عفوا .. نحن لا نكتب هنا صدقة .. فاعطونا حقوقنا

" الكتابة من أشرف الصنائع و أرفعها. و أربح البضائع و أنفعها. و أفضل المآثر و أعلاها. و آثر الفضائل و أغلاها.
لا سيما كتابة الانشاء التي هي بمنزلة سلطانها. و انسان عينها بل عين انسانها "
القلقشندي في " صبح الأعشى "

و لما كانت الصناعة شريفة فلزم أن يلحق بها كل شريف خلق و كريم فعل.
و من ذلك شرف النقل و اخلاق الاحالة.

ظل الناس يقتبسون عن بعضهم البعض فيؤلفون و يكتبون و يأخذون المعاني و المعارف في تبادل للمعلومة و تطوير للمعرفة.
و العلم لا يكون الا بالاخذ عن الغير.
و الكاتب مستند على غيره اقتباسا و استلهاما و استبطانا شاء ام ابى.
فلا شئ ينحت من العدم.

أما ان تعيد كتابة ما كتبه أحدهم من قبل بلفظه و حرفه مع تعديل كلمة هنا او هناك لتناسب مكان و زمان وضعتها فانها سرقة لا شئ غيرها.
و اعادة كتابة ما كتب الناس قبح و ازراء بالكاتب. فهي دليل عجز و فقر مقدرة.

و قديما كتب ابن دريد رحمه الله كتاب " جمهرة اللغة " فاتهموه انه نقله عن غيره و أملاه بفارس حيث لم يعلم الناس لمن الكتاب.
و قيل في هجاء ابن دريد :
ابن دريد بقره
يأكل حتى الشره
لقد ادعى من جهله
وضع كتاب الجمهره

نحن هنا لا نكتب مقابل حقوق مادية .. انما هي حقوقنا الادبية في ما نكتبه خبرا او انشاءا .
و لنا حق على من يقرأ لنا ان يشير الينا حين ينقل عنا.
لا الموقع فقط فذاك حق مالكه لكن للكاتب فذاك حق تقدير جهده.

دخلت على بريدي فوجدت رسالة من صديقة عزيزة عنوانها :
" يسرو في بوستاتك و انت و لا هنا "
فتعجبت جدا.
و تبعت الرابط الذي وضعته و انا اظن بخبرها الظنون.
فقد اعتدت على نقل اهل الشرف الذين يحفظون حقي و يشيرون لمصدر ما ينقلونه في اكثر من موقع.
لكن حسن ظني بالناس كان حسرة.
فالرابط قادني الى حروفي و كلماتي بنصها و لفظها في أمر هين لا يستحق وصمة السرقة لولا ان الكاتب لم يقيم اعتبارا لاخلاق النقل.
خبر بسيط كان يمكنه ان يصيغه بلغته لو كان لا يرغب في الاشارة الى غيره ليكون له قصب السبق.
لكنه نقل ما كتبته انا هنا بحرفه و لفظة و اكتفى.

كتب الناقل :

Quote: صدرت يوم الأحد 15 فبراير 2009 مجلة "صوت المهجر" اضافة جديدة للمنشورات السودانية .. ترأس تحرير المجلة الأستاذة نا مهدي. الطاقم الاداري للمجلة به : كابتن عادل المفتي رئيسا لمجلس الادارة لنا مهدي رئيسا للتحرير و عضوية دكتور الطيب حاج مكي و يعقوب البشير من الاقلام التي تكتب في المجلة : الاستاذ كمال الجزولي الاستاذ جعفر عباس الاستاذ عالم عباس الشاعر فضيلي جماع دكتورة اشراقة مصطفى الاستاذ خالد عويس الدبلوماسي ارديس الحارث الاستاذة نور تاور دكتور يوسف الموصلي الاستاذة رجاء العباسي دكتورة صديقة الهادي المهدي ومجموعة اخرى من الاقلام كلمة رئيس التحرير : كما منزل الأحلام بنينا مجلة "صوت المهجر" الدورية (طوبة طوبة) و كلما وضعنا أساساً فظهر على الصفحة الرئيسة للمجلة صفّقنا بفرح طفولي غامر و صحنا بمزيج من الحيوية و الإحساس بالانجاز المتنامي و الجذل. كيف لا و هي "مجلة" حلم بمعنى الكلمة، ليست قيمة المجلة المطبوعة أو المجلة التي تتخذ من الانترنت بيتاً لها أن تكون فخيمة و جميلة شكلاً بقدر ما تكمن قيمتها في مقدرتها على تحقيق أهدافها. فكرة مجلة "صوت المهجر" و أهم أهدافها أن تعيد خطاب المثقف السوداني الجاد و أن تعيد للصحافة ألقها بمجلة جامعة ثقافية اقتصادية اجتماعية فكرية سياسية فنية دينية رياضية بكافة الاختلافات الرؤوية كل يجد فيها ضالته،،همنا في المجلة تجميع السودانيين و لو لمرة بآليات جديدة:الفن الراقي،الفكر المتقد،السياسة الخلوقة،الأدب المهذب للنفس،الدين الحقيقي لا الشعاري والأديان الأخرى. همّنا في المجلة أن نتقارب مع (الآخر) (المختلِف) بمحاولات فهمه حتى لو اختلفنا مع أطروحاته، همّنا في المجلة أن نؤسس للاختلاف الراقي و الحرية الواعية و الملتزمة، (الآخر) (المختلف) عادة ما يجد نفسه في عالمنا العربي و الإسلامي مجابه بسياج العزلة و الإقصاء، و نحن في "صوت المهجر" نقول لهذا الفهم المتخلف (لا) و ندير ظهورنا لكل القوالب الجاهزة لنزلزل عرش التنميط فقط لنطلق على الخوف رصاصة..لم و لن تكن رصاصة الرحمة.. فلنطلق على الخوف رصاصة! مع محبتي؛ لنا عنوان المجلة على الشبكة : http://www.soutalmihjer.com/index.php

راجعه في هذا الرابط غير مأمور :


منتديات قافية و حرف سوداني

و كنت أنا قد كتبت قد تاريخ كتابته بثلاثة ايام هنا اقول :

