Post: #1
Title: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 02:26 PM
Parent: #0
الذين يوزعون صكوك النضال والمعارضة والتوبة والغفران على الناس !!
من أنتم ؟؟ ومن الذي أعطاكم هذه الحق ؟؟ ومن أين حصلتم عليه ؟؟
وما هي صفاتكم ؟؟ ما هي مواصفاتكم كموزعين ؟؟ مناضلين يعني واللا كيف ؟؟
ووين مكان نضالكم ده عشان نمشي كان نلحق لينا فَرَقَة ، نوزع بيها صك ، صكين..
حاجة عجيبة!!
شابكين الناس السفينة والقطر ، وباب التوبة وباب المندب !!
وفلان نطّ وهناي تلّب ، والباب قفل ، وليبيا فتحت !!
قاعدين تتونسوا ومرطبين ، وتتكلموا عن الثورة والإنتفاضة والتغيير
وغيركم عايشين جوه الجحيم وشايلين أرواحهم في أيدهم و لا هاميهم شئ سوى تغيير واقعهم العايشين فيهو (هم ).
ديل هم أصحاب الوجعة.
إتنو منو يا أصحاب سفينة نوح ؟؟
خلاص عينتوا نفسكم دستوريين ( بكامل المخصصات) واللا القصة شنو ؟؟
بي حركاتكم دي ، اتمنيت أكون كوز ، عشان أشوف موضوعكم شنو!!
لكن ما فات شئ ، يلا اعتبروني كوز ، ومؤتمر وطني ، وإنقاذي ، ومشارك في الحكومة ، وكادر شنو كده ما عارف
أها الحيحصل شنو يعني ؟؟ وح تعملوا لي شنو؟؟
البيعرف أبوي (رحمه الله) يمشي يشتكيني ليهو ، والما بيعرفوا يمشي يشتكيني في ( التمنة ) بتعرفوها واللا أشرحها ليكم..
عضوية المؤتمر الوطني في الموقع ده معروفة ، والمؤيدين برضو معروفين، اللولوة البتعملوا فيها دي لزومها شنو ؟؟
واللا بس عايزين تلبّسوا الناس صفات وإنتماءات قاطعينها من روسينكم المكعوجة دي..
فلان تاب ، وحسن غاب ، وجيت متأخر ، وبيحاول يلحق الطيارة ، ومن زمان كنت وين؟؟
إنتو منو؟؟
هسي لوقلنا ليكم أثبتوا إنو فلان ده كوز واللا مؤتمر وطني ح تلفوا وتدوروا وتتفلسفوا فلسفة فارغة، وفي الآخر ما ح تردوا..
بالله فكونا من أوهامكم التجارية البتعملوا فيها دي ، ووصايتكم و(مريّستكم) الفارغة دي ، لأنو ( بعدين ) ما في زول ح يعرفكم
لأنكم عايشين ليكم في عالم خالقينوا براكم ، وفاكينها في نفسكم ..
وطبعاً ممكن عادي – باعتباركم قادة ما هو قادم – تضربوا لي بعض (بدون خجلة) وتتفاكروا في القضايا المصيرية التي ستتناولونها – حينئذٍ-
وتضعوا لها الحلول، كما ستتناولون موضوع الصكوك ، والتعيينات الدستوية ، والحزبية ... ياخ ده وهم عجيب !!!
في شنو يا جماعة ؟؟
أرحمونا ياخ الله يرضى عليكم.
|
Post: #2
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: اساسي
Date: 06-20-2012, 02:33 PM
Parent: #1
يا صلاح هؤلاء مهمتهم تفتيش الضمائر
كفيت واوفيت والله
|
Post: #3
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: سلمى الشيخ سلامة
Date: 06-20-2012, 02:37 PM
Parent: #2
في شنو يا جماعة ؟؟
نحنا زاتنا عاوزين نعرف معاك حبيبنا
|
Post: #4
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: محمد البشرى الخضر
Date: 06-20-2012, 02:40 PM
Parent: #3
التمنة دي شنو يا اب شنب ما عرفتها 
|
Post: #6
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Abdulrahman Gorashi
Date: 06-20-2012, 02:57 PM
Parent: #4
الاخ صلاح،
يا زول مالو نفسك بقي حار كدا، فعلا لقد اوجزت وصدقت، اتفق مع حديثك تماماً ،
تخريمة:
كدي اشرح لي شكاية التمنة دي كيف؟ إدينا من كلام الحبوبات دا يا جميل.
|
Post: #7
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 02:58 PM
Parent: #3
سلمى الغايبة عننا
والله الجماعة ديل حيرونا معاهم..
