صديق الموج .. مثقف .. لطيف .. وظاهرة عليه الجدعنة .

من الذين أتمني أن ألتقيهم .

* أستمتع جداً بمداخلاته ... وأبحث عنها بين البوستات.

حدثونا عنه يا أصدقائه.

Quote: من الذين أتمني أن ألتقيهم .

ما كويس عشانك

Quote: حدثونا عنه يا أصدقائه.

بيشبه رمضان

*

Quote: ما كويس عشانك

full stop!

مكاوى ...سلامات

من غير مقدمات عايز ترشه رشه ..



كما لايفوتني ان احي الدكتورة نجاة ..



تحياتي

أخو أخوان...إنسان..

النبيل عاطف مكاوي

تحياتي


العزيز.. صديق الموج ( سوداني وبس ويحمد ربو) وهدا الوصف في زماننا عملة نادرة وهو لا زال يجهر بصوته الوطني العالي في جغرافيا يصعب فيها حتى التأوه بالوطنية السودانية كما نشتهي الا من يحبون الوطن فقط ولديهم الجاهزية للموت في سبيله وصديق الموج واحد منهم...له المجد والرفعة ودوام الصحة والعافية
شكرا ....عاطف

التقيت الموج صديق مرة واحدة لعدد سويعات لم يقمن بعد نهمي المعرفي , لكنه ومنذ الوهلة الاولى يحتضنك بكلمات بسيطة
ويلج معك الموضوعات وكأنما بينكما معرفة ممتدة , التقيته وفي لحظتها احسست اني اعرف الرجل منذ امد فهو جد في الجد
والعكس , له بااااع طويل وذراع في غناء الحقيبة حافظ ومترنم ومغني وفنان وزول بجد يحمل كل صفات السوداني الانسان
المثقف .اهم مافي الامر هو صاحب خط واضح ودوغري .









المووووج صديق زول على طريقته الخاصة جداً,,,

........................................................................................................................حجر.

Quote: من الذين أتمني أن ألتقيهم .

Quote: ما كويس عشانك

مما قريت عنوان البوست توقعت حمزواي ورده وبالفعل كان ما كان وما سيكون !!!

صديق فنان وبيحكي زين وياريت لو دور لينا اغاني بادي زي البوست بتع قبل سنتين،

ود الموج
فيهو حاجات تعجب كتير
صلوعابي
وأخوي عمر الحمدي في الحساب عمو ...!!!
بعدين مريخابي أحمر

زول جميل اخو بنات
دائما ضاحك
وعيونه فيها هم والم كبير
رغم بشاشته وجع البلد في كل قسمات وجه

ولسان حاله
لا تحسبن رقصي بينكم طربا
فالطير يرقص مذبوحا من الألم


واهم حاجه انه جدوووووووو

زول أشتر .. والله صحي!!

فى هذا المنبر كتاب ، وفى هذا المنبر مهرجون ...
وفى هذا المنبر عناوين بدون موضوع ، وفى هذا المنبر
قراء وهم أعضاء ، وفى هذا المنبر متداخلون جيدون ..
وفى هذا المنبر أصحاب رأي ونصح ، .. وفى هذا المنبر
من يكتب وهو يعلم أنه يكتب ، وفى هذا المنبر من
يضيف أحسن من ما كٌتب ، ( بضم الكاف ) ..
وقليلون هم الذين يكتبون ، ويدرون متى يكتبون
ومتى يتداخلون ومتى يتحفظون ، ويعرفون من يخاطبون ،

أخى صديق الموج هو من أؤلئك القليلون الذين أعنيهم ..
تحيي كثيرا له ولك ..
محمد مختار جعفر



تصحيح لغوي ..

البروف الموج هلّلا هلّلا
ياخى اكثر زول اشعر كأنى أعرفه و قابلته من قبل.
لم يحدث هذا لكنه كتاب مفتوح على العالم بكل ما هو سودانى و جميل.

و بعدين راجل معلّم اى و الله على مقدرة عالية تمكّن من اللغة العربية، و الله صحى.
لو مشى ناس جامعة القرآن الكريم يقرأ هناك غالباً يعينوه عميد لكلية اللغة العربية.

لم أقابلة فى حياتى
ولكن لة منى منزلة الشقيق
بحكم مشاركة والدة فى تربيتى ( الصول/ عم الطيب الموقر)
رحمة الله و وأسكنة مع الصديقين والشهداء

________________

الأصل معروف والدين فوق الكتوف...

% سياسة وفن وحقيبة فن وكمان مريخابي. باقي حاجة واحدة ح احكيها معه هاتفيا إذا سمح بذلك.
تحياتي عاطف.

الخــال العزيز صديق الموج

من عائله حباها الله بسرعة البديهة وحلـو اللسان وطيب المعشـر

وأصحاب مروة ،، يخلقون المـرح أينما كانوا صديق، اسامه.محمد. الصغير الداهية عمار والأخوات الكريمات تراهم جالسين تحسبهم أصدقاء وليس أشقياء ملوك الكوميديا


طيب القلب مسامح ...


ربنا يديـم عليه نعمة الصحة والعافيـة دائما





أبومصطفى

Quote: ولسان حاله لا تحسبن رقصي بينكم طربا فالطير يرقص مذبوحا من الألم

صديق الموج من اميز الشخصيات التي قابلتها في حياتي فهو رجل خلوق ومتزن في حديثه شفاف ومريح في تعامله مثقف من الدرجة الاولى وفوق هذا وذاك رجل فنان بمعنى الكلمه يحفظ الشعر والغناء ومناسبات القصائد وتواريخها ويعرف الكثير عن قبائل السودان وقاطنيه والاهم من ده كلو إنو راجل أخو أخوان كريم بشوش يحتويك بطيبته ولطفه وإحترامه ، لقد عرفته منذ قدومي للرياض في مطلع عام 2003 فإلتقينا في عدد كبير من المناسبات فالرجل يملأ المكان بحركته وبحديثه الجميل ومن ثم ضمانا بعد ذلك كيان سودانيز أون لاين بورداب الرياض هذا الكيان الجميل الذي أعتز بإنضمامي له لأنه جمعني بأخوان اكارم فهم نعم الاخوه ونعم الزملاء وكان من ضمنهم العزيز صديق الموج ... متعك الله بالصحة والعافية أخونا صديق الموج واطال في عمرك وجعلك اخا حبيبا على قلوبنا ...

تحياتي : ياسر العيلفون

تخريمه : غايتو انا عارف لو لاقيت حمزاوي اكيد ما حا اسلم منو .. لكن يا حمزاوي ود الموج يستاهل والله ...

