Post: #1 Title: عفواً ليونيل ميسي ، قد جاء من يحقق المتعة الحقيقية بكرة القدم : فيديو Author: عبد اللطيف بكري أحمد Date: 05-28-2012, 10:00 AM
طريقة لعب ليونيل ميسي لم تكن ممتعة بقدر ماهي فعالة في تحقيق الفوز،، لم يكن يمتلك اللمسات الساحرة التي اشتهر بهاالبرازيليون وبعض الممتعين من الأساطير عبر التاريخ في امتاع الجماهير مثل بيليه ماردونا - زيدان - وحتى رونالدو ورونالدينهو : لكن كان فعالاً في حسم النتائج ويتمتع بقدرة غير عادية في الجري بالكرة وإحكام المسافة بينها وبين قدميه ليصعب مهمة المدافعين ،،
Post: #2 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 10:10 AM Parent: #1
الآن الوضع يختلف برز في الآونة الأخيرة العديد من الموهبيين البرازيلين على رأسهم نيمار ليأتي بعده من يستطيع أن يجمع بين مهارات كل الأساطير في طريقة أدائه:
إنه مدهش بحق : اللاعب : لوكاس مورا - لاعب ساباولو البرازيلي شاهدوا وأحكموا ، فإنه أكثر ما يشبه أداء بيليه : ولكنه يفوقه (حرفنة ) بكثير:
Post: #3 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 10:28 AM Parent: #2
اللاعب بنسبة كبيرة ضمن تشكيلة ريـال مدريد للموسم القادم،،
سافر مورينهو إلى ألمانيابطائرة خاصة لمشاهدة اللاعب ضمن صفوف المنتخب البرازيلي هذا الاسبوع وعلى مايبدو أن هاجس ميسي سيجعل بيريرز يدفع 40 - 50 مليون يوريو بهذا اللاعب!!
Post: #4 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: أيمن دياب Date: 05-28-2012, 10:47 AM Parent: #3
هذه ليست كرة قدم.. بل سحر وخوارق ومعجزات.. ريالنا كان ضمن اللاعب ده..عوجة تب ما بتجينا..
Post: #6 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 11:07 AM Parent: #4
Quote: هذه ليست كرة قدم.. بل سحر وخوارق ومعجزات.. ريالنا كان ضمن اللاعب ده..عوجة تب ما بتجينا..
والله يا أيمن زي دا ماشفنا طول (نصف قرن من المشاهدة) ههههههه
هذا غير معقول بتاتاً: لا يبدع إلا حين تكالب المدافعين!!
أبشرك : بيرز انتفض بعد وفاة زوجته مخصوص من أجل هذا اللاعب : ولن تتكرر حركات نيمار!!
لاعب = 200 مليون بدون كلام ويساوي 8 لاعبين أداءاً بوسط الملعب!!
Post: #5 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: الامين موسى البشاري Date: 05-28-2012, 10:55 AM Parent: #3
Quote: اللاعب بنسبة كبيرة ضمن تشكيلة ريـال مدريد للموسم القادم،،
سافر مورينهو إلى ألمانيابطائرة خاصة لمشاهدة اللاعب ضمن صفوف المنتخب البرازيلي هذا الاسبوع وعلى مايبدو أن هاجس ميسي سيجعل بيريرز يدفع 40 - 50 مليون يوريو بهذا اللاعب!!
50 مليون وفوقه كاكا هواده
دا اخطبوط عديييييييييل كدا ما شاء الله
وما تنسى كمان يايا توري قالوا جاي من مانشستر ستي
بكدا الريال ح يبقى نجاضة يا عبد اللطيف
ريال مدريد وي يييييييييي
Post: #7 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 02:29 PM Parent: #5
Quote: 50 مليون وفوقه كاكا هواده
دا اخطبوط عديييييييييل كدا ما شاء الله
وما تنسى كمان يايا توري قالوا جاي من مانشستر ستي
بكدا الريـال ح يبقى نجاضة يا عبد اللطيف
ريـال مدريد وي يييييييييي
ياحبيب : والله أخطبوط زاتها شوية عليهو : هههههه
الولد مبالغة ، لا يهدأ؟؟
مرواغة من عالم آخر : تعبير قرأته هنا لأحد الزملاء : إنه في محاورته يجعلك تقرأ رقم فنيلتك من الخلف هههه،،
وفوق كدا : يمتعك وأنت صريع هذه المحاورة،،
= إن شاء الله موسم من عالم آخر لتحطيم الأرقام المملوكة حكراً للملوك!
Post: #8 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: خالد عبد الله محمود Date: 05-28-2012, 02:37 PM Parent: #5
أبو خالد سلامات خلاص قنعتو من خيراً في كرستيانو رونالدو لمنافسة ميسي ؟
الاعب ده لاعب ممتاز لكن لاعب مساحات و دي ميزة ممكن يلقاها في الدوري البرازيلي لكن في أوربا ما أظن الدوري البرازيلي أصلاً ما مقياس يا عبد اللطيف
Post: #9 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 02:52 PM Parent: #8
Quote: أبو خالد سلامات خلاص قنعتو من خيراً في كرستيانو رونالدو لمنافسة ميسي ؟
الاعب ده لاعب ممتاز لكن لاعب مساحات و دي ميزة ممكن يلقاها في الدوري البرازيلي لكن في أوربا ما أظن الدوري البرازيلي أصلاً ما مقياس يا عبد اللطيف
أبو الخلد ياحبيب ، أزيك يارجل،،
بالنسبة لكريستيانو بصراحة : فقد أهم خصائصه وهي التخلص السهل من المدافعين وأصبح من لاعب مهاري متكامل إلى لاعب يعتمد فقط على الضربات الثابتة والتهديف من بعيد،، وميسي بصراحة عامل ليهو هوس في الحتة دي!!
