اكلنا قراصة حميد....صور ..

لم اكن ادرى او يدور بخلدي ان تلك المحادثة كانت ستكون المحادثة الاخيرة لي مع الصديق الراحل صاحب ..نورا ..وعشوشة وست الدار الشاعر الكبير محمد الحسن سالم حميد ...فقد هاتفني حميد من نوري للتحية بعد عودتي للوطن من لندن .. فدعوته لزيارتي وزوجي في دارنا عند حضوره من نوري الى الخرطوم فقال لي بلهجته السودانية الشايقية المحببة ,,,ايوه بجي بسلم عليك وعلى زوجك لكن تعملي لي قراصة بالدمعة ومعاها بصل وشطة وجرجير وما داير حاجة زيادة ....واضاف حميد بمرحه المعهود ....لكن ما تكون قراصة بنات بندر دايرها قراصة زي البعملنها لي اماتي وعماتي في البلد وعلى ذلك تواعدنا ان نلتقى ... وبعد تلك المهاتفة بىيوم واحد كنت مع اصدقاء وصديقات بمعية شابات وشباب نودع حبيبنا حميد الارض التي احبها .. بمقابر الحاج يوسف الفقيرة التى تشبه حميد.

رحم الله حميد رحمة واسعة وألهمنا الصبر في فقده الجلل

فقد كان خفيف الظل مرحا ، يدخل السرور في نفوس كل من يمر به

هاتفته مرة حينما كان يقيم في مكه فابتدرني قبل التحية والسلام :

( انا عايش في مكه ، وزي ما عارف يا صلاح مكه دي ما بيدخلها أي زول )

في إشارة منه إلى أنه أكثر مني صلاحا وورعا ، أرجو ذلك وأدعو الله

أن يسكنه الفردوس الأعلى من الجنة

حتما سيشفع شفع العرب الفتارى لحميد

حتما سيشفع حمتو لحميد

حتما ستشفع عيووشة لحميد

وكل الغلابة الذين جعلهم قضيته الأولى

سيظل مقعد حميد في قلوبنا شاغرا

لنا الصبر أختي آسيا ربيع ولحميد الرحمة

الحبيبه اسياء الله ما يسهد ليك عين
ولا يوجع ليك قلب
ما ح اقول ليك ربنا يجعلا اخر الاحزان
لانها سنة الحياه
لكن الله يصبر قلبك يا نبيله
القراصه دي كانت غداء
عيونك طالقت النوم
يا خيار القوم


ارحمي روحك شويه وانشاء الله انتي وحميد بدل قراصتك
هو يعزمك طير جنه
كوني كما انتي

يا قريبه حميد ما مات
حميد شقاء
وحميد تعب
حميد ظلم
حميد الم
حميد وجع
حميد بكاء
حميد فرح
حميد مطر
حميد رجا وحميد امل
حميد بزر اندفن في حشي الو جع الانتي مسهدك النوم

وعندما التقيت بعض الاصدقاء المشتركين ..عركي ..قدال ...احمد عبدالوهاب وازهري محمد علي وعصام عبدالحفيظ ..خطاب حكيت لهم عن تلك المحادثة ..اقترحت عليهم ان نلتقى في رحاب صديقنا حميد ونأكل قراصته وفي دارنا .

عصام عبدالحفيظ

احمد عبدالوهاب

اخي ديامي
لك التحية والف رحمه ونور للعزيز حميد

العزيزة .. عفاف أبو حريرة
لكى اعزازى واحترامي عدد طوب الارض

قاسم ابوزيد يحي فضل اللة الولد ربيع اسيا امنة امين
وتأكدت الفكرة اكثر عندما دعاني الصديق والزميل المسرحي خطاب حسن احمد لحضور ورشة بروفات عمله الضخم ...عم عبدالرحيم ..والذي قدم في حفل تأبين حميد في استاد المريخ ..فقدمت الدعوة لفريق الممثلات والممثلين الذين قدموا العمل والاصدقاء..صوصل وامنة امين ومجموعة الشابات والشباب الممثلات والممثلين ....وايضا اصدقاء الازمان الجميلة يحيى فضل الله وقاسم ابوزيد

