جائزة سودانيز اون لاين لحرية التعبير

اقتراح ان تتبني العضوية والموقع في منبر سودانيز اون لاين العام جائزة شهرية او ربع سنوية او نصف سنوية او سنوية ايهما انسب لحرية التعبير يتم منحها لصحفي سوداني او مؤسسة صحفية سودانية وذلك لتميز شخص او مؤسسة صحفية يتعرض للتضيق والحد من حرية تعبيره
وذلك دفاعا عن حرية التعبير والعمل علي تعزيزها في السودان , وذلك مساهمة منا في دعم الصحافة السودانية ليتثني لها القيام بدورها المنوط بها كسلطة رابعة
ونسمع منكم

أُثني الاقتراح
وأرشح الأستاذ فيصل محمد صالح كأول شخصية
وشكرا

شكرا يا ود الصايم علي تثنية الاقتراح

الاستاذ فيصل " الذي تم اعادة اعتقاله اليوم " حفي بالجائزة وبدعمنا من اجل حرية تعبيره ومن اجل الوقوف تضامنا معه ضد الاعتقال وتقيد حرياته , لذا اتمني ان يجتمع الاخرون خلف الفكرة ليتم في بحر الاسبوع القادم علي اكثر توقيت الاجتماع في بيت الفنون او مركز الخاتم او اي جهة يقدرونها منسوبي المنبر بالخرطوم لمنحه درع سودانيز اون لاين لحرية التعبير وتكريمه والاحتفاء به .

إقتراح جميل يا أساسي
و مع تسارع الأحداث الحاصل في البلد دي
إقترح إنها تكون كل 3 شهور

الفاضل عيدروس

شاكر لدعم الفكرة وفعلا تسارع الاحداث في السودان يجعل فترة الثلاث اشهر فترة زمنية مناسبة لتقديم الجائزة

اثني
على ان يكون الصحافي الفائز متمسك باخلاقيات المهنة والصدق في ما يرده من اخبار وتحليلات

بختك .. أخيراً حيتعلق ليك بوست على الأستار

الفاضلة نجاة , بالتاكيد هذا شرط اساسي لذا يجب ان يكون هناك لجنة محايدة من عدة اطراف يتم ترشيحها والاتفاق حولها من عضوية الموقع لاختيار الشخص او الجهة التي ترشحه للحصول علي الجائزة

الانصرافي ملاسي

هذا بدلا ان تقول خيرا في امر الجائزة اتفاقا او اختلافا تاتي للعبث والتندر بالرغم من انك معني بالامر كونك من الصحفيين السودانين !!




ــــــــ
لعلمك
بكري مشكورا قام بتعليق اكثر من من خمسة بوستات سابقة لي اخرها كان مشروع عبد العزيز ضد محمود الحضاري هذا سوى انه دبج من قبل عنوان اولي رئيسي بعد عودتي من غياب طويل بوستا كتبه هو جاء فيه " مرحبا بروح البورد اساسي"
يا مسكين

اثني الفكرة
فالفكرة تتكامل تلقائيا مع دور سودانيز اون لاين في الدفاع عن الحريات
والجائزة ثمرة طبيعية لهذا الدور ويمكن ان تكون البداية بفيصل محمد
صالح كاثبات للفكرة نفسها فهو اهل لها

تحياتي اساسي

Quote: اثني الفكرة فالفكرة تتكامل تلقائيا مع دور سودانيز اون لاين في الدفاع عن الحريات والجائزة ثمرة طبيعية لهذا الدور ويمكن ان تكون البداية بفيصل محمد صالح كاثبات للفكرة نفسها فهو اهل لها

الاخ الشامي تحية

كل الشكر علي التثنية ودعم الفكرة , وكما اسلفت فان الاستاذ فيصل حقيق بالجائزة ونتمني ان تسير الفكرة الي الامام وتري النور

إقتراح جميل ..