أما هذا اللاعب فهو بالعكس (نظامين) مساحات / وغير مساحات هههههه يلعب في أماكن الزحام بثقة كبيرة وبمهارة عالية،،
غايتو كان جاء : بيكي / بيول/ ألفيس ماعارف مين : باي باي !!
كترو الأطراف الصناعية!! (جواريدولا عرفها) .....
Post: #10 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: خالد عبد الله محمود Date: 05-28-2012, 03:49 PM Parent: #9
Quote: غايتو كان جاء : بيكي / بيول/ ألفيس ماعارف مين : باي باي !!
دفاع برشلونة من أضعف الدفاعات في الفرق الأوربية حالياً لكن المشكلة مش في برشلونة المشكلة حتكون في دوري أبطال أوربا مع دفاعات فرق زي أنتر و تشلسي و بايرن و مانشستر و هلم جرا
Post: #11 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: ناصر احمد الامين Date: 05-28-2012, 04:04 PM Parent: #10
يا عبداللطيبف الود دا فرفاره و جباد و اي حاجة لكين زي ما قال خالد: الزول دا محتاج مساحاتو اوروبا دي ضيقة خلاص هههههه بعدين زولك دا نهايات الهجمة بتاعتو كلها ضايعة، يا باص غلط و اللا تحس بيهو فتر
علي الرغم من انو حريف و كيفني .. لكين بينو و بين ميسي فرق السما و الارض. و ليبقي ميسي هو الملك الا اشعار اخر. ههههههههه تحياتي
Post: #13 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: Nasr Date: 05-28-2012, 05:37 PM Parent: #11
دا ما لعب نصاح الزول عارف إنه عنده ميزة خطيرة وبستخدمها بفعالية السرعة لكن مع الريا ل وبرشلونة والكورة الأوربية عليه التعود علي حكاية الباصات القصيرة يعني لازم يبقي بتاع كورة جماعية (بنسبة كم وتسعين في المية) وما يحتفظ بالكورة اكثر من ثواني ودي بقدر عليها (لكن ما معي الر يال )
Post: #15 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 05:48 PM Parent: #13
Quote: دا ما لعب نصاح الزول عارف إنه عنده ميزة خطيرة وبستخدمها بفعالية السرعة لكن مع الريا ل وبرشلونة والكورة الأوربية عليه التعود علي حكاية الباصات القصيرة يعني لازم يبقي بتاع كورة جماعية (بنسبة كم وتسعين في المية) وما يحتفظ بالكورة اكثر من ثواني ودي بقدر عليها (لكن ما معي الر يال )
نصر يامخضرم، تحيات،، نظرة سليمة مائة بالمائة في حكاية السرعة فالواضح إنو عندو تيربو
الإحتفاظ بالكرة ميزة هامة لذوي المهارات : بعض اللاعبين لا أفضلهم أن يلعبو كرة جماعية أمثال روبينهو وكريستيانو رونالدو ، لأنهم فقد الميزات التي جعلت منهم لاعبين مرغوبين، الآن في نظري كريستيانو لاعب شوات بس !!
اللاعبين الأسبان في أي فريق لهم تأثير سالب على الأجانب ودا ممكن يكون سبب في ان اللاعب يبطل إظهار مهاراته الفردية ،، يمكن!!
بس أنا والله عمري ماشاهدت لاعب بهذه القوة والسرعة والمراوغة والتهديف المباغت!!
Post: #14 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 05:41 PM Parent: #11
Quote: يا عبداللطيبف الود دا فرفاره و جباد و اي حاجة لكين زي ما قال خالد: الزول دا محتاج مساحاتو اوروبا دي ضيقة خلاص هههههه بعدين زولك دا نهايات الهجمة بتاعتو كلها ضايعة، يا باص غلط و اللا تحس بيهو فتر
علي الرغم من انو حريف و كيفني .. لكين بينو و بين ميسي فرق السما و الارض. و ليبقي ميسي هو الملك الا اشعار اخر. ههههههههه تحياتي
ناصر شاكرون على الطلة البهية،،
المشكلة ناس برشلونة بعاينو ليهو بفانيلة الملكي ههههههه
والله العظيم الزول دا = 3 ميسي أقل حاجة!!
Post: #12 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 05:36 PM Parent: #10
ياخالد خليك حنين أومال!!
ياخي دفاعات أوربا دي راؤول وانزاغي أكتر ناس مسجلين أهداف تاريخيا !!
زي امشبتو الاتنين ههههههه ،،
Post: #16 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عزيز Date: 05-28-2012, 07:40 PM Parent: #12
شكرا يا عبداللطيف على هذا لفت نظرنا لهذا الفنان
ولكن لديه مشكلات كثيرة.. اوجزها في
أولاً بيلعب لوحده ونسميها نحن بالسوداني اناني
ثانياً ليس لدية خاصية الهداف وهي حاسة التهديف
ثالثاًإذا اراد ان يحضر لأوروبا فافضل الفرق التي يمكن ان يظهر فيها مواهبه ويجد فرصته هو فريق البرشا
الريال فريق مجرات وهذا النجم سيجد الحرب منهم ولن يمنحوه مكانته وشوف ما حدث لكرسيانو وبن زيما
الود حريف وياريت يعزز فريق البرشا
برشلوناوي حد النخاع
Post: #17 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: معتصم دفع الله Date: 05-28-2012, 08:12 PM Parent: #12
حبيبنا أبوخالد .. كيفك يا ملكي والله الشوق كميات ..