رحمة الله على صديقنا حميد
له الرحمة والمغفرة
تعازى لاحمد عبدالوهاب
وعصام عبد الحفيظ
ولك يا صديقتى الابدية

واليوم مساء وبدارنا التي ازدانت بهؤلاء الاصدقاء والصديقات..اكلنا قراصة حميد بحضور ابوعركي البخيت وازهري محمد على وخطاب واحمد عبدالوهاب الذي غادر الى المطار مباشرة الى هولندا وعصام عبدالحفيظ. جاء ايضا يحيى فضل الله وامنه امين وصوصل والصحفية سهير عبدالعزيز وشمت محمد نور( وغناء جميل للراحل حميد بالعود ) وكان الشباب والشابات الذين قدموا عمل عم عبدالرحيم ..حضورا . نعم التقينا كلنا واكلنا قراصة حميد ...بخمج ناس المسرح ووقار الشعرا والفنانين فقد كانت وجبة بسيطة شهية تشبه حميد

كان من المفترض ان يشارك في جلسة قراصة حميد الصديق الشاعر قدال ولكنه اعتذر لظروف خاصة وايضا الصديق الشاعر هاشم صديق الذي سافر الدوحة فلهما التحية .




خطاب والصحفى طاهر محمد على يوم رحيل حميد .. مع هاشم صديق.. نواسي بعضنا البعض في رحيل النوار خلسه ولسان حاله يردد: قدرك تقيف فى العاصفه منصوب الشراع مكتوب على سكك السفر تعتر على نصل الحصى

سلمى يا سلامة
فقد كان اليوم حقا يوم حميد ..اكلنا القراصة بالدمعة والجرجير والبصل والشطة تماما مثلما طلبها صديقنا حميد .

لو لمى فيكم حميد كان ضحك ######ر من القراصة(التيك اوايي) كل زول بي قراصتو
القراصة لوما بقيت خمج وصحن كبير اليدين كلها اطاقشت فيهو شن فايدتها
القراصة دي ماكلنها في نيو جيرسي
تسلمي يا حبيبتي وقريبتي العزيزة روح حميد ظالاكم والكل مبتسم لانو روحو معاكم
لكم الف تحية وتقبلي سلام ومحبة هاشم صديق

الأستاذه آسيا،
من يوم رحل وردي، ووراهو [قشريد]*، وهديبي لصيص حدّادّو..
قراصتكم دي ولمت السمحين ديل، شويي خلتني اتوازن..
أريتني كت معاكم..
-
بجي راجع لي تعليق السني بتاع القراصه التيك أوي، ومسكة عركي لي فقشت البصله!
-
شكراً ليك..




* ده أسم دلع شايقي!

شكراً آسيا على البوست الوفي وجمع المبدعين,

أقمنا تأبين حميد في الرياض وكان الجميع بعيون الدمع يرثون راحلاً مقيماً

تحياتي

أحمد الشايقي

رحم الله المغفور له حميد
رحمة واسعة بقدر عطائه وحبه للوطن وأهله.

وشكراً على هذا الوفاء وأهل الوفاء، ولمة الأصحاب والأصدقاء من أهل الدراما والغناء والشعرفي رحاب داركم العامرة و"قراصة حميد".
وزي ما قال السني ( سامعين ضحكت حميد عليكم) !

تعرفت على الراحل حميد وسط اصدقاء وصديقات جميلات وفي زمن جميل قبيل انتفاضة مارس ابريل والذي كان حميد احد صناعها باشعاره التى كان يغرد بها في المنتديات فكانت زادا لشباب الانتفاضه وبها امتلأت دواخلهم ثورة وخبزا وسلام .