مريخابي

الحلو ما يكملش....

استاذ صديق الموج بلسم هذا البورد ومن الناس القلائل البتمني أني التقيهم...ربنا يحفظه لي أولاده ..

صديق الموج ينطبق عليه ( رب اخ لم تلده امك)
كاتب بوستات بدرجة امتياز
مداخلاته بنكهة سودانية
لم اقابله ولكن رسمت حروفه شخصيته التى وصفتها

Quote: مثقف .. لطيف .. وظاهرة عليه الجدعنة

الرجل بحرف الصاد صادق فى كلماته لا يعرف اللون الرمادى
وبحرف الدال دافىء الحروف يعاتبك باريحية وشفافية
وبحرف الياء يم تبحر فيه بدون خوف من الاعاصير
وبحرف الجيم جميل ان يكون متداخل معك فى البوست
لكاتب البوست كل الشكر على اعطاء الرجل حقه
تحياتى

يا عاطف والله وضعت الناس أمام إمتحان صعب

يا أخي صديق الموج دا مهما الناس تكتب ليك عنو صدقني ما حاتقدر تخلق عنو أي إنطباع

الإنطباع لن يتأتى إلا من خلال حضورك للرياض عشان تعيش فيها سنين ، وتحضر فيها مناسبات كثير شديد عشرف تتعرف على داهية إسمو صديق الموج

نكتب ليك عن شنو ونخلي شنو

صديق المثقف جداً

ولا صديق المتحدث اللبق جداً صاحب المدرسة المميزة في الخطابة ـ والله أنا صديق يا عاطف دا لو مسك المايك ساعات ما أمل كلامو

ولا صديق بتاع النكتة العجيبة

يا عاطف مكاوي أنا صديق الموج دا سمعتو منو نكتتين بس ليهم قرابة 10 سنين ـ على بالطلاق لليلة أنا أضحك

ولا صديق الرجل الإجتماعي الذي لا يذكر بني أدم دخل السعودية ويكون صيدق الموج ما بعرفوا

ولا صديق الموج المناضل صاحب المواقف

يا عاطف مكاوي لو في زول قال ليك ممكن تتعرف على شخصية صيدق الموج من خلال ما نكتبوا عنو بكون كذب عليك

صديق دا إلا تعاشروا سنين عشان تتعرف على كل ملامح هذه الشخصية المتفردة جداً

الأخ عاطف وضيوفه الأكارم,
ود الموج من القلائل الذين استمتع بمداخلاتهم ومواضيعهم بالبورد.
لكن صحى طلع مريخابى ؟

مالو الصديق مات ؟
العرب شكارين الميت
قالوا الجعلي شكرو والشايقي سكرو والدنقلاوي غشو ساهي
لكن الزول دا ما معروف ليهو جنس كلو كلو
اقوليك انا جدي دينكاوي وحبوبتي جعلية وجدي رباطابي وجدي من تالا امي من حمرة الوز
وعندي خالات في 24 القرشي وعمتي من صقيعة سلامة وخالتا من ام صفقا عراض
وحبوبتها من الشدرات التحت لكن انا اصلا اصلا شراقي جينا بغنمنا وسكنا جنب الاذاعة
عشان نبيع ليهن اللبن ونوسر ليهن العناقريب لقعدة العصرية
ونسمع الغنا حااااار من خشم الفنانين
الزول مكرهنا الونسة ونسة البندر حقتو ونسة العروب اتقول والدنو في الباجور
والعجب العجيب كان مسك المكرفون مستعد امسك الحفلة مقاولة
قرآن كريم بصوت عوض عمر تجويد عديل كدا وكمان بمرق لسانو للسا ام تلاتة نقط
يتكلم عن موضوع الحفلة ويبداهو من تاريخ دخول العرب السودان وحتى لحظة وقوفه على تلك المنصة
ويقدم المادح صديق الموج ويمدح الطيارة السودانية
ويعرج على الحقيبة هوووووي يا ليلى هوي
ويقدم القبعة وفاصل من النكات منها النوع البضحكك بعد تطلع من مخرج طمنتاشر
يا ناس هوي الزول دا مو نصيح
الزول دا اذاعة عديل
الزول دا مستعد اكون قناة فضائية براهو بس الا معاهو البنات السمحات بس للنشرة الجوية
صديق الموج ..... الله اطول عمرك واديك العافية
شكرا عاطف

حتندم بعد دا كلو
وحتحاول تنساه وما حتقدر ومش حتغمض عينك

Quote: الزول دا مستعد اكون قناة فضائية براهو بس الا معاهو البنات السمحات بس للنشرة الجوية

شديدة يا ود البوش شديدة و قوية

يا سلااااااام علي هذه المعلومات


ومعذرة آ ناس (فروق الوقت) وكده !

قرأت كل المساهمات وتأكدت بأن حدسي لم يخذلني
فقط ..... قصة (مريخابي) دى ما إنبلعت لي.

شكراً ليكم كلكم وكلكن.

صديق الموج

عليكم الله الزول دا فى حروف بتوفيه
حقه ؟؟ انا شخصيآ ما اظن

الله يديك الصحة والعافية يا اخوى أنا

شكرآ عاطف مكاوى

صديق الموج

الأوصفوك ... ما أنصفوك

العزيز عاطف

لن يستطيع أحد أن يُلمك بكل ما فى صديق الموج

لذا أقترح أن تٌطوع الظروف لملاقاته .. ولن تندم

*

ربما لن أستطيع أن أزيد على ما قاله الأخوان والأخوات هنا عن حبيب الكل صديق الموج
لكنني أقول

إنني لم ألتقيه إلا خلال هذه المساحة
لكنني أحبه محبة صادقة
وأرجو أن تسمح لنا الأقدار بلقاء ذات يوم

حبيبنا الموج ..

رجل بحجم الوطن ..
شماله وجنوبه .. وشرقه وغربه ..

تحياتي حبيبنا عاطف ..

الشكر والتحايا للجميع.