Quote: صدرت امس الأحد 15 فبراير 2009 مجلة "صوت المهجر" اضافة جديدة للمنشورات السودانية .. ترأس تحرير المجلة الزميلة لنا مهدي الطاقم الاداري للمجلة به : كابتن عادل المفتي رئيسا لمجلس الادارة لنا مهدي رئيسا للتحرير و عضوية دكتور الطيب حاج مكي و يعقوب البشير من الاقلام التي تكتب في المجلة : الاستاذ كمال الجزولي الاستاذ جعفر عباس الاستاذ عالم عباس الشاعر فضيلي جماع دكتورة اشراقة مصطفى الاستاذ خالد عويس الدبلوماسي ارديس الحارث الاستاذة نور تاور دكتور يوسف الموصلي الاستاذة رجاء العباسي دكتورة صديقة الهادي المهدي و مجموعة اخرى من الاقلام عنوان المجلة على الشبكة : http://www.soutalmihjer.com/index.php كلمة رئيس التحرير : كما منزل الأحلام بنينا مجلة "صوت المهجر" الدورية (طوبة طوبة) و كلما وضعنا أساساً فظهر على الصفحة الرئيسة للمجلة صفّقنا بفرح طفولي غامر و صحنا بمزيج من الحيوية و الإحساس بالانجاز المتنامي و الجذل. كيف لا و هي "مجلة" حلم بمعنى الكلمة، ليست قيمة المجلة المطبوعة أو المجلة التي تتخذ من الانترنت بيتاً لها أن تكون فخيمة و جميلة شكلاً بقدر ما تكمن قيمتها في مقدرتها على تحقيق أهدافها. فكرة مجلة "صوت المهجر" و أهم أهدافها أن تعيد خطاب المثقف السوداني الجاد و أن تعيد للصحافة ألقها بمجلة جامعة ثقافية اقتصادية اجتماعية فكرية سياسية فنية دينية رياضية بكافة الاختلافات الرؤوية كل يجد فيها ضالته،،همنا في المجلة تجميع السودانيين و لو لمرة بآليات جديدة:الفن الراقي،الفكر المتقد،السياسة الخلوقة،الأدب المهذب للنفس،الدين الحقيقي لا الشعاري والأديان الأخرى. همّنا في المجلة أن نتقارب مع (الآخر) (المختلِف) بمحاولات فهمه حتى لو اختلفنا مع أطروحاته، همّنا في المجلة أن نؤسس للاختلاف الراقي و الحرية الواعية و الملتزمة، (الآخر) (المختلف) عادة ما يجد نفسه في عالمنا العربي و الإسلامي مجابه بسياج العزلة و الإقصاء، و نحن في "صوت المهجر" نقول لهذا الفهم المتخلف (لا) و ندير ظهورنا لكل القوالب الجاهزة لنزلزل عرش التنميط فقط لنطلق على الخوف رصاصة..لم و لن تكن رصاصة الرحمة.. فلنطلق على الخوف رصاصة! مع محبتي؛ لنا

راجع ما كتبته انا في الرابط ادناه غير مأمور :

مجلة " صوت المهجر " .. صوت سوداني جديد بقيادة " لنا مهدي "

اعجب معي من نقل خبر بحرفه و نصه لا يسمن و لا يغني من جوع.
الخبر ليس فيه الا معلومة عادية.
و به رابط المجلة.
الم يستطع الناقل ان يصيغ الخبر بنفسه مبشرا بالمجلة و الدخول الى الرابط ليختار ما ينقل ؟
الم يجد في لغة العرب ما يبشر به بصدور مجلة صوت المهجر الا نص كلامي و كتابتي ؟
فان راقته الكلمات و اعجبه الترتيب الم يجل بخاطره ان يقول انه قرأ هذا الكلام عندي ؟
ايها الناقل انا لست متصدقا بحروفي ( حتى تلك البسيطة التراكيب ) حتى تأخذ نص كلامي و تذهب به.

و صفة الناقل التي كتبها عن نفسه في المنتدى الأخر هي :
كاتب و مترجم.
فلا اعلم هل نقله نص خبري ترجمة مسقطة لحقي ؟
و العجيب انه صاحب مدونة على الشبكة الالكترونية.
له فيها كتابات جميلة.
لكنني رأيتها بعد ان رأيته ينقل خبرا لا تعني سرقته شيئا للسارق فسألت نفسي هل ما يوجد في تلك المدونة هو من كتابته ام من نقله ايضا؟

ما كتبته انا ايها الناقل لا يتجاوز الثلاثين كلمة دون الاسماء و الصفات.
فرأيت انت انها سهلة يسيرة لا بأس من نقلها.
لكني اقول لك كلا.
فاختيار كلمة جوار كلمة ليس عبثا و لا صدفة.
و نسج العبارة ليس لعبا و لا هينا.
حتى لو كانت جملة من مبتدأ و خبر.
فان كان الامر هينا فمالك استسهلت النقل عن البناء ؟
اليس في وسعك نسج ثلاثين كلمة اخرى لتبشر بالمجلة ؟

و قارن فعلة هذا الناقل بما كتبه زميل المنبر خالد ابو أحمد في مقاله عن أحمد سليمان المحامي رحمه الله :

Quote: أول دخولي المنبر فوجئت بخير وفاة الاستاذ أحمد سليمان المحامي من خلال بوست للاخ حمور زيادة، أسأل الله له الرحمة والمغفرة

أحمد سليمان المحامي..قدم للحركة الاسلامية الكثير لكنه لم يأخذ منها شيئاً
و لو قال :
فوجئت هذا الصباح بخبر وفاة الاستاذ احمد سليمان المحامي اسأل الله له الرحمة و المغفرة.
لكان صادقا و فعله سليما.
فأنا نقلت خبرا ليس سرا بل هو خبر سيذيع ان لم يكن قد ذاع في لحظته.
فما ضر ابو احمد لو اسقط اسم صاحب الخبر و تناوله كخبر عام ذاع فوصله من اي مكان ؟
لكن ربما كان عيب الزميل خالد انه ليس كاتب و مترجم.

و قارنه بفعل الزميل ياسر الشريف في موقع سودان فور اول حين كتب :

Quote: شاهدت صباح اليوم نقلا حيا شيع فيه السودانيون فقيد السودان والأدب الأستاذ الطيب صالح إلى مثواه الأخير في مقابر البكري بأمدرمان. رحم الله الطيب صالح رحمة واسعة وألهم آله وذويه ومحبيه الصبر وحسن العزاء. قرأت البارحة كتابة جميلة كتبها الأديب حمور زيادة في سودانيز أونلاين، أنقلها بعد تصويب ما وقع سهوا. وأحيي حمور وأعزيه حار العزاء اقتباس: مشهد لم يكتبه سيدي : كان في غيبوبته تحفه دعواتنا و حبنا حين دلف الشيخ الحنين إلى الغرفة. كانت باردة يتردد فيها صفير اجهزة الانعاش و ضوء يومض في احدها. حين سرى الشيخ الحنين داخلا الغرفة لم يره احد. و لم يكن له على الارض ظل. وقف جوار الفراش تحيطه هاله من نور كالشمس حين تطل من خلف سحب. ابتسم في حنو. قال : "أرح يا الطيب". فتح سيدنا عينيه. لم تسجل الاجهزة البلاستيكية المظهر اي تغير. لم تدوي الاشارة لتنبه الممرضة بالخارج ان مريضها فاق. فتح عينيه في صمت تام. نظر في عيني الشيخ الحنين. ابتسم في ارهاق. قال : "أخيرا يا ابوي الحنين ؟ " "لكل اجل كتاب يا الطيب. و وكتك جا يادوبو" هز رأسه في تفهم و همس : "عارف. لكني كنت مستني من زمان. جهزت نفسي من بدري يا ابوي " انحنى الشيخ الحنين على الفراش و همس له : "شفتك يا المبروك. شفتك و انت بتجهز روحك للمشي. عارف شوقك قدر شنو. و هسه جا وكتو" "انا جاهز " مد الشيخ الحنين يده "أرح " رفع كفه فقبض على يد الشيخ الحنين و هب من فراشه. وقف وسط الحجرة و نظر الى جسده الذي خلفه في تسجيته. دارت في داخله مئات الرؤى و الذكريات. لكن الشوق كان يحفزه. قال الحنين : "خلاص ؟ " اجابه و هو يتنهد : "خلاص " ثم التمع في عينيه الشوق لما يأتي. قال : "فتح الرحمن هناك ؟ " " راجيك " برفق جذبه الشيخ الحنين من يده و اتجه الى باب الغرفة مغادرا. بدأت الاجهزة تعوي. حين وصلا امام الباب انفتح بعنف لتلج الممرضة المذعورة. نظر اليها في سلام و ابتسم. و قبل ان يغلق الباب خلفهما لمحها تميل على جسده محاولة ما لا جدوى منه. لقد أتاه الشيخ الحنين. و لا عودة. "أرح يا الطيب.. أرح "

