نانسي عجاج .. كأنها نانسي عجاج

احيانا تكون البدايات سيئة و ظالمة ..
فتمنع عنك خيرا كثيرا و متعة عظيمة ..
السوء ليس بالضرورة أن يكون من الآخر ..
بل غالبا ما يكون منك أنت ..
لكن ربما لا تستطيع أن تميز ذلك في حينه.

انا شخص كلاسيكي من الصعب أن تبهره الظواهر ..
لذلك كثيرا ما اكون اقرب للجمود في كثير من الاشياء ..
و من ذلك فنون السماع ..
من الصعب أن تخرج مزاجي و تذوقي من خانة اغنيات الحقيبة و عثمان حسين و ابراهيم عوض و احمد المصطفى و وردي ..
و حتى الان اصر أن عبقرية الغناء السوداني تظهر في صوت مبارك حسن بركات الفريد و الكاشف المعجزة و وردي الندي.

أما الطمبور فهو لذة السماع التي لا يلقاها الا الخاصة ..
مدارج لا يرتقيها كل طالب ..
النعام حين يبكي الرايقة شتيلة قريرا
صديق احمد و هو يغني : قولنا اي حديث نسمعو.
محمد جبارة و هو يشدو : لبسو الهديمات عدلو ركبو اللواري و قبلو
عبد الحكم الاراك و هو يصدح : شن يجدي العلاج يا يمة ما دام الفكر مشغول
عبد القيوم الشريف و هو يردد : أهواك و الهوى يستحيل
اما محمد كرم ..
يا الله من محمد كرم الله ..
أسمعت الطيف ؟
اسمعت وكت السمحه في هيباتا تتجلى
دعني افخر لك أن الاذاعة رفضت ان تجيز صوت محمد كرم الله حتى توسط له أبي.
نعم بكل الفخر أنا ابن الرجل الذي أهدى لنا صوت محمد كرم.

في منتصف التسعينيات و أنا منبهر بفنان الطمبور الصديق المقل لكنه مجيد يعقوب تاج السر ابن القرير قوز قرافي الرائع وجدت ابناء خالتي ينصحونني بسماع فنان جديد اسمه فرفور.
سخرت منهم.
كانوا - و نحن بعد طلبة في الجامعة - يتبادلون شرائط كاسيت تسجيل حفلات لشاب جديد صوته غريب جدا بالنسبة لي و هم في غاية الانبهار.
قلت ساخرا : يعني كيف اسمع لي فنان اسمو فرفور ؟
رد احدهم : قلنا ليك اسمعو ما قلنا ليك سمي ولدك عليو.
حاولت ان اسمعه لكن ..
يع ع ع
ما هذا ؟
انه فرفور ..
لكن تخيل ..
الان لدي اكثر من ثلاثة قيقابايت في جهازي كلها اغاني لجمال مصطفى الشهير بفرفور .
و انا الان ازعم انه من اميز الاصوات السودانية.
تخيل ؟

و هذا تقريبا ما حدث لي مع نانسي عجاج

"الحاج" حمّور .. صباحاتك بيضا
بما أنني لست FAN للحقيبة ومغنّيها
أحببت أصبّح عليك .. بس

حاج حمّور .. أضف لنانسي عجاج
شروق أبو الناس كمان .......

يا هشام يا " ابني " ..
كنت عاوز اقول ليك الما بيحب الحقيبة ده زاتو حرام نرد ليو الصباح ..
لكن تاني قلت نتألفك شوية ..
صباح النور
لكنك معذور ..
شهادة عربية و بتكتب رواية بطلا كاسبر أورفل ..
الحقيبة تشيلا بياتو يد يا هشام ؟
غايتو الله يشفيك يا زول
ـــــــــــــــــــــــــــ


الرواية تحت منظار القرأة الثانية

كنت من أشد المعجبين بجريدة الصحافة ايام الشراكة الذكية .
اتابع الحاج وراق و الطاهر ساتي و حيدر المكاشفي و فيصل محمد صالح و لبنى احمد حسين و اراقب امل هباني تثبت نفسها و روعتها و اقرأ الطيب زين العابدين و عبد الله علي ابراهيم الممتع و عبد الرحيم بلال و غيرهم.
و في الصحافة لفتت نظري اخبار مغنية اسمها نانسي عجاج.
و الحق أن البداية كانت سيئة لي بخطا مني و ساخبرك لماذا.

ما مشكلة يا حاج .. بسيبك في النوستالجيا بتاعتك
وتجلياتك الصباحية دي، ويمكن نتلاقى في فجّة تانية :)

حمور
كونك تسمع اغاني الطنبور وتتذوقها
هذا يعني انك رجل يستحق ان نصبح عليه


صباح الخير ياخي

حمور ..
مساك الله بالخير ..
يا كل الجمال والخير ....

كونك تستمع لاغاني الطمبور وتحدد يعقوب تاج السر تحديدا فده ممكن يخلينا نقول انك شايقي اكتر من انك ذواق للفن!!
لكن لو طلعت ما شايقي وبتسمع يعقوب تاج السر فده بيعني انك فعلاً ذواق ..
لانو يا زيادة الشوايقة بغض النظر عن تذوقهم فهم يحبون الطمبور اكثر من عيونهم وده من البديهيات عندهم لكن بتبقا الحاجة الغريبة لو زول ما شايقي حب اغاني الشوايقة والطمبور ..
بالنسبة لي طيبة الذكر نانسي فمفروض ما تكون اضافت ليك جديد يخليك تغير رايك فلا هي تطورت في الاداء ولا هي اتت بالجديد حتى الادهاش كما تفضلت وقارنت بفرفور!!
نانسي ياها نانسي نفس التقطيع للغنا وانا اسميته بي لغة اولاد الحلة نانسي بتزعط الفكرة ..
ولسة البت بتغني وكأنها قاعدة تحت بطانية في جو درجة حرارته 5 تحت الصفر وبردااااااااااااانة وخاااااااايفة وترتعش..
عموما حب الناس مذاهب وما يعجبك ممكن يزعجني وما يزعجك ممكن ييعجبني وما يعجبنا الاتنين ممكن يزعج زكي جمعة !!

حمور

كاتبي المفضل

انا شخصيا اشجع اي صوت نسائي

ونانسي وشروق ما دمن وجدن اسر سودانية متفهمة وتسمح لبناتها بالغناء


نشجعهن وندعمهن بشدة

ومع الزمن يتم التجويد

عفوا فقد انقطعت في وسط الكلام لظروف طارئة ..
للاسف لدي عادة سخيفة و هي الكلام بالقطارة و الاستطراد ..
اخذ مرور على الاعزاء المعلقين و اعود لأحكي عن نانسي

حمور يا صديقي سلام

تعجبني كلماتك الواضحه التي لاتحتمل اي تاويل ,,,

واصل قكلنا ينتظر ان تكمل ,,,

الزميل هشام ادم غادرنا ليمشي في مناكب المنبر تاركني مع النوستالجيا .
و هي ليست مضاد حيوي كما يتبادر من الاسم او كما يظن العربجية امثالي .
فحتى قبل أشهر كنت أظنها نوعا السياسات اليسارية كالبروستوريكا او ما شابه.
ثم اكتشفت انها اسم الفرنكا للحنين للماضي الذي لا يمكن اعادته و تستعمل مع المتحجرين امثالي من العجائز الذين يهوون الحديث عن الجدادة التي كانت تباع مشوية و معها السلطات و العيش و كاس شيري و عروس هدية بشلن فقط.
نتمنى عودتك مره اخرى يا هشام فالحقيبة كانت فرشه فقط.

شبكة ..
صباح النور على عشاق الطمبور ..

