Post: #1 Title: بهــدوء: التوازن يا محمد عبد الرحمن..!!! Author: Kabar Date: 06-10-2012, 10:09 AM
اخر غنية نشرها اخونا محمد عبد الرحمن.. في ثقافات اهلنا بجبال النوبة..وكت الموت الناس بتغني.. و هي بتحاول تفتش عن معادل موضوعي.. عشان تقاوم الموت..و الحزن على الموت..
تعجبني غنية (رمال حلتنا)..و خصوصا الفيرشن بتاع الشابة ختمة مروي..و يا ريت كان الظروف سنحت.. عشان احدث عنها محمد..على الأقل كان عرف ناس الهامش ديل.. ياهم ناسو..و ناس ناس كتيرين خلاص..!!!!!!
كبر..
Post: #2 Title: Re: بهــدوء: التوازن يا محمد عبد الرحمن..!!! Author: Kabar Date: 06-10-2012, 10:15 AM Parent: #1
عارف يا صديقي.. دخلت المنبر في اول لحظة ..و انا جاي من شغل مرهق.. متل رهقك وكتين الطيارة قربت تعفصك..و انت بتحكيها زي الما حاصل شي..و اول حاجة المنبر ضلم..و قام اخونا محمد جلال عبد الله فتح ليهو بوست و بتساءل الحاصل شنو..كتير المنبر ضلم قبالك يا محمد و كان الناس ما بتلقى ليها فرصة تتشهود حتى..طاخ الخبر بينزل .. الإ لحظة فراقك..و محمد جلال بيتساءل. اول مرة في حياتي احضر اللحظة دي..وقعت كباية الموية من يدي..و اول مرة اتسبق الحوادث..و اضع تصور..وكنت قايلو زول محدد.. اسمو ابكر ادم اسماعيل..و تاني يوم فتحت المنبر.. لقيتك انت المشيت يا محمد..و بكرة انا بمشي..و ابكر بمشي.. و الغير نا بيمشي.. الأ مشيتك يا حبيب بالجد مختلفة..و انت بتودع في الناس..و الناس ماها جايبه خبر..و دي الإ الواصلين بيقدروا عليها..!!! و زي ماك عارف.. الموت دايما بدورلو ناس تحفظ التوازن و تدي الناس اليقين..و صدقني يا حبيب دي تب ما قدرت عليها..عارف ليه.. لأنو الناس كلها دخلت في .. Mood صعب خلاص..لأنو فرقتك بالجد قاسية..استقبلنا خبر موت من اقرب الأقربين لينا..و دسيناهو من ناس سودانيز اونلاين.. عشان نحقق التوازن..و سكتنا..و مشينا..نكتب.. نجامل.. نطايب..لأنو انهيار الوجدان في المجموعة كان قاسي.. عشان كده كنا بنحاول نتجنبو..في نص خبر الموت بندخل و ننخج و نخج..و بعد شوية الحكاية بتمشى و الناس ترجع تشوف القدامها.. الإ مشيتك يا حبيب.. متلك يا محمد..خايفين.. مش من الموت.. بل من الموتة في بلاد بعيد..زولا كان بيعز رمال حلتنا..و يموت بعيد عنها..!!!! يوم فات من بلدو روح.. رحل من بلدو..روح و فاتلو لي لدارا ماها هيلو..!!!
صعب يا حبيب.. تمشي و الحسرات في جواك لأي حاجة حلوة و مؤجلة.. صعب يا حبيب..و اقرب الأصفياء يموتون في صمت و انت ماك قادر تعمل حاجة..!!! صعب يا محمد و انت بتحاول تدي الناس توازن..و انتا جواك ماك قادر تتوازن..!!!
عرفنا قيمة الحياة.. لكن ما قدرنا نوصل تلك القيمة للناس..!! اخير نمشي في صمت..و صمت قاسي يا حبيب..!!!