الاخ عاطف الصحة والاخبار
التقيت الاخ العزيزصديق الموج في زفاف ابنته
ولكن كاننا نتعارف منذ زمن بعيد فهو اخ عزيز واخو
اخوان وقضاي غرض فله مني مليون تحية

الاخ عاطف الصحة والاخبار
التقيت الاخ العزيزصديق الموج في زفاف ابنته
ولكن كاننا نتعارف منذ زمن بعيد فهو اخ عزيز واخو
اخوان وقضاي غرض فله مني مليون تحية

بعض الناس تحبهم دون سابق معرفة ، ودون حتى أن تراهم. قابلت صديق الموج في هذا الموقع الجامع. صافحتني كلماته وعباراته خفيفة الظل. وحين لاح كلام في الحقيبة التي أحبها إنبرى الرجل يملأ المنبر العام بخرائد ود الرضي وأبو صلاح والعبادي وخليل فرح والجاغريو وحدباي والمساح والبنا وغيرهم من أساطين الكلمة الساحرة في زمن فيه ترقص كلمات الشعراء في سماوات ام درمان فيولد اللحن ناصعا ، يانعاً بين شمبات واب روف. بهرني صديق الذي صافحته وصافحتني روحه المرحة الخلوق عبر هذا الموقع.
وحين كتب عنه بعض من عرفوه عن كثب شهادات تقدير بدرجة ممتاز، عرفت أني على حق في محبتي له..فبعض الناس نحبهم دون سابق معرفة. وطبعا... نحمد لزماننا لو جمعنا بهم.
صديق الموج.. سجل عندك : أنا أحد معجبيك !

تخريمة: أعجبتني شهادة الأستاذ عبد الله ود البوش في الرجل .. فقد إمتدحه دون إسفاف، وأعطاه حقه دون مغالاة...وفي أسلوب خفيف الظل. جميل يا ود البوش هذا التقريظ لحبيبنا صديق الموج!

طبعا يا عاطف أنا اشاركك نفس المحبة للعزيز ود الموج،
زمان لمن كنت اقرا أسمه كنت فاكراه لقب وكنت بقول يا سلام على الأسم الشاعري..
ولما عرفته من خلال كتاباته عرفت كم هو إنسان أصيل ومهموم بهم بلده وكمان بروف ...
..شكرا عاطف علي هذه النافذة لنجدد البيعة لصديق الموج والغيم والبشر.

والله ياعاطف انا سعيد جداً ألا يخني خيالي المتكل علي مداخلات صديق المواج خفيفة الظل ,,,,,,وملئية ذكاء وتلميح ..........حزين جداً ان تكون علاقاتي مع صديق الموج عبر هذا الاسفير ،،،،،،،،،،كما اني في نفس الوقت سعيد جداً ان التقيه ( فالقحة ولا صمة الخشم) ياخي الزول
ده لذيذ بشكل ........فكل الذي قيل عنه تقريظاً واضح في بوستاته ومداخلاته
وشكراً لك ياعاطف وانشاء الله يوم شكره مايجي

لو زرت السعودية وده وارد جدا
الموج واحد من خمسة اشخاص حا ازورو في بيتو
له التحية
وجميل انو مريخابي

سلام الأخ عاطف لك ولكل زوارك الكرام
الأخ صديق الموج شهادتي فيه مجروحة بحكم العلاقة ا########دة بين الأسرتين ، رغم إنه إلتقينا مرتين في زيارتنا وكان اللقاء حميميا مع كوكبة بورداب الرياض المميزين
مميزين بحفاوة ترحابهم وتقديرهم وإكرامهم لضيفهم , يكرموك ويكرموك حتى تستغيث
هؤلاء القوم منهم ود الموج الرجل خفيف الظل عريض الإبتسامة فصيح اللسان كريم الخصال وكفى ....
وإستمرت العلاقة الأخوية وكتر خيرو ما انقطع التواصل وإن شاء الله البينا دائما عامرة , له اسرة مميزة زيو ست بيتو حنييييينة وزولة حبيبة زي بت عمي ابو حريرة الحبيبة عفاف
ربي يحفظه وعياله ويحفظك اخي عاطف

على فكرة عندنا بوست كان مدور إسمه في حلتنا وتحت ضل نيمتنا , فيه عمك ود البوش وود المدير وود الموج ، وغيرهم كتير ، أمانه ما فيهو حلاة نضمي وقفشات
خاصة من ود الموج وود المدير و أخونا إسحق بلة وغيرهم , حا تستمتع فيه بمداخلات ود الموج الجميلة وممتعة حد الدهشة
كتابته السهل الممتنع

Quote: قرأت كل المساهمات وتأكدت بأن حدسي لم يخذلني فقط ..... قصة (مريخابي) دى ما إنبلعت لي.

اها دي انا زاتي ما بتنبلع لي كلو كلو ,, والعجب كمان معاه زوجي صاحبه ود الجنيد ,
يوم المريخ يغلب اليوم داك أنا مافي لي راحة ولا غمدة نهاااااااااائي
والله صحي

أنا صديق درسنى فى الثانوى وكان فقر خلاس بدقنا دق
لكن بدفع لنا حق الفطور




لصديق التحايا والإحترام



منصور

البروف ود الموج


اكن له كثير من الاحترام والحب.... زول مجود شغله جد
بعرف يقول شنو ومتين وكيف ودي من المميزات التي تنتقص
كثرا منا وانا اولهم..... صديق اخو اخوان لمن لا يعرفه
وزول حارة وراجلا ضو وامدرماني اصيل ولا اشك اطلاقا في انه
من النوادر الذين يعرفون بواطن شعر الحقيبة ومن الموثقين
اصحاب الوزن الثقيل في شان الحقيبة.... رجل بسيط ومتواضع
وقدر اي زول يعني بلبس لاي زول مقاسو.... خلاصة القول احبه
حتى النخاع.

الأخ عاطف سلامات

Quote: لكن صحى طلع مريخابى ؟

تتصور

دا عيبو الوحيد

لكن معليش لكل حصان كبوة

عاطف وانت كمان رجل أصيل لأنو لا يعرف معادن الرجال الا الرجال

لك وله وللمتداخلين التحايا

وعليك الله لو جا بى هنا قوليهو شنو ياخى منتظرنك بى غادى يعنى ما شايف وله شنو ؟

اكن له كثير من الاحترام والتقدير زول لماح وخبرة فى قراية الناس من مداخلاتهم ....
له التحية كما لك الاخ عاطف.

Quote: لو زرت السعودية وده وارد جدا الموج واحد من خمسة اشخاص حا ازورو في بيتو

الاخ خالد العبيد مين الاربعة الباقين والله نفسي في دتحلك اعاين





الاخ صديق الموج انسان ....... قابض علي جمر القضية .....

فنان ... اخو اخوان واخو بنات .....

