الإحباط وطن !!!

و بعدين مع السودان ده ؟!

ما اهو جاوبت يا بروف

احباط غريب

و

مرمي الله ما بترفع


---

تحياتي

يقول سيدي كجراي عليه رحمة الله :
يمر العام تلو العام ...لا الأحلام تصدق... لا ركام الهم يسقط من حساباتي !
مات كجراي و بقيت مقولته حية و صادقة و صالحة لوصف حالنا ...

لا أعتقد أن هناك أحسن من السوداني كفرد ...
كمجموع ... نحن الفشل يمشي علي قدمين ... الشعب الوحيد الذي تفشل كل تجمعاته و علي كل الأصعدة :
سياسيا.. لا يوجد حزب سوداني لم يعاني من التشظي و الانشقاقات، احزابنا و تكتلاتنا السياسية منذ الاستقلال تنشق و تنشطر كما الأميبا في كتب الأحياء : الجبهة الأسلامية انشقت لجبهتين و زيادة و حزب الأمة لعدة احزاب و الاتحادي كذلك ، منشقي الحزب الشيوعي كونو حزبين اخرين إنشقو هم بدورهم و الحركات المسلحه في دارفور انشقت بمتواليات هندسية بحيث يصعب - إن لم يستحيل - حصر عددها الكلى ، و اهلنا في الجنوب إنفصلو تماما !
هذا الفشل في أن نعيش تحت مظلة ما... لا يقتصر علي تجمعاتنا السياسية ، بل يمتد ليشمل تجمعاتنا الرياضية و الثقافية و حتي الأجتماعية منها ، و المتابع لنشاطات جالياتنا في الخارج يري العجب العجاب كل سته في حته و كل نفرين عملو جاليه و يا ريت كان ببقو في حالهم ... تبدأ حرب الشتائم و الملاسنات قبل ينفصل الناس تماما .
و لو كان إنشقاق الاندية الرياضية ممكنا لكان الهلال جناح صلاح إدريس منافسا لهلال البرير في الدوري العام في دوري الكرة و لعل هذا ما يحدث تحت إسم أهلي شندي ...
فنيا ... لا توجد مجموعة موسيقية بقيت موحدة لبضع سنين و لا يوجد مغني و ملحن و شاعر تجمعا لوجه الفن و إفترقا عليه ... لا بد أن يختلف الناس و من ثم تبدأ الشتائم و الاتهامات!!
و الذي يحدث الان في مشهدنا السياسي بكل قتامته ما هو إلا أحد تجليات فشلنا كشعب في إنجاز أي نوع من أنواع العمل الجماعي علي أي مستوي من المستويات ....
و الحال كذلك ما الغريب في أن تنقسم البلاد بدعاوي السلام و بعد مرور بضع شهور علي الانفصال تحترب الدولتان ؟! و ما الغريب أن كل ما ياتي من جهة السودان من أخبار لا يحمل إلا الاحباط.... احباط بعضه فوق بعض ... احباط يسكننا حتي صار لنا وطنا !!

Quote: كمجموع ... نحن الفشل يمشي علي قدمين ...

يمشي على كرعين.......
الكراع للبهيمة.....
والقطيع نحن....

شوف منبرك دا...واحد يقول عوووووك يجو وراهو عشرين يقولو عوووووك....ويكونو ما عارفين سبب عوووك شنو؟


ممكن اجيب كديستي يا بروف؟

سلام يا أمين

!

Quote: و بعدين مع السودان ده ؟!

خصوصا لما تلقى نفسك عاجز تماما أنك تعبر عن غضبك صراحة


اللهم إهدنا الصراط المستقيم

- الانقاذ هي السبب الرئيسي لما نحن فيه الان ...
- جنوب السودان دولة أجنبية احتلت جزء من ارضنا ...
- الجيش السوداني أقرب لمليشيات الجبهة القومية من كونه الجيش الوطني ....
- يجب التفريق بين معارضة النظام و معارضة الوطن ...
- الكيزان اخر من يتحدث عن الوطنية ...
- هجليج ليست كوزة !!
-
رغم تناقض بعض هذه الأقوال... لكن في كل منها شئ من الحقيقة .... و طالما أن كل طرف يدعي إمتلاك الحقيقة... ستبقي الحقيقة : أن (أزفت) أيامنا لم تأت بعد !!