أتمنى أن تكون لها قيمة مادية بالإضافة للبعد المعنوي

و ذلك بإلتزام بالتبرع لها بنذر يسير سيصبح كبيرا مع عدد الأعضاء

شكرا أساسي

اثني
تحفيز حراس حرية التعبير ولو ادبيا ضروري في ظل قمع سلطة المؤتمر الوطني

أبصم بالعشرة

الدباب أساسي
قرقرقرقرقر!
مع تقديرنا التام لي لفكرتك، لكن المعيار شنو و الحكم بياتو طريقة ؟ تفكيركم كجلابية صرفة عار، بل نكتة عديل كده، او بعد كل الحصل والحاصل، تاني من جديد، تعيدون انتاج ذات مداخلات انتاج الوعي الذي جعل منا، كشعب ووطن اضحوكة البشرية بحق!
هكذا وعلي مدي نصف القرن الماضي، تحولت شخصية الجلابي الي صنم صغير مفروضة عبادته علي الاغلبية المهمشمة، في كل مناحي الحياة تقريبا، تماما كما هو حال شخصية العربي في مخيلة ذات الجلابي، المستعبد او مسترق بي دورو، الي درجة جعلت من العربي اله عدييييل معبود في لاوعي ذنوجة الجلابة، تاسيا بسيرة جدهم بلال، ومن بعده كافور!
و طبعا جائزتك دي مفصلة أو مطرزة بي منطوق بروتكولات الاستعلاء الجلابي: السياسي الاول جلابي، الاقتصادي الاول جلابي، الفنان الاول جلابي، الرياضي الاول جلابي، الاعلامي الاول جلابي، والمذيعة الاجمل قطع شك جلابية، او راعي الغنم الاول جلابي! ده كلو والجلابة 5% او اقل من السكان!
ياخي الي الجحيم إنت و جائزتك وقبلكم وعيكم الجلابي هذا، الذي اوردنا، ووطننا موارد التهلكة.
دكتور أمين محمد سليمان
ع/ رسول الوعي امون رع كمال بشاشا

بالغت يا بروف


كان تخليه يرشوه

شكرا يا حافظ انقابو علي الدعم

Quote: اثني تحفيز حراس حرية التعبير ولو ادبيا ضروري في ظل قمع سلطة المؤتمر الوطني

الاخ خدر تشكر علي التثنية

تصدق انا علي وشك اكتب مداخلة علي نحو انه الاقتراح ليس علي راسه يساري عشان كدا الدعم خجول ومعظم الناس سردبت وعملت رايحة لكن دخولك الجمني ههههه
تسلم يا خدر

Quote: أتمنى أن تكون لها قيمة مادية بالإضافة للبعد المعنوي و ذلك بإلتزام بالتبرع لها بنذر يسير سيصبح كبيرا مع عدد الأعضاء

لك التقدير اخ محمد قرشي
واقتراح ممتاز ان تتحتوي الجائزة علي قيمة مادية وان صعب تحقيقها في البداية الا ان تتكون لجنة للجائزة تباشر امر استقطاب الدعم المادي لها من العضوية او هيئات اخري وهو امر جدير بالنقاش

منذ فترة طويلة اعاني من اصدقائي الاسفيريين , الي الدرجة التي جعلتني اتوقف في احد المرات من الكتابة في المنبر لعدة اشهر والزهد فيه , فالاصدقاء الاسفيريين لا يميزون بين ما هو جدي وبين ما هو عبثي , الي الدرجة التي دعتني اتفكر واتامل في ذلك الدعاء الشهير "اللهم قني شر أصدقائي أما أعدائي فأنا كفيل بهم"
اخر هؤلاء الاصدقاء صديقي حيدر الزين والذي تأسفت ان يكون ايقافه بسببي حينما دخل الي احد بوستاتي التي لم اقصد بها مزاحا وعلق تعليقا "فجا" كان السبب في ايقافه من الكتابة بالمنبر , ان الهزل مكان الجد كوضع الندى موضع السيف مضر .

شكرا اصدقائي علي مروركم العبثي

ما عبثى ولا حاجة يا اساسي

لكن من لا يستفيد من تجاربه يجتر الندم

لنا تجربة في هذا المنبر مؤلمه

ولك ان تسال نفسك ما هي اسباب توقف الدعومات المادية وبوستات الخير في هذا المنبر
ولك كذلك ان تسال ايضا عن اسباب توقف تنادينا



صداقتك نعتز بها وعن نفسي اعتبرها حقيقية وليست اسفيرية .. ما تعتقده انت عنها شانك

لكن تأكد انها لن تكون ابدا حائل دون كتابت رائي بصراحة حول اي موضوع مكتوب ... حتى لو كان كاتبه صديق


المهم
حا اسالك عن رائيك واحساسك عن هذا الامر بعد فترة لن تكون بعيدة
واتمنى ان تكون عندك الشجاعة حينها ان تبينه

