ما قُتُو زمان بتجونا !!! مُش قلت سعادتك يوم، في الشارع برّا أرجونا ؟؟؟ اهُو نحن طلعنا الشارع وجّه أُخوانا يدُقونا، وارغِم ابُواتنا يجلدونا اهُو نحن مرقنا الشارع جِيّب نافع وشيخك وتعالوا يا أسد العُرب أهِينونا جِيّب أمّنك وجلآدِيّك وتعال يا حارس البيضة أذِلوّنا، ولو ما أديّنا ولاء الطاعة أبداً، أبداً، ما تخلُونا اهُو نحن مرقنا الشارع طلبة وطالبات ومُزآرِع نسوان، واطفال، وعُمآل حالفين للظُلم نصارع قسماً بعِز سودانا بسيف النصر نقارِع اهُو نحن مرقنا الشارع وإنت الفي قصرك لآبِد أمرُق يا زول لآقينا وبرجاحة عقلك هديّنا، ولدرب إنقاذك أهدِينا وبإنجازآتك حجيّنا اهُو نحن مرقنا الشارع أمرُق يا زول، مالك خآيف ؟؟؟ الزول المانافع، بيشِدّك ويقويّك والشيخ بمِحايتو بيروِيّك حضرنا نِحاس ودلوُّكة رآجيّن العرضة الصقرية الّفح توّبك وشوتآلك حدّرِ يا زول الطاقيّة أمرُق لنا في الساحة جِهاراً لاتبقى وُعُودك مرخيّة دآيِر تِترآجع، وتنُط ؟؟؟ دي ما كانت فيك المحرِيّة اهُو نحن مرقنا الشارع يا حُكم الدجل الشيطان ما بحِلّك عسكر وبُمُبآن ومهما ليل الظُلم إتمدد الحق لآبُدّ يبان، والشعب الثائر بُركان يِمتدّ لهيّب من نيرآن يهدِر ويغلي في الشارع سقطت، سقطت يا كيزان اهُو نحن مرقنا الشارع، والثورة طريق الأحرار حالفين نمشيهو المشوار قسماً، قسماً ما نرجع سنُحطّم عرش الظالم حانقيّف في وجه المُدفع، ولرآية الحق حانرفع اهُو نحن مرقنا الشارع كان غلبك تمرُق احسن ليّك في دم الشعب لآ توّحل سُوّق نآسك، ولملم عفشك يا زوّل إتخارج أرحل اهُو نحن مرقنا
الشارع... . . . معاوية المدير ...
التعديل لتعديل في النص. بدل مرقنا في الشارع، مرقنا الشارع. تمّ حذف في كي يستقيم الوزن. ألف شكر أخي أشرف الحلبي...
Post: #3 Title: Re: اهُو نِحن مرقنا في الشارع ... شِعر ... Author: طه إبراهيم عبد الله Date: 06-21-2012, 01:18 PM Parent: #2
كيفك يا جنى المدير سعادة المشير قال بعضمة لسانو لو الشعب ثار ضدنا حا نمرق ليه في الشارع يرجمنا بالحجارة أها الشعب مرق وبدل ما سعادتو إجي مارق للرجم أرسل العسكر المساكين إرجموا الناس بالمبان والرصاص المطاطي الزول دا أكتر من عشرين سنة ما حصل قالو كلمة بقى قدرا الله إحلنا ياخ وبعد إذنك ننقل القصيدة للبوست دا [الرئيس البشير: إذا ثار الشعب ضدي سنخرج له ليرجمنا بالحجارة ] التعديل لإضافة حرف سقط سهوا
الشعبِ قام يسيّر في الشارع ليهو هدير الليلة وين تطير؟ حليلك يا البشير عامل أسد شِريّر في الفارغة ليهو هدير وفي الرقص مالو نظيّر عامل جعيص وخطير لآمن وقع في البير الشعب زي السيل في الشارع ليهو هدير ويطالب بالتغيير الليلة وين تطير؟ حليلك يا البشير الشعب صبر كتيّر لا موية فوق الزير جفت في المواسير وقفتو البوابير وشردتو المناصير يا نافخين الكير ليكم يوماً عسيّر حال العِباد خطيّر ما بيحمل التأخيّر مِلآريا وبواسيّر التايفُد والصِفِيّر صِبح العِلآج عسيّر حال المدارس شيّن لا كنبة لا طبشيّر وحال المواطن شيّن لا حُوّت لا فول لا صِيّر لا شوربة قرآقيّر لا كِسرة لا فطيّر يا ربنا المُجيّر في جنبك نستجيّر من حُكماً جد عسيّر في راسو عُمر بشيّر وبقيّة ناس الطير ناس نافع الحقير وشيخ علي الخبير في سوق المواسير وكرتي العامل وزير للشحدة فرّ يطيّر والعالم النِحريّر عصام ود البشير وأمين حسن الثقيل نهبوا البلد والخير الليلة وين تطيّر؟ يا عمر البشير يا شعبنا الأمير رجال الباسابير الباوقة والجِويّر الدآمر والعِشيّر تنقاسي والقُرير ما ترُقدُوا في السرير الظُلم صِبِح كتير ولا بُد من التغيير حُكماً ما فيهو خيّر عسرلنا اليسيّر ضيّق علي الخُلُوّق وسمك البحر والطير والقُمري والحِميّر والجِن والزرآزيّر يا الله يا قديّر بقُدرتك يطيّر ما يفضل فيهو وزيّر لا امن لا مُشيّر مولانا يا قدير يا عالي يا كبير يا جابر الكسير دبرنا يا بصير بي أحسن.. التدبير انصرنا يا نصير يسر لنا العسير وطيرلنا البشير ــ ــ ــ معاوية المدير...