او زي ما قال الفاتح ابراهيم بشير :
الطمبور صديقنا و عزنا و ملجانا
من ما قمنا نسمع فيهو لا ملينا لا ملانا
زي ابل الرحيل شايلي السقى و عطشانه

عثمان دغيس
مساك الله بالخير

البوست ده قيل بينا عديل
ناس تصبح و ناس تمسي

ازيك يا عمر الفاروق ..
اول حاجه مداخلتك سخنت بالبوست لامن سيحت التلج الانا كنت ناوي اجيبو .
هسه لو صبرت كانت قلت ليك دي ام كلثوم الالفية و الاربعة الفيات القادمات.
لكن بعد رفعت درجة الحرارة و تلجنا ساج ساضطر ان اكون موضوعي في الطرح.
شكيتك على الله .

ثانيا يا زول وحات كندي مر ذواقه ساااكت يا زول انا ماني شايقي.
اما يعقوب تحديدا فده راجل صاحبي و افخر بذلك و صوتو من اجمل الاصوات .. بس لو الدنيا العبوس خلتو من المزازاه.
اتحدى زول يسمع يعقوب و هو بيغني :" يا القوافل الراحلة باكر تشرق احزاني و تغيبي " و ما يتهز.
أما " الشمات يعاينولك يا قلبي " فدي قصه براها .. مع الاعتذار للاستاذ عثمان عبد العظيم طبعا.

بالنسبة لطيبة الذكر نانسي فانت شكلك عندك ملكة نقد جيده ما عربجي ساي زي العبد لله.
فكدي اديني فرصة احكي ليك حكايتي مع سماع نانسي و بعد داك احكم .
سمح ؟ يا قول نادية مختار.

خليل الجميل ..
اتفق معك لا سيما في الخروج بشكل الفنانة من شكل الغنايه .
فنحن لدينا الكثير من الغنايات.
لكن الفنانات قلة .
رغم اني كمستمع (و ده شي شخصي ) بنطرب للغناء الرجالي اكثر .
تخلف بعيد عنك.
لكن توجد اصوات نسائية معينة تأسرني.
الفلاتية طبعا .. و البلابل المعجزات .. و أخيرا تومات محمد خيري احمد.
وندي القلعة طبعا بهجة للناظرين

عمو العوض ..
تسلم ..
خليك قريب يمكن نحتاج تأويل لقدام

كانت البداية السيئة مع نانسي عجاج أني كنت اكتفي بقراءة الاسم و المانشيت و اتجاوز تفاصيل الخبر .
فوقع في ذهني انها غناية من الثورات او ام بدة طفرت الى السطح باغنية كشاكلة حنانة او سواها من الموضات و اتخذت اسما فنيا قريبا لاسم نانسي عجرم كنوع من الشهرة.
و تخيلتها فتاة سمراء بدينة تضع طنا من كريمات التبييض و ترتدي حوالي عشرة كيلو ذهب مختوم .
و حتى حين لمحت صورة لفتاة حسناء مقصوصة الشعر في احد الاخبار ابتسمت و انا اقول : و الله غايتو ناس الجرايد ديل . عاين مشركين للقراء بصورة بت لافحنها من الانترنت و خاتنها مع خبر نانسي عجاج دي .
ثم اتجاوز الخبر غير اسف و لسان حالي يقول : على منو يا فارات.

ثم كان أن فتح الله عليا بخالي و هو عقيد شرطة لكنه راجل بهجه فسمعته يتحدث عن نانسي الخطيره.
تعجبت فقد عهدت الخال رجلا ذواقه.
فسألته متعجبا عن نانسي فقال لي :
كيف يا زول دي بت بدر الدين عجاج ما بتعرفو ؟
فقلت :
الزمااان داك ؟
فأخبرني بارك الله فيه قصة نانسي البت التي جاءت من هولندا لتنشر الفرح في الخرطوم.
طبعا هنا اصبح الامر بالنسبة لي كفرفور في منتصف التسعينيات.
فتاة جديدة من اسرة فنية تغني .
طيب .. اتشرفنا.
و يعني شنو يعني ؟
ظاهرة ثم تختفي .
و لم اهتم بالامر.. فقط امتلكت المعلومة ان نانسي لم تأتي من ام بدة بل من هولندا.

ثم تفضل الاخ اليو تيوب بأن سمح لي برؤيتها تغني في ذات صدفة.
كنت اقلب فيه بحثا عن شئ لا اذكره الان و لو تذكرته فلن اقوله لكم لأنه خارج عن موضوعنا .
و فجأة عثرت على تسجيل لمدة دقيقتين و نصف لنانسي .
بل صدق اقول ان انهما كانتا دقيقتين و نصف من العذاب بالنسبة لي.
فقد كان التسجيل سيئا و العزف غير مسموع و الاغنية صعبة.
كان تسجيلا على مسرح ما في مكان ما من هذا الكوكب .
طبعا ليس المسرح القومي بام درمان.
المهم أن التجربة كانت مؤلمة و قررت أني لن اخسر شيئا ان لم اسمع هذا الصوت مرة اخرى.
و ركبت رأسي حتى بعد نصحني الناصحون أن اسمع لها شريطا بدل تسجيل المسرح السئ.
لكني ركبت رأسي كالعادة.
و كالعادة كان لابد أن تزحلقني صلعتي العزيزة.

طبعا كنت في غيبوبة لا ادري أن نانسي اخذت تصبح ظاهرة و انا اسمع في مبارك حسن بركات بينما جيلي (احم .. او الجيل الذي يلي جيلي بجيلين او ثلاثة للدقة ) يسمع نانسي في شغف و هي تغني ظلموني الناس.
حتى جاء شريط نانسي الجديد ليجبرني على دخول هذا العالم.

تسجيل الشريط تم في استديو الصديق المهندس مهند دبورة ..
لذلك اهتممت بسماعه لابداء الرأي في هندسة الصوت بغض النظر عن الفنانة .
و اعتبرتها فرصة جيدة لسماع نانسي بالمره.
و للاسف كان اول ما سمعته هو اغنية الطيف .
طيف محمد كرم الله.
اسغفر الله.
نانسي تغني الطيف ؟
يا للجراءة.
بعد الطيف استمعت لبعض الاغاني و انا مكفهر غاضب.
لكن بلدا هيلنا لفتت نظري .
ثم سمعتها مرة اخرى فاعجبتني.
ثم مرة ثالثة ففتنتني و احسست ان هذا الصوت جميل.
بل هو ساحر.
ثم ..
اكشتفت سر اللعبة..

لا تسألني كيف وصلت لاكتشافي او سببه ..
لا ادري ..
فقط لاحظت فجأة ان نانسي لا تسمع في اي جو.
نانسي تحتاج الى درجة معينة من الصفاء و معينات خارجية خاصة.
هل تظن هذا الامر هراء ؟
كلا .
اغاني الطمبور مثلا لا تناسب الشتاء.
ان لها عبق صيفي خاص.
اما اغاني وردي فهي اغاني خريفية جميلة.
جرب ان تسمع وردي و الخريف يصب امطاره ستحس بروعة لا تضاهى.
طبعا ليالي الشتاء القارسه تحتاج الى عثمان حسين او هاشم ميرغني.
جرب و ستفهم.
هذه اشياء تحس و لا تقال.
و ليست خرافة.
من يفهمون في هذا الاشياء يقولون ان موسيقى باخ تناسب اللوحات التأثيرية.
لا يمكن ان تعزف موسيقى لفاجنر مثلا جوار لوحة تأثيرية لرينوار. لن تحس بجمالها.
اما الحان فاجنر فتناسب لوحات فان جوخ.
هكذا يقولون و العلم عند الله.
كذلك اكتشفت انا العبد لله ان لنانسي جوا خاصا

اسمع نانسي في جو هادئ بعيد من الضوضاء في مناخ معتدل لا هو بالبارد و لا هو بالحار و انت مغمض العينين و حبذا لو كنت تسمعها بسماعات اذن.
و حلق..
ستجد أن هذا الصوت يحملك الى سماوات عالية.
حتى في اغنية الطيف و استغفر الله من هذا القول.
حين وصلت الى هذا الاكتشاف وجدت ان نانسي لها صوت جميل ملائكي لا يشبه غيرها.
هو صوت لو اردت ان اشبهه فلن يشبه الا بصوت نانسي عجاج ذاتها.
او هو ان شئت التفنن في المدح كأشعة الشمس الشتويه المعبأه في زجاج براق.