لقاء نادر مع الأستاذ الطيب صالح

فهذه كلمات كتلك ايها الناقل .. وضعت جوار بعضها بعضا .. و لو نقلها غفلا عن اسم او مصدر ربما لم ينتبه لذلك أحد.
لكنه شئ يدعونه الأمانه.

بل ان الزميل ياسر الشريف الشريف ( و التكرار ليس غلطة طباعة ) فعل خيرا من ذلك في ذات الموقع.
ففي موضوع ذي صلة نقل عني معلومة صغيرة كان يمكن ان تمر و تظهره بمظهر حسن كعالم بالأمر .. لكنه ذكر المصدر بكل امانة :

Quote: لم أقرأ رواية كونراد التي قلتها ولكني لا أستبعد أن يكون الطيب صالح قد تأثر بها أو بأسلوب كاتبها و"تكنيكه"، ولكن أن تكون كل رواية موسم الهجرة هي إعادة كتابة لهذه الرواية فهذا ما لا أوافقك عليه. قرأت اليوم بوستا جميلا في سودانيز أونلاين للأديب حمور زيادة أورد لك منه هذه المداخلة التي تؤكد أن الطيب صالح يعترف بنفسه بأنه قد تأثر بحكاوي القرية، فهل نقول أنه سرقها أو انتحلها لنفسه؟؟ كلمة "منحول" غير صحيحة أبدا. فما هو الإنتحال؟

ثم نقل نص كلامي مشكورا.

في رحاب الخلود اديبنا الطيب صالح

و قد اعتدت ان اجد احيانا بعض ما اكتب منقولا في مواقع اخرى فضلا من ناقليه و احسانا منهم الى كتابتي.
لكني لم اجد يوما احدهم يغمطني حقي البسيط في الاشارة الى نقله عني.
بل ان منهم نفر كريم يرسل مستئذنا قبل الفعل و منهم من يرسل الرابط بعد النقل مشكورا.
و هذا فضل منهم اشكرهم عليه و احني رأسي امامه خجلا من تطويقهم لي بهذا الجميل أن يروا في ما كتبت شيئا يستحق النقل.
لكنهم اضافوا الى جميلهم حسن الفعل حين اشاروا الى الكاتب.
فللاسف كنت ايها الناقل اول من فعل ذلك لي. رغم انك كاتب و مترجم.

ارجو ان تكون ايها الناقل تقرأ هذا الان فيحرجك اني اشكر جدا من نقلوا عني شيئا من كتابتي.
و منهم الاخ مدحت عثمان

دولة كوش

و الاخ عمر ادريس بمنتديات الجالية السودانية بفلادلفيا

قالوا في رحيل الطيب صالح

و الاخ هرقل في سودان دوت نت و الاخ الكلاكلة الذي نقل عني اكثر من مره هناك

كرري الحكاية التي لم يستفد منها احد : حمور زيادة

.

المثل الأمريكى يقول ...

If you're good at something ... Don't do it for free

إذا كنت تجيد شيئاً .... فلا تفعله مجاناً ...

(دائماً نستمتع بكتاباتك يا أستاذ)










... المهم ....

Quote: المثل الأمريكى يقول ... If you're good at something ... Don't do it for free إذا كنت تجيد شيئاً .... فلا تفعله مجاناً ...

نعمل شنو طيب يا تبارك للناس القايلننا بنكتب صدقة او بنفتح بوستات سبيل.
يجي الواحد يخم و يمشي.
و لو سرق بوست تاني كنت عذرتو .. قالوا لو سرقت اسرق جمل.
لكن يسرق بوست خبري ما يزيد عن تلتين كلمة ؟
دي الحقارة زاتا ياخ.
كلمو انو الاشارة لكاتب شي








مهم

ايها الناقل ..
حين تجدني وضعت ايقونة " وقف " جوار البوست او ايقونة " سبيل " يمكنك حينها ان تأخذ ما شئت و تغرف.
حتى ذلك الحين فان لي ( و لغيري من كتاب الموقع ) حقوقا ينبغي ان تحفظ.
و اعلم انك كما ازريت بنفسك حين اظهرت نفسك عاجزا عن صياغة خبر يسير كهذا ازريت ايضا بالمنتدى الذي تكتب فيه.
فلو كنت تعتبره منتدى مطروقا يأتيه الناس لخشيت ان يرى احد القراء تشابه ما كتبت انت مع ما كتبته انا.
لكنك ظننت ان منتدى الحرف السوداني هذا مهجور لا يكاد يراه احد ففعلت فعلتك.
لو كنت تحسن تقدير المنتدى لخشيت الفضح. لكنك ظننته زقاقا جانبيا لا يلجه احد.
فكامل تعاطفي مع منتدى منحك عضويته و انت تعامله كشارع خلفي غير مطروق.

العزيز الانيق حمور
تحياتي
سرقه جهدك الادبي تستوجب قطع اليد اعلم كل العلم الالم الذي يعتصر
فؤادك لكن الجاتك في قلمك سامحتك
كل التضامن معك حتي تنال كل حقوقك الادبيه

ثم خطر ببالي ان ابحث في الشبكة عن اي مقال اخر لي كتبته هنا ربما اجده مسروقا في مكان اخر.
فكتبت اول عنوان خطر ببالي و هو بوست قديم وجد رواجا لفترة " لماذا لا يتزوج بطوط زيزي "
فاذا بقوقل يقودني الى موقع سوداني وجدت بوستي فيه بنصه و حرفه مع اضافة وجوه تعبيريه لطيفة تظرفا من الناقل.
لكني بحثت عبثا عن اسمي او اسم سودانيز اون لاين فلم أجده.

اسم الموقع فتش

www.ftesh.com[/B]

لماذا لا يتزوج بطوط زيزي

وليد ..

Quote: سرقه جهدك الادبي تستوجب قطع اليد

او القطع من خلاف ؟

لا اظن اني سأكون متطلبا او مغاليا لو طالبت الناقلين الذين عثرت عليهما حتى الان بالاعتذار ..
ناقل موضوع لماذا لا يتزوج بطوط زيزي
و ناقل موضوع مجلة صوت المهجر

او على اسوأ حال اعتذار من المشرفين على موقع منتديات قافية و حرف سوداني و موقع فتش.

