عرض اكتافكم روِّحوا يلاَّ .. محجوب شريف. فيديو

سجلت القصيدة من الأستاذ شريف صورة وصوت يوم السبت 23 يونيو 2012 إبّان انتفاضة الشعب السوداني المستمرة منذ يوم 16 يونيو وحتى الآن.



http://youtu.be/Tpxln-QS7Ik





عرض اكتافكم روِّحوا يلاَّ
محجوب شريف
شعبنا أصبح وأمسي وظل
كترتوها عليه الطله
أكَّلتوهُ زمانِك ممَّا
ولبّستوهُ كذلك ممَّا
عدّمتوهُ الخيت والغله
شبراً شبرأً عابس ويابس
أكتر منها مابتذلّ
الكانون في الشارع ولّع
طَول منّها نار الحله
عِشنا وشفنا تب ماخفنا
العايزكم لمّن جرب كنتو اضلَّ
تلك مآذن ولاَّ مخازن ؟!
خمَّ ولمَّ فساد الدنيا
ثم اتنحنح ...هي لله.. هي لله
كبر وصلي
لما رفعتو السيف والمصحف
ولافي المتحف بقى حق الله
باسم الدين والدم والدمعه
وباسم الخالق عزَّ وجلَّ
اتعذبنا ... وما كذبنا
حليلو الفات ... والمات وإتشل َّ
بيوت اشباح وجراح ومذله
دم الشهدا رصاصه رصاصه
وحبل المشنقه داك إدّلي
ومع ذلك حتي اللحظه
ما اتربَّصنا ...ولا فجَّرنا
إلا كذلك ما اتحجَّرنا
قد أدبنا الشعب الطيب
نحن جميعاً دونو اقلَّ
بيتنا وساسنا ورفعة راسنا
نحن حنانو وجَنا وجدانه
مش لافتات في الإيد ومظله
إيد علي إيد وسِلِّم سِلم
ما بنسلم وشعب مُعلم
ما بتخلَّي
حاشا وكلا ما بنتْخلَّي
غُبننا أكبر من تتصور
وحكم الفرد زمانك ولَّى
القذافي وأصبح مافي
حسني مبارك ...وعلي عبد الله
ياحاج زين إستغفر ربك
تسرق شعبك
وتهرب تلبد جمب بيت الله ؟
والغرقان في الدم السوري
حتي الحاجب منو اتبلَّ ومابتحلَّ
الهبباي سوداني مُدرب
جرَّب هدم وجرب عَلاَّ
ما بالصدفه ولاها لعلَّ
فيكم ريحه من الشبيحه
خلوا البلطجه روِّحوا يلاَّ
كل العالم عين بتاوق
صوره وصوت وكتاب ومجله

مرحب بالدكتور ياسر الشريف

نورت المنبر وشكرا

تسلم يا بشير
وسلام للجميع..



وهذه قصيدة أخرى قمت بستجيلهافي نفس اليوم، والقصيدة قديمة ولكنه تذكرها بقوة عندما سرت شائعة خبيثة بموته وانتشرت قبل عدة قبل أسبوعين تقريبا.

http://youtu.be/auvxd6maEaI



أقول دون رهبة
أقول دون زيف
أموت لا أخاف
أين أو متى وكيف
بغتة مستمتعا
بأنجم السماء
ليل صيف
رصاصة في القلب
طعنة من سيف
أموت لا أخاف
أين أو متى وكيف
أموت في الظلام
في الزحام
تحت غفلة
بساحل الطريق
حريق
غريق
أموت في سريري
زوجتي بنتاي
جيرتي عشيرتي
وأصدقائي
قطتي راكوبتي وزيري
معززا مكرما مهندما
بناصع البياض
موكب يحفني
لمرقد أخير
أموت لا أخاف
كيفما يشاء لي مصيري
أموت لا أخاف
قدرما أخاف
أن يموت لحظة ضميري

وهذه القصيدة الرابعة التي سجلناها للأستاذ محجوب شريف يوم السبت 23 يونيو 2012

http://youtu.be/ssu4fYBGua8


قدر الثبات.. ضد السكات
أغسطس 1989، قسم المديرية في سجن كوبر

محجوب شريف

جيناك
وكنا طلعنا منك
نحن مرفوعي الرؤوس
جيناك مرفوعي الرؤوس
أفتح زنازينك
أهو بنفتح صدورا ما بتكوس
الرحمة تبْ
ما فينا مِرْقاً فيهو سوس
بل فينا عِرقاً من جذور الشعب
عشقاً لا يُداس
نحن بندوس
على كل من عايز يدوس
نحن بندوس
جيناك وكنا طلعنا منك
عنوةً كدا واقتدار
تشهد ترابيسك هديك
وهدا الجدار
نهر الجماهير العميق
جلجل شديد الانحدار
زلزل حديد الانكسار
امتد حولك واستدار
وملا الطريق
فإذا بأسوار الضفاف
وسواعد الناس النخيل
حملتنا أمواج الهتاف
في ذلك الصبح الجميل
حملتنا أفواج الكفاف
ومدامع الفرح النبيل
الغدر ما ببْقى انتصار
والانكسار
المستحيل
المستحيل.. المستحيل
اسمعنا يا ليل السجون
نحن بنحب شاي الصباح
والمغربية مع الولاد
والزوجة والأم الحنون
والأصدقاء
وإلى اللقاء
واللّمة عند الأمسيات
والتكية جنب الأغنيات
والقدلة في السوق الكبير
نتمشى نغرق في الزحام
ملء العيون
بنحب كدا ونعشق تمام
إلا بْنكون قدر الثبات
ضد السُّكات
ضد التسكُّع والجنون
جنبا إلى جنب التماسك والحنين
أفتح زنازينك أهو بنفتح
شبابيك اليقين
ــــ
والآن شبابيك اليقين تفتح مشرعة في كل مساحات السودان
المجد لشعبنا ولشهدائه من كل عرق ولون ودين

فوق

Quote: وحكم الفرد زمانك ولَّى القذافي وأصبح مافي حسني مبارك ...وعلي عبد الله ياحاج زين إستغفر ربك تسرق شعبك وتهرب تلبد جمب بيت الله ؟

أهلا يا دكتور ياسر.
أهلا بالعضو الجديد القديم.