من هو البديل في حالة ذهاب النظام ؟؟

.....................

بما انو الشعب لا يثق في أحزاب المعارضة ويعتبرها الوجه الآخر لعملة الحكومة

التكنوقراط بديل حقيقي وواقعي ايا كانت انتماءتهم

البديل الصحيح هو حكومة تكنوقراط ليست ذات ميول حزبية لفترة انتقالية تحدد بفترة زمنية معينة للقيام بأعباء البلد والخروج من عنق الزجاجة في ملفاتها الإقتصادية والسياسية

بالرغم من أن توقيت السؤال غير مناسب
ولكن!!
المهم ديل يغوروا وبعدين يحلها الحلال
..
..


___
البديل هو ارادة الشعب وخياراته
سلام

Quote: تكنوقراطيَّة (Technocracy) حركة بدأت عام 1932 في الولايات المتحدة, وكان التكنوقراطيون يتكونون من المهندسين و المعماريين و الاقتصاديين المشتغلين بالعلوم ودعوا إلى قياس الظواهر الاجتماعية ثم استخلاص قوانين يمكن استخدامها للحكم على هذة الظواهر وإلى أن اقتصاديات النظام الاجتماعي هي من التعقيد بحيث لا يمكن أن يفهمها ويسيطر عليها رجال السياسة ويجب أن تخضع إدارة الشئون الاقتصادية للعلماء و المهندسين, وكانت هذه الدعوة نتيجة طبيعية لتقدم التكنولوجيا. تكنوقراط: هم النخب المثقفة الأكثر علما وتخصصا في مجال المهام المنوطه بهم, وهم غالباً غير منتمين للأحزاب. والتكنوقراط كلمةمشتقة من كلمتين يونانيتين: التكنولوجيا:وتعني المعرفة أو العلم ،وقراط وهي كلمة اغريقية معناها الحكم, وبذلك يكون معنى تكنوقراط حكم الطبقة العلمية الفنية المتخصصة المثقفة. الحكومة التكنوقراطية: هي الحكومة المتخصصة غير الحزبية التي تتجنب الانحياز لموقف أي حزب كان وتستخدم مثل هذه الحكومة في حالة الخلافات السياسية. مثال:دكتور متخصص في العلوم السياسية يسند له منصب رئاسة الحكومة, طبيب معروف وخبير في الطب ينال وزارة الصحة, ودكتور متخصص في الاقتصاد وزارة الاقتصاد, وآخر متخصص في التكنولوجيا وزارة الاتصالات وهكذا...

hgw,lgm
ومعناها بالعربي
الصوملة

Quote: التكنوقراط بديل حقيقي وواقعي ايا كانت انتماءتهم

نعم هي حكومة التكنوقراط يا المسلمي

لابد من استصحاب الهامش الجغرافي للبلاد ومشاكله المزمنة في الحكومة القادمة بل والمشاركة الحقيقية في صنع القرار لا التمثيل الصوري ونظام الترضيات القبلية الذي نحر الوطن من الوريد إلى الوريد

لو كان البديل شيطان بقرون و طالع دخان من راسو فهو افضل من الوضع الحالى!!!!
ثم اى مقارنة بين الاحزاب و القتلة فهى لصالح الاحزاب: فلاحزاب لم تفصل ثلث مساحة البلاد دون اى مردود بل
و يتم الان التلويح بابتلاع ما تبقى من المساحة
ارجو الحذر عند طرح احكام جزافية بخصوص الاحزاب: ما دامت مطروحة كبديل فيجب على رافضى هذا الخيار
طرح نقاط معينة يرونها سلبية بخصوص ادائها يمكن الحوار حولها
اما مساواتها, ضربة لازب, بالانقاذ من غير اى حيثيات فهذا امر, علاوة على تعسفه, فهو لا يؤدى الا لاحباط
الساعين لتغيير الوضع الحالى, خصوصا ممن لم يعاصروا حكم الاحزاب الاخير(1986-1989م) و الذى كان بكل المقاييس افضل من حكم الانقاذ الحالى, و الحساب ولد!

Quote: بالرغم من أن توقيت السؤال غير مناسب ولكن!! المهم ديل يغوروا وبعدين يحلها الحلال .. .. ___ البديل هو ارادة الشعب وخياراته سلام

الأمين إزيك

بل هو الوقت المناسب والمناسب جداً فقدوم الثورة دون معرفة مابعدها يقود إلى الخواء وربما إلى الصوملة كما قال الزميل علي ميرغني




ابصر لرجلك قبل الخطو موضعها ** فمن علا زلقا عن غرة زلجا

Quote: الأمين إزيك بل هو الوقت المناسب والمناسب جداً فقدوم الثورة دون معرفة مابعدها يقود إلى الخواء وربما إلى الصوملة كما قال الزميل علي ميرغني ابصر لرجلك قبل الخطو موضعها ** فمن علا زلقا عن غرة زلجا

محمد الطيب ....... حبابكـ
الثورات في السودان لا تصنعها الاحزاب بل يقوم بها الشعب
وتتسلق الاحزاب على أكتاف الشعب لاخماد الثورة
كلامكـ دا جميل وأوانه مفروض زمان قبل الخروج
أما وقد خرجت الجماهير انتصاراً لنفسها
فعليها ان تملي ارادتها على الاحزاب وتفرض خياراتها
وعشان كدا قلت هذا الكلام ليس أوانه
المهم الآن سقوط النظام ثم يجلس الجميع
احزاب وممثلين للثوار للتفاكر والتحاور في المرحلة المقبلة
مستصحبين أخطاء الماضي وآفاق المستقبل

كن بخير

انا شايف يقلبوها وتتدخل جهات دولية زي الامم المتحدة او النيو المهم ديل يمشوا وماعندى مانع قوات اجنبية تخش تنظم الوضع حتى تتم انتخابات حرة يشارك فيها الكل وتوزع المناصب والثروة بكل عدالة ...


تحياتي ..

عوض حبابك

Quote: ارجو الحذر عند طرح احكام جزافية بخصوص الاحزاب: ما دامت مطروحة كبديل فيجب على رافضى هذا الخيار طرح نقاط معينة يرونها سلبية بخصوص ادائها يمكن الحوار حولها

عدم ثقة الشعب في المعارضة لا يعني سوءها يا عوض ولكنها لم تصل إلى قلب وعقل المواطن بدليل عدم استجابته لنداءتها المتكررة بالخروج إلى الشارع هذه نقطة

النقطة الثانية هي مشاركة المعارضة بكافة أطيافها السياسية في الحكومة فعكست بذلك للمواطن العادي سعيها للسلطة لا لخدمته ودونك قائدي أكبر حزبين في البلد وكل منهما جاد بإبنه كمساعد لرئيس الجمهورية دعك من المواقف المتخاذلة على مر الثلاث وعشرون عاما الماضية

حقيقة أن المواطن لا يثق في المعارضة موجودة على أرض الواقع ولا ينكرها إلا مكابر ,,, دعك من كلامي أعلاه أجبني أنت لماذا؟؟

علي حبابك

Quote: hgw,lgm ومعناها بالعربي الصوملة

نحن نتناقش الآن لتفادي هذا المصير الأسود ولكن بقاء هذا النظام يقود البلاد نحو الصوملة بخطاً حثيثة

البديل هو الشعب .

Quote: البديل هو الشعب .