غايتو كان عرفتي حاجة ألكزيني ..
|
Post: #5
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 02:54 PM
Parent: #2
والله يا أساسي من الله خلقني ما شفت لي وهم زي ده!!!
والغريبة إنهم بيفكوها ، ويصدقوها!!
الغايظني المبارين السيرة ديل..
|
Post: #8
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: tmbis
Date: 06-20-2012, 03:02 PM
Parent: #5
Quote: شابكين الناس السفينة والقطر ، وباب التوبة وباب المندب !!
وفلان نطّ وهناي تلّب ، والباب قفل ، وليبيا فتحت !! |
والله متعة لكن يا ود الخاله ..
انا غايتو جيتك بي مويتي تنقط .. حسع دي تلبت لي من سفينة بي هناك
بكري دا احسن حاجة عمله .. لم لينا اكبر كمية من الفارات ..
فاااااارررررااااات عديل كدا ..
|
Post: #12
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 03:17 PM
Parent: #8
تامبا ، يا أصلي .
(بليت) لينا الحتة بي مويتك دي ياخ.
أها بالله السفينة التلبت منها دي سيدا منو، واللا ( مُدورّا) براك
ياخ من أول مظاهرة كل ( فارة ) جاء شايل ليهو مكرفون وخرتاية صكوك
الفارات ديل مصابين بالوهم ( التجاري ) وهو أسوأ أنواع الوهم.
لكن بيتعالجوا..
|
Post: #9
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 03:04 PM
Parent: #5
أبوحتوت وعبدالرحمن قرشي
قلتوا لي ما عارفين التمنة يا (كبار)..
كدي يا عبدالرحمن أسأل أخوك محمد البشرى ده عنها
خبرتو كويسة في (التمنات)..
قلت لي حبوبات.
|
Post: #10
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Abdulrahman Gorashi
Date: 06-20-2012, 03:10 PM
Parent: #9
يا ابوصلاح،
وهي دحين ما كلام حبوبات!!!
أنا باين لي براءتي دي يوم بتقتلني، قبل شوية أخونا تمبس الله يطراه بالخير أدا اخوك علي راسو بس عشان سؤال برئ،
|
Post: #11
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: وليد محمد المبارك
Date: 06-20-2012, 03:15 PM
Parent: #10
مرحبا بك في المجموعة يا صلاح
وليد محمد لمبارك
امين سر المجموعة المتلبة
|
Post: #13
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 03:29 PM
Parent: #11
| Quote: امين سر المجموعة المتلبة |
بالله يا وليد هي مجموعة ، ومنظمة كمان !!
المشكلة يا وليد إنو ما شايف لي زول من الناس المتهمين (زوراً) ديل قاعد جوة السفينة!!
زول ما جوة السفينة ، يتلب ليكم كيف يعني !! ما قلت ليك الفارات ديل موهومين..
أهل الجتة والراس زاتم جو هنا وقالوا هم انقاذيين وح يظلوا في السفينة للآخر ، تاني شنو؟؟
|
Post: #14
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: ولياب
Date: 06-20-2012, 03:31 PM
Parent: #11
إزيك ياصلاح عبد الله
طبعاً أقرب وصف لك بأنك مركب مكنة (كوز) وداقي سايرين ، وهناك وصف آخر يمكن أن يطلقوه عليك أنك لست من المناضلين الشرفاء ، وتوقع أن يتم توزيع الصكوك عليك حالاً .
* ولياب واحد نفر ما في هب سياسة .
|
Post: #15
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: ABUHUSSEIN
Date: 06-20-2012, 03:41 PM
Parent: #14
غايتو يا أب شنب دا كلام زول روحو محراقهو شديييييييييد و داير ليه سبب
ترد على ود البشرى بي حكاية التـُـمـنـة و لا أرد عليه أنا ....؟؟؟؟
تحياتي و إحترامي
|
Post: #16
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 06:03 PM
Parent: #14
أهلين ولياب قريبي..
والله كلنا مافي ( هب سياسة) لكن ياخي ديل فارات رزق
شغالين يوزعوا في الألقاب والإنتماءات على كيفهم!!
بعدين أنا قلت ليهم اعتبروني كوز، بدون حاجة لتركيب مكنة.