انظرو إلي تفاهة الساسة في الشمال و الجنوب و ستعرفون اننا شعب واحد !!

نا و انت (و الذينا ديل) ما بنقدر نحل مشاكل السودان...لكن....
لو لقيت طريقة تخلى مشاكل السودان ما تعمل ليك ضغط و سكرى و تقصر عمرك, ورينى ليها....ينوبك ثواب.

يقول سيدي أمل علي لسان عنترة بن شداد :

وها أنا في ساعة الطعان
ساعة أن تخاذل الكماةُ .. و الرماةُ .. و الفرسان
دُعيتُ للميدان !
أنا الذي ما ذقت لحم الضان
أنا الذي لا حول لي أو شان
أنا الذي أقصيتُ عن مجالس الفتيان :
أدعى الى الموت .. ولم أدع الى المجالسه !!


تماما كبني عبس : الانقاذ تدعو السودانيين الى الموت .. ولم تدعهم الى المجالسه !!

طبق اليوم : وطنية بمرقة الدجاج !!

- 22 بيضة و شوية
- شعب مبشور و مبلول
- 13 ملعقة كرامة مهدورة
- 12 رطل من زيت الشعب
- 53 شوال فساد
- مرقة دجاج من عرق الغلابا
- شهداء و معذبين ما ليهم حد
- أكوام و أكوام من الاحباط

تخلط هذه المقادير لمدة لا تقل عن اتنين و عشرين سنة ... تجفف و تقدم عند اللزوم !!

بعد أن فرغ كأس التكسب من الدين لاغراض الدنيا... و بعد أن سقت الناس منه حتي ما عاد يروي الظمأ ... أخرجت الانقاذ كأس العنصرية... فشرب منه الجميع ...

سطحية معظم ساستنا و شدة بأسنا مع بعض البعض عند إختلاف الرأي تنبئ أن مستقبل هذا البلد مظلم ذهبت الانقاذ أم بقيت !!

يا امين احنا ناقصين ياخ

يا امين

احزنى حزنك واحساسك المرير بالاحباط و التغيير الذى يحدث في السودان

عارف يا امين

انا اكثر شى حزينة ليه التغيير الاجتماعى والاخلاقى للرجل السودانى والمراة السودانية

بقينا شعب غير محترم خالص خارج السودان

سمعتنا بقت زفت ياخى

الله في يا أمين لكن حالة تمرض جد. المحزن جدا إنه مافي أي حاجة تشير لأنه بكرة حيكون أحسن.

Quote: أخرجت الانقاذ كأس العنصرية

امين
اذا كان اعلان التعبئة وتجييش الشعب وحشد القوى لمقابلة الاعتداء الجنوبي على الارض السودانية (عنصرية)، فألف مرحباً بها
اكيد ليست هي التي قال عنها المصطفى (دعوها)

المهندس الشفيع :
أخرجت الانقاذ كأس العنصري قبل معارك هجليج الاخيرة والادلة كثيرة وهي ليست غائبة عنك
وما حديث عراب الانقاذ د. الترابي عن الغرابية و( الفرخ) علي الحاج الا احد الادلة

Quote: فشرب منه الجميع ...

إلا من رحم الله .. أو فشرب منه الكثير .. فأعجب به قوم ومجه آخرون

سنة الله في هذه الخليقة (ولا يزالون مختلفين إلا من رحم ربك)
ويبقى دور المصلحين بصدق .. (وسيعود غريباً فطوبى للغرباء) وفسرهم النص النبوي بأنهم الذين يصلحون ما أفسد الناس
في الفتن والمصائب (محن) و(منح) ..
وأمر المؤمن كله خير إن أصابته ضراء صبر أو سراء شكر ..

