نبؤة و نصيحة !!

غبار في وجوة خير أهل هذا البلد ... غبار و عرق في وجوه شبابنا ...
رائحة اطارات محروقة ... قطرات دماء علي الأسفلت ...
رصاص ينطلق و يعود برسالة :
هذه القلوب لا يمكن الوصول إليها ...
يرجي ترك المحاولة !!!

الأرض في سوداننا لن تشبع من أجساد شهدائنا ... و لن ترتوي من دمائهم ...
الأمر سيكون سريعا ....
أسرع مما تصورو و أسرع مما تصورنا ....
سيسقط النظام في اسابيع قليلة ...

المخاض سيكون بعد الثورة ... ثم يولد هذا الوطن من جديد ...
وطن انتظرناه طويلا ...
و سيكون - بحول الله - قريبا ..
أقرب مما تخيلناه جميعا..

سيجئ الأنبياء الكذبة ...
الذين أكلو من مائدة الانقاذ...
و نبتت أجسادهم من مال الانقاذ ... و باسم الانقاذ بصقو علي وجه الوطن ...
سيجئ الكيزان و الكوزات ...
المستفيدين و المستفيدات ....
الوالغين في دماء و مال الشعب و الوالغات ....
الأحياء منهم و الأموات ....
سيجيئو باسم نفس الشعب الذي ذبحوه ...
و باسم نفس الديمقراطية التي اغتالوها ...
و باسم نفس الثورة التي ودو لو وأدوها ....
سيجيئو يطلبون الصفح و السماح ...
الويل لينا إن سامحنا قبل أن نحاسب !!

Quote: سيسقط النظام في اسابيع قليلة ..

يسمع منك ربنا..

بس اذا صدقت نبؤتك وعملنا بيتك مزار ما تجيب لينا سيرة البدع بالله:)

امين الامين ازيك؟

يا حسين ... والله أكاد أراه راي العين ...

امين يا امين

سلام و احترام,

الحساب لابد آت!
ستسقط الانقاذ ان شاء الله, "رفعت الاقلام و جفت الصحف"!

يا بدرنا ... سلام ياخي

Quote: الحساب لابد آت! ستسقط الانقاذ ان شاء الله, "رفعت الاقلام و جفت الصحف"!

عندما تسقط الانقاذ ... ما لم يتغير كل شئ ... سنظل ندور في نفس الدائرة ... و القصة بقت ما مستحمله ...
ياخي لفترة طويلة جدا ... الترابي و جماعتو كانو هم القيادة الفعلية لمعارضة النظام .... و هم من جاءو بالانقاذ ... مكنو لها بقتل الناس و تشريدهم ... و يوم أن إختلفو علي السلطة ... تقدم الترابي كالمسيح المنتظر لتخليص الناس من الانقاذ ...و ده كلو بدون حساب ...

الحساب يا بدرنا قبل يوم الحساب !!

Quote: لمخاض سيكون بعد الثورة ... ثم يولد هذا الوطن من جديد ... وطن انتظرناه طويلا ... و سيكون - بحول الله - قريبا .. أقرب مما تخيلناه جميعا

نعم المحك هو ما بعد الثورة، لذلك على عقلاء هذا الوطن و مثقفيه العمل و التخطيط
لذلك اليوم .
سلامات يا أمين

Quote: الويل لينا إن سامحنا قبل أن نحاسب !!

سلام يأ أمين
أتفق معك في قراءتك، وما أخشاه حدوث انقلاب استباقي، يرتدي قناع الثوار، ويهدف لحماية هؤلاء الذين سرقوا
أجمل سنين عمرنا..بل سرقوا حلمنا في وطن خير ديمقراطي...

