التمييز ضد الصلع .." حبيت أب قجيجة" نموذجاً

نُشر بصحيفة المستقلة .. عدد الاربعاء 4 فبراير 2009

[1]
نشطت في العالم خلال السنوات الخمسين الأخيرة حركات مناهضة التمييز في كافة أشكاله الجندرية أو العرقية أو الدينية أو الثقافية . بل قامت دول كالولايات المتحدة الأمريكية بعد تاريخ طويل في التمييز العرقي و العنصرية القبيحة بسن قوانين للتمييز الايجابي في محاولة للاعتذار عن الظلم الذي لحق بالعنصر الإفريقي المهمش.
لكن أحدا لم يهتم بالتمييز الواقع ضد ذوي الصلع .. و هو تمييز قبيح مؤلم.
هذه المقالة محاولة للتأسيس لـ " حقص " .. حركة قوى الصُلُع .
إن كنت من أرباب الصلع فامسح على رأسك و تعال لتقرأ هذا المقال.

[2]
الصلع ظاهرة سببها حساسية تصيب جذور الشعر من إفراط الجسم في إفراز هرمون الذكورة (التستسترون Testosterone) .. و هي المعلومة العلمية الصحيحة التي يترجمها رجل الشارع الى فحولة الأصلع و أنه أكثر رجولة من غيره. هذه الحساسية تورث عبر الجينات من الآباء الى الأبناء مثلها مثل أي موروث جيني آخر.
و علاقتها بهرمون الذكورة هي السبب في إصابة عدد من النساء بالصلع بعد سن الثمانين حيث ترتفع نسبة الهرمون لديهن.
لمحبي الأرقام أقول أن دراسة أجريت في اسبانيا أكدت ان 57% من النساء يصبن بالصلع بعد سن الثمانين. و هي صيغة لطيفة لقول إن 57% من النساء يبدأن في التحول الى رجال بعد سن الثمانين.
عليه يمكنك أن تنادي جدتك بلقب : "جدي " بلا أي قلق فالحقائق العلمية في صفك.

[3]
التمييز ضد الصلع – الذي هو موروث جيني – حقيقة ظاهرة في كل المجتمعات حولنا .. تبدأ من وصف أي شخص أصلع بهذه الصفة دلالة على الاختلاف و إشارة الى أنها علامة مميزة لابد ان تلفت النظر. بينما لا يكون من الطبيعي أبدا أن تصف شخصاً بأنه فلان ذو الشعر.
من مظاهر التمييز ضد الصلع ما حدث في ألمانيا عام 2005 حيث رفضت المحكمة طلبا من زميل أصلع بإدراج قيمة الشعر المستعار ضمن التأمين الصحي للرجال. بينما يغطي هذا التأمين علاجات تساقط الشعر و الصلع و فواتير الشعر المستعار للنساء.
و بررت المحكمة حكمها بأن الصلع للرجال أمر شائع و مقبول.
الغريب أن السعوديين ينفقون سنوياً مبلغ 320 مليون دولار لمكافحة الصلع عبر عمليات الزراعة و المستحضرات المقاومة للتساقط.
فهل تنفق المملكة العربية السعودية هذا المبلغ ( أكثر من مليار ريال سعودي ) في مكافحة أمر شائع و مقبول ؟
إنما هي عنصرية أصحاب الشعر و كيلهم بمكيالين.

[4]
و في السودان عاني الصلع من ذات الاستهجان و التهميش و التمييز.
و هو تمييز له جذور ممتدة في التاريخ و الثقافة الشعبية.
في فترة الستينيات التي كانت فترة لحركات التحرر الوطني و الحريات و النهضة في كل العالم كان المجتمع السوداني لا يجد غضاضة في أن يمجد حركات التحرر مغنياً لباتريك لوممبا ممجدا له و في ذات الوقت يغني للصلع مزدريا إياه.
اشتهرت في الستينيات أغنية نسائية تقول :
"يا باكو السجاير .. يا الفي الحفلة داير .. حبيت أب قجيجة و أريت أب صلعه طاير"
هذه الأغنية نتاج لعقلية التمييز ضد الصلع و تهميشه. فأب صلعه لا حق له في الحب و لا أن ينال إعجاب الفتيات .. بل إنهن يدعون عليه أن يطير.
و لا شك ان مثل هذه العقلية لدى النساء إنما هي من نتائج الاستلاب و الوقوع تحت تأثير العقلية الذكورية الشعرية التي تخشى من ذكورة الصلع التي قلنا أن سببها هو ارتفاع نسبة هرمون الذكورة لدي الأصلع.

