مُظاهرات .. مُظاهرات , اندلعى يا ذات العجاج .

1
ومُظاهرات .. مُظاهرات
اندلعى يا ذات العجاج
عالى الهتاف .. شاقى العنان
افتح ترابيس اعتقال
بوليسنا ابـ بومبان تعال
(دايرين دروس فى حب حكومتنا العروس)
اضربنا فى الراس والكراع
كهربنا فى الخصى والنهود
لعلع رصاص
اصقعنا بالخطب الرئاسية الكبار
اندلعى يا ذات العجاج .
2
خوفنا انشرخ
ضرساً مسوس ينقلع
ومتى المسدس بنفعو .. لما الجماهير تندلع ؟ .
3
اتكلمى .. واتحركى
او ارفسيهم واصهلى .. وتصهللى
اخر الطريق راح توصلى
وتوضئى
قرب اذان الفجر يصدح بالخلاص
فـ تخلصى
من عبء رعبك
واركضى
نحو انتصار .
4
وضعوا اللجام شان يركبوك
يا مهرتى البرية .. يا بدر التمام
يا درس فى التاريخ سلام
يا ارم يا ذات العماد
(اتراك) سلام
يا (انجليز)
(عبود) سلام
(جعفر امام العرش) كيف ؟
ما قلتوا انتوا نهاية التاريخ !
يا القلتوا رب الكون خلق مهرتنا بس شان تركبوا !
فلماذا يعنى ودون مؤاخذة يا شباب ؟
لما الحثالة فى بيت ابوكم تنتفض
بتجقلبوا ؟
5
نوارة النوار سلام
يا مهرة ضد هذا اللجام
برسيم بيرسم ليك طريق
نحو السحاب
اندلعى يا ذات العجاج
زهج انتظار من انتظار
لا رجعة تانى الى الوراء
و لا فرار
الشارع المفتوح وراك .. والبحر قدامك فسيح
والحل فى الشارع صريح
فلماذا يعنى ودون مؤاخذة يا شباب
لما الحثالة ولاد شوارع تنتفض
بتجقلبوا ؟ .
6
ارفع مسدس عسكرى
اضربنا فى الراس والركب
بس ذاكر التاريخ كويس
وافهمو
هو اللى بشرح فى ذكاء
سر العلاقة بين المسدس .. والجماهير الغفيرة
كلمة السر .. (اندلاع)
اندلعى يا ذات العجاج .

شاهين