما اهتميتو بالقليل الذي يروقني.
مش احتمال القليل ده ياهو الزبدة و الفيهو الفايدة ؟

ثم الفرق شنو بين اني اختار من حديث الجندر قليل يروقني و بين كلام عزاز و اماني قبل كده عن انو كلام الفلاسفة ما بيلزمم و بياخدو منو ما يوافقم ؟
ما من حقي انا اخد من كلام الجندر ما يوافقني سواء كانسان او كرجل ؟
هل نظريات الجندر اكثر قيمة من احكام سقراط و توما الاكويني ؟
و هل لو كنت رافض كل حديث الجندر استنادا الى رأي هوميروس اكون زول كعب ؟ طيب هوميروس سيد الكلام يكون شنو ؟
ثم يا عزاز مش انتي قلتي ما بتهتمي برأي سالب من فيلسوف في المرأة ؟ ليه يهمك رأيي انا في الجندر ؟

الأخ صبري الشريف ..
تحياتي ..
مع الاخذ في الاعتبار رد الاخ وليد عليك و اتفاقي التام معها اضيف اليك :


انت تقوم بدور مقدر في نقد الذهنية الذكورية المهينة للمرأة اعتمادا على الدين. اتفق او اختلف معك في ذلك لا يهم.
لكن الان اضيف انا الى ذلك مكونات لذهنية ذكورية مهينة للمرأة اعتمادا على الفلاسفة و المفكرين.
و اتعجب ان اجدك لطيفا هادئا في نقد هذه المكونات كأنك تبحث عن اعذار لها.
و العذر هنا ايضا سئ و الاعتراض اسوأ :

Quote: وهنا حمور عندما اتي ببوست الفلاسفة رايه ان يوضع رؤية قد قالها فلاسفة العصر الماضي ورايهم وليد زمنه وبرضو انا من وجهة نظري لا اقبله

هل هو مقبول ان نقول ان الفيلسوف الثائر الذي يقدم نظريات تقدمية انما هو مجرد سجين لزمانه ؟
لو كان سقراط اسير زمانه لما قتل.
لو كان فرويد اسير زمانه لما هاجمه معاصروه.
هل يصح أن نطلق القول في كل ما لا يعجبنا من اقوال الفلاسفة انه قول وليد زمانه و غير مقبول ؟
طيب لماذا لا نطلق هذا القول على كل منتوجهم الفكري و نقول انما هو وليد زمانه و نحن لا نقبله.

ثم ما هو الزمان ؟
هذه بعض اقوال من قبل الميلاد حتى اربعينيات القرن العشرين.
هل زمان سقراط هو نفس زمان برنارد شو ؟

ثم ما هو مقياس عدم قبولك ؟
نحن هنا يا سيدي لسنا في استفتاء حتى تقول لا تقبل هذه الاقوال .
نحن نريد اعتراضك المنهجي العلمي عليها. لماذا لا تقبل هذه الاقوال ؟

Quote: ناس ان المراة ضلع اعوج او انها ما بتكسر الراس او لم يفلح قوم ولوا امرهم امراة او ان المراة تقطع الصلاة هي والكلب والحمار ديل انا لا انتمي لهم \لهن

عرفنا انك لا تنتمي الى هؤلاء .. فهل تنتمي الى الذين قالوا ان المرأة اصل كل شر ؟
هل تنمتي الى فرويد و برنارد شو و توما الاكويني ؟
اما انك خرجت من هؤلاء و هؤلاء و انتميت الى نفسك ؟
لماذا تضرب المثل بمن لا نناقشهم في البوست ؟ هل خشيت ان تصرح انك لا تنمتي الى مدرسة الفلاسفة و المفكرين الذين اعتبروا الدين معطلا لتقدم المجتمع ؟



سؤال اخير جاد و مهم :

Quote: الاديان في سياق زمنها كانت متقدمه عما قبلها الان القوانين الموضوعية هي المناسبه للمراة والرجل وهي في متناول التغيير والزيادة والنقصان