غايتو أنا ح أكتب الكلام دا الحي الله والكاتل الله .. وكان جاتني أي حاجة في اليومين ديل عليك بصاحبك صلاح شتات .. فقد بشرني بهذا اللاعب بعد أن شاهده في بوستك دا ..
أها بعد جوك المعلمين ناس خالد وناصر ونصر وأفتوا فيه ما عندنا تاني حاجه .. لا أشك في إمكانياته الفنية وخصوصاً إنه صغير في السن .. أما مقارنته بميسي فيه ظلم كبير لميسي .. هذا اللاعب يحتاج لمساحات ينطلق فيها وزي ما قالوا الشباب اللعب في أوروبا يختلف .. وهذا ما قلته لشتات قبل مشاهدة البوست واللاعب .. والكرة الآن أصبحت جماعية واللعب السهل عن طريق الباص المريح وغير المعقد .. غايتو كان قنعنا تب بنسجل ليهو بلة والشغيل الليلة الله يحلنا من شتات دي ح تكون شكلة الخميس والجمعة ..
Post: #18 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 09:09 PM Parent: #17
Quote: شكرا يا عبداللطيف على هذا لفت نظرنا لهذا الفنان
ولكن لديه مشكلات كثيرة.. اوجزها في
أولاً بيلعب لوحده ونسميها نحن بالسوداني اناني
ثانياً ليس لدية خاصية الهداف وهي حاسة التهديف
ثالثاًإذا اراد ان يحضر لأوروبا فافضل الفرق التي يمكن ان يظهر فيها مواهبه ويجد فرصته هو فريق البرشا
الريال فريق مجرات وهذا النجم سيجد الحرب منهم ولن يمنحوه مكانته وشوف ما حدث لكرسيانو وبن زيما
الود حريف وياريت يعزز فريق البرشا
برشلوناوي حد النخاع
ياعزيز يافنان، اولاً حاجة كتلنا فيك كونك كاتلوني والله،،
طبعاً اللاعب سيأتي في وظيفة صانع ألعاب ، ومشكلته فعلاً كما اسلفت يصنع اللعب لنفسه، زي الفران يخبز الرغيف ويقرضو ههههههه
بس انا بالعكس منك استمتع باللعب الفردي المهاري لم ، احتفي بعلي قاقرين كراجل فنان مثلما استمتعنا بعز الدين الدحيش وكمال عبد الوهاب وكسلا ورشيد المهدية
----
أما بالنسبة للملكي كونه فريق مجرات فهذه حقيقة ولكن بعكس ماذكرت بخصوص رونالدو وبنزيما، فقد انفجروا برفقة هيجوايين بتخليد اسمهم كأعظم خط هجوم طيلة 110 سنوات هي عمر الريق بتسجيلهم لأكثر من 120 هدف في الدوري هذا العام كرقم لم يحدث في تاريخ الليغا اضف لرقم قياسي آخر وهو تعدي حاجز 100 نقطة
الريال مقبل على فترة ازدهار ستكون عاصفة ولوكاس مورا بالعكس يناسب هذه الطفرة بينما لن يكون ممتعاً بقرب ميسي،،
شكراً للمرور
Post: #19 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: حبيب نورة Date: 05-28-2012, 09:16 PM Parent: #17
ده من هسه ولدنا
الريال عِدِل
Post: #22 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 10:39 PM Parent: #19
ومبرووووووك منغوليك ياخ والله جينا شربنا البيبسي بس لم نوقع في دفتر الحضور وحقك علينا ،،
Post: #20 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 09:22 PM Parent: #17
Quote: حبيبنا أبوخالد .. كيفك يا ملكي والله الشوق كميات ..
غايتو أنا ح أكتب الكلام دا الحي الله والكاتل الله .. وكان جاتني أي حاجة في اليومين ديل عليك بصاحبك صلاح شتات .. فقد بشرني بهذا اللاعب بعد أن شاهده في بوستك دا ..
أها بعد جوك المعلمين ناس خالد وناصر ونصر وأفتوا فيه ما عندنا تاني حاجه .. لا أشك في إمكانياته الفنية وخصوصاً إنه صغير في السن .. أما مقارنته بميسي فيه ظلم كبير لميسي .. هذا اللاعب يحتاج لمساحات ينطلق فيها وزي ما قالوا الشباب اللعب في أوروبا يختلف .. وهذا ما قلته لشتات قبل مشاهدة البوست واللاعب .. والكرة الآن أصبحت جماعية واللعب السهل عن طريق الباص المريح وغير المعقد .. غايتو كان قنعنا تب بنسجل ليهو بلة والشغيل الليلة الله يحلنا من شتات دي ح تكون شكلة الخميس والجمعة ..