سلامات منوت
حميد ما مات مدام في اوفياء زيك
شمت والمجموعة ويا مطر عز الحريق

اخي محمد عبدالرحمن محمد( الشايقي )
نحن سعداء بان استرجعنا لك ولو قليل من الفرح .. رحم اللة كل مبدعين هذا الوطن الجريح .. تحياتى

السنى الجميل
تعرف عركى بعد اكل قال لي واللة يا اسيا حميد دا اتلوم معانا شديد .. قلت ليهو كيف؟ قال لي مش كان يطلب كبدة وشيه وحبة سمك كدة مع القراصة دى .. تحياتى ليك والاسرة الجميلة وللاستاذ الجميل هاشم صديق ومبروك نجاح اليوم يا سنى يا فنان

يا بت ابوي كيفنك ياخي
دة وجع لا بيموت لا بيفوت

كنت اقول انني تعرفت على حميد بعمامته التى تشبه عمامات ائمة الشيعة ...حسب وصف اسامة الخواض..في منتديات وبيوت الاصدقاء المشتركين ...كان حميد باذخا مثل اشجار المانجو وسامقا مثل شجرة نخيل ..وكان الوطن وقتها مليون ميلا مربعا بل كان اكثر... كان به الاف اللغات والقبائل وكان هناك عميري وقدال وهاشم صديق ووردي وتحية زروق تمثل في المسرح القومي وشرائط ندوات نقد يتدوالها الشباب والشابات في الجامعات وصوت مصطفى سيد احمد يتسلق جدار الوطن من همشكوريب لراجا . كانت اذاعة الحركة الشعبية لتحرير السودان تنطلق كل مساء لتبشر بالسودان الجديد وجون قرنق يرسل ازهار وحدة السودان كل مساء

اخي العزيز احمد الشايقي
سلامات وتحياتى
.........................................
كان حميد ورفاقه شعراء ومبدعين ذاك الزمان مشروعا وطنيا ديمقراطيا حقيقيا ..وكان سيكون راسخا لو احسنا صنيعا بان نجعل جذوة الانتفاضة متقدة ...لكن جاءنا ليلا طويلا ..فتبعثرنا في جهات الارض الاربع ومنا من ادخل جوف الارض للابد .

سويتي من الموت جمال ... شكرا اولا لحميد
وشكرا ليك يا اسيــــــــا

معتصم ود الجمام

Quote: سويتي من الموت جمال ... شكرا اولا لحميد وشكرا ليك يا اسيــــــــا

مشهد من الزميل الجميل صوصل

وقد اصر والدي ربيع ابشر ان يكون حضورا رغم المرض برفقة شقيقتي نادية و اتصل تلفونيا زوجي صلاح الامين مرحبا بالحضور وهو على بعد الاف الفراسخ من الوطن

رحم الله حميد شاعر الغلابة وحتى فى أمنياته الدنيوية لا يطلب الأ ما يأكله أهله الفقراء.

وأمد الله فى عمركم وأنتم تخلدون ذكراه وتدعوا له بصالح الدعاء.

لك التحية وأعلم مدى حبك للناس ولدكتور صلاح ألف تحية ومن معك.

تحياتى لعم ربيع وألأخوات.

يا له من دفق حنين والق اليق تذدهي به جنبات هذه الدوحة الاسيوية الربيعية

شكرا اسيا لانك منحتنا ان نرى الحزن في عيونهم ... فهو حزن نبيل.


البوست دا دوحة جمال.... الرحمة وكل الرحمة للكبير فينا دوما حميد.