Quote: الثورات في السودان لا تصنعها الاحزاب بل يقوم بها الشعب وتتسلق الاحزاب على أكتاف الشعب لاخماد الثورة

ما أحاول طرحه هنا هو منع الأحزاب من الارتقاء على أكتاف الشعب كما تجيد ذلك عقب كل ثورة ونعيد الحلقة المفرغة ديموقراطية عسكر ,,, ديموقراطية عسكر وتعود الاحزاب من دون تجديد على مستوى الطرح أو حتى على مستوى الوجوه فتضيع الثورة هباء منثورا

الزول بياخد العبرة من التجارب السابقة
اكتوبر جابت اولاد المهدي والميرغني
والنتيجة عودة الجيش للحكم
ثم ابريل جابت ولد المهدي ساطا كدا وساطا كدا
وكون ثلاثة حكومات بتحالفات لبن سمك تمر هندي
والنتيجة وصول ناس الجبهة في سباق محموم من الانقلابات
ومعلوم انو كان هناك اكثر من ثلاثة انقلابات بعضها حزبي
وبعضها يقودها عساكر طموحين او وطنيين (من الوطن وليس الوطني)
شخصيا مقتنع انو لو الحكاية دي جاطت على طريقة ديل يطيروا بعدّاك نفكر في البديل
اكيد البديل ح يكون الصوملة او الروندة من رواندا
الغبن الاجتماعي على قفا من يشيل
السلاح في متناول كل يد
الحركات المسلحة ما تعدش
الزعماء.. لا يوجد زعيم متفق عليه
شوية وارجع ليك

ود القاضي حبابك

Quote: انا شايف يقلبوها وتتدخل جهات دولية زي الامم المتحدة او النيو المهم ديل يمشوا وماعندى مانع قوات اجنبية تخش تنظم الوضع حتى تتم انتخابات حرة يشارك فيها الكل وتوزع المناصب والثروة بكل عدالة ...

رأيك يحترم ولكن عادة تدخل الجهات الدولية يعقب جريان نهر من الدماء وهذا ما أحاول تجنبه في محاور هذا الخيط

ود القاضي حبابك

Quote: انا شايف يقلبوها وتتدخل جهات دولية زي الامم المتحدة او النيو المهم ديل يمشوا وماعندى مانع قوات اجنبية تخش تنظم الوضع حتى تتم انتخابات حرة يشارك فيها الكل وتوزع المناصب والثروة بكل عدالة ...

رأيك يحترم ولكن عادة تدخل الجهات الدولية يعقب جريان نهر من الدماء وهذا ما أحاول تجنبه في محاور هذا الخيط

سلام محمد صاحب الخيط

اعتقد ان القوى التى تسهم بقدر اكبرفى التغيير ، والطريقة التى سيحدث بها غالبا ما يحددا

من سيكون البديل ، اتفق معك ان اغلب الاحزاب السياسية ابدت عجزا كبيرا

واحيانا يشعر المرء بانها حتى لا تملك الرغبة فى التغيير ، لهذا يسبب التفكير فى البديل كثير من الحيرة

خاصة اذا عرفنا بانه ليس هناك تنسيق حقيقى حول البديل بين قوى الاجماع و تحالف القوى الثورية هذا من ناحية من نتحية ثانية

التناقضات المسكوت عهنا بين الاحزاب التى تشكل قوى الاجماع ، التناقضات المسكوت عنها بين التنظيمات التى تكون تحالف القوى الثورية

خلف كل هذه التعقيدات يطل سؤال البديل مقيدا بشروط ادوات التغيير وقواه ولحظته التاريخية

Quote: من هو البديل في حالة ذهاب النظام ؟؟

لما يذهب النظام في الاول البديل حين ولكن في ظل وجود النظام حالياً لا بديل للنظام الا النظام الحالي

بقال ..سلامات ..

Quote: في ظل وجود النظام حالياً لا بديل للنظام الا النظام الحالي

لكن البوست عن ماهو البديل في حالة ذهاب النظام وليس في حالة وجوده ؟!!

ابراهيم انت بقيت كوز خلاص ولا لسه معصلج معاهم ؟!!!


تحياتي ،،

Quote: لكن البوست عن ماهو البديل في حالة ذهاب النظام وليس في حالة وجوده ؟!!

وهو النظام ذاهب وين ؟؟؟

علي ميرغني حبابك تاني

Quote: الزول بياخد العبرة من التجارب السابقة اكتوبر جابت اولاد المهدي والميرغني والنتيجة عودة الجيش للحكم ثم ابريل جابت ولد المهدي ساطا كدا وساطا كدا وكون ثلاثة حكومات بتحالفات لبن سمك تمر هندي والنتيجة وصول ناس الجبهة في سباق محموم من الانقلابات ومعلوم انو كان هناك اكثر من ثلاثة انقلابات بعضها حزبي وبعضها يقودها عساكر طموحين او وطنيين (من الوطن وليس الوطني) شخصيا مقتنع انو لو الحكاية دي جاطت على طريقة ديل يطيروا بعدّاك نفكر في البديل اكيد البديل ح يكون الصوملة او الروندة من رواندا الغبن الاجتماعي على قفا من يشيل السلاح في متناول كل يد الحركات المسلحة ما تعدش الزعماء.. لا يوجد زعيم متفق عليه شوية وارجع ليك

Quote: ما أحاول طرحه هنا هو منع الأحزاب من الارتقاء على أكتاف الشعب كما تجيد ذلك عقب كل ثورة ونعيد الحلقة المفرغة ديموقراطية عسكر ,,, ديموقراطية عسكر وتعود الاحزاب من دون تجديد على مستوى الطرح أو حتى على مستوى الوجوه فتضيع الثورة هباء منثورا

نعم عدم وجود بديل حقيقي وفاعل قد يقود للصوملة كما قلت ولكن هل تنادي ببقاء النظام مثلاً إتقاء لذلك مع علمك التام بأن دائرة الحرب تتسع كل يوم ,,, السودان ليس الخرطوم فقط

Quote: وهو النظام ذاهب وين ؟؟؟

هو الشعب ده لو قام بوريك محل موديك ؟!!!
اضعف الايمان الشارع ..

Quote: هو الشعب ده لو قام بوريك محل موديك ؟!!! اضعف الايمان الشارع ..

لو قام ؟؟

عبد الغفار سلام

Quote: اعتقد ان القوى التى تسهم بقدر اكبرفى التغيير ، والطريقة التى سيحدث بها غالبا ما يحددا من سيكون البديل ، اتفق معك ان اغلب الاحزاب السياسية ابدت عجزا كبيرا واحيانا يشعر المرء بانها حتى لا تملك الرغبة فى التغيير ، لهذا يسبب التفكير فى البديل كثير من الحيرة خاصة اذا عرفنا بانه ليس هناك تنسيق حقيقى حول البديل بين قوى الاجماع و تحالف القوى الثورية هذا من ناحية من نتحية ثانية التناقضات المسكوت عهنا بين الاحزاب التى تشكل قوى الاجماع ، التناقضات المسكوت عنها بين التنظيمات التى تكون تحالف القوى الثورية خلف كل هذه التعقيدات يطل سؤال البديل مقيدا بشروط ادوات التغيير وقواه ولحظته التاريخية .

كلام مرتب يا عبد الغفار وحقيقي جدا جدا وانما أحاول استباق الحدث بحثاً عن أفضل الخيارات لهذا الوطن كواحد من الشعب ليس إلا

السؤال دا بيجيب لي ارتكاريا

1- فترة انتقالية سنة الى سنتين تحكم فيها البلاد حكومة من التكنوقراط العاجبنكم ديل
2- انتخاب جمعية تأسيسية لكتابة الدستور الدائم للبلاد
3- الدستور سيحدد صلاحيات وعلاقة المؤسسات الرئيسية بالدولة الرئاسة، البرلمان والقضاء ببعضها البعض ويؤكد على استقلاليتها
ويحدد كمان شكل الدولة
رئاسية
برلمانية
ولا مزيج

بعد كدا البيحكم منو ما بيهم ان شاء الله نستورد ناس يحكموا
طالما انت اسست لي طريقة تداول السلطة ومنعت جهة بعينها من السيطرة على مفاصل الدولة
الدولة المحترمة = مؤسسات ويل استابليشت
دا البديل

Quote: لو قام ؟؟

حبة حركة وبقوم

.القضية كما يقولون ليست من يحكم ....
القضية كيف يكون الحكم ؟
وكيف يختار الحاكم ..
ولو اتفقنا على أن الديمقارطية ونظام التصويت الحر في ظل
حكومة انتقالية محايدة رئيسها وكل قيادتها ليس فيهم مرشح للرئاسة
أو البرمان ...
يكون بعد ذلك البديل هو ما يختار الشعب وفق هذه الآلية
عن طريق التصويت الحر
وقبل ذلك الاتفاق على دستور دائم مفصل يضع خريطة للحكم
ونظام للحكم .
هذا الجسم الضخم للحكومة الذي أكل الأخضر واليابس دون
أن يعنى بقضايا المواطن لابد من هدمه وبنائه من جديد
ليكون جسم خفيف ورشيق يعطي أكثر مما ياخذ...
كفاية ستة أو سبعة ولايات او أقاليم ومحافظات قليلة كما كانت
وأعفاء الدستوريين في المركز والولايات ...
لا نريد برلمانات ومجالس وهمية ....
ولماذا حصر الخيارات في الايطار القديم
للاحزاب والزعامات ؟!
حوتنا والدة ماشاء الله
.