هل هذا اعتراف منك أن الاديان كرمت المرأة في زمانها و ان المرأة لم تكن مهانة في مكة و المدينة في زمن الدين ؟
عندما كان الرجل يتزوج اربعة و يمتلك الجواري و غيره .. هل كان الدين مكرما للمرأة في ذلك الزمن باعتبار انه متقدم عما قبله و مناسب لسياق زمنه ؟

بالله يا وليد ركز على السؤال الخير ده خلي صبري يجاوبو لينا لأنو السؤال ده بوست براو

بوست العجائب هذا يفرز نتيجة اخرى ..
يقول الزميل صبري الشريف :

Quote: الاديان في سياق زمنها كانت متقدمه عما قبلها الان القوانين الموضوعية هي المناسبه للمراة والرجل وهي في متناول التغيير والزيادة والنقصان

ما فهمته من هذه العبارة أن الزميل صبري يعتبر الحديث القائل ان المراة تقطع الصلاة هي والكلب والحمار انما هو وضع تقدمي عن ما قبله و بالتالي ليس فيه اهانة للمرأة .
عليه تكون مشكلة الزميل صبري مع هذه النصوص فقط في صلاحيتها لهذا الزمن.
و هذه مشكلة ثانوية يمكن بحثها لاحقا.
المهم هسه نعرف هل حقا الدين الاسلامي في زمن نزوله كان متقدما عما قبله و اعطى المرأة مكانة جيدة و لم يهينها ؟

انه سؤال المليون دولار يا صبري.

Quote: بوست العجائب هذا يفرز نتيجة اخرى ..

حمور عدو المرأه
لمن قلت ليك الكلام ده ‎، قلت لي بتقرا باضنيك.....
حسي عليك الله أنا كان بقرا باضنيني ، صبري الشريف ده بقرا بشنو ؟

وووووووووووووووووووووووووووووهـ ..

Quote: تحية احترام وتقدير لكل النساء داخل وخارج المنبر

امسك ,, عدد واحد هرش ! لووووووب ..

اليهودية : السيدة آسيا هى من رعت سيدنا موسى ودافعت عنه وحفظته (من فرعون) حتى إشتد عوده
المسيحية: السيدة مريم العابدة هى من حملت كلمة الله سيدنا عيسى ..(عيسى بن مريم)
الإسلام : السيدة خديجة ووقوفها مع المصطفى (ص) ..

دور المرأة عظيم فى جميع الرسالات السماوية

حمور حتى الان بوستاتك كلها موفقة
بس حاجة واحدة كنت غير موفق فيها و انا ما عافية ليك :)
ما بقدر اقول قرأت كل المدخلات لكن لفت نظرى الحوار الداير بي امانى و وليد وعزاز
و ال عندو علاقة كبيرة بما كتبت

Quote: و تعجبت اني لم اطلع على نقد لهذه الاراء على حده. فعلى حين وقفت كثيرا على نقد لايات قرانية و احاديث نبوية يظن منتقدها انها تهين المرأة و ذم لأمثال سودانية تحط من قدر المرأة الا اني لم اطلع على نقد خاص لكثير من كلمات الفلاسفة و المفكرين السيئة في حق المرأة.

هذة المداخلة ليست موجهة ليك يا حمور فى شخصك و فى تعجبك الشخصى من واقع من ذكرت بقدر ما هى و جهة نظرى عن لماذا