شكراً آسيا على البوست الجميل
حلاة ناسا..سماح ناسا..بلا السكر صحن قراصه في قدحاً من الدبكر
والله دا احله ناس ابوعركي + احمد عبدالوهاب + وازهري محمد علي + وعصام عبدالحفيظ +خطاب + يحيى فضل الله + وقاسم ابوزيد
كاني فطرت بي قراصة بالدمعة ومعاها البصل الابيض وقراصه 2 بوصه وشطه كاربه ولمه ناس كتيرين واكلنا لحدي ما شبعنا وحبسنا الفطره الكاربه دي بي شاي تقيييل
دي لحظات متتعوض هى اجمل لحظات الايام اللي بترووح عمرها متتعوض خالص وتبقي ذكريات جميله


أه ياولد يافارس الحوبة القديم

يانار بتحرق في الجسد

ما حان زمانك للرحيل

كفين تفوت نادوس تموت

أه ياولد يافارس الحوبة القديم

يانار بتحرق في الجسد

أه ياولد أه يانورا أه

أه من خوازيق البلد

كيفين تفوت حميد تموت

ما حان زمانك للرحيل

لكن أقول أحدآ أحد

كفين تفوت نادوس تموت

أرجع أقول أحدآ أحد

أه ياولد يامدرسة كل الغلابة الكدحين

عمل تربله ومحسينين أه ياأسد

يانار بتحرق في الجسد

سبت البلد وطين البلد وناس البلد

لليله ست الدار تفتش في ولد راح الولد

أه يابلد كيفين تفوت حمد تموت

أرجع أقول أحدآ أحد

ياولد يافارس الحوبة القديم

يانار بتحرق في الجسد

يانار بتحرق في الجسد

اخي العزيز .. يحي ابن عوف
لك التحية والتقدير
تعرف لحدي امباارح كانت الونسه في اليوم الجميل دا
اصلو روح حميد في اصحابو الاوفياء

اخي الكريم الخير محمد عوض .. لك تحياتى

Quote: شكرا اسيا لانك منحتنا ان نرى الحزن في عيونهم ... فهو حزن نبيل

دموع حزن عميق من الصديق ازهرى محمد على

الجميل اسماعيل عباس
تحياتي
كان يوم جميل يشبه حميد .. شاركة الصديق العزيز ( جدو ) لاعب الاكروبات .. بشكل جميل جدا ادهش الجميع





علي فكرة دى طماطم يا سمعه



دهشه كبيرة واعجاب من بابا ربيع

طارق ود عمي جبريل ( له الرحمه ) كيف حالك
بالفعل لا بيموت ولا بيفوت

الف رحمة و نور تنزل عليه ....
اسيا ربيع ...بوست جميل و محضور
ان شاء الله دائما ديارك عامرة بلمة الأحباب
تحياتي و تقديري و شوقي

من
قيل الشعراء لا يموتون ؟
لذكرى " حميد " أن تكون حية ، ناعمة الحنين ، فرائحية بطعم المحتفى به ،الحاضر الغائب ،والذي اعتاد أن يُدلل أبناء وبنات السودان بمحبته المغموسة في دلال مُحبب .لتكُن دائماً الملفات في ذكراه مكنوزة بالمحبة التي أخذت أنفاسها منه .
لك من الشكر أجزله أستاذ ة آسيا
والتحية لأهل هذا الملف المكنوز بالصور .

*

الصديق العزيز راشد سيداحمد .. كان حضور انيق من عاصمة الضباب ( لندن )
آسيا يا صديقة كنت محتاج لى لمة زي دى عشان أفك حِدّ الروح وشيلة الحفة فى التربال العجيب خلقة.ء الولد دا ما ولدت نصاح، وأجزم وأنا بكتب الشعر.. جنس رطنيهو الفصيح دا لا جن لا إنس حيسوو زيو غايتو نفسو وريحتو حتلازم البنكتب بعدو لي زمناً زمين نزلى الكلام المرفق فى خيطك دا لأنو النزل قبال كده تم ليه تعديل بسيط ومهم. الأول إنكتب بين الدموع فى تاني يوم، ما راجعتو ما تمرتو زي ما بقول حميد هسع يتوارى لى كضب كضب إلا لو كلكم أصحابو قلتو مات.. يانى المصدق حدسكم بس بشوفو يتاوق مرة مرة من صريف الروح ... ويعاين... أقرب أقول ليه وههه... إلا خايف الناس تقول عليّ جنيت ليكى التحايا يا صديقة ولي صلاح لمان يرك فى ضلكم من رحلة الشتاء والصيف وسلامى لى جدو .. راشد