بقال العوارة البتسوي فيها دي شنو ؟؟

Quote: حبة حركة وبقوم

الله يعلم

أقبل بإبليس اللعين حاكماً للسودان بشرط ألا تتضمن حكومته أيّاً ممن حكموا السودان أو ساهموا في حكمه منذ 1956 وحتى اليوم.

وسأقوم بمبايعته حاكماً عاماً للسودان في حالة استلامه للسلطة. - والله على ما أقول شهيد -

متى عرف البديل اصبحت الثورة انقلابا ابيض يخدم جهة حزبية معينة ولكن الثورة تكون نتاج للتغير وكنس النظام بأدرادة شعبية مجردة من كل حزبية وطائفية كما شاهدناه فى مصر وتونس وليبيا فى بداياتها وبعد نجاح الثورة سنجد كثيرا من الاحزاب تصرح باشعالها ولاننا فى منظومة دول العام الثالث سيكون نهاية المخاض انتخابات لنفس الاحزاب ولكنها بافكار جديدة فرضتها الثورة الشعبية بجانب ولادة احزاب جديدة .
فما يهمنا الان كيف تبدأ الثورة لتصل الى درجة تغير النظام وبعدها لكل مقام مقال
تحياتى

البديل من يختاره الشعب بإرادته الحرة ..
دمت بالف خير الأخ محمد الطيب يوسف

Quote: البديل من يختاره الشعب بإرادته الحرة ..

وهنا تبرز القضية
كيف سيختار الشعب بارادته
وامامك التجربة المصرية
مع كل جيشها واهمية امنها بالنسبة للامن والسلم العالميين\
اقلام كتابتها بتزول بعد ثلاثة ساعات
قصف جنوب اسرائيل بصواريخ من سيناء
وديل براهم بيشكلوا اكبر دليل على اتجاه الفريقين لاساليب غير قانونية
الاقلام الصينية تهمة معرض لها الفريقين
قصف اسرائيل رسالة واضحة للناخب المصري ان
فوز مرسي مممكن يعيد الناس لمربع الحرب تاني

طيب دا الحال في مصر بكل استقرارها
كيف الحال يكون في السودان بلد المليون مليشيا ومليشيا مضادة

Quote: السؤال دا بيجيب لي ارتكاريا 1- فترة انتقالية سنة الى سنتين تحكم فيها البلاد حكومة من التكنوقراط العاجبنكم ديل 2- انتخاب جمعية تأسيسية لكتابة الدستور الدائم للبلاد 3- الدستور سيحدد صلاحيات وعلاقة المؤسسات الرئيسية بالدولة الرئاسة، البرلمان والقضاء ببعضها البعض ويؤكد على استقلاليتها ويحدد كمان شكل الدولة رئاسية برلمانية ولا مزيج بعد كدا البيحكم منو ما بيهم ان شاء الله نستورد ناس يحكموا طالما انت اسست لي طريقة تداول السلطة ومنعت جهة بعينها من السيطرة على مفاصل الدولة الدولة المحترمة = مؤسسات ويل استابليشت دا البديل

هذه خارطة طريق كاملة الدسم , تمام
اللهم وفق بلادنا السودان لكل خير ..

البديل موجود ومحجوب ! , فتح الابواب يعطيك معادلة كم هي حواء السودانية ولود ..
البديل نظام حكم كامل وليس افراد فقط مهما بلغ تمدنهم وعبقريتهم ,
البديل نظام لا استدامه لمخطئية وفاشليه ..

حبابنا سوا خطوات وطريق ..

______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور

Quote: من هو البديل في حالة ذهاب النظام ؟؟

أنا شايف البوست ده مهم جدآ وفي رأيي هو بوست الساعة إن تم النقاش فيه بجدية, دون دكتاتورية, دون زعل, دون شجار, دون سخرية وإحترام لكافة الآراء
خلونا نكون واقعيين, الحكومة دي لسه قاعدة وما مشت وإمكن تاني تقعد شهر أو 20 عاما دي بتعتمد على تكوين بديل وااااضح لا لبس فيه للشعب
أكون أكثر وضوحآ البديل غير واضح البتة للشعب ولو عملت إستطلاع شعبي حا تطلع بإجماع (وين البديل) مع رفض الشعب للمعارضة الحالية والأحزاب
لكن مثلآ إذا كونا رأي مثل:

Quote: البديل الصحيح هو حكومة تكنوقراط ليست ذات ميول حزبية لفترة انتقالية تحدد بفترة زمنية معينة للقيام بأعباء البلد والخروج من عنق الزجاجة في ملفاتها الإقتصادية والسياسية

كده بنكون قطعنا نصف المشوار للشعب وبكده تاني ما حا تلقى زول يقول ليك (أين البديل) لأنه بكده البديل أصبح واضح على عكس أن تقول للشعب البديل هو الشعب أو هو الشيطان
أو أن أي فرد أو حزب لن يكون أسوأ من النظام الحاكم, وبكده الشعب بسهولة ممكن يخرج لقلب النظام شريطة أن يتم تعريف البديل بوضوح.
أنا شخصيآ أتفق (بعد زوال الإنقاذ) بأن يحكم السودان لفترة إنتقالية لا تتجاوز العام من قبل النخبة المثقفة التي تسمى (بالتكنوقراط) ولكن مثلي مثل بقية الشعب أريد من
الجميع الإتفاق على أسماء بعينها تكون جاهزة لحكم السودان بل يتم الإعلان عنها والترويج لها على كافة الأصعدة القومية والدولية حتى يتعرف عليها الناس جيدآ وحتى تشتهر فتصل
إلى أسماع الشعب بالداخل والخارج, ثم بعد مرور العام الإنتقالي تقام إنتخابات نزيهة تدخل فيها كافة الأطراف السياسية وحينها سيقول الشعب كلمته.
فبإمكاننا الآن القول بأننا قد خرجنا من سؤال من هو البديل (إذا وافقتم على هذا المقترح), وعليه يستمر النقاش في البوست أو يفتح بوستا لإختيار
النخب المثقفة في البلاد التي تكون جاهزة لإستبدال هذا النظام وأعتقد لو إتفقنا عليها وإستشرنا هؤلاء في القبول أو الرفض لا يتبقى سوى الإعلان عن هذه القائمة المنتقية.
إذن دعونا نتفق الآن أننا قد وجدنا البديل والشروع مباشرة في البحث عن أفضل النخب المثقفة لتدير البلاد في الفترة الإنتقالية القادمة.
والتعب والجهد في هذا الأمر في رأيي مهم جدآ إذا أردنا أن يتقدم السودان للأمام من أول مرة عوضآ عن خوض الكثير من التجارب الفاشلة بوضع إناسآ غير مؤهلين للحكم
ونغدو نعيش نفس المشاكل التي تعيشها الآن مصر وليبيا وغيرهما من البلدان الثورية. وحتى لا أكون تعجيزيآ النخب المثقفة كثيرة ويمكن الوصول لإتفاق حول هذه النخب
بسرعة, فالقصد هو الحكم الإنتقالي لعام واحد ومن ثم تقام إنتخابات نزيهة يكون الشعب فيها هو الفيصل.