تحياتي للجميع..لمن قرأوا ما كتبنا.. سواءا كانوا عضوية أو ناس بتابع من خارج المنبر..!!! و تحية لكل من توسم فينا الخير..و نحن نحيا في ظروف قاسية..!!! و العفو لكل من ناله ما كتبنا بسوء..و العفو لكل من ظننا انه أو انها نالتنا كلماتهم بسوء..!! التوزان يا اصدقائي و يا صديقاتي.. حاجة تب ما بنقدر عليها..!
عندي رغبة حقيقية اتوقف عن الكتابة هنا..فرصة للتأمل و اشياء اخرى..! احبكم جميعا نساءا و رجالا..ومن قبلكم احب وطن اسمو السودان..! كتر خيرك يا بكري ابوبكر..جمعتني باصدقاء و صديقات لم اكن اعرف كيف التقيهم..!!! و كتر خيرك و انت تثق في شخصي و معك اناس اخرون رجالا و نساءا..! اخر طلباتي و لن اكررها يا بكري أن تمنح الأستاذة مها الطاهر عضوية..و سوف اراسلك عن معلوماتها..و هي في يقيني ستكون اضافة لهذا المنبر.. ارجوكم احترام عاطفتي و انفعالي..و اريد التوقف عن الكتابة هنا.. اسبوع.. شهر .. سنة.. الى الأبد..لا ادري بالضبط..و لكنها رغبة اكيدة..ماني زعلان من زول ولا زولة ..و ان كان هناك زعل.. زعلان من روحي الماقادرة تحقق حاجة.. احبكم جيمعا.. عضوية..قراء..قارئات.. متابعين .. متابعات..!! و العفو لله و رسولو..!!! محمد النور كبر..
Post: #3 Title: Re: بهــدوء: التوازن يا محمد عبد الرحمن..!!! Author: محمد عبد الماجد الصايم Date: 06-10-2012, 10:24 AM Parent: #2
يا حليلو
Post: #4 Title: Re: بهــدوء: التوازن يا محمد عبد الرحمن..!!! Author: محمد عبد الماجد الصايم Date: 06-10-2012, 10:28 AM Parent: #3
تعرف يا كبّر .. أكتر من مرة جاني نفس تفكيركـ دا كل ما نفقد واحد عزيز وغالي هنا بقول أخير الواحد يقول للناس ديل مع السلامة من بدري لكن بقتنع إنو دا ما الحل .. ولا ح يكون نهاية الأحزان
فـ .. خليكـ قاعد معانا هنا .. في الفرح والكره والبيناتم وأوع تمش بعيد ..
بلييز!!
Post: #5 Title: Re: بهــدوء: التوازن يا محمد عبد الرحمن..!!! Author: الرفاعي عبدالعاطي حجر Date: 06-10-2012, 10:41 AM Parent: #4
وفكرت بل كتبت في بوست منفصل هذه الرغبة اللهم ارحم محمد عبدالرحمن فقد ازهدنا في الحياة الله يرحمك يااخ.
كبر خليك قاعد نتشلرك همنا يااخ .
...........................................حجر.