هههههههه، والله شتات دا انت عملت ليهو قولون عصبي، وانا في الحقيقة قنعت من ظهورو في المنبر دا عندما لم يظهر والفريق يحقق اللقب بفارق تسع نقاط عن فريق الاخضر بريش ههههه
غايتو الله يستر مايلحق يوهانس قبال مايظهر في مدريد ، لكن يامو الزول دا والله ميسي ما يجي بجنبو، دا مدرعة بشرية ماشفناها قبال دا،،،
ههههههه ، اما فيما يتعلق ببلة والشغيل ، والله إلا تكون المباراة في السلاح الطبي والحكم جراح عظام ، وشرطاً رجال الخطوط واحد تخدير والتاني محضر عملية ههههههههه
ياخ سلم على الزول دا شديد وقول ليهو ابقى مارق الجماعة خلاص أفل نجمهم ،،،
سلام يابوعمر ،يازول ياذوق ،،
Post: #21 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: طارق جبريل Date: 05-28-2012, 09:45 PM Parent: #20
يا ود خالتي كيفنك زولك دة حريف لكن طريقة لعبه دي في أوربا ما بتاكل عيش أوربا عايزة نتيش للكورة بين اكثر من لاعب موش زول براهو يجري خمسين كيلو يعني لو مرق من بيول وبيكيه ماسكيرانو بيكشو يرقده قرض
Post: #23 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-28-2012, 10:48 PM Parent: #21
يا ود خالتي كيفنك زولك دة حريف لكن طريقة لعبه دي في أوربا ما بتاكل عيش أوربا عايزة نتيش للكورة بين اكثر من لاعب موش زول براهو يجري خمسين كيلو يعني لو مرق من بيول وبيكيه ماسكيرانو بيكشو يرقده قرض -—_________________________----
يازول ماسكيرانو بتاع مين ، والله دي مصيبة بس الله يكافيكم شرها،،
انت بس أسكت خلو الليجي بعدين النتيش هين،،
مشتاقين ياخ، أمرق لا برة مرة مرة كدي خلنا النسلم عليك ههههه
Post: #24 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عماد شمت Date: 05-29-2012, 00:24 AM Parent: #23
عبداللطيف كيفنك اخوي ....
تعرف لو الفديو بتاعك ده حقيقي ومافيهو اي دغمسه الزول ده ساحر عدييييييييييييل
وبعدين الناس البتقول ماحيقدر يلعب في اوربا كلام ماصاح لانه حيكتسب خبرة جديده من المدربيين
خاصة هوصغير السن دي مهمة المدرب الفطن والذي يسطيع ان يستفيد من مهارات اللاعب ويوظفه داخل الملعب
غايتو متعه ياعبداللطيف ربنا يحفظه
ويحفظك كمان
Post: #25 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد عبدالرحمن محمد Date: 05-29-2012, 01:42 AM Parent: #24
Quote: والله يا أيمن زي دا ماشفنا طول (نصف قرن من المشاهدة) ههههههه
الأخ دفعه ولّا إيه!!
عبداللطيف إزيك، عارفو الجنا ده بيكون بهرك بي مهارتو في المراوغه زي بهرني.. ومن جبت سيرة ماهو فعال زي ميسي، عرفتك دار تسوّلك ساتر قبلما يجوك االشفوت الجنا حاواار، لاكين فايدتو شنو لي تيمو؟ عمُّنا لطيف قال: الكوره اقوان.. عندو حبيبة أنانيه.. يهدر مجهودو في المحاوره،* لامن لمستو الأخيره تبقى متِلْ ودالصايم مؤخراً في المنبر!
ثم أخيرن: قتّا يساوي تلاته ميسي؟
يا رااجل!
- * تطرى الحرفا ديل، علي سبيل المثال، المتعونا، ويمرقو نضااف ولياقتن بعد التسعين دقيقه زي ماهي في الدقيقه الأولى؟: يوسف مرحوم، شرف موسى، النيل حسين، د. كمال عبدالوهاب [إمّا جارطو فوزي!]، ثم قلّه ياااخ!
Post: #26 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد سنى دفع الله Date: 05-29-2012, 04:36 AM Parent: #25
الناس الوهم العاملين ابو التحليل الكروي يا وهم الزول ده مدريدي من كان طفل بعدين ده بقلب الناس قلب بشبه ريال مدريد بعدين حكاية اللعب الاوربي ده كلام ناس عندها وهمة الكورة في امريكا الجنوبية قال اوربا اهم حاجة ديل بسمعوا كلام المدرب البقولو المدرب بنفذوهو ومعاهو السحر بتاع البرازبل والمقدرات الفردية وسنو صغيرة لامن يلعب سشنة سنتين تعالوا شوفو الجن ناس وهم كيف عبد اللطيف تسلم متعتنا يمتعك الرحمن في صحتك وعافيتك
Post: #27 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد عمر الفكي Date: 05-29-2012, 06:28 AM Parent: #26
ابو خالد سلام عليك انتو عارفين يا اخوان المنبر دا مافي شئ خربو غير المجاملات، وابو خالد دا مع انه زول ظريف وممكن تجامله في اي حاجة لكن لما يصل انه يقارن بين ميسى والشئ الجابو دا فاعتقد انه المجاملة حدها وقف. ياخوي والله زولك دا ما يساوي ضفر في الاصبع الصغير بتاع الرجل اليمين (لاحظ اليمين) بتاعة ميسى. الزول دا وان كان في ريالاب حاولو يجملولك الصورة لكنه بالفعل لو ما لقى مساحة بيبقى زي عربية السباق في طريق الملك فهد الساعة 8 صباحاً منها فائدة؟ الزول دا مادام لعاب اكتر من ميسي يا ابو خالد فممكن تورونا انجازاته مع فريقو دا شنو؟ ميسى دا فضل ليهو كاس العالم بكاس العالم بس ويكون جمع المجد من كل الاطراف اللهم الا اذا طالبتو بانه يفوز بكاس ديفيس للتنس او يسبق ليكم اوسين بولت الخلاصة والله رايح لكم درب في الموية والله اعلم تلقوهو
Post: #28 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: Zomrawi Alweli Date: 05-29-2012, 06:53 AM Parent: #27
لاعب برازيلي موووووووووووبالغة - شاهدوا الانبهار ومتع نفسك بالدهشة ولكن هل يا ترى الرويال حيقدر يدفع المبالغ الموووووبالغة الكان بدفعها للمحترفين وخاااااستن بعدما اسبانيا بقت من الدول الساقطة في مستودع الفلس وقريبا ستحلق باليونان وتطلب المعونة من بوركينا فاسو
Post: #30 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: مجدي عبدالرحيم فضل Date: 05-29-2012, 07:16 AM Parent: #28
Quote: ابو خالد سلام عليك انتو عارفين يا اخوان المنبر دا مافي شئ خربو غير المجاملات، وابو خالد دا مع انه زول ظريف وممكن تجامله في اي حاجة لكن لما يصل انه يقارن بين ميسى والشئ الجابو دا فاعتقد انه المجاملة حدها وقف. ياخوي والله زولك دا ما يساوي ضفر في الاصبع الصغير بتاع الرجل اليمين (لاحظ اليمين) بتاعة ميسى. الزول دا وان كان في ريالاب حاولو يجملولك الصورة لكنه بالفعل لو ما لقى مساحة بيبقى زي عربية السباق في طريق الملك فهد الساعة 8 صباحاً منها فائدة؟ الزول دا مادام لعاب اكتر من ميسي يا ابو خالد فممكن تورونا انجازاته مع فريقو دا شنو؟ ميسى دا فضل ليهو كاس العالم بكاس العالم بس ويكون جمع المجد من كل الاطراف اللهم الا اذا طالبتو بانه يفوز بكاس ديفيس للتنس او يسبق ليكم اوسين بولت الخلاصة والله رايح لكم درب في الموية والله اعلم تلقوهو
صاحب البوست والزوار الكرام ندع حبنا العاطفي للبرازيل وننظر لما حققوه السحره ماردونا ومرورا بالعديد من المواهب حتي ميسي وكفي.