هل في طلبي هذا شئ كثير ؟

Quote: * معلومات عن المش مهندس أمجد المكان الخرطوم التخصص مهندس معماري * التوقيع لا تنسى ذكر الله

انساه ذكر الله عن ذكر اسمك..... ربما
يا هذا اذكر اسم صاحب المقال حتى يذكرك الله

صباحاتك ملبده بالغضب يا حمور.....
....الغضب احساس غير صحى يا عزيزي....
لذلك حاول ان تصنع من القضيه طاقه ايجابيه.....كيف؟؟ما عارفه...بس كلام خواجات قلتو!!!...
عموما...ادبيات حقوق الطبع والنشر والاقتباس والكلام ده..
ثقافه تتراوح من غير سائده الى منعدمه عند شعب السودان.....
ومع سيادة السايبرسبيس أصبح الوضع أسوأ....
.....قرأت مره قصيده لكاتب شاب كدت أحلف بأنها لمحمد عبد الحي....
الترميز والعموديه والاغراق فى
تلوين القصيده بالحس الافروعربي....
فراسلته معرفة عن نفسي.....ولم يرد...
""لكن بلقاو فى ملف""
...عموما...أعتقد انو من المناسب ان ننتهز فرصة نصوص حمور الطالعه صدقه للاحتفال
باليوم العالمى للملكيه الفكريه....
رأيك شنو يا حمور ...بدلا من ان يتحول البوست الى بوست غضب وتعازى وعوضك الله...
تتحفنا بشئ عن الملكيه الفكريه....
...لنتعلم...







-----------------
ويكون حجر آخر فى بحيرة السكون..!!!!

حمور
اصلا زي كتابتك مافي
عشان كدا احسن يرمزوا لمصدر النقل او الكاتب باي اشارة


عجبي يازمن

الأخ حمّور (هل لي في إخائك)؟ .... وإذا كان لي أو لم يكن .. هل (إخائك) صحيحة؟

أولاً غضبك مبرر .. ولك كل الحق.

منذ اشتراكي في سودانيز أونلاين، وقبلها، حينما كنت متصفّح، كنت أتخيّر لمن أقرأ، في محاولة لنهل المفيد والمتعة. ومنذ اشتراكك واظبت على بوستاتك مثل كثيرين وجدوا فيك أديباً مثّل إضافة للمنبر. وللحق فإني - تقريباً - قرأت كل ما كتبت حتى ولو لم أتداخل في معظمها.

فقط إني أستغرب لغضبك العارم، والذي دعاك لفتح بوست لسرقة صياغة خبر أوردته، رغم عن سكوتك عند سرقة موضوع (لماذا لا يتزوّج بطوط زيزي)، لأني أجد سرقة (ولا أقول نقل) موضوع لماذا لا يتزوّج بطوط زيزي أدعى للغضب من سرقة (صياغة) الخبر، وفي كلاهما تجنّي.

كامل دعمي في المطالبة بوقف التعدّي.

يا عمكـ

عمرنا دا كلو ما قدرنا نركب لينا غير عبارة واحدة
(غايتو جنس غايتو) .. والناس فيها ما ريحتنا
خليناها ليهم وبقينا نخستكـ ساي!



زميل المنبر الأديب محمد الطيب يوسف
كل فترة بيلقى رواياتو في منبر واحد قاشر بيها!


هسي كمان يا عمكـ
كل يوم تقوم تقوقل نفسكـ من الصباح وتشوف اللاطش منكـ منو
تسجل في منتداهم وترشو بي كلمتين وتعمل نايم عشان تاني ما ينقل
لأنو عارفكـ مسجل معاهم!

ما في حل غير كــدا يا عمكـ!



قوقلها وتوكل

Quote: حين تجدني وضعت ايقونة " وقف " جوار البوست او ايقونة " سبيل " يمكنك حينها ان تأخذ ما شئت و تغرف.

هاها...



يجب عليك كتابة ( محظور ) كما يفعل العسكريون في مكاتباتهم .. ويمكنك ايضا وضع احد النمور للحراسة ..


الله يعينك ..

الحبيب حمور
لك حق تغضب
أن يفكر الإنسان ثم يدلف للمنبر ثم يختار عبارات محددة ثم يصيغها ثم يسكب مداد كيبورده ليست عبثاً، هلا كونا مجموعة نسميها (مجموعة حماية حقوق الملكية الفكرية للنصوص المنشورة في الانترنت) أو أي تسمية تختارونها؟

Quote: هل في طلبي هذا شئ كثير ؟

اخى حمور

افهم معنى غضبك , ولكن ربما فعل ذلك سهوا دون ان يذكر المصدر واقصد ناقل خبر الصحيفة واما الاخر فهو سارق

وما كتيرة على الاتنين الاعتذار

كن بخير

المؤسف إنو الناقل عنك كاتب ومترجم, يعني (زميل) و فاهم أصول (الكار), غير مثلا لو كان ده حصل من هواة كتابة السايبر
فيهم مراهقين, وغير ناضجين, و ذوي حظوظ قليلة من الوعي.

يازول تاني اكتب بالشفرة, أو اكتب جزء من المقال ك preview وقول الباقي إلا ب فيزا كارد



غايتو جنس غايتو



!

سلام حمور المتداخلين .

حقيقي حـُسن النية ( تتمثل حـُسن النية في وضعه للخبر , ثم اعقبه بمداخلة منفصلة من عنده ) لاتنفي صفة ( هضم الحقوق ) , حتى إن كان المنقول خبراً , الآن الناقل لم يـُشر للكاتب , ولم يـُشر للموقع الذي تذيله هذه العبارة :
يمكنك نقل أو اقتباس اى مواد أعلامية من هذا الموقع بشرط وضع "نقلا عن سودانيز اون لاين"و الاشارة الى عنواننا

اعتذر لكل الاخوة المتداخلين.
المشاغل مسكتني.

يوسف الولي ..

Quote: انساه ذكر الله عن ذكر اسمك..... ربما يا هذا اذكر اسم صاحب المقال حتى يذكرك الله

هو الزول ده قايل انو ذكر الله بيمنع ذكر المصدر ؟
يعني الصحابة كانوا بينسوا اسماء بعض عشان بيذكروا الله ؟
غايتو بالغ.
لكن فعلا اشارتك ذكية.
زول بيوقع بالتنبيه لذكر الله مفروض يخلي بالو حبة من حقوق الناس.