البديل انا وانتا واى سودانى غيور بحب بلدو ومصلحتها فى المقام الاول!!

البديل ..ليس بالضروره شخص مشهور ..ولا من اسره مشهوره..!!


السودان مليان بدائل!!


ـــــــــــ
دعاية الحكومة الاعلاميه تريد ان ترسخ بان ليس هناك بديل لهم!!

حينطو ليك ناس جدي عمل وجدي فعل

بئسا لهم وللكيزان اجمعين

محمد الطيب لك التحية

Quote: عدم وجود بديل حقيقي وفاعل قد يقود للصوملة

فى البدء الثورة فعل سياسى تعنى تغير كل العلاقات القديمة التى جربت وأثبتت فشلها لكن فى نفس الوقت أنتجت مفاهيم مغلوطة يتم تداولها بوعى او دون وعى ولها أهداف منها الفعل العكسى وهو الأحباط

لكن من الضرورة الحوار وقبول الآخر

من الأخطاء التى وقعت فيها الثورات السودانية وادت لعدم اكتمالها وبل اكلها أبنائها عدم صيرورة الثورة حتى إنجاز مهامها واهدافها الأساسية التى من أجلها قامت وتحصينها وحمايتها بالفعل الثورى

قبل الحديث عن البديل

نحن جربنا أنواع من الديمقراطيات والحكم العسكرى المطلق ديمقراطيات بمفهوم الزعيم الذى يحكم على مستوى كل السلطات (سطلة دينية 0 ثقافية 0 رياضية 0إجتماعية ) نحن عندنا مشكلة من الضرورة
أن نقف عندها مفهوم القائد الملهم والزعيم الكارزمى وده بيعنى كاننا قطيع خراف لايتحرك إلا بوجود خروف كبير عندو قرون قوية
ياخى الثورات فى كل العالم وفى السودان قامت وستقوم بجهد جمعى وذكى جدا وفية كثير من الفداء والتضحيات ولم تنتصر اى ثورة إذا غابت عنها القيادة الجماعية
ماأريد ان أقوله
مكان الفرد تتقدم قيادتنا الجماعية بعنى بلغة أخرى تحكمنا المؤسسات وليس أفراد يحكمنا دستور يتفق عليه كل اهل السودان بدون تغيب العمال والمزارعين وكلات الموانى والمدن والطلبة والنساء
فى الثورات العربية والسودانية التى لم تكتمل يقوم بسرقتها النخب والتنقراط الذين تتحدث عنهم وياصديقى الكل منحاز الكل منتمى حتى إذا لم يدرك ذلك فهو منتمى
يعنى مانغلط مره ثانية ونخرج من الخرطوم حتى تتكون الحكومة الأهلية ويمثل فيها الثوار وكلات المدن والموانى والمثقفين الثوريين الذين ينحاذوا الى قضايا وهموم مواطنيهم
ولابد من ميثاق لحماية الثورة
والحكومة الأهلية لها أهداف محددة وزمن محدد
لى عودة أذا تحدثت عن البديل
لأن البديل فى راى ليس الديمقراطية اللبرالية ديمقراطية أخرى وتأخر الثورة السودانية ليس لقبول جماهير هذة الدمامل التى تحكمنا وليس لأنه يفكر فى البديل الفرد

لى عوده

شكراً يا شهاب على التامين
اذا بنتخيل انو سيناريو الثورة حتعقبوا حالة رخاء واستقرار مباشرة بنكون واهمين
مصر الكانت في وضع اكثر استقراراً بكتير قبل الثورة حاصل فيها الشايفنو هسة فما بالك ببلد منهارة واقتصاد رايح في ستين دهية
لكن على الاقل بنكون بدينا مسيرة هد الواقع الخرب دا وبدينا التخطيط للبناء
والتخطيط للبناء دا ياهو القلتو في مداخلتي الفوق دي
المؤسسات ثم المؤسسات ثم المؤسسات
والممارسة السياسية الرشيدة برضو ما بتجي بين يوم وليلة
المهم في الموضوع تفكيك مقول البديل البتخذل الناس و تبطء الخطى نحو التغيير
المهم جداً حاليا اننا ننتبه للتجارب الحولنا وبعاين تحديدا للتجربة المصرية
الناس الشباب تحديدا الحيكونوا اكيد وقود الثورة دي لازم تكون خارطة طريق الثورة وما بعدها واضحة جداً عندهم عشان ما تنسرق الثورة
انا من يومين بفتش في صفحات لامة الشباب ديل عشا نفكر وننسق مع بعض و ننجح ان شاء الله
طلبة الجامعات وناس قرفنا وغيرهم نواة وشرارة الثورة
يا جماعة اذا في صفحات زي كدا ورونا ليها واذا مافي خلونا نعملا و لازم تكون قريبة واكسسبل للشباب والطلبة
خلونا نبدا

كلمة السر فى رأيي هى التنظيم !!!
اذا انتظم الناس يستطيعوا ان يقتلعوا هذا النظام فى ساعات محدودة ..
واذا انتظموا يستطيعوا ان يتوافقوا على حكام مهما كانت سيرهم لسنوات طويله ..

الحكومة الآن ومنذ بدايتها تلعب فى مساحة اختلاف الأخرين .. ولن تترك لهم الفرصة للتنظيم ..
لان الأنتظام يعني نهايتها المؤكدة ..الحكومة استطاعت بنجاح واضح ان تقنع عدد كبير من السودانيين بأن
بديلها هو (الفوضي) فى حين انها هي من مهد لهذا الخيار المحتمل ..كما استطاعت بالطرق الأعلامي المتواصل
ان تحرق ورقة الأحزاب التاريخية , وللحق يجب الاعتراف بأن هذة الأحزاب ساعدتها بالأستسلام وعدم الفاعلية والجدية ..

الحكومة نامت طويلا على هذة المسلمات التي زرعتها .. وراهنت على عدم قدرة انتظام الناس فى مواجهتها ..وهى تعلم علم اليقين بأنها هشة جدا
وضعيفة جدا ومنخوره من الداخل ..ونسوا بأن الأنتحار ايضا يمكن ان يكون خيار ..

لذا ...

فلنجفف المستنقع اولا (كما يقول المثل الروسي)..وسنجد طريقة ما لبناء البيت الجديد ..حتي وان كانت طريقة غير مثالية ...

Quote: كده بنكون قطعنا نصف المشوار للشعب وبكده تاني ما حا تلقى زول يقول ليك (أين البديل) لأنه بكده البديل أصبح واضح على عكس أن تقول للشعب البديل هو الشعب أو هو الشيطان أو أن أي فرد أو حزب لن يكون أسوأ من النظام الحاكم, وبكده الشعب بسهولة ممكن يخرج لقلب النظام شريطة أن يتم تعريف البديل بوضوح. أنا شخصيآ أتفق (بعد زوال الإنقاذ) بأن يحكم السودان لفترة إنتقالية لا تتجاوز العام من قبل النخبة المثقفة التي تسمى (بالتكنوقراط) ولكن مثلي مثل بقية الشعب أريد من الجميع الإتفاق على أسماء بعينها تكون جاهزة لحكم السودان بل يتم الإعلان عنها والترويج لها على كافة الأصعدة القومية والدولية حتى يتعرف عليها الناس جيدآ وحتى تشتهر فتصل إلى أسماع الشعب بالداخل والخارج, ثم بعد مرور العام الإنتقالي تقام إنتخابات نزيهة تدخل فيها كافة الأطراف السياسية وحينها سيقول الشعب كلمته. فبإمكاننا الآن القول بأننا قد خرجنا من سؤال من هو البديل (إذا وافقتم على هذا المقترح), وعليه يستمر النقاش في البوست أو يفتح بوستا لإختيار النخب المثقفة في البلاد التي تكون جاهزة لإستبدال هذا النظام وأعتقد لو إتفقنا عليها وإستشرنا هؤلاء في القبول أو الرفض لا يتبقى سوى الإعلان عن هذه القائمة المنتقية.

