جانا كلـــب سنونو صفر كشح المحلب من توب أحمد

صوت ينساب عبر الاثير طيب وزين وملان حنان وبتحنان
ما هماهو ولا خساهو بالترتيب ولا التعريف
هلو معاي منو وعارفك انت منو لكن كدي بس اياهو طبعو فطري عديل
ديل أهلي ناس امحمد ود عراك والخزين ود جادالرب
هناك في البيوت بدخلو كدي بس لا كو كو ولا استذان
منو سيد البيت ومنو الضيف ومنو سيد الحق كلنا كدي بس حقنا واحد
.
.
جننا كلـــــــــلاب سنن صفر وكشحن المحلب من توب احمد وقالن هو
انبهطتت ام احمد وقالت كر وفات احمد خلا البلد وترك ام احمد عادمة الضو
وختت توبا في نص راسا تقبل وين تسوي شنو احمد وفات واياهو الضو
يوما ادخلي من الحر ما بدخل منتظرة اسوق فوقي الضل

وسيك وسكنا وسقطو كتلنا
وديك وجدادة في بحر مكادة
.
.
.
للناطقين بغيرها فقط

استمر يا عبد الله

أفصح يا رجل


ويا ريت تترجمها بالنوبية أو اي من اللغات النيلية سواء من الشمال أو الجنوب أو لغات جبال النوبة

حتى نستطيع أن سودنة المعنى

وتفريش الأسنان الصفر لكي تنجلي وتصبح بيضاء من غير سوء

والهول ضرب التلفون
والعسكر واقف طابور
والجبة وقعت في البير
صاحبا واحد خنزير
فات وفات في ديلو
سبعة لفات في ديلو
.
.
.
هكذا تتوارد خواطر أحمد في غربة ممتدة كالرهاب
ويحسب ان العمر عمرين عمر للغربة يجمع الرهاب
وعمر يبنى في طنو رهاب آخر
ام احمد ما زالت في نفس المنظر مقبلا لوراء علي المقابر
لاشافت تربتو ولا شمت عرق عراقيهو
من يوم الكلــب الكشح محلب ام احمد الختتو فوق توب احمد
واحمد فات... فات الركايب تاني ام احمد لاهجست لاخلت الجيران هجسوا

Quote: وفات احمد خلا البلد

احمد راجع يا شيخ العرب
عما قريب يفتح شبابيك الحبيب
و الحال يطيب

البيت يتم .. تتلم تلم .. تفرح فرح .. تحلم حلم
كم تطمئن

حقك يجيـــــــــــــــك
لا فيهو شــــــــــــــك
ويفوتو هــــــــــــــــم
والعدل يعــــــــــــــم
----------

الساقية لسع مدورة
واحمد وراء التيران يحب
اسيان يفكر منغلب
مابين بكا الساقية الهناك
وما بين طفولة بتنتحب
في الماشين المدارس
في المصاريف في الكتب
في اللضاق بيه المكان
هسع سافر واغترب
لمدن بعيده تنوم وتصحا
على مخدات الطرب
والساقية طاحونة الامين
طول الليالي بتنتحب

فيصل خليل يا حنين
لمتين نغني برا البلد
لمتين شوقنا الدفين نحضن تراب البلد
.
.
.
آآآآآآآخ يا بلد
نفسي اشوفك يا فيصل في محطة سبعة
.
.
.
شكرا جزيلا ياخي

قالوا إذا اهلك كلاب أمرق هوهو معاهم

Quote: قالوا إذا اهلك كلاب أمرق هوهو معاهم

يا خالي حمزاوي سلام واحترام
اهلنا زينين وطيبين
ولكن من اين اتت هذه الكـلاب السعرانة ؟

الاخ عاصم فقيري
سلام وتحية واحترام
اقوليك حاجة يا عاصم
حمودي ولدي كان عمرو سنتين تلاتة وجيرانا هنود عندهم بنت في عمرو
الشافع اطلع الشباك المقابل لشباك الهنود والشويفية يا عاصم تتطلع شباكم
وتعال اسمع ونسة وضحك اتقول امهم السرة بت ود الضواها
اهتميت جدا بعلاقتهما حتى توطدت علاقتنا الاسرية والتقينا
وحمودي وسان الهندية صارا اصدقاء لاكثر من سنتين وكل يكلم الاخر بلغته
.
.
.
نحن بنحب بعض يا عاصم جنوب وشمال شرق وغرب ووسط وبندر
ولغتنا واحدة
فرقنا الكلـــب الكشح المحلب من توب أحمد
لغتو ما فهمناها كلو كلو وسنون اصلا ما بتنضف يا عاصم

صالح عبده سلام يا حبيب
نستمر في دروب الغربة المظلمة
والصباح لو لاح لاداعي للمصباح

متابعة لصيقة وسيعود احمد يا ود البوش
غايتو بتنكت ليكـ في جنس حاجات تعرفها برااااكـ
والله صحي ()
أها أولاد البنــدر ديل "الحناكيش " علا تترجم ليهم الحكاية دي