أمين يا بروف،
السلام عليكم،
لا ننتظر منك هذه اللغة المناضلاتية!
الثورة آتية آتية، دي ما فيها اتنين تلاتة!
لأن الإنقاذ ما عاد عندها أصلاً رصيد من القيم لم تستنزفه،
لم يعد عندها الآن سوى قوة السلطة!
فنحن في الظرف الراهن بحاجة ماسّة،
إلى الاجتهاد والحوار الموضوعي المخلص،
من أجل أن تحقق ثورتنا فعلاً ما نرجوه من ورائها،
نحتاج نبني جدار متين من الثقة بين مختلف الاتجاهات
غير الإنقاذية في الظرف الراهن، من أجل توجيه قطار الثورة
نحو مساراتٍ آمنة!
وهذه كما تعلم قضية خطيرة جداً جداً!
لو ما استطعنا تكوين قاعدة عريضة،
من أجل تغيير سلمي ديمقراطي،
يقيم دولة القانون،
سنكون مواجهين بخطر كبير!
الآن كما ترى يوجد في هذا المنبر إجماع سكوتي، وأحياناً صريح،
على أن المهم هو أن تسقط دولة الإنقاذ (بكل وسيلةٍ ممكنة)
وبعدين نشوف الحاصل!
وهذا تفكير مغامر مخاطر لا مبالي!
لتسقط دولة الإنقاذ غير مأسوفٍ عليها، في مزبلة التاريخ!
لكن لا نريد أن تذهب تضحيات أبنائنا وإخواننا سدىً!
مع كل احترامي!

Quote: الويل لينا إن سامحنا قبل أن نحاسب !!

نعم يا بروف، لا بد من الحساب

(ولكم في القصاص حياة يا أولي الألباب)

الفرج قريييييييييييييب جدا

لا حول ولا قوة لهذا النظام
لا اصدقاء ولا دعم. نظام مكروه معزول من كل العالم
وقد حانت ساعته ,,

لابد من نظام قوي تحالف شامل لكافة القوى
ليهدينا الى النور
لتستمر الثورة
ولنصل الى غد افضل
تسلم يا امين وتسلم احلامك ورؤاك
هي نبؤة
ننتظر النصيحة
ومنتظرين الحكماء

ــ
-
-
-
-

-------------------------------
خارج موضوع البوست
يا أمين ..
واليوم فقط .....
لقد تحصل صديقي بدرى محمد سليمان علي رقم تليفوني بمحض الصدفة وعبر (قوقل) .. وليس أمين
فإذا بي أستمع لصوت لم أسمعه منذ ما يقارب (رُبع القرن) ..... فشكراً لعمنا (قوقل) .......

سلام يا امين

أقامة دولة القانون هو الهدف الاول، وتحت ظل هذه الدولة فاليتقدم كل من له مظلمة الي القضاء العادل، مظلمة في عهد الانقاذ او في غيره، وهناك جرائم لا تسقط بالتقادم..
الحساب مهم حتى لا يتكرر ما حدث، ولكن من هو الذي سيحاسب؟ الحديث عن الشرعية الثورية ومحكمة الرأي العام هو مجرد حديث رومانسي لا يصلح في عهدنا هذا ولا في بلدنا هذا..
علينا اقامة نظام قضائي عادل ومستقل وشفاف اولا، وهو الذي سيتولى محاسبة كل من يستحق المحاسبة..

تحياتي اخي امين

Quote: سيجئ الأنبياء الكذبة ... الذين أكلو من مائدة الانقاذ... و نبتت أجسادهم من مال الانقاذ ... و باسم الانقاذ بصقو علي وجه الوطن ... سيجئ الكيزان و الكوزات ... المستفيدين و المستفيدات .... الوالغين في دماء و مال الشعب و الوالغات .... الأحياء منهم و الأموات .... سيجيئو باسم نفس الشعب الذي ذبحوه ... و باسم نفس الديمقراطية التي اغتالوها ... و باسم نفس الثورة التي ودو لو وأدوها .... سيجيئو يطلبون الصفح و السماح ... الويل لينا إن سامحنا قبل أن نحاسب !!

هذه هي القاعدة يا اخي امين عندما اتكلم عن الاخوان بصفة عامة
واراك هنا في هذه النبوءة الصادقة تتفق معي رغم انك اديتني هبشة في حديثي عن اخوان مصر
وزي ما اقولو اهلنا البصل ريحتو واحدة فاخوان مصر هم اخوان السودان وهم الاخوان في كل مكان

غايتو الانا متـاكد منو هو:
الحكومة سقوطها بنشاف بالعين.

كـدي تعال أفرز لينا النبوءة من النصيحة!!