حتى ذلك الوقت

ايوة كدا كويس تكتب رايا ولو سلبيا تجاه الفكرة يكون واضح ومعين لينا بدل من الاستخفاف اعلاه , عموما كل اصدقائي الاسفيرين اعتبرهم اصدقاء حقيقين وان التقيتهم في هذه الاسافير
وانت تعلم ان معزتك خاصة
المهم
الجائزة المقترحة الان ليست جائزة مادية ولو رأيت اعلاه في ردي للاخ محمد قرشي اشرت الي ذلك الامر في اقتراحه
الجائزة معنوية وتعبر عن وقوفنا دعما ومساندة من اجل حرية التعبير الصحفي في السودان وهو مطلب اعتقد مشروع جدا لن يضير احدا ولن يجد كما اعتقد من يقف ضده الا صاحب غرض
بهذه الجائزة نكون قد ادينا رسالة لكل الاقلام التي تواجه من اجل قول الحق انها ليست وحيدة وان هناك الكثيرون الذين يقفون معهم مساندين
نعلم تماما ان المنبر يحتشد بالتباينات الفكرية والثقافية والعقائدية حتي , ولكن نريد ان نثبت قيمة ان مقارعة القلم تتم بالقلم لا بالسلطة
مثلا الان هناك مقترح من معظم المشاركين في هذا البوست بان الصحفي فيصل هو اول من يستحق الجائزة ولا اعتقد ان هناك من يخالف ذلك
انا فتحت هذا البوست اصلا لسماع كل الافكار وكل المقترحات للوصول بهذا الامر الي سياق واضح نلتف حوله جميعا , وحتي ان كانت الفكرة غير قابلة للتنفيذ في هذا البوست متسع لسماع هذا الراي والعمل به اذا كان رايا غالب وفي النهاية هو مقترح اما يقتفق حوله او يٌختلف

مالك يا اساسي عاوز تبقى بتاع لخبته زي المناضلين

Quote: بالغت يا بروف كان تخليه يرشوه

وين الاستخفاف هنا يا اساسي

ده كلام واضح وصريح .. وعشان يكون جادي ما ارفقتو ليك باي وش اخدر .. وانت عارف طبعا انو انا بعرف اسوي وشوش خدر

المهم
انا لسع عند رائي .. مع اني اتمنى يخيب
حا تعدي موضوع فيصل ده .. والموضوع البعدو يمكن
بعد داك بنشوف

مثلا الان في كاتب اخر يدعى منعم سليمان تم اعتقاله وهو زول عبر عن نفسه بحرية شديدة جدا .. وفي ناس خلافك انت وبيان مقتنعين انو الزول ده كلامو صحيح

اها الراي كيف ؟
حا تختو في اللسته ؟!

يا وليد انا عارف حساسية بورداب الخرطوم للتباينات الحصلت حول كثير من الفعاليات السابقة , عشان كدا بورداب الخرطوم ما مطالبين بالكتير في امر هذه الجائزة لا اختيارا منفردا للمرشح ولا دعما ماديا لها , اللهم الا المشاركة في تقديم الجائزة وهذه كانت فكرتي التي كنت ساصل اليها بالنقاش مع الافكار التي ترد الي البوست
وحتي تقديم الجائزة نفسه اذا كان فيه مشقة , يمكن ان يكون اعلانا في هذا المنبر عن فوز فلان الفلاني او الصحيفة الفلانية بالجائزة ويتم ارسال شهادة له بالبريد العادي يعني الموضوع ما لازم يكون حرفي وهو امر معنوي في المقام الاول وهناك الكثير من الاليات التي ممكن ان تتبع لانجاح هذا الامر ولاتقاء اي حساسيات قد تحدث
المهم ان الناس مطلوب منها الان تقديم خمسة مرشحين يتم الاتفاق حولهم بالتصويت من اجل تولي امر الجائزة والاتفاق علي طريقة تقديمها

لو كان امر الترشيح لي لاخترت خمسة من عضوية المنبر ممكن اشتهروا بعدم وجود ميول سياسية او اثنية واضحة وطاغية علي كتاباتهم

امثال الاخ الشامي , بكري , الفاتح ميرغني , خليل , طارق جبريل , عاطف عمر , ملاسي , جمال السنوسي , ابو جهينة , صباح احمد , سلمي الشيخ سلامة ,,, الخ

مفروض تكون لجنة تحكيم يتم انتخابها من البورد هنا بطريقة ديمقراطية
ولكي نكون عمليين مفروض تبدو تطرحوا في اسماء الناس المرشحة للجنة دي
طبعا ليس بالضرورة ان يكون اعضاء لجنة التحكيم من البورداب
بل من المقبول ان يكونو شخصيات عامة مشهود لها بالنزاهة والاستقلالية
تقوم لجنة التحكيم باختيار ثلاثة مرشحين للجائزة مثلا ويتم طرحهم للتصويت هنا في البورد
ونرشح بورداب الخرطوم بالتعاون مع بيت الفنون بتنظيم حفل استلام الجائزة
دي اقتراحاتي واذا ما عجبتكم ادوها البحر وبرضو معاكم ماديا ومعنويا