شيراز يا صديقتي ..
ياخ الناس دي عجيبة ..
انا بقى ما لقيت زول سارق من ابوي ( ده على سيرة الابهات )
لكن لقيت زول كاتب مقال في مدونة فيهو معلومات غلط كتيرة جدا عن ابوي في معرض هجوم عليهو.
بكل لطف رسلت انبهو على الايميل بتاعو ..
وحاتك لا غير كلامو في المدونة لا رد لي في الايميل و لا اشتغل بي الشغلة.
الناس دي بتكتب و تعجبا روحا و تلبد.
المهم ..
انا و الله حقوق الملكية و قوانينا ما فالح فيها.
ممكن اتكلم عن الاخلاقيات و ادب الكاتب.
لكن يا ريت زول يجيب لينا الفوائد دي.
زاتو عشان اشوف هل ممكن افتح بلاغ انا زاتي ؟
و كده تبقى سودانيز اون لاين مسكت كل قضايا النشر الالكتروني الموجودة على الساحة.
طارق الامين
منال خوجلي
ناذر الخليفة
دكتورة بيان
و حمور زيادة
و تصدق نبوءة كمال علي الزين
محكمة سودانيز اون لاين الخاصة
حبذا لو عملوها لينا في قندهار كمان.

الغريبة يا شبكة انا طلعت الداقس الوحيد
اتنين من الصديقات قالوا لي نحن بنعمل سيرش لبوستاتك طوالي لأننا متوقعين انها تتلطش.
و انا قاعد بكل سعادة اكتب هنا و قايل العالم بخير.
شئ مؤلم ياخ.

محمد ابو العزائم ..
انا يا اخي فتحت البوست غضبا لنقل الخبر بكلماتي و نص حروفي ..
بعد ما كتبت البوست و عاوز اعمل ساين اوت فكرت افتش حاجه تانية
فتحت قوقل و دقيت اول اسم في بالي
فجاني ناطي ..
بطني طمت و ما فتشت حاجه تانية
خفت القى بوستاتي التانية حايمة برضو.
و و الله ما عرفت اكتب شنو في الزول اللطش بوست كامل ده.
يعني بس براك اتخيل انا انفعلت قدر ده في تلتين كلمة.
لما القى بوست كامل مفروض اكون وصلت ياتو مرحلة ؟
و الله ما عارف اقول شنو زاتو.

ود الصايم يا عمك ..
و الله عاوز اقوقل لكن خايف ..
لو لقيت بوست تاني و الله اتفقع ليكم هنا في نص البورد ده.
عليك النبي قوقل لي و كلمني براحة ..
يعني لو تقدر كلمني سطر سطر ما مره واحده.
ما بستحمل

معتصم ..
نمر ياكلك ياخ

لا محظور لا حنطور .. اها الكتابة دي بنخليها ..
نشوفم يسرقوا شنو تاني

اتذكرت زميلتنا الراقية الاستاذة هند محمد ..
حكت لي انها ما بتنشر نص الا بعد تسجلوا باسمها في الجهات الرسمية ..
يعني تاني الواحد يشيل اللابتوب و يمشي يقعد جمب المكلية الفكرية ..
يسجل و يكتب
الله يقرفم زي ما قرفونا ياخ

يا لنا ..
انتي وشيراز ديل شوفوا العاوزين تعملوهو و انا معاكم طوالي
هسه خلوني في مغستي دي و مافي زول يسألني

انا يا حامد ما زعلان من ناقل الخبر عشان الخبر زاتو
كون انو مجلة صوت المهجر صدرت ده خبر عام
لا هو سري لا حصري لا غير معلوم
من حقوا ينشر الخبر من غير ما يجيب سيرتي
دي ما بتزعل
البيغيظ انو يعمل كوبي لكلامي بضبانتو و يختو
ياخ ده حتى ما راجع
انا كاتب اسم ادريس غلط ما صلحو
هو وكت الخبر هماهو قدر ده و عاوز يكتب عنو مالو ما بيعرف عربي ؟
ما يصيغو بطريقتو
قد اكون متعنت لكن و الله ما شايف فرق بين الاتنين.

Quote: يازول تاني اكتب بالشفرة, أو اكتب جزء من المقال ك preview وقول الباقي إلا ب فيزا كارد

صلاح النادر ما تضحكني ياخ
فيزا كارد شنو .. انا كاتب بوست وله فاتح لي قناة استغفر الله في اليوتيوب.

تعرف يا فلان ..
عبارة بكري دي بتذكرني من دون مؤاخذة عبارة " ممنوع البول يا حمار " البتلقاها مكتوبة على الحيط ديك
و بتلقى تحتها الحيطة مسقية و العبارة ذاتا مبلولة.



ــــــــ
مخصوص ابيت اضرب المثل بعبارة التدخين ضار بالصحة لأني انا زاتي مدخن.

قمت امس بمراسلة مشرفي الموقعين و اخطارهم بالنقل و وضعت لهم روابط الموضوعين بمنتدياتهم و في سودانيز اون لاين.
و ما زلت انتظر ردهم حتى الان.

Quote: قمت امس بمراسلة مشرفي الموقعين و اخطارهم بالنقل و وضعت لهم روابط الموضوعين بمنتدياتهم و في سودانيز اون لاين. و ما زلت انتظر ردهم حتى الان.

كده نقدر نقول إنك وجّهت زعلتك توجيه مفيد (الفضفضة برضو مفيدة). ولو كل زول عمل كده ... أكيد السرقات حتقل، وأقول ليك، لو كل كاتب عمل كده تاني العايز يعمل إقتباس زي حقي القوق ده حيتلفت قبل ما يعملو.

غايتو يا محمد من امبارح منتظر
و غالبا ما حاستعجل لاي شي او كلام كعب.
لغاية بكرة لو ما جاني رد فارسل ليهم تاني.
و احتمال ادي فرصة رسالة تالتة كمان.
لكن بعد داك بيكون الواقع بيقول حقيقة شينة اتمنى من الله انها ما تتحقق.


في حالة كان احد الناقلين او المشرفين بيتابع البورد و ما عرف يطلع ايميلي من الملف فالايميل هو :[/B][email protected]

حمور زيادة

بغض النظر عن اني مخاصماك وكدة... لكن اتذكرت طارق جبريل وقصته المشهورة بتاعة العمارات...سالته قبل كدة قلت لي يا طارق شنو قصتك دي ماداير تختمها لينا،،، عرفت منه انه في واحد في موقع تاني بشيل القصة بنقطتها وشولتها وينزلها على انه كاتبها...تتخيل...اها طارق جبريل وقف كتابة القصة..وناسنا ديلاك لي اسه مشرورين وبطالبوا حرامي القصص انه يتمها ليهم..... وطارق هنا..حير حرامي النت والقراء وحيرنا معاه...






بالمناسبة بوست بطوط وزيزي ماتعيد إفتتاحه من جديد...مغروضين فيه في عوزة....


اها نرجع لي خصامنا....

Quote: بغض النظر عن اني مخاصماك وكدة... لكن اتذكرت طارق جبريل وقصته المشهورة بتاعة العمارات...سالته قبل كدة قلت لي يا طارق شنو قصتك دي ماداير تختمها لينا،،، عرفت منه انه في واحد في موقع تاني بشيل القصة بنقطتها وشولتها وينزلها على انه كاتبها...تتخيل...اها طارق جبريل وقف كتابة القصة..وناسنا ديلاك لي اسه مشرورين وبطالبوا حرامي القصص انه يتمها ليهم..... وطارق هنا..حير حرامي النت والقراء وحيرنا معاه...