الحكومة ساقطة ساقطة، لو ما الليلة بكرة. حتى لو الناس قعدت في بيوتها وما طلعت مظاهرات. ببساطة لأنها ماشة بعجل الحديد

يا بروف وين الياسرين (العوض وأب تفة)؟
في إشاعات إنو أب تفة مشغول اليومين دي ببروفات البدل، لأنو قالوا مرشح يمسك حقيببة في الحكومة الانتقالية

سلام يا حلوين .... حتي أعود ... شكرا لكل الأراء

أمين أزيكـ

خليني أرد بالنيابة عنك لود الصايم ..

النبؤة ... بالدراجي التعوسي كدا ..

البشيرح ينقلع و يقلب وشو (آذ سووون آذ بوسيبول) في رمشة عين يعني..

و النصيحة ;كالآتي: ما ينقلع الا و العين بي عشرة و النخرة بـ100 شفت كيف!

هوي يا امين
اصحى
اصحى ياخي الواطة صبحت
يا زول اصحى الاولاد اتاخروا من المدرسة



وصحى امين من النوم مخلوع
هو الحاصل شنو؟
الثورة وصلت وين؟
الرئيس بقى منو؟

قالت ليهو:رئيس شنو، ما ياهو القشير القدامك ده
وشاف البشير يبشر ويرقص
ثم صاح: كم لبثت؟





----------
كم لبثت سرقتها من مورتا

Quote: أقامة دولة القانون هو الهدف الاول، وتحت ظل هذه الدولة فاليتقدم كل من له مظلمة الي القضاء العادل، مظلمة في عهد الانقاذ او في غيره، وهناك جرائم لا تسقط بالتقادم.. الحساب مهم حتى لا يتكرر ما حدث، ولكن من هو الذي سيحاسب؟ الحديث عن الشرعية الثورية ومحكمة الرأي العام هو مجرد حديث رومانسي لا يصلح في عهدنا هذا ولا في بلدنا هذا.. علينا اقامة نظام قضائي عادل ومستقل وشفاف اولا، وهو الذي سيتولى محاسبة كل من يستحق المحاسبة..

سلام صاحب النبوءة

شكرا شهاب

تحياتى

وعليكم السلام يا سعدالدين

Quote: نعم المحك هو ما بعد الثورة، لذلك على عقلاء هذا الوطن و مثقفيه العمل و التخطيط لذلك اليوم . سلامات يا أمين

الساسة في هذا البلد مفروض يكونو في حالة تنسيق لمرحلة ما بعد الانقاذ حتي لو سقطت الانقاذ بعد الف سنة .... مفروض علي الأقل يكون في تصور مبدئي لما يود الناس عملة حال سقوط الانقاذ
----------------
وعليكم السلام يا نادوس

Quote: أتفق معك في قراءتك، وما أخشاه حدوث انقلاب استباقي، يرتدي قناع الثوار، ويهدف لحماية هؤلاء الذين سرقوا أجمل سنين عمرنا..بل سرقوا حلمنا في وطن خير ديمقراطي...

مفروض نكون صاحيين يا نادوس ... الناس لن تقبل بغير ريح عاتية تكنس كل هذا العفن !!

وعليكم السلام و رحمة الله يا صلاح ... يا زول إنت وين ؟

Quote: أمين يا بروف، السلام عليكم، لا ننتظر منك هذه اللغة المناضلاتية! الثورة آتية آتية، دي ما فيها اتنين تلاتة! لأن الإنقاذ ما عاد عندها أصلاً رصيد من القيم لم تستنزفه، لم يعد عندها الآن سوى قوة السلطة! فنحن في الظرف الراهن بحاجة ماسّة، إلى الاجتهاد والحوار الموضوعي المخلص، من أجل أن تحقق ثورتنا فعلاً ما نرجوه من ورائها، نحتاج نبني جدار متين من الثقة بين مختلف الاتجاهات غير الإنقاذية في الظرف الراهن، من أجل توجيه قطار الثورة نحو مساراتٍ آمنة! وهذه كما تعلم قضية خطيرة جداً جداً! لو ما استطعنا تكوين قاعدة عريضة، من أجل تغيير سلمي ديمقراطي، يقيم دولة القانون، سنكون مواجهين بخطر كبير! الآن كما ترى يوجد في هذا المنبر إجماع سكوتي، وأحياناً صريح، على أن المهم هو أن تسقط دولة الإنقاذ (بكل وسيلةٍ ممكنة) وبعدين نشوف الحاصل! وهذا تفكير مغامر مخاطر لا مبالي! لتسقط دولة الإنقاذ غير مأسوفٍ عليها، في مزبلة التاريخ! لكن لا نريد أن تذهب تضحيات أبنائنا وإخواننا سدىً! مع كل احترامي!