Quote: مفروض تكون لجنة تحكيم يتم انتخابها من البورد هنا بطريقة ديمقراطية ولكي نكون عمليين مفروض تبدو تطرحوا في اسماء الناس المرشحة للجنة دي طبعا ليس بالضرورة ان يكون اعضاء لجنة التحكيم من البورداب بل من المقبول ان يكونو شخصيات عامة مشهود لها بالنزاهة والاستقلالية تقوم لجنة التحكيم باختيار ثلاثة مرشحين للجائزة مثلا ويتم طرحهم للتصويت هنا في البورد ونرشح بورداب الخرطوم بالتعاون مع بيت الفنون بتنظيم حفل استلام الجائزة دي اقتراحاتي واذا ما عجبتكم ادوها البحر وبرضو معاكم ماديا ومعنويا

شكرا اخي محمد ابراهيم

وهذا الاقتراح والله العظيم علي وشك كتابته في المداخلة التي فتحتها , او رأيا قريب من هذا , كنت ساقترح لجنة مكونة من خمسة اشخاص يتم ترشحهم في هذا المنبر , اختلافي كان مع مقترح محمد ابراهيم ان اللجنة يتم انتخابها من عضوية المنبر من جميع التيارات او الشخصيات التي لا خلاف عليها تتفق حول المرشح بالتصويت ويكون رأيها الزامي لجميع كتاب المنبر وهكذا تتم ممارسة الديموقراطية

فكرة جميلة - أثني

سلام يا أساسي
فكرة ممتازة جدا أرجو إنها تنتقل لحيز التطبيق. و الناس لو تابعت الجماعة الجنهم يكسروا المقاديف ديل يا وليد ما حيعملوا أي حاجة... تتذكر حتى مشروع علاج طلاب دارفور كان أشد المعارضين ليه بعض أبناء دارفور بنفس الأسلوب الأشار ليه أمين دا في مداخلته؟

اقتراح مفيد، وعملى، وممكن، يعنى اقتراح ممتاز

واتمنى ان تشتمل الجائزة على مبلغ مالى يساعد الصحفى فى الاستمرار فى رسالته

الصحافة تسمى السلطة الرابعة كما هو معروف لدى الجميع، وهى الاداة الاكثر اهمية فى مكافحة فساد المسئولين، وفى تعليم الشعب وترقيته

اهنئى الاخ صاحب الاقتراح، واتمنى ان تكون هناك لجنة لجمع التبرعات، وجمع اسماء المرشحين، ونشر اعمالهم التى تؤهلهم للترشيح، وتنظيم استفتاء بين اعضاء سودانيزاونلاين لاختيار الفائز

طبعا يمكننا ان نتخيل ان هذا المشروع قد يبدأ محاطا بالصعوبات والعيوب، ولكن يمكن التغلب على كل الصعوبات بالمثابرة والاصرار

رجاء ان ننسى خلافاتنا السياسية وان ننظر لهذا المشروع وكانه مهم لكل واحد، وهو حقيقة مهم لكل منا، فالاخ المسلم يتمنى ان يفوز من يعبر عنه اكثر، والانصارى كذلك، والاشتراكى واليسارى والانفصالى والوحدوى.

تقدم الشعوب وتقدم الافراد لا يتم بالاستهزاء والاستخفاف وانما بالعمل الجاد وايضا بالمقدرة على احتمال اذى الاخرين

نسأل الله الا نكون من الذين لا يعملون او من الذين يتسببون فى اذى من يعملون

هناك الكثير من الاسماء التى تستحق الترشيح بجانب فيصل محمد صالح، من الصحفيين والاعلاميين الذين يعملون من اجل قضية الوعى

الفكرة ممتازة يا اساسي
وياخي كتر خيرك علي حسن الظن

تحياتنا واستعدادنا ودعمنا

سلام اساسي
بصورة عامة شايف الفكرة كويسة - و بتدي الموقع و المنبر وجود عملي كواجهة اعلامية سودانية -
لكن من حتة تانية شايف انو الموقع و (ليس المنبر) يعمل الجائزة و التقديم - و ممكن يتعمل بورد شرفي للموقع مثلا من قدامي المحاربين والمتخصصين
كلامي دا سببو هو اني شايف المنبر شكلو غير مؤهلا ادبيا بما يكفي لانو فاقد الشئ لا يعطي اضافة للاستقطابات الحادة
الاعضاء يمكن يساهموا في الترشيحات و بعد داك البورد(المجلس الشرفي) يحدد -
الموقع(البورد الشرفي ) ممكن يعمل تعاون او تنسيق مع جهات عالمية لحرية الصحافة

تحياتي و شكرا --

---










يا وليد بالغت !
كلامي امين حركة استباقية ذكية عشان يقتل الدش لبشاشا !
و ما يجي (يبيّض) بالفكرة !
لكن تذاكي امين دا ما بنطلي عليهو !
ممكن يجلي فكرة البوست و يجي يحلل كلام امين باعتبارو مثال لتواطؤ الوعي الجلابي اللاشعوري
للدفاع عن الصدمة المتوقعة !
وين ح تهرب ووووين !

up

يا سماني الفكرة ممتازة وسهلة التطبيق..
نؤيد وندعم ما يخرج به البوست من توصيات..