Post: #6 Title: Re: بهــدوء: التوازن يا محمد عبد الرحمن..!!! Author: امينة عيسى Date: 06-10-2012, 10:48 AM Parent: #2
محمد كبر يا صاحب
كم هو محزن ان تفجع برحيل صاحب وكم هو مؤلم عندما تفقد توازنك الحزن يا صديقى كاس مر مذاقته كطعم العلقم..ولكن ان تغسل الحزن بهروب دون مواجهته فهذا ما يزيد الالم الم..العزاء يا صديقى فى تواجدك بين اخوانك واخواتك..العزاء يا كبر ان تلطم خد قلبك وتزرف دموع ربما ...اقول ربما ..تغسل احزانك رحم الله الاخ محمد واسكنه العلا من جناته والهمكم صبرا جميلا
قلبى معك يا كبر فاصبر ان الله مع الصابرين ادعو له يا كبر ادعو له واشحن رصيده هذا ما يحتاجه محمد
كن بخير اينما كنت فهذه امنيتى
Post: #7 Title: Re: بهــدوء: التوازن يا محمد عبد الرحمن..!!! Author: Elawad Eltayeb Date: 06-10-2012, 03:22 PM Parent: #6
Quote: ارجوكم احترام عاطفتي و انفعالي..و اريد التوقف عن الكتابة هنا.. اسبوع.. شهر .. سنة.. الى الأبد..لا ادري بالضبط..و لكنها رغبة اكيدة..ماني زعلان من زول ولا زولة ..و ان كان هناك زعل.. زعلان من روحي الماقادرة تحقق حاجة.. احبكم جيمعا.. عضوية..قراء..قارئات.. متابعين .. متابعات..!! و العفو لله و رسولو..!!! محمد النور كبر..
الأخ العزيز كبر، البركة فيكم في الفقد العزيز، نسأل الله أن يدخله الجنة بغير حساب.
قبل أن تذهب وجب أن تعرف أننا نحبك في الله وأن كتاباتك هنا هي جزء من توازننا وآمالنا المشتركة في التغيير
Post: #8 Title: Re: بهــدوء: التوازن يا محمد عبد الرحمن..!!! Author: مها عبد الله Date: 06-10-2012, 05:46 PM Parent: #7
Quote: صعب يا حبيب.. تمشي و الحسرات في جواك لأي حاجة حلوة و مؤجلة.. صعب يا حبيب..و اقرب الأصفياء يموتون في صمت و انت ماك قادر تعمل حاجة..!!! صعب يا محمد و انت بتحاول تدي الناس توازن..و انتا جواك ماك قادر تتوازن..!!!
العزيز كبر ... أُعزيك بفقدنا الكبير للحبيب محمد ... أصعب هذا الفراق هو أن تكون بعيدا لا تُشارك الأحباب أتراحهم وأفراحهم .. عند موت سمندلاوي فقدت توازني وإنقطعت عن المنبر لعام تقريبا ، لم يُخفف عنى فقد عزيز آخر ( د. مجدي ) إلا تواجدي وسط الأعزاء بسودانيز أوون لاين ... وهاهو الوجع يتجدد بفقد محمد ولكن وجودي وتعزيتي للغالبية هنا خففت عني الكثير ... كُن بخير يا صديق
Post: #10 Title: Re: بهــدوء: التوازن يا محمد عبد الرحمن..!!! Author: أمير عثمان Date: 06-10-2012, 06:08 PM Parent: #8
الأخ كبر ... أولا لك أحر وأصدق التعازى فيمن فقدت من الأعزاء .. وفى حبيبنا محمد عبد الرحمن .. ولهم الرحمة ...
أخى أنا ... أحس بألمك ... فأنا أعيشه ... لأول مرة فى حياتى أجد المحبة مؤلمة لهذا الحد .. وتجمع الأحباء فى مكان واحد أيضا مؤلم للجميع ومؤلم جدا ... دائما ما كنا نعتقد إن توحد الناس وإجتماعهم ساعة المصيبة يخففها ... إلا فى حالتنا هذه وفى حلتنا هذه ... فكلما تدخل بوستا عن الحبيب بدلا أن تجد عزاءا تزداد الما ... ودائما قد قيل مع الأيام يتناقص الحزن .. إلا فى حالتنا هذه .. بفقد الحبيب محمد ... أحس بحزنى و حزنكم أخواتى وإخوانى يزداد بصورة مضطردة ... أدخل غرفتى وأنظر للكمبيوتر .. أأدخل أم لا ؟ أدخل لأجد العزاء ... فأجد الألم .. والحسرة ,احس الحرقة عميقا داخلى ... يا الله يا الله اللطف ..