(ظهر الفساد في البر والبحر) .. وتغيرت الأحوال .. وفسد طباع الكثيرين .. وتفاقمت المعضلات .. وعسرت المشكلات .. وقل الحكماء وأهل البصيرة
وأصبح الحليم حيرانا ..
ولكن !!
(فأما الزبد فيذهب جفاء وأما ما ينفع الناس فيمكث في الأرض)
لا نيأس ولا نقنط .. طالما الأمر بيد الله تعالى .. وهو قادر على كل شيء .. لكنه يريد منا أن نكون كما يريد فيكون لنا برحمته كما نريد
فليعمل كل بقدر استطاعته فينشر حقا ويدمغ باطلا ويصوب مخطئا .. وينشر خيرا وكلمة طيبة
ولنضع الحزبيات والجهويات والعنصريات الخبيثة المدمرة ..في مكانها المناسب لها :
تحت الأقدام ..

ولك من التحايا أطيبه أخي أمين

زبدة المرارة .. او خلاصة المرارة هو ما كتبت
شكرا اخي امين ...

Quote: احباط غريب و مرمي الله ما بترفع

يا نصر ... البلد دي تاني إلا يرفعها الله برحمتو ... انقطعت الاسباب تماما ...
البلد ماشة - بخطي ثابته - نحو الأنهيار الكامل ..
-----------

Quote: شوف منبرك دا...واحد يقول عوووووك يجو وراهو عشرين يقولو عوووووك....ويكونو ما عارفين سبب عوووك شنو؟ ممكن اجيب كديستي يا بروف؟

المشكلة يا دكتور لمن يكون القال عوووووك ذاتو ما عارف رقبتو قالها ليه !!
يا زول مرحب بيك إنت و كديستك و كدايس البلد أجمعين ...
----------

Quote: خصوصا لما تلقى نفسك عاجز تماما أنك تعبر عن غضبك صراحة

لم يبق من شئ يقال يا حمد ... الوطن صار إحباطا... و الاحباط وطن !!

Quote: لو لقيت طريقة تخلى مشاكل السودان ما تعمل ليك ضغط و سكرى و تقصر عمرك, ورينى ليها....ينوبك ثواب.

يا سمارت ... السودان كان ما عمل لينا ضغط و سكري و قصر عمرنا ما ببقي السودان ذاتو !!
جزء من هويتنا كسودانيين اننا نكون طواااالي محبطين و مبلولين ... الما حاصل ليه كده يتحسس سودانيتو !!
-------------

Quote: يا امين احنا ناقصين ياخ

يا دوك ... إنت القال ليك اطلعي سودانية منو ؟!
-------------

Quote: عارف يا امين انا اكثر شى حزينة ليه التغيير الاجتماعى والاخلاقى للرجل السودانى والمراة السودانية بقينا شعب غير محترم خالص خارج السودان سمعتنا بقت زفت ياخى

وضاحة يا فجر المشارق ...التغيير الحاصل كلو لاسوأ وفي كل المجالات و و علي كل المستويات و لا ضوء يلوح في اخر النفق !!
سمعتنا بقت زي الزفت لاننا بقينا زي الزفت و الزفت أحسن !!

شكرآ يا قريبي البروف .. كتبت فيما يعتريني .. تحياتي

حقو نفتح tender كبير نجيب ليهو كبريات الشركات العالمية

ونسميهو عطاء ادارة السودان

نجيب كل خبرات العالم

نجيب شركة سيمينس لإدارة الطاقة والكهربا والسكة حديد
وشركة هلين اند نورتون لإدارة الموارد البشرية
ونشوف اكبر شركات في تكساس للزراعة
ونجيب اكبر شركات في استراليا لأدارة الثروة الحيوانية
ونعمل كونسولتيوم لكبريات الجامعات في العالم لإدارة التعليم
وشركة للتأمين الصحي










ملاحظة مهمه:

الشعب السوداني غير مقيد بقبول ادنى او اي عطاء اخر





..

Quote: الله في يا أمين لكن حالة تمرض جد. المحزن جدا إنه مافي أي حاجة تشير لأنه بكرة حيكون أحسن.