تحياتي

Quote: يا أم أحمد دقي المحلب شعر : محمد المهدي حامد نور الدين يا أم أحمد دقي المحلب دقي المحلب فوق توب أحمد في ذات يـوم والنيل دا بيشهـد ... إنو بلدنا دي كانت عامري وكان الخير بى فوقا ممدد حتى الغيم ما بخلف وعدو لما الشفع ليهو يغـنوا " يا ميطيرة صبي الليلة أحلبي سحابك في عينينا " كان في الحال بتشيل الغيمة وتصبح ترعاً ماب تتحدد وكان الشفع يفرحو بيها ونفرح بيهم يا أم أحمد وحتى اللوبي الشم الزيفة إنشر وطال يتراقص فرهد رغم بساطة الحال تلقانا قليلنا يزيدنا سعادة ونسعد أصلوا الهم ماحـام بى فوقنا وما شفناهو وكان الأبعد نصحـا على قنانة شاينـا نمشي القش عند العصرية ننـوم وحجـا حبوبـة معانـا يشاركنـا الأحـلام يتردد فاطنة السمحـة عشقنـا جمالا عشقنا بلدنـا وطيـرا الغرد وكنا زهـور في جناين الشاطي قريرنا هو مرتع خيرنا الأوحد وكنـا كبـار في عيون حلتنـا وكل شـوارع الحلة بتشـهد وكنا حريـرة وكنـا ضريرة وكنـا عديلة وزفـة وسيرة وكنـا بطان في ليل أعراسنـا وكنـا فرح كل يـوم بتجـدد يا أم أحمد دقي المحلب دقي المحلب فوق توب أحمـد وفي ذات يوم والشفع نامـوا جانا ###### سنونو صفر حلب الناقـة وإتعشـابـا داك اليـوم الشفع قامـوا مع الفجراوي .. الطير ما غرد النخلة الوارفـة في نص الدار الضللت الحبـان يوماتي وكانت مرتـع خيـر للشفــع بلعت ضلها رجفت كلها جفلت من غيم ليلاً أسـود وحتى نسيم الصبـح السـارى اليـوم داك مزهلل جارى ..ً!! ومافى نفس غير حس الصنـة وبـوخ الأنة وشوقاً جنّ ودمعة تسـرسـر فـوق الخــد ..!! غيوم العبـرة إنداحت وشاحت وسدت حلق الأفق الباكي السارف دمعـو يشفق ... شفقو يوهدب قمرو الجاكي ينـوح ..يشهق .. يتنكـد يومـاً لبس الضـو بالقلبـة وبـدا بالليـل يومـاً صارع روحنـا وغلبـا وهـدّا الحيـل حيلنا وحيلن ناس الحلى صغار وكبار الشفع واليادوب في المهد يا أم أحمد من يوم داك وأب أحمد غايب سادر فوق ديداب الراحو وأريت الغايب لو كان جايب دافـر والقدام مجهولة وكل أركان البـال مشغولة والأيام بتزح مشلولة تجرجر أذيال أملو الخايب وكل أحلامو تموع تتـبدد أتارى الغربـة رفيقة الكربة شقيقة الآهـة ال للوجـدان دايماً شواهة تشكّع فوقو كلاب الحسرة يضيع وتضيع قبالو المسرّة تنّوخ فوقو زوامل الصايب وهمّـاً سرمـد زولاً فات الضل الوارف ولى أنفاس الحن كان كارف ومن فيض الإحساس يوت غارف مالك قولو مفارق ضلك؟؟ وبارى سراب الغربة وعارف ليلا بهيم و صباحا مرمّد يا أم أحمد دقى المحلب ديل سنتين واب أحمد غايب جاهو ###### سنونو صفر لملم باقي أفراحو مشابا ونشّف ريق السيل والغيمة ويبّس كم ضرعات حلابـة وضلّمت الأيام ضليمة بلاد الغربة يباب وخرابة أتارى بلدنا دى ضمة رحيمة برغم الحزن الحارس بابا ولو في ايدا فرد مليمة بتفرح بى ضيفانا وتسعد بلداً نيلا براهو يطمّن وصيدا إن جال في الدارة يجنن وزولا أجواد ضكران ومصنّن وطلتو في الحوبات بترحمِن لا ب يتخاذل عند الحارة ولا ب ينضارى في يوم المشهد يا أم أحمد دقى المحلب لى كل غايب من أوطانو لى كل شاعر عاشق زيّن صدر أبياتو بحب سودانو لى كل زارع بوّق أرضو وقرّن في الكروات حيضانو وللسادّات الفَرَقَة معاكِ قدر ما عانن هُنْ بْيعانوا ساندات ضهر الحال إن ميّل شان حِبانِنْ ياما كانوا دقى المحلب للغايبين يمكن ذات يوم الخطى تتسدد ونرجع بلد العزة الخيلا تجَقْلِبْ في الوجدان من قُمنا وما فارقنا في لحظة صهيلا وزى ماطيرا بيصدح يومى يرقّص بالتغريد في نخيلا نغنى ليها نقول يا تومى نضمها في الأعماق ونشيلا تزغرد (نورا) تضم (حميدا) ويشرح صدر (العازة) (خليلا) وتفرح أمدرمان وتبشّر وتسرج ليل الطابية وخيلا للعايدين الغابو وجابوا جابوا ضراعن بس لى نيلا تَشَويمْ بيهو وتلقا شليلا ويرجع للقمرية هديلا ويبقى العود يا أم أحمد أحمد ويبقى العود يا أم أحمد أحمد ويبقى العود يا أم أحمد أحمد

