Post: #1 Title: نغيم من الطنبور..! Author: محمد عثمان Date: 10-03-2008, 11:21 PM
سماح ناساً حلاة ناساً بلا السكر طعم قراصه في قدحاً من الدبكر كواريك شفع المغرب يقلبوا في الجمر قنقر ولاد بلدي نقاقيرن طنابيرن جبابيدن سنانيرن وافوت يا ناسي في دربي أقول يا أهلى وا غلبي خلاص ريدكن ملك قلبي منو الغيركن بشيل حبي تراب بلدي بنات بلدي ولاد بلدي...
Post: #2 Title: Re: نغيم من الطنبور..! Author: سلمى الشيخ سلامة Date: 10-04-2008, 00:52 AM Parent: #1
طعم قراصه في قدحاً من الدبكر كواريك شفع المغرب يقلبوا في الجمر قنقر
الله يا محمد عثمان الاغنية دى بتذكرنى صحبى السمح محمد صالح كان سواقنا فى الاذاعة من يقفل باب العربية لامن (اندلى ) فى بيتنا هو يغنى ومحمد جبارة يشهق بالغنا الحق لله حبيت الاغنية دى من الزمن داك ولليلى ما خليت حبها يطير واندق اها لمن محمد جبارة يقول المقطع دا محمد صالح يطير ويندق ويقرب يبكى ويبكينى معاهو عارف اول من رجعت البلد مشيت (لاعن محمد صالح) واتقالدنا واتباكينا (زينتى ) ومشينا مشوار لفردتنا التالته نجاة كبيدة واااامرى ما لقيناها كنا ناويين نسوى الفوت (عل يا محمد اخوى الله ما هون) وحات الله لامن اسمع ودجبارة حالى ببقى حال اريت ربى يغتيهو ويزيدو من نعيمو ودافى الصوت ويديك كل العافية
Post: #3 Title: Re: نغيم من الطنبور..! Author: dabeep Date: 10-04-2008, 01:37 AM Parent: #2
العزيز محمد عثمان
قاعد تبالغ و قاعد تباغت
محمد جبارة .. ... محمد جبارة
اوداع الناس افوت مجبور اجينى نغيم من الطمبور واشوفلي جيني وقف صفق ينط لي فوق يطير يندق واطير واندق وادقنر فوق تراب اهلي اخم بي ايدى فى رحلي
سلمى الشيخ سلامة كل سنة وانت طيبة ومحمد عثمان طيب
جبابيدون سنانيرون .............
خالص الود
Post: #7 Title: Re: نغيم من الطنبور..! Author: محمد عثمان Date: 10-04-2008, 08:12 AM Parent: #3
ود جبارة يثير الشجون و يتاور الحنين للبلد الجميل...اغنية فيها ريحة التراب و صوت النيل الجميل و تفااصيل الشمال و الحياة الجميلة هنااك...
شكرا ليك و انت فى حضرة ود جبارة...
يديك العاافية...
Post: #15 Title: Re: نغيم من الطنبور..! Author: سلمى الشيخ سلامة Date: 10-04-2008, 10:51 PM Parent: #3
dabeep تسلم ويسلم شبابك وكل سنه وانت طيب ويديك الفى مرادك وشكرا للعيدية ولمحمد عثمان طبعا محمد عثمان البعض ينطقها محمد عصمان والاخر عتمان
ونحن نحب ان نناديه محمد عثمان لانه يجمعنا على المودة والغناء الجميل
Post: #4 Title: Re: نغيم من الطنبور..! Author: baha eassa Date: 10-04-2008, 01:51 AM Parent: #2
اخي الرائع محمد عثمان .. .. جيت تلوت الليل تصحي فينا الشجن البيطير النوم .. انها الروعة المكتوبة او المغناء .. ومع الصوت الشجي .. يضيع كل وعي فينا .. شكرا لك وعيد سعيد
سكت روح نويرة الفرقة جوة الجوف تسوي البق؟؟ مشيت لازاد اشيلو معاي زلا زولا معاه اترفق ؟؟
Post: #8 Title: Re: نغيم من الطنبور..! Author: محمد عثمان Date: 10-04-2008, 08:38 AM Parent: #4
تلوت الليل و الغناء الثمين النابع من الوجدان و من انفعالات حقيقة الذى يدقدق نحاس الاحزان و يثير المشاااعر..
الشاعر السر عثمان الطيب استطاع لن ينقل صورة حقيقية لحاله و هو بعيد الوطن لتعبر عن احساسات الكثيرين منا و الجميع فى شوق لتراب الوطن الجميل...
شكرا ليك و تلوت الليل دايما ما تثير الشجون و تجتر ذكرياات اياام خلت...