يا ياسر ياخي أنا مواطن سوادني لي أكتر من أربعين سنة ... لحدي الليلة السودانيين ديل كنص إستغلقو علي تماما ... قدرت ما حاولت أفهم المشكلة وين.. غلبني !! بلد بالامكانيات البشرية و الطبيعية حقتنا دي مفروض نكون أحسن من خالتو فرنصا هيم سيلف (زي ما قال أساسي )...
قريب الستين سنة مما استقلينا و البلد كل سنة ماشه لوراء ... ما قادرين نخت الرحمن في قلبنا و نعمل حاجة لام البلد دي ... من حرب لحرب و من تمرد لتمرد و كلو جيل يسلم البلد للبعدو أزفت و أضل ... . ياخي خليك من البلد و عاين في المنبر ده اللي أعضاءو كلهم ناس متعلمين و يفترض فيهم الحد الأدني من العماقة ... شوف الخلاف في الراي ممكن يوصل لشنو و شوف بأسنا بينا شديد كيف .. يعني لو في مفتاح في الكيبورد بخليك تطلع للزول بهناك ما كان فضل فينا زول !!!
-------------

Quote: امين اذا كان اعلان التعبئة وتجييش الشعب وحشد القوى لمقابلة الاعتداء الجنوبي على الارض السودانية (عنصرية)، فألف مرحباً بها اكيد ليست هي التي قال عنها المصطفى (دعوها)

يا الشفيع ياخي... تعبئة شنو في الحر ده ؟!
ياخي ...قوة عين زي حقتكم دي يا الشفيع يعمينا و يطرشنا ...
إستلمتو البلد مليون ميل ... كان سلمتوها مليون كيلو تكونو ما قصرتو ... دمرتوها و عدمتوها نفاخ النار ... الأعترفتو بكتلهم عشرة الاف و العذبتوهم و رفدتوهم ما بتعدو ... نقضتو غزل البلد - من بعد قوة - أنكاثا ... فرتقتو النسيج الاجتماعي الكان موجود... و نفختو في كير العنصرية النارها كانت قاعدة تحت الرماد.. أفرغتو أي حاجة من مضمونا و خنقتو الوطنية في قلوب الناس حتي ماتت كما تموت العير ... فياخي أحكمو حكمكم وبلو بلكم و فكونا من قصة الوطنية باللحمة المفرومة دي ... بس ما تنسو إنو كلو ما تطولو الحساب بكبر !!
----------
اللهم إنا قد فترنا من الانقاذ و من دمنا الما فيهو غير جينات الفشل !!

Quote: المهندس الشفيع : أخرجت الانقاذ كأس العنصري قبل معارك هجليج الاخيرة والادلة كثيرة وهي ليست غائبة عنك وما حديث عراب الانقاذ د. الترابي عن الغرابية و( الفرخ) علي الحاج الا احد الادلة

يا علاء ... الشفيع الكلام ده عارفو و فايتو بهناك ... و ده جزء من محن البلد البنتكلم عنها ... هسي زول زي الشفيع ده البخليه يايد الناس دي شنو ؟! افرض المعارضة ا تفه من التفا هة و أقبح من القباحة ...هل ده مبرر لانو الزول يصطف مع القتلة ؟!
---------------

Quote: إلا من رحم الله .. أو فشرب منه الكثير .. فأعجب به قوم ومجه آخرون سنة الله في هذه الخليقة (ولا يزالون مختلفين إلا من رحم ربك) ويبقى دور المصلحين بصدق .. (وسيعود غريباً فطوبى للغرباء) وفسرهم النص النبوي بأنهم الذين يصلحون ما أفسد الناس في الفتن والمصائب (محن) و(منح) .. وأمر المؤمن كله خير إن أصابته ضراء صبر أو سراء شكر .. (ظهر الفساد في البر والبحر) .. وتغيرت الأحوال .. وفسد طباع الكثيرين .. وتفاقمت المعضلات .. وعسرت المشكلات .. وقل الحكماء وأهل البصيرة وأصبح الحليم حيرانا .. ولكن !! (فأما الزبد فيذهب جفاء وأما ما ينفع الناس فيمكث في الأرض) لا نيأس ولا نقنط .. طالما الأمر بيد الله تعالى .. وهو قادر على كل شيء .. لكنه يريد منا أن نكون كما يريد فيكون لنا برحمته كما نريد فليعمل كل بقدر استطاعته فينشر حقا ويدمغ باطلا ويصوب مخطئا .. وينشر خيرا وكلمة طيبة ولنضع الحزبيات والجهويات والعنصريات الخبيثة المدمرة ..في مكانها المناسب لها : تحت الأقدام ..