شكرا أشرف

لابد بالطبع من نقطة مهمة جداً حتى لا تتكرر مأساة البلاد من 56 ولي جاي

1/ قانون العزل السياسي
لكل من تقلد منصباً دستوري في نظام الإنقاذ حتى وإن كان ممثلاً لتنظيم آخر
2/ حظر الترشح لرئاسة الجمهورية أو رئاسة الوزراء لمن تولى هذا المنصب لمرتين على الأكثر

3/ حظر الترشح في الانتخابات لمن جاوز الستون عاماً وذلك للدفع بدماء شابة وجديدة في شرايين الوطن

( بما انو الشعب لا يثق في أحزاب المعارضة ويعتبرها الوجه الآخر لعملة الحكومة )



من اين اتيت بهذا الافتراض هل انت مفوض بالحديث بأسم الشعب

الرائع د محمد الطيب
تحياتى
من المسلمات قبل التنظير فى الامر ان مظان الاجتهاد هو تحقيق قول الحق " قل اللهم مالك الملك تؤتى الملك من تشاء وتنزع الملك ممن تشاء وتعز من تشاء وتذل من تشاء بيدك الخير انك على كل شئ قدير " وجدلية ( من يحكم ؟ ) ..... محكومة بظرفها فى المكان والزمان المناسبين " قالوا انا يكون له الملك علينا ونحن احق بالملك منه ولم يؤت سعة من المال ؟ قال ان الله اصطفاه عليكم وزاده بسطة فى العلم والجسم والله يؤتى ملكه من يشاء "
اما جدلية كيف يحكم ؟ ... فيا صديقى تظل فيها قيمة الرضا هى المفتاح فى امر القدرية وقيمة المكابدة هى المفتاح فى امر الاصلاح ... وكما قال المصطفى (ص) كيفما تكونوا يول عليكم ....
لا اجد فيما طرح بحسب راى الشخصى الضعيف خيارا يحقق الهدف من الولاية فى ظل الحاكم والمحكوم حتى فى ظل الموجود .... الا انى اؤمن بان الامن والسلامة للناس عظيمتان يجب الحفاظ عليهما فى ظل اى نظام او تغيير ... فلا معنى لتغيير تزهق فيه الارواح او تسترخص فيه حقوق الغير او تجير له الفتوى ... كما لا اجد معنى للحفاظ على حكم يهدر العظيمتان .. حرمة دم المسلم اشد حرمة عند الله من الكعبة .. هذا فيما يلى حتى تبعات التغيير ...
اما من يغير من ؟ فسنة الله غالبة فالقدرة الاقتصادية ( سعة المال ) لم تك مقياس بل كانت ( بسطة الجسم ... وهية هيبة القوة ) وبسطة العلم وهى ( تكنوقراط حقتك ) وهى بالبلدى فى زماننا هذا ( خلطة جيش وشعب ) فلا معنى فى سنة الحكم لفصل القيادة العسكرية عن المدنية فى ظل انعدام الحاكم العسكرى العالم .... وهذا بالطبع يثبت عدم اهلية " الاحزاب لقيادة الحكم " ولك ان تبحث فى دول العالم كلها عن حزب حاكم لا يكون رئيسه قائدا اعلى للجيش !!!! لن تجدها حتى فى النموذج الديموقراطى الامريكى ...
اتفق معك ان الحاكمية والقيادة السياسية لا بد لها من سقف زمنى ولم يكن ذلك كذلك لما اختار النبى ( ص ) حين خير بين الخلود والموت ليقول " بل الى الرفيق الاعلى " والتاريخ الاسلامى الذي قاد التغيير المجتمعى والاقتصادى والسياسي فى زمن وجيز به من المفارقات العجب
عمر بن عبد العزيز مغير التاريخ حكم سنتين ونصف
ابوبكر الصديق حكم اقل من ثلاث
ولك ان تقيس ...
الحكم فى ظل الاسلام لا للاشخاص بل للمشاريع التى تراعى الحقوق وتعرف بالواجبات وتضع الحدود وتحاسب عليها ولا اظن ان مشروعا سيكون باطول من مشروع الرسالة المحمدية التى حكم راعيها 23 عاما منها 13 بمكة معرفا بدستورها ومخططا لنهجها ومعرفا بعقيدتها ومنها 10 اعوام مطبقا لما علمه الناس فى دولة المدينة ...
الحكومات واعنا هنا التجارب فى الحكم ... كالبشر تماما تمر بمراحل ... طفولة ومراهقة وشباب ونضوج وشيخوخة ... ولعمرى انها فى هذا التشبيه تختلف حولها الانظار بين الاعجاب والنفاق فى كل المراحل الا انها حينما تصل مرحلة الشيخوخة لن تخطئها العين .... وتستدعى العطف والشفقة
فى تاريخ السودان الحديث مرت حكومات بهذه المراحل فى سنوات مختلفة وبازمان مختلفة بين 7 و 4 و 16 و 4 و ؟ سنوات
وكما يقول المثل " عمك كان خررررف ... اقفل عليهو الباب "
ولك الود كله

كمال ازيك ياحبيب

Quote: عدم ثقة الشعب في المعارضة لا يعني سوءها يا عوض ولكنها لم تصل إلى قلب وعقل المواطن بدليل عدم استجابته لنداءتها المتكررة بالخروج إلى الشارع هذه نقطة النقطة الثانية هي مشاركة المعارضة بكافة أطيافها السياسية في الحكومة فعكست بذلك للمواطن العادي سعيها للسلطة لا لخدمته ودونك قائدي أكبر حزبين في البلد وكل منهما جاد بإبنه كمساعد لرئيس الجمهورية دعك من المواقف المتخاذلة على مر الثلاث وعشرون عاما الماضية حقيقة أن المواطن لا يثق في المعارضة موجودة على أرض الواقع ولا ينكرها إلا مكابر ,,, دعك من كلامي أعلاه أجبني أنت لماذا؟؟

ده كتبناهو لي أخونا عوض فوق ممكن إنت تاخدوا برضو كرد علي الشق الأول من السؤال
بالنسبة للشق التاني انا مابتكلم بإسم الشعب أنا واحد من الشعب والبطرخ فيها دي رؤية قابلة للتصويب

تخريمة :
فاتنى القول ان البديل المثالى لن يكون .... فعمر بن الخطاب الحاكم العادل مات مقتولا ....

العزيز هيثم بابكر
كيفك وكيف الأسرة الكريمة ان شاء الله كلكم بخير وعافية

Quote: وجدلية ( من يحكم ؟ ) ..... محكومة بظرفها فى المكان والزمان المناسبين " قالوا انا يكون له الملك علينا ونحن احق بالملك منه ولم يؤت سعة من المال ؟ قال ان الله اصطفاه عليكم وزاده بسطة فى العلم والجسم والله يؤتى ملكه من يشاء "

الآية الواردة هنا لا تطابق الوقت الآني فاختيار طالوت لبني إسرائيل جاء من نبي وجبت عليهم طاعته والنبي جاء بالأمر من الله عز وجل ولكن البوست يناقش ماهو الوضع حال ذهاب النظام الحالي وماهو الخيار الأنسب للبلاد والعباد فالوضعان مختلفان جدا يا هيثم .

Quote: اما جدلية كيف يحكم ؟ ... فيا صديقى تظل فيها قيمة الرضا هى المفتاح فى امر القدرية وقيمة المكابدة هى المفتاح فى امر الاصلاح ... وكما قال المصطفى (ص) كيفما تكونوا يول عليكم ....