نانسي ساحرة الصوت فاتنة النغم .
اكتشفت ان حتى من ينتقدها يعترف بهذا.
لم أجد من يقول أن صوتها يشبه صوتي حين ارتكب جريمة الغناء.
و هي جريمة لو اردت رأيي تفوق جريمة الابادة الجماعية.
فقد حباني الله بصوت اشتر في الغناء يقلق الاموات.
لكن من ينتقد نانسي يحمل عليها في اختياراتها.
و اظن لهم بعض الحق في ذلك.
بعض اختيارات نانسي في الغناء تحس انها صوت جميل فتان لا يستطيع ان يعبر عن نفسه جيدا.
لكنه يبقى صوتا فاتنا بلا شك.

و لأني معجب جديد بصوت نانسي و للغربال الجديد شدة كما يقول اهل مصر فساقول ان عذرها أنها تحاول ان تثبت أنها تستطيع أن تغني كل انواع الغناء .
لكني اخشى على صوتها الساحر أن تحمله فوق طاقته.
لو كانت نانسي تقبل نصحا من معجب جديد عربجي في مجال الغناء لقلت لها :
اختاري لنا تلك الاغاني الدافئة التي تصلح أن يسمعها الشخص وحده و هو مغمض العينين ليحلق بها مع صوتك.
و ثاني النصائح ان تترك للمهوسين من امثالي ايقونات الغناء كالطيف التي نعتبر أن سماعها بغير صوت محمد كرم الله جرم كبير فنسمعها منها و نعجب بها و نحن نحس بالذنب فلا نستطيع ان نتذوق صوتها الجميل بكامل حقه.

ختاما اعلن اني معجب بصوت هذه الفتاة جدا.
و اذيع سرا أن نانسي ليست فقط صوتا ساحرا بل هي قارئة جيدة و مطلعة ذات ثقافة.
لذلك فأنا انتظر منها الكثير و الكثير و انا مغمض العينين في جو هادئ.
غني يا نانسي ..
احسني الاختيار ..
و اطربينا.

حبيبنا حمور

قالوا النسى قديمو تاه

ياخي الحقيبة دي مافي اجمل منها غناء بي الالات بسيطه في اروع مايكون كلمات ولحن واداء

يعني اسع لو مافي حقيبة ناس هشام كان سافروا بي شنو يشيلوا ملابسهم في كيس ولا شنو لووول يكه

انا من متابعي الحقيبة ولمن البرنامج بتاع يوم الجمعة يفوتني بي سبب نومة وكده بحضرو نص الاسبوع بالليل اعادة

بعدين لو ما الحقيبة الفنانين الكتار ديل كان قلدوا ام كلثوم لوووول يكه .

اغاني الطنبور حنينة جدا

نانسي عجاج فنانة واعدة

جمال فرفور مابطال

ترتيب مجد الاغنية السودانية

اغاني الحقيبة - جيل حسن عطية والكاشف ابراهيم عوض وردي - جيل خليل اسماعيل ابو عركي محمد ميرغني زيدان

اها وحاتك من التمانينات وانت جاي مافي فنان يحلفوا بيهو لوووول يكه

اها انا اسع بسمع من 78 وانت نازل

طولنا عليك

القميص قرب يصلك لووول يكه

زاتووووو

الزول زاتو
ياخ انت بتتكلم بلساني وله بتسمع باضاني ؟
ياخ اقول ليك ..
خلاص البس القميص البنفسجي عشان تبقى انت انا و انا انت و نحن زاتنا
لكن كمان بدون مدسه انا بسمع الركشات مرات.
لكن بسمعم في جنس بله دق الرقم جله و ما شابه من الطرائف.

و عليهنؤكد أن حمور زيادة ما زال كأنه حمور زيادة
وبالمثل فالمعنى في بطن الشاعر
و ربما اعود و ربما لا

قليل يا طيف
اقيف و ارجاني

الفريد أمجد ..
و تبقى صداقتنا كأنها صداقتنا زاتها بلا معاني مستتره.
و يبقى وعد الحقيبة الوزارية حتى ان لم تعد يا دكتور.

اغاني الطمبور مثلا لا تناسب الشتاء.
ان لها عبق صيفي خاص.
اما اغاني وردي فهي اغاني خريفية جميلة.
جرب ان تسمع وردي و الخريف يصب امطاره ستحس بروعة لا تضاهى.
طبعا ليالي الشتاء القارسه تحتاج الى عثمان حسين او هاشم ميرغني.
جرب و ستفهم.
هذه اشياء تحس و لا تقال.
و ليست خرافة.

حقيقة لا اختلف معك فيها

Quote: حقيقة لا اختلف معك فيها

تسلمي يا شبكة يا ذواقه

يسعد مساك بالنور ياحمور

يا صاحب القميص البنفسجي
كل زهور البنفسج
لك باقة مودة
قلت لي
موسم لكل فنان
فـــكـــرة
كده نجربها ونجيك ...

اتذكرك يايمة والناس قالوا قايمين البلد
رصوا الهديمات عدلوا ..
وركبوا اللواري وقبلوا ..
........
اغاني الطمبور .. والوصف المدهش البقوم النفس
والله ياحمور انت فعلا مبدع .. وعندك احساس مشدود
للابداع .. والحقيبة الحديث عنها كثير ومثير ..
وبعدين .. وردي وفرفور ونانسي عجاج .. فعلا جمعت
احلي الانغام في طبق واحد .. شكرا





وبعدين :
سيرة امدرمانية .. اخيرا لميت فيها ..

حمور

لي قصة مشابهة مع صوت نانسي وفن نانسي وان لم تكن متطابقة ...

حتى الان لا استطيع السماع للتسجيلات الردئية لنانسي واعتبرها جريمة في حق نانسي في المقام الاول .

نانسي عجاج لسه حتوريكم العجب .

كمال الزين مابراه.......سااكت اتلومنا معاه..

Quote: يسعد مساك بالنور ياحمور

يطرب صباحك بنانسي يا وهبة

استاذنا الجميل السني ..
بركنا الشفناك طيب
وحات اسم الله مشتاقين ..

Quote: قلت لي موسم لكل فنان فـــكـــرة كده نجربها ونجيك ...

اذا قالوا انو كل نوع من انواع الادب عندو جو معين عشان تحس بيو
و الموسيقى طلعت عندها علاقة بمذاهب رسم معينة
ليه ما يكون السماع ليو طقوس و مواسم ؟
في قارئة رسلت لي روشتة حقت سماع حاختها بعد الردود دي
اديني رايك فيها بالله

بهاء ..
على قول المصريين : و النبي .. و اللي نبى النبي نبي
الطمبور ده احن منو مافي
غايتو الله مدي الصيت و القسمة لأغاني البلوز
لكن محنة الطمبور دي عجب.
عليك الله اسمع معاوية المقل و هو بيقول : يا سحيبات المواسم طلي دارم بالعشيه و منك ان راحو المعالم ادي للنيل التحيه
او اسمع يس عبد العظيم الله يرحمو و هو بيقول : مالك استغرب يا ليل في الكلام
ده ما غنا
ده اعجاز

استاذ عادل ..

Quote: نانسي عجاج لسه حتوريكم العجب

أريتا تورينا
نانسي صوتا كأنها بتتكلم معاك ..
بتغني ليك براك ..
فاضل تختار اغاني تناسب الصوت ده
اغنية لسماع شخص واحد
حتى لما تغنيها على مسرح كل زول ينسى الجمبو
و يسمع نانسي بتغني ليو براو

Quote: كمال الزين مابراه.......سااكت اتلومنا معاه..