ده حالتو مقيد في بلاد شمسها سوداءءءءءء

تسألون عن صديق الموج
عرفته فى السعودية وهو علم بارز فى مجتمعات السودانيين
راجل اجتماعي من الطراز الاول .. مثقف .بسيط .. انيق ..طيب العشرة يمتلك قدرة فائقة من الابداع الخطابي
يحفظ عن ظهر قلب تاريخ وتراث الحياة الامدرمانية
ياريت لو فتح لنا بوست يسرد فيه تاريخ وحكاوى وقصص الغناء والشعر فى امدرمان
تحياتي لك وله
ود الري

التحية لزعيم صديق الموج

والتحية لجماهير الاحمر الوهاج


تحياتى عاطف

Quote: لو زرت السعودية وده وارد جدا الموج واحد من خمسة اشخاص حا ازورو في بيتو له التحية

ود الموج فاكهة المنبر
ياخى لو مشيت السعودية ومازرت ود الموج تبقى زى المشيت الحج وما وقفت بعرفة

غايتو نحن ما صيّاغ ياخالد لكن بنعرف الدهب المجمّر لما نشوفوا

تحياتى ليك ياعاطف وتحياتى عبرك للاخ صديق

صديق الموج

مداخلاته بسيطة فى التراكيب مفيدة جدا ومباشرة فى المعنى

هو وينو ما يجينا قالع ويدينا كلمة

لماح جدا وصاحب فكاهة محببة
تحياتنا يا بروف الموج

Quote: الزول مكرهنا الونسة ونسة البندر حقتو ونسة العروب اتقول والدنو في الباجور والعجب العجيب كان مسك المكرفون مستعد امسك الحفلة مقاولة قرآن كريم بصوت عوض عمر تجويد عديل كدا وكمان بمرق لسانو للسا ام تلاتة نقط يتكلم عن موضوع الحفلة ويبداهو من تاريخ دخول العرب السودان وحتى لحظة وقوفه على تلك المنصة ويقدم المادح صديق الموج ويمدح الطيارة السودانية ويعرج على الحقيبة هوووووي يا ليلى هوي ويقدم القبعة وفاصل من النكات منها النوع البضحكك بعد تطلع من مخرج طمنتاشر يا ناس هوي الزول دا مو نصيح الزول دا اذاعة عديل الزول دا مستعد اكون قناة فضائية براهو بس الا معاهو البنات السمحات بس للنشرة الجوية صديق الموج ..... الله اطول عمرك واديك العافية شكرا عاطف

ذلك هو الرجل و اكثر

و من الملامح اعلاه لابد ان يكون من الصفوة !!!!

سلمت عاطف

و كفيت يا ود البوش

Quote: حدثونا عنه يا أصدقائه.

Quote: بيشبه رمضان

الاخ عاطف مكاوي
موضوع يشبه رمضان دي بتذكرها كلما اشوف صديق الموج
في حلفاوي كان لمن يدخل شهر رمضان يكون متضايق وكره شديد للصوم
وما يطيق حتى نفسو ... مرة قابل زول شين خلاص كوز سبيل بس الحلفاوي سأله
يازول اسمك مين الشين قال ليه اسمي رمضان ... لا حول اول مرة اشوف زول بيشبه اسمه
هلقتك ذي اسمك الهالق الناطق

Quote: لو زرت السعودية وده وارد جدا الموج واحد من خمسة اشخاص حا ازورو في بيتو

غايتو انا قطع شك ما فيهم الخمسة ديل

يا جماعة إنتو بتتكلمو عن صديق زولنا ولّ زولا تاني؟
يااا عم حمزاوي اتصرّف ياخ!

والله يا جماعة شوقتوني في أن أنتقل من مرحلة التمني
للقاء صديق الموج ... لمرحلة السعي لهذا اللقاء خاصة وأنني
لم أزور المملكة في حياتي الطويلة هذه ... كنت بقطر وزرت
الأمارات عدة مرات وزرت السلطنة مرة واحدة ونزلت ترانزيت
بمطار المنامة عدة مرات ... إلا المملكة ... لكنني سأسعي
سعي جاد ولتكن حجة أو عمرة وزيارة للأهل والأصدقاء والموج.

وبمناسبة ظهور ودالباوقة ... وعلي الرغم من أن إبرتي لا تحتمل
أى خيط كيزاني لكنني أعترف بأنني لم أستطع أن أتداخل بطريقة
خشنة مع هذا الرجل المسمي بود الباوقة وأظن بأن لصديق الموج دوراً
في ذلك إذ كثيراً ما أضحك عندما أقرأ مداخلاته معه ... فلود الباوقة
طريقة تحجب عنه المخاشنات رغم أنه (غياظاً) .. ولصديق لغة تجبر قارئها
علي الإنشراح في نفس الوقت الذى تصل فيه المعلومة التي يُريد أيصالها بدون أذى
شخصي (إلا في حالات أرى أنه كان مضطراً فيها) إذ من الصعب الإحتمال
بشكل دائم.

* يا جماعة صديق الموج ما قادر يدخل البوست !

Quote: صديق الموج الأوصفوك ... ما أنصفوك

صدقت يا الحبيب

صديق رجل فاضل وزيادة

شكرا مكاوي

تحياتي ووافر احترامي

Quote: الزول مكرهنا الونسة ونسة البندر حقتو ونسة العروب اتقول والدنو في الباجور والعجب العجيب كان مسك المكرفون مستعد امسك الحفلة مقاولة قرآن كريم بصوت عوض عمر تجويد عديل كدا وكمان بمرق لسانو للسا ام تلاتة نقط يتكلم عن موضوع الحفلة ويبداهو من تاريخ دخول العرب السودان وحتى لحظة وقوفه على تلك المنصة ويقدم المادح صديق الموج ويمدح الطيارة السودانية ويعرج على الحقيبة هوووووي يا ليلى هوي ويقدم القبعة وفاصل من النكات منها النوع البضحكك بعد تطلع من مخرج طمنتاشر يا ناس هوي الزول دا مو نصيح

Quote: الزول مكرهنا الونسة ونسة البندر حقتو ونسة العروب اتقول والدنو في الباجور

والله يا عبدالله ود البوش
منذ بداية متابعتي لهذا المنبر ... كنت من قراء هذا الموج ولكنه حيرني في حاجتين :

الأولي : علاقته التي كشف عنها مؤخراً بأحد (مثقفي السودان) الأفذاذ .. من الذين لم ينتبه إليهم الغالبية في هذا المنبر
وخارجه ... عدا القليلين .. وهو (د. عبدالقادر الرفاعي) ... فبالإضافة لدكتور طراوة والأستاذ يحي العوض وبالطبع معارفه
من ناس أبي روف (سناء الصباغ .. بروف أمين محمد سليمان.. الصاوى .. حامد الصاوى .. إلخ)
لم يكتب عنه غير هذا الصديق الموج .... وبحكم معرفتنا (الحديثة) بدكتور عبدالقادر .. (نحن) من أعضاء هذا المنبر
(الهادى هباني .. عبدالله إحيمر.. ياسر شبيكة .. شاذلي الصديق .. نورالدين فتح الرحمن .. وشخصي .. إلخ) ...
أذكر بأننا قد شعرنا بأننا قد إكتشفنا الدهب المجمر الغير معروف (جماهيرياً) إلا في حدود المهتمين بالكتابة والأدب
كما أذكر بأننا قد شعرنا حينها بعظيم الشرف لهذه المعرفة علي الرغم من معرفتنا السابقة له عبر كتاباته
... فإذا بها نتفاجأ بأن صديق الموج يقول لنا .... مهلاً فقد تم إكتشافه من قبل في أُم درمان ومن بعد في السعودية.