ليونيل ميسي لا يتكرر (في الزمن القريب والبعيد معا)
والمتعه الحقيقية عند الارجنتينين علي مر العصور مع كل التقدير للبرازيل
Post: #29 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد عبدالرحمن محمد Date: 05-29-2012, 07:10 AM Parent: #27
Quote: لكن لما يصل انه يقارن بين ميسى و الشئ الجابو دا فاعتقد انه المجاملة حدها وقف.
الله بالعافي التخسك في المصارين يا محمد، قبييل انا قتلو اللت محمد سليمان: يا راااجل.. وبعد رسلت المداخله زي اللِتحسست لاكين بعد الفي الكوت المنّك ده متل اتّكني قتلو: بالله؟
- عبداللطيف بعدّا الِّلي يجي يحاميلك الصايم، من باب شفقه ساكت كدي..
. .
[المطرطش]
Post: #31 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد عمر الفكي Date: 05-29-2012, 07:21 AM Parent: #29
القلوب شواهد يا ابو حميد والعوج مافي زول بيرضاه وصراحة ربنا مقارنة ابو خالد دي مي عوج براهو كمان معاها شتارة ريالاب مؤيدين
Post: #32 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد عبدالرحمن محمد Date: 05-29-2012, 07:44 AM Parent: #31
Quote: القلوب شواهد يا ابو حميد والعوج مافي زول بيرضاه وصراحة ربنا مقارنة ابو خالد دي مي عوج براهو كمان معاها شتارة ريالاب مؤيدين
- ما قتَّ غير الحق يا محمد عمر..، وطال ما بيني وبين جنا بكري ده مسافة يوم وضحوه، أياً كانت الرَكوبه، فخلني اللزيدلك مِحِنْتو:
Post: #40 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-29-2012, 09:10 AM Parent: #27
محمد عمر الفكي : كدا ريح أعصابك بالعزف المنفرد دا ،، ومن هنا كان بداية الزلزلة لأكذوبة قاطلونيا:
وشوف معاك أبشع ظلم تحكيمي في تاريخ الكورة !! وشوف الظلم لما يقرر الحكم أن يضيف كأس غير مستحق لخزائن برشلونة : والله قاسية عندما تنعدم النزاهة ويسرق جهد اللاعبين بهذا الشكل!! المباراة للتاريخ في ملعب : الكامب نو، ومنها تأهل برشلونة لنهائي الكأس الذي احتفل به بالأمس:
Post: #37 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-29-2012, 08:53 AM Parent: #26
Quote: الناس الوهم العاملين ابو التحليل الكروي يا وهم الزول ده مدريدي من كان طفل بعدين ده بقلب الناس قلب بشبه ريال مدريد بعدين حكاية اللعب الاوربي ده كلام ناس عندها وهمة الكورة في امريكا الجنوبية قال اوربا اهم حاجة ديل بسمعوا كلام المدرب البقولو المدرب بنفذوهو ومعاهو السحر بتاع البرازبل والمقدرات الفردية وسنو صغيرة لامن يلعب سشنة سنتين تعالوا شوفو الجن ناس وهم كيف
والله المدريدين غير!! كلمهم يا أستاذ ،، قال ايه كورة أوربا وما أعرف إيه: ههههه والله وهم وزايد عليه حسادة !! حالتو دي لسه ماوصل القلعة البيضاء،،
Quote: عبد اللطيف تسلم متعتنا يمتعك الرحمن في صحتك وعافيتك
والله دي بالذات محتاج ليها بشكل؟؟ ويمتعك أنت كمان وكمان والمدام والوريث الشرعي لعرش الابداع والسهر!!
تسلم ، وشرفت البرنابيو والله!!
Post: #35 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-29-2012, 08:30 AM Parent: #25
Quote: الأخ دفعه ولّا إيه!!
