( أمشي .. يا حيوان .. )

..........

غالبيتكم حا يجي يديني درس في الاخلاق وعيب وشنو ما عارف
ولكن ساواصل حتي النهاية !!

اول قبل ما تتدخلوا شوفوا الزول يستحق كلمة حيوان ولا لا ؟!
ويشهد الله اقول ليكم اسمه هنا والزارعنا غير الله يجي يقلعنا !

شفتوا الكلام ده شين لياتوا درجة ؟!!
وكلكم بستنكروا انه يتقال في حق زميل معاكم هنا صاح ؟؟
اها يا جماعة الخير تصدقوا او لا تصدقوا ؟!
الكلام ده ( أمشي .. يا حيوان .. ) قالها بالفم المليان وبوضوح
الحروف وبمخرج ( الامر) ، كمال عبيد وزير الاعلام الاسبق والقيادي الكبير
في الحزب الحاكم ، قالها لمن ؟ للاستاذ عثمان مرغني الكاتب والصحفي المشهور ،
وبحضور الاستاذ الطاهر حسن التوم ، والسبب يا اخواني واخواتي هو غضب كمال عبيد
من عثمان ميرغني من نقاش دار اثناء حلقة من برنامج ( حتي تكتمل الصورة ).
وكان موضوع الحلقة حول اجتماع مجلس شوري الحركة الاسلامية ..
نسال الله السلامة والبعد عن الملامة ،

الله يهجمك يا العوض المسلمي


وشكرا

والله يا ودالباوقة انا ذاتي مهجوم ومستاء جدا من حديث الرجل هذا !!
اها يا ودالباوقة عارف عثمان رد قال شنو؟!
قاليهو ( كيف اصبحت وزير للاعلام .. وان لا تستطيع مجرد تحمّل حوار تلفزيوني ؟ )

نعم قد نختلف مع عثمان ميرغني في كثير من الاشياء حول تغطيته الصحفية
ولكن نتفق جميعا انه شخص نضيف يكتب وجهة نظره واغلبها مناهضة للنظام وناصحة له
ونختلف معه في تاخيره لنشر مواضيع ذات اولوية وحساسة بسبب الاثارة منه ولكنها تضيع علي الشعب
فرصة معالجة كان يمكن ان تحدث ،،
ومهما كبر الاختلاف فهو اختلاف حول شأن عام ، ولكننا نرفض رفضا تاما الاساءة اليه من ايا كان ،
وخاصة اذا كانت اساءة مبتداها ومنتهاها اختلاف في وجهات نظر ! ونرفضها ان تأتي من مسئول يفترض فيه
احترام الصحافة والصحفيين ومفروض عليه تقبل النقد وان كان حاداً ..

سلام اخ العوض

هل قال هذا الكلام بعد نهاية البرنامج ولا في الفاصل؟

Quote: هل قال هذا الكلام بعد نهاية البرنامج ولا في الفاصل؟

قالوا بعد الرمية

الله ليلة ليلة ليلة

بعد نهاية البرنامج يا واصل كما جاء في عمود عثمان ميرغني اليوم ،

Quote: بعد نهاية البرنامج يا واصل كما جاء في عمود عثمان ميرغني اليوم ،

بسيطة .... حيطلعوهو كضّاب ......... في تسجيل أو أي إثبات؟

___
ده كمال حُقنة والا واحد تاني؟

يا ابوالعزايم ما يقدروا عشان في شهود من ضمنهم الطاهر حسن التوم
ولا اعتقد ان عثمان سيتخذ اي اجراء قانوني فوقته كما يذكر دائما في ردهات المحاكم لانه رئيس تحرير !

سلامات شيخ العوض...

واللة أنا ما مستغرب إلا من إستغرابك دة...دة مش كمال عبيد بتاع الحقنة داك ولا واحد تاني....أها زي دة تتوقع منو شنو...

وبعدين الكيزان ديل كلهم ما يهو دة أسلوبهم في النقاش وسيخ ومطاوي...يعني الأدب والزوق يجيبوهو ليك من وين....

بيني وبينك عثمان عصرو لمن جاب الزيت...ياخ هو بالغ لاكين....