المسيرة النسوية و ما تحمله من من قيم التحرر شابها ما شاب كل الحركات التحررية قد تكون هناك هنات هنا و هناك
و قد تكون تلك الهنات صادرة من عدم وضوح خط السير او تلاعب المتلاعبين و تسلق المدعين و لا ننسى تغوص المتغوصين من الاعداء كما لا يفوتنا النقل الاعمى
قد نتفق يا حمور انو مافى حركة تحرر ما اصابها مد و جزر
ولكل اسبابة الموضوعية و الذاتية (ياخ اانا بتكلم عام خلاس)
المهم
التركيز على نقد وضع المرأة فى الاديان ( رغم تحديدك للاسلام) كان اساسى فى النضال
ليه ..لانو ست البنات الفى ام البين ما بتعرف مقولات من ذكرت من فلاسفة
و لكن تعرف كل ما وضع فى راسها من تصورات دينية تعوق و ضعها كانسان
الدين هو السلاح النارى الذى يصوب فى صدر الحركة النسوية فى بلادنا
لذا تجد التركيز عليه .. قد نختلف او نتفق مع بعض ما كتب و لكن يظل الحال فى هذا البوست
كما تحب .. فى تركيزك على ما كتبة هؤلاء الفلاسفة .. ممكن يجى عدد من المهتمين ينظر ذى ما عاوز
ولكن بالنظر للحال القائم فى بلادنا ... سيستمر بعض من النقاش دينى
حتى يتبين للنساء كم ظلمهم المفسرين و ناس الدقون .. و لاننسى ناس العبايات السود

يا وليد اذيك ياخ و كيف حالك
فى مداخلاتك الكتير يا وليد و لكنى اظن فكرتها الاساسية تنطلق من
الاقتباس ادناة:

Quote: انا قلت كم مرة في المنبر ده آن الاوان لقيام سيداو الرجالية الاقوال اعلاه موجوده يا حمور العاوز يرد عليها برد ... انا هنا همي محاولة النسوة الباس تقصيرهن للرجال فقط وان لا يلمن انفسهن ابدا على ذلك...؟ يعني الحنك ده بقى موضه والناس ساقت فيها

الدور التاريخى للرجل فى وضع النساء فى المنظومة الاجتماعية لايمكن اغفاله او التغافل عنه
يا وليد
مثلا ما ممكن نتكلم عن مشاكل السودان السياسية و الاجتماعية و الاقتصادية و نحللها بمعزل عن دور المستعمر
والا بيبقى فهمنا ناقص و حلنا بالتالى ناقص
مسيرة الدول المستعمرة سابقا نحو البناء لازالت تعوقها المعوقات ولازال الاستعمار الحديث يبدع فى انتاج كل ما
من شأنة ان يبقى تبعية هذه الدول اليه بما يحافظ على مصالحة
نفس الحكاية نجدها عند النظر فى حال المرأة فلازال " لبعض" الرجال مصلحة ان يبقى الحال على ما هو عليه فهم مستفيدين كتييييير :)
فى نفس الوقت هذا لايعنى ان المعركة هى بين النساء والرجال بل المعركة اجتماعية و سياسية فى المقام الاول
من اجل نظام ديمقراطى حر يجد فية الرجل و تجد فيه المرأه حقهم الانسانى غير منقوص
و فى مقام اخر اجدنى اتفق معك ان بعض النساء سلبيات (لاسباب مختلفة)
( مثال: بتلقى ده برضو فى انو بعض النساء و الرجال سلبيين فى العمل من اجل الديمقراطية و السلام (فى السودان مثلا.. وبرضه للاسباب مختلفة))
و لكن هذا لا يعنى ان مجمل المسيره سلبية و متباكية ورامية اللوم
و تفتش فى الشماعات الرجالية :)

يا دينا

البعدني يعدوا في النار
:)

حمور ... مسائك لعلو طيب ؟؟
و ان سألتم عنا،
فنحن بخير .. نساء ونحمد الله ...
و نرفل في خير و نعمة من لدن مانح النعم و خالقنا ذكرا و انثى
لنسكن لبعضنا و نطلع عين بعض في وقت الفراغ ...

