Post: #1
Title: يجلى النظر ياا صاحي...عبد الرحمن عبد الله
Author: محمد عثمان
Date: 05-13-2013, 09:10 PM
Parent: #0
ليّلت...
سيد عبد العزيز...
|
Post: #2
Title: Re: يجلى النظر ياا صاحي...عبد الرحمن عبد الله
Author: عبد اللطيف بكري أحمد
Date: 05-13-2013, 10:41 PM
Parent: #1
مدهش انت
بتجيب الحاجات دي من وين؟؟
وبعدين انت بتمشي وين؟
وبالقطارة ليه ياخ؟؟؟
انتظرك من يومك الجبت لينا ( إنت ليه سهرت عيني)
فماتنوم بالله
|
Post: #3
Title: Re: يجلى النظر ياا صاحي...عبد الرحمن عبد الله
Author: محمد المرتضى حامد
Date: 05-13-2013, 11:06 PM
Parent: #2
أنا قلبي طار من صدري ،
تقول لي ليَّلت؟
عارف يا أفورقي، صوت عبدالرحمن عبدالله دا براهو محراب منذ رويحة الهاويه يا مجافيه،
أها هسه معاها يجلي النظر ، والكلام دا كدا ما كويس بعد منتصف الليل وكان مفروض
الباشمهندس محمد عثمان يعمل تنويه خرج البوست تفاديا للسايد إفكتس بتاعت الجرعة الزائدة..
يا محمد..
جلاء النظر الصوفية الإنجليز وشيوخ الطريقة الساكسونية بيسموهو ال clairvoyance ونحن بنسميهو جنني ياخي العيون ..
زي ما قال ليك اسياسي.. ما تغيب.
|
Post: #19
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:04 PM
Parent: #3
Quote: أنا قلبي طار من صدري ،
تقول لي ليَّلت؟
عارف يا أفورقي، صوت عبدالرحمن عبدالله دا براهو محراب منذ رويحة الهاويه يا مجافيه،
أها هسه معاها يجلي النظر ، والكلام دا كدا ما كويس بعد منتصف الليل وكان مفروض
الباشمهندس محمد عثمان يعمل تنويه خرج البوست تفاديا للسايد إفكتس بتاعت الجرعة الزائدة..
يا محمد..
جلاء النظر الصوفية الإنجليز وشيوخ الطريقة الساكسونية بيسموهو ال clairvoyance ونحن بنسميهو جنني ياخي العيون ..
زي ما قال ليك اسياسي.. ما تغيب. |
ود المرتضى ياا جميل..
سلاام و تحاايا و شكلو الليله الواحد اول يوم يدخل البورد مرتاح بعد معاناه شهور
و الظاهر رفعوا الحظر عننا اخيرا...
و لو قلبك طار من صدرك يا حبيب انا كان فى بالي عندما فتحت البوست اغنيه جانى بريدو طاير و تلك الايام الجميله
و قلت فى نفسى الزول دا بيجيب لينا ود المرتضى طاير و فعلا قد كان...يااخ ليك الحق و اكثر
ما دام بلبل الغرب يمتلك هذا الصوت الجميل الطروب...
و لسه فى الكلاام بقيه..
تسلم كتير
|
Post: #4
Title: Re: يجلى النظر ياا صاحي...عبد الرحمن عبد الله
Author: elhilayla
Date: 05-13-2013, 11:17 PM
Parent: #2
أجلي النظر يا صاحي
في منظر الانسان
الطرفو نايم وصاحي
صاحي كالنعسان
وفي الضي جبينها النادي والبدر خلان
تجمع كل لطافة ورقة ونفرة الغزلان
ما بينو جسيما اللادن الكسلان
يزري الحرير الناعم والفريع اللان
وداعجة ومكحلة خلقة عظما الرحمن
بي الجمال جمال الخلقة إتوشحا الإيمان
هي في الجمال زي يوسف والوهيبة كمان
تمتاز بديسا طال وبي لهيج رمان
ومني السلام ما غنا شادن أو رطان
ومني السلام ما دنا بفارق الاقطان
يخضب بنانك حنة والوريد قيطان
والأيد رضاك يا ملكة نجلة الصلان
________
الحليلة
|
Post: #5
Title: Re: يجلى النظر ياا صاحي...عبد الرحمن عبد الله
Author: عبد اللطيف بكري أحمد
Date: 05-13-2013, 11:28 PM
Parent: #4
Quote: عارف يا أفورقي، صوت عبدالرحمن عبدالله دا براهو محراب منذ رويحة الهاويه يا مجافيه،
أها هسه معاها يجلي النظر ، والكلام دا كدا ما كويس بعد منتصف الليل وكان مفروض
الباشمهندس محمد عثمان يعمل تنويه خرج البوست تفاديا للسايد إفكتس بتاعت الجرعة الزائدة.. |
يامولانا ياحبيب يا صائد الروائع مشتاقون ياخ،،
والله لم أكترث كثيراً لكلمات الأغنية بقدرما ما اسرني هذا الصوت الشجي!!
هذا الصوت رمز للصمود مع كل المتغيرات من حوله من ناس وأشياء وحتى أشجار التبلدي (ماشاء الله تبارك الله)،،
تحية عبرك للأخ محمد عثمان وفعلاً قاعد يعسّمنا بين الفينة والاخرى ولكننا نترقب ظهوره كلما غاب!!