وهو كذلك ...شكراً اساسي .









...........................حجر.

لووووووووووووب يا اساسى !
والله مافى زول فاهمك غيرى !
احرجك بكرى بتعلييق البوست ...
ما كنت تشتغل بى اصلو بكرى دا بعلللق سااااى !
غايتو البركة فى النعليقة ... تانى لوووب .

قال لها اسكتى ,, وقبل على اساسية قال ليها انكتمى
وضرب اساسى الصغير علقة مبرحة
ثم جر الكرسى وامر بالشاى وقال ليهم البعمل تانى شوشرة
بكسسسر رقبتو .. اريد ان اكتب عن حرية التعبير !!












ـــــــــــــــــ
انت ياغبى ما كنت تدينى ليها انا ..
عشان تورطنى فى قصة الاستلام دى مع البورداب !

اثني الاقتراح

Quote: الدباب أساسي قرقرقرقرقر! مع تقديرنا التام لي لفكرتك، لكن المعيار شنو و الحكم بياتو طريقة ؟ تفكيركم كجلابية صرفة عار، بل نكتة عديل كده، او بعد كل الحصل والحاصل، تاني من جديد، تعيدون انتاج ذات مداخلات انتاج الوعي الذي جعل منا، كشعب ووطن اضحوكة البشرية بحق! هكذا وعلي مدي نصف القرن الماضي، تحولت شخصية الجلابي الي صنم صغير مفروضة عبادته علي الاغلبية المهمشمة، في كل مناحي الحياة تقريبا، تماما كما هو حال شخصية العربي في مخيلة ذات الجلابي، المستعبد او مسترق بي دورو، الي درجة جعلت من العربي اله عدييييل معبود في لاوعي ذنوجة الجلابة، تاسيا بسيرة جدهم بلال، ومن بعده كافور! و طبعا جائزتك دي مفصلة أو مطرزة بي منطوق بروتكولات الاستعلاء الجلابي: السياسي الاول جلابي، الاقتصادي الاول جلابي، الفنان الاول جلابي، الرياضي الاول جلابي، الاعلامي الاول جلابي، والمذيعة الاجمل قطع شك جلابية، او راعي الغنم الاول جلابي! ده كلو والجلابة 5% او اقل من السكان! ياخي الي الجحيم إنت و جائزتك وقبلكم وعيكم الجلابي هذا، الذي اوردنا، ووطننا موارد التهلكة. دكتور أمين محمد سليمان ع/ رسول الوعي امون رع كمال بشاشا

ههههههههههههههههههههه

أخدت الكلام من لسانى يا بروف .


تحياتى للأخضر بللومى أساسى الأساسى .
كامل دعمنا ، مع إننا كالعادة حا نطلع من قد القفة ..

Quote: ليتثني لها القيام بدورها المنوط بها كسلطة رابعة ونسمع منكم

اقتراح وجيه، لكين دايرللوا جيهة.

بس بالله، أعمل حسابك للتفريق بين التسنية والتثنية، ينالك كتير من الفضل.

----

بوستات أساسي خط أحمر ممنوع المزاح والدعابة وربما حتي السلام الواحد دا إذا إعتبرو سيد
البوست فيهو لمحة هزار .
ومن الآخر كدا أية صديق إسفيري لأساسي عليه أن يرفق ديباجة توضح أنو جاد جدا قبل أن يتداخل
أو يعلق أو يرد أو حتي يلقي التحية على صديق مشترك.
أساسي وبنبرة لا تخلو من إحتفاء أو شماتة قال أن حيدر الزين أحد أصدقائه الإسفيريين تم إيقافه
لأنه تجرأ وأراد أن يداعبه في أحد بوستاته المصونة، وهو بذلك يطلق تحذيرا قويا لباقي الأصدقاء
بأن أرعوا بى قيدكم وتلتزموا جانب الجدية والإحترام عندما تدخلون إلى حرم أحد بوستاتي وإلا ..
تقليعات أساسي عجيبة وإستثنائية وتشبهه وحده لا شريك له..
أحبك يا أساسي .