حنونه ..
ما بيكون زي لومي لمن كنت قايل نانسي غنايه من ام بده و بتغني ويييين مغرزه
الله يسامحني ياخ

Quote: حنونه .. ما بيكون زي لومي لمن كنت قايل نانسي غنايه من ام بده و بتغني ويييين مغرزه الله يسامحني ياخ

كان كدة ظلمتها....لكن هذا لا ينفي انها ليست اكثر من مؤدية جيدة...انا شخصيا لاتطربني نهائيا واستغرب من الضجة والهيلمانة العاملنها حولها دي...هذا لاينفي احترامي وتقديري لها فنانسي سمعت عنها الكثير حول احترامها لفنها ومستمعيها وعن شخصيتها الحلوة الودودة الطيبة.





الفلم ده دخلته لوج قبل ده عشان كدة مابقدر اواصل في...اضف الى ان الزمن قرابة الثانية صباحا بتوقيت واشنطن...
صباحكم زين...

Quote: يطرب صباحك بنانسي يا وهبة

الرأي والرأي الآخر


صباح الخير يا عبدالوهاب..

Quote: الرأي والرأي الآخر

روحي ربنا يسامحك

اها يا استاذ السني شوف الوصفة دي رسلتا لي قارئة من امريكا ..

Quote: أولا وعملا بنظريتك التى تنادى بسماع وردى فى الخريف والطنبور فى الصيف وووو0000جرب هذا الثيرمومتر السنوى ليكون شبه يومى 00000 هكذا 0000 جرب سميره دنيا بأى أغنية وخاصة الدرب الاخضرصباحا بعد الصلاة والأوراد مباشرة00لما النهار يسخن وانت سايق والكوبرى مقفول أسمع هاجر كباشى 00بعد اللنش ومع قطع بطيخ باردة دور فرفور بالكاتشب أقصد بحسين شندى أو فرفور بالمايونيز وقصدى بترباس لترويق الدم تمام التمام 00بعد صلاة المغرب جرب أسرار بابكر لو ستيل فى السودان كل ما تحلق به خاايل حتى لو لخبطت 00نحن هنا مململانا بى يا طير يا ماشى لى أهلنا ومقرضين على كدة 00بقى بالليل وبعد أن تشفع وتوتر ما تسمع طوالى ولو لا بد خذ واستمع لعابدة الشيخ فى مرثية ليلى المغربى أو غيرها من المراثى 00بعد نشرة التاسعة وموبايلك مقفول وخلصت كل اجراءات نهاية اليوم أخلد لى عبدالحليم حافظ وما حتندم 00 حيديك احساس مختلف وأهو يا سيدى برضو بيغمض عيونو وبيهز أصابع يدو اليمين00

اجمل ما في هذه الرسالة حسن ظن الاخت الراسلة بي أني اقفل موبايلي بعد نشرة التاسعة و يكون يومي اوشك على الانتهاء.
فيها الخير و الله.

Quote: اضف الى ان الزمن قرابة الثانية صباحا بتوقيت واشنطن...

و قرابة الثانية صباحا بتوقيت واشنطن البيخليك تكاجري في نانسي شنو ؟
طيب على الاقل كان تستني تجيني الرابعه عصرا بتوقيت فرجينيا (اوعا تكون واشنطون دي في فرجينيا برضو )

المهم ..

احتمال معناها رايي بتاع انو نانسي صوت جميل محتاجه تركز على اختياراتا اكتر شويه ينفع معاك.
طالما انتي اديتيها المرور بتاع انها مؤدية جيده
المؤدي الجيد لو عرف يختار شي بيناسب طريقتو بيبقى فنان.

بالنسبة للضجة و النجومية فدي قسم و حاجات تانيه.
ما تتخيلي مثلا خالد حسن عامل ضجه قدر شنو ( مع الاعتذار لصديقتي وديان عضوه البورد )
رغم انو في رايي .. المهم
بس يعني تقدري تقولي ضجه كبيرة شديد.
و في كتير كده.
و في ناس مبدعة مافي زول بيخت ليهم بالو.
دي ليها علاقة بمقاييس صناعة النجم و قبولك عند الناس.
لأنو الغناء لا ينفصل عن شخصية و شكل و طبيعه و روح المؤدي.
يعني مهما بقيت غناي لكنك شين و دمك تقيل و روحك سمجه و ما عندك كاريزما زول بيسمعك غير ناس بيتكم و اولاد حلتكم المجبورين عليك مافي.
و ديل زاتم يمكن يقولو ليك ما تقدنا ياخ. بغض النظر عن صوتك السمح.
اها نانسي في الحاجات دي ربنا اكرما شديد.
الباقي عليها تساعد يس بجكه.

Quote: يعني مهما بقيت غناي لكنك شين و دمك تقيل و روحك سمجه و ما عندك كاريزما زول بيسمعك غير ناس بيتكم و اولاد حلتكم المجبورين عليك مافي

لكل جواد كبوة...........دي بالغت فيها يا حمور لكن اهو انت اوضح من غيرك..والله انا زرزرت كمال الزين ربع كامل ما أقر بالحقيقة دي...


استغفرتك يا مولاي...يارب الشينين والسمحين...على حد سواء...

يا حنونه طيب ما كان تسأليني بالواضح كان قلت ليك ايوه نانسي عجاج جميلة.
لكن ده علاقتو شنو بانها بتغني كويس ؟
ده ليو علاقه بالنجومية لكن لاحظي انو ابدا ما من مقاييس النجومية بس انها تكون سمحه.
انا ختيت كم حاجه انتي قبضتي في واحده لأنو شكلو انتي معتبراها الاهم.
اها اقول ليك حاجه ..
الجمال مهم للقبول في الظهور العام.
الله يطرى ود خالتي بالخير كنت مستضاف في الاذاعة مره فقال لي ما تحاول تظهر في التلفزيون لأنك وجه اذاعي ممتاز.


نانسي جميلة لكن لو عاوزه تحصريها في انها وجدت قبول لجمالها فقط فانتي بتظلميها و بتكوني مجحفه جدا.

Quote: نانسي جميلة لكن لو عاوزه تحصريها في انها وجدت قبول لجمالها فقط فانتي بتظلميها و بتكوني مجحفه جدا

بتقول الكلام وترد على نفسمدك ياحمور....يازول مابينا اختلاف الرأي لا يفسد للود البينا قضية لكن تذكر انك انت من تحدثت عن الجمال وان الصوت مهما كان جميلا لا يكون له مستمعين وجمهور ام كان صاحبه او صاحبته شين عموما مابينا...

Quote: لكل جواد كبوة...........دي بالغت فيها يا حمور لكن اهو انت اوضح من غيرك..والله انا زرزرت كمال الزين ربع كامل ما أقر بالحقيقة دي...استغفرتك يا مولاي...يارب الشينين والسمحين...على حد سواء...

أنا ماني الزول البتزرزر ..
يا(شرطي البورد) ..
(نانسي) أختي التي لم تلدها أمي ..
يعني (الكلام الفوق) ده على مسئؤلية كاتبه ومتوهمته التي أحتفت به ونسبته إلي ..
(نانسي) لو حا تعرس حا أكون وكيلا , عشان ماتتوهمي أكتر ..

والأهم :
(نانسي) تقدم شيئاً مفيداً ..لذلك يحتفي بها الناس (ولو توهم المتوهمون غير ) ذلك

الجملة أعلاه :
(نانسي) خرجت بنا من طور (الغنايات) إلى طور (الفنانات) أفخر أنها من (بناتي) ..


_______________________
(حنين) جربي أعملي حاجات مفيدة غير (الهههههههههههههههه) دي ستجدينا قد أحتفينا بك
دون أن نتشرف بأن نملي أعيننا بجمالك , ...