الثانية : إكتشفت بأن لصديق الدراسة الذى كنت أشاركه السكن فترة الدراسة الجامعية .. الصديق أبوذر بابكر الملقب هنا ب (المطر)
أختاً زميلة بهذا المنبر إسمها (رشا بابكر عوض) وكنت قد زرتهم بود راوة من قبل وتعرفت عن قرب علي هذه الأسرة وعلي أمهم (الشاعرة)
فإذا بها أيضاً أقرأ لصديق الموج مداخلات في بوست رشا بأنه يعرف هذه الأسرة (إن آند آوت) بل حتي يحفظ بعض أشعار والدة أبوذر ورشا
فقلت لنفسي .... هل كان المقصود هذا الصديق في تلك المدحة التي تقول (في كل بلد سوالو عيال)؟

فيا صديق الموج :
أنا من قرية إسمها المناصير ... ريفي المسلمية ... منطقة الحصاحيصا ... وقد درست المتوسطة والثانوى بالحصاحيصا .. وقد كنت في بداية
الثانوى في مدرسة المرين بالهلالية ... فمن هم من المعارف المشتركة بيننا في هذه المناطق علماً بأنني قد أنهيت دراسة الثانوى في الرُبع الأول من العام ١٩٨١م)؟



-

Quote: يا جماعة صديق الموج ما قادر يدخل البوست !

أصعب بوست تخش فيهو في البورض دا
البوستات البشكروكـ فيها الناس!!



ما تعرف تقول شنو زاتو!!!

Quote: أصعب بوست تخش فيهو في البورض دا البوستات البشكروكـ فيها الناس!! ما تعرف تقول شنو زاتو!!!

اها يا شباب النجيضة جابه ليكم الوغد المسمى مجازاً محمد عبد الماجد الصايم .
لكن احاول عسى ولعل .... ما طالبنى حليفة انا من البوست ده اتفتح اقرأ وانا قسمة بين الفرح
والحزن ، نعم تفرح نفسى الامارة و يملاءها الزهو وهى ترى الكلمات الجميله تتناثر فو قها
مثل فراشات مجنحة و لكن سرعان ما يتبدد هذا. لانكم لا تعلمون أبقاكم الله ان محبتكم ومعزتكم
هذه تذلنى وتشقينى اكثر مما تسعدنى لانى اعرف قصر رحلتى اليكم وتقزم قامتى امام سموقكم
وفى احسن الاحوال اعلم ان الظروف لن تساعدنى ان اكون عند حسن ظنكم و فى كل الاوقات
وهذا ما يجعلنى احتقر نفسى كثيراً..
انا اكتب اليكم هذا ليس من باب التواضع الزائف المستدر لعطف او الموجب لشفقة او المستوجب لاحترام
ولكنه من باب رحمة الله بعبيده العارفين لقدرهم و مقدراتهم....
انا شاكر ليكم كل ما كتبتوه عنى هنا كما اشكر كل من نوى ان يكتب حرفاً وكل من قرأ البوست
وهز رأسه كافراً او شكورا..
اها تبقى موضع السنده و السجده فى الشكر اخونا عاطف مكاوى والله اشهد ليس بيننا غير واشجة الظن الحسن
ولا اعرف اين يقيم جغرافياً ولكنه قطعا وجدانياً من الذين يسكنونى و احس انه يؤلف ويألف فالشكر له من
امثالنا الذين لا يملكون مالاً ولا خيلاً يهدونها فليكن اطنان من مودة وقوافل من حب ناقة اثر بعير و فصيل
اثر حوار تصله لتجده كما نود ويود..
الاخوة الباقين سوف اعود لكم بالمهلة وكتر خيركم ان اريتمونى مسودة من البوست يوم ان يسود لى المنبر.
فالى ان يقيض المولى لنا وقت للكتابة استودعكم الذى لا تضيع ودائعه والعفو والعافية،،،

للأسف لم أحظى بمقابلته إلا مرتين
ولكن تبادر إلي مفهوم واحد هو: (سوداني كما يجب أن يكون السوداني)

العزيز عاطف مكاوى هذه الرسالة من صديق عزيز وعزيز جدا ...للصديق العزيز جدا ود الموج ...انا معاوية عبيد شهادتى فى صديق مجروحة وكابة الدم



كاتب الرسالة بقترح كتابة اميل .صاحب البوست ..للمشاركة من خارج البورد

Quote: اسامة التوم التحية لك اخي عاطف مكاوي وانت تسلط الضوء علي احد مبدعي بلادي ... الرجل الموسوعة الكوميديا التي تمشي علي قدمين صديق الموج عرفته في الرياض عن طريق اخي الاكبر محمد بابكر وهو صديقه اللدود .... حدثني عنه وعن خفة ظله وموسوعيته في معرفة اغاني الحقيبة وشعراءها وسمارها وقصص الاغاني لدرجة انك تشك كيف لرجل في هذا العمر يحفظ جميع هذه التفاصيل عن ظهر قلب ... وموهبة صديق الحقيقية اخي عاطف تكمن في طريقة حكاويه مباشرة لا كتابة ... يعني ما رايته في صديق من كتابات لا تساوي 1% من لطافته وخفة ظله علي الواقع دون تكلف ... اضف لذلك له موهبة الحفظ لدرجة لا توصف ... وقارئ نهم لو وجد كتابا لما سمعت صوته حتي تظن انه ليس معك ... لفت نظري عام 2005 م الي الاديب محسن خالد .. وكان معجبا جدا بكتاباته ... وتنبأ له بمستقبل وشارط عليه بانه يمشي علي خطى الاديب الراحل الطيب صالح ... عند زيارة الطيب صالح الرياض قدم الندوة صديق الموج وموجود معي شريطها حتي الان ... فداعبه الاديب الراحل بان هذا الرجل الفصيح اكيد شايقي .... فرد له صديق الموج في جو مرح هل هناك من هو افصح من بروفيسور عبد الله الطيب .... فضحك الطيب صالح وقال له ( لا والله مافي ) ... استضافه ايضا ابراهيم احمد عبد الكريم في برنامجه المشهور وكان احد الضيوف للتحدث عن اغاني الحقيبة .... صديق الموج ياعزيزي عاطف فوق كل ذلك رجل متواضع تواضع الصوفيه ومن القلائل الذين تحسبهم علي اصابعك ثقافة ومعرفة من خلال هذا البورد ولكنه يملك تواضع العلماء ... اضف لذلك بانه من اشطر مدراء المبيعات علي نطاقة الرياض عامة وزي ما بقولوا ابيعلك الرملة سكر .... تحياتي الاخ عاطف والتحايا النواضر للموج وقفشاته التي لم تفارقني يوما بس عيبو مريخابي ....اسامة بابكر التوم احمد ...