Quote: ثم يا عزاز مش انتي قلتي ما بتهتمي برأي سالب من فيلسوف في المرأة ؟ ليه يهمك رأيي انا في الجندر ؟

كلامك الفوق ده ذكرني نكتة الزول اللي قال لمرتو يوم العرس
(يا مرة اسمعي كلامي ده كويس .. انا كلامي زي الساعة في البيت ده )
لما حمرت ليهو استدرك و قال
( لا بتقدم لا بتأخر)
لووووووووووووولز
حسي انا رأيك في البوست ده أخدو لا اتكلو في السيرفر
و اتناول مما يلينا من الأقوال المأثورة؟؟

اديني الرد علشان عندي كلامات كتار دايرة افضفض بيهو في البوست الليلك ...

محبة و احترام سواء اختلفلنا او اتفقنا ....

مين المزمزيل دي يا د. امبده؟

المــرأة...

Quote: عزاز زاتها يا حمور ما حتلقى ليها مرتكز نسوي عشان ما تنقد على اساسه .. نيتشة ولا سقراط وبرناردشو او فرويد ... اتحدها تجي تنتقد نقد موضوعي بدون ما تتشهد بكلام ذكر اتحداها تحدي صريح طالما انها قالت لا تحتفي بقول الرجال في النساء عليها ان تبين بطلان كلام الفلاسفة اعلاه وتستند في دفوعاتها على منتوج معرفي نسوي فقط وما حا تقدر

والله يا وليد انا آسفة ما شفت طلب المبارزة ده إلا حسي!!
تحدي عديل كده؟ يا راجل؟ قول كلام تاني ؟
فات الوقت ولا أمرق سيف الكتابات و الحبر الانسكب من نساء في المجال؟
بالله يا اخوانا ده كلام؟
(المعرفة) كمان بقت مرأة و رجل؟
طيب ... عندك وقت تقرأ براك الإرث المعرفي للمراة قبل ما تجي تدرع فيني التحدي
ولا دايرني اجيبهم ليك كبسولات وحبوب مضغ في البوست؟


غايتو ... و حوقلت و بسملت و ختت الخمسة فوق الاتين ..!!

Quote: حسي عليك الله أنا كان بقرا باضنيني ، صبري الشريف ده بقرا بشنو ؟

شكرا للمرور يا خال.

Quote: امسك ,, عدد واحد هرش ! لووووووب ..

دينا خالد تعتبر اعلان الرجل احترامه للمرأة سببه الهرش.

تعرف يا امبدة موضوع الاديان ده انا كنت خاتيو بره القوس تماما.
قناعتي الخاصة فيو ما كنت طارحا هنا للنقاش و ماشي حسب المنهج الجدلي بالتسليم للبيقول الاديان اهانت المرأة و عاوز اشوف طيب الفلسفة عملت شنو للمرأة.
لكن كلام اخونا صبري اعلاه ده كان مفاجأة بالنسبة لي تماما.
و فضلت اعمل استثنا بدل افتح بوست من بوست.
و حتكون معلومة مفيدة بالنسبة لي لأني ناقشت صبري كتير جدا في موضوع المرأة لكن للاسف ما وصلنا لحاجة لأنو زي ما شايف معتبرني لا احترم المرأة.
و طبعا اخونا صبري مشهور بدفاعو عن ما يظنو كرامة للمرأة بنقد موقف الدين منها.
هسه الليلة جا يقول انو الاديان كانت تقديمة في زمانا و بما اننا بنتكلم عن المرأة فانا فهمت انو هو بيقول الاديان كانت تقديمة في زمانا في موقفا من المرأة.
و دي كلمة زي ما بيقولو توزن بالدهب لمن تجي من صبري الشريف.
فدحين ادعي معاي انو صبري يجي يوضح لينا هل فعلا هو يؤمن انو الدين الاسلامي في زمن نزوله كان متقدما عما قبله و اعطى المرأة مكانة جيدة و لم يهينا بحسب كلامو اعلاه ؟

تحياتي يا بلدياتي سهام بت المجمر ..
نورتي البوست ياخ ..