يا حُمّيد....إتْ بِىّ صُحّكْ؟
(نشيج الترابلة)

آ مُحُمّدْ شُفتا كيف؟
شُفتا كيف النيل مِحُومِر بالدِمُوع
والجِرُوفْ آضراعى جتّ صِبّحَتْ تَعِيسِىّ؟
والعَبّرة زي مُهراًّ يناتِق في الضِلُوع
والدنيا ضَلّمّا وطلّطَمِيسِىّ؟
آ مُحمّدْ شُفتا كيف؟
شُفتا كيف الموت بعّزِلّ فى نِخيلاتْنا البيلدِنّ
وتراهُوّ صايِّلْ... يعقِرّ الخيل البِسُبْقِنّ،
ويَحرِّمّ القمّرا الطِلُوعْ
وبى مُبْردّ الأسى والوجِيعَةْ
يَسِنّْ مناجِلّْ الهَمّ وسِكِينْ الفجِيعَةْ
ويَحش تميرة كبدة الأمات...
حَشّا التَربّالة ... والطَمّبَارا
والقُمّرِىّ البِنوِّح في الفِرُوعْ
موجوع ... يقوقى عليكا بالحى ووب
وشايل الحفّة .. متكنّدكْ رماد (نورى الجِريفْ)
آ مُحُمّد شُفتا كيف؟
شفت كيف ....
الموت يِقصقصْ هامة النَخَلَّ البَحَرسْ القِيفْ
وشُفتُو كيفِنّ يتاتى خطاك فوق درب المِحَنّ؟
يتلّهمكِ بالهَمّ ... يدُودّر فِيكَا......
ويا المحبوب .... إيّا مُودِيكَا
للسِكِة القصِيّى ....
لا إترجاكْ تناغِمّ لِىّ رفاقتك .. ضُمّةْ
ولا خلاكا بسّ تَكْتِبّ وصِيّي
ولا عُقُبّْ فَطّمْنّا كيف يبقى الرِجُوعْ
آمُحُمّد شُفتا كيف؟
شُفتا كيف ...
في ثانية زىّ لمّحْ البصرّْ
(عم عبد الرحيم في السِّكة إتلافَّا القطّرْ)*
وفي الدُنيّا (اِتشايّعْ خَبَرْ)*
والحِكْمّة بى نَفْسَّ الأمُرّْ
وإنتّا في سِّكة سَفرْ
تلّفَـاكَا عربِيةَ (الكَجْرّ)*
شان تكتمْ الغِنوّة فلِهاتَكْ
وينْرّشَا دمّك فوق حَصَى (الشِّريان) نزِّيفْ
وشان رِويحتّكْ غِيمّة فوق (نادُوس) تحَلِقْ
وإنتْا إصّلكْ زى دُعاشْ فى كتمّة
أو زى نسّمَة مرّتْ
في لهِيبْ سَهراجْ وُحَرّ
وإنتْا ... جُغْمة مُويّ باردِىّ
لىّ غلابا ومُتعَبِينْ والدُنّيا صِيفْ
وإتّْ تكِنّكْ ود ندِيهه
أو تكِنّكْ كُنتا في بِينَاتنا ضِيفْ
آ مُحُمْدّ شُفتا كيفْ؟
ناشدكْ .. مُحُمّدْ .. يا رفيق الهم ..
عقيد الشعرا ...مُشّهاد الحيارىّ
قَبُالّ تفوتنا ولى ضرى الغيمات تَعرِجّ
وفوق خيول الريح تَسْرِجّ
تآجِرّ (نُورا) في فـقدّكْ
تصّبِر (شُفّع العرب الفتارى)
بى (رٌقيّة) من فرحك تفك (حزن الصحارى)
ويستريح وجع الفقارى
وبى كفك الأخضر تقشقش