التقيتُ يا صاحبي عاطف بالأستاذ صديق الموج في رحلتي لمدينة الرياض في يوليو 2011 وأبهرني الرجل بتواضعه الجم وقدرته الهائلة في إلقاء الشعر وبشاشته وحزنه (النبيل) كنبله والمرسوم على محياه، وهو لعمري حزنٌ كبير على وطنٍ أحبه وما زال كمن قال أحبك بتضحك واحبك عبوس. عدتُ من رحلتي وأنا صديقٌ لهذا الرجل (الموج) العالي.

أخي وصديقي صديق الموج محبة الله من محبة الناس فاعد الكرة مرتين في هذه الهبة الإلهية وأقرأ كل ما قيل عنك وحقّ لك أن تحمد الله سراً وعلانية فمحبة الناس صعبة المنال في هذا الزمن الغيهب....

Quote: الاخوة الباقين سوف اعود لكم بالمهلة وكتر خيركم ان اريتمونى مسودة من البوست يوم ان يسود لى المنبر.

أها دا الخائف منو ذاتو
وكل الكلام المذكور اعلاه يخوف
ما باقي حاجة الا التلج والبرد
وبالمناسبة صديق الموج دا كلمني بوصيتو للبورداب واشهد عليها خالد المحرب
قال لمن اموت مافي زول ادعو لي بالتلج والبرد دي ائ حاجة ولا السقط دا
ادعو ليهو بالجنة الدافية لان المرحوم جنو وجن السقط قال لمن شعرة جلدي تكــلـب
من السقط لمن ادعو للمرحوم بالبرد والتلج
وكمان هو زول متواضع ما طماع خالص في بنات الحور كفاهو الكانن في الدنيا ديل
بس اعزل عزل لووووووووول عشان كونو المخ البنشاف في الساق
.
.
ان شاء الله يوم شكرك الشديد داك ما اجي قريب يا الصديق والوكت داك ذاتو مافي منبر
لا سواد ولا رماد
صديق الموج ياخي انا طالبك بوست ( عمر الحاج موسى )
عاين جاي
ياخي اكتب لينا كلام عديل كدا ... كداي من كداي وكداي من كداي
الكلام المفلعص زي العصيدة الدقدقوها في طاحونة عيار فاكي درشتو دراش
مابنفع معانا نحن غير المثقفاتية انا وخالد المحرب وعمران صالح
ومن لف لفهم وقام سداري
وبعداك ان شاء ابقوك وزير اذاعة ما عندنا معاك شغلة
ولا اقول ليك النجيضة ام شيط البوست دا اختاهو كلو كلو

عزيزي/ عاطف مكاوي


عبرك نحي هرم البورد..
الرجل الخلوق ود الموج..
البروف الذي قدمته كلماته لكل الناس..
أخ كريم ورجل مهذب.. وقلم قامة..
بوستاته ومداخلاته لها نكهات خاصة..
لن أجزيه حقه من خلا الكلمات..
فله الحية..
وله التقدير

Quote: زيو ست بيتو حنييييينة وزولة حبيبة زي بت عمي ابو حريرة الحبيبة عفاف

الحبيبه استاذتنا الكبيره اسماء الجنيد
وين الحي بيك
الحنيه ربنا لما خلقه اداك ليها كلها وبعدين
وزع لينا الباقي تسلمي كتير يازوق
لكن عليك الله ماتلمني مع عم الموج ده في اي شي
الزول ده ماكل عصيدة القيامه
خالتو انعام اااي
جدووووووووووووو الموج لا



ضربنا ليك كم مره لكن الظاهر انك غيرتي رقمك
سلامي لي ود الجنيد والوليدات

Quote: كاتب الرسالة بقترح كتابة اميل .صاحب البوست ..للمشاركة من خارج البورد

[email protected]

Quote: له بااااع طويل وذراع في غناء الحقيبة حافظ ومترنم ومغني وفنان وزول بجد يحمل كل صفات السوداني الانسان المثقف .اهم مافي الامر هو صاحب خط واضح ودوغري . .

وبي زياده انو رياضي مطبوع من الدرجة الأولى..
أخو أخوان وشخصية اجتماعية نشطه ومعروفة عند كافة أهل الجالية السودانية بمدينة الرياض..
وياريت أهل الحقيبة يلحقو ويسجلو ليهو ويوثقوا عن
شعراء الحقيبة
أغاني الحقيبة+ الأغاني (المسروقة والمجيره)
قبل ما يفوت الفوات(بعد عمر طويل)........

وسلامات..

Quote: له بااااع طويل وذراع في غناء الحقيبة حافظ ومترنم ومغني وفنان وزول بجد يحمل كل صفات السوداني الانسان المثقف .اهم مافي الامر هو صاحب خط واضح ودوغري . .

وبي زياده انو رياضي مطبوع من الدرجة الأولى..
أخو أخوان وشخصية اجتماعية نشطه ومعروفة عند كافة أهل الجالية السودانية بمدينة الرياض..
وياريت أهل الحقيبة يلحقو ويسجلو ليهو ويوثقوا عن
شعراء الحقيبة
أغاني الحقيبة+ الأغاني (المسروقة والمجيره)
قبل ما يفوت الفوات(بعد عمر طويل)........

وسلامات..

شكراً الأخ الكريم مكاوي لفتح هذه النافذة
لنتعرف أكثر بالاخ الكريم صديق الموج ..
لم التقيه ولكنني تحدثت معه عبر الهاتف
وراسلته عبر الإيميل عندما " إعتقل
عبد المنعم رحمة ، عبد القادر عبد الرحيم "
وقضايا أخرى ..
محب للوطن مهموم به و بإنتهاكات حقوق
الإنسان فيه ..
وخال فاطنة ..
له التحية والإحترام ولك مثلها ..