والله يا صلاح إذا كانت الدعوة لحساب كل من سرق و نهب و قتل و خرب هذه البلاد في ال 23 سنة الماضية (لغة مناضلاتية) ... فلتكن !!
الدعوة لم و لن تكن قتلهم في المعتقلات كما فعلو ... و لا قصفهم بالطائرات كما فعلو ... و لا حرمناهم ممارسة السياسة و حقوقهم الدستورية كما فعلو ... الدعوة كانت و ما زالت محاكمة عادلة و عاجلة لكل من كتب سطرا في كتاب الانقاذ المظلم !!
--------------
سلام يا العوض

Quote: نعم يا بروف، لا بد من الحساب (ولكم في القصاص حياة يا أولي الألباب)

الدين و المنطق و العقل يقولو إنو من قتل و سلب و نهب يحاسب علي ما فعل ... ذلك ببساطة ما ندعو له !!

أمين ... سلامات ...

Quote: الساسة في هذا البلد مفروض يكونو في حالة تنسيق لمرحلة ما بعد الانقاذ حتي لو سقطت الانقاذ بعد الف سنة .... مفروض علي الأقل يكون في تصور مبدئي لما يود الناس عملة حال سقوط الانقاذ

يا أمين ... كانت هناك فرصة قبل الآن ...
الإنتخابات الماضية كانت فرصة ذهبية للمعارضة ...
إلا إنهم لم يعملوا بالجدية الواجبة ...
الإنتخابات كأحد اجدى أنواع الصراع السياسى المشروع ...
تتطلب العمل الشاق المضنى وسهر الليالى فى التخطيط
وإعمال الذهن والجهد والمال لتحفيز القواعد والشباب ..
ويتطلب العمل فى الريف والأطراف و المدن ...
لم يفعلوا شيئا من ذلك ...
وحتى بعد الإنتخابات والى الآن لم يقوموا بأى عمل ذا أهمية ..
كل الذى يأملوه أن يثور الشعب ويسلمها لهم على طبق من ذهب ...
ولا أمل فى القيادات القديمة والأحزاب التقليدية ولا الحركات المسلحة ...
والآن أرجو أن يتم التغيير عن طريق الشعب ...
وأتمنى أن تبرز قيادات جديدة وجادة تأخذ زمام المبادرة ..
وتعمل لسيادة دولة القانون والمساواة والعدل ...
والا يكون هناك إقصاء الا بحكم القانون ...
حتى للإسلاميين فهم مكون كبير ومؤثر فى الحياة السياسية فى السودان
ومن الصعب تجاهله .. وكما قلت إلا بحكم القانون ..
وأرى إن الكثيرين سيطالهم حكم القانون ...

Quote: سلام يا امين أقامة دولة القانون هو الهدف الاول، وتحت ظل هذه الدولة فاليتقدم كل من له مظلمة الي القضاء العادل، مظلمة في عهد الانقاذ او في غيره، وهناك جرائم لا تسقط بالتقادم.. الحساب مهم حتى لا يتكرر ما حدث، ولكن من هو الذي سيحاسب؟ الحديث عن الشرعية الثورية ومحكمة الرأي العام هو مجرد حديث رومانسي لا يصلح في عهدنا هذا ولا في بلدنا هذا.. علينا اقامة نظام قضائي عادل ومستقل وشفاف اولا، وهو الذي سيتولى محاسبة كل من يستحق المحاسبة..