عايزين نعرف منهم (النضال الشريف) ده كيف.
|
Post: #17
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: محمد البشرى الخضر
Date: 06-20-2012, 06:07 PM
Parent: #16
لا يا ابشنب النبي فيك رد لي انت
ابو حسين دا كان اندرع فيني تاني يحلني الحلال
|
Post: #18
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: ABUHUSSEIN
Date: 06-20-2012, 06:10 PM
Parent: #17
Quote: لا يا ابشنب النبي فيك رد لي انت
ابو حسين دا كان اندرع فيني تاني يحلني الحلال |
ياخ عايز أثقفك يا رجعي أحسن ليك أنا من أب شنب....
أب شنب فتح البوست دا عايز ليه سبب مع أي زول
|
Post: #19
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 06:26 PM
Parent: #18
والله يا أبوحتوت عشان حركاتك دي إلا أدرعك في أبوحسين ده..
ما عارف التمنة يا كبير!!
فعلاً يا أبوحسين ، داير لي سبب مع واحد من فارات الرزق ديل..
ياخ معقول يلصقوا في الناس (الألقاب) سااااي كده؟؟
الزول لو ردّ له على (مناضل شريف) يشبكوه يا كوز ويا لوز ..
وبعد شوية يقوم هو يصدق القصة ، وبعدها يجو (مباريي السيرة) بي دلاليكهم ومكرفوناتهم!!
وبعد داك ( الله يقدرك) تنتقد الحكومة!! طوالي يشغلوا ليك فرمالة النطيط والتليب
وإنتظر بقى لحدي ما يتفضلوا عليك بصك غفران أو توبة!!
شفت ليك وهم أكتر من كده يا بوحسين؟؟
|
Post: #20
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: ABUHUSSEIN
Date: 06-20-2012, 06:46 PM
Parent: #19
Quote: والله يا أبوحتوت عشان حركاتك دي إلا أدرعك في أبوحسين ده..
ما عارف التمنة يا كبير!! |
أها يا ود البشرى سيك سيك معلق فيك أب شنب طلب مني أثقفك
عاين جاي الـتـُـمـنـة (بضم التاء) دي نقطة البوليص سمعناها عند أبواتنا و دي القاصدة أب شنب
و كمان عندها معنى تاني و هي الرُبطة بتاعة القش أو القصب اللي هي علف البهائم
يعني أبوك إرسلك إقول ليك بالله أرمي للبهائم ديل تـُمنة قش
بالله شنو ليك يا أب شنب قصرت مع الزول دا...؟؟
|
Post: #21
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 08:56 PM
Parent: #20
| Quote: بالله شنو ليك يا أب شنب قصرت مع الزول دا...؟؟ |
أبداً والله يا ابوحسين ما قصرت تب
ان شاء الله ما يجي يسألك من ربطة القش كمان.
-------
أخبار سفينة نوح شنو يا شباب؟؟
|
Post: #22
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: ABUHUSSEIN
Date: 06-20-2012, 09:06 PM
Parent: #21
| Quote: أخبار سفينة نوح شنو يا شباب؟؟ |
نسيت أقول ليك غير سفينة نوح ظهرت أشياء تانية
يعني ناس عايزين إبولو في كل المراحيض
و إستمناء فكري
ديل خلي ود البشرى إشرحهم ليك
|
Post: #23
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: الشفيع وراق عبد الرحمن
Date: 06-20-2012, 09:41 PM
Parent: #22
التمنة كانت حقة اللبن زمان
--------------
نكشف ليكم السر
مافي غرق ولا حتين
كل الحكاية اديناها حتة خجة عشان الخفاف يتلبوا، الزحمة شديدة والنقاطة قلت
|
Post: #25
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 10:00 PM
Parent: #23
| Quote: التمنة كانت حقة اللبن زمان |
وما زالت يا الشفيع ..
إزيّك ياخ..
إنتو الخج ده ما بتتوبو منو يا الشفيع، واللا كايس ليك سبب زيي كده؟؟
|
Post: #24
Title: Re: إنتو سفينة نوح بتاعتكم دي سيدا منو يا موزعي الصكوك؟؟
Author: Salah Abdulla
Date: 06-20-2012, 09:56 PM
Parent: #22
| Quote: ديل خلي ود البشرى إشرحهم ليك |
يشرح شنو يا أبوحسين.
ياخ ده كلام ريحتو طاقّة.
نسأل الله السلامة..
|
|