نسيت أن أثني الإقتراح موضوع البوست
مع التحية

سلام ياأساسي الكان رومانسي
ليك وحشة
أثني

يولد جميع الناس أحراراً متساوين في الكرامة والحقوق، وقد وهبوا عقلاً وضميراً وعليهم أن يعامل بعضهم بعضاً بروح الإخاء.
لكل إنسان حق التمتع بكافة الحقوق والحريات دون أي تمييز، كالتمييز بسبب العنصر أو اللون أو الجنس أو اللغة أو الدين أو الرأي السياسي أو أي رأي آخر، أو الأصل الوطني أو الاجتماعي أو الثروة أو الميلاد أو أي وضع آخر، دون أية تفرقة بين الرجال والنساء. وفضلا عما تقدم فلن يكون هناك أي تمييز أساسه الوضع السياسي أو القانوني أو الدولي لبلد أو البقعة التي ينتمي إليها الفرد سواء كان هذا البلد أو تلك البقعة مستقلا أو تحت الوصاية أو غير متمتع بالحكم الذاتي أو كانت سيادته خاضعة لأي قيد من القيود.
لكل فرد الحق في الحياة والحرية وسلامة شخصه.

سلامات اساسي والجميع عاليه ..

الحاجة الاولي : ارحب بالفكرة وكامل الدعم ....

الحاجة التانية بالنسبة للكلام ده عندي مقترح مخالف بسيط ..

Quote: مفروض تكون لجنة تحكيم يتم انتخابها من البورد هنا بطريقة ديمقراطية ولكي نكون عمليين مفروض تبدو تطرحوا في اسماء الناس المرشحة للجنة دي طبعا ليس بالضرورة ان يكون اعضاء لجنة التحكيم من البورداب بل من المقبول ان يكونو شخصيات عامة مشهود لها بالنزاهة والاستقلالية تقوم لجنة التحكيم باختيار ثلاثة مرشحين للجائزة مثلا ويتم طرحهم للتصويت هنا في البورد

اقترح ان يكون دور لجنة التحكيم دور رقابي واداري علي مسار عمليات الترشيح ..اي ان تقوم بتحديد شروط الترشيح المتفقة مع فكرة الجائزة ومن ثم تفتح باب الترشيح وبعدداك تقوم باستبعاد المفارقين لشروط الترشيح وتطرح المستوفين ليتم التصويت عليهم ....

وخالص الاحترام

كتب وليد

Quote: مثلا الان في كاتب اخر يدعى منعم سليمان تم اعتقاله وهو زول عبر عن نفسه بحرية شديدة جدا .. وفي ناس خلافك انت وبيان مقتنعين انو الزول ده كلامو صحيح

تعرف يا وليد دي نقطة مهمة جدا وكويس انك اثرتها في البوست المعني باقتراح الجائزة عشان نجتهد في توضيح الفكرة وابعادها وطبيعة حرية التعبير حسب ما افهمها علي الاقل انا شخصيا

قد اتفق مع اي صحفي اتفاق تام او جزئي وقد اختلف تماما مع اي صحفي اخر اختلاف تام او جزئي , بل قد ابغض في نفسي صحفي لكتاباته واعتبره يتعدي علي الاخرين بكتاباته , وقد اختلف مع صحفي عقائديا او فكريا او ثقافيا كل ذلك وارد جدا بل وحاصل , لكن الرهان هنا ليس علي الزاوية التي انظر بها للصحفي ومدي اتفاقي او اختلافي معه , الفكرة اساسا في حرية تعبير ذلك الصحفي وان ذلك حقا له اصيلا , لن اقول مثل ما قال فولتير "أختلف معك في الرأي ولكنني على استعداد أن أموت دفاعًا عن رأيك" ولكن اقول اذا تضررت منك بصورة شخصية اقاضيك واللاحق حقي قضائيا ولكني اعارض بل اتظاهر من اجل ان لا تعتقل ظلما , بصورة اوضح من حق اي شخص متضرر من صحفي ان يلاحقه قضائيا وان يقيم عليه الدنيا ولا يقعدها من اجل الاقتصاص له , لكن ليس من حق اي احد ان يلجم وتتم مضايقته واسكاته دون وجه حق اي دون محاكمة وحتي الحق العام له رجاله الذين يحرسوه

أساسي باين داير يردم ليهو ناس وداير ياخد الموافقة الكاملة


يلا استعدوا للردم وما في زول يقول لأساسي تلت التلاتة كام

أرمي قدام

حرية التعبير دي ما بتشمل "دراب الخواض"* يا أساسي؟

عموماً الفكرة ممتازة وممكن توفر قليل من الدعم المعنوي للصحفيين الماشين على قشر البيض ديل


ــــــــــــــــــــــــــــــــــــــــــــ
*سبق لأساسي أن وصف نص للخواض بالدراب