يحق لي هنا ان انوب عن امين الياسمين ( البروف )
في الرد ... والانابة هنا ليست معقودة علي صلة قربى او انتماء تنظيمي ضيق
بل حس انساني اصيل لايكذب ابدا .....
صبية الانقاذ تورم ان تصور لنا ان بواكير الانقاذ كانت الجولة والصولة للترابي ، وكان (فارس العرب ) البشير العوبه في يد الترابي
وبعد الانقسام (المفاصلة ) تمايزت الصفوف ، لا والف لا .... كل من لديه مظلمة عند البشير او الترابي ينصفه القانون ، فاامين لا يدعوكم لشرعية ثورية او رومانسية
او تنطلي عليه دعاوي الانقلاب الجهوي ، الذي يبتغي تجيير مخازي وتجاوزات الانقاذ في رصيد الترابي ، فكل من قال خصيمي الترابي او البشير اهلا به وكلووووو ا بالقانون
المتهم برئ الي ان تثبت ادانته ، ونقدر للترابي تصديه للسلطه الان ... ولكن في الحقوق فالكل ياتي فردا ولا تميز بين بشير او غفير .... فالحق احق ان يتبع .
برمي ليكم كلامي سمبهار قبل مايجي امين ......

Quote: الفرج قريييييييييييييب جدا

ربنا يسمع منك يا معاذ
-----------
السني يا حبيبنا

Quote: لابد من نظام قوي تحالف شامل لكافة القوى ليهدينا الى النور لتستمر الثورة ولنصل الى غد افضل تسلم يا امين وتسلم احلامك ورؤاك هي نبؤة ننتظر النصيحة ومنتظرين الحكماء

أؤمن علي كل كلمة ...
النصيحة يا عزيزنا إنو إذا شاء الله أن يعفو عما سلف ... we shouldn't !!!
-----------
عاطف يا حبيبنا

Quote: خارج موضوع البوست يا أمين .. واليوم فقط ..... لقد تحصل صديقي بدرى محمد سليمان علي رقم تليفوني بمحض الصدفة وعبر (قوقل) .. وليس أمين فإذا بي أستمع لصوت لم أسمعه منذ ما يقارب (رُبع القرن) ..... فشكراً لعمنا (قوقل) .......

قبل ما اقرأ مداخلتك دي الصباح ... ضرب لي تلفون في موضوع و قال لي إنو اتكلم معاك أمبارح ... صحبك ده قدر ما حاولت أجر رجلو بجاي أبي لي ... كويس إنو نبقي اتنين !!

و عليكم السلام يا عم شهاب

Quote: سلام يا امين أقامة دولة القانون هو الهدف الاول، وتحت ظل هذه الدولة فاليتقدم كل من له مظلمة الي القضاء العادل، مظلمة في عهد الانقاذ او في غيره، وهناك جرائم لا تسقط بالتقادم.. الحساب مهم حتى لا يتكرر ما حدث، ولكن من هو الذي سيحاسب؟ الحديث عن الشرعية الثورية ومحكمة الرأي العام هو مجرد حديث رومانسي لا يصلح في عهدنا هذا ولا في بلدنا هذا.. علينا اقامة نظام قضائي عادل ومستقل وشفاف اولا، وهو الذي سيتولى محاسبة كل من يستحق المحاسبة..

ياخي والله وددت أن انسخ و الصق مداخلة محجوب لانو أوصل وجهة نظري باحسن مما فعلت أو كنت سافعل .... يا شهاب أنا لم اتحدث عن شرعية ثورية و محاكم راي عام ... أنا اتحدث عن محاسبة كل من أجرم في حق شعبنا - و لو بشق تمرة - بالقانون ... لا شئ غير القانون و ضربت مثل بالترابي عراب الانقاذ و أبوها و عمها و اللي لمن إختلفو في الحكم و السلطة طلع بيان و نقد ذاتي و ظن إنو هذا يكفي لغسل يديه من دماء الناس و مظالمهم .... نحن في إنتظار دولة قانون يطبق فيها القانون و يحاسب فيها الذين سطو علي الديمقراطية بليل و سامو شعبنا سوء العذاب ...
----------------
سلامات يا شيخ الشامي

Quote: هذه هي القاعدة يا اخي امين عندما اتكلم عن الاخوان بصفة عامة واراك هنا في هذه النبوءة الصادقة تتفق معي رغم انك اديتني هبشة في حديثي عن اخوان مصر وزي ما اقولو اهلنا البصل ريحتو واحدة فاخوان مصر هم اخوان السودان وهم الاخوان في كل مكان