[5]
هذا التأثر بالعقلية الذكورية الشعرية التي تخشى الأصلع ظهرت في إيران حيث قامت إحدى الزوجات برفع دعوى لدى محكمة العائلة مطالبة بالطلاق من زوجها ( اسمه أمير ) لأنها اكتشفت ليلة الدخلة أنه أصلع و أن شعره الذي أعجبت به كان مجرد باروكة.
حاولت الزوجة إخفاء حقيقة صلع زوجها عن عائلتها و أصدقائها لكن أمير رفض الاستمرار في الخداع و أصر على مواجهة العالم بصلعه. تقول الزوجة ان هذا الأمر سبب لها حرجاً كبيراً حتى أصبحت تضطر الى زيارة أهلها و الظهور في التجمعات بمفردها خجلا من صلع زوجها.
و حين تأكدت تماما من أن الزوج الأصلع مصمم على إشهار صلعه قررت طلب الطلاق. و أكدت الزوجة أنها مستعدة للعيش معه إن قبل ارتداء الباروكة.
إن أمير الإيراني بطل من أبطالنا المجاهيل الذين حان الوقت لكشف النقاب عنهم و معرفتهم.
أحيي فيك أخي أمير ثباتك و مبدئيتك .. أدام الله عليك صلعك.
للتوثيق و فضح التمييز ضد الصلع لابد من الإشارة الى ان اسم الزوجة هو سولماز.
لا تسألني عن معنى الاسم فكل هذه الأسماء الفارسية الغريبة تعني الزهرة النادرة أو الأميرة المدللة أو النهر الهادئ أو أي هراء أخر. لو اخترعت أي اسم به كثير من حروف السين و الزاي و الواو فستجد العبقري الذي يقول لك أن معناه وردة الصباح الزرقاء. ان لهذا قوة قوانين الجاذبية و الطفو.

[6]
اختصاصيو علم الأنتروبولوجيا يقولون إن الصلع مرتبط، منذ قديم العصور بالحكمة والتنوّر والتخلّي عن مباهج الحياة كبداية لرحلة إلى العالم الجديد.. عالم التأمّل والروحانيّات.
في القرن السادس عشر قبل الميلاد خلع مهاويرا مؤسّس الديانة الجينيّة في الهند الذي وُلد من أسرة أرستقراطيّة حاكمة الملابس الفاخرة والحليّ وحلق رأسه ونتف شعر جسمه، ليبدأ حياة التأمّل والبحث عن الحقيقة التي تجلت في عقائد ديانته "الجينيّة".
كما أن الصلع هو أحد مظاهر التحرر الفكري لدى البوذيين.

[7]
التاريخ الإنساني زاخر بالمشاهير الصُلُع. فالحقائق تدعم ذكاء الأصلع و عبقريته لكن محاولات "الشعريين" لإخفاء و مغالطة هذه الحقائق لا تنتهي.
يقال أن آدم عليه السلام كان أصلعاً .. جداتنا في الموروث الشعبي يحاولن تفسير ذلك فيقلن أنه كان طويلاً جداً حتى أن رأسه كان يحتك بالسماء مما سبب له الصلع.
كونفوشيوس حكيم الصين كان أصلع الرأس من النوع الذي يسخر منه السودانيون و يسمونه "قرعه" أو " كوجاك ".
الفرعون مرنبتاح ابن رمسيس الثاني كان أصلعا كما أكدت الفحوصات التي أجريت على موميائه.
علي بن أبي طالب كان أصلعا.
ليوناردو دافنشي عبقري كل العصور كان أصلعا.
برنارد شو كان أصلعا.
ونستن تشرشل كان أصلعا.
حتى أجاثا كريستي حين أرادت ان تخلق شخصية روائية ذكية لم تستطع ان تجعل لبطلها هريكل بوارو شعراً. فجعلته أصلعا. من كان سيصدق أن عبقرياً كبوارو يمكن أن يكون بشعر ؟