والله يا عمر البشير غرآك جد طول السنين خلآك تتحدى الغلآبة الكادحين وتنفُخ، أكان دآيرننا لاقونا في الشارع دحِيّن وبتدورنا نلحس كوعنا يا حانث اليمين ؟؟؟ يا زول أقيّف أسمع كلآم الشعب جوّك متحزمين أسمع هدير الشعب جوّك متلزمين حلفنا يمين، وتاني يمين لا نجارا لا نضارا ويّن شُفتُو القبور بتخوّف الميتيّن ؟؟؟ وويّن شُفتُو الشعوب قهروها رقاصيّن ؟؟؟ يوم دآك دآيرنّك تمام تركز تقيف ما تجري يا ابقلباً رهيّف ما تجري، ارجى الصاقعة في عِزّ الخريف اركز تمام، يوم نصرة الحق المُبيّن قسمنا يمين، ونطبُق فوقو تاني يميّن لا نجارا لا نصارا ويّن شُفتُو القبور بتخوّف الميتيّن ؟؟؟ إنتبهوا يا غافليّن خلّوا الصلف والكبرياء لا يغركم زبد الحُكُم اما الزبد يذهب جُفاء وينساب علي وجه الأرض عرق التعابا الأوفياء يغسل فساد الفاسدين ويطمِس رُسُوّم حُكماً لعيّن حلفنا يميّن، قسمنا يميّن لا نِجارا لا نِضارا ويّن شُفتُو القبور بتخوّف الميتيّن ؟؟؟ يا نافع قليل الشآن، امرُق لينا في الميدآن ولا تنسى، جيبو معاك علي السجمآن جهاز الأمن يا وسـخـآن ويا غوّش العميل وجـبـان يوم الحآرة ما تِدسوا يا خاينيّن يوم الحآرة امرقوا برّة يا خايبيّن حلفنا يميّن، لا نجارا لا نِضارا ويّن شُفتو القبور بتخوّف الميتيّن ؟؟؟ ليّه تِغتصبوا بنت العازة يا حاسديّن ؟ ليّه تأذوها يا منافقيّن ؟ تجونا تحت ستآر الدِيّن وإنتو في أصلكم فاسديّن لباس الهيّبة فوقكم شيّن عشان في أصلكم نجسيّن يوم الحق يهِل ويبيّن، عآد ما شيّن تقبلوا ويّن ؟ حلفنا يميّن، قسمنا يميّن لا نِجارا لا نِضارا ويّن شفتو القبور بتخوّف الميتيّن ؟؟؟ شباب العآزة، أمرقوا في النهار الحار سِلّوا الصارم البتآر علي حُكماً تجبّر و جآر قسمنا يميّن، نخوض النار نجيب التار، نساند جُمّلة الأحرآر نزرع في بلدنا سلآم و ننضُم لوطنا كلآم، كلآماً زيّن، عديّل ورزيّن يسعِد أهلنا السمحيّن، ويفرِح جُملة الطيبيّن، وعشان حاجاتنا تبقى كُويّسة يا زينيّن قسمنا يميّن حلفنا يميّن في درب النضال سايريّن، و برب العباد حآلفيّن لا نِجارا، لا نِضارا ويّن شُفتُو القبور بتخوّف الميتيّن ؟ ؟ ؟ ؟ ؟ ؟