ههههههههههههههههههه
حمور وحنين ازيكم

تعرف يا حمور القصة دي مرة قوقلتها
بنصيحة من اخونا كيكي
وحاتك لقيت لي جغلمية موقع كدة
فيهم الخاتي الاسم وفيهم القاشر بالموضوع
قمت حردت وخليتها
بقيت مرة مرة ارجع اشوف ناسي ديك
يمين زي ما قالت ليك عزيزتنا حنين
كسحوا خلوا المنبر زاتو هههه


يا سيدي شيخي وشيخك الطيب صالح مرة قال لي:
مرة جاء واحد قال لي يا استاذ قصتك حقت
طير الجنوب ديك سمحة خلاص.. يا طارق يا ولدي
الناس دي دايشة ونحن دايشين معاها
هههههههههههههه

الف رحمة ونور على قبره

و الله يا حمور قدر ما اخرت المداخلة دي ما نفع انو يقطع الضحك
ياخ ما تحمينا الضحك و تجيب امثال تحريضية زي دي
تحذير التدخين ما كان بحلك ؟

ما عارف غايتو شغلتكم دي شغلة بعرفوها الكتاب لكن انا مع حبيبي بتاع بيضة الديك داك ( غايتو جنس غايتو ) الخلاها للجماعة
اها الناقل دا تقوم تسجل معاه في عقر داره و تديهو في التنك
طبعاً حل زي دا ما ح ينفع في حالتكم
بالجد الحركة ما نبيلة و لا جميلة
كلمة ناقل دي غالباً انا بتقع لي في خانة القيم السلبية . . . و احياناً سلبية مُعدية و متعدية لما يرتبط بيها من مفردات
مثلاً من ضمن المرات القليلة الفيها مفردة " وطني " بتبدوا لي سلبية لما يتربطوا ببعض " الناقل الوطني "

اها في تضامن و لا كشف و لا اي حاجة هنا و لا نكتفي بالفات ؟

يا حمور يا زيادة مساك الله بالخير والجمال
يا خوي لغاية ما نتعلم حماية الملكية الفكرية ومتابعة لصوص المواقع

حنقول الجاتك في كتابتك سامحتك

مرة نشرت قصة واقعية جداً وابطالها لسة غير واحدة كلهم عايشين في منتدي الراكوبة
وتشهد على كتابتها صديقة من نفس الموقع لأنها شجعتي على نشرها بعد أن عايشت جزء من حياة أبطالها
المهم نشرت القصة وتداخل فيها أدباء أقدرهم كمحمد عبد الملك وأحمد الملك وعالجت القصة بناء على نقدهم
بعد سنتين كدة إتصل صديق وقال لي قصتك دي منشورة في منتدى آخر ورسل لي الراط

وأنت الصادق بكل الأدب والذوق خاطبت السارق وحضرتوا خاتي تلفونو في البروفايل بتاعه
وخاطبت إدارة المنتدي
ما غشتغلوا بي
واصحابي في الراكوبة هاجوا وقالو ما حيخلوا القصة دي
وخاطبت إدارة المنتدى المعني وهددتهم بغتخاذ إجراءات في حال أن لم يكتبوا إسمي على القصة
وإسم الراكوبة وهو الموقع الأصلي الذي شهد ميلاد القصة

وحاتك لي يومي ويمك ما في زول عبرني


أها كان لقيت ليك حل غير الزعل كلمني وينوبك ثواب


مع تحياتي

Quote: شئ مؤلم ياخ.

حنين ..
كنت حارد عليك ..
لكن لقيتك رجعتي الخصام قبل ما انا ارد ..
فعليه ما حاقدر اقول ليك غير : الحيريب.

و الله يا ود جبرين قصتك دي ما خشيت منتدى سوداني الا لقيتا قدامي
عاملة زي عبارة المواضيع المنشورة لا تعبر بالضرورة عن رأي الموقع.
محل تخش تلقاها.
انا في الاول كنت قايلك منتشر.
تاني لقيت الموضوع نقل سااااي.
الله يكون في عونك ياخ.

تعرف يا قيقا ..
كنت عاوز اسجل في منتدى و اخش شايت شمال.
لكن فجأة اتنبهت انو ده اسلوب تاخد حقك بيدك زاتو.
و مافي سبب يخليني اخش منتدى اشاكل لي زول و يطلع نجم بهناك يا عمك و ناس المنتدى كلهم ينطوا لي في حلقي.
فسمعت نصيحة اخت عزيزة و قمت مشيت بالقانون و رسلت شكوى للادارة.
اها و تراني لسه راجي.



تضامن حاف ما معانا تقوم شيراز تزعل مننا.
جيب لينا حاجه عن الملكية الفكرية.

الله لا ختاك في حتة زي دي يا شبكة.
بالجد مؤلمة.

حمور زيادة
صباح الخير
جدث هذا و يحدث لأنو ال copy و ال paste " معالم في حياتهم"
و هم يطمجون إلى التواجد ك"أسماء فى جياتنا"
يا سيدى الفاضل
هذا زمان "النبق" و " الأنناس"
وزمان الوهم البقى إحساس

دمت بخير و "بدون مغسة"

يتواجدون كاسماء في حياتنا على حسابنا ؟
ذنبنا شنو يا اسعد ؟
غايتو الله بيننا و بينهم.

اللطيف اني لاحظت اخيرا انو ناقل موضوع بطوط و زيزي كاتب " منقول " صغيرونه كده على شمال الصفحة ..
منقول من وين و من منو ؟
الظاهر اسمي او اسم الموقع عيب كبير عشان كده عمل بضميرو و كتب منقول و ما كتب اسم الكاتب.

Quote: يتواجدون كاسماء في حياتنا على حسابنا ؟ ذنبنا شنو يا اسعد ؟ غايتو الله بيننا و بينهم.

حمور زيادة
أن تقرأ كلامك "مسروقا" .. خيرا من أن تقرأ كلامهم " اورجنال"
لأنه من شاكلة
هو الطيب صالح دا ذاتو منو !!
و لا ممكن تسمع
.." هو عليك الله الفيتورى ده بكتب شعر"
يا حمور أنا مرة سمعت مذيعة " هسع معروفة و ممكن تكون مفكرة و اديبة !! بتسأل .. " إنتو الصلحى ده منو" ..
و اخيرا " عليك بقراءة الاعمدة الصحفية لبعضهم" ثم تنقل بقوقل .. و ستجد العجب العجاب ، و يمكن تقنع من الغنيمة بالاياب إذا لم تقرر الغياب ..
حمور
نحنا بالبنقراهو هسع و بنشوفو و نسمعهو بقينا عديمى "مرارة" و " فشفاش
و ضاربينها طناش
و كاميرا من غير فلاش


و دمت بخير

و الله يا شادية ما عارف حاعمل شنو بالضبط
لكني لو قمت للشرشرة شرير شديد.
قوليها تلاتة مرات و بدخلك معاي في الحل.