وتحية لدرة كردفان ومدينتي الحبيبة الأبيض بلوم الغرب صديقي عبد الرحمن عبد الله وربنا يمتعه بالصحة الدائمة
انت أفورقي لسه حي؟؟؟ هههههه
|
Post: #6
Title: Re: يجلى النظر ياا صاحي...عبد الرحمن عبد الله
Author: محمد عبد الماجد الصايم
Date: 05-14-2013, 07:07 AM
Parent: #5
البارح لمحت البوست وآخر المتداخلين محمد المرتضى حامد!
طوالي قلت ما دام محمد عثمان ومحمد المرتضى مع بعض يعني أن الجمال في أبهى حُلله!
وبينهما عبداللطيف بكري يبقى القصة جاطت شديد!!
والحليلة كمّل الباقي!!
_
شكرا ياخ لهكذا متعة!!
لأول مرة اسمع الأغنية دي بالأداء دا!!
وفعلا يجلي النظر .. وياها دي الحيشان!!
|
Post: #7
Title: Re: يجلى النظر ياا صاحي...عبد الرحمن عبد الله
Author: احمد الامين احمد
Date: 05-14-2013, 11:16 AM
Parent: #6
تحية محمد عثمان
أول مرة أسمع بلوم الغرب عبد الرحمن عبد الله يصدح بأغنية حقيبة التى تعتمد فى الأصل على قوة وجمال الصوت وقد ساعده صوته المرن المطواع على الهبوط والصعود والتذبذب عند الرمية الشجية التى أستهل بها الصدح لرائعة سيد عبدالعزيز بصورة أعادت لنا ترنمه الجميل عبر تلك الرمية التى كانت تسبق أغنيته القديمة " أبو جمال زينه" حيث يقول :
عذاب الحب يا نار
يا ضباب اشقى العمر
بالصبر داوينا الجراح
لو يداويها الصبر
كل لحظه من عمرى تمضى
وانت بتزيد يا جراح .....
إلى جانب الرميات الأخرى التي استعارها بعد عودته من غربته الأولى بليبيا من بعض أغنيات صديق احمد بلهجة الشايقيه وحولها إلى رميات تسبق غنائه بلهجة دار حامد أو حمر " بفتح الحاء والميم" رغم أن هذا أسلوب سبقه إليه داؤد في تحوير بعض أغنيات سيد عبد العزيز إلى إنشاد حر وقد تبعه اللحو فى لك ( لى نية فى قمر السما ) وقد اسهب على المك فى لك وإليه ينظر وفى النموذجين يتجلى جمال الصوت وروعه الأداء...
أغنيات بلوم الغرب الأولى بالأبيض التي يصاحبها على العزف خلالها فرقه فنون كرد فان بالات جلها وتريه تعتبر أجمل أغنيات عبد الرحمن عبد الله مع ملاحظه أن هذه الأغنيات عند نزوحه إلى دار الصباح تحديدا أم درمان ومشاركه عازفين غير عازفي فنون كرد فان وادخال بعض التحويرات الموسيقية عليها قد فسدت وتلاشى عبرها صوت بلوم الغرب وروعه أدائه ربما لان ذلك التحوير الموسيقى عليها قد ألزمه التخلي عن العزف على العود أثناء مصاحبه الاوركسترا رغم أن تجلياته عليه وارتجاله القديم أيام الأبيض هو بعض سر جمال أغنياته الأولى وهنا يتطابق مع الجابري رحمه الله .....
قف :
عبدالرحمن عبدالله صاحب أجمل صوت سودانى
|
Post: #8
Title: Re: يجلى النظر ياا صاحي...عبد الرحمن عبد الله
Author: Ahmed al Qurashi
Date: 05-14-2013, 12:01 PM
Parent: #7
شكرا عزيزي محمد عثمان على هذا الإبداع
في العام الماضي أقمت ندوة عن الحقيبة في الابيض شارركني فيها الفنان عبدالرحمن عبدالله بالعود
ومن ضمن الأغاني التي تغنى بها كاملة أغنية يجلي النظر
ولقد ابدع فيها كما أبدع في هذا التسجيل
عندي تسجيل فيديو للندوة ان شاء الله أجد الوقت والبرنامج لفصل الأغنية عن بقية الندوة
لك كل الود والتقدير لهذا التسجيل النادر
|
Post: #9
Title: Re: يجلى النظر ياا صاحي...عبد الرحمن عبد الله
Author: omer osman
Date: 05-14-2013, 12:07 PM
Parent: #8
عجيب والله ،،،
شكراً لهذا الامتاع للشاعر والمغني وصاحب البوست ،،،
|
Post: #24
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:28 PM
Parent: #9
Quote: عجيب والله ،،،
شكراً لهذا الامتاع للشاعر والمغني وصاحب البوست ،،، |
جنابو عمر عثمان...
و شكرا ليك ايضا و انت تسجل هذا الحضور الجميل...
كل الود..
|
Post: #10
Title: Re: يجلى النظر ياا صاحي...عبد الرحمن عبد الله
Author: فتحي الصديق
Date: 05-14-2013, 12:27 PM
Parent: #8
Quote: تميل تخز أحيان
تقوم تتاتي كفيلا |
يا ريت يا ود القرشي تكتب لينا النص الكامل والصحيح للقصيدة التحفة .. وبالتشكيل كمان ان أمكن .