قبل الشروع في الجائزة يستحسن تحديد مفهوم حرية التعبير ثم تحديد المعايير التي على ضوئها يتم اختيار الفائز...
هل المقصود بحرية التعبير الشخص الذي يتمكن من التعبير عن رأيه أكثر من غيره أم الشخص الذي يحرم من التعبير عن رأيه أكثر من غيره؟ فإن كان الأكثر تعبيرا... ما المضمون الذي يستحق الجائزة؟ أهو المضمون السياسي أو الاقتصادي الذي يعارض توجهات السلطة الحاكمة ويبرز أخطاءها وفسادها، أم المضمون الاجتماعي والثقافي الذي يبرز ما آلت إليه أوضاعنا الاجتماعية والثقافية؟ وماذا بشأن من يمارس حريته في الإساءة للأديان من منظور معتنقيها؟
هل نختار الأكثر تعبيرا من داخل الفضاء السوداني الذي تطاله السلطات السودانية، أم نختار الأكثر تعبيرا وهو بعيد عن متناول السلطات السودانية الحاكمة؟
وإن كان الأكثر حرمانا من التعبير... هل يكون النموذج المثالي هو نموذج أبي ذر الذي حرم من التعبير وتعرض للتعذيب في آن معا، أم نموذج من منعوا عن التطرق لقضايا الفساد؟
هل ستأخذ اللجنة في الاعتبار القوانين التي تمنع التعبير عن معلومات أو قضايا بعينها، ومن ثم تحكم على حرية التعبير بمدى الالتزام بهذه القوانين، أم تعتبر تحدي هذه القوانين رصيدا يضاف للمترشح؟ هل يمكن أن يتم اختيار من يمارس حرية التعبير انطلاقا من الحماية التي توفرها له مظلة حزبية أو سلطوية؟
بمعنى آخر: من نختار: فيصل أم الفاتح جبرا أم عثمان ميرغني أم هشام هباني أوتراجي مصطفى أم مبارك الفاضل أم الطيب مصطفى؟؟؟

نجلاء سيد أحمد وبس.. والباقي خس

د
دعونا نبدأ برصد الصعوبات التى قد تؤدى الى فشل المشروع، او المعوقات التى قد تحرف مساره، اول هذه الصعوبات هى تكوين لجنة مؤهلة للقيام بهذا العمل، فهناك مسائل كثيرة يجب التفكير فيها لضمان نجاح المشروع:

اولا:
قد يصعب تكوين لجنة محايدة، بمعنى انه قد يغلب على اعضاء اللجنة اتجاه سياسى محدد، فكيف يمكن تكوين لجنة جديرة بالثقة؟ وهل تنحصر عضويتها على اعضاء سودانيز اونلاين فقط؟
ثانيا
قد تضم اللجنة بعض الصحفيين، وبالتالى قد يؤدى ذلك لخلق جو من التحيز
ثالثا
قد تضم اللجنة اعضاء يعملون تحت اسماء مستعارة مما يعنى انه قد يجنح بعضهم لعدم الجدية او الفوضى
رابعا
قد يضيع وقت اللجنة فى محاولة اكتشاف بعضهم البعض، مثل من هذا؟ او ما هو لونه السياسى؟ او ما هى مؤهلاته
خامسا
قد تكون هناك صعوبات فى رصد اعمال الصحفيين المرشحين، وقد يؤدى ذلك لضعف آلية اختيار الفائز
سادسا
قد تكون هناك صعوبات فى تجميع التبرعات اللازمة للجائزة المالية، علما بان الجائزة المالية من اهم العوامل التى تشجع التنافس وتضمن الاستمرارية.
سابعا
قد يكون اثر الجائزة ضعيفا، فكيف نضمن اهمية الجائزة، بمعنى هل يمكن الاتفاق مع جهات اعلامية باجراء مقابلات مع الفائزين، او هل يمكن الاتفاق مع كل الصحف ومحطات التلفزيون السودانية لنشر اسم الصحفى الفائز على اوسع نطاق
ثامنا
كيف يمكن لاعضاء اللجنة ضمان انهم قد اطلعوا على كل اعمال الصحفيين السودانيين حتى نضمن ان ليس هناك عمل صحفى كبير تم اهماله
تاسعا
كيف نضمن مصداقية الترشيحات، بمعنى انه قد يؤدى نشاط بعض المرشحين أوحماس عدد محدود من المرشحين لصحفى معين الى تغيير النتيجة لصالحه

ختاما: اعتقد ان البداية بالتفكير فى المعوقات سوف يؤدى الى ضمان بداية صحيحة

نثني الفكرة ونبصم عليها بالعشرة
بس وزي ماتفضل بعض المتداخلين لازم يكون فيها جائزة مالية
وياريت لجنة الجائزة تضم كل الأطياف
كثير من الكتاب الوطنيين والإسلاميين يتعرضون لمضايقات رهيبه وتشوية سمعه خصوصاً عبر السايبر ورغم ذلك يظلون ثابتون على مبادئهم أقوياء على الحق