كلامك جميل و مفيد.
لكن للاسف بما اني ماشي بمنهج محامي الشيطان في البوست ده فلازم اتوقف و اسأل و احاجج حتى في الحاجة الانا مقتنع بيها عشان يزيد التوضيح و تزيد الحجج.
فمن الباب ده بالله اسمحي لي اناقش شوية حاجات في مداخلتك :

Quote: المسيرة النسوية و ما تحمله من من قيم التحرر شابها ما شاب كل الحركات التحررية قد تكون هناك هنات هنا و هناك و قد تكون تلك الهنات صادرة من عدم وضوح خط السير او تلاعب المتلاعبين و تسلق المدعين و لا ننسى تغوص المتغوصين من الاعداء كما لا يفوتنا النقل الاعمى قد نتفق يا حمور انو مافى حركة تحرر ما اصابها مد و جزر ولكل اسبابة الموضوعية و الذاتية

كلام ممتاز شديد .. لكن ما بتفتكري انو بعد كل هذاالزمن اصبحت المسيرة النسوية في حاجة لعملية مراجعة لتبيين ما اصابها من هنات و توضيح اين كانت عادلة و منصفة في طلباتها الموضوعية و اين كانت متطرفة و امازونية مبالغة في ردود الفعل ؟
انا شخصيا اعتقد انو حركة تحرير المرأة بلغت الرشد و وصلت درجة تمكنها من نقد نفسها و التنازل عن مواقف و مفاهيم متشدده لا تصمد اليوم امام النقد و انما كان داعيها في حينها الظروف الموضوعية و رد الفعل تجاه مواقف معينة تلاشت و ذهبت الى حيث القت (دي بديل مهذب لمزبلة التاريخ)


عجبني شديد كلامك عن النقل الاعمى و ده هو اكتر شي انا ما قاعد ادورو في نظريات الجندر و غيرا من نظريات زمنا ده.

Quote: التركيز على نقد وضع المرأة فى الاديان ( رغم تحديدك للاسلام) كان اساسى فى النضال ليه ..لانو ست البنات الفى ام البين ما بتعرف مقولات من ذكرت من فلاسفة و لكن تعرف كل ما وضع فى راسها من تصورات دينية تعوق و ضعها كانسان الدين هو السلاح النارى الذى يصوب فى صدر الحركة النسوية فى بلادنا لذا تجد التركيز عليه

كان اساسي .. فهل لازال اساسي ؟
ده أولا.
ثانيا هل الاساسي انك تنتقدي وضع المرأة في الدين لست البنات ؟ حتفهم ليك النقد ده وله حتعتبرك يا كافي البلا كافره ؟
في تقديري انو النقاش النقدي ما بيكون لست البنات لكن لسهام المستنيرة او ممتلكة ادوات وعي تسمح ليها بفهم و تقبل و نقد الفكرة الجديدة.
يعني هسه يا سهام لو مرقنا من البورد ده و سقنا معانا صبري الشريف و مشينا عملنا اجتماع بحريم تنقسي في نادي الشعلة و قلنا ليهم الدين لم يعد مناسبا لهذا الزمن و من الواجب تطوير نصوصه المهينة للمرأة.
تفتكري حريم تنقسي حيكون رد فعلهم شنو ؟ لو بوكس مرتضى الكباشي ما مرقنا سريع تاني ما بنمرق.
دي معركة مثقفين بصورتا و شكلها ده. و ليست معركة شارع. انعكاسا على الشارع نعم. لكنها لا تخاض في الشارع بهذا الشكل ابدا.
و بما انو في تقديري صراع مثقفين انا بشوف انو كان من الواجب استصحاب الموروث المهين للمرأة في الفكر الفلسفي و الاوروبي عشان ما يبقى تعميه و بتر للحقائق.
يعني لما انا كمتلقي اتملي بخطاب انو الدين مهين للمرأة و اجي فجأة اكتشف انو في ناس ملاحدة و هم من مؤسسي و رسل مناهج التفكير العلماني الحديث هم اشد اهانة للمرأة تفتكري موقفي حيكون شنو ؟
يعني هسه في ذمتك زي كلمة مونترلان بتاعة المرأة هي الاشمئزاز دي لاقتك في كتاب دين وله حتى كتاب جغرافية ؟
و مش من حقي استغرب لمن القى ناس طايرين السما برسل التنوير لكن لمن اخت ليهم كلماتم في المرأة مافي زول يقول بغم فيها ؟
حاجه زي دي ما بتخليك تحسي انو الموضوع ما موضوع مرأة و لا موضوع حقوق ؟