----------------------------------------------------------
عبد الرحمن عبد الله من أجمل الأصوات الغنائية في السودان . وأداؤه الغنائي بديع واّسر .
|
Post: #11
Title: Re: يجلى النظر ياا صاحي...عبد الرحمن عبد الله
Author: فتحي الصديق
Date: 05-14-2013, 12:41 PM
Parent: #10
تقدير واجب ليك يا محمد عثمان ..
وتحية لكل الحضور ..
عشاق الجمال .
والبكايين .
الجوا
والجايين ..
|
Post: #12
Title: Re: يجلى النظر ياا صاحي...عبد الرحمن عبد الله
Author: طلحة عبدالله
Date: 05-14-2013, 12:59 PM
Parent: #11
سلام يا سيد البوست المرور Quote:
عبدالرحمن عبدالله صاحب أجمل صوت سودانى
|
حتما وقطع شك
لكن بختلف مع وجهة النظر أن التدوير الموسيقي عبر الألات أفسدت غناء بلبل الغرب
بل أعتقد أنها زادته وسامة وطربا كما في (ضابط السجن) و ( ست الفريق) و (جدي الريل) وغيرها
من الأغنيات التى يبتدرها بالرميات وذلك لأن بلبل الغرب حفظه الله يتمتع بحنجرة مرنة تساعده على التحرك و الولوج
إلى أعمق وأوسع المساحات الصوتية بما يجعله قادرا على مسايرة تعرجات ومنعرجات مختلف الالات الموسيقية ..
عبد الرحمن عبدالله أحد عباقرة الغناء الذين ظلمهم اعلام الإنطباعية والمزاجية والخيار والفقوس ولكن موهبته
التى حباه بها الله ظلت حاضرة تطرب العالمينا رغم أنف حاشية السلطان.
|
Post: #13
Title: Re: يجلى النظر ياا صاحي...عبد الرحمن عبد الله
Author: نادر النور آدم
Date: 05-14-2013, 01:20 PM
Parent: #12
شفت الجمال الوافي .. في عظيمة الشان
عييييييييييييييييييييك
مدد
مدد
|
Post: #14
Title: Re: يجلى النظر ياا صاحي...عبد الرحمن عبد الله
Author: عبد اللطيف بكري أحمد
Date: 05-14-2013, 02:09 PM
Parent: #13
Quote: تحية محمد عثمان
أول مرة أسمع بلوم الغرب عبد الرحمن عبد الله يصدح بأغنية حقيبة التى تعتمد فى الأصل على قوة وجمال الصوت وقد ساعده صوته المرن المطواع على الهبوط والصعود والتذبذب عند الرمية الشجية التى أستهل بها الصدح لرائعة سيد عبدالعزيز بصورة أعادت لنا ترنمه الجميل عبر تلك الرمية التى كانت تسبق أغنيته القديمة " أبو جمال زينه" حيث يقول :
عذاب الحب يا نار
يا ضباب اشقى العمر
بالصبر داوينا الجراح
لو يداويها الصبر
كل لحظه من عمرى تمضى
وانت بتزيد يا جراح .....
إلى جانب الرميات الأخرى التي استعارها بعد عودته من غربته الأولى بليبيا من بعض أغنيات صديق احمد بلهجة الشايقيه وحولها إلى رميات تسبق غنائه بلهجة دار حامد أو حمر " بفتح الحاء والميم" رغم أن هذا أسلوب سبقه إليه داؤد في تحوير بعض أغنيات سيد عبد العزيز إلى إنشاد حر وقد تبعه اللحو فى لك ( لى نية فى قمر السما ) وقد اسهب على المك فى لك وإليه ينظر وفى النموذجين يتجلى جمال الصوت وروعه الأداء...
أغنيات بلوم الغرب الأولى بالأبيض التي يصاحبها على العزف خلالها فرقه فنون كرد فان بالات جلها وتريه تعتبر أجمل أغنيات عبد الرحمن عبد الله مع ملاحظه أن هذه الأغنيات عند نزوحه إلى دار الصباح تحديدا أم درمان ومشاركه عازفين غير عازفي فنون كرد فان وادخال بعض التحويرات الموسيقية عليها قد فسدت وتلاشى عبرها صوت بلوم الغرب وروعه أدائه ربما لان ذلك التحوير الموسيقى عليها قد ألزمه التخلي عن العزف على العود أثناء مصاحبه الاوركسترا رغم أن تجلياته عليه وارتجاله القديم أيام الأبيض هو بعض سر جمال أغنياته الأولى وهنا يتطابق مع الجابري رحمه الله .....