[ 8]
أمريكا المولعة دوما بارتكاب الجرائم ثم التكفير عنها بدأت الان في التكفير عن التمييز ضد الصلع. هذا التكفير تمارسه النساء الأمريكيات حيث أجريت دراسة إحصائيّة أمريكيّة بيّنت أنّ النساء ما بين 23 و 66 سنة يجدن الرجل الأصلع أكثر ذكاء ونضجًا من سواه، وأكثر استعدادًا للنجاح في الحياة لأنّ اهتماماته تتركّز على رجولته بأبعادها الإنسانية ومعانيها العميقة.
ربما لهذا اجتهد العلماء الأمريكان في بنسلفانيا في اكتشاف نوع من الخلايا تساعد على نمو الشعر و اعتبروا ذلك بشارة بعلاج الصلع. و نشرت مجلة "التكنولوجيا الحيوية للطبيعة" ان الخلايا المكتشفة بها جينات معينة لحويصلات الشعر نشطت بشكل لم يحدث في الخلايا الأخرى.
وأضافت ان العقاقير التي تؤثر على هذه الجينات في البشر قد تؤدي الى التوصل لأساليب جديدة للتحكم في نمو الشعر.
من اللطيف أن هذه الخلايا ربما تساعد على علاج مرض السرطان لكن التركيز اغلبه انصب على علاج الصلع كما لو كان مرضاً . إنها العقلية الذكورية الشعرية ترتجف من قبول النساء للرجل الأصلع.

[9]
في ألمانيا التي رفضت محاكمها دفع التأمين الصحي لرجل أصلع توصل العلماء الى ان مادة الكافيين تساعد على وقاية الانسان من الإصابة بالصلع. الكافيين يوجد في القهوة و الشاي و المياه الغازية و الشكولاتة.
عليه ان كنت تخاف على شعرك و تريد الوقاية بالكافيين فعليك بدهن شعرك بأحد هذه المشروبات أو تناول ما بين 60 الى 80 فنجاناً من القهوة في اليوم .
من وسائل مقاومة الصلع أيضاً التنويم المغنطيسي و عمليات زراعة الشعر. و من المشهور طبعاً قصة الأصلع الذي لحست البقرة رأسه فنبت شعره مجدداً.
عليه ان كنت تخشى ان تنضم الى الفئة المهمشة هذه فان خياراتك واسعة .. تمتد من الوفاة جراء الإفراط في شرب القهوة الى الجلوس تحت بقرة لتلحس رأسك.

[10]
انه نداء لكل أصلع لمقاومة التمييز ضدنا و الدعوة الى رفع الظلم الواقع علينا و نشر ثقافتنا الصلعاء بعيدا عن الاستلاب و القمع و التهميش الذي يمارسه ذوي الشعور تجاهنا.
عزيزي القارئ ان كنت من ذوي الصلع فقد حان الوقت لتنضم الى "حقص" (حركة قوى الصلع) لتسترد حقوقك المستلبة.
و من يدري .. ربما قادت الحركة نضالاً مسلحاً – فخياراتنا مفتوحة – حتى توقع اتفاقية سلام مع المجتمع الشعري تحفظ بها حقوقنا .
و ليكن شعارنا :
"يا باكو السجاير .. يا الفي الحفله داير .. حبيت أب صلعه و أريت أب تفه طاير "

[11]
أخي الأصلع .. احذر الخونة و الخيانة ..
ألقت الشرطة في هونغ كونغ القبض على آلان شان (32 عاماً) الموظف في بنك "دي بي اس " لاختلاسه مبلغ 43 ألف دولار أمريكي من حساب أحد العملاء ليسدد مصاريف عملية زراعة شعره.
العملية فشلت مما اضطر الشاب لسرقة المبلغ لتسديد ثمن العملية و البحث عن علاج جديد.
هذا جزاء كل خائن لصلعه.

***

http://hammourziada.blogspot.com/2009/02/blog-post_04.html

متابعنك يا حمور بنص بسمه وحاجب يسار مرفوع وصره خفيفه علي الجبين ومنتظرين لحظة الانقضاض المشروع ....!!!