ذكرتني يا اسعد مرة كاتب مقال صحفي باني مقالو في شتيمة انجلترا على قصة انو الملكة فكتوريا لما شافت مظاهرات و قالوا ليها عاوزين عيش قالت طيب ما ياكلو جاتوه.
و قام ليك على بريطانيا قومة كلب تقول خربت حوض خدارو قبال السوق بيوم.
انو بريطانيا المستعلية التي لا تحس بالفقراء و ما تعرف ايه.
اول شي جا في بالي انو الزول ده لو خت الرحمن في قلبو و خش قوقل كان استفاد بدل الاحراج ده.
تاني فكرت انو قد يكون لقط المعلومة زاتا غلط من قوقل و جا يفتل بيها موضوع.
غايتو ربك يهون علينا ياخ.

طيب يا حمور ، اديك دى و قبل أسبوع بس
فى برنامج بالنيل الازرق و عند التعليق على شول منوت
ذكر احد الحكام ..الرئيسين فى الحلقة معلومة عن بابو نمر و ابيى و "البرلمان" .. البرلمان كان فى غهد الرئيس الراحل عبود و لا الديموقراطية الثانية و لا النميرى .. المهم الراجل اختار واحد و أفتى و ضرب المثل..
و الناس صفقت و بحرارة لكلامو ..
و أخر الكلام ..سلام
______________________________
و معذرة لخروجى خارج النص شوية

Quote: تضامن حاف ما معانا تقوم شيراز تزعل مننا. جيب لينا حاجه عن الملكية الفكرية.

لا كلو و لا زعل شيراز مننا دي
تعرف سنة كم و تسعين كدا ما عارف انا و سارة ايام كنا بنمشي نجكس في كلية الطب ، هفتنا لينا نمشي نسلم على الزولة ساي بلا سابق معرفة . . . عالم الله ريدة ساي لله و الرسول

اها كان فيها زعل انركب السودانية ساي و نبقى ليكم " ناقل وطني " عديل
و يا مضارب ويكيبيدا و سائر عموم الانترنت ما جاك بلاء و بحت عن " الملكية الفكرية "








------------------
" غايتو جنس غايتو " يا عمك ود الصائم . . . ما تجي تطالب بحقوق ملكية فكرية ، لاحظ انها بين قوسين
كرهتنا كسير التلج ذاتو ببوستك المغرض داك . . . ياخ بنفتح فيك بلاغ اعتراض كسار تلج رسمي اثناء تأدية واجبه

Quote: ان موضوع حق المؤلف والبيانات الرقمية Copyright and Digital Data لا يزال في نطاق البحث والتقصي ، ومع ذلك فقد انجز الكثير منه في الوقت الحاضر سواء على المستوى الدولي ام الوطني ، وتهيء اتفقيتا المنظمة العالمية للملكية الفكرية بشان حق المؤلف والحقوق المجاورة لعام 1996 الى الانطلاق نحو بناء نظام قانوني لحماية المحتوى الرقمي ، وهو ما سنتناوله تفصيلا في الكتاب الثالث من هذه الموسوعة . ونكتفي في هذا المقام بالقول ان أحد اكثر الأخطاء الشائعة في حقل قانون الكمبيوتر أن حق المؤلف لا ينطبق على البيانات الرقمية ( Digital Data ) وتحديدا في بيئة الإنترنت . ان قوانين حق المؤلف قد تنطبق على بيئة الإنترنت وفقا للنظام القانوني مدار البحث وثمة جهد دولي واسع لتمتد الحماية للبيئة الرقمية تماما كما تحققت في عالم الموجودات والحسيات ، وليس معنى تخلف الحماية واحيانا الجدل حول توفرها اهدار حق المؤلف مثلا في بيئة الانترنت ، فحتى في بيئة الإنترنت ، فانك لا تزال بحاجة الى إذن المؤلف (Author's permission)

اها يا حمور
لحدي اسي قدرت افرز ليك بين الكيسين العرضتهم هنا
2. بالنسبة لنص " بطوط و زيزي " : حكاية منقول براها ما بتحل الناقل . . . الشغلة فيها اذن عديل
2. اما موضوع الخبر و سرقة صياغتك ليهو . . . فدا برضو بيعتبر خلق ابداعي - بختنا يا ود الصايم اهو طلع لينا حقوق برضو مع الناس )

Quote: اما قضاء محكمة النقض المصرية فانه يتوسع في مفهوم الابتكار ، فقد قضت محكمة النقض المصرية عام 1964 بان فهرسة احدى كتب الاحاديث النبوية يعد عملا ابتكاريا لانه يكفي ان يكون عمل واضعه حديثا في نوعه ويتميز بطابع شخصي خاص وانه يعتبر من قبيل الابتكار في الترتيب او التنسيق او باي مجهود آخر ان يتسم بالطابع الشخصي.[ نقض مدني في 7 يوليو 1964 - مجموعة النقض المدني المصري سنة 1964 ، ص 920 . ]

شرحو من هنا http://www.mawhopon.net/ver_ar/news.php?news_id=1716
- http://www.kenanaonline.com/ws/hetta11/blog/81023/page/2
- http://lunajan.com/articles-action-show-id-4.htm
- http://braa.getgoo.us/montada-f6/topic-t14.htm#14

تحياتي اسعد و قيقا.
دخول سريع لنقل خبر عاجل ..
تفضل الاستاذ معتصم الحارث ناقل خبر مجلة صوت المهجر بالاتصال و الاعتذارالجميل الراقي و تعديل الخطأ.
ادناه انقل كريم خلقه في تصويب الخطأ.