يديك العاافية...
Post: #6 Title: Re: نغيم من الطنبور..! Author: محمد عثمان Date: 10-04-2008, 07:52 AM Parent: #2
الحبيبة سلمى...
كل سنة و انت طيبة و عيد مبارك علينا عليكم...
ذكرياات الغناء الجميل دايما تجتر الكثير من الاحداث و المواقف التى ارتبطت دايما باغنيات بعينها..محمد جبارة نغم حنين و صوت متفرد رضع من النيل النقى ينقلك دايما الى عواالم بعيدة عندما يغنى و من من الشعب السودانى لا يعرف قايمى الصبااح متكفلتى و شايلة الحليلة على المراح...
اذكر ايضا اغنيته التى لم تبارحنى منذ الطفولة والتى كنا نسمعها فى اليوم عشرمائة مرة اغنية بت البلد و التى كانت دراما و قصة فى اغنية ابدع فى تصويرها الشاعر المبدع السر عثمان الطيب..
ود جبارة و الشاعر السر عثمان الطيب كونا ثنائى افرد الكثير من الاعمال و الاغنيات الجميلة و التى كونت مرحلة مهمة فى مسيرة غناء الطنبور الذى اصبح غناء السودان كله..
التحية لشاعر هذه الاغنية الشاعر السر عثمان الطيب و التحية لك اخت سلمى و شكرا للمداخلة التى تحكى عن مااضى و ذكرياات جميلة...
يديك العاافية...
Post: #19 Title: Re: نغيم من الطنبور..! Author: عثمان دغيس Date: 10-05-2008, 11:37 PM Parent: #2
Quote: طعم قراصه في قدحاً من الدبكر كواريك شفع المغرب يقلبوا في الجمر قنقر
الله يا محمد عثمان الاغنية دى بتذكرنى صحبى السمح محمد صالح كان سواقنا فى الاذاعة من يقفل باب العربية لامن (اندلى ) فى بيتنا هو يغنى ومحمد جبارة يشهق بالغنا الحق لله حبيت الاغنية دى من الزمن داك
سلمى الشيخ .. محمد صالح الخضر ده إبن عمتي ...! تشكر يا محمد عثمان على هذا الإبداع وعلى هذه الإلتفاته الحنينة لهذا الضرب من الفنون الراقية الصادقة ... ألحقنا بي ( يمه ) لو عندك .. خلينا نتم بكيتنا دي زيييييييييين ما دام مافي زولا شايفنا بلا الكي بورد الأصم ده ,.,..,,!
Post: #20 Title: Re: نغيم من الطنبور..! Author: محمد عثمان Date: 10-06-2008, 00:11 AM Parent: #19
الاخ عثمان...
يا زول كل سنة و انت طيب فعلا اغنية تثير الشجون...و سلمى بتنكت حاجات جميلة كعادتها فى ذكرياتها مع الاغنياات...
يديك العاافية...و اغنية يمة تحت
اضغط للاستماع لاغنية يمه
Post: #5 Title: Re: نغيم من الطنبور..! Author: حسن الطيب يس Date: 10-04-2008, 02:58 AM Parent: #1
العزيز محمد عثمان كل سنة و إنت طيب أوادع الناس و فوت مجبور يجيني نغيم من الطنبور الواحد لما يسمع هذة الاغنية الواحد بدون ما يشعر يلقي الفكر راح بعيد و دمع سال و شريط الذكريات مرة سريع اقالد فية سماحة ناس بلا السكر و الايام الحلوة معاهم يا حايلي البقيت بعيد منكم شكرا محمد
Post: #9 Title: Re: نغيم من الطنبور..! Author: محمد عثمان Date: 10-04-2008, 05:39 PM Parent: #5
Quote: العزيز محمد عثمان كل سنة و إنت طيب أوادع الناس و فوت مجبور يجيني نغيم من الطنبور الواحد لما يسمع هذة الاغنية الواحد بدون ما يشعر يلقي الفكر راح بعيد و دمع سال و شريط الذكريات مرة سريع اقالد فية سماحة ناس بلا السكر و الايام الحلوة معاهم يا حايلي البقيت بعيد منكم شكرا محمد
الاخ حسن الطيب..
يا زول كل سنة و انت طيب و ربنا يحقق الاماانى...
الغناء السمح يعيد الذكريااات و تفااصيل جميلة دايما مخزونة فى الذااكرة الاغنية بريحة تراب البلد الجميل و ناسه السمحين بالتفااصيل الاصيلة..
شكرا ليك كتير و ربنا يعيد الاياام الحلوة..
يديك العاافية...
