الخرطوم الان جميلة وهادئة كنسمات الفجر وشارع النيل متعة !!!

انا الان في الفندق الكبير
اكتب وصية الموت هذي من اللوبي مستخدما الواي فاي الذي وفرته الادارة الجديدة للفندق
واخذت جولة طقوسية في شوارع الخرطوم الكبيرة والشوارع الخلفية
لقد وصلت مطار الخرطوم قبل ثلاث ساعات
بعد غيبة طالت وزادت عن الاربعة اسابيع
تخيلت ما يرشح هنا وهناك ان الخرطوم اصبحت بغداد او دمشق
او الزنتان واطراف حمص او كابول اوابوجا او صنعاء
وان الهدير يملأ الشوارع كما شاهدت في حركة احتلال وول ستريت
او في عرصات القاهرة وشوارعها العنيدة
وان الشوارع تعج بالموت الاسود وان الطرقات تحترق كما في الاحلام
كيف اصل بيتي الصغير وبيني وبينه كوابيس الاعلام والاصوات العالية
والانوف التي تشم رائحة الدم وهوفي العروق
لابد ان اعبر كبري القوات المسلحة كي اتفادي الانصهار في شارع الجامعة
طيب ربما يغلق الكبري ويحتله الثوار واسقط من فزعي في النهر
قررت ان اخذ طريق بري الى شارع النيل من تحت الكبري ثم كبري امدرمان
عرجت قبالة بنك السودان الي كبري ابوسعد( الانقاذ) (سابقا)
قطعت الكبري ورجعت بعد ان ادركت نهاية شارع الدويم وهو شارع ابوسعد الذي يلتقي مع شارع الشيهدة سلمى
دكتورة سلمي لم تستشهد في الميل اربعين لكنها استشهدت في حادثة غرق العبارة في النيل
وكانت رمزللعطاء والتجرد ونكران الذات قدمت علمها وزمنها ومهنتها لتخفف ويلات الفقراء
الرازحين تحت رحمةمكان الديلزة والغسيل البريتوني

على فكرة
دخلت الفندق الكبير حبا للاستطلاع
فزميل عزيز يعمل مستشارا قانونيا للشركة الباكستانية التي تولت تشغيل الفندق
طلب مني الف مرة وجهة نظر في بعض المضايقات الخاصة بالاجراءات القانونية
مع بعض الجهات الحكومية والخاصة
فرأيت من باب اولى وانا اتحسس الخرطوم الاخرى
الخرطوم التي هي في الاعلام
والخرطوم التي هي في الاحلام
الاعلام الذي يريد ان يجرنا معارضين وحكام الى الهاوية
والاحلام العصافير التي تحلم بها الحكومة او تحلم بها المعارضة
وفي الحالتين انا الضائع ،، يقول السودان
لكن الطبيعة هي التي تفرض المشهد
طبيعة اهل السودان
فماشاهدته خلال الثلاث ساعات الماضية كرهني في الاتنين المعارض المتنطع والحكومي المتنطع

البوستات دي كويسة جدا، ما عارف ليها الناس بطالبوننا بمقاطعتها؟!!

اكتب يا عبدالملك اكتب ياخي، من المطرف ان كتابات مثل هذه تصب في مصلحة الثورة والاطرف من ذلك انكم لا تدرون

شارع النيل اليوم في اروع حالاته
ظللت احوم بين المشاركين في المعرض التشكيلي الاسبوعي الذي ينفذه الهواة والمحترفين
ولم اعرف من يقف وراءه لكن عددمن السواح يتبادلون الحديث مع العارضين
حول بعض المنتجات التراثية والتشكيلية
المعرض يتمتع بالبساطة فهو يعرض على الارض وفي ضفة النيل الجميلة
ويحوي عدد كبير من الاعمال الجميلة
الغيوم تغطي الخرطوم ،، ياجمال النيل
وبعض الشباب في ثنائيات او مجموعات يضحكون ويتبادولن الانس

اكتب واكتب يا جميل

وحمدا لله على السلامة

يعني كتاحة الخرطوم ابدلها الله بهذه النسمات الجميلة كيدا في المتظاهرين

المظاهرات امر طبيعي وجزء من جماليات الحياة السودانية
وهي حق لمن يشكو الفاقة او الجوع
ويبو ان هذه المظاهرات كانت تنظرها المعارضة السياسية
كما ينتظر لاعب الورق ( الكوتشينة) كرتا معدوما لكي (يفتح) الله عليه
يعني لم يرتب ورقه بالشكل المناسب وينتظر الفرج من عنده تعالى
عموما يااحمد ابنعوف
انا لااريد ان اقصم ظهر الاحلام الحزبية ولااتمنى حرمان اسرة المهدي من الحكم في السودان
لكنن اريد ان اصور الخرطوم التي احبها
والتي خوفوني من الغيلان في شوارعها
ولايهمني ان يحكمني المسيح الدجال او تربال او امام اخر الزمان
لكن يهمني ان تظل بلدي جميلة وهادئة كنسمات الصبح
ليعيش اولادي كما يشاءون
ففرصة تمتعي بالهجرة الى الابد لكي اناضل من جبال الالب او ضاحية نيويورك معدومة