شكرا علي الاتفاق ... و ما زلت علي خلاف معك في موضوع كيزان مصر ...
كيزان مصر يا شيخ الشامي ... لم يصلو للحكم بانقلاب عسكري ... لم يدخلو الناس بيوت الأشباح و ينهبو بلادهم ... لم يغتالو الأمل في قلب شعبهم ... لم يفعلو ما فعل كيزان السودان ... في الحقيقة هم لم يفعلو أي شئ حتي الان لانهم لم يستلمو حكم البلاد حتي هذه اللحظة ... إنت بتحاسبهم علي ما فعل اخوانهم في السودان ... و ده لا يصح لا عقلا و لا منطقا ... و كما تعرف - و أنت سيد العارفين - ناس الحرية و العدالة في تركيا كيزان و ناس راشد الغنوشي الحاكمين في تونس كيزان ... لا تثريب عليهم و لم تشتكي منهم شعوبهم بل هي التي أوصلتهم للسلطة ... الاولي يا شيخ الشامي إنو الناس تثمن مسالة وصول الحكام - بغض النظر عمن هم - طالما جاءو برضاء الشعب .... إن شاء الله الشعب ينتخب صلاح غريبة له علينا الأتفاق و الاختلاف بالقانون ... بعد أربعة سنين كان ما خارج نجيب صلاح جادات و برضو له علينا الأتفاق و الاختلاف بالقانون !!

حيا الله أمين، قلت:

Quote: والله يا صلاح إذا كانت الدعوة لحساب كل من سرق و نهب و قتل و خرب هذه البلاد في ال 23 سنة الماضية (لغة مناضلاتية) ... فلتكن !! الدعوة لم و لن تكن قتلهم في المعتقلات كما فعلو ... و لا قصفهم بالطائرات كما فعلو ... و لا حرمناهم ممارسة السياسة و حقوقهم الدستورية كما فعلو ... الدعوة كانت و ما زالت محاكمة عادلة و عاجلة لكل من كتب سطرا في كتاب الانقاذ المظلم !!

لا خلاف بيننا على هذه الأمور، ولا خلاف بيني وبين الإخوة (المناضلين) الذين يشعرون بأنهم المعنيون بهذه النسبة، حول ضرورة
الثورة على هذا النظام الجاثم على صدر الوطن!
والذي أعنيه أن ما ينبغي أن نهتم به في الظرف الراهن، هو الإعداد لهذه الثورة حتى تسير في مسارات آمنة!
خاصة والصوت الأعلى في هذا المنبر، لا يهمتم بهذه القضية أصلاً،
وينظر إلى من يطرح سؤال البديل، أو يتتحسس عن المرحلة القادمة،
أنه مجرد مثبط للهمم، على أحسن الفروض، لو ما قالوا أنو غواصة!
وكذلك هم عموماً متواطئون في الرؤية مع التنظيمات العسكرية المسلحة التي كانت قائمة،
أو التي نشأت حديثاً!
فهذا الموضوع يحتاج إلى وقفة جادة جداً جداً!
ويحتاج طبعاً إلى قلمك الذي ينفذ إلى القضايا بأسلوب سهل ممتنع ومقنع للجميع!
شكراً لك!

علوم يا حبيبنا ...

Quote: غايتو الانا متـاكد منو هو: الحكومة سقوطها بنشاف بالعين.

و بتحس بالقلب !!
------------

Quote: كـدي تعال أفرز لينا النبوءة من النصيحة!!

النبؤة إنو الناس ديل ح يتخارجو باسرع مما تصورنا و تصورو هم ... و النصيحة انك ما أتيت لحوار !!
------------

Quote: الحكومة ساقطة ساقطة، لو ما الليلة بكرة. حتى لو الناس قعدت في بيوتها وما طلعت مظاهرات. ببساطة لأنها ماشة بعجل الحديد يا بروف وين الياسرين (العوض وأب تفة)؟ في إشاعات إنو أب تفة مشغول اليومين دي ببروفات البدل، لأنو قالوا مرشح يمسك حقيببة في الحكومة الانتقالية

يا حلبلب ... طالما ما المظاهرات مستمرة و الجذوة متقدة ... بعد شوية عجل الحديد ذاتو ما بلمو فيه ...
الياسرين - بحسب جادات - طلعو غواصات .... ح نقدمهم لمحاكمات ثورية عاجلة تاني يوم من سقوط النظام

سلامات يا رشا ..