Post: #10 Title: Re: نغيم من الطنبور..! Author: محمد عثمان Date: 10-04-2008, 09:58 PM Parent: #9
مغستي رحل تلوت الليل شقاوتي رحل تلوت الليل مسالكي ضلمه ما بتنشق سكت روح نويرة الفرقة جوة الجوف تسوي البق مشيت لا زاد أشيلو معاي ولا زولاً معا اترفق لما بقيت مفارق الدار نجيم الليل مشي إتفرق بكيت و بكيت طريف العين متمسح و بالدموع رقرق اسوى الوووب نحاس احزانى جوه قليبى ينقر دق يلوعنى يوهدبنى و اخاف من المصير اشفق اوادع الناس افوت مجبور يجيني نغيم من الطنبور اشوفلي جني وقف صفق ينط لا فوق يطير يندق واطير واندق وادنقر فوق تراب بلدي أخم بي إيدي في رحلي اقول يا ليل افارق الدار اجر فوق الوداع مسدار ادخل إيدي في رحلي تراباً فيهو تسوى الكون تراب اهلى..تراب اهلى بشم طيبة اهلي منو تفوح ترد الروح عويناتن تلوح وتلوح انين الساقي لما تنوح حسيس البربخ المفتوح عراريقن طواقيهن طواريهن سواقيهن واشيل من زادي واتكرف واشوف فيك يا تراب اهلى الحنين المابي يتوصف اشوف فيك صورة ماب تنشاف واشم ريحة الكُليت والشاف بنات بلدي... بنات بلدي رقيصاتن... شبابيلن طريحاتن... مناديلن سماح ناساً حلاة ناساً بلا السكر طعم قراصه في قدحاً من الدبكر كواريك شفع المغرب يقلبوا في الجمر قنقر ولاد بلدي يا ناس... ولاد بلدى جبابيدن سنانيرن نقاقيرن طنابيرن وافوت يا ناسي في دربي أقول يا أهلى واغلبي خلاص ريدكن ملك قلبي منو الغيركن بشيل حبي...
عاد آآآموحمد عثمان هسي انا اسويلك شنو اقعد اعوعي عند بوستيك دة ولا اجوعر هني لامن افطس
الله بيسألني ماني عافيلك ضُمة ضُمة
ألحقني بي لنك الحفظ
تليشة: سلمى بت ناس الشيخ وحاتك الاغنية كنت بشغلها في قطر كريمة وكتين اكون راجع من البركل للخرطوم يمين القمري ألت القطر كلها تصن وتسمع في النحنيح ... وزين الصوت آآآجنى
Post: #13 Title: Re: نغيم من الطنبور..! Author: محمد عثمان Date: 10-04-2008, 10:34 PM Parent: #11
Quote: عاد آآآموحمد عثمان هسي انا اسويلك شنو اقعد اعوعي عند بوستيك دة ولا اجوعر هني لامن افطس
الله بيسألني ماني عافيلك ضُمة ضُمة
ألحقني بي لنك الحفظ
الحبيب طارق...
يا زول كل سنة و انت طيب و بعدين انت قاعد وين..؟؟ نحن نعوعى من امبارخ بهنا..!! و يا حليل اياام قطر كريمة و حكاياته التى لا تخلص..ايااااام..!!
والله يا محمد عفيتلك انا يا اخوي قاعد جنب فاس الما وراها ناس (الرباط-المغرب) ياخي كل سنة وانت طيب
Post: #14 Title: Re: نغيم من الطنبور..! Author: سلمى الشيخ سلامة Date: 10-04-2008, 10:46 PM Parent: #11
Quote: سلمى بت ناس الشيخ وحاتك الاغنية كنت بشغلها في قطر كريمة وكتين اكون راجع من البركل للخرطوم يمين القمري ألت القطر كلها تصن وتسمع في النحنيح ... وزين الصوت آآآجنى
هى لكن ا طارق اخوى البكا ماالسبيل الوحيد لمن تسمع محمد جبارة ايمان رحمن يا العشا ولا بندسها دميعاتنا والرهيفة التنقد المتل محمد جبارة يبكى الصخرة الله يحفظو ويطول لينا فى عمره وحكمة الله يا طارق اخوى مانى شايقية ولا شيتن كدى الا غنا الشايقية دا تقول (كاتببنا) بيتنا كلو بموت فى جنس الغنا دا نقول (الحكايى) دى من شنو اربى؟ ارجح انها من خالتى مريم الشايقية وهى امراة من اجمل نساء الكون اللاتى شهدتهن لها ملامح كل نساء الدنيا الفاتنات داخلها انقى من ماء زلازل ووجهها صبوح وصوتها خافت حتى انك لتود ان تصرخ فيها على صوتك يالسمحة لكنها رغم تقدم السن لدنها لكنها تحب الغناء وتبتسم فى مرح حين تلوح اصوات الغناء فائحة من الراديو حاملة عبق محمد جبارة او محمد كرم الله لعلنا تعلمنا منها تلك الخاصية ان نستمع لغناء الشايقية لكم اشتاق ايام العيش فى السكة الحديد حيث جاراتنا الشايقيات يعلمننا الحياة والدنقلاويات وباختصار كل تلك الدواخل النقية فى البيوت المتلاصقة والقلوب التى لا تقل التصاقا شكرا لمحمد عثمان ان اتاح لنا هذا الحديث
Post: #26 Title: Re: نغيم من الطنبور..! Author: محمد عثمان Date: 11-10-2008, 09:52 PM Parent: #21
Quote: سلامات
وتحايا
و
سوداانية...