شكرا للمتابعة يا طارق ..
شُكُر بابتسامة كاملة و حواجبين مرفوعات

حمورنا اب صلعة(وش شمتان)

شايفاكـ تسيق فى التبريرات وتنتقى مالذ لكـ منها

ياخي بصلعتكـ دي وعاجبنا ، تعبان مالك



اول مرة اعرف انو الصلع زيادة فى هرمون الذكورة ،،معلومة والله،،




ـــــــــ
بالله اتاريكن يا الصلع والجلحات قاعدات ليكن فوق راى (وش مندهش)

Quote: بالله اتاريكن يا الصلع والجلحات قاعدات ليكن فوق راى (وش مندهش)

و الله يا شمايل نحن لو قمنا مرقنا كل اسرار الصلع دي الا انتو يا البنيات تحلقن ..
بس خلي القرار في النهاية يكون لناس "حقص " هم اليقررو ينشروا كل حقائق الصلع وله يدسوا منها حاجات و يتعبروها اسرار عظمى زي الحاجات المدسوسة في مكتبة الفاتيكان الكتب عنها دان براون ديك

أريد أب آفرو
أريت أب صلعة طاير ..








__________
أغنية من عيون أغاني البنات في حقبة الثمانينيات
هسي الموضة بقت "نمرة واحد" والديرتي لوك

هدية العدد ..
وكمان أحمر
تيمناً بالخامس

حمـور يا رائع

بوصـفـنـا من الموعـودين بالصلـع (بعد خرف)

عميق التضامن

وشجب وإدانـة لمشط تيسيـر

عالم تحب الشماتة بشكل ........



أحمـد

حـمور ..
الصلع في حد زاته قد يكون مقبول ..
اذا كان الصلعة ( نضيفة ) لا تعتريها منعطفات و انبعاجات .. او تكون الفاخورة في شكل تراينقل ..
او كثيرة الفلق و الفليق .. كصلعة اخونا مجتبى .. عندما اطلعنا عليها في ما يسمى معسكرات الدفاع الشعبي .. ( ايام الشهادة الثانوية ) ..
مما حدا بنا بأطلاق اسـم ( خالد بن الوليد ) علي تلك الصلعة ..!!
صلعة كوجاك تعتبر نموذج نضيف .. لما يجب ان تكون عليه الصلعة .. و صلعة المارينز مغرية لرواد السينما الوطنية و شاربي البنزين و شاممي السلس ..

..
..

في الايام الاولى لحكم الانقاذ .. عندما كان تتبنى النظرية ( البوليسية المارينزية ) .. كان للصلعة صولات و جولات في رؤوس اولاد الحلة ..
صلعة دفاع شعبي ( مموجة و بيها كثير من المطبات ) .. صلعة إدارة ألف ( حقة الله ) .. صلعة ضباط صف ( نضيفة و تسكن تحت البوريه ) ..
صلعة ضباط و لفوق ( لاخفاء الشيب ) ..
كلها صلعات مصنوعة .. وفرت لاصحاب الصلع الحقيقية غطاء استراتيجي للظهور في المجتمع علي انهم يمتلكون ( سلطة ) ..
مما يعزز النظرية الذكورية التي تتحدث عنها ..

..
..

ايضا هناك ارتباط للصلعة بالنباهة و الشطارة .. ( في الموروث السوداني ) .. ويقال ( شعره اتحتا من كترة القراية ) ..
و في ما يذكر من احاديث المدينة .. ان أحدهم كان عنده صلعة فاهمة من نوع ( كوجاك استايل ) .. وكان يمر بصاحب الدكان صباح مساء و لا يلقى عليه التحية ..
تضافرت عدة عوامل وهمية .. ( الصلعة - و عدم السلام ) .. ليعتقد صاحب الدكان يقينا .. انه قطع شك الزول دا دكتور ..
ومن يومها عرفته الاوساط في حلتنا باسم .. ( دكتور توروتا ) ..

..
..

لي عودة ..

Quote: في الايام الاولى لحكم الانقاذ .. عندما كان تتبنى النظرية ( البوليسية المارينزية ) .. كان للصلعة صولات و جولات في رؤوس اولاد الحلة .. صلعة دفاع شعبي ( مموجة و بيها كثير من المطبات ) .. صلعة إدارة ألف ( حقة الله ) .. صلعة ضباط صف ( نضيفة و تسكن تحت البوريه ) .. صلعة ضباط و لفوق ( لاخفاء الشيب ) .. كلها صلعات مصنوعة .. وفرت لاصحاب الصلع الحقيقية غطاء استراتيجي للظهور في المجتمع علي انهم يمتلكون ( سلطة ) .. مما يعزز النظرية الذكورية التي تتحدث عنها ..