ماسمعت بي صيغة المبالغة أصلك ههههه،،
Quote:
عبداللطيف إزيك، عارفو الجنا ده بيكون بهرك بي مهارتو في المراوغه زي بهرني.. ومن جبت سيرة ماهو فعال زي ميسي، عرفتك دار تسوّلك ساتر قبلما يجوك االشفوت الجنا حاواار، لاكين فايدتو شنو لي تيمو؟ عمُّنا لطيف قال: الكوره اقوان.. عندو حبيبة أنانيه.. يهدر مجهودو في المحاوره،* لامن لمستو الأخيره تبقى متِلْ ودالصايم مؤخراً في المنبر!
ثم أخيرن: قتّا يساوي تلاته ميسي؟
يا رااجل!
- * تطرى الحرفا ديل، علي سبيل المثال، المتعونا، ويمرقو نضااف ولياقتن بعد التسعين دقيقه زي ماهي في الدقيقه الأولى؟: يوسف مرحوم، شرف موسى، النيل حسين، د. كمال عبدالوهاب [إمّا جارطو فوزي!]، ثم قلّه ياااخ!
الجنى دا ياحبيب متوفرة فيهو كل مقومات النجاح : القوة - السرعة - المهارة ،، ميسى توفرت له ظروف مثالية في البرشا منذ أن قدم له رونالدينهو تلك التمريرة الساحرة التي اكدت ظهوره على مسرح الأحداث ،، ولكن هذا أظهر نفسه بضراعه ياب حميد وفي هذه السن المبكرة :
ماتبقو إنفصاليين اكتر من كارلوس بيول ، والله الزول دا وصوله لأوربا سيكون قنبلة الموسم!! خليك قريب ،،
وبعدين ياخ ماتبالغ : يوسف مرحوم؟؟ لا حولا : أول سنةلينا في الجامعة كان يوسف مرحوم هو المسئول الرياضي وكان زوول عجوووووز الوقت داك!! ههههه
Post: #33 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-29-2012, 08:07 AM Parent: #24
Quote: عبداللطيف كيفنك اخوي ....
تعرف لو الفديو بتاعك ده حقيقي ومافيهو اي دغمسه الزول ده ساحر عدييييييييييييل
وبعدين الناس البتقول ماحيقدر يلعب في اوربا كلام ماصاح لانه حيكتسب خبرة جديده من المدربيين
خاصة هوصغير السن دي مهمة المدرب الفطن والذي يسطيع ان يستفيد من مهارات اللاعب ويوظفه داخل الملعب
غايتو متعه ياعبداللطيف ربنا يحفظه
ويحفظك كمان
ويحفظك كمان ياحبيب ، وشرفت الديار،،
تشكيك في أن يكون الفيديو ملعوب فيه هو أصدق تعبير عن الإندهاش في متابعة هذا الساحر،،
مجرد مقارنته وهو في سن التاسعة عشر بميسي الآن فهذه قفزة بالزانة :
بعد سنتنين كان الله حيانا لن يقارن بأحد،،
شكرا على الإثراء ياعمدة ، وتعال شوف الهجمة المرتدة من الكتلوونيين أدناه هههههه
Post: #34 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عصام علي أحمد Date: 05-29-2012, 08:28 AM Parent: #33
Quote: والله العظيم الزول دا = 3 ميسي أقل حاجة!!
مشتاقين والله
سمعنا نفس العبارة لما سجلتو كرستيانو رونالدو قلنا ليك قبل كده ريال مدريد مقبرة للمواهب
تعال لينا زيارة لدبي عشان اجضمك
Post: #36 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد عبدالرحمن محمد Date: 05-29-2012, 08:52 AM Parent: #34
Quote: القوة - السرعة – المهارة
بلحيل.. بس اريتو يتعلم هاك وَدّني!
-
Quote: وبعدين ياخ ماتبالغ : يوسف مرحوم؟؟ لا حولا : أول سنةلينا في الجامعة كان يوسف مرحوم هو المسئول الرياضي وكان زوول عجوووووز الوقت داك!!
بالله انتو الدفعه الكانت قبُل مازدا؟
Post: #38 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: moaz elsir Date: 05-29-2012, 08:57 AM Parent: #34
ماردونا + بيليه + روناادينيو = ميسي
ميسي ظاهرة لن تتكرر :
** ميسي اسرع من يجري بالكرة. ** ميسي لا تبعد الكرة عن رجلة مسافة كبيرة اثناء الجري. ** ميسي يسدد الكرة اثناء الجري بطريقة مباغته لايتوفعها الحراس. ** ميسي لا يخطئ المرمي بسهولة . ** ميسي يستطيع صناعة الاهداف بطريقة لاينافسه فيها سوي ماردونا ورونالدينهيو.
Post: #41 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: صبري طه Date: 05-29-2012, 09:16 AM Parent: #33
ثانياً بالتبادي .. أُبارك لميسي فوزه بجائزة أفضل لاعب في العالم للمرة الرابعة على التوالي وكأول لاعب يحققها رباعية متتالية وغير متتالية .. وهذا سيحدث بعد إعلان نتيجة فوزه لهذا الموسم والتي ستعتمد في المقام الأول على تكسيره للأرقام القياسية التي لم يكسرها إنسٌ ولا جان ...
ثالثاً بالتبادي .. يكفي ميسي شهادة مارادونا بأن ميسي أفضل منه ..
رابعاً بالتبادي .. سأتابع هذا البوست مع يوتيوب لوكاس مورا .. وبعدها سأعود للرد والمراشقات مع أخونا عبداللطيف بكري .. والذي يبدو أنّه كبّر لفّة لوكاس مورا فقط لاحتمالية انضمامه لريال مدريد !!!
خامساً بالتبادي .. الدعوة مُقدّمة للصديق الفنان علاء الدين تمبس .. للتواجد في هذا البوست ...