تحايا و سلاااام
شكرا للطلة..بعد غيبة
Post: #22 Title: Re: نغيم من الطنبور..! Author: osman righeem Date: 11-10-2008, 00:28 AM Parent: #1
حتي في بيوت احزانا نفتح لي افراحنا طاقه
تسلم محمد
Post: #27 Title: Re: نغيم من الطنبور..! Author: محمد عثمان Date: 11-10-2008, 10:16 PM Parent: #22
Quote: حتي في بيوت احزانا نفتح لي افراحنا طاقه
تسلم محمد
الاخ عثمان...
جعلها الله اخر احزانكم...
لك التحية و التقدير...
Post: #23 Title: Re: نغيم من الطنبور..! Author: yasiko Date: 11-10-2008, 01:59 AM Parent: #1
الأستاذ محمد عثمان سلام "الصمت في حرم الجمال جمال" لا تعليق جاء ابني الذي لم يكمل العامين بعد "وصفق خلفي" التحية لك وللسر عثمان ولهذا الإنسان الفنان غير العادي الذي اجاد في اللحن والتطريب
Post: #24 Title: Re: نغيم من الطنبور..! Author: ناهد بشير الطيب Date: 11-10-2008, 05:05 AM Parent: #23
ازيكم ياناس الشمالية البركل وشبا ومروى ومورة والقرير
منورة والله و حمد لله بسلااامة الوصول و صاحباتك عملوها فينا...و نتلاقى ان شاء الله فى ساعة خير
و يلا المكان مكانك و راحتك بالكامل..
Post: #29 Title: Re: نغيم من الطنبور..! Author: محمد عثمان Date: 11-10-2008, 10:29 PM Parent: #23
Quote: الأستاذ محمد عثمان سلام "الصمت في حرم الجمال جمال" لا تعليق جاء ابني الذي لم يكمل العامين بعد "وصفق خلفي" التحية لك وللسر عثمان ولهذا الإنسان الفنان غير العادي الذي اجاد في اللحن والتطريب
الاخ yasiko
تسلم يا حبيب و ابنك خلى الينطلق...الصفقة احساس و الطمبور و النغم الجميل داايما ما يثير الوجدان..
لك التحية و التقدير...
Post: #25 Title: Re: نغيم من الطنبور..! Author: محمَّد زين الشفيع أحمد Date: 11-10-2008, 05:13 AM Parent: #1
محمَّد عثمان .. يا جميل ،
شكرًا لهذا الإهداءِ الرَّائعْ .
احترامي .
أخوك / محمَّد زين .
Post: #30 Title: Re: نغيم من الطنبور..! Author: محمد عثمان Date: 11-10-2008, 10:43 PM Parent: #25
ـ القدح : صندوق الصوت . ـ جلاد رأس البقر : لجلاد القدح. ـ فتحات : للصوت. ـ الداقن: لتثبيت الكوبري (الكج) ـ الكج: كوبري تشد عليه الأوتار. ـ المرق : قاعدة مثلث الطمبور. ـ الجرتق : زينة الطمبور (ليست أساسية) ـ السلك: (تشد منه الأوتار) ـ فيكاي : ملابس قديمة . ـ الوحيد : الوتر الأول. ـ الوتر الثاني: (أغلظ وتر في الطمبور) ـ الوسط : الوتر الأوسط. ـ الحنين : الوتر الرابع من تحت لفوق ، والثاني من فوق إلى تحت . ـ المجاوب : الوتر الخامس. ـ السندالة : أو سنادة لتثبيت اليد لتمكين العازف من العزف بأصابعه, ـ الضراب : أو ضرابة وهي الريشة التي يضرب بها الطمبور.
من تاريخ الغناء والموسيقى في السودان من اقدم العصور حتى 1940 م المؤلف/ معاوية حسن يس الطبعة الأولى 2005م الخرطوم عاصمة للثقافة العربية