أصبحنا وأصبح الملك لله ..

(*)

حمور .. عن أذنك

(حنين) أحسن تخليك مع (الههههههههههههههههههة)
بتجيب دخل .. سمح؟

كمال يا جميل ..
ازيك و نورت و الله

كان نفسي اقول ليك لأ
لكن بعد ده صعب ..
يا عزيزي راي حنين ده برضو تبع الـ هههههههه
راي انطباعي
زيو زي حقي
انا ما الاستاذ الموصلي و لا حنين اسماء حمزه
نحن ناس بنسمع و نحكم حسب مزاجنا
تقول شنو لو اعترفت ليك اني ما بطيق غنى محمد الامين ؟
و مستغرب الزول ده بيغني اربعين سنة كيف ؟
لكن عندي خالتي مره قلت ليها كده قربت تقول لي تاني ما تخش بيتي.
دي اذواق ناس عنقاله ساي.
اما انو حنين تختصر نانسي في انها بت جميلة و تعتبر المعجبين بيها (سواء الفطاحله الزيك او المستجدين الزيي ) معجبين بالجمال بس فده طبيعي.
لازم تلقى تبرير لاعجاب الناس بالصوت الما عاجبا ده.
و اسهل تبرير و اقوى تبرير انو نانسي بت سمحه عشان كده خالعانا.
مره قلت لواحد انو نوال الزغبي غنايه اكتر من ورده الجزائرية قال لي انت مراهق.
خلي روحك عاليه في حتة التذوق دي.

عندك بوست عن نانسي يا ريت تجيب رابطو تنفع لي بيو البوست ده يا كمال.

Quote: (*) حمور .. عن أزنك (حنين) أحسن تخليك مع (الههههههههههههههههههة) بتجيب دخل .. سمح؟

كمال الزين.... لا ما سمح......



والمرسل برضه ماسمح..


ولا الكلام....سمح

ولا المعنى سمح....


انتبه لكلماتك.......سمح!!

Quote: انتبه لكلماتك.......سمح!!

خضيتيني ..

لا ماسمح ..

Quote: أنا ماني الزول البتزرزر .. يا(شرطي البورد) .. (نانسي) أختي التي لم تلدها أمي .. يعني (الكلام الفوق) ده على مسئؤلية كاتبه ومتوهمته التي أحتفت به ونسبته إلي .. (نانسي) لو حا تعرس حا أكون وكيلا , عشان ماتتوهمي أكتر .. والأهم : (نانسي) تقدم شيئاً مفيداً ..لذلك يحتفي بها الناس (ولو توهم المتوهمون غير ) ذلك الجملة أعلاه : (نانسي) خرجت بنا من طور (الغنايات) إلى طور (الفنانات) أفخر أنها من (بناتي) .. _______________________ (حنين) جربي أعملي حاجات مفيدة غير (الهههههههههههههههه) دي ستجدينا قد أحتفينا بك دون أن نتشرف بأن نملي أعيننا بجمالك , ... أصبحنا وأصبح الملك لله

ههههههههههههههههههههههههههههههههههههههههه

Quote: ههههههههههههههههههههههههههههههههههههههههه

دي معاي أنا مابتجيب دخل ..

حنين كيف بقول الكلام و برد على روحي ؟
انا اتكلمت ليك عن النجومية وانها قسمه و مقومات
و قلت ليك ده مرتبط بشخصيتك و شكلك و طبيعتك و الكاريزما
و جبت ليك المثل قلت ليك لو شين و دمك تقيل و روحك سمجه و ما عندك كاريزما ما بتبقى نجم مهما بقيت غناي.
الحاجات دي ما بتنفصل.
يعني لو غناي و سمح لكن شين و دمك تقيل و روحك سمجه و ما عندك كاريزما برضو ما بتبقى سمح.
و الجمال هنا محدد في انواع فنون معينه.
في انواع من الفنون نجوميتا بتتطلب الحاجات دي كلها بما فيها الجمال.
لكن مثلا التمثيل و نجوميتو عاوز حضور اكتر من الجمال.
ما اظنك فهمتيني صاح.
انتي اخدتي كلامي انو انت لو شين زول بيسمعك مافي.
و ده ما كلامي يا حنونه.
اقري كلامي براحه تاني بعيد من ظنك انو ضجة نانسي سببا انها بت سمحه.

Quote: حنين كيف بقول الكلام و برد على روحي ؟ انا اتكلمت ليك عن النجومية وانها قسمه و مقومات و قلت ليك ده مرتبط بشخصيتك و شكلك و طبيعتك و الكاريزما و جبت ليك المثل قلت ليك لو شين و دمك تقيل و روحك سمجه و ما عندك كاريزما ما بتبقى نجم مهما بقيت غناي. الحاجات دي ما بتنفصل. يعني لو غناي و سمح لكن شين و دمك تقيل و روحك سمجه و ما عندك كاريزما برضو ما بتبقى سمح. و الجمال هنا محدد في انواع فنون معينه. في انواع من الفنون نجوميتا بتتطلب الحاجات دي كلها بما فيها الجمال. لكن مثلا التمثيل و نجوميتو عاوز حضور اكتر من الجمال. ما اظنك فهمتيني صاح. انتي اخدتي كلامي انو انت لو شين زول بيسمعك مافي. و ده ما كلامي يا حنونه. اقري كلامي براحه تاني بعيد من ظنك انو ضجة نانسي سببا انها بت سمحه.

حمور
تفريبا ده الانا استنتجته من مداخلتك الاخيرة وربماانت صغتها غلط وربكا انا فهمتها علط لك العتبى ..
كما ذكرت انا مجرد مستمعة لا اكثر ولا اقل واقول رأيي هنا كمستمعة لنانسي عجاج..وارى ان صوتها عادي ليس بضخامة الضجة التي تثار..وهذا لاينقص من قدرها..فجمهولا وردي مثلا لا يقلل من جمهور ود الامين .
وعندما ذكرت انت ان المغني او المغنية لو كانوا شينين ناس الحلة مابسمعوا ليهم ربطت ان نانسي بصوتها" العادي في نظري" الغير عادي في نظر الآخرين مع جمال شكلها ربما هو الذي اوجد لها هذه القاعده ، غيري من محبي صوتها ربما سيخالفوني الراي...عموما هي وجهات نظر لا اكثر ولا اقل..





ملحوظة...
جانبني الصواب عندما توهمت تعامل محترم بيني وبين الاخ الذي ذكرت اسمه، فضربت به المثل لان لنا تداخل في ذات الموضوع من قبل كان اكثره مزاحا، فعذرا لما توهمت..وعذرا حمور لو جرفنا لك البوست...
احترامي ومودتي التي تعلم...

Quote: حمور تفريبا ده الانا استنتجته من مداخلتك الاخيرة وربماانت صغتها غلط وربكا انا فهمتها علط لك العتبى ..

كويس أفهمي صاح تاني .. سمح؟

Quote: كما ذكرت انا مجرد مستمعة لا اكثر ولا اقل واقول رأيي هنا كمستمعة لنانسي عجاج..وارى ان صوتها عادي ليس بضخامة الضجة التي تثار..وهذا لاينقص من قدرها..فجمهولا وردي مثلا لا يقلل من جمهور ود الامين . وعندما ذكرت انت ان المغني او المغنية لو كانوا شينين ناس الحلة مابسمعوا ليهم ربطت ان نانسي بصوتها" العادي في نظري" الغير عادي في نظر الآخرين مع جمال شكلها ربما هو الذي اوجد لها هذه القاعده ، غيري من محبي صوتها ربما سيخالفوني الراي...عموما هي وجهات نظر لا اكثر ولا اقل..

نقد فني بناء ..