إستدلالك بالحديث مردود عليك يا هيثم وهاك تخريج الحديث
السؤال كيفما تكونوا يُولىّ عليكم، أريد معرفة درجة قوة هذا الحديث؟الإجابــةالحمد لله والصلاة والسلام على رسول الله وعلى آله وصحبه أما بعد:

فحديث: كما تكونوا يولى عليكم. رواه الديلمي في مسند الفردوس عن أبي بكرة، ورواه البيهقي عن أبي إسحاق السبيعي مرسلاً.
وقد ضعفه غير واحد من أهل العلم، منهم من المتقدمين الحافظ ابن حجر العسقلاني رحمه الله ومن المتأخرين الشيخ الألباني رحمه الله فقد جمع طرقه في سلسلة الأحاديث الضعيفة 1/490
وحكم عليه بالضعف. ثم قال: والواقع يكذبه، فإن التاريخ حدثنا عن تولي حكام أخيار بعد حكام أشرار والشعب هو هو.
والله أعلم

من هنا

Quote: لا اجد فيما طرح بحسب راى الشخصى الضعيف خيارا يحقق الهدف من الولاية فى ظل الحاكم والمحكوم حتى فى ظل الموجود .... الا انى اؤمن بان الامن والسلامة للناس عظيمتان يجب الحفاظ عليهما فى ظل اى نظام او تغيير ... فلا معنى لتغيير تزهق فيه الارواح او تسترخص فيه حقوق الغير او تجير له الفتوى ... كما لا اجد معنى للحفاظ على حكم يهدر العظيمتان .. حرمة دم المسلم اشد حرمة عند الله من الكعبة .. هذا فيما يلى حتى تبعات التغيير

طبيعي يا هيثم الا ترى فيما طرح خيارا جيداً للتغيير فأنت موال لهذا النظام حتى إشعار آخر ^__^
أما بالنسبة لحرمة دم المسلم فدمه يهدر كل يوم مابين دارفور وجنوب كردفان دعك من الحركات المسلحة أنا أتكلم عن المواطن العادي الذي يروح ضحية حروب الإنقاذ التي لا تنتهي وقد سمعتها من عمر البشير بأذني (يقولوا الماتوا في دارفور تلتمية الف والماتو حقيقة يا جماعة عشرة ألف بس ) عشرة الف يا وإنت بتتكلم لي عن حرمة دم مسلم واحد وكعبة واحدة دي عشرة الف كعبة يا هيثم

Quote: " والتاريخ الاسلامى الذي قاد التغيير المجتمعى والاقتصادى والسياسي فى زمن وجيز به من المفارقات العجب عمر بن عبد العزيز مغير التاريخ حكم سنتين ونصف ابوبكر الصديق حكم اقل من ثلاث ولك ان تقيس ... الحكم فى ظل الاسلام لا للاشخاص بل للمشاريع التى تراعى الحقوق وتعرف بالواجبات وتضع الحدود وتحاسب عليها ولا اظن ان مشروعا سيكون باطول من مشروع الرسالة المحمدية التى حكم راعيها 23 عاما منها 13 بمكة معرفا بدستورها ومخططا لنهجها ومعرفا بعقيدتها ومنها 10 اعوام مطبقا لما علمه الناس فى دولة المدينة ... الحكومات واعنا هنا التجارب فى الحكم ... كالبشر تماما تمر بمراحل ... طفولة ومراهقة وشباب ونضوج وشيخوخة ... ولعمرى انها فى هذا التشبيه تختلف حولها الانظار بين الاعجاب والنفاق فى كل المراحل الا انها حينما تصل مرحلة الشيخوخة لن تخطئها العين .... وتستدعى العطف والشفقة فى تاريخ السودان الحديث مرت حكومات بهذه المراحل فى سنوات مختلفة وبازمان مختلفة بين 7 و 4 و 16 و 4 و ؟ سنوات وكما يقول المثل " عمك كان خررررف ... اقفل عليهو الباب

أتفق معك في هذا الجزء خاصة بعد خرف الحكومة الحالية وهي تقترب من كسر حاجز الثلاثة وعشرون عاماً وخرفها قد بان وطبق الآفاق

Quote: فاتنى القول ان البديل المثالى لن يكون .... فعمر بن الخطاب الحاكم العادل مات مقتولا ....

ومن قال أننا نبحث عن البديل المثالي ,,, انما نبحث عن الأفضل فقط يا هيثم ,,, وخيار الإنقاذ هو الاسوأ على الاطلاق

ولك من الود مثله

التكنوقراطيين موجودين في الانقاذ.. موجودين في الاحزاب العظامية (الامة/الاتحادي) وكانوا موجودين دائما وبدا منذ الحكومة الاولى (الازهري) الما موجود هو الشباب البديل لامثال "محمد عادل" العمرو اصغر من عمر التلفزيون الملون والانترنت وهو لسه عايش في جلباب "سيدي".

النظام طال الزمن ولا قصر ذاهب حيث ذهب غيره.. الذي اراه ان سيناريو ما بعد ذهاب نميري سوف يتكرر، انتفاضة شعبية.. انقلاب العسكر.. ضغوط خارجية.. اختطاف الانتفاضة.. انتخابات.. ائتلافات حزبية.. اختلافات.. ارتجافات.. ثم مسلسل [ترقبوا بيان هام للقوات المسلحة] ثم اذاعة خطاب هجين من خطاب كل من الفريق عبود وجعفر نميري وسوار الذهب وعمر البشير. الخبر الجيد انو مهما حدث لن يعود سودان "محمد علي باشا" ولن يشمها متاسلم وسوف ناخذ الناس بالشبهات في هذا الامر، بمعنى ان من نراه يرتاد المساجد نصنفه تيار متاسلم فيعزل سياسيا.

الاكرم د . محمد الطيب
شاكرا على تشخيص الروشتة فقد عهدتك قراء للخطوط واكثر فهما للمعانى فلا تنظر لما كتبت بنظرة الطبيب المعارض ولا انا الكاتب الموالى بل بنظرة مقدم الراى وكل يؤخذ برايه ويرد الا صاحب تلك القبة كما قيل ... والقبة هنا هى القبة الخضراء بمدينة رسول الله

تعقيبا على تعقيبك

Quote: الآية الواردة هنا لا تطابق الوقت الآني فاختيار طالوت لبني إسرائيل جاء من نبي وجبت عليهم طاعته والنبي جاء بالأمر من الله عز وجل ولكن البوست يناقش ماهو الوضع حال ذهاب النظام الحالي وماهو الخيار الأنسب للبلاد والعباد فالوضعان مختلفان جدا يا هيثم .

لا اتفق معك فى " تحنيط " الايات وتجميدها فى فترة زمنية محددة وان لم يكن ليستفاد منها فى عهد النبوة وما بعده لما ذكرت فى القران ... هنا يستحضرنى فهم الوالد حفظه الله حول " فقه المقاصد " والمقصد من الاختيار واضح
اما فيما يلى الاستدلال بحديث ضعيف فلا غرو كما يقول اهل العلم فى الاخذ به فى فضلئل الاعمال ولعمرى ان ما طرحته انت من موضوع يعد من الفضائل
شاكرا اعادة قراءة ما كتبته بين السطور فانا لا ادافع عن نظام بل اقدم راى .... وهذا لا ينفى انتمائ ... وكبر النظارة يا دكتور ....
اسفت جدا للمهاترة فى بعض ما تفضلت به من رد ... ولن ارد عليه
ولك الود كله

تخريمة جميلة
دعنا لا ننازع رب العزة فيما يختار فلسنا اهل لذلك ودعنا نساله الخير لاهل السودان ان كان فى هذه الحكومة او غيرها ... فلا انا ولا انت نملك حق تنصيب من نشاء بل سويا نملك ان نقول لمن احسن احسنت ولمن اخطا اخطات ونتحمل تبعات ذلك ...