دمعة الشعب العفيف.
وعليكَ البِينِا يا حُمّيد ...
أفتحْ ضلفّة الرُوحْ الشَفِيفْ
وبي الراحة تاوِّق بين صَرِيفْ قلبكَ ... وعايِّنْ
البِنّبلع فِيهو عِبّرة؟
ولّا عَبّرة؟
ولّا جمّرة؟
ولّا سِيفْ؟
آ مُحُمْدّ شُفتأ كيفْ؟
بِى وراك يا دُغرِىّ يا زُولْ ياشريفْ
مِسْختْ علينا الدِنيِىّ ....
إصّلُو الدِنيِىّ ماليِيها العّفن والزِيّفْ
وكُنّا راجين يا عَشانّا
تحضّرْ جدِيدنا آ ود حَشَانّا
بى أِيدْ تبشَّر للبِرُقصِنّْ
وبى كفّ تتمِّر خَدّ غُنانّا
وتضوِىّ بى حرفّكْ سمانّا .. وبالنشِيد تسنِدّ قفانّا
وتطيِّبَ الجُرِحّْ النزِّيفْ
آ مُحُمّدْ شُفتأ كيفْ؟
شُفتا كيف إتْيبسّ الغُّنا .. فى حِلوقنا
وما فِينا زولاً... قِال ... نَطّق؟
بندهه رفاقتك جُملة يا تَرّبال
يا خِيّرى يا عاطِف....ويا أبو الحااااج..
ويا قدّاااال.....
والكعو بالصبر ألفوفنا يا زمّاااال
ود عثماااان ويا مَحجُووووب ...
يدا الآسِرنا بى (إسّرَ الوِلِفّ كتّالْ)*
ياشِغِيلة ... يا كلّاتة... يا عُمّاااال…..
كيف عِرقَ القصِيدة يَطُـقّ؟
وتحرِّنْ ضُمّة ... يا طبلَّ الحقيقة تدُقّ؟
وا مِغِيسّتنّا يا حُمّيد..... وا غبينتا
(كُمْسيدَ الغبِينّة بِشُقّ) (كُمْسيدَ الغبِينّة بِشُقّ)*
و(كُمْسيدَ الغَبِينّة) الليلِىّ،
في جُوفَ المِهيرِيّات لهِيبُو يبُقّ
حُزُنّ كُوفّتْ مسايِر القمّرا بالفجّعة
ونبحْ دِنّقِرْ وجعّنا يدُقّْ
خلاص آضراع؟
خلاص آخيِىّ؟
قفانا قِمِحّ؟... عشمنا حِرِقّْ؟
وساس غُنواتنا فوق موج الدمِيّرة غِرِقّْ؟
سكت حس الغنا الهداى؟
وإنبكمّت لِهاة البُوحْ؟
وإتشلّع ضرى الأحلام
تِحِتْ مطر العوِيلّ والنُوحْ؟
وإنجَرّح حلقْ قُمْرِيِّى
جانى حِسِيسا زي مبحُوحْ
وعِرّق الشِّيمة شال الشُعرا
وإنغّرغّر غُنانا الكُنّا بيكْ ساندِنُو..
لِحِقْ الصُّحْ؟
وطشت فى بحور الهم سفينة نُوحْ؟
وخلاص يا الكُنّا (ِنّترجاكَا)* يا تقنت (عشّم باكِر)*
غنانا يَسيل بَلّا مِرّتِقّ؟
وفوق بحراً هوايلو كُتُر
نشِيلّ صَفّحِةْ شُرَاعنَا غَرِبّ
تجينا النّوه هابِىّ شَرِقّْ
وا مِغِيسّتنا واغبِينّتنا ياحُمّيد،
( كُمّسيّد الغبِينّة بِشِق)*
و ( كُمّسيّد الغبِينّة بِشِق)*