اخيرا يا سهام ..
و بحكم العلاقة اسرك على جمبة كده و ما يسمعوني البنوت :
الكلمات دي كانت بالون اختبار لقوة الايمان بحقوق المرأة .. لأنو البوست لو كان عن تعدد الزوجات في الاسلام كان حيكون مذبحة و 42 مداخلة في الدقيقة استنكارا و تنديدا و اتهاما بالظلامية.
لكن وكت طلع البيقول المرأة كائن قصير التفكير هو جان جاك روسو فالادانات بقت خفيفة و بتهذيب : كلام غير مقبول.
و اقري مداخلة صبري الشريف الفوق دي بالذات عشان تعرفي انا قاصد شنو من انو المسيطر على الذهن هو نقد الدين اكثر من مكانة المرأة الكريمة.

قنبي عافية و تعالي تاني .. نضميك سمح بالحيل يا بت الناس العزاز.

عزاز..
غايتو بتكتلي لي قلبي بانك عزاز و بنكتك السمحة دي ..

Quote: حسي انا رأيك في البوست ده أخدو لا اتكلو في السيرفر و اتناول مما يلينا من الأقوال المأثورة؟؟

انتي شايفة شنو يا عزاز ؟
غايتو عشان الخوه بقول ليك كان اتجاهلتي اقوال الفلاسفة و زغتي من البيقول المرأة كائن مثير للاشمئزاز و من البيقول المرأة كائن قصير التفكير و مسكتي فيني انا حتكوني بتزوغي من المهم للما مهم.
لأنو اولا حمور زيادة ما مؤثر و لا كلماتو حكم ترددها الاجيال.
و ثانيا لانو انا و انتي لا نكاد نكون مختلفين الا كنوع من اختلاف التنوع لو وجد. بل على العكس انا قاعد استفيد منك شديد في امور الجندرة ( و الامثلة عندك مافي داعي افرشا هنا ) . فحركة تركزي معاي دي ياها الزوغا زاتا و نوع من " دعوني اقول " ( زي دعوني اعيش).
انتي عارفة و واثقة انو حمور ما بيقول بقول هؤلاء الفلاسفة و انو قولهم اخطر و اعظم من انو يتم تجاهلو لكن لو عاوزه بعد ده كلو تتهميني بما لم اقل او تناقشيني في ما قلت فما بقدر احجر عليك.
و اصلو النقاش معاك الزول ما بيطلع منو ساي يا عزاز.

فاختاري يا عزاز.
يا تناقشي كلام الفلاسفة و تتكلي كلامي في السيرفر ده.
يا تناقشي كلامي و تتكلي كلام الفلاسفة في ذات السيرفر.
يا كمان تناقشي الاتنين و دي ما عارفه كيف لكن انتي ما بيغلبك شي.

و نواصل القاء مزيد من الاحجار ..
اعتذر للصديقة شيراز إن كان ذلك سيجعل مهتمها اصعب.

قال فولتير :

السر الوحيد الذى تستطيع المرأة أن تحتفظ به هو عمرها







فولتير فيلسوف فرنسي من الرموز الفكرية الكبيرة التي اسست لحركة التنويرالفكري الاوروبي .
و كان فولتير قد ألف مسرحية عام 1742 يهاجم فيها موقف الاسلام من المرأة و يقول ان الاسلام يجبر النساء على الايمان. و كان مؤمنا بتحريف الانجيل و ينتقد موقف العلماء المؤمنين بالدين.