Quote: نشر مقالة بإغفال الإشارة إلى كاتبها- توضيح واعتذار الأخ الفاضل حمور زيادة تحية طيبة واحتراما دعني أبدأ بالاعتذار لتأخري في الرد إذ لم أقرأ مقالتك العاصفة على صفحات سودانيز أونلاين بعنوان "عفوا .. نحن لا نكتب هنا صدقة .. فاعطونا حقوقنا" إلا الآن، وهأنذا أبادرُ إلى الرد على جناح السرعة موضّحا ومعتذرا لإحقاق الحق، والحمد لله أن انتقائك لعنوان مقالتك استرعى انتباهي فاطلعتُ عليها، وإلا لتأخر ردّي كثيرا. لقد اطلعتُ بمزيد من الدهشة والألم على مقالتك المذكورة: الدهشة لأنني لم أتوقع أن أرى اسمي على صفحات الشنار: إثر خطأ غير متعمد، وبالتأكيد غير مقصود ارتكبتُه في لحظة سهو كريهة غاب عني فيها الإشارة إلى كاتب المقالة ومصدر الخبر الأصلي كما كان دائما ديدني وعادتي، والألم لأني اقترفتُ –من حيث لا أُريد أو أرغب- خطأ فادحا بعدم المحافظة على حقك الأدبي، وتجاوزتُ قانونا أخلاقيا أحرصُ عليه منذ قديم. أخي الكريم، لعلّك تذكر أنني راسلتُك منذ فترة لأعرض عليك الانضمام إلى عضوية منتديات "قافية وحرف سوداني"، ولعلك أيضا من الأدباء والكتّاب السودانيين الذين تصلهم نشرتها الدورية من حين لآخر. بصفتي أحد إداريي الموقع، اضطرُ بعض الأحيان إلى نقل أخبار ثقافية ذات صلة بطبيعة المنتدى، وتهم أعضائه وزواره الكرام، من أمثال عروض الكتب والإخبار/الأخبار عن فعاليات ثقافية مختلفة، وفي هذا السياق أرجو منك شاكرا أن تطّلع على الروابط التالية، وسترى أنني أشرتُ بصورة وافية إلى أن المواضيع منقولة، موضّحا بما لا يدعُ مجالا للشك مصدرها وكاتبها، وذلك على عادتي في التوثيق. دعوة لحضور الندوة عن رواية "أرتكاتا" للروائي هشام آدم http://sudaneselit.net/showthread.php?t=68 صدور "شذور متفرقة حول الأدب"- أسعد الطيب العباسي http://sudaneselit.net/showthread.php?t=98 صدور رواية "السيدة الأولى" للكاتب هشام آدم http://sudaneselit.net/showthread.php?t=184 أخي الفاضل، إنني أتفهم تماما غضبك العرمرم، ومنبع ألمك وضيقك، فقد تعرّضتُ لتجربتين مماثلتين تتصلان بترجمة كتابين كاملين ضاع مجهودي فيهما هباء منثورا، ولم أنل عنهما عوضا ماديا أو تقديرا أدبيا. ثِق تماما يا سيدي أنني لم أفعل ما فعلتُ عن سوء نية، أو خبث طوية، أو لرغبة شريرة في الإنقاص من حقك، أو الاعتداء على ثمرات قلمك، بل كانت زلّة غير متعمدة، وخطأ غير مقصود. وقبل ذلك وبعده لكَ العُتبى حتى ترضى. أتقبَلُ اعتذاري؟! أتمنى ذلك. تقديري الوافي أخوكم معتصم الحارث الضوّي ما بعد الختام: أنا على استعداد للاعتذار في أي محفل تراه مناسبا (مع مراعاة أني الآن مقيم خارج السودان)، كما أني على استعداد للاعتذار هاتفيا، وشخصيا في أول زيارة لأرض الوطن، فنصرة الحق تستدعيه، وإرضاؤك يتطلبه، واحترامي لنفسي ينشده. كما أن ترسية قاعدة الحفاظ على الحق الأدبي هي إحدى القضايا التي تهمني كثيرا. أرجو شاكرا تأكيد استلامك لهذه الرسالة، وبانتظار ردك العاجل من فضلك.

فكان ردي :

Quote: تحياتي استاذ معتصم لك الشكر استلمت اعتذارك الحار و انا له شاكر و مقدر فنحن في زمن صار من يعتذر و يوضح محمودا مشكورا لندرة من يفعل ذلك و هو كما قال النبي صلى الله عليه و سلم عن الامانة انه سيأتي زمن يقال فيه ان في بني فلان رجل امين فكأننا الان في زمن يقال فيه ان في بني فلان رجل يقبل النقد و يعتذر فلك شكري خاصة غضبتي فاني لا ابرئ نفسي عن التجاوز لكن كما قيل فان لصاحب الحق مقالا و الحمد لله الذي جعلك ممن يحسن تقدير ذلك لا اطمع منك في اكثر من ذلك فلن يكن مقصودي قط ان اشنع بك او اشهر و ربما لشئ كهذا تعمدت عدم كتابة اسمك ظنا ان الكثيرين سيعجزن عن فتح الروابط و يكتفون بقراءة ما نقلته و اكرمني المتداخلون الذين اتبعوا الرابط انهم لم يذكروا اسمك فانا اقبل اعتذارك هذا بكل صدق و احمدك عليه و توضيحك عندي مقبول مقدر و نصحي لك بتوخي الحذر في مقبل العمل فان للقلم حساسيته المفرطة و اظنك تعلم دم بخير و تقبل تحياتي

ثم قام بعد ذلك الاستاذ معتصم مشكورا بتعديل المقال و اضافة اسمي و اسم الموقع و نشر اعتذارا على موقع منتدى قافية و حرف سوداني :

Quote: الإخوة والأخوات الكريمات نقلتُ منذ فترة عن منتديات سودانيز أونلاين مقالة بعنوان "صدور مجلة صوت المهجر الإلكترونية" بقلم الأستاذ الكاتب/ حمور زيادة، وذلك على الرابط التالي: http://www.sudaneselit.net/showthread.php?t=195 لسهو غير مقصود، وبدون تعمد من جانبي لم يأت ذكر الأستاذ حمور باعتباره كاتب المقالة أو الإشارة إلى مصدر النشر. إنني أتوجه في هذا المقام بالاعتذار الصادق للأخ الأستاذ حمور زيادة عن هذا الخطأ غير المقصود، إذ لم يصدر عن سوء نية، أو خبث طوية، أو رغبة في الإساءة إليه، أو الاعتداء على حقوقه الأدبية والمعنوية، أو الإنقاص من قدره الكريم.

اعتذار شخصي للأستاذ الكاتب/ حمور زيادة

اكرر شكر الاستاذ معتصم الحارث على كريم فعله و اخلاقه ..
و اشير الى انه ارسل لي معلومات عن نفسه انه عمل في مجال الترجمة لاكثر من عشرين عاما و الاعلام و العلاقات العامة ..
فعليه تكون اشارتي اعلاه في تسائل عن هل بقية ما يكتب هو من كتاباته هذه الاشارة انما هي اشارة غضب تجاه من لا اعلم عنه شيئا.
فهي جملة مؤلمة لا تحمل من الحقيقة شئ.
و انا اعتذر لاستاذ معتصم انها اوجعته .. فانما قصدت حينها ان اوجع من وجعني.
لا التشكيك في كتاباته.

اذا انا في انتظار ناقل بوست بطوط و زيزي الكريم الذي نقله و كتب عليه منقول فنفى عن نفسه التأليف لكنه لم ينسب التأليف الى شخص او جهة.
فهل يكون له شجاعة الاستاذ معتصم الحارث و نزاهة خلقه ؟


انتظر حقي مازلت.

يا حمور والله ما اشرشر مني
لكن

أخوي محمد عبد الملك زي الكانت عندو بصارة بتاعة حل

لكن صدقني دي حاجة تغيظ لأنو فيها عدم إحترام لجهد الآخر بشكل مستفز

وطالباك بالنبي لو فكرت تعمل حاجة تقول لي

بالمناسبة الشاعر القدال ممكن يساعد
كدي خليني أتصل وأشوف

كامل التضامن مع حمور في محنته ومغصته الشديدة !!

صحيفة سودانيز أون لاين تمتهن السرقات الأدبية و تتعمّد الكذب الصراح

أها يا حمُّور دي هِنا
من الموقع دة و فيهو
يعني و الشمس في كبد السماء

شكرا شادية و نادية

يا علاء الله يعينك

انا لسه منتظر رد من ناقل موضوع بطوط و زيزي او من الموقع ..
شكلو مفروض اتحرك بايجابية اكثر من التهذيب و الهدوء