Quote: البشيرح ينقلع و يقلب وشو (آذ سووون آذ بوسيبول) في رمشة عين يعني.. و النصيحة ;كالآتي: ما ينقلع الا و العين بي عشرة و النخرة بـ100 شفت كيف!

ما في رمشة عين يا رشا ... الناس ديل حاكمين البلد دي فوق و تحت لمدة 23 سنة ... توقعاتي إنو سقوطهم ح يكون باسرع مما يتصور الجميع ... أما مسالة العين بي عشرة و النخرة بـ100 فحاشا لشبابنا الذين يضعون أنفسهم في مواجهة الة النظام العسكرية و الأمنية as we speak و لمعارضي هذا النظام أن يظلمو الناس حتي لو كان هؤلاء الناس الظلم يمشي علي قدمين ..
يعني يا رشا كان أخير تخلي الصايم يفهم براه بدل ما تجوطي ليه فهمو البراهو جايط ده
-----------------

Quote: هوي يا امين اصحى اصحى ياخي الواطة صبحت يا زول اصحى الاولاد اتاخروا من المدرسة وصحى امين من النوم مخلوع هو الحاصل شنو؟ الثورة وصلت وين؟ الرئيس بقى منو؟ قالت ليهو:رئيس شنو، ما ياهو القشير القدامك ده وشاف البشير يبشر ويرقص ثم صاح: كم لبثت؟

ترونه بعيدا و نراه قريبا ...
يا الشفيع ياخي اركب معنا ... اني لك من الناصحين !!

Quote: يا الشفيع ياخي اركب معنا ... اني لك من الناصحين !!

يا النبي نوح

يا بروف لا تدع التفاؤل يقودك لأندراستميشن للنظام الماخدها مسالة حياة او موت
الموضوع ح ياخد وقت طويل و انهيار النظام لن يكون بين عشية وضحاها بل تدريجيا
المطلوب صمود الشباب لاطول فترة و ان تشارك الاحزاب وقياداتها بفعالية و تجرد
الافضل ان نتوقع أسوأ و أصعب السيناريوهات و نبني على اساسها

Quote: ما في رمشة عين يا رشا ... الناس ديل حاكمين البلد دي فوق و تحت لمدة 23 سنة ... توقعاتي إنو سقوطهم ح يكون باسرع مما يتصور الجميع ... أما مسالة العين بي عشرة و النخرة بـ100 فحاشا لشبابنا الذين يضعون أنفسهم في مواجهة الة النظام العسكرية و الأمنية as we speak و لمعارضي هذا النظام أن يظلمو الناس حتي لو كان هؤلاء الناس الظلم يمشي علي قدمين ..

في الجزء الأول من الثانية الأولى لـ رمشة العين (كدا كيف؟ )

فيرتايل اماجنيشن حلوو أوووي ... دا أنت التفاؤل زات نفسو والله!

-------------------------

و الله ما قايلاك حنين كدا يا بروف ! الله ينتقم منهم ياخ .... الشافع عندنا بي بدرزن شنبات منهم (دا العدل كدا ... و بكل تواضع كمان)

أنا غايتو غالية عندي شديد .. و النفسيات العملوها لي آل كوز ما بكفيني تجي لي واحد فيهم ... عشرة زاتو شوية ورحمة ...

Quote: النبؤة إنو الناس ديل ح يتخارجو باسرع مما تصورنا و تصورو هم

كنت عايز أسألك وصلت الخرطوم و للا لسه؛
و بعد كلامك الفوق بقول ليك لامن تصل أبقى اتصل!

Quote: و بعد كلامك الفوق بقول ليك لامن تصل أبقى اتصل

بعد كلام ملاسى دا ..
الشاف البروف حايم في دبي بدون حناسة ماكضب.