حبابك هيثم الصديق وابقي داخل يا حبيب
ذكرتني قصة واحد قالوا سافر لندن ولاول مرة في حياته يسافر خارج منطقته ،
يازول الراجل ده ماشي في لندن جنب حديقة هايد بارك ، لقي ليك خواجة ماسك صاحبه
وببوس فيها ، صاحبنا بس كشافات ( قندران ) يعاين في الجماعة باستغراب شديد ،
صاحبنا بعد رقبته المته من طولة المعاينة ، اتلفت وراه ، لقي ليك صف طوييييييل من الخواجات
ما بعاينوا في الراجل وصاحبته ! كانوا بعاينوا في استغراب صاحبنا للمنظر ؛)
المهم
كمال عبيد قال الكلام الشين ده ونحن ما بنقبلوا منه ابدا !.

اخوي العوض
مسكاقمي
تعرف يا اخوي العوض الكوز اتربى على السمع والطاعة
ما اتعود رأي مختلف او من يخالفه في القول
عشان كدا طوالي بيطلع من طوره عند سماعه الرأي الاخر
ويفقد المنطق

اللهم لا تبتلينا

ولك تحياتي

شكرا الامير الحبيب خالنا حمزاوي علي التشريف

Quote: الكلام ده ( أمشي .. يا حيوان .. ) قالها بالفم المليان وبوضوح الحروف وبمخرج ( الامر) ، كمال عبيد وزير الاعلام الاسبق والقيادي الكبير في الحزب الحاكم

عشان كده يا حبيب نحن بنكره وبنحارب الكيزان، ولو باضعف الإيمان وهو الكلمة.
لأن الإنسان عندهم ما عندو قيمة إلا لما يشيل سلاح.

أظنو كان قاصد حيوان ( منوي ) وهو أصل الانسان ..
لقيتوني كيف .................

الأخ المسلمي .. تدنى أخلاقي لرجل يفترض أنه صاحب مسئولية .. خاصة الاعلام .. عليه أن يعيد النظر في كثير من الأمور لديه ..
وجميل من الأخ عثمان أن يرد عليه بمثل ما قال ..

الاخ العوض المسلمي

تحياتي


هي بلا شك ذلة لسان من اخينا كمال عبيد

وعليه ان يعتذر للاخ عثمان ميرغني



وللذكري فان الاخ عثمان ميرغني من قيادات الحركة الاسلامية الطلابية في مصر في اواخر سبعينات القرن الماضي وبداية الثمانينات


ولعله بذلك يكون معاصرا لكمال عبيد الذي كان من قيادات الطلاب بالعاصمة في تلك الحقبة


والاخ عثمان ميرغني حاليا من قيادات الصحفيين وهو كما اعرفه علي التزامه بالخط الفكري للحركة الا انه يمثل تيار اصلاحي وسط الاسلاميين نهجه النقد

والنصيحة والشفافيةوالمكاشفة

Quote: وهو كما اعرفه علي التزامه بالخط الفكري للحركة ا

و ماذا ان لميكن ينتمي لتيار الحركة الاسلامية..هل تصح الشتيمة في حقه؟
اذا كان هذا اسلوب و لغة (دكتور) و مفكر..فكيف هي لغة ما دونه!؟؟
ان تصدر هذه اللغة من شخص عادي ممكن نقول زلة لسان..ولكن من وزير ثقافة سابق و دكتور و مفكر؟؟؟
لا عجب انحدار البلد للقاع.

سـلام يا شيخ العـوض..
فعـلاً الغريب هـو استغرابك لما قاله كمال عبيد.. لا أدري هل غضبت أيضاً لوصف البشير وفي الهـواء الطلق وعلى هواء التلفزيون للجنوبين بالحشرات، ولمالك عقار بالتور.. ام لوصف قوش لأعضاء الشعبي والشعبية بالعواليق.. والتكبيرات والتهليل الذي كان يلي كلام البشير وقوش من مريديهم، وبل وتلقف حتى قادة الحزب لجملة الحشرة الشعبية وترديدها وكأنها قرآن منزل.. ما قاله كمال عبيد وغيره وما سيقوله البقية هو إمتداد لمنهج إحتقار الإنسان والإحساس بالفوقية وأنهم إنما حصلوا على السلطة كحق وإصطفاء خاص بهم ويجب على الآخرين فقط التسبيح بحمدهم آناء الليل وأطراف النهار وأجعص آخر فقط ينال من ما يرمونه لهم من فتات موائد فسادهم...