Quote: ملحوظة... جانبني الصواب عندما توهمت تعامل محترم بيني وبين الاخ الذي ذكرت اسمه، فضربت به المثل لان لنا تداخل في ذات الموضوع من قبل كان اكثره مزاحا، فعذرا لما توهمت..وعذرا حمور لو جرفنا لك البوست... احترامي ومودتي التي تعلم...

الأخ الذي ذكرت إسمه ليس تأبط شراً ولم يتعرض لك ..
والتعامل المحترم لا يمكن أن يحتوي تلميحات مثل تلميحاتك ..

وما أنا الزول البسكتوهو بي كلمتين (زي أعمل حسابك وإيه مش عارف) ..

على العموم كويس أنو أخيراً طلعت منك مداخلة قيمة ..

أنا برضو متأسف ياحمور ..
أتيت مرغماً ..
وسأذهب طوعاً ..

لك العتبى ..

كمال ..
لو كنت ترى أنك أتيت مرغما فأنا اراك اتيت أخا كريما و سعدت بدخولك حتى لو شابه توتر مع حنين.
ففي ظني انها حده تأتي بين الزملاء و تزول.
( حنين دي زعلت مني قبل كده لامن قفلتني بالطبله .. زوله بسيطه شديد و حبوبه شديد. ممكن تزعل منك لاخر حد .. و ترضي عنك كأنها ليلة القدر )
اتمنى ان تعود مرة أخرى.
حتى لو تجي ترش عمر الفاروق ده لأنو برضو ما عاجبو صوت نانسي.
سمح ؟

هذا فراق بيني و بينك يا حمور، بالله ما بتطيق غنا الباشكاتب؟ وطي صوتك ما اسمعك محمد المرتضى، سبحان الذي اسرى بنانسي من هولندة لي امبدة! ..يا حمور اتفق معاك بخصوص نانسي لكن ده ما برمي كلام خالتك الارض ابدا.يا كيمو اول مرة اشوفك منفعل كدي يا ود ابشرة..القصة ما مستاهلة ابوي.

و الله خالتك دي بتعرفك عرفة يا حمور اخوي!

سخنتو البوست لامن سيحتو التلج و السيرفر زاتو

غلطانه نانسي الغنت قبل تتشلخ يمكن ما كان تكون سمحه شديد.



و لا يهمك يا حنونه
و اقول لك بصراحتي السغيله التي تعلمين .. أكيد في ناس بتسمع نانسي عشان هس سمحه بس بغض النظر عن تقييما لصوتا.
و ده بيكون تحدي ليها و لغيرا من البيخشو في ضروب الابداع كلها ( غناء / تمثيل / كتابة .. الخ ) انو الواحدة تثبت انها ما مجرد وجه جميل.
هنا حنتفق انا و انتي انو لو في زول معجب بنانسي عشان الجمال فده ما غلط نانسي
و اظنك حتكوني عاوزه تنصحيها ( شفتي بقولك كيف ) انها تنمي نفسها اكتر و اكتر عشان ما تضيع باعجاب ناس قد ما تكون مقدره غناها قدر ما هي مقدراها في شخصها او شكلها.
و دي اظنها نصيحه كويسه اي زول بيطلع للناس بفن بيحتاجا.

اها لما نرجع لصوت نانسي بنتفق.
انا زاتي لما سمعتها في الاول ما عجبتني ( رغم انها برضو كانت سمحه ).
لكن بعد فتره رايي اتغير.
يبقى فعلا هي اذواق و ظروف.

و خليك رايقه

Quote: و خليك رايقه

اكتر من كدة ياحمور....والله لو ماكنت رايقة كان اجزولكم هههههه
واصل يا حمور في بوستيك ابوي....واصل..
وشكرا للرد الهاديء الرصين الذي عودتنا عليه...وتقبل اسفي في ذوبعة البوست...احترامي ومحبتي اخي..

(*)

أختي الصغرى (حنو) أنا متأسف على الخشونة ..
تقبلي إعتذاري ..
بس كمان تقبلي إعتراضي على (الهههههههههه) دي بصدر رحب
لأنو مابتشبه إمكانياتك وثقافتك ..
(دي شوية تتطبيل طبعاً عشان حلاتك) ..
):

تانياً :
نانسي شخصية عامة ومعرضة للنقد والشتيمة ..
وما طرحتي نفسي محامي ليها ..
لكن إستفزتيني (البوست )ده حق حمور ..
وكلامك زعلني ورديت عليهو في لحظة زعل ..

لك العتبى ..

محبتي ..

Quote: هذا فراق بيني و بينك يا حمور، بالله ما بتطيق غنا الباشكاتب؟

يا سعد الدين ياخ ما تعصر على أخوك ..
اعتبرني كضبت الكضب المباح حق الاصلاح بين الناس داك .






ــــــــ
لكن بيني و بينك ما قدرت استحملو خالص

وا حلاتي كمال و حنين اتصافو و بقو رايقين

ياخ الله يفتح عليكم
كل زول فيكم اروع من التاني و كان لازم تنتهو للسلام الجميل ده


و الله لو كانت الاكواد حقت بكري دي شغاله كنت نزلت ليكم اغنية لنانسي كتدشين للصلح ده.

صــــورة
و
صـــــوت

سلامات يا اخوانا القاعدين بي جاي
سيد البيت هي البوست
سلامات
جيناكم توش كنا بنعاين وبنتاوق بالرقراق من برة ساكت
[
IMG]http://www.sudaneseonline.com/uploadpic/Feb09upload/s10...147884_5614.jpg[/IMG]






انسانة

رحيمة

مطربة

!

نظرة لباكر

بكرة احلي
http://www.facebook.com/photo.php?pid=380084&id=1216081...le.php?id=1062897594
تجدونها هنا
*
**
***
امشي افتش ليك الفيديو اتصبر بس بالصور دي

http://www.youtube.com/watch?v=UIQzhknh1xA
http://shahss.com/nansy.html

Quote: حنين) جربي أعملي حاجات مفيدة غير (الهههههههههههههههه) دي ستجدينا قد أحتفينا بك دون أن نتشرف بأن نملي أعيننا بجمالك

انتي يا حنين انا لو في مكانك بنزل هنا صوت وصورة وكتابة اللقاءات السياسية الاعلامية مع شخصيات عربية وامريكية سياسية معروفة عشان الناس تحكم...اضافة لدرجاتك العلمية..استعرضي زي ما الناس هنا قاعدين يستعرضو..
الشئ المعروف انو وسائط اعلامية زي البتشتغل فيها حنين لو ما مقتنعة 100% في مقدرتها كمعدة ومترجمة ومحررة واهم حاجة صوت اذاعي ما كانو استوعبوها..
وكونك تكوني بتمثلي السودان في وسيط اعلامي معروف دة مفروض نفخر بيه..
ثم الكتابة هنا مسئولية فردية..تكتبي ههههههه تكتبي ننننننن دة شئ بيخصك..غلطتك انك ما جيتي استعرضتي هنا زي الباقين بانك فاهمة ومثقفاتية..الشئ الغريب انو البيعترضو هم من الناس الكانو بيسجلو حضور في البوستات الغير مفيدو دي؟؟دة نفهمو شنو؟؟

معلومة تانية خاصة بالبوست..
نانسي عجاج ما كنتا هاضمة صوتا في البداية نهائي لانها كانت في نظري بتدلع الغنا..
سمعتا ليها شقي ومجنون بتاعت الكحلاوي ..اعدت نظر في الحكاية...
لقيتا غنايا..صوتا حلو..اظنهاغيرتا طريقة الاداء ولا القصة شنو ما عارفة..لكن بالجد بفكر اشتري ليها شريط بتاع شقي ومجنون..
يعني عادي ..غيرتا رائي ...زي ما قال حمور