Post: #9 Title: Re: بهــدوء: التوازن يا محمد عبد الرحمن..!!! Author: الشفيع وراق عبد الرحمن Date: 06-10-2012, 05:54 PM Parent: #7
كبر ازيك
يا ناس حكايتكم شنو؟ كلما دموعنا تجف، تتوروها من جديد
(رمال حلتنا) تحديدا اقرب للمناحة من الغناء واكاد اجزم ان المطرطش كان ينعي نفسه بتقديمها،،،،ولكن من يفهم؟؟؟؟؟؟
Post: #11 Title: Re: بهــدوء: التوازن يا محمد عبد الرحمن..!!! Author: هيثم طه Date: 06-10-2012, 06:18 PM Parent: #9
مصيرو راجيهو ونحن هناك راجينو
Post: #12 Title: Re: بهــدوء: التوازن يا محمد عبد الرحمن..!!! Author: Siham Elmugammar Date: 06-10-2012, 06:41 PM Parent: #11
الحزن عندو طاقة عجيبة يا كبر يا اخوى وكل زول يفتش درب وين يوديها عنى اقول ما قاله اخوى العوض الطيب
Quote: قبل أن تذهب وجب أن تعرف أننا نحبك في الله وأن كتاباتك هنا هي جزء من توازننا وآمالنا المشتركة في التغيير
Post: #13 Title: Re: بهــدوء: التوازن يا محمد عبد الرحمن..!!! Author: Kabar Date: 06-13-2012, 07:22 AM Parent: #2
up
Post: #14 Title: Re: بهــدوء: التوازن يا محمد عبد الرحمن..!!! Author: Kabar Date: 06-13-2012, 07:26 AM Parent: #13
الصديقات.. امينة..مها..سهام.. الأصدقاء..الصايم..الرفاعي..العوض..امير..الشفيع..هيثم..طه.. حبابكم جيمعا.. كتر خيركم على المرور من هنا.. غمة صغيرة..و سوف تزول.. الحزن قد يقاوم بالكتابة..و التواجد بين الأصفياء هنا.. و ربنا يقدرنا نكون عند حسن ظن الجميع..
كتر خيكم كتير..و انا بخير..و بحالة جيدة للغاية..
كبر
Post: #15 Title: Re: بهــدوء: التوازن يا محمد عبد الرحمن..!!! Author: أيمن الطيب Date: 06-13-2012, 09:20 AM Parent: #14
سلامات يا كبر يا عزيز..
التوازن يبدو عزيزا بعيد المنال خاصة فى مكان متغير المناخ والأهواء كهذا المكان,, دائرة الأحزان تأبى إلا أن تنفتح علينا كل صباح بفقد عزيز أو عظيم وقبل أن نفيق من صدمة نجد أخرى فى إنتظارنا وليس أمامنا غير أن نصمد ونقاوم إنهيار دواخلنا,,
فكيف نتوازن إذا كنا نعيش وسط عالم غير متوازن؟؟؟ قد نبحث عن إتزان أنفسنا ولكن توازن الأشياء ليس بإيدينا!! لم يستطع أحدنا أن يمنع تداع الأشياء يوما يا صديق..
نفجع كل يوم فى وطن تقسم وتقتل الحروب الغبية أهله وأصبحت أخباره لا تسر العدو والصديق,, وإخوة أعزاء فجأة أصبحنا غرباء عنهم بفعل الساسة السوس وأحوال قاتمة كئيبة يعيشها وطن بحاله,,
هذا المكان فقط كم من الأعزاء والأصدقاء والأصفياء فقدناهم مؤخرا وكم من المرات إنقبضت قلوبنا والموقع مسود ويأبى أن يفتح ويدخلك فى دائرة من الضيق والخوف وسؤال صعب الإجابة عنه !!! من ياترى رحل,,من ترجل وودع الفانية و سبقنا..