تعرف يا حميدة على سيرة صلعة ايام الانقاذ الاولى ..
انا لحدي هسه بتذكر قصة غريبة جدا كان الشارع بيحكيها عن اول الشهادة لمن دخل الدافع الشعبي .. الكلام ده في اول التسعينيات الخطيرة ديك
الود قالوا امو جابت ليو عصير في المعسكر .. اها التعلمجية لموا ليك فيو و خلوهو يجري حوالين المعسكر و هو بيكورك : انا العوير امي جابت لي عصير
القصة دي ما غريبة الغريب انو الناس كانت بتقول انو حلقو ليهو بقزازة بيبسي مكسورة
دي بقا انا مستغرب فيها شديد
ياخ حلاقة بقزازة بيبسي مكسورة دي مسألة فوق للخيال شوية كده

Quote: عميق التضامن وشجب وإدانـة لمشط تيسيـر عالم تحب الشماتة بشكل ........

يا الشايقي يا اخوي تيسير دي زي الزول المشى جمب المقابر و شغل اغنية حبيبي الدنيا محلاها ..
لكن ليهم يوم
لقد حانت ساعة ثورة الصلع
و اجمل شي في حركة قوى الصلع دي انها حتجمع كل الاعراق في السودان و كل الاديان
الجلابة و المهمشين كلهم عندهم صلعة و كلهم مصيبتم واحدة
الغنيان و الفقير كلهم عندهم صلعة .. فعلا واحدة مقابلة الحر و التانية ضاربة الكندشة لكن التمييز ضدهم حاصل
الى الامام يا حقص

الأخ حمور:

الفكره جميله للغايه..

"الصلع ظاهرة سببها حساسية تصيب جذور الشعر من إفراط الجسم في إفراز هرمون الذكورة (التستسترون Testosterone) .. و هي المعلومة العلمية الصحيحة التي يترجمها رجل الشارع الى فحولة الأصلع و أنه أكثر رجولة من غيره. هذه الحساسية تورث عبر الجينات من الآباء الى الأبناء مثلها مثل أي موروث جيني آخر".

دي طريقه ممتازه لرفع معنويات الصلع..

احتمال تكون دراسه جديده..

غايتو الكلام الدرسناه انه وراثة أليل واحد من جين الصلع "أي جين بيتكون من أليلين.. ما تسألني كيف.." كافي لاحداث النمط الظاهري للجين عند الذكور (صفه متأثره بالجنس).. وذلك بسبب تأثره بالهورمونات الذكوريه.. في حين أن الأنثي لتحمل الصفه الظاهريه (أنثي صلعاء) يجب أن تحمل نسختي الأليل..

ده ما ينفي التضامن الكامل..
لو في رابطة أصدقاء للجمعيه أدينا خبر..
للمشاركه في رفع المعنويات..

خليك متفرد دائما...

حمور،

دة كلو عشان قالو لبكرى أب صلعة؟؟؟


طب إنت مالك،
عيبك لى!!!!



و بعدين،

Quote: يقال أن آدم عليه السلام كان أصلعاً .. جداتنا في الموروث الشعبي يحاولن تفسير ذلك فيقلن أنه كان طويلاً جداً حتى أن رأسه كان يحتك بالسماء مما سبب له الصلع

كضبا كاضب،
سيدنا ادم الشافته عينى دة،
كان بشعر،
و شعر كتير كمان،،،،



ماتفلقوا ساكت........

Quote: سيدنا ادم الشافته عينى دة، كان بشعر، و شعر كتير كمان

امنا حوه


عزيزتي هالة ..
دقستي ..
اذهبي فانتي " حوه " من الليلة

Quote: غايتو الكلام الدرسناه انه وراثة أليل واحد من جين الصلع "أي جين بيتكون من أليلين.. ما تسألني كيف.." كافي لاحداث النمط الظاهري للجين عند الذكور (صفه متأثره بالجنس).. وذلك بسبب تأثره بالهورمونات الذكوريه.. في حين أن الأنثي لتحمل الصفه الظاهريه (أنثي صلعاء) يجب أن تحمل نسختي الأليل..

