Post: #1
Title: # تعالو أحكي ليكم عن علويه جماكسين قبل العرس!؟
Author: زهير عثمان حمد
Date: 05-25-2012, 10:11 PM
تعرفوا في تجارب كدا الواحدبيكون حريص أنو ينقل تفاصيلا عشان الناس تعرف نحن وين وكناشنو وبقينا كيف المسألةه هنا ما للمقارنة هي عرض تجربة بطريقة جديدة ومحايدة كمان
كان قلت علويه سمحه تكون عيوني مزغلات ومخي في عالم تاني وغرقان في أوهامي البتراقص قدامي يا خي هي ما جماكسين عديل كدا وزوله وأنسانه ومن حقها تعيش حياته و ترتبط , لما يقول لعلويه (أنتي قصيره وسمينه ومعشكبه وما بتشبهي البنات ) تقول بكل ثقة الحمدلله طلعت من الدنيا بعماد سبحان الله قالت بتحبوا وأثرت عليهو وجدانياوعاطفيا وسيطرت عليهو أقتصاديا الود بقي مسلوب أرادة وبقي كمان ما بعرف أي حاجة غير علويه هي الهم الاكبر في حياتو من الصباح وقبلي ما يمشي الشغل زي حمار القش بيت ناس علويه جري ومن ما أمها تشوفوا تقول ( محمد معنا ما تغشانا )عماد ما عندو موضوع في حياتو غير علويه ومتعلق بيها شديد مع أنها طاعنه في السن وعجوز غابرين المعاصرين لعلوية قالوا لما كانت في سادسة أبتدائي عماد كان يادوب دخل المدرسة يعني الفارق في العمر أمكن زي خمسه سنين وناس بيقولوا أكتر كدا الناس لما يتذكروا علويه وعماد بيقولوا حاجة ربانيه عماد بريد علويه وبطريقة مريضيه كان ما ركب معها المواصلات ووصلا لحدي البيت وفطرت معاهو وعامل الدرب ساسقامن البيت للمكتب روحو ما بترقد المهم هو موظف في البلدية وهي موظفة في المحكمةمرة كاتبه ومرة في الحسابات قالت قرت قانون لا في ديوان النائب العام ولا محاكم السودان عينوها لانها سقطت زي ست مرات كدا في امتحان المعادلة بس هي روحا رياضية كان سقطت ولا نجحت ما عندها مشكله ولا فارقه كتير معها لو تعرفوا الحاجة الوحيدة اللي بتميز علويه عن كل البنات شنو ح تستغربوا والله غير أبتسامه غربيه وضحكة مجنونه ما عندها معني وكمان تعال شوف اللبس عندها هدوم من العصورالوسطي وتسريحية شعر أسمها في الكوفيرا علويه كجول بتذكرني مدلين أبرويت وزيرة الخارجية الامريكية ديك المهم طبعا العبد لله كان من أصدقاء الرهيبه جدا علويه لاسباب أقتصادية وهي من كبار المانحين والدائنين لابوالزهراء في كل الاوقات الصعبه جدا كانت ما بتبخل بالماية والمتين وكمان كان في ناس ضبحين في الحله بجي بلقي اللحمه حقتي قاعدة أنا والله بعترف أني كنت بستغل علويه عاطفيا عشان أقدر أشتري الدوا حقي لكين كان عندها أحساس قوي أني بتاع مصالح ليس الا وحالتي المادية مترديا جدا المهم الاخت علويه كانت صاحبة مخ في عالم المال والاعمال وقدرت تكون عندها ثروة كبيرة بعد ثلاثة سنوات من العذاب من الصباح توزع الطعميه علي المدارس والبقالات وفي المساء بعد ما أشترت الفرن بقت تخبز لكين الحق يقال عندها خبيز فنان وأسعارا معقولة المهم زبطت البيت عش الزوجية عشان حبيب القلب عماد الهوائي والله ياناس عملت عرس أنا الي الان مبهور الدخله كانت في صالة سولارا وفستان الزفاف أخر صيحه العاري من الضهر وبدلة عماد جاءت من لندن أظنها من بت خالة علوية قالوا كمان بيتا قريب من سوق اليهود زاتو, العرس بيكون كلف علويه جماكسين زي 80مليون كدا وشهرا العسل كان في أديس ياخي دي حسي شدة ما عايشه وهمة العرس لما تلقي الواحد حتي السلام بعد تعب وتحديد للمكان والزمن وأخر أهميه ولانها مشغولة بمشروع طفل الانابيب لان الود عماد نفسو في طفل عشان يلعب معهو بالله شوفوا علويه جماكسين مش زادت عدد التعساء من المتزوجين لكين انا ما حارقني الا (قصة أنشالله تلقي بت الحلال اللي ترضي بيك ) حتي علويه بتمارس معي الاضطهاد العاطفي دنيا
أخ يا يا علويه وهم ويا عماد هبوب .