الرائع حمورة التحية ليك
وللمبدعة الجميلة ناسي عجاج

Quote: و هذا تقريبا ما حدث لي مع نانسي عجاج

نفس الاحساس

وتسلمي يارائع

مدثر تيف تيف

سروره ..
ياخ مداخلتك الاولى دي زي الشترا كده ..
وله رايك شنو ؟
ياخ الناس اتصافو و اتصالحوا و بقو حلوين.
اظنك ما قريتي الحته دي :

Quote: أختي الصغرى (حنو) أنا متأسف على الخشونة .. تقبلي إعتذاري .. بس كمان تقبلي إعتراضي على (الهههههههههه) دي بصدر رحب لأنو مابتشبه إمكانياتك وثقافتك

اما بالنسبة للبوست ففعلا اداء نانسي الاخير فيو حاجه اتغيرت ..
انا برضو ماعارف هي شنو

الزميل مدثر ..
تسلم للمرور يا غالي


لكن يا تيف تيف زي عصرت على اخوك

Quote: حمورة

Quote: وتسلمي

براحه ياخ

شكرا للروابط و الصور يا طلال

Quote: انتي يا حنين انا لو في مكانك بنزل هنا صوت وصورة وكتابة اللقاءات السياسية الاعلامية مع شخصيات عربية وامريكية سياسية معروفة عشان الناس تحكم...اضافة لدرجاتك العلمية..استعرضي زي ما الناس هنا قاعدين يستعرضو.. الشئ المعروف انو وسائط اعلامية زي البتشتغل فيها حنين لو ما مقتنعة 100% في مقدرتها كمعدة ومترجمة ومحررة واهم حاجة صوت اذاعي ما كانو استوعبوها.. وكونك تكوني بتمثلي السودان في وسيط اعلامي معروف دة مفروض نفخر بيه.. ثم الكتابة هنا مسئولية فردية..تكتبي ههههههه تكتبي ننننننن دة شئ بيخصك..غلطتك انك ما جيتي استعرضتي هنا زي الباقين بانك فاهمة ومثقفاتية..الشئ الغريب انو البيعترضو هم من الناس الكانو بيسجلو حضور في البوستات الغير مفيدو دي؟؟دة نفهمو شنو؟؟

لو رديت حا تحمبكي ..

حا أقرض على إعتذاري الفوق ..

دي رفعة إحتفاءً بنانسي ..

عادي يا كمال ..رد
لاني انا والحمبكة ما بنتلم في حتة واحدة...
بس خايفة علي بوست حمور..



ورفعة تانية..
لي حمور

(*)
لأ
والله حا تحمبكي ..

رفعة تانية ..
عشان حمور ..
ونانسي ..

Quote: والله حا تحمبكي

كلامك صح..
حا احمبك..
ما بقدر اغالطك ..
عاد ما بتعرفني اكتر من روحي..

(*)

عارفة مداخلتك وفرت علي بوست ..
وإحتمال حمبكتك (المفترضة) وفر علي مداخلة ..

أستغفر الله لي ولكم ..
وآدي طلعة ..

Quote: وآدي طلعة ..

مع السلامة..

Quote: مع السلامة..

الله يسلمنا من الشبك يا(رشا كاشان)

Quote: الله يسلمنا من الشبك يا(رشا كاشان)

عارف انا بشوف من الافضل انك تكتب كلام واضح بيتفهم لي وليك ولي البيقرو الكلام دة..
لو سمحتا يا كمال وضح كلامك ..
شبك شنو؟؟؟
ورشا منو؟؟؟
وكاشان منو؟؟؟
لانو كلامك دة شكلو ما حلو ..بالرغم من اني ما فهمتو..لكن اخدتو علي انو اساءة...

وضح لو سمحتا..

(*)

مش قلتا ليك حا تحمبكي ..!!

(*)

مش قلتا ليك حا تحمبكي ..!!

حمور و ضيوفك سلام،

كثير حاولت اتحاشى اقول راي في أي مؤدي او فنان
لأنو الآراء دي لو كانت نقد بتكون منكورة من المعجبين
و باكتفي باني ما اسمع الفنان أو الفنانة دي و اشتري
دماغي ...

ولكن،

ما يغيظني و يفرفر لي مرارتي أنو يجي زول يلصق لي
في نفوخي و يحاول يقول لي انا ما بافهم لاني ما متفقة
مع ذوقو ...

و الآن، و البركة في بوستيك،
لقيت نوع آخر بيغظني و بيؤسس
نوع جديد من الغلاط في التذوق الفني


معليش يا كمال و ياحنة
امكن تكونوا اتصافيتو
و لميتو الدور،
بس انا ما عجبني كلامك يا كمال
ما عجبني تب ...

نوع بوستات حنين ما شرط ولا متطلب اساسي
في مدرسة تذوق الفن،
ده واحد ..

اثنين،
سماحة نانسي
صداقتك بنانسي
ما بتفرض علينا نحبها و نشيد بيها

السماحة زاتها نسبية
و البيعجبك ممكن ما بيعجب غيرك

و السماحة هنا شااااملة الصوت و الشكل و باقي ما تبقى

حكاية تقيم الناس و تصنيفهم بانواع بوستاتهم دي برضو ما حلوة
و حكاية تجريم الناس لو اختلفو معاك في الذوق و التذوق الموسيقي
برضو ما حلوة ...


عاد ده رأي،
تقراهو
يقع ليك
ترميهو البحر
فطو ..

ما مهم ... الاعتذار سمح منك
بس الاهم - تراجع الاسلوب كلو على بعضو


____

جبت ليكم لوحين تلج تتمو بيهم الحفلة

ليه كل بنات البورد السمحات ما عاجباهم نانسي ؟







يا عزاز ياخ انا طنشت قلت البوست يغتس بشكلتو و ينسوهو
تقومي تجي تقلعيو زي جنازة البحر ؟

اها خليني كمان اقول لسارة انو كل كلاما ما عجبني لانو كلام زعل بين حنين و كمال و اتصافو فيهو و كمال اعتذر لحنين عن كلامو القاسي و نصحا و حنين ردت برد حلو و عم السلام الكون و خرجت ذات الرداء الأحمر تلعب في الغابة حولها الفراشات.

تقوم سارة تجي دافره تشاكل كمال و تمسك في الكلام ليه ؟
كلام اتقال و اترد عليو و تاني اعتذر منو و ستو فهمت و اتصافو
تاني شنو ؟
نحن مالنا ؟


اها خليها تجوط
كمال يجي يزعمك
و ساره تجي تزعط ريشي
الليلة مصنع التلج ده الا نقفلو

الغريبة يا عزاز المحيرني انو فك درب النقاش من موضوع نانسي لي بوستات حنين..وطوالي جا قبل علي في قصة بعيدة من موضوع النقاش ومصر انو ممكن يحمبكني باسلوب انا تماما ما قادرة افهمو..
يا كمال كونك تتريق علي لمن تقول لي رشا كشان الاعلامية في البي بي سي ما بيخدم شئ في الموضوع...
بحترم اي اعلامي..
وفي نفس الوقت بحترم نفسي..
فبتوقع من الاخرين الاحترام التاااااام..في حدود المعرفة..
والبتسوي فيهو دة ما حلو نهائي..

حمور ازيك ..

أنا قايل نفسي براي دقة قديمة زي ابن عمي صديق الموج ..
على فكره الزول دا دردقه هنا يجي يحكي ليك عن الحقيبة وناسه ..
الحقيبة دي عالم تاني ياخ ..
كمان نحن مع قلبنا الرهيف دا ما بنقدر نستحمل غناء الطمبور ..
وكان عرجت على عثمان حسين في ساعات متأخرة من الليل يمكن ما تنوم زاتو ..
بس ما بتفق معاك في كلامك عن الباشكاتب ودالأمين خسمتك بالنبي كان ما مشيت وسمعت ليهو أغنية مراكب الشوق على شرط تكون بالعود لمن يقول ليك ..
شايلك معاي وأدفى بي طيبة العيون وكتين أسير مشوار براي ..
ولمن تصل فوق موج فوق موج أقيف شوية عشان تسمع ..
وشلالات مشى ..
والله خالتك دي ما خاتيه عليك

بعدين نعمل شنو مع قريبك دا ياخ عطل لينا ملفات الصوت ..
كان جبنا ليك حاجات هنا متعناك بيها ..
نانسي عجاج زوله غناية ..
ومش لازم تتفق الأصوات في سماع الغناء وتذوقه ..