اماني الخوافة ..
ازيك ياخ في أول مداخلة بينا ..
حقو الواحد يقوم يرشك هنا دا عشان ترجعي الباسويرد

غايتو ما بغالطك في دراستك تب .. لكن العارفو انو الصلعة سببا حساسية جذور الشعر تجاه هرمون الذكورة .. اها الحساسية دي ممكن يكون سببا الجين بتاعك ده مش كده ؟

Quote: أغنية من عيون أغاني البنات في حقبة الثمانينيات هسي الموضة بقت "نمرة واحد" والديرتي لوك

التمانينيات دي زمن التفه ديك .. اي واحد لابس البنطلون الرمادي الشارلستون و قميص ابيض مجبص و شعرو زي زعافة حبوبتي الجديدة .. الغريبة الاغنية ما سمعتها بنسختا التمانينية .. بعرف القديمة بس
و بمناسبة الخامس حقك يا حاقدة اديك مقطع تاني من الاغنية كان بيقول :
يا باكو السجاير يا الفي الحفلة داير
حبيت الشيوعي و اريت اب سبحة طاير
هسه نحن كمصلعين عاوزين زي ما اب سبحة اخد حقو و خلى الشيوعي يزازي بمؤتمراتو في قاعة الصداقة و يعزم ليها نافع عاوزين نعمل نفس الحكاية على ناس الشعر ..

حمور أب صلعة سلام ..

هدية ليك من الإرشيف ..:


المصلعون والمصلعات في المنبر !!!!

بشرى سارة للمصلعين والمصلعات في المنبر !!

Quote: المصلعين والمصلعات في المنبر

يعني يا ناذر في داعي تنكت الحاجات القديمة دي ؟




أحمد الشايقي

سلام يا الشايقي ..


صدق لقيت صورتك إختفت من بي هناك ..

ما فضلت الا صورة بكري ..

قلنا نذكر الجماعة بالرابط داك ..

الحمد لله انني رغم تجاوزي للثلاثين
اتمتع بكامل شعرى وان كانت تعلوه بعض الخصلات البيضاء






___
الشعر نعمة والله

لكن يا وهبة تبقى عليك صلعة و عدم شوف ؟
ما ممكن ياخ
واحدة كفاية يا متجاوز الثلاثين

طبعا اي زول يصل مرحلتك العمرية دي بيقول انا بلغت الثلاثين مرتين .. مش كده ؟

غايتو يا ابو النيز يوم بتكتل ليك زول

ياخي انت ما شفت قصة الايرانية العاوزة تطلق من راجلا الفي المقال دي ؟
هسه افرض في واحد من الناس دي مجكس ليو واحدة اون لاين و شابكا ليك شعري حريري و كستنائي و خصلي سايحه و نايحه و لمن ازعل شعري بيقيف زي شعر رشدي اباظة .. تقوم تنكت للناس من الارشيف البلاوي و تفضح الخلق ؟
بالغت ياخ

هلا حمور ..
ذكرتنى ود عمى مهندس زراعى بامريكا صلعتو زى صحن العصيدة الملاحو شوية
لمن اجيب ليهو سيرة صلعتو دى بيقول لى ( دى عبقرية ..انت قايلها صلعة جزار ؟؟)

استاذنا الطاهر ..
مرحب بيك ..
و الله جيتك فرحتني جنس فرح
ياخ نقرا ليكم من زمن الجرايد بميتين لامن بقت بالف ..
اخيرا قريتو لينا ؟
المشكلة انو ملح .. لكن حقنا بناخدو (الوشوش الضاحكة ما شغالة)


ود عمك شكلو متأثر بنميري و بثينة مرة الرئيس و ما مرة نجار

الاخ العزيز حمور
تحية طيبة
وبعد
"حبيت اب قجيجة اريت ابصلعة طاير "؟
لعلك تتفق معى ان السياق الذى انتج الاغنية هو ما باح بهذا النوع من الغناء
وذاك كان فى ستينات القرن الماضى
حيث كان للهيبز سطوة بشعرهم المسدل الطويل
وكان الفيس بريسلى بخصلاته المشهورة
وجاكسون فايف
وكان البيتلز بشعرهم الذى جعلهم "الخنافس "
وكما تعلم فان الفنانة "الشعبية دائما مرتبطة بما حولها
كل هذا ادى بدوره لان يكون الفنان ابراهيم عوض نموذجا لتلك الفترة
وكذا الفنان احمد الجابرى
وغيرهم من الفنانين الذين تركوا العنان لشعرهم
اسوة بما هو سائد من الموضة
اذن الامر لا يتعدى كونه حالة من حالات الموضة
التى لو نظرت اليها الان لوجدتها قد بدات فى الاشتعال عقب ان اطلق لاعبى كرة القدم العنان
"لصلعاتهم "اثناء كاس العالم 1994
ومنذ ذلك التاريخ والى الان باتت الصلعة
موضة لاغبار عليها
بل ومحل تقدير عالمى
اذن يا صديقى ليس الامر الا موضة
الى كل ذلك فى السابق كن اصحاب الصلع هم من العواجيز
وهنا ترد الاشارة الى اغنيات البنات التى كانت وما تزال
مرجعا اساسيا لمعرفة ـ الموضة ، المرغوب اجتماعيا ، المرفوض ايضا
اذن الصلعة الان محل ترحيب من الفتيات ولاغبار عليها فى تصورنا