لكين الدنيا ما دوامه والحال ما بقي نفس الحال
|
Post: #2
Title: Re: # تعالو أحكي ليكم عن علويه جماكسين قبل العرس!؟
Author: احلام وهبي
Date: 05-26-2012, 00:07 AM
Parent: #1
بوست روعة
مع تمنياتي ليك بواحدة زي علوية جماكسين
وتتكفل هي بكل مستلزمات العرس وتمشوا شهر
العسل تركيا في قصر نور ومهند
|
Post: #3
Title: Re: # تعالو أحكي ليكم عن علويه جماكسين قبل العرس!؟
Author: زهير عثمان حمد
Date: 05-26-2012, 00:18 AM
Parent: #2
أنا ماعايز لا جمكسين ولا مضاد حيوي وكان ما عندي مشكله قاعد في بيتنا (المافي شنو) قالت مع تمنياتي ياخي
بلا وهم معكم
|
Post: #4
Title: Re: # تعالو أحكي ليكم عن علويه جماكسين قبل العرس!؟
Author: قيقراوي
Date: 05-26-2012, 04:33 PM
Parent: #3
Quote:
عشان حبيب القلب عماد الهوائي والله ياناس عملت عرس أنا الي الان مبهور الدخله كانت في صالة سولارا وفستان الزفاف أخر صيحه العاري من الضهر
|
يادوب فهمت دخلة الصالة دي انا!!
-----
عمدة دا هو هوائي ول هبوب؟
|
Post: #5
Title: Re: # تعالو أحكي ليكم عن علويه جماكسين قبل العرس!؟
Author: خالد عبد الله محمود
Date: 05-26-2012, 04:55 PM
Parent: #4
يا أبو الزهراء
البت من تبقي روحها مرحة و ضحكتها مالية الدنيا بتبقي أجمل واحدة في الدنيا حتى لو كانت بتشبه قيقراوي دة زاتو .. 
غايتو للضمان كده ( أنشالله تلقي بت الحلال اللي ترضي بيك )
|
Post: #6
Title: Re: # تعالو أحكي ليكم عن علويه جماكسين قبل العرس!؟
Author: رشا احمد
Date: 05-26-2012, 06:20 PM
Parent: #5
هههههههههههههههههههههههه
عسسسسسسل يا زهير و الله أنت عسل
|
Post: #7
Title: Re: # تعالو أحكي ليكم عن علويه جماكسين قبل العرس!؟
Author: زهير عثمان حمد
Date: 05-26-2012, 10:33 PM
Parent: #6
يا صديقي قيقا
تحياتي
قلت الدوخله بعدين أنت عماد دا ما عارفو هوائي المزاج وشخصيتو هبوب
والله الايام دي البطيخ كتير ورخيص في العاصمة القومية
|
Post: #8
Title: Re: # تعالو أحكي ليكم عن علويه جماكسين قبل العرس!؟
Author: Randa Ahmed
Date: 05-26-2012, 10:42 PM
Parent: #7
اضطهاد...وحقد اجتماعى رهيييييب...
انت بس خليك طيب وبتلقى أحسن وأحسن من الدايرو زاتو :)
|
Post: #9
Title: Re: # تعالو أحكي ليكم عن علويه جماكسين قبل العرس!؟
Author: قيقراوي
Date: 05-27-2012, 08:46 AM
Parent: #7
Quote:
يا صديقي قيقا
تحياتي
قلت الدوخله بعدين أنت عماد دا ما عارفو هوائي المزاج وشخصيتو هبوب
والله الايام دي البطيخ كتير ورخيص في العاصمة القومية
|
البتيخ فررررررررررر
كدي خلينا في ي ي ي ي الدخلة الهوائية في الصالة دي
------
انا جايي خصيصاً للموضوع دا
كدي نشوف مدى التطور و (الانفتاح) الوصل ليو السودان الشغيغ في مجال الهوائيات و البث المباشر دا
بعدين ياخ الزولة دي ما بي حقها ياخ .. انت قايل 80 مليون دي ساااهلة!؟
اسي كان سوتا في بطاقات اسكراتش ساااي بتربح كم!؟
مضيعها في الهواء ساااي الغبيانة؟
خالد يا حاقد .. اصبر لمن نقابل السيدة/ جمكسين و نتباحث الامور ذات الاهتمام المشترك .. ونختك على رأس الاجندة ..
بطير ليك بعدين .. اوع تنكر تمييزك ضدنا!
|
Post: #10
Title: Re: # تعالو أحكي ليكم عن علويه جماكسين قبل العرس!؟
Author: خالد عبد الله محمود
Date: 05-27-2012, 02:24 PM
Parent: #9
Quote:
خالد يا حاقد .. اصبر لمن نقابل السيدة/ جمكسين و نتباحث الامور ذات الاهتمام المشترك .. ونختك على رأس الاجندة .. |
قيقابايت
كدي أنا أجلوني شوية و شوفو طريقة لأبوالزهراء ده ..