ابوالطيب يا حبيب ازيك

Quote: بما انو الشعب لا يثق في أحزاب المعارضة ويعتبرها الوجه الآخر لعملة الحكومة

غايتو العبارة المختوتة "كحقيقة " دي -في نظري - "خطاب كامل مضغوط " ! ولو فكفكناها احتمال نلقي حل ! علي الاقل
لطريقة تفكيرنا ...
نحاول افككها معاك :
1- العبارة قاصدة منو ب"الشعب" و احزاب المعارضة ؟
الاحزاب والتنظيمات الشايلة سلاح مش احزاب معارضة !؟ و عندها الاف الاتباع والمناصرين مش جزء من الشعب ؟
وبالطريقة دي معناه اقصينا ناس كتار من صفة "الشعب" ! يعني نتكلم باسم "الشعب" و كمان نختار نحن منو البمثل "الشعب"
2- هل الشعب مقصود بيهو انا و انت الما عندنا علاقة بأحزاب المعارضة و بنحاول نوصل رأينا لللاحزاب
عشان نقول ليهم (نحن ما بنثق فيكم ) و شدو حيلكم شوية ! ولة قصدنا نحاربهم ؟ و طيب ليه بنقول رأينا
عن طريق "الشعب" بدل نقول رأينا مباشرة ؟
واذا افترضنا انو "الشعب" قال لازم نوصل ليهو رأيو "للاحزاب " مش حقو في الاول نناقش الشعب دا انو ياخوانا
احزاب المعارضة ما الوجه الاخر للحكومة !؟ يعني الديمقراطية حتي لو في رأسها الصادق
او الميرغني او غيرهم ما الوجه الاخر للنظام ومهما يكون النظام الديمقراطي سئ لكن ما بقدر
يقتل مئات الالف بالانتينوف او يشرد عشرات الالف من الوظائف و ما بعتقل او بقتل الزول لمجرد انو قال رأيو
مش النظام الحالي حسب بعض الاحصائيات قتل قرابة المليون و شرد قرابة 3 مليون كنازح داخل الدولة و شرد
قرابة المليون كلاجيء او مهاجر -- هل الانظمة الديمقراطية التلاتة بكل سوءاتها ارتكبت جرائم زي دي (اذا استثينا مشكلة الجنوب الشارك فيها كل الشمال )

طيب كيف لامن "الشعب" يقول "الاحزاب" هي الوجه الاخر للنظام نقوم نصدق و كمان نجي نقولو كمسلمة ! ؟
وكيف تفكيرنا للبديل ح يكون صحيح اذا اصلا بنفكر كدة عن "الشعب" او النظام الديمقراطي
وكيف اصلا ح يمشي النظام !!


تحياتي وابقي اظهر بعيدا عن الشعب

محمد الطيب سلامات ياخ

هنالك طبعآ الخوف من إختطاف الثورة بعد قيامها

وأعتقد أن الناس مختلفة في التكنوقراط (السودانيين ديل أصلوا ما بتفقوا على حاجة)

طيب أنسونا من التكنوقراط

خلونا في الشباب الواعيين والمثقفين والفيهم أمل للبلد

أنا أرشح وليد محمد المبارك ليحكم السودان,,,رأيكم شنو ؟؟

كلام جادي جدا والله

وليد شاب مثقف ومعتدل وحبوب وله برنامج سياسي

وغير كده هو من المتعايشين مع المعاناة داخل الوطن وليس من المرطبين في الخارج

فبمساعديه ومستشاريه ممكن ينهض بالبلد ويرفع المعاناة عن الشعب

يعني ممكن براحة يحكم الفترة الإنتقالية وبعدها تعمل إنتخابات

بعدين أي زول شارك في هذه الحكومة ما عايزنوا يشارك في الحكومة الجديدة

والأحزاب السياسية دي كلها إتخلصوا منها

الهدف هنا الإتفاق على شخص مناسب عشان نطمئن إنو الشعب ده حا يستمر لقدام وما حا يموت

خلونا مرة نكون جادين ويكون عندنا نقطة إنطلاق نتحرك منها

لو موافقين ممكن أي زول يفتح بوست وننطلق

اشرف مصطفى.. كيف حالك؟ علك طيب.. ياخ انت بتطالب انو نكون جادين.. طيب ياخ اكتب كلام مسؤول ياخ،.. بترشح بجدية -وكدي الحاجة المؤلمة- وليد محمد المبارك، وهو المعروف هنا بوليد الشفت - لو انا ما غلطان- .. فعلا وليد (الشفت) فوقو الاوصاف الانت كتبتها وازيد كمان -حسب بورداب الخرطوم- بس حكاية انو عندو "برنامج سياسي" لحكم السودان كلو، ده بقى هو الكلام الما جاد، وليد (الشفت) بالرغم من حب الناس -الناس البتعرفو- ليهو ، سقط في انتخابات "دائرة" ببرنامج " خدمي" بسيط.. وانت بتقول انك خايف من اختطاف الثورة، طيب تفتكر مرشحك (وليد) الهو بدون سند جماهيري او حزبي او عسكري، فرصتو قدر شنو؟ اقول ليك كلام، انت ما جاد.. او بتهظر

Quote: ارجو الحذر عند طرح احكام جزافية بخصوص الاحزاب: ما دامت مطروحة كبديل فيجب على رافضى هذا الخيار طرح نقاط معينة يرونها سلبية بخصوص ادائها يمكن الحوار حولها اما مساواتها, ضربة لازب, بالانقاذ من غير اى حيثيات فهذا امر, علاوة على تعسفه, فهو لا يؤدى الا لاحباط الساعين لتغيير الوضع الحالى, خصوصا ممن لم يعاصروا حكم الاحزاب الاخير(1986-1989م) و الذى كان بكل المقاييس افضل من حكم الانقاذ الحالى, و الحساب ولد!

أشرف مصطفي ازيك وليد الشفت مابتعيب لكن اختيار شخصية عامة وممكن التف حولها الشعب بكون أجدى وأنفع
عموما أنا بقترح د/ كامل إدريس

عزيزي محمد الطيب يوسف
لانود ان نرشح اشخاص كبديل للنظام الحالي ولكن البديل هو حزب يحظى باختيار الشعب له عبر انتخابات حرة ونزيهة وتحت مراقبة الأمم المتحدة وحزب آخر يكون في معارضة قوية ويراقب تصرفات الحكومة داخل البرلمان,, وصحف حرة تنشر كل سلبيات الحكومة ودستور قومي وطني يقضي باقامة الانتخابات كل 4 سنوات فقط.. وإزالة الحكم الأبدي للأشخاص.. فإن هذا عصر ولى وذهب والله لا عاده..وتاكد اذا الشعب اختار النظام الحالي بموجب انتخابات حرة ونزيهة فيجب احترام اختيار الأغلبية.. فعلى الأقل لا يمكن لأي حكومة فاسدة ان تحكم اكثر من 4 سنوات
والله يديك العافية

هم يتخارجوا البلد مليانة بالرجال والنساء البقدرو يمشوها
ومافى عفا الله عما سلف هذه المرة

Quote: التكنوقراطيين موجودين في الانقاذ.. موجودين في الاحزاب العظامية (الامة/الاتحادي) وكانوا موجودين دائما وبدا منذ الحكومة الاولى (الازهري) الما موجود هو الشباب البديل لامثال "محمد عادل" العمرو اصغر من عمر التلفزيون الملون والانترنت وهو لسه عايش في جلباب "سيدي".

Quote: الحكومة التكنوقراطية: هي الحكومة المتخصصة غير الحزبية التي تتجنب الانحياز لموقف أي حزب كان وتستخدم مثل هذه الحكومة في حالة الخلافات السياسية. مثال:دكتور متخصص في العلوم السياسية يسند له منصب رئاسة الحكومة, طبيب معروف وخبير في الطب ينال وزارة الصحة, ودكتور متخصص في الاقتصاد وزارة الاقتصاد, وآخر متخصص في التكنولوجيا وزارة الاتصالات وهكذا...