كن بخير ..

شفت يا معتصم كيف لكل شئ اذا ما تم نقصان؟

سعدالدين كيفك يا صاحب ..
الباشكاتب دا ما فيهو كلام ..
وخلينا نتعلم مع الأيام وزاد الشجون ..

Quote: لكل شئ اذا ما تم نقصان

!!

تعرف يا حمور

وقفت عند عبارة التنميط بتاعتك دي

Quote: لكنك معذور .. شهادة عربية

و قلت تاااااااااااااني!!


بعدين قريت دي

Quote: تقول شنو لو اعترفت ليك اني ما بطيق غنى محمد الامين ؟ و مستغرب الزول ده بيغني اربعين سنة كيف ؟

و قلت

حمور ... معذور!!!

ود اللمين يغني

Quote: اربعين سنة

ما اقنعك!!

الشهادة العربية طايرة في السما اللحمر!!

مكرر

يا معتصم و الله ود الموج و حبو للحقيبة ما عندي فيو كلام ..
كنت محظوظ انو في اكتوبر الفات في بداياتي في البورد كتبت بوست اسمو " في عشق حقيبة الفن " فجا ود الموج كب فيو علم تقيل .. و هارون دياب خت لي فيو رابط بوست تاني فيو تسجيلات حقيبة نادرة .. لكن البوست شالو الهكر الله يسامحو ..
لكن يا عزيزي ود الموج ده بقى مشبوه ..
الحته البيخشها بيخلي الناس فيها يتكلمو كلام ما ياهو ..
كفاية مستشار الرئيس يا زول ..


اي زول حنين لازم يسمع الطمبور ..
بوصيك بتلاته اغاني لجعفر السقيد باعتبارو هسه ماسك الجو :
جرح الريدة البيقول فيها يا جرح جواي سافر فوق جناح السرعة .. الموج يوم يضارب الشاطي و الريح لما تطفي الشمعة .. و المحبوب وكت يجرح لو في زول يحس او يوعى .. جرح الريدة كان اتعد من ضمن العجايب السبعة
و اغنية اصبر يا قليب .. و بيقول فيها اصبر يا قليب و انسى العذاب الكان .. صابر كم رجيت و الراجي مو ندمان
و اغنية عاشقة و خصوصا رميتا لما يقول رغم انو العلم اتقدم لكن مافي على الاطلاق .. دكتور يكشف وجع الريدة و يدي مسكن للاشواق

و لو عاوز ترجع ورا اسمع يس عبد العظيم في اغنيتو العبقرية : ليل الغلابة .. يلا يا ليل الغلابة و ضمني

و عليك بيعقوب تاج السر ..
اسمع اي حاجه غناها يعقوب حتى لو قحه منغمه ..
ياخ سمعتو و هو بيغني يا قاسي لو عيني بكن سالن متل حبر اليراع .. ماني امانة باكي علي هواك خايف عليهو من الضياع

ااااخ

امتنع عن التعليق على الاستاذ محمد الامين عشان الزي معتصم و سعد الدين ديل ما يلقو فرقة ..

عالم متسببه

يعني هسة يا حمور ، ناسك ديل غنايين و ود الامين ما قادر تهضم غناه؟... اريتا خالتنا تتعلى ما تتدلى.

حمور..
ازيك..ياخي..
انت عارف..مشكله الاستماع..دي مشكله..عجيبه..
وذوق شخصي لي ابعد الحدود..
مثلا...قد لا احب.. الفنان الفلاني...اول لا يعجبني اداءه..ولكن ليس
هذا لا يعني انه غير جيد او انه لا يعرف الغناء..
وتماما مثلما احب و اسمع فنانا معينا..و لكني لن افرضه علي غيري
او انصبه فقط انه الاوحد..
وقد لا تعجب نانسي البعض.زاو قد يعشقها الاخرين..
ولكن في الاخر...يجب ان نعترف بها
كواقع و حقيقه..بان لها جمهور.وصارت تشق طريقها بثبات ونجاح
وما الشريط الاخير..الا دليل هلي ذلك..
نانسي في بدايه المشوار.فلندعمها..بالنصح و النقد الايجابي..حتي تواصل دربها..حسب ما خططت للمستقبل
اختلاف طريقه اداءها..يجعل لها ميزة و تفرد عن زميلاتها من الفنانات..
وايضا نفس الاختلاف في الاداء..قديجعل البعض لا يحبها..
وفي الاخر..حب الناس مذاهب..
ولو واصلت نانسي بنفس اداء(رفقه)..فقطعا..ستكون...النجمه الاولي بلا منازع..
ولك الود
هواري
.
..

شوف يا سعد الدين اقول ليك حاجه ..
ما تتكلم في غنا الطمبور عشان ما تتعكس عليك
اسمعا نصيحة من اخوك
الطمبور صوت الطبيعة اذا غنت ..
ثم ما تزعل لمحمد الامين شديد كده ..
برضو ما بحب كريغ ديفد و جميع الاخوة الخواجات ..
اعتبر محمد الامين كريغ ديفد ياخ

Quote: نانسي في بدايه المشوار.فلندعمها..بالنصح و النقد الايجابي..حتي تواصل دربها..حسب ما خططت للمستقبل اختلاف طريقه اداءها..يجعل لها ميزة و تفرد عن زميلاتها من الفنانات.. وايضا نفس الاختلاف في الاداء..قديجعل البعض لا يحبها..

استاذ هواري ..
كلام سليم تماما ..
لو ظنت نانسي انها وصلت فقد انتهت
و لو غرها الناس انها وصلت فقد انتهت

نانسي تمتلك مقومات ممتازة ..
عليها ان تحسن ادارتها ..
و ستكون فعلا البت الفريدة

ود الامين زعلي ما بزيدوا آ حمور اخوي، زعلان ليك انت، لقيتك محروم. ناس الطنبور عندي فيهم فنانين و اغاني معينة علا ناسك ديل اول مرة اسمع بيهم.

Quote: علا ناسك ديل اول مرة اسمع بيهم

أها شوف المحروم فينا منو

صباح الخير يا حمور ..

ود الموج دا زي ودالموية اصلو ما بتمسك عشان كده اليومين ديل مخلنو لي ناس مستشار الرئيس ..
أنا قلت ليك الطمبور دا بوديني لحتات تانية ياخ وبتعب اعصابنا التلفانة ..
الطمبور دا حنين ياخ ..
ومسألة الذوق دي راجعه للشخص وما بتنفي المغني والفنان وحب الناس مذاهب ..
قد نتفق على فنان ونختلف في آخر ..
عشان كده ما تعصر على الباشكاتب دا كتير الزول دا حاجة تانية ..

يا سناء خالد ياخ ما تتحسسي ..
الكلام ده كان موجه لهشام ادم بالذات ياخ.
على فكرة انتي واقفة في الصورة دي من زمان وله جيتي هسه ؟
أنا اول مره الاحظ ليك الليله !!!!!!!
حاجه غريبة مش ؟



يا معتصم وحات سيدي الحسن أنا لا عاصر عليو لا حاجه ..
كلامي لو ما جابتو المناسبة اصلو ما كان ضربت بيو المثل
لأنو ود الأمين فنان كبير و مبدع غصبا عني
كون اني ما عاجبني فده ما معناهو هو كعب
و لا معناهو انا ما بتذوق لانو الفن اذواق مختلفه
فما تخاف عليو مني