الى ابنائي في كهوف جبال النوبة الرجاء الخروج من تلكم الجحور والقدوم الى الخرطوم
على وجه السرعة للتمتع مع عبدالملك في جمال وهدوء شارع النيل

Quote: لكن يهمني ان تظل بلدي جميلة وهادئة كنسمات الصبح

ما قلنا ليكم بوستاتكم دي كويسة

قصاد شارع النيل الدائري الذي التف حول امدرمان كوشاح جميل
تنتشر عشرات محلات بيع الفاكهة
اسرة تنزل من سيارتها ويقلب الابن الصغير حبة المانجو التي مسكها بيديه الصغيرتين حتى لاتسقط
بينما يعد والده النقودويتكلم مع البايع
صورة رمزية صغيرة
ليت كل هذه الثمار لاتسقط من بين ايدي اطفالنا
الوان الفاكهة تزين الشارع على مد البصر كالوان طيف في صفحة السماء الصافية
لن انفي ولن اؤكدقيام مظاهرات لكن يبدو ان حظي سيئا حيث لم اسمع صرخة واحدة وانا ادور حول العاصمة بشكل عفوي
لو مرت المظاهرات من هنا لتحولت هذه الالوان لدم قان
واختلط الحابل بالنابل
لن تتذوق هذه الاسرة طعما للفاكهة
صحيح الاف لايشترون هذه الفاكهة ،، لكن هل يملك المتظاهرون او من يظاهرونهم عصاة سحرية
تحول الدوم والنبق والاحلام السوداء الى فاكهة
صحيح ان النظام ملوث بالاخطاء
لكن الاحزاب كلها ملوثة بالاخطاء وكلها ركبت على ظهر دبابة
وهي نفس الاحزاب التي قبل الشعب ازاحتها وصفق للذين قطعوا راسها من قبل

غايتو انا ما عارف موقعك وين هسع
لكن تحسبا كده، ما تمشي بتقاطع امبدة السبيل، او شارع الوادي او بري او بحري حي الاملاك

اللساتك المولعة ما تديك الدرب

ايوا نسيت، السجانة برضو قالو مولعه

خليك بس في القراند اوتيل مع الواي فاي

طفل يقلب حبة المانجو و ابوه بتكلم مع البايع...
انا لله ياخي.

وصلت بيتي الان
زوجتي العزيزة نائمة ربما لميتة قلبها ففارسها القادم من خلف المدار
وصل البيت ورغم علمها بهبوطي في الخرطوم منذ ساعات طوال
لم تتوجس خيفة بسبب تاخيري
ربما كنت مصابا في درب الالام
ابني يوسف يسبق الجميع كي يخبرني بالمظاهرات !!عرفت نهمه بالفيس بوك منذ طفولته المبكرة
والان تتشكل ثقافته تحت حوافر الفيس بوك

شوف هناك يا عبدالملك من برجك العاجي
الجوز الجالسين , والرومانسية التى تحف المكان
وأناقة عسكري النظام العــام
انها من أجمل اللوحات التى يكملها صاحب البرادو
بلحيته الذهبية وغرة جبينه الملائكية وعيون المحجبه التى بجواره مع الموسيقى الخلفية المنطلقه من ذهب اساورها
ارخي السمع , وانظر لسماحه الرجل في البيع والشراء
يا ابني جيب منقه , وعنب ,
اه وسوسة له المراة (وش وش وش )
(بابتسامه لون المنقه ) يا ولد ارفع لي من كل نوع
وش وش وش وش
قطع الارسال فقد مره عدد من المتسولين والمعدمين
ليعكروا صفو رومانسية شارع النيل ويسببوا الكتاحه

حاقوم الف واجيك راجع ,,

Quote: حاقوم الف واجيك راجع ,,

هههههههههههه

وقت وصلت البيت يا عبدالملك، ما تمشي الكلاكلة

ياود ابنعوف
اذا كنت في الخرطوم
تعال طالعني الخلا
وناخذ جولة سويا
امشي معاك محل مظاهراتك وتمشي معاي محل الناس القاعدين في الكراسي وبشربوا
الشاي وماعارفين الحاصل شنو
وعوضية ست السمك وقلب الخرطوم
بس خليك من الناس البتاوقوا بي شباك سودانيز او لاين
وبناضلوا على طريقة البلي ستيشن
فوق رؤوسهم طيور الدولة السنية التي تقتل القلب بالاماني السندسية
صدقني هولاء هم نحس الثورة الشعبية
منذ زمن شموع المرحوم سامي سالم
مرورا بمواعيد الثورة التي ضربت في هذا المكان مليون مرة
انتهاء بكتاحة الجمعة
اما اذا كنت بره البلد فعلاقتي بك انتهت
فالهشكي لايصنع ثورة
وحجر في ود البشير
وحجرين في الكلاكلة مابعملوا راكوبة

اما اذا كنت خارج شبكة هذه الكتاحة

المرحوم المثقف السوداني الكبير سامي سالم لا علاقة له بشموع و لا قناديل فدعه في مرقده هانئا وادعا.