استاذتنا سلمى الرائعة ..
يعني عشان خاطر عيون الموضة تحقروا بينا نحن ذوي الصلع ؟
حتى رد الاعتبار ده رد مصطنع
الجماعة ديل حالقين ما محلوق ليهم غصب
لقد آن الاوان اننا ناخد حقنا من تهميشكم التاريخي لينا
اشمعنى اي زول في البلد دي شايف روحو مهمش و زعلان الا نحن ؟
لابد لنا ان ناخد حقوقنا حتى لوغصب

Quote: الى كل ذلك فى السابق كن اصحاب الصلع هم من العواجيز وهنا ترد الاشارة الى اغنيات البنات التى كانت وما تزال مرجعا اساسيا لمعرفة ـ الموضة ، المرغوب اجتماعيا ، المرفوض ايضا

دي كمان مرحلة تهميش تانية .. تهميش العجائز
انتي اكيييييييد كنتي من البيغنو و يقولو :
ما بدورو ما بدورو الشايب ده
مافي ليكي ما ليكي الطالب ده
مش كده ؟
ليكم يووووم يا ظلمة

حمور

سلاااام
موضوع حلو وطريقت سردوا احلي

في ناس بيخجلوا من صلعتهم ودوما بيكونوا لابسين الطاقية فوقها عشان مافي حد يشوف صلعتهم
بيكون عندهم طواقي بكل الالوان والاشكال عشان تناسب ملابسهم
وفي ناس ما بيشتغلوا بالغير وشكل صلعتهم حلوة والله
يعني ما معني انو الزول صلعة معناهوا شكله بشع
صلعة عن صلعة بتفرق
في ناس بيحلقوا صلعة عشان بقت موضه (*_^)
وفي ناس بيفتشوا باي طريقة عشان يتخلصلوا عن الصلع
والتلفزيون ما مقصر كل يوم في شي جديد عشان يساعدهم من تخلص من صلعتهم
بس
اظن انوا الواحد لو اقتنع بشكلوا ما يحتاج لي دوا صلع ولا غيروا

مع كل الود والتقدير

سالي

Quote: الحمد لله انني رغم تجاوزي للثلاثين اتمتع بكامل شعرى وان كانت تعلوه بعض الخصلات البيضاء

]

تعرف يا عيد الوهاب انا باختلف معاك شويه لاني رغم تجاوزي العشرين لم تسكو بقايا شعري (او ما تبقي من الاتحاد السوفيتي كما يقال) شيبة واحده رغم ان

الشيب انكشح علي الشنب دون وازع من ضمير.

صديقي محمد موسي من الشعبيه وبعد زمن لم اره فيه لوجوده في قطر قلت له كيف شكلك الآن صديقي فقال والله شعري كلو بقي ابيض.

هنا تبسمت لسواد شعري الحالك وفاجأته - تصور لحدت دلوكتي انا ما عندي في شعري شيبه واحده فقال لي هو انت عندك شعر لمن يكون في شيب ....!!!!

يا اخي حمور الصلع ليس الا نقطة تلاقي للجلحات شأنها شأن اختفاء الجزر.

Quote: يا اخي حمور الصلع ليس الا نقطة تلاقي للجلحات شأنها شأن اختفاء الجزر.

يا سلام يا طارق
معا من اجل ثقافة صلعية جديدة

سجل عندك يا حمور واحد اصلي

حمور الظريف ..

تحياتى !!

كامل تضامنا مع حركة حقص

صلاح أبودية

ع/أصحاب الرؤوس البيضاء

حمور،

فى طفل صغير (5 سنين)،
ما شاء الله عليه بفكر و بتأمل كتير،،

فجاءةأكتشف إنو أبوه جلحاته واصله لرقبته من وراء،
مع إنو عندو دقن كثيفة جدا،،،

فكر ليه ليه،،

قام قال لأمه:
أنا عارف بابا شعرو مشى وين،،،
قطعو كللو و ختاهو فى دقنو!!!!!