قف :
عبدالرحمن عبدالله صاحب أجمل صوت سودانى
|
الحبيب ابو حميد ،،
كلامك مهيب والله ، ومحبتك صادقة وواضحة،،
كلامك جعلني أنقل هذا الكلام برمته للأخ الصديق والقريب عبد الرحمن عبد الله ،،
يشكرك كثير جداً على الملاحظات القيمة ، ويدعوك دعوة صادقة لزيارته في أقرب
زيارة لك إلى الخرطوم ، أو حضور احدي لقاءاته وحفلاته في العاصمة بعد الإضافات
التي أدخلها على موسيقاه وأدائه بالتدريب والتمرين مع وجود استوديهات التسجيل
في العاصمة بإمكانيات أفضل من ذي قبل،،
ويشكر أخي الدكتور أحمد القرشي ويغريك السلام والأخ محمد عثمان مفترع البوست
وكل الحضور الأنيق (ود الصايم وصفت ليه ضحكتك كمان ههههه)،،
|
Post: #15
Title: Re: يجلى النظر ياا صاحي...عبد الرحمن عبد الله
Author: احمد الامين احمد
Date: 05-14-2013, 02:18 PM
Parent: #14
Quote: الحبيب ابو حميد ،،
كلامك مهيب والله ، ومحبتك صادقة وواضحة،،
كلامك جعلني أنقل هذا الكلام برمته للأخ الصديق والقريب عبد الرحمن عبد الله ،،
يشكرك كثير جداً على الملاحظات القيمة ، ويدعوك دعوة صادقة لزيارته في أقرب
زيارة لك إلى الخرطوم ، أو حضور احدي لقاءاته وحفلاته في العاصمة بعد الإضافات
التي أدخلها على موسيقاه وأدائه بالتدريب والتمرين مع وجود استوديهات التسجيل
في العاصمة بإمكانيات أفضل من ذي قبل،، |
تحية وتقدير الاخ عبداللطيف وأتشرف كثيرا بالدعوة من هذا الصيدح
عسى أن البى الزيارة إن عدت للسودان لكن ياليت تكون فى (أب قبة )
وليس الخرطوم خاصة اننى سمعت هذا المغرد بعقل و وجدان طفل وصبى فى قرية كردفانية
هى المجلد حين كان يفد إليها فى فرقة فنون كردفان بمعية ناس صديق وابا وعبدالقادر وا م بلينة
ومن تلك اللحظة صوته لم يغادرنى وكلما اسمعه راهنا اشم دعاش واشوف سحب وغدران جميلة هى بيئة كردفان
التى بجمالها زينت صوت هذاالمبدع ..
شكرا لك ولمحمد عثمان الذى يجمعنا فى لحظات جميلة كهذه ..
|
Post: #27
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:40 PM
Parent: #13
Quote: شفت الجمال الوافي .. في عظيمة الشان
عييييييييييييييييييييك
مدد
مدد |
نادر ياا حبيب...
فعلا عيييك مع حور الجنه داخل الحيشان
شكرا ليك كتير...
|
Post: #16
Title: Re: يجلى النظر ياا صاحي...عبد الرحمن عبد الله
Author: محمد المرتضى حامد
Date: 05-14-2013, 02:26 PM
Parent: #12
| Quote: هذا الصوت رمز للصمود مع كل المتغيرات من حوله من ناس وأشياء وحتى أشجار التبلدي (ماشاء الله تبارك الله)،، |
افورقي سلام،
أولا: أسياسي حي،
ثانيا: ودباره دا لامِن يقول ( برييييييدك من زمان لِسَّه) يلخِّص تاريخ خلايا كل عاشق بعملية تشبه كربون 14.
ثالثا: في عملية تماثل تجربة إيفان بافلوف والفعل المنعكس الشرطي ، كلما استمع إليه أنظر للسماء لعل
هناك غيوما تنذر بمطر كردفاني موعود..
رابعا: كنت أحلم - وما زلت - بابتدار بوست عن عبدالرحمن عبدالله بعنوان ( ودبارا) وسأفعل لو مد المولى في الأجل..
الله يرحم عبدالله الكاظم يا عبداللطيف.. السهل الممتنع..
طالما إنك من دار الأبيض عايز أوسطك لزول أول إسمو دكتور أحمد القرشي عبدالرحمن مهدي لأنو ودبارا
هيمسلف ( كما يقول ود الصايم) سلمه أمانه لي وأخبرني عنها من تلفون ودالقرشي زاتو لكن إنت عارف..
الله يغفر ليو ذنوبو ويجازي الظلموني.
|
Post: #17
Title: Re: يجلى النظر ياا صاحي...عبد الرحمن عبد الله
Author: عبد اللطيف بكري أحمد
Date: 05-14-2013, 03:22 PM
Parent: #16
Quote: افورقي سلام،
وعليكم السلام ياحبيب
أولا: أسياسي حي،
ههههههه، الحمد لله ، بس ياريت مايقولو الشبيه الفقير يموت أول وأنا أروح في الكرعين
ثانيا: ودباره دا لامِن يقول ( برييييييدك من زمان لِسَّه) يلخِّص تاريخ خلايا كل عاشق بعملية تشبه كربون 14.
ياسلام والله ، نشأنا على أنغام هذا العملاق ، وهو في الحقيقة من جذب إلينا الرائعين ذواقي الفن الأصيل، فعبد الرحمن محافظ
على وزنة واحدة من التجويد والاعتزاز بفنه وإحترام جمهوره ،، حدثني اليوم عن تزايد جماهيريته في العاصمة
بشكل ملحوظ وقالها بكل تواضع أن الجمهور يجلس في القاعة (لآخر قطرة) ويصر على طلب المزيد ،، أذكر من زمانأنو عبد الرحمن عبد الله هو الفنان الوحيد البيطلع من الحفلة والجمهور كامل العدد على كراسيه!!
ثالثا: في عملية تماثل تجربة إيفان بافلوف والفعل المنعكس الشرطي ، كلما استمع إليه أنظر للسماء لعل
هناك غيوما تنذر بمطر كردفاني موعود..