أها باقي كلامك ده الا يجيك ليهو محمد عادل غايتو انا سيدي الله بس

Quote: عزيزي محمد الطيب يوسف لانود ان نرشح اشخاص كبديل للنظام الحالي ولكن البديل هو حزب يحظى باختيار الشعب له عبر انتخابات حرة ونزيهة وتحت مراقبة الأمم المتحدة وحزب آخر يكون في معارضة قوية ويراقب تصرفات الحكومة داخل البرلمان,, وصحف حرة تنشر كل سلبيات الحكومة ودستور قومي وطني يقضي باقامة الانتخابات كل 4 سنوات فقط.. وإزالة الحكم الأبدي للأشخاص.. فإن هذا عصر ولى وذهب والله لا عاده..وتاكد اذا الشعب اختار النظام الحالي بموجب انتخابات حرة ونزيهة فيجب احترام اختيار الأغلبية.. فعلى الأقل لا يمكن لأي حكومة فاسدة ان تحكم اكثر من 4 سنوات والله يديك العافية

أميرة ازيك

حكومة التيكنوقراط البنتكلم عنها هسي دي للفترة الانتقالية فقط وياريت الأحزاب الفي المعارضة هسي تقدر تحسن صورتها في ذهن المواطن خلال الفترة دي لأنها لو ظلت علي وضعها الحالي الذي تجاوزه الزمن فسيكتسخها الشعب ويتجاوزها هذا إن لم يتجاوزها حتى الآن

محمد الطيب سلامات

Quote: أشرف مصطفي ازيك وليد الشفت مابتعيب لكن اختيار شخصية عامة وممكن التف حولها الشعب بكون أجدى وأنفع عموما أنا بقترح د/ كامل إدريس

طيب ما شايف بعض الناس إحتجت على التكنوقراط وقالت ليه تجيبوا ناس مشهورين؟
يعني السودانيين ديل إلا يحكمهم زول بالقوة حتى يتحدوا؟
لا بعجبهم العجب ولا الصيام في رجب !!
أنا شايف انو اي حكومة تجي حا يحصل انقلاب عسكري تاني ويشيل الحكومة المنتخبة
تراهن؟

ترشيحك لكامل إدريس في حد ذاتو خطوة للأمام,,,معناها البوست بدأ يتحرك
وحا يجوا ناس يختلفوا في ترشيح الأفراد وحا نلقى كافة الإختلافات في هذا البوست
النقاش في النهاية صحي وأنا من البداية أمنت على أهمية البوست مع إنو في ناس بتستنكر السؤال من أصله
لكن ده ما صاح وكأنه الواحد يفترض أن يوقع شيك على بياض

أخونا عزام لعلك بخير

Quote: اشرف مصطفى.. كيف حالك؟ علك طيب.. ياخ انت بتطالب انو نكون جادين.. طيب ياخ اكتب كلام مسؤول ياخ،.. بترشح بجدية -وكدي الحاجة المؤلمة- وليد محمد المبارك، وهو المعروف هنا بوليد الشفت - لو انا ما غلطان- .. فعلا وليد (الشفت) فوقو الاوصاف الانت كتبتها وازيد كمان -حسب بورداب الخرطوم- بس حكاية انو عندو "برنامج سياسي" لحكم السودان كلو، ده بقى هو الكلام الما جاد، وليد (الشفت) بالرغم من حب الناس -الناس البتعرفو- ليهو ، سقط في انتخابات "دائرة" ببرنامج " خدمي" بسيط.. وانت بتقول انك خايف من اختطاف الثورة، طيب تفتكر مرشحك (وليد) الهو بدون سند جماهيري او حزبي او عسكري، فرصتو قدر شنو؟ اقول ليك كلام، انت ما جاد.. او بتهظر

هذا إقتراح لربما يصادف أهله, الثورة حتى الآن لم تقم في السودان ولكننا نتحدث عن البدائل الممكنة بعد قيامها

حاولنا طرح شريحة التكنوقراط ولكنها لم تنجح فطفقنا نبحث عن الشباب النشطين الذين يمكن أن يقدموا شيئآ لهذا

الوطن الجريح النازف دمه, في بالي التجربة الغير ناجحة التي مر بها الزميل وليد ومع ذلك فأعتقد أنه قد إستفاد

منها وخرج منها بخبرة قد تنفعه مستقبلآ, أدري أن هذا لا يكفي لذلك إصطحبت معي الآتي:

Quote: فبمساعديه ومستشاريه ممكن ينهض بالبلد ويرفع المعاناة عن الشعب

هذا مع ذكر أنني أعني الفترة الإنتقالية.

قصدت في حديثي إن تحركنا تحرك الشارع معنا وإن تركنا الشارع يتحرك وحده سيتم قمعه غدآ وتهدأ الإحتجاجات المشتعلة

حاليآ حتى لا تصير ثورة.

Quote: هم يتخارجوا البلد مليانة بالرجال والنساء البقدرو يمشوها ومافى عفا الله عما سلف هذه المرة

سلمى سلامة ازيك
هم ما بتخارجو ,,, هم بتقلعوا قلع
لابد من التخطيط لما بعد القلع الآن والا سيواجهنا الفراغ وربما الفوضى أيضا

سلامات

أولا الكل متفق أن هذا النظام زائل لا محالة لأن دوام الحال من المحال....والان توفرت الاسباب اللازمة لزواله...وهم أنفسهم يعلمون هذا...

أعتقد أن فترة إنتقالية من التكنوقراط ببرنامج إنتقالي واضح...حتي يجهز الشعب نفسه ويحضر لإنتخابات حرة ونزيهة....لإنهاء هذه المعاناة....وكفاية كدا ...الشعب السوداني عاني بما فيه الكفاية...وخسر بمافيه الكفاية....حان الوقت لنقول كفي

سلامات

أولا الكل متفق أن هذا النظام زائل لا محالة لأن دوام الحال من المحال....والان توفرت الاسباب اللازمة لزواله...وهم أنفسهم يعلمون هذا...

أعتقد أن فترة إنتقالية من التكنوقراط ببرنامج إنتقالي واضح...حتي يجهز الشعب نفسه ويحضر لإنتخابات حرة ونزيهة....لإنهاء هذه المعاناة....وكفاية كدا ...الشعب السوداني عاني بما فيه الكفاية...وخسر بمافيه الكفاية....حان الوقت لنقول كفي

سلامات

أولا الكل متفق أن هذا النظام زائل لا محالة لأن دوام الحال من المحال....والان توفرت الاسباب اللازمة لزواله...وهم أنفسهم يعلمون هذا...

أعتقد أن فترة إنتقالية من التكنوقراط ببرنامج إنتقالي واضح...حتي يجهز الشعب نفسه ويحضر لإنتخابات حرة ونزيهة....لإنهاء هذه المعاناة....وكفاية كدا ...الشعب السوداني عاني بما فيه الكفاية...وخسر بمافيه الكفاية....حان الوقت لنقول كفي

اذا كتب لأهل السودان التخلص من هذا النظام فلن يكون نتائج الثورة كسابق التجربتين اكتوبر وابريل حيث كانت القيادات الجاهزة أو من تسلق سطح الثورة في تلك الفترة اما نتاج ثورة اليوم حتكون بقبول ورضي كل اهل السودان يعني ما يجي ينط لينا فيها الترابي او الصادق او المرغني الثورة حتكون ثورة سودانية خالصة واهل الهامش حيكونوا شركاء اصيلين في التغيير لن ينتظروا اهل الخرطوم حتى يحددوا مصير البلاد كلها ..

Quote: اذا كتب لأهل السودان التخلص من هذا النظام فلن يكون نتائج الثورة كسابق التجربتين اكتوبر وابريل حيث كانت القيادات الجاهزة أو من تسلق سطح الثورة في تلك الفترة اما نتاج ثورة اليوم حتكون بقبول ورضي كل اهل السودان يعني ما يجي ينط لينا فيها الترابي او الصادق او المرغني الثورة حتكون ثورة سودانية خالصة واهل الهامش حيكونوا شركاء اصيلين في التغيير لن ينتظروا اهل الخرطوم حتى يحددوا مصير البلاد كلها ..

جبت الزيت بتاع الموضوع يا شحتاوي بلغة شباب اليومين ديل هههههه