حمور ...
أول حاجة ..
اتضامن ،،، يعني (نص ،، نص) ..

تعرف لما قريت مداخلة هالة :

Quote: سيدنا ادم الشافته عينى دة، كان بشعر، و شعر كتير كمان

طوالي فكرت أرد عليها وأقول ليها (أمنا حوة ،،)

لقيتك سبقتني وقلت ليها :

Quote: امنا حوه عزيزتي هالة .. دقستي .. اذهبي فانتي " حوه " من الليلة

فعلا ،،
دقستي يا ... حوة ...
(وبعدين حوة .. وليست حواء ...)

إبراهيم،

شكلك أتضامنت مع حمور مية فى المية،
و أتفقتوا على،،

مع إنو ياخى لو شعرك ناوى يخف،
كان حسه ظهر،،،



و بعدين،
سيدنا ادم دة لو كان ربنا خلقو (من غير شعر)،
باقى الناس جابت شعرها من وييين؟؟؟




عالم من غير شعر،
و مفترية كمان.....

Quote: و بعدين، سيدنا ادم دة لو كان ربنا خلقو (من غير شعر)، باقى الناس جابت شعرها من وييين؟؟؟

حوة ..
يا للبؤس
محاولات عضيرة للتشكيك في مرجعيات حركتنا لكنها لن تزيدنا الا قوة

تعرف يا ابراهيم ..
انا فكرت ليها في اسم تاني و هو " قرينة أمبشر "
بس مشكلة الاسم ده نطقو الاجمل ما بيجي للزول من القراية لو ما عارف حجوة النمير الطمبجاني
عشان كده اخترت ليها حوة

شكرا لتضامنك النص نص
و يوم حركتنا تستلم السلطة حنعمالك برضو نص نص .. قدر تضامنك

Quote: كامل تضامنا مع حركة حقص صلاح أبودية ع/أصحاب الرؤوس البيضاء

مرحب بمهمشي البياض

Quote: سجل عندك يا حمور واحد اصلي

بكري الخير الشجاع المقابل الناس بصلعتو في صورة البروفايل
دخولك معنا فخر لصلعنا جميعا

Quote: ... كل هذه الأسماء الفارسية الغريبة تعني الزهرة النادرة أو الأميرة المدللة أو النهر الهادئ أو أي هراء أخر. لو اخترعت أي اسم به كثير من حروف السين و الزاي و الواو فستجد العبقري الذي يقول لك أن معناه وردة الصباح الزرقاء

حمور زيادة

محجوب البيلي..
شكرا لمرورك..
شكلها وقعت ليك في جرح

هالة ،،،

قصدي حوة ....

المشكلة ما في شعر سيدنا آدم ،،،

المشكلة في :

Quote: سيدنا ادم الشافته عينى دة

انا متضرر من البوست ده
المكتب كله قرأ البوست ده ورسله لي لنكات ونغمات
في داعي تحلق لزملانك كدة



بالجنبة كدة : مدونك جميلة..حرسل ليك تمبليت خطوطه العربية سمحة ده لو لقيته قاعد لو ما لميت فيه العفو والعافية

Quote: المشكلة ما في شعر سيدنا آدم ،،، المشكلة في : Quote: سيدنا ادم الشافته عينى دة

إنتو الزول أصلو ما ياكل بعقلكم حلاوة؟؟؟؟


شافتو صاحبتى ياخى،
و قالت لى......

أها؟؟؟؟؟؟؟؟؟؟

Quote: شافتو صاحبتى ياخى، و قالت لى......

هي بالله أمنا حوة ..
كانت صاحبتك ؟؟؟

حوة وابراهيم..
آدم وسارة..

حيمور..تعرف..انا ما عندي صلعة زي باقي الناس..
لكن عندي بعض المشاكل في (الهامش)..
لمن مشاكل المهمشين تزداد..بأضطر اني أقعدهم مع ناس (الوسط)..
ونقوم نعمل مساواة سريعة بين الجميع بعد الإستعانة بأخواننا من الحبشة!!

معا..نحو تجمع صلعي ..

وناس (اماني) ولو حاسة انو الموضوع فيهو هيمنة ذكورية ممكن نساويها معانا..