راشد سيد أحمد الشيخ
22 مارس – 18 أبريل 2012

*أصداء من قصائد للشعراء حميد، محجوب شريف، قدال وعاطف خيرى

يا سلااااااااااام عليك يا ستنا يا زوق

حميد عايش داخل كل سودانى اصيل

يا اصيلة يا بتى بلدى يا اصلك سودانى

التحية لكم جميعاً

ولكى الشكر اجزلة يا ملكة

Quote: لو لمى فيكم حميد كان ضحك ######ر من القراصة(التيك اوايي) كل زول بي قراصتو القراصة لوما بقيت خمج وصحن كبير اليدين كلها اطاقشت فيهو شن فايدتها القراصة دي ماكلنها في نيو جيرسي تسلمي يا حبيبتي وقريبتي العزيزة روح حميد ظالاكم والكل مبتسم لانو روحو معاكم لكم الف تحية وتقبلي سلام ومحبة هاشم صديق

اسيا ربيع .......سلام لاهكمى لادكمى
السنى الفقر الثمين
بالله شفت حنكشة قراصة بنات اللندرة ؟ و عاين حلاة بصيلة عركى ماسكه زى المايك بالاييد الشمال!!
اقول ليك كلام يا السنى وحات الركز الارض معبد وسوى الفاس أو الناس عليها مقام (كلها صحيحة)
لا تثريب على اسيا ولا جناح على عركى وإن فعلوا
انت عارف يا صديقى موت حميد ده خلا الناس تتمطق بى جلد مصنوع اى شى فيه نفس حميد وطعم صوته وحلاة غناه
بصيلة، قراصة، وجع ترابله، غناء همباتة، نشوق ودمر رعاوية، جرف طين، صوت بابور، حسيس ساقية.
شقيق كرعين ترابلة، عرق عتالة..
موت حميد عبرة ليس للذين لا يرون فى الموت غير الموت ، اتمنى ان نقرأ حميد كل يوم فحميد بعث
من جديد ..
تصدق يا السنى كل يوم حانكتشف حميد اكثر وكلما حفرنا فى روحه سوف نرى عجبا..
اسيا ربيع شكراً جميلاً ان جعلتى ذلك ممكناً اتمنى من كل مجموعه ان يفعلوا ذلك كل جمعه
يتلمو فى بكان بيت ، رحلة، قعر شجرة ، نادى، ويعملوا قراصة حميد ويقيموا ويقرأوا اشعاره فمن مثل هذا
تنطلق رصاصات الخلاص ،اقرأوا حميد تدبروا فى أمر الوطن وسوف نكون ويكون الوطن
وكما قال حميد وطنى البموت وبخلى حى وخلف قراصة حميد استوا اعتدلوا ساوا بين الصفوف
فقد قال حميد من ضمن ماقال : كلها كمها الرباطة ونحن كتار،،،

Quote: لو لمى فيكم حميد كان ضحك ######ر من القراصة(التيك اوايي) كل زول بي قراصتو القراصة لوما بقيت خمج وصحن كبير اليدين كلها اطاقشت فيهو شن فايدتها القراصة دي ماكلنها في نيو جيرسي

يمين الله .. السني ده قال الكلام الدخلت عشان أقولو ....

قال ليكم عايز قراصة تربالة ...... ترباااااالة يا حناكيش.

آسيا كيفنك ... لمتكم جميلة وتبغّر.

لك الرحمة يا حمّيد.

Quote: الف رحمة و نور تنزل عليه .... اسيا ربيع ...بوست جميل و محضور ان شاء الله دائما ديارك عامرة بلمة الأحباب تحياتي و تقديري و شوقي

لمه جميلة يا رائعة
ملمومين في خير وعلى خير ان شاء الله
رحم الله الفقيد ..

شكرا لاشراكنا في الحدث عبر الكلمات وجميل الصور
حبابكم لمه ورقي و خطوات ,,

______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور

ترحيب حار بالاصدقاء والصديقات المبدعين
وهم يحتفون بقراصة حميد في دارنا ..وحميد شخص يستحق فعلا الاحتفاء

وسعدت جدا بالمشاركة عبر الاسكايب من البعد وشاهدت وتحدثت مع بعض الحاضرات
والحاضرين .

