لناس الدوحه...لمحتك...ليست للمقارنة..

لمحتك..



ــــــــــــــــــ

لمحتك .. قلت بر آمن ..
بديت أحلم ..
ألملم قدرتي الباقيه وأشد ساعد علي المجداف
كلما الريح تطارد الموج أزيد أصرار
وأحلف بيك ..
أغير سكة التيار ... واقول يا إنتِ يا أغرق ..
ألوح لي مدن عينيك
تلوح لي
أخاف الضفه ترجع بيك .... قبل ألحق
أخاف غيم المنى الشايل
تسوقو الريح ويتفرق..
واخاف وأخاف ..
وأشد ساعد علي المجداف ..
واجيك بي قدرتي الباقيه ..
حطام انسان ..موسم بى شقا الدنيا
ومقسم قلبو في الأحزان ..
أجيك فنان ..
أشد أوتارى أحكيلك ..
حكاية انسان
وهب لى سكتك نفسو ..
رسم صورتك على حسّو
ربط ساعد على المجداف ..
وقال يا انتِِ يا أغرق
واخاف و أخاف
أخاف غيم المنى الشايل
تسوقو الريح ويتفرق
والاقيك يا أماني سراب
مواهبي عليهو تتدفق..
واخاف وأخاف

Quote: أخاف غيم المنى الشايل تسوقو الريح ويتفرق.. واخاف وأخاف ..

شكرا انعاام..

محمد عثمان ... كيفك ... علك طَيِب ... شكراً على التسجيل الرائِع ...

الأخ بدرالدين الأمير (الذي أبدى رأيِهِ في تناول نانسي عجاج لأغنِية " لمحتِك ")
مِن ناس الدوحة لكِن ما الدوحة كلها ... وبدرالدين الأمير لأنو كان لصيق جِداُ جِداُ
بمُصطفى سيدأحمد ما أظِنو ممكِن يقبل أي تعديل/تَوزيع جديد/رؤية... الحاجات دي
في تناول أغانيهِ لأنها بِتشكِل ليهو جزء عزيز مِنو أقصُد أٌغنِيات مُصطفى سيدأحمد
كتيرين بِحِسوا بِكده لامن الأُغنيات الشكلتم -حسب التعبير الشائِع- تتبشتن بشتنه
العدو لأنو بِشِمو فيها الزمن الولى ... الزمن القبيل ... زمن الخالات والعمات
واللمه السمحه ... الأُغنيات بِالوصِف ده ، بتبقى جزء مِن الزول ... الأُغنية البِقت
مكان ... بِقت زمن ... بِقت بِتعكِس زي مِرايا تفاصيل ... تاريخ ... تاريخ مٌساهمتي
فوقو بس إني كُنت حاضِر وكِت إتغنت ... بعد ده لو جات أُم كلثوم زاتا ما بقبل ليها
تعيد " تدوير " حاجاتي الما عِندي أصلاً غيرا ...

مُعظم ألبومات صَور السودانِيين ما فوقو صَور ... فوقو أُغنيات ... الأُغنية دي
بِتذكِرني بِفُلان لامن جا مِن البلد ... ودي بتذكِرني بِفُلان ... و دي ... و دي ...
تناول الأُغنيات بِنِظام " التدوير " معناهو أجدع ألبومي البحر ...




ده الطلع مِني ... سلام ...

الاخ عزام...

لك التحية و التقدير الكثير و شكرا للحضور هنا و المداخلة
ذات المعانى الكثيرة...

من المصادفات امس كنت حضورا فى النادى العائلى بالخرطوم فى فعالية
خاصة بالراحل مصطفى سيد احمد و كان حضورا فيها الشاعر عبد القادر
الكتيابى مع كوكبة اخرى من الشعراء منهم القدال و صلاح حاج سعيد
و استمعت القاءا الى لمحتك بصوت شاعرها الكتيابى فتذكرت الجدل الداير حول
هذه الاغنية...الغريبة و رغما لمصاحبة الغناء فى هذه الفعالية بحضور الفنان عمر خليل
و الفنان ابو بكر سيد احمد و ايضا الفنان علاء الدين السنهورى لكن اى منهم لم يقوم بغناء
هذه الاغنية رغما عن انهم تغنوا باغنيات اصعب منها...

كان يجلس بالقرب منى الصديق الفنان مصطفى السنى و جات سيرة لمحتك فكان ان ذكر
لى انه سمع هذه الاغنية من ناننسى اكتر من مره و هى اتعودت ان تغنيها على طريقة الموال
او بالاصح كما وضع لحنها الاساسى والدها عليه الرحمة و المغفرة..

قرأت الجدل الدائر فى بوست الاخ بدر الدين حول اغنية لمحتك و كل ما اهم بالدخول للتعليق
اغير رائى و ذلك لان النقاش بدا ياخذ منحنى اخر...!!

طبعا من الصعوبة الحكم على اى فنان او فنانه بانه شوه العمل الفلانى للفنان الفلانى فكل
فنان له مشربه و اسلوبه الذى يغنى به و المعروف طبعا عند قبيلة الفنانين و الموسيقين
ان المحاكاءة دايما مرفوضة و لكن التقليد يكن ان يكون...و الله اعلم..

شكرا ليك و هنئيا لكم بنانسى و صوتها الجميل و هى اكيد ينتظرها مشوار طويل و مع قليل
من التريث و انتقاء الكلمات و الالحان الجميلة ستكون لنا عائشة فلاتية اخرى...

يديك العاافية...