ههههههه ، أما نحن فأجراس عمنا بافلوف تدق في آذاننا وتبعاتها تنساب كلما غنى : شوف جمال بت بارا وحلاتا!!
رابعا: كنت أحلم - وما زلت - بابتدار بوست عن عبدالرحمن عبدالله بعنوان ( ودبارا) وسأفعل لو مد المولى في الأجل..
الله يرحم عبدالله الكاظم يا عبداللطيف.. السهل الممتنع..
طالما إنك من دار الأبيض عايز أوسطك لزول أول إسمو دكتور أحمد القرشي عبدالرحمن مهدي لأنو ودبارا
هيمسلف ( كما يقول ود الصايم) سلمه أمانه لي وأخبرني عنها من تلفون ودالقرشي زاتو لكن إنت عارف..
الله يغفر ليو ذنوبو ويجازي الظلموني
بس في دي صعبتها علي شديد خلاص ، أنا أتوسط ليك وأنت أقرب إليه مني؟؟ هههه ، لكن لا راد لطلبك:
Dr Ahmed, Do you speak English? x
طيب ياخي أدي الراجل أمانتو ولا أقسم لينا منها ينوبك ثواب !!!
|
|
Post: #26
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:36 PM
Parent: #12
Quote: سلام يا سيد البوست المرور
Quote:
عبدالرحمن عبدالله صاحب أجمل صوت سودانى
حتما وقطع شك
لكن بختلف مع وجهة النظر أن التدوير الموسيقي عبر الألات أفسدت غناء بلبل الغرب
بل أعتقد أنها زادته وسامة وطربا كما في (ضابط السجن) و ( ست الفريق) و (جدي الريل) وغيرها
من الأغنيات التى يبتدرها بالرميات وذلك لأن بلبل الغرب حفظه الله يتمتع بحنجرة مرنة تساعده على التحرك و الولوج
إلى أعمق وأوسع المساحات الصوتية بما يجعله قادرا على مسايرة تعرجات ومنعرجات مختلف الالات الموسيقية ..
عبد الرحمن عبدالله أحد عباقرة الغناء الذين ظلمهم اعلام الإنطباعية والمزاجية والخيار والفقوس ولكن موهبته
التى حباه بها الله ظلت حاضرة تطرب العالمينا رغم أنف حاشية السلطان. |
طلحه صاحب البوستات الجميله و المشاكسه احيانا
يشهد الله متابعك و متابع بوستاتك كلها...
شكرا ليك كتير و انت حضورا هنا...و ما قلت الا الحقيقه فى حق هذا الفنان الجميل
تسلم...
|
Post: #25
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:32 PM
Parent: #11
Quote: تقدير واجب ليك يا محمد عثمان ..
وتحية لكل الحضور ..
عشاق الجمال .
والبكايين .
الجوا
والجايين .. |
فتحي يا الصديق ..
و تحايا و تقدير لك انت ايضا
و شكرا على زياده جوقه البكايين...
تسلم كتير..
|
Post: #23
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:24 PM
Parent: #8
Quote: شكرا عزيزي محمد عثمان على هذا الإبداع
في العام الماضي أقمت ندوة عن الحقيبة في الابيض شارركني فيها الفنان عبدالرحمن عبدالله بالعود
ومن ضمن الأغاني التي تغنى بها كاملة أغنية يجلي النظر
ولقد ابدع فيها كما أبدع في هذا التسجيل
عندي تسجيل فيديو للندوة ان شاء الله أجد الوقت والبرنامج لفصل الأغنية عن بقية الندوة
لك كل الود والتقدير لهذا التسجيل النادر |
دكتور ود القرشى...
يسعد مسااك بالف خير
شكرا ليك و انت حضورا هنا و شوقتنا لمشاهده فيديو الندوه
و فى الانتظاار يا حبيب...
يديك العاافيه...
|
Post: #22
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:20 PM
Parent: #7
Quote: تحية محمد عثمان
أول مرة أسمع بلوم الغرب عبد الرحمن عبد الله يصدح بأغنية حقيبة التى تعتمد فى الأصل على قوة وجمال الصوت وقد ساعده صوته المرن المطواع على الهبوط والصعود والتذبذب عند الرمية الشجية التى أستهل بها الصدح لرائعة سيد عبدالعزيز بصورة أعادت لنا ترنمه الجميل عبر تلك الرمية التى كانت تسبق أغنيته القديمة " أبو جمال زينه" حيث يقول :
عذاب الحب يا نار
يا ضباب اشقى العمر
بالصبر داوينا الجراح
لو يداويها الصبر
كل لحظه من عمرى تمضى
وانت بتزيد يا جراح .....
إلى جانب الرميات الأخرى التي استعارها بعد عودته من غربته الأولى بليبيا من بعض أغنيات صديق احمد بلهجة الشايقيه وحولها إلى رميات تسبق غنائه بلهجة دار حامد أو حمر " بفتح الحاء والميم" رغم أن هذا أسلوب سبقه إليه داؤد في تحوير بعض أغنيات سيد عبد العزيز إلى إنشاد حر وقد تبعه اللحو فى لك ( لى نية فى قمر السما ) وقد اسهب على المك فى لك وإليه ينظر وفى النموذجين يتجلى جمال الصوت وروعه الأداء...