حاجة غريبة جدا والله

Quote: اها يا جماعة الخير تصدقوا او لا تصدقوا ؟! الكلام ده ( أمشي .. يا حيوان .. ) قالها بالفم المليان وبوضوح الحروف وبمخرج ( الامر) ، كمال عبيد وزير الاعلام الاسبق والقيادي الكبير في الحزب الحاكم ، قالها لمن ؟ للاستاذ عثمان مرغني الكاتب والصحفي المشهور ،

أخونا المسلمي يفترع خيطا كاملا لتقريع شخص لأنه قال ما قال أعلاه
لغاية هنا الكلام جميل ويحسب لصالح سيد البوست ولكن عندما دخل أخوه واصل على ليستفسر
أين ومتي قال هذا الكلام كانت المفاجأة:

Quote: بعد نهاية البرنامج يا واصل كما جاء في عمود عثمان ميرغني اليوم ،

والله لغاية قبل سؤال واصل كتا معتقد أنو أخوكم المسلمي سمع الكلام دا بأضانو
قياسا على غضبته وأحكامه التي دلقها في البوست قبل أن يتضح أنه (أي سيد البوست) مجرد
متبني لكلام قرأه في الجريدة .

شكرا زياد جعفر علي المرور

حباب شيخ عمر ابو الصديق
الزول ده كلموه يقع ليه يوم في زول حمقي يبعجه بالسكين :)0

حباب صلاح الفكي
فعلا عثمان ميرغني كان رده معقولا
تخيل لو غضب عثمان وكفت الوزير !
في ناس بعملوها يعني ما كل مرة تسلم الجرة ؛)

اهلا بدرالدين وحبابك وتاني عليك ما تفسر وانا ما بقصر ؛)

اهلا العوض الطيب
يا رجل الاستغراب من وزير سابق وقيادي كبير يتلفظ بهذه الالفاظ لمجرد ( زرزرته ) في برنامج تلفزيوني !
الناس دي ما بتتعظ ولا شنو !؟

الأخ العوض المسملي

تحياتي - حرم يا زول القصة دي بقت كل يوم بتضيق والنماذج كثيرة . لكن في التراث الشعبي السوداني زي الكلام دا موجود بس كلما كبرنا ووعينا تلقاها متلاشية حيث قال أهلنا الكبر حسنات وفي هذه الغلطة لكمال عبيد ما يجعلنا نحن في هذا المنبر نتحرج من مثل هذه السلوكيات والعبارات التي لا تليق بنا البتة !! لكن في البيئة العامة لنظام الإنقاذ هناك شينات كتيرة منكورة بالطبع . يعني مثلاً في نائب والي لولاية الخرطوم كان حالته صعبة في الأداء العام ويوم دخل عليه واحد في إطار العمل العام وقام نائب الوالي تلفظ ليه بكلمة كدا فما كان من صاحبنا إلا شال نائب الوالي فوق ودق بيه الدلجة , القصة كانت في التسعينات ويا الله حتى الحجازين فرقوهم!!

الحمد لله إنه عثمان ميرغني ما كان شايل معاه دوا الحقارة زي ما بقولوا ناس سوق ليبيا ( السكين ) كان قبيل الدم دفق وسال . والحمد لله إنو هناك منبر عام للتنفيس عما يستفز مشاعرنا .

بحيراوي

Quote: الحمد لله إنه عثمان ميرغني ما كان شايل معاه دوا الحقارة زي ما بقولوا ناس سوق ليبيا ( السكين ) كان قبيل الدم دفق وسال . والحمد لله إنو هناك منبر عام للتنفيس عما يستفز مشاعرنا .

[ شكرا اخي بحيراوي وفعلا دواء الحقارة هام جدا ههههههههه