عندما نمت الفكرة ...فكرة قراصة حميد وعرفت من اسيا وان المدعوين هذه الكوكبة الجميلة وبهذا
العدد من الصديقات والاصدقاء ابديت تخوفي في ان صالة الشقة قد لا تسعهم ..لكن اسيا ردت بان

ناس المسرح ما عندهم مشكلة ..كلهم بدفسوا في الارض ...

وفعلا وزي ما شايفين فقد افترش هؤلاء الشباب والشابات ارض دارنا

وجلسوا باريحية سودانية تشبه سيدنا حميد ..
وبكل اريحية وحب وهم تقاسموا قراصة حميد ...



شكرا لهم وشكرا لهن.





















فلهم التحية كلهن وكلهم

Quote: ترحيب حار بالاصدقاء والصديقات المبدعين وهم يحتفون بقراصة حميد في دارنا ..وحميد شخص يستحق فعلا الاحتفاء

د. صلاح.................سلام يا ابناراً تولع للضيوف تقابة
يا دكتور وحات الخلقنى وخلقك ما انسانى شكرك الا الشياطين ..
اقصد شياطين او شواطين الابداع الاتلموا فى دارك فقد تنادوا من كل عبقر
ليتحلقوا حول روح حميد..
غايتو يا حبيب معليش بقت عليك : صلاح يجقلب والشكر لمقصوفة الرقبه الما تسماش لووول
لكن برضو اسيا وحاتك قدرها وقدود تعوض غياب الف راجل
ربنا يهنيكم فى داركم العامرة وحاتك كان جو الف زول تانى تشيلهم
اصلو وكتين القلوب تبقى ماهلة البمبر ببقى اوسع من عنقريب جرتق
شكرا صلاح واسيا من تانى،،،

سلام يا آسيا وسلامات لضيوفك الهنا و الهناك
كنت ومازلت انظر بعين الفخر و الإعجاب لتجربة صديقي مجتبي محسي وصديقتي سهام المجمر
في تخليد زكرى ابنتهما الراحلة غادة بجائزة غادة للكتاب المتميزين التي تقام كل عام،
ومصدر فخري و اعجابي هو ان التجربة كانت رائدة و جديدة وحولت طاقة الحزن السالبة لعمل
ايجابي مفيد.

دحين دمعتك وقراصتك وبصلك ديل مع خميرة روح حميد وباقة الشعراء و الفنانين و المسرحيين
و الموسيقيين و الأدباء المعاك ديل ممكن يكونوا نواة لعمل كبير يحمل اسم حميد ويخلده للأبد
و يعرف الأجيال الجديدة بحميد الإنسان و حميد الفنان و حميد التربال و حميد الشاعر، و الأهم
هو اضافة لون قوي جديد في خارطة الفن والإبداع في السودان والتي اصبحت باهتة و فقيرة بفعل
اعداء الفن و الفنون الذين يرعبهم القلم الجهور و الوتر الشجي و الريشة البهية.
عليك الله كلام صديق الموج ده ما ترميهو البحر.

لك السلام المودة والشكر على حزنكم الجميل و ان شاء الله ملمومين في الخير و السمح.

أسيا سلام
حقيقى فقدنا حميد -وردى ونقد
لك المودة

Quote: أسيا سلام حقيقى فقدنا حميد -وردى ونقد لك المودة

الصديق العزيز اسامة الخواض



يبدو انني قد خلطت خلال هذه الكتابة في نسب تشبيه عمامة حميد بائمة الشيعة الى الصديق اسامة الخواض ...وهو ..أي نسب ..هذا التشبيه لاسامة غير صحيح ..ويبدو ان من قال ذلك شخص اخر كتب عن حميد ....
فقبل ابتدار هذا البوست ...كنت قد قرأت عدد من الكتابات...كتبها بعض اصدقاء حميد ومعجبيه ومن بينهم اسامه في نصه الرائع

دمعة على مدارج ماريل الذي نشره هنا في المنبر


فمعذرة لاسامة