اللمين يا كلس ياخي قصيدة محمد المهدي مبالغة
اول مرة اشوفها ولكني حسيت بانو اختصر حكايتي من اولها لاخرها
وريحتني من باقي الكلام الكتير الكنت ناوي اكتبو
طبعا انا بكتب ساهي من الذاكرة وللشاشة مباشرة
زي ما تجي تجي مرات اكشحوا ومرات اجيبو ملان
.
.
.
عاين جاي يا اللمين
اسع نحنا في الربع التاني ولا التالت ولا انا بنقز برا التقنت ؟
عشان ما اعرض في النشرة كلمني سمح ؟

Quote: ولكن من اين اتت هذه الكـلاب السعرانة ؟

يومهم قرب اولاد اللزينا
سنصلي صبح الخلاص حاضراً

طه ود احمد فاتو ابوهو في بطن امو
كبر طه ولبس نعلاتو قلب
مافي الوالد البعدل ليهو وامو تسرح بيضا وسودا غبش
لا كركار ولا زيتا مر تطرح بيهو وشيها وحالا زفت
طه وين تنادي ام احمد ناغمتا سلوى تراهو ختر امكن علي الحفير وامكن ولدي ودر
تروح روحك آ سلوى بت اختي روحي في طه فيهو روح ولدي كيفن تقولي ودر
كلنا رحنا يا خالتي براك ما شفتي الكلـــب الكشح المحلب من توب احمد

يا اهل السواقي الديش
مآدين كروشكم ليش؟
ساقية حسن شِقيش
تدى المُلآح والعيش
يا والدة وينو حسن؟
الكان زمان صِنديد
شافوهو في البندر
بيعاني من الضيق
ضِيّق الحياة الخلّت
المِتلو يمشي بعيد
يا حِليلو يا ما كان
زولاً سخي وضكران
ما مخلِى زول عدمان
الحِلة والجيران
ما شافو يوم زعلآن
كان بيرفع الآذان
يا حليلو يا خِلآن
شافوهو في البندر
بيصارع الحِرمان
ساقيتو يا حليلها
شالوها ناس جونا
زنديّة حكمونا
حسن اللكان ضو بيت
وسط الظلط حيران
راح مِنو راس الخيط
يسأل في أهل الخير
يا أخوانا وينو شبير؟
قالولوا روّح فآت
قام بجماعتو بعيد
غنولو الف نشيّد
يعرض تملى سعيد
أيامو كُلها عيّد
إتحيّر المسكين
سألوهو ناس عآبرين
يا عمو ما عندك سرير؟
رآكوبة من حرّ الهجير
مكتوف على عيدانها زير
لآزم الرُقاد قطعة حصير
توب من فحيح الزمهرير؟
فوق خدو سآلت دمعتين
قشاها بوجع السنين
الصبر بس عاد لآمتين؟
شاف طيفها يترنح حزين
وصوتها القِبيل مُنساب حنين
في سمعو كان زفرآت أنين
تنادي في الأطياف بشيش
يا اهل السواقي الديش
وين فات حسن شِقيش؟
من تفتحت مطآميرو
لجارو وعشيرو
المابي تقديرو
ما دقّه لسديرو
الهيبة في شالو
كان القدر شالو
الجنّة فاتحالو
والراجي فيها عمآر
خشمو التُرآب كآلو
يا اهل السواقي الديش
ساكتين تتنطنو ليش
دلوني وروني
كان السمِح فآرق
ما اظنى بعدو أعيش...


ود المدير...

ود المدير الحلة راجياك
ولكن ما ياها زي يوم داك
القمرة مخنقة والقروانات راحت مع السنبرية ام قدوم
والشمش تطلع وتغيب
الليام كلها بقت سودا
من يوم جاء الكلــب اللغا موية اللبريق
وغشا الناس القالوا عشم الكــلب في موية اللبريق
تعال وقول البغلة في اللبريق
تعال وجيب معاك محلب ودربكة
عليك الله يا جنا حصل ضقت طعم النوم
عليك دينك هل واشنطوم زي الخرتوم
تعالوا يا جنيات ندك الحصون دك جد نهز الارض نموت جت ولا كمان تولع الخرتوم