الجزار ورور لي بالكذلك

أمبارح في الكدرو وقفت عند جزار عشان اشتري لحمة (الله الله على لحمة الكدرو) am:

أول حاجة الجزار لقيتوا نايم في ضهر الديب فريزر

والسخانة تلحم واللحمة تلخم..

الخدرجي كتر خيره كورك للراجل يا مرتضى يا مرتضى يا مرتضى..

أنا في نفسي قلت الزول دا لو قام مرييل وقشا الريالة حا اقول ليه معليش كنت مشبه على لحمتك دي متوسفين وامشي اشوف لي واحد تاني..

ربك رب الخير ستر الراجل سبحان الله قام من النوم من غير اي رييالة تخيلو امبارح اول مرة اكتشف في ناس تنوم وتقوم عادي كدا من غير اي رييالة لكن العيون حممممممممر ولمن قعد يحمر لي قعدت اعايين للسكاكين قلت صاحبنا دا يجر سكين اجر اقرب سكين ونتبارز هنا..

اها قعدت ارقد ليه:: والله حكاية يصحوط من النوم دي مسالة صعبة خلاص ووو..

قطع لي كسير تلجي في راسي وقال لي اها ورينا عاوز شنو..

قلت ليه عليك الله كيلو مخروقة..بمناسبة مخروقة دي زمان ابوي رسلني قال لي امشي جيب كيلو مخروقة لمن وصلت الجزار ومصطلحات الكورة وانواع الكسور شابكا في راسي قلت للجزار اديني كيلو عرقوب ولا شنو كدا ما عارف غايتو متأكد ما كيلو (أنكل) ولا رباط صليبي ولا حتى كيلو عضم الشيطان..

صاحبك شال الساطور وقع في البهيمة المعلقة رزع بصراحة روح الزول الانتقامية دي انا قلت الحكاية تكبر في دماغو يقوم يرزعني انا كمان..قمت تاني اكسر تلج (والله متاسفين يا اخي والله انا القدامك دا لو صحوني من النوم ممكن اقوم الحرب العالمية الرابعة) طبعا دي عشان يفهم انه السلاح الابيض دا قدام النووي القاعد اقوم بيه الحروب العالمية ولا حاجة عشان يأمن..

ها ولااااا اشتغل بي رزع لمن غفر ليه و جاب الكيلو ووزن واداني ..

كم يا مرتضى (كانوا قرا معاي برضو ولاااااا اثرت فيه المكنة...)

تلاتين..

تلاتين ليه الصباح دا ما كانت 28 دي نظام يعني انا بشتري لحمة كل تلات ساعات عملتها واضحة مش..

قال لي مفروض تكون بعد الليلة 35

قلت ليه الفرضو منو..

صاحبك خلاص دابو اتذكر اني السبب القطع ليه حلموا بالمراح والبقر والسعية والحاجات العجيبة التلقاه كان بيحلم بيها دي وقام لف ليك مفتاح تحمير العيون لمن حمرن وعملن حبة رماد بالجنبة وقام ورور لي بالكذلك قال لي فرضتو انا دا ما عاجبك..

قمت براحة واظنو ما سمعني قلت ليه براحتك مافي عوجة وشلت الكيلو بكل شجاعة ومشيت على بيتي كالاسد الهصور..

يعني خلاصة الشغلانة الزول دا لو قال لي قوم ليف مش كان تكون محترمة شوية...في داعي يهرشني كدا ويستقل عامل الارض والساطور..

يعني لحمة وبتلاتين ومعاه هرشة بي سكين ياكلوها بياتو نفس..

نفسي ابتها تب

تحياتي سامي

35 جنيه للكيلو
كتير شديد ، اللهم نسألك اللطف بعبادك

Quote: تحياتي سامي 35 جنيه للكيلو كتير شديد ، اللهم نسألك اللطف بعبادك

اتلومت معاي والله ...هسي موضوع هرشتي دا عادي

كامل التضامن سامي

Quote: اتلومت معاي والله ...هسي موضوع هرشتي دا عادي

باقي ليك الجزار ده نايم لي شنو وهرشك ليه. عشان ما تفاصل في قيمه الـــ 35 جنيه.
الشغلانه قلع ساي