Quote: نثني الفكرة ونبصم عليها بالعشرة بس وزي ماتفضل بعض المتداخلين لازم يكون فيها جائزة مالية وياريت لجنة الجائزة تضم كل الأطياف كثير من الكتاب الوطنيين والإسلاميين يتعرضون لمضايقات رهيبه وتشوية سمعه خصوصاً عبر السايبر ورغم ذلك يظلون ثابتون على مبادئهم أقوياء على الحق

بعد اذنك يا اسس

Quote: تعرف يا وليد دي نقطة مهمة جدا وكويس انك اثرتها في البوست المعني باقتراح الجائزة عشان نجتهد في توضيح الفكرة وابعادها وطبيعة حرية التعبير حسب ما افهمها علي الاقل انا شخصيا قد اتفق مع اي صحفي اتفاق تام او جزئي وقد اختلف تماما مع اي صحفي اخر اختلاف تام او جزئي , بل قد ابغض في نفسي صحفي لكتاباته واعتبره يتعدي علي الاخرين بكتاباته , وقد اختلف مع صحفي عقائديا او فكريا او ثقافيا كل ذلك وارد جدا بل وحاصل , لكن الرهان هنا ليس علي الزاوية التي انظر بها للصحفي ومدي اتفاقي او اختلافي معه , الفكرة اساسا في حرية تعبير ذلك الصحفي وان ذلك حقا له اصيلا , لن اقول مثل ما قال فولتير "أختلف معك في الرأي ولكنني على استعداد أن أموت دفاعًا عن رأيك" ولكن اقول اذا تضررت منك بصورة شخصية اقاضيك واللاحق حقي قضائيا ولكني اعارض بل اتظاهر من اجل ان لا تعتقل ظلما , بصورة اوضح من حق اي شخص متضرر من صحفي ان يلاحقه قضائيا وان يقيم عليه الدنيا ولا يقعدها من اجل الاقتصاص له , لكن ليس من حق اي احد ان يلجم وتتم مضايقته واسكاته دون وجه حق اي دون محاكمة وحتي الحق العام له رجاله الذين يحرسوه

ده كلام بتاع عشاق يا اساسي
مافي حاجة هنا شخصية ... ولا يحزنون ... تجربة منعم سليمان تجربة عنصرية وكمان عنصرية سفيهة ...
ان يدافع شخص عن اخر وصف امه بالعاهــرة هذه يتوبيا حالمة ولن تطبق الا في المدينة الفاضلة .. او يفعلها انسان بدرجة نبي الا شوية

فكرة ان الجمه هذا ليس مجالها فلسنا في هذا المنبر لنا هذا الحق
لكن حكاية ارشحو واثنى ترشيحه .. فهذا شان اخر
وكمان ادية جائزة !!!!!


هو منو ذاتو البرشحو .. والبرشحو ده موش وكانه بيخرج لسانه لمن طعن منعم في شرفهن !!!

جائزة حرية التعبير هذه .. تعطى لمن يستخدم هذه الحرية في مكانها ... ويتعمل للزول ده فيش وتشبيه اعلامي عديل كده
انو ما استغل هذه الحرية في غير موضعها .. حتين بعد داك يكون استحق الترشح لهذه الجائزة

يعني ممكن تكون نجلاء تستحق الترشح ده
لكن ما ممكن تقول لي زول حرية التعبير دي هو ذات نفسو اتعدى عليها واستغلاها في طن شرف النساء
وتجي تقول لي ارشحو واديه جائزة

معقولة !!!

الاخوة المثنين والداعمين للفكرة والله انا شاكر ليكم جنس شكر ومقدر مداخلاتكم تقدير كبير جدا

الا انه يبدو ان الفكرة كانت شاطحة قليلا والاقتراح كان من باب احلام اليقظة
مع تقديري الكامل لتفاعل الاخوة مع الفكرة الا انهم يظلوا نسبة 1% فقط من مجموع كتاب المنبر التي تبلغ 5000 عضو وهي نسبة ضئيلة وغير مشجعة لابتدار عمل باسم الجميع
كما وانه بكري اظنه رفع البوست من باب المجاملة الخجولة او نكاية في ملاسي اللهم رفعته للبوست بنظام " المس كول " وانزاله سريعا يبنبي بان بكري لم يتحمس للفكرة مثل بقية الاعضاء سوي المشاركون والذين لم يتجاوزوا 50 عضو كما اسلفنا من مجمل عضوية المنبر
لذا اعتذر منكم عن المضي قدما في هذا الامر , وادعم من يظن ان الفكرة يجب ان تسير الي غاياتها وايجاد الالية لتفعيلها لتكون واقعا , ادعمه للمضي بالفكرة الي اخر المشوار