Post: #43 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: صبري طه Date: 05-29-2012, 09:29 AM Parent: #41
Quote: رابعاً بالتبادي .. سأتابع هذا البوست مع يوتيوب لوكاس مورا .. وبعدها سأعود للرد والمراشقات مع أخونا عبداللطيف بكري .. والذي يبدو أنّه كبّر لفّة لوكاس مورا فقط لاحتمالية انضمامه لريال مدريد !!!
بعد مُشاهدة اليوتيوب .. أقول بأن لوكاس مورا جمع بين مهارة رونالدو البرازيلي ورونالدينو .. ويتمتع بسرعة رونالدو البرازيلي وهو أقرب إليه من حيث الأداء العام ..
ولكن يا عبداللطيف .. ميسي لم أُشاهد لاعب يشكّل خطورة على الخصم أكثر منه .. لا مارادونا ولا بيليه ولا غيرهم .. وفي بعض الأوقات حتى محاولة تعطيله بالمخالفات لا تنجح معه ...
ـــــــ شاهد رونالدو وقارنه بلوكاس مورا
Post: #39 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: فيصل المفتاح نور الهدي Date: 05-29-2012, 09:04 AM Parent: #1
أستاذي الجليل عبد اللطيف بكري.
تحيايا و إحترام و أشواق بقدر مقامك السامي. و لك أتم التقدير.
الرجل ممتاز و لكن فيهو حبة قوة زايدة يعني (عود عود).
و بيني و بينك كسرت رقبة الحروف لأجتر ذكري العود بين يديك في تلك الأماسي الندية في رحاب خور عمر.
لك ما تستحق من مودة و ما تشاء من دعوات.
مفتاح. الدفعة السادسة.
Post: #42 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: داليا الكباشى Date: 05-29-2012, 09:24 AM Parent: #39
Quote: خامساً بالتبادي .. الدعوة مُقدّمة للصديق الفنان علاء الدين تمبس .. للتواجد في هذا البوست ...
ـــــــــــــــــــ المُشكلة الكورة ذاتها راحت لي مع مسلسلاتها التركية
Post: #44 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: moaz elsir Date: 05-29-2012, 09:30 AM Parent: #39
Quote: طريقة لعب ليونيل ميسي لم تكن ممتعة
بالغته عدددددددددديل
Post: #45 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد يوسف الزين Date: 05-29-2012, 10:02 AM Parent: #44
يا عمكـ
ميسي شنو الممتع؟! ميسي دا وهم ساكت اكتشف سر اللصيق بين الكدارة والكورة يكون كيف بس! دا بالنسبة لميسي.
اما بالنسبة لزولك دا..اهم حاجة عمرو كم؟! الزول دا لازم يتعلم يخلي الاستعراض وما يحاور الا لمن يحتاج ويعرف يباصي :) ياخي الزول دا احمق وعوير كلو كلو .. بخلي الاطراف وبجري النص ويقعد يفتش محل المدافعين وين! مبدئياً كراعو قوية يعني خلطة بين ادريانو ودنيلسون والاتنين ما نجحو في اوروبا، لكن نجح رونالدو والزول دا جراي زي رونالدو. المهم داير فرمطة ووندوز جديد ولو مشى ارسنال سنة كدا قبل ما يجي ريال مدريد يكون كويس :)
Post: #47 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: معتصم دفع الله Date: 05-29-2012, 10:10 AM Parent: #44
شفت يا أبوخالد .. صبري طه إتقطّع عديل عشان يجي داخل البوست دا فيا صاحبي المقارنة مع ميسي معدومه .. المشكلة لا البرازيل ولا غيرها ما ح تجيب لاعب في الوقت القريب ينافس ميسي .. لوكاس دا ما قلنا عليه حاجة (عشان شتات ما يزعل) بس لسه عايز كتير .. من زمان وأنا بقول إنه الريال مقبرة اللاعبين .. يشتري ويخزن والدليل كاكا حاليا تايه وما لاقي نفسه .. أخير ليكم أمسكوا قوي في القاعدين ديل رونالدو وبنزيما ومن خلفهم أوزيل .. وكان رجعت لهقواين عافيته فريقكم يبقى تمام التمام .. بس عليك الله إنت وصاحبك شتات دا أبعدوا لينا من ميسي
Post: #48 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: صبري طه Date: 05-29-2012, 10:56 AM Parent: #47
Quote: شفت يا أبوخالد .. صبري طه إتقطّع عديل عشان يجي داخل البوست دا
اتقطّعت بعدما قطّعت الطماطم
Post: #49 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: طلحة عبدالله Date: 05-29-2012, 11:23 AM Parent: #47
والله دي حاجة عجيبة جدا...... خمس ست مداخلات تحت بعض أصحابا قالوا اللاعب دا لاعب مساحات وياللعجب ؟؟؟؟؟؟ لاعب عندو امكانية المراوغة في علبة صلصة صغيرة ويجي مين ومين يقولك مساحات وملاح قرع . لا مقارنة البتة بين هذا الشويطين المقرم والراجل الواحد سيد الكراع الواحدة الإسمو مين كدا ميسي دا . إتوا ما عندكم نظر واللا ما عندكم نظر ؟ سلامات يا عبد اللطيف والمتداخلين .