أغنيات بلوم الغرب الأولى بالأبيض التي يصاحبها على العزف خلالها فرقه فنون كرد فان بالات جلها وتريه تعتبر أجمل أغنيات عبد الرحمن عبد الله مع ملاحظه أن هذه الأغنيات عند نزوحه إلى دار الصباح تحديدا أم درمان ومشاركه عازفين غير عازفي فنون كرد فان وادخال بعض التحويرات الموسيقية عليها قد فسدت وتلاشى عبرها صوت بلوم الغرب وروعه أدائه ربما لان ذلك التحوير الموسيقى عليها قد ألزمه التخلي عن العزف على العود أثناء مصاحبه الاوركسترا رغم أن تجلياته عليه وارتجاله القديم أيام الأبيض هو بعض سر جمال أغنياته الأولى وهنا يتطابق مع الجابري رحمه الله .....
قف :
عبدالرحمن عبدالله صاحب أجمل صوت سودانى |
استاذ احمد...
سلاام و تحاايا كتاار يااخ
عندما قررت فتح البوست توقعتك حضورا هنا و لم يخيب ظنى
شكرا ليك كتير و انت تسوح بنا كما عودتنا فى تاريخ جميل و بدايات هذا الفنان صااحب الصوت المتفرد..
اوعدك ببوست منفصل لاغنيات بلبل الغرب ليكتمل هذا الحكى الجميل..
يديك العاافيه....
|
Post: #21
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:13 PM
Parent: #6
Quote: البارح لمحت البوست وآخر المتداخلين محمد المرتضى حامد!
طوالي قلت ما دام محمد عثمان ومحمد المرتضى مع بعض يعني أن الجمال في أبهى حُلله!
وبينهما عبداللطيف بكري يبقى القصة جاطت شديد!!
والحليلة كمّل الباقي!!
_
شكرا ياخ لهكذا متعة!!
لأول مرة اسمع الأغنية دي بالأداء دا!!
وفعلا يجلي النظر .. وياها دي الحيشان!! |
ابو احميد ياا جميل...
ياخ من ديك و عييك و يا حليل تلك الاياااام
فعلا عبد الرحمن عبد الله وضع نفسه و بصمته فى اداء هذه الاغنيه
و اكيد ساعده صوته الجميل طلوعا و نزولا...
شكرا ليك كتير و لك كل الاستماع و الاستمتاع الجميل...
|
Post: #20
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 11:08 PM
Parent: #4
Quote: أجلي النظر يا صاحي
في منظر الانسان
الطرفو نايم وصاحي
صاحي كالنعسان
وفي الضي جبينها النادي والبدر خلان
تجمع كل لطافة ورقة ونفرة الغزلان
ما بينو جسيما اللادن الكسلان
يزري الحرير الناعم والفريع اللان
وداعجة ومكحلة خلقة عظما الرحمن
بي الجمال جمال الخلقة إتوشحا الإيمان
هي في الجمال زي يوسف والوهيبة كمان
تمتاز بديسا طال وبي لهيج رمان
ومني السلام ما غنا شادن أو رطان
ومني السلام ما دنا بفارق الاقطان
يخضب بنانك حنة والوريد قيطان
والأيد رضاك يا ملكة نجلة الصلان |
يا الحليلة يا اخوى ربنا يديك العاافيه و شكرا كتير على اضافه كلمات
الاغنيه فى البوست...
سلمت من كل شر...
|
Post: #18
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-16-2013, 10:47 PM
Parent: #2
Quote: مدهش انت
بتجيب الحاجات دي من وين؟؟
وبعدين انت بتمشي وين؟
وبالقطارة ليه ياخ؟؟؟
انتظرك من يومك الجبت لينا ( إنت ليه سهرت عيني)
فماتنوم بالله |
حبيبنا عبد اللطيف...
يسعد مساك بالف خير
خلاص طوالى معااكم بعد كدا...شكلو مشاكل الدخول اتحلت اخيرا
يديك العاافيه...
|
Post: #28
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-17-2013, 02:41 PM
Parent: #18
Quote: عبدالرحيم تاج الدين · Khartoum, Sudan
ودبارا ابداع مابعده ابداع واليعرفه انسان متواضع جدا حبوب ويعاب عليه بعد ان امن الله عليه بالصحه له اكتر من سنتين مستقر بالابيض المفروض يتحفنا اكتر بتراث الكردفاني الملئ |
شكرا ليك اخ عبد الرحيم...
|
Post: #29
Title: Re: يجلى النظر ياا صاحي...عبد الرحمن عبد الله
Author: احمد الامين احمد
Date: 05-17-2013, 02:59 PM
Parent: #28
| Quote: اوعدك ببوست منفصل لاغنيات بلبل الغرب ليكتمل هذا الحكى الجميل.. |
تحية باشمهندس أنتظر مع السميعة بصبر بالغ البوست عسى أن يغسل من أذنى الغناء القبيح الذى اسمعه كثيرا
عبر الفضائيات ...
حبذا لو تضمن بوستك الموعود تضمين أغنيات محمد وردى يتغنى بهما كثيرا عبدالرحمن عبدالله وهما :
1- نور العين (بغنيها أحسن من وردى ومحمد اللمين مجتمعين ) وقد ذكر معاوية يس فى مقال سنة 1987 بمجلة الدستور أن عبدالرحمن عبدالله قد فاز بجائزة فى يوم الاباء بمدرسة بمدينة بارا حين صدح بأغنية وردى (نور العين ) وهو فى المرحلة الوسطى ...
