Post: #1
Title: لسع الثورة ما قامت.. لكن التقيل منتصف الاسبوع الجاي
Author: على ميرغني
Date: 06-21-2012, 01:08 PM
قبل شوية طلعت انا واحد الزملاء الى شارع عطبرة عشان نشوف مظاهرات ظلاب
معهد الدرسات المصرفية
الشارع ملان قزاز بارد مكسر وحجارة
تضر بالمواطن اكثر من الدولة
سيارة شرطة ومعاها دفار
بضع بكاسي يبدو انها من الجهاز
شكل المشهد العام محبط
ومظاهرات لا تعدو كونها (لعب عيال)
وصل لحدي سب ناس الشرطة بعبارات بذئية
بعضها اشارات باليد
طبعا الطلبة كانوا فوق سطوح مبنى المعهد
لكن حدث بسيط اقنعني انو الاسبوع الجاي دا
ح يشهد طلوع مظاهرات شعبية من الاحياء وليس طلابية يسهل قمعها
نواصل
|
Post: #2
Title: Re: لسع الثورة ما قامت.. لكن التقيل منتصف الاسبوع الجاي
Author: حافظ انقابو
Date: 06-21-2012, 01:14 PM
Parent: #1
التقيل جاي
اردم يا علي ميرغني
اردم اخوي
جاييك بعد شوية جهز الجبنة
|
Post: #4
Title: Re: لسع الثورة ما قامت.. لكن التقيل منتصف الاسبوع الجاي
Author: محمد المسلمي
Date: 06-21-2012, 01:18 PM
Parent: #2
ياعلي يعني الجديد شنوا عشان الاسبوع الجاي
|
Post: #3
Title: Re: لسع الثورة ما قامت.. لكن التقيل منتصف الاسبوع الجاي
Author: Mohammed Awad
Date: 06-21-2012, 01:17 PM
Parent: #1
سلام على ميرغنى
صراحة من كتبابتك ماعرفت اقيم موقفك تمامآ
فماعرفت انت موقفك من الموضوع بتاع التظاهرات دا عموما شنو...
احترامى الشديد
|
Post: #5
Title: Re: لسع الثورة ما قامت.. لكن التقيل منتصف الاسبوع الجاي
Author: على ميرغني
Date: 06-21-2012, 01:26 PM
Parent: #3
| Quote: ياعلي يعني الجديد شنوا عشان الاسبوع الجاي |
بقولو ليك .. بس شيل الصبر
الشليق... بس انتا تجي وكلو هين
ــــــــ
Quote: فماعرفت انت موقفك من الموضوع بتاع التظاهرات دا عموما شنو...
|
موقفي انها لحدي الآن لا تخرج عن انها لعب عيال وطلبة
ليس لها بعد استراتيجي اكتر من اغلاق الجامعات كام اسبوع
وانا مع تغيير هذا الناظ بكل السبل.. ودي خلي مبرارتها اسع
حتى ولو بانقلاب
لكن بعد تجهيز البديل.. او حتى قول تأمين حكومة انتقالية، بدون تعريض البلد للانفلات الامني،
وقادرة على تنفيذ الديمقراطية الصح صح وحمايتها
|
Post: #6
Title: Re: لسع الثورة ما قامت.. لكن التقيل منتصف الاسبوع الجاي
Author: محمد حامد جمعه
Date: 06-21-2012, 01:36 PM
Parent: #5
واصل يا جنابو على ...
الخيوط المرتبة دى مهمة ، الناس مرات بتندفع عاطفيا ودا مضر بالجميع
|
Post: #7
Title: Re: لسع الثورة ما قامت.. لكن التقيل منتصف الاسبوع الجاي
Author: على ميرغني
Date: 06-21-2012, 01:37 PM
Parent: #5
اثناء مسيرنا في شارع عطبرة
المهم كان ماشي جنبنا واحد خمسيني كدا
بفى يسب في المؤتمر الوطني والحكومة ونافع
والبشير ذاتو
قلت ليهو اعمل حسابك الشباب القدامنا ديل بتاعين أمن
والله الزول من شدة غبن على الحكومة علا صوتو وزاد
سب المؤتمر الوطني والحكومة ونافع والبشير وزاد عليهم الخضر كمان
مشهد الرجل يدل بقوة على ان الثورة بدأت تشتعل داخل كل رجل سوداني
بس منتظرة حدث او شخصية محورية تحرك هذه الجموع
وحادثة تانية وانحنا راجعين على الجريدة
|
Post: #8
Title: Re: لسع الثورة ما قامت.. لكن التقيل منتصف الاسبوع الجاي
Author: محمد حامد جمعه
Date: 06-21-2012, 01:51 PM
Parent: #7
عشان كدا قلت
إن انصرمت هذه العشر !
|
Post: #9
Title: Re: لسع الثورة ما قامت.. لكن التقيل منتصف الاسبوع الجاي
Author: على ميرغني
Date: 06-21-2012, 02:03 PM
Parent: #8
الحدث التاني واثناء رجوعنا من شارع عطبرة لمقر التيار في شارع البلدية
وقفت مع رجل اربعين تقريباً.. سألتو عن رايو في الحاصل في البلد
الكلام دا قدام كوم بتاع ناس منتظرين المواصلات
قال لي بدون تردد انو البشير وناسو فهمو خروج الشعب جمعة استرداد هجليج
على انو دا وقوف مع المؤتمر الوطني، لكن الحاصل شئ تاني
والكلام دا لسع للرجل
الحاصل انو فات عليهم انو الشعب دا خرج عشان السودان وبس
وانو الشعب دا قادر يخرج مرة تانية ضد المؤتمر الوطني لمن تضيق بيهو الوسيعة
ويبقى مافي حل غير الخروج.. واضاف انو المؤتمر الوطني فهم عجز المعارضة عن الخروج للشارع
هو عجز الشعب عن الخروج... سألتو... هل سيخرج الشعب.. قال لي في الاسبوع المقبل دا وقبل تلاتين يونيو
سألتو ليه.. قال لانو تأثير ارتفاع الدولار الجمركي حيكون ظهر في السوق، وكل شئ ح يطير السما..
ومن عندو قال لي انو حل المشكلة الاقتصادية ظاهر.. لكن الناس ديل حرامية واكل الحرام قتل قلوبم
الزول الكنت بتكلم معاهو دا زول سوداني عادي، انيق بدون قطع نص، شكلو لا ينتمي لاي حزب
|
Post: #10
Title: Re: لسع الثورة ما قامت.. لكن التقيل منتصف الاسبوع الجاي
Author: الكباشى عبد الله الرقيق
Date: 06-21-2012, 02:09 PM
Parent: #8
الأخوان على ميرغنى ومحمد حامد جمعة تحياتى
العشرة ايام التى حددها الأخ محمد حامد جمعة
اذا مرت بسلام فهذا معناه ان العاصفة قد انقشعت .
اما منتصف الاسبوع القادم الذى يخمن الأخ على ميرغنى
بأنه سيجلب الضرر للانقاذ فكما أن مناضلى الكيبورد يراهنون
على ذات الامر فنحن ايضأ نقول ان ذلك بالضببط هو الوقت الذى تنحسر
فيه احداث الشغب الجارية حاليأ.
تحياتى
|
Post: #11
Title: Re: لسع الثورة ما قامت.. لكن التقيل منتصف الاسبوع الجاي
Author: على ميرغني
Date: 06-21-2012, 02:16 PM
Parent: #10
ود الرقيق
الموضوع ما موضوع تشجيع هلال مريخ
او امنيات
|
|