قال صمويل بتلر :

إن قطاع الطرق يسألونك نقودك أو حياتك .. ولكن النساء يطلبن الاثنين معا



صمويل بتلر كاتب بريطاني.

قال نيتشه :

روح المرأة سطحية فهي صفحة ماء متماوجة تداعبها الرياح.. في حين أن روح الرجل أعماق تزمجر أمواجها في المغاور السحيقة القرار وقد تشعر المرأة بقوة الرجل ولكنها لن تفهمها



فريدرك نيتشه .. فيلسوف القوة الأول . يمكننا القول أنه صاحب واحدة من أكثر الفلسفات تأثيرا في التاريخ الحديث.
هو من الممهدين لعلم النفس و شاعر و عالم لغويات و هو كان ملهما للوجودية و مدارس ما بعد الحداثة.

قال جوستاف لوبان :

لو لم تكذب النساء في الحب لفقدن سلطانهن على الرجال


جوستاف لوبان فيلسوف و مستشرق فرنسي ملحد يؤمن بالماديةو هو باحث في علم النفس و الاجتماع.

قال شوبنهاور :

لقد سلحت الطبيعة المرأة بالمكر والكذب والخداع لأنها حرمتها من النبوغ و العبقرية




ارثر شوبنهاور فيلسوف الماني شهير يعتبر الحياة كلها شر.
فلسفته تقوم على الربط بين العقل و الارادة.

قال فيكتور هوجو :

سحر المرأة هو في قدرة ملامحها على الكذب

فيكتور هوجو اديب فرنسي شهير شاعر و مسرحي و روائي.
انضم الى حزب اليسار في فرنسا و نادى بالحكم الجمهوري.
من اشهر اعماله رواية البؤساء العبقرية.

قال بودلير :
النساء كالحيوانات المنزلية لا بد من حبسها وإيصاد الباب دونها وضربها وتأديبها مع العناية بها و اطعامها.




شارل بودلير شاعر و ناقد فرنسي يعتبر من رموز الحداثة في العالم.
من اهم اعماله ديوان أزهار الشر.

مازالت اعناق هؤلاء الفلاسفة و المفكرين و الشعراء و الادباء معروضة للمقصلة لمحاكمة الاقوال السيئة في حق المرأة التي قالوها.
لنثبت أنه لا كبير على النقد و التجريم.
و أن اهانة المرأة اثم يتقاسمه الظلاميون و اهل التنوير.

سلام ياحمور ..

بوست ابن ستين لذينا..

كتب الاخ صبري

Quote: الان القوانين الموضوعية هي المناسبه للمراة والرجل وهي في متناول التغيير والزيادة والنقصان

ومن باب صب بعض الزيت على النار المولعة اصلا .. اضيف ان القوانين العامة
في الدول الغربية العلمانية لا يوجد فيها مساواة بين الرجل والمراة - حيث توضع المراة في وضع الغير قادر
على مجابهة مصاعب الحياة دون حماية و تمييز لها بسلسلة من القوانين التى تميل لصالحها في الاحوال
الشخصية وقوانين العمل- فهل يا ترى وضع هذه القوانين هو اعتراف ضمني من المجتمع الغربي "بضعف" المراة
رغم تميزها في كل المجالات بل تفوقها على الرجل في مجالات كانت حكرا علية؟؟ هل هي في حوجة لـ affirmative action
بعد ان نالت كامل حقوقها قبل مئات السنين ؟؟ اسئلة لم تستطع الاجابة عليها اي امريكية جمعتني بها علاقة عمل او جيرة!

وليد صاحبي الزمان ازيك؟
اتفق معك والاخت اماني ان العلاقة بين الرجل والمراة يحب ان تكون تكاملية وليست تنافسية للاختلاف النوعي لما يجلبه كل منهما للطاولة..

تحياتي ..