نعم القول يا دكتور .. نسال الله أن يلطف بالبلاد و العباد ...
الواحد بحاول يشوف السبب الوصلنا للمرحلة دي ... كل سنة و الحال أزفت من القبلها حتي تعتقد إنو ليس في الأمكان أزفت مما كان ... بعدها بسنة تقول يا ريت نرجع لحال السنة القبلها ... الان البلد بقت بلدين و يا ريت لو بلدين و ساي ..بلدين و في حالة حرب ... و كل المعطيات تنبئ بشر مستطير ...

ياخ حرام عليك !

دعنا نموت بسلام دون ألم !

The higher you build your barriers
The taller I become
The farther you take my rights away
The faster I will run

Labi Siffre قدس الله سره

عريت السوادن قدام نفسه.. دام كبيبوردك و قدس الله سرك

تحياتنا يا خال

عريت السوادن قدام نفسه.. دام كبيبوردك و قدس الله سرك

تحياتنا يا خال

Quote: زبدة المرارة .. او خلاصة المرارة هو ما كتبت شكرا اخي امين ...

يا معتصم ... لم يبق من شئ يقال ..
يا أرض ... هل يلد الرجال ؟!
الشئ المؤسف فيما يحدث الان إنو تفا هة قادة الشمال لا يفوقها إلا تفا هة قادة الجنوب و العكس صحيح ... لو كان لاي منهم قدر و لو بسيط من الحكمة لحقنو دماء مواطنيهم و حفظو موارد بلادهم ...
-----------

Quote: شكرآ يا قريبي البروف .. كتبت فيما يعتريني .. تحياتي

عادل يا قرببي ... نحن ندفع ثمن فشلنا جيلا بعد جيل ... حكومات و شعوب ...
و ما تسمع كلام شعب عظيم يقوده أقزام ... ياخي في شعب عظيم بخلي الأقزام يقودو ؟!!
كلنا أقزام يا قريبي ... كلنا أقزام !!

Quote: حقو نفتح tender كبير نجيب ليهو كبريات الشركات العالمية ونسميهو عطاء ادارة السودان نجيب كل خبرات العالم نجيب شركة سيمينس لإدارة الطاقة والكهربا والسكة حديد وشركة هلين اند نورتون لإدارة الموارد البشرية ونشوف اكبر شركات في تكساس للزراعة ونجيب اكبر شركات في استراليا لأدارة الثروة الحيوانية ونعمل كونسولتيوم لكبريات الجامعات في العالم لإدارة التعليم

إنت يا حذيفة قايل ده ما حل ؟!!
ما هو كل يوم جايبين مدرب أجنبي و شركات أجنبية ... المانع شنو نتعاقد مع اجانب أولاد حلال يجو يحكمونا ... باقي ليك كانو نفشو البلد دي زي ما الكيزان نفشوها ؟!!
---------

Quote: عريت السوادن قدام نفسه.. دام كبيبوردك و قدس الله سرك

يا باش ....أنا ما عريتو ... السودان حبيبنا براهو عريان مما الله خلقو ...

Quote: ياخ حرام عليك ! دعنا نموت بسلام دون ألم !

يا دوك ... ياخي نحن ميتين من سنة 56 ... ما لجرح بميت ايلام !!
-------------------------------
شايف هجليج إتحررت ... و طالما لم تتحرر عقلية الاطراف المتحاربة ... تستمر الحرب و يتواصل الاحباط !!