2- أغنية الطاهر ووردى (حرمت الحب والريدة ) وقد سمعتها بصوت عبدالرحمن عبدالله فى تسجيل تلفزيونى قديم ومن لحظتها حلفت تانى ما اسمعها بصوت محمد وردى ..
معاوية يس كتب قديما أن عبدالرحمن عبدالله تاثر كثيرا بوردى فى بداياته لكن جمعة جابر نصحه أن يخرج من شخصية وردى كى يتمكن من شق طريقه بقوة وحرية وقد فعل رغم ذلك أثر وردى بالغ فى صوت هذا البلبل...
قف!
عبدالرحمن عبدالله ربما يكون الفنان السودانى الوحيد الذى بعثت له (هنا ام درمان )رسالة كى يأتى لتسجيل اغنياته دون المرور بلجنة صوت
وقد تم إدراجه مباشرة (فنان درجة اولى ) ذاك فى عصر ناس عثمان حسين ، الشفيع ، التاج ،داؤود و وردى واحمد المصطفى ...
كلما جلبت يامحمد اغنيات لهذا الصوت من تسجيلات أقدم يكون أفضل
|
Post: #30
Title: Re: يجلى النظر ياا صاحي...عبد الرحمن عبد الله
Author: Ahmed al Qurashi
Date: 05-17-2013, 03:15 PM
Parent: #29
| Quote: يا ريت يا ود القرشي تكتب لينا النص الكامل والصحيح للقصيدة التحفة .. وبالتشكيل كمان ان أمكن |
الأخ العزيز / فتجي الصديق
سلامات
إليك النص كاملا كما ورد في ديوان ليالي زمان
يجلي النظر
كلمات الشاعر / سيد عبدالعزيز
لحن وغناء / الحاج محمد سرور
يجلي النظر يا صاحي في منظر الانسان.... الطرفو نايم وصاحي صاحي كالنعسان
******
في الضي جبينها النادي والبدر خلان....تجمع لطاف وعفه ونفرة الغزلان
مابين أنوجسيمها اللادن الكسلان ..... يزري الحرير الناعم والفريع اللان
*******
دعجه ومكحله خلقه عظمها الرحمن .... بكمال جمال الخلقه ووشحها الإيمان
هي في الجمال زي يوسف والوهيبه كمان ... تمتاز بديس طال وبي نهيد رمان
*******
جذب المناظر منا منظرها الفتان .... حين جات تميس تتخنتل وشفنها فيها البان
بدري وغمامه ودميه في فريع البان .... وردفا يتب بدروعه والقديم غلبان
*********
من دون مرور النسمه أم قوام نديان ..... تجي في الدروع منقسمه تميل تخد أحيان
تقدل تتاتي كفيلها ويلعب الطغيان ...... وتبرع المتبرع وبالخمـــــر نديان
******
أنا قلبي طار من صدري يا صديقي عشان ....شوفت حور الجنة داخل الحيشان
شوفت العيون بتقهقر ضابط النيشان .... شوفت الجمال الوافر في جليلة الشأن
******
مقسم يمين يا بنيه الهلاك لي هان .......... ذرفت دموع عيني والفؤاد ولهان
أنا في الخلوق ما علي الراضي والكرهان ....لو كان وهبتي لي نظره يا أم دلهان
********
إنت نور الدنيا الضاوي ليه زمان ..... انت وهبك ربك تاج بهاء الأزمان
انت آمنة خدرك وبهجة أم درمان ...... انت انت مناي اللي مخافي أمان
********
ليك مني السلام ما غنى شادن لو رطان ....ليك مني السلام ما حن بفارق الاقطان
يخضب بنانك حنة وللوريد قيطان .....وأنال رضاك يا الملكة يا الأبوك سلطان
|
Post: #33
Title: Re: يجلى النظر ياا صاحي...عبد الرحمن عبد الله
Author: Gaafar Ismail
Date: 05-18-2013, 03:38 AM
Parent: #30
يا سلام عليك يا باشمهندس محمد عثمان
دائما مدهش
عندما تجد مولانا محمد المرتضى وعبداللطيف بكري واحمد الأمين احمد ، تجد الجمال والروائع.
يديكم العافية ويسلم ذوقكم الرفيع
تحياتي ووافر احترامي
|
Post: #34
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-18-2013, 06:48 PM
Parent: #33
Quote: يا سلام عليك يا باشمهندس محمد عثمان
دائما مدهش
عندما تجد مولانا محمد المرتضى وعبداللطيف بكري واحمد الأمين احمد ، تجد الجمال والروائع.
يديكم العافية ويسلم ذوقكم الرفيع
تحياتي ووافر احترامي |
الجميل جعفر...
حضورك دايما يسعدنا و يفرحنا و انت واحد من الكوكبه الرائعه
التى ذكرتها فى مداخلتك الفوق...
سلمت من كل شر...
|
Post: #31
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-17-2013, 03:22 PM
Parent: #29
Quote: تحية باشمهندس أنتظر مع السميعة بصبر بالغ البوست عسى أن يغسل من أذنى الغناء القبيح الذى اسمعه كثيرا
عبر الفضائيات ...