كتب الزملاء ما كتبوا

لكن الخال الموج يبقى فوق كل هذه الكلمات

هو من نوع من السودانيين بدأ في الانقراض ... عفوياً كالسودانيين قوياً كالسودانيين واضحاً كالسودانيين

ومستقيماً كالسودانيين ...

ومثقفاً كالامدرمانيين ...

أتمنى له العافية وطول العمر

أحمد الشايقي

شوفوا حتى ناس بلاد برا بيحبوه

اولاد عاطف مكاوي برضو ما ساهلين

تعرف يا فيصل يا خليل .... يا صديق يا عزيز
الصورة أعلاه كانت يوم عيد الميلاد الأول لإبنتنا الفي الصورة (لميس) ...
قبل أربعة سنوات ... إذ أنها من مواليد إحدى السنوات (الكبيسة) يوم ٢٩ فبراير ٢٠٠٤
وبعد لحظات من الآن سيكون إحتفالنا بعيد ميلادها (الثاني) بعد أن أكملت اليوم (٨ سنوات) بالتمام والكمال.

وفعلاً صورتك كانت هدية لها في عيد ميلادها .... ولقد فرحت بها كثيراً

فشكراً لك
وشكراً لصديق الموج الذى أتاح لنا فرصة هذه الصورة.


-

Quote: شوفوا حتى ناس بلاد برا بيحبوه

فيصل هليل بالله ما تستغل شهرتى بالطريقه دى
اى زول عاوز يتصور جنب صورتى دى يدفع
الشهرة متاعب قلت لى الصور مختوته فى المحطه الوسطى حقت بوسطن؟؟؟

يا جماعة صديق الموج مالو؟
حصل ليهو شنو (بعد الشر)

____

طبعاً الكلام ده، على أساس إننا ما بنشكر الناس في وجودهم ....

لكن خلونا نحارب مقولة (الشكروهو قدامو نبّزوه).

____

شوية جدية:
شخصياً، سعيد جداً بآراء الناس البيعرفوا الموج، لأنو ده إحساسي بيهو من بعيد، بدون ما أقابلو.

أراه سوداني كما ينبغي أن يكون

مثل صديق الموج لا يرهقك بأن تتعرف علي شخصيته
يعطيك دائما عدة خيارات تختار أنت منها الطريقة التي تريد
أن تعرفه من خلالها ( ماكان متاح لنا هنا قوله الواضح الشفيف )

النتيجة واحدة هو ذاك الرجل السهل الواضح الشخصية والرأي والموقف

(تب ما وقف بين بين)

لصديق الموج المريخابي الوهيج التحية والتقدير
لاعيب فيه سوى أنه نجم ساطع طالع لا يقض له غياب أو افول ..

*

Quote: لكن صحى طلع مريخابى ؟

زول زى دا وبالأوصاف دى لازم يكون مريخابى .. هذا رجل لم يغير فطرته التى فطرها الله عليه

والله يا صديق الواحد كان بيمر على الصور في البوست مرور الكرام
لكن ما دام أخونا فيصل ختاها بالطريقه ديه
معناها المسألة عاوزه ليها قراية تحليلية تفكيكية..

أنا ما عاوز أسرح بعيد ..
لكن احسبك بتقول فيهاللناس كلام أبوالطيب المتنبىء:


أعيذها نظـــرات منك صادقـــة **** أن تحسب الشحم فيمن شحمه ورم

وما انتفاع اخي الدنيا بناظـــره ****إذا استـــوت عنده الأنوار و الظلم

سيعلـم الجمع ممن ضم مجلسنا **** باننــي خير من تسعى به قـــــدم

انا الذي نظر العمى إلى ادبــي **** و أسمعـت كلماتي من به صمــم

انام ملء جفوني عن شواردها **** ويسهر الخلق جراها و يختصم

و جـــاهل مده في جهله ضحكي **** حتى اتتــــه يــد فراســة و فم

إذا رايـــت نيوب الليــث بارزة **** فلا تظنـــن ان الليــث يبتســم
+ متعك الله وأسرتك الكريمة بموفور الصحة والعافية

تحية....

ياخذ من الموج تدفقه ....نشاركه ويشاركنا في الوقوف ضد قبح الاشياء والانظمة الفاسدة...نحمل معه النجمة ونجوب بها ساحات الانتصار...نقف خلفه في انتصار اخر موعود...

شهادات المتداخلين الذين يعرفونه دروس ووفاء لقيمة الكلمة والتي يحمل المذكور معناها ومبناها..وحتي هؤلاء المتداخلين احس انني اعرفهم واتابع حروفهم الاسفيرية لعلهم يشاركون الموج في ابتسامته الوافرة...وافرة لانها مريحة ومن المؤكد انها صادقة ايضا...

يديكم العافية

زول ما بتندم علي معرفته

الله اديهو الصحة وطول العمر

والله حوش بكري ده الذ حاجة في الدنيا ...... سوي لصديق ده قيمة كويس نحن ماقابلناهو قبل كده
ياعاطف يااخوي نحن سوينا ليك شنو عايز تدرع فينا صديق بشخصية متوهمة شاركت انت في صناعتها مع بعض حسني النية
ودالصايم وخالنا حمزاوي تحياتي

رسالة عبر البريد الأليكترزني ...
المرسلة إسمها حسب ما هو مكتب في خانة (FROM)
نجلاء الرفاعي

والرسالة عبارة عن فيديوهات :


ما عرفت أنزل الفيديوهات .... لكن أدناه ال URL الخاص بهما :

http://www.youtube.com/watch?v=2kryyAO1HNw
http://www.youtube.com/watch?v=Moe7qsaLOlU

-----------------------------

أرجو كتابة الإسم ... ورسالة مختصرة علي الأقل

مريخابي بس تكفيهو هييييييييييييييييع

الفيديوهات ما شفتها بس إحتياطي كدا يا مونج ( التاية ) ما تخليها تتابع البوست دا هههههههههههه

التحية للجميل صديق الموج ، عفوية وطيبة ، روح جميلة وكلمة صادقة
شكرا عاطف

نزولا لرغبة الجماهير

شكراً أستاذة عفراء

وفي إنتظار صديق الموج ليُقرر لنا .... إن كان علينا الإبقاء علي الفيديوهات أم حذفهما.

Quote: زول جميل اخو بنات دائما ضاحك وعيونه فيها هم والم كبير رغم بشاشته وجع البلد في كل قسمات وجه ولسان حاله لا تحسبن رقصي بينكم طربا فالطير يرقص مذبوحا من الألم

انا زاتى نفس كلام اختى العزيزه دى
واضيف على كلامك دا انو مريخابى كمان ياخ دى اهم حاجه

لو وزع حزن الدنيا علي كافة المخلوق لما كان اكبر

من حزن صديق يوم ان قطعت فيه اوصال الوطن... وكنت شاهدا علي ذلك

صفـــــــوة ودى الأهم,,

معاها حمــــرة عين .. وحمرة دم

ومحبة ناس من حوله .. متعه الله بالصحة والعافية

لن تنصف الحروف صديق الموج
وستظل خاسراً إن لم تلتقيه يا عاطف
..
..