Quote: شايف هجليج إتحررت ... و طالما لم تتحرر عقلية الاطراف المتحاربة ... تستمر الحرب و يتواصل الاحباط !!

بروف أمين تحية

عقلية الأطراف المتحاربة لن تتحرر حتى تتحرر مقاعد السلطة الوثيرة منهم ، كنت أشاهد في التلفزيون قبل قليل سمعت أمين حسن ينعق كالبوم لينذر بأن مليشياته ستدخل الجنوب لتخلص شعبه(المغلوب على أمره) من الحشرة الشعبية -حسب اللفظة الرئاسية-...

و سمعت آخر يقول إن الخرطوم أخطأت منذ البداية في التفريط بأرض المسلمين !!!!!!

أخشى على السذج من التعبئة الضالة بإسم الدين و الجهاد

Quote: أخشى على السذج من التعبئة الضالة بإسم الدين و الجهاد

يا مازن الحنك بتاع الدين بقي ما بمشي ... عنصرية سااااي من هنا لقدام ...
----------
أخطأ ساسة الجنوب باحتلالهم أرض شمالية لا نزاع عليها ... عقلية الكيزان تحكم الدولتين !!

Quote: أخطأ ساسة الجنوب باحتلالهم أرض شمالية لا نزاع عليها ... عقلية الكيزان تحكم الدولتين !!

يا امين ناس سلفا شكلهم لسع ما اتحرروا من الفكرة القديمة بتاعت الحركة الشعبية حركة مطالب مشروعة ! و حكومة الخرطوم ما بتسجيب الا لمن حمل السلاح !
و ما عارفين انو الوضع اختلف و بقت فيها دول وامم متحدة !
عشان المؤتمر الوطني شغال فيهم ابتزاز و استنزاف في نقل البترول قالوا خلاص نحن زاتنا نحتل هجليج ! ثم اعلانها ارض جنوبية خالصة !
وديل بجايي قالوا تغيير نظام الجنوب و احتلال جوبا !
لسع بتعاملوا مع دولة الجنوب و كأنها حركة شعبية "متمردة" !
غايتو جنس محن

وخلف الصفقات السياسية و المساومات و"حروب التحرير" يموت الانسان

--
غايتو لو في درس للاستفادة من الكارثة الانسانية و المادية دي -الحركة الشعبية و المؤتمر الوطني يعرفوا انهم بمثلوا دول مختلفة والحروب
بين الدول بتختلف من حروب الهامش و المركز !



والله أتقول النظامين اعضاء في سودانيز!
يا حقو الريس يدي النظامين باسوردات هنا !

يا حبيبنا ... هسي عليك الله تفا هة الساسة في الدولتين مش مفروض تكون مسوغ لتوحيد البلد ؟! علي الأقل يكون عندنا مجموعة تا فهه واحدة بدل اتنين !!
الفلم ده ح يكون مدور كده طالما الوهم ديل حاكمين الدولتين ... و طالما الشعوب راضيه و ساكته ... يستحملو فواتير الحرب و مافي زول يجي يعمل لينا غاغة في راسنا ده !!
------------
ضد فكرة الباسويردات للنظامين هنا ... خليهم يمشو فوراول محل الثقافة و الناس القيافة !!

to add to your frustrations, watch BNTV partying without a mention to those who passed away or their loved ones mourning them

يا دوك ... ديل بتاعين loved ones ديل ؟! الناس دي لو عندها إحساس قدر ده ... الحرب ما كانت قامت من الأساس ؟!
الله يرضي عليك وفري ال frustrations حقتك دي ... ح تحتاجي ليها كتير جدا من هنا و لي قدام !!
--------
يا اخوانا عيبو لي الحوار لحل المشاكل !!

في أكثر من قناة سودانية شاهدت أمس إحتفالات الناس في الشوارع باسترجاع هجليج ... شئ لم تكن الانقاذ لتحلم به لولا تفاهة قادة الجنوب !!