Post: #50 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: أمجد الزين Date: 05-29-2012, 12:44 PM Parent: #49
والله اعلق واصفق ياخ الزول دة ما خلى حاجة فى الكورة لدرجة بتخليك تحس انو الناس البلعبو معاهو ديل ناس بيض الود دة حريف شديد
Post: #51 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد يوسف الزين Date: 05-29-2012, 01:25 PM Parent: #50
Quote: خمس ست مداخلات تحت بعض أصحابا قالوا اللاعب دا لاعب مساحات وياللعجب ؟؟؟؟؟؟
يا طلحة الناس ديل قايلنو مهند كاريكا مثلن؟! الزول دا بجري بالنص عديل تقول لي مساحات!
Post: #52 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: محمد عمر الفكي Date: 05-29-2012, 01:31 PM Parent: #51
Quote: والله دي حاجة عجيبة جدا...... خمس ست مداخلات تحت بعض أصحابا قالوا اللاعب دا لاعب مساحات وياللعجب ؟؟؟؟؟؟ لاعب عندو امكانية المراوغة في علبة صلصة صغيرة ويجي مين ومين يقولك مساحات وملاح قرع . لا مقارنة البتة بين هذا الشويطين المقرم والراجل الواحد سيد الكراع الواحدة الإسمو مين كدا ميسي دا . إتوا ما عندكم نظر واللا ما عندكم نظر ؟ سلامات يا عبد اللطيف والمتداخلين .
يا جماعة زحو بعيد ، سيد الشئ ذاتها جاء، حباب تنظير ، ود البشرى اوعى يكون علقت في البوست دا، حتتعلق من كرعياتك في احدى اطراف الاخطبوط العظيم طال عمرو
Post: #53 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: شتات Date: 05-29-2012, 02:18 PM Parent: #52
لالالالالالالالالا..لالالالالالالالالا.... لالالالالالالالالا دا كلام جديييييييييييييييييييييييييييييييييييييييييييد .. دا كلام خطييييييييييييييييييييييييييييييييييييييييير ... دا عجييييييييييييييييييييييييييييييب .. دا .. دا .. ما حصل .. عبد اللطيف يا بوخالد .. دا كان وين ..؟ ماشاالله والصلاة على الرسول .. وعينا باردة وعين الحسود فيها عود .. والله يا معتصم كان الله هون وكتب التوفيق للولد دا تشوفوا شوف .. تشوفوا كرة قدم جديدة .. تشوفوا كلام جديد .. تشوفوا تاريخ جديد .. يا بوخالد والله أنا من السبعينات منتظر بيليه جديد .. واظنو ياهو دا .. دا خطير يا معتصم .. تعرف دا شكلو كان بيطارد الاسود في غابات الأمزون .. شكلو كان بيقفز في خزان ايتايبو العجيب البين البرازيل وباراغواي داك .. شكلو كان بيرقص السامبا في الموية على سواحل ساوباولو .. دا خطير يا معتصم .. دا جارنيشا وريفيلينو وتوستاو وسقراط وزيكو وفالكاو وايدر وروماريو ودي نيلسون ورونالدو ورنالدينيو .. دا سانتوس وساوباولو وفاسكو دي جاما وكروزيرو وفلامنجو .. دا 1958 .. 1962 .. 1970 .. 1994 .. 2002م قوة بيليه .. رشاقة ماردونا .. ثقة زيدان .. وحرفنة ميسي .. متكامل الموهبة .. سرعة .. قوة .. قوة في الخطوة .. قوة في التهديف .. قوة وشطط في الخيال .. بس يا اخوانا الله يرضى عليكم طلعوا لينا ولدنا من حكاية برشلونة وريال مدريد .. دا ولدنا .. ولدنا برانا .. من راقصي السامبا .. من طيور الكناري .. من موسيقي الريو. من سحر برازيليا .. من الاساطير الأمازونية .. يا بوخالد بالله قول لمعتصم دا ياخي انت زول فنان بتحب الكورة وبتشجع اللعبة الحلوة بالله ادينا خاطرك وزح شوية .. والله أكبر .. ولا نامت أعين الجبناء ..
Post: #54 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: عبد اللطيف بكري أحمد Date: 05-30-2012, 03:07 PM Parent: #53
عذراً ياشباب + المطرطش ،
والله الموقع ماراضي يفتح / الظاهر عايز مساحات ههههه،،
Post: #55 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: صبري طه Date: 05-30-2012, 03:48 PM Parent: #54
ــــــــــــــــ واحـــد فيــهـــم مــاســـــورة ^^^ يـا مورينيــو يـا لــوكـاس مورا والشاطر يكتب في السبورة ^^^ ميسي فن وهندسة وملك الكورة
Post: #56 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: Elmosley Date: 05-30-2012, 04:41 PM Parent: #1
Quote: إنه مدهش بحق : اللاعب : لوكاس مورا - لاعب ساباولو البرازيلي
عبد اللطيف يعلم الله زي ده ماشفنا ياخي ده لا يقارن الا بموتسارت في البيانو ببساطة انا قارنت بين فيديو رونالدو في البوست وبين الزول ده صاح رونالدو محاوراتي عجيب ولكنه يعتمد على المدافرة والمكابسة لكن الشاب ده بحاور بالكوره نفسها لا حول ولاقوة الا بالله
Post: #57 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: mekki Date: 05-30-2012, 05:44 PM Parent: #56
Quote: طريقة لعب ليونيل ميسي لم تكن ممتعة بقدر ماهي فعالة في تحقيق الفوز،،
ياخي حرام عليك والله
Post: #58 Title: Re: عفواً ليونيل ميسي ، قد جاء من يحقق المتعة الحقيقية بكرة القدم : في Author: صبري طه Date: 06-11-2012, 10:38 AM Parent: #57
عفواً ليونيل ميسي .. ما كان في داعي للمرمطة دي !!!
عليك بصاحبك صلاح شتات ..