Quote: المرحوم المثقف السوداني الكبير سامي سالم لا علاقة له بشموع و لا قناديل فدعه في مرقده هانئا وادعا

سيف

زلة ذاكرة
وربما لعلاقتي بهم الاثنين منذ ان كانا يحرران صفحة ثقافية في جرية الايام
ويكتبان في اعرها سامي سالم وسالم احمد سالم
رحمها الله فلقد كان سامي مثقفا عصاميا وموهبة نادرة وفريدة لم يتلق تعليما نظاميا الى ذلك الحد
لكنه اتى بمالميات به الاوائل في قدرته على الامساك بخيوطةالنقد الادبي
وسالم احمد سالم اخذته اوروبا فاختنق ومات وسامي اختطفته امريكا فاختنق ومات
هم خلقوا ليتنفسوا في وطنهم
الفرق الوحيد ان سالم غرق في وحل التسييس والهتافية الفكرية وسامي عكف في محراب الثقافة المطلقة
فترك اثرا قزحيا في كتاباته ونبوءاته الرائعة
رحمهما الله الاثنين واسكنهما المقامة

أظن الأخ كاتب البوست، نقل مقال (أو اقتبس)، لا أدري ...

فقد قرأت هذا الكلام من قبل

Quote: أظن الأخ كاتب البوست، نقل مقال (أو اقتبس)، لا أدري ... فقد قرأت هذا الكلام من قبل

ابو الريش والله هذا ابلغ اشكال المدح الكلام عجبك
رغم المجافاة
لكن هذه طبيعة الاشياء اسع كلامك داتو انا قريتو قبل كده
حكاية اقتبس او نقل مقال
شكرا

عبدالملك ..سلام ..

حمداً لله على السلامة ..


كتر من البوستات الزي دي ...فبعد سقوط النظام وعودة الوطن لاصاحبه حانبقى عاطلي شغل فيحتاج الواحد يشغل نفسه ويحتاج لمثل هذه البوستات مع تقديري واحترامي ليك ..

واصل ...



تحياتي ،،

اكتب سااااااكت يا عبدالملك انطويت
اكتب كتبك شيخ الجيلي

Quote: كتر من البوستات الزي دي ...فبعد سقوط النظام وعودة الوطن لاصاحبه حانبقى عاطلي شغل فيحتاج الواحد يشغل نفسه ويحتاج لمثل هذه البوستات مع تقديري واحترامي

ياود القاضي
بعد سقوط النظام سنتحول نحن لمناضيلن ونشبع فيكم رجم
اسع انتو قادلين بي شنو غير شتيمة الحكومة
انشا الله يسقط الليلة عشان سودانيزاون لاين يبقى حقنا نضري فيه عيشنا زيكم كه
والله تروحوا شمارفي مرقة
لامريم الصادق ستقبل بكم شركاء في سلطة جدها
ولانحن سنقبل سدنة النظام
وبعدين حانخرب ليكم سلام الشرق
ونشعلل الارض والشائعات تحوم من اضان لي اضان
مااحلى ان تكون معارضا شرسا ولو على ظهر كي بورد
تحياتي

الخرطوم (3) تشتعل وجميع السكان في الشوارع !!

Quote: بعد سقوط النظام سنتحول نحن لمناضيلن ونشبع فيكم رجم اسع انتو قادلين بي شنو غير شتيمة الحكومة انشا الله يسقط الليلة عشان سودانيزاون لاين يبقى حقنا نضري فيه عيشنا زيكم كه والله تروحوا شمارفي مرقة لامريم الصادق ستقبل بكم شركاء في سلطة جدها ولانحن سنقبل سدنة النظام وبعدين حانخرب ليكم سلام الشرق ونشعلل الارض والشائعات تحوم من اضان لي اضان مااحلى ان تكون معارضا شرسا ولو على ظهر كي بورد

عجبى من تبجح الرجولة المخصاة فى حمى العسس..إإ
والعودة احمد....لميقات طال فيه الحلم والامل...إ
ونعما هى....الاوهام فى تباشير المنتهى..
وبانتظار الوعد..

فى سجل لا....يضل ولا ينسى...إإإ

Quote: اسع انتو قادلين بي شنو غير شتيمة الحكومة انشا الله يسقط الليلة عشان سودانيزاون لاين يبقى حقنا نضري فيه عيشنا زيكم كه والله تروحوا شمارفي مرقة

criminals will never get the chance to function as regular citizens
killers and thieves should be sent to their graves or jail cells

يا مواطــــــــــــن!

الزمزعة الكتيرة مش كويسة
حدد مكانك الآن إنت وين في الفندق الكبير ولا قبل تلات ساعات في المطار؟




عشان نجيب ليك كتاحة ثورة الجمعة دي دليفيري من هونج كونج إلى مكانك!

معليش يا خرطوم الهدوء ما بحلك











الديامة الاشاوس يردوا علي نافع وتابعيه الرباطة بحرق دفار الشرطة(صورة)