لك وله التحية

تحية طيبه يا عاطف وشكرا على البوست ،
الموج بيهدم كل غفوه على الرموش ..
غايتو يا موج السَوَّتا فيك عفراء في المول ما حصلت..
ويمين كان ما شلت حقك إلا عاطف يغيِّر عنوانو دا..

.

Quote: تحية طيبه يا عاطف وشكرا على البوست ، الموج بيهدم كل غفوه على الرموش .. غايتو يا موج السَوَّتا فيك عفراء في المول ما حصلت.. ويمين كان ما شلت حقك إلا عاطف يغيِّر عنوانو دا..

مولانا محمد المرتضى ..........سلام

والله يامولانا مع انى قلتيها الحاجات دى قسمة ونصيب
لكن ما قايل فى زول يتذكر شاكوش من ايام الثانوى
والغريبه انها عارفه الوالده قالت لى عفراء دى بت طيبه
وطباخه ومستورة وبت ناس بس اكبر منك يا صديق يا ولدى
وقدر ما حاولت اقنع الوالده انو اربعه سنين ما فرق ابت تقتنع
اخيراً رضاء الوالده مهم وانت سيد العارفين،،،

الموج وود المرتضي والله أنا ما شفته الفيديوهات بس قلت النساعد..
لكن لمن جابت ليها كبر وشاكوش يمين الله الموج ده بالميت دفعة أبوي..
يعني اصلو الواحد ما يعمل خير في المنبر ده..
اسع بنادي ليك البروفات الصحي يوروك إنت قدر منو..

.

Quote: الموج وود المرتضي والله أنا ما شفته الفيديوهات بس قلت النساعد.. لكن لمن جابت ليها كبر وشاكوش يمين الله الموج ده بالميت دفعة أبوي.. يعني اصلو الواحد ما يعمل خير في المنبر ده.. اسع بنادي ليك البروفات الصحي يوروك إنت قدر منو..

-خالتى عفراء والله انا ما بقدر على زعلك
امسحيها لى فى وشى الشين ده،،،

ود الموج في راي اخو اخوان وشيال تقيلة

صديق قلب يا صهاينة ـ

حتى الكرفتة زرقاء

مرحب بالموج في عالم الموج الأزرق

*

ياخـال الناس ديل نســوا نقطة مهمــةوهــي:ـ



أن وراء كــل رجـــل عظيــــــــــــم أمــرأة


أها شـــن قــولــك




مع تحياتي للأسرة الكريمــة


أبومصطفى

صديق الموج ده أخونا ...مافي زول يهبشو

و الله يا احمد الشايقى وفرت علينا الكلام
و جيت من الاخر

Quote: كالسودانيين واضحاً كالسودانيين ومستقيماً كالسودانيين ... ومثقفاً كالامدرمانيين ... أتمنى له العافية وطول العمر

سلام عاطف ولك الاف التحايا
صديق الموج شيخ عرب واخو اخوان وود قبائل بحق وحقيقة
وما عايز ازيد عشان هو اكبر من الكلمات

سلام يا عاطف.
وكل سنة والاسرة بالف خير.
الواحد ما عارف يكتب شنو بعد كل هذا التقريظ المتدفق في حق الخال الموج.
توثيقه لبادي لوحده كفيل بمنحه درجة البروفيسرية بجدارة.
ربنا يمد في عمره ويحفظه لأسرته واحبابه.



محبتي

*

*

تحياتي أستاذ / عاطف .. وشكراً لفتح هذه النافذة الجميلة للتحدث عن أخونا صديق الموج ...

الرجل غايه في الطيبه وقلبو زي اللبن الحليب ، لايحمل الحقد أبداً في قلبه الكبير ، (وليس زعيم القوم من يحمل الحقدا) ، زول طيب ، ومرح جداً لا تمل الجلوس معه ، سريع البديهه لمّاح أخو اخوان بجد ، يعجبني فيه إنك مهما اختلفت معه فإن ذلك لا يفسد للود قضية معه ، يهتم بأدق التفاصيل ... مرة تمت دعوتي لحفل أقامته الحركة الشعبية بالرياض لتكريم الأخ / عبد المنعم عبد العال وكان صديق مكلفاً بتجهيز العشاء تخيل لم ينسى الرجل حتى قش تنظيف الأسنان ، مثقف جداً ، ويعتبر ود الموج مرجعاً في أغنيات وشعر الحقيبة ، وأرجو أن يهتم بتوثيق ما لديه من معلومات ثره وإصدارها في كتاب متأكد أنا من أنه سيلقى الرواج الذي يستحق ... عموماً صديق يعتبر كنز من المعلومات والثقافة العاليه ... من عيوبه الأخرى بالإضافه لكونه مريخابي .. زول كيشه في الويست لامن يحيًرك زاتو ياخ ده بياخد سيك يومياتي على الله ...

ولكم خالص الود والتحية ؛؛؛

فلنوثق هذه أولاً :

Quote: من عيوبه الأخرى بالإضافه لكونه مريخابي .. زول كيشه في الويست لامن يحيًرك زاتو ياخ ده بياخد سيك يومياتي على الله ...

Quote: من الذين أتمني أن ألتقيهم . ما كويس عشانك[/QUOTE bold يا شباب زى ما تقولو فضيت شويه ابدأ بصاحب الزهايمر حمزاوى طبعاً دى شهادة لايعتد بها كثيراً فهى من شيخ مخرف... هو طبعاً مكسوف يقول عنى اى حقيقة عشان ما يقولو التلميذ استاذ عموماً شكراً حمزاوى،،،

---

Post: #111 Title: Re: صديق الموج .. مثقف .. لطيف .. وظاهرة عليه الجدعنة . Author: صديق الموج Date: 03-10-2012, 03:31 PM Parent: #110 ما اوجع الحزن عندما يستعصى فتقه على رانقه سوف اعود لكل الذين سبحوا بحمدى دون من او اذى،،،

---

Post: #112 Title: Re: صديق الموج .. مثقف .. لطيف .. وظاهرة عليه الجدعنة . Author: حبيب نورة Date: 03-10-2012, 03:47 PM Parent: #111 أحترمه جداً وأحبه من غير تفسير راجل جميل وصاحب ضراع أخضر التحية يا عاطف