حبذا لو تضمن بوستك الموعود تضمين أغنيات محمد وردى يتغنى بهما كثيرا عبدالرحمن عبدالله وهما :
1- نور العين (بغنيها أحسن من وردى ومحمد اللمين مجتمعين ) وقد ذكر معاوية يس فى مقال سنة 1987 بمجلة الدستور أن عبدالرحمن عبدالله قد فاز بجائزة فى يوم الاباء بمدرسة بمدينة بارا حين صدح بأغنية وردى (نور العين ) وهو فى المرحلة الوسطى ...
2- أغنية الطاهر ووردى (حرمت الحب والريدة ) وقد سمعتها بصوت عبدالرحمن عبدالله فى تسجيل تلفزيونى قديم ومن لحظتها حلفت تانى ما اسمعها بصوت محمد وردى ..
معاوية يس كتب قديما أن عبدالرحمن عبدالله تاثر كثيرا بوردى فى بداياته لكن جمعة جابر نصحه أن يخرج من شخصية وردى كى يتمكن من شق طريقه بقوة وحرية وقد فعل رغم ذلك أثر وردى بالغ فى صوت هذا البلبل...
قف!
عبدالرحمن عبدالله ربما يكون الفنان السودانى الوحيد الذى بعثت له (هنا ام درمان )رسالة كى يأتى لتسجيل اغنياته دون المرور بلجنة صوت
وقد تم إدراجه مباشرة (فنان درجة اولى ) ذاك فى عصر ناس عثمان حسين ، الشفيع ، التاج ،داؤود و وردى واحمد المصطفى ...
كلما جلبت يامحمد اغنيات لهذا الصوت من تسجيلات أقدم يكون أفضل |
الاستاذ احمد...
جمعه مباركه علينا و عليكم
بلبل الغرب مافى شك لفت الانظار حال ظهوره و لم يحتاج لوقت طويل ليكون فنانا معروفا لدى الجميع
و اكيد كل هذا يكمن فى تفرد صوته و ادائه الجميل فهو اخلص لفنه و لم يقدم ابدا الغث من الاغنياات
بل بدا كبيرا من البدايه و كما ذكرت فى مداخلتك الفوق فلقد تمت ترقيته و هو بالاقاليم و هذا لم يحدث
لفنان غيره و كما معروف عنه انه رفض الحضور للعاصمه رغم المحاولات الكثيره و لكنه اثر ان يقدم جميل
اغنيااته و فنه للجميع و هو فى الابيض..
كلما اسمع وردى اتذكر الفنان عبدرحمن عبد الله و فنان الطمبور صديق احمد و الفنان الراحل وردى كان معجب
بالاثنين معا و لقد ذكر ذلك كتيره ف مقابلاته الصحفيه... و كما ذكرت انت ايضا فى مداخله سابقه ان الفنان
عبد الرحمن عبد الله اختار واحده من اغنيات صديق احمد لتكون بمثابه الرميه فى واحده من اغنياته و هى الاغنيه
المشهوره للشاعر الراحل عبد الله محمد خير( خلهن سوا لا تفرقن) و الذى اغترب فى المملكه العربيه السعوديه بمدينه الرياض
و لقد عاصره فى الغربه فى تلك الفتره الفنان عبد الرحمن عبد الله و وقتها كان يعانى من الام الغضروف و الظهر التى تعافى منها اخيرا
بعون الله...
بحاول اجهز البوست ان شاء الله رغما عن المشغوليات الكثيره لنسمع الجميل من اغنياات الفنان الجميل عبد الرحمن عبد الله
شكرا ليك كتير...
|
Post: #32
Title: Re: يجلى النظر ياا صاحي...عبد الرحمن عبد الله
Author: محمد عثمان
Date: 05-17-2013, 03:47 PM
Parent: #31
طالما فتحنا صفحه جديده نسمع تانى للفنان عبد الرحمن عبدالله
فى واحده من اغنياته الجميله...
ودى الشوق لديارهم...و غنى بحنيه
|
Post: #35
Title: Re: يجلى النظر ياا صاحي...عبد الرحمن عبد الله
Author: Ahmed al Qurashi
Date: 05-20-2013, 06:50 PM
Parent: #32
Quote:
طيب ياخي أدي الراجل أمانتو ولا أقسم لينا منها ينوبك ثواب !!! |
عزيزي عبداللطيف الفنان عبدالرحمن عبدالله اداني كاسيت لمرتضى
ومرتضى سيارته فيها سي دي فقط ، وما عنده مسجل في البيت كلها حاجات حديثه
يعني يشغل الكاسيت دا وين ؟
مودتي
|
Post: #36
Title: Re: يجلى النظر ياا صاحي...عبد الرحمن عبد الله
Author: محمد المرتضى حامد
Date: 05-20-2013, 08:13 PM
Parent: #35
Quote: عزيزي عبداللطيف الفنان عبدالرحمن عبدالله اداني كاسيت لمرتضى
ومرتضى سيارته فيها سي دي فقط ، وما عنده مسجل في البيت كلها حاجات حديثه
يعني يشغل الكاسيت دا وين ؟ |
والله قصص..
إنت يا مقنع الكاشفات كان عندك 3000 شريط غناوي وقلبتهن سيديهات..
شريطي دا شريط وكيل عريف ؟..
|
|