الزول ده شكلو كان قافل علي جمكسين دي بتلاتة كروت
غايتو أنت و السيدة جمكسين لازم تشوفو ليهو حل
يا تكملو ليهو نص دينو يا تشيلو النص الموجود حالياً !!
|
Post: #11
Title: Re: # تعالو أحكي ليكم عن علويه جماكسين قبل العرس!؟
Author: زهير عثمان حمد
Date: 05-27-2012, 08:13 PM
Parent: #10
الاحباب والاصدقاء من البورداب والعابرين
تحياتي
طبعا الاخت غلويه قدمت عريضه لوكيل النيابه اليوم متهمةالاخ أبوالزهراء بالقذف والتشهير وتعريض سمعتها للأشاهة والاشانة دا مغقول أنا كلوا سويتو في البوست الصغير دا المهم دخلت الاجاويد وأعتذرت ليها والود عماد كمان لذلك ما في طريقة لتداخلي هنا مرة أخري
والله يا قيقا وكيل النيابه معجب بيك جدا وقال تعليقانك ذكيه
وأنا يا ستهم يا علويه والله ما قصدت غير الطرافة والدعابة وقلبي كويس وأنتي عارفه
لكم كل الود
أقفل البوست في ساعته وتاريخه عشان غلويه ما تزعل
|
Post: #12
Title: Re: # تعالو أحكي ليكم عن علويه جماكسين قبل العرس!؟
Author: سارة علي
Date: 05-27-2012, 08:29 PM
Parent: #11
يا سعادة وكيل النيابة..
الزول دا ما تخليهو كلو كلو ..
شابكا "غلوية غلوية"
ــــــــــــــ
زهير انت زول قلبك ابيض ربنا يديك بت الحلال التسعدك يا رب
بس خلي الكتابة بالليل ..
|
Post: #13
Title: Re: # تعالو أحكي ليكم عن علويه جماكسين قبل العرس!؟
Author: زهير عثمان حمد
Date: 05-28-2012, 10:55 AM
Parent: #12
الجميله سارة علي
كيفك
تعرفي كتابة الليل دي بقت مزاج وبعد مرات بتكون حاجة ما تقليدية وكمان مهضومه وسط كم الاحباط والمشاكل اللي في البوردالمهم شكرا لمرورك وماداعي للتحريض
لك كل الود
|
Post: #14
Title: Re: # تعالو أحكي ليكم عن علويه جماكسين قبل العرس!؟
Author: قيقراوي
Date: 05-28-2012, 11:46 AM
Parent: #11
دقيقة .. دقيقة يا عمك
Quote:
أقفل البوست في ساعته وتاريخه عشان غلويه ما تزعل
|
وكت جابت ليها وكيل نيابة خلينا نزبط وضعنا
Quote:
اسي كان سوتا في بطاقات اسكراتش ساااي بتربح كم!؟
مضيعها في الهواء ساااي؟
|
تم سحب الوصف .. والاعتذار للسيدة جمكسين عنه
------
لكن كمان كان قلّبت (الحاصل) ح تلقى النتيجة كأنو السيدة جمكسين اشترت ليها اسكراتشات بي 80 مليون .. ؤ وقعت فيها اتكلمت بيها برااااااااها ..
تكرش و تتكلم .. تكرش وتتكلم ... لمن خلصتن chــــــت عليهن!!
ؤ كلو ضائع في الهواء!
حظها كـ(دغيغ) .. وعمدة هواء ساااي!
|
Post: #15
Title: Re: # تعالو أحكي ليكم عن علويه جماكسين قبل العرس!؟
Author: وضاحة
Date: 05-28-2012, 12:30 PM
Parent: #14
ابو الزوز الحنين
علوية ياخى فى النهاية انسانة وبتحب والحب ليس احساس نشتنشقوا بل مواقف نصنعها
وانا سعيدة انوا علوية قدرت تنجح فى انها تعمل عش زوجيها وتتزوج البتحبوا
المحزن بالنسبة ليهم الاطفال لكن كلوا مكتوب ومقسوم فى النهاية
عارف يا ابو الزوز
فى ناس عندها شباب ومال بس ماعندها سعادة
ربنا ما بديك كل شى والكمال لله وحدوا
ربنا يديك البت البتسعدك
وليك على وقدام ناس المنتدى الشيلة وتكلفة العرس كلها على
بس انت انوى
واختك جاهزة
|
Post: #16
Title: Re: # تعالو أحكي ليكم عن علويه جماكسين قبل العرس!؟
Author: زهير عثمان حمد
Date: 05-28-2012, 03:28 PM
Parent: #15
وضاحة بت القبايل
تحياتي
في البداية شكرا ليك والله كنت دايما بقول أنت مختلفة عن الاخريات والله لو أنقطع العشم في كل الناس تبقي أنت الامل والاخت الحنون وأنشالله ربنا يجعل اللي بيننا أواصر خوه أقوي وتبقي العمر كلو ولك كل الامتنان والشكر وبرضو مهما كون ح أكون نعم الاخ ليك وضاحة ومتعك ربي بالعافيه
|
|