حاولت جهدى أن أوازن فقط علاقتى بهذا المكان وأحدد خطوط إرتباطى به لأن أسوأ من إدمانه إدمان أهله الطيبين الأنقياء الجميلين,,
القاعدة أن هنا قد تكون زمالة وقد تكون صحبة وقد تكون محبة صادقة مجردة من أى غرض أو شوائب ولكنها ليست صداقة حقيقية منعا للتورط فى ما لا نقدر عليه من إلتزامات نفسية وإجتماعية ,, عندما تجمع الظروف الناس ببعضها قد يجدوا فرصتهم لتقييم الأشياء وإعادة صياغتها وبناء على ذلك تتحدد أشياء أخرى,, عدمها أو وجودها,,
يبدو أن القاعدة أعلاه لا تعمل فى كل الأوقات ووجب إعادة النظر فيها..
والدائرة مازالت تدور.. جرعات مؤلمة من الحزن والألم نتجرعها وتحس مرات بالإنهاك ووهن الروح من ضخامتها وقوتها,,
ألم تكن كافية هذه الغربة وهذا البعاد,,الإيمان القوى والصبر لا يمنعان فقدان التوازن,, ولكن المهم ألا يطول هذا الفقدان فالصدمات لن يقفن هنا ولكن المهم أن نرفع الرأس سريعا تحسبا للقادم الذى نأمل أن يكون خيرا وأفضل وأجمل..
إلى حين رحيلنا للحاق بمن سبقونا وفى النفس أمنية أن يذكرنا من مررنا على دروبهم بالخير وإن أخطأنا,,
اللهم تقبلهم جميعا القبول الحسن وأكرم مثواهم وتجاوز عن سيئاتهم وصبر أهلهم وأصدقائهم وإخوتهم فهم كانوا أجمل الناس وأطيبهم,,
هون عليك يا صاحب ولا تذهب بعيدا ,,
Post: #16 Title: Re: بهــدوء: التوازن يا محمد عبد الرحمن..!!! Author: ملكة سبأ Date: 06-13-2012, 10:43 AM Parent: #15
كبر
كدا بدون صديقنا
عارفة بالضبط الاحساس دا
عارفاهو وجربتو واتملكني
وكانت متملكني احساس وفكرة :
Quote: ثم مالعمل ؟
وبعدييين معاك يادموع ؟
انعتزل تلك الأسافير وكل الدروب التي تئن وتنبيء بانه كان في خال جميل ، بعدين قام مشى ؟
ام نعتزل اصدقائك وتلك الحكاوي الطاعمة بعد ان أصبح لافكاك من طعم العلقم ؟
محمد دا ذاتو ياكبر حاول يطلعني من الحالة دي وماقدر أو انا ما اديتو فرصة آخر رسايلو لي بقول فيها (قوليلي شي) وانا ماقدرت اقول شي
مع انو في كلام كتير لسة ما انتهى
والموجعنى اكتر ياكبر ومزعلني لمن نزلت اغنية يابلدي في الخاطر قريب انا عشت في ضلك زمن عشقك يوديني ويجيب(ياريت تسمعها) كانت مؤثرة فيهو بصورة ماعادية كان بنوم بيها ويقوم بيها والله لمن اشفقت عليهو حينها كان عاوز كل احبابو واصحابو يسمعوها ولماهن لي في ذلك البوست وانا كنت وقتها في شغل عن ذلك لظروف خارجة عن إرادتي وكل ما اسمع الاغنية دي اقول محمد واصحابو طالبني اعتذار واقول حايجي اليوم البلاقي محمد واوضح ليهو وهو برضو كمان ادرى اها الحصل ولا حا الاقيهو ولايحزنون
فالبعاد ياكبر برضو قد يحمل ليك كميات من الاسى ويوقعك في يا اريت !
الواحد مننا بقى ماعارف هو قاعد يكتب في شنو ولا عندو الخلق البراجع بيهو