بنت أُختي بعد أن أكملت سني دراستها في كُلية الطب، تمّ إستيعابها في مستشفى عطبرة، فحكت لي هذه البلِيّة الشريرة التي أضحكتني من شِدّة شرها. كان مسرح البليّة الشريرة غرفة العمليات بمستشفى عطبرة، حيث كان المريض مستلقياً علي ظهره فوق طاولة العمليات، وفي حالة تخدير كاااااملة. يعني ما جايب خبر للحاصل حوالينو، والباقية عليهو. الطبيب الذي سيقوم بإجراء العملية والتيم المساعد من ممرضين ومُحضري عمليات في غاية الإستعداد، والعِدة كلها جاهزة. غرفة العمليات في حالة كاملة من الجِديّة. العملية عملية فتح بطُن ومافي أيّ مجال للهزار. المُساعد ناول الجرآح المشرط، والجرآح قال بسم الله وكررررررر، راح فاتح بطن المريض وراح يعالج في موطن الداء. بطن المريض فاتحة مُشرع، والمكان كله دماء وكل أعضاء التيم منهمكين في العمل. وفجأة !!!
فجأة ...!!! من سقف غرفة العمليات ضب جُنبُلُغ وقع في بطن المريض، والظاهر لما شعر بلزوجة المكان، أخد ليهو كم تفحيطة كدا في بطن المريض وسط دهشة التيم البيعمل في العملية وتلّب من الطاولة في البلآط، وراح فاتح طيران في أرجاء الغرفة. بعد أن فاق أعضاء التيم من الدهشة التي عقدت لسناتهم، دخلوا في مطاردة عنيفة جداً مع الضب في أنحاء الغرفة تاركين المريض وشأنه لتنتهى المطاردة بإنقشاط الضب في جُحُر في أحد أركان غرفة العمليات، فرجع التيم بخُفي حنين ليواصل العملية. والله صحي...
ضب فى بطن مريض..مقص .شاش معقولة..بلادى تفقد المقومات الدنيا من الصحة وبالطات فى ألأقاليم..صرصور قطة ضب فأر .والله دى مصيبة..على ألأقل غرفة العمليات دى تكون نظيفة ومهتمين بيها.
دى أرواح ناس مالعب.
Quote: والله صحى التكل ذاتو نادر مايقع ضب جو حلة الملاح .... حاجة محزنة الاخ معاوية وآ آسفى على التدهور الوصلت ليهو مستشفيات الوطن..
ألأخت نجاة لك التحية...ممكن يكون وقعوا ريحة البنج حقوا يمسكوا الضب ذاتو يعملو ليهو عملية فى راسو ده..
Quote: مستشفي عطبرة ومستشفي بربر عبارة عن كوشة بتاعت اوساخ والاطباء الشغالين فيهن انا ما عارف قاعدين كيف؟ خليك من المرضي واحد حلفاوي قال وزير الصحة دا اي زول زهجان منو بيقول ليهو امشي انتظرني هناك ولو شفتو غرفة الانعاش؟ والله تحيرك غايتو غير مكيف عطلان وانبوبة هواء مصدية مافيها حاجة غايتو الزول لو عيان ومشي هناك الا قنعان من روحو ونوعية الدكاترة زاتا تحيرك النوع داك البقول ليك مشي الفطور
سلآمات يا بكري. ذكرتني.
عارف، مرّة وآحد من أهلنا ناس الباوقة عيان وحولوهو مستشفى عطبرة. أها، راح قابل الدكتور ورجع البيت. الوالدة الله يرحمها ويرحمو، قالت لو: مشيت قابلت الدكتور ؟؟؟ قال لها: أيّ. قالت لو: أها، الكتور قالك شنو ؟؟؟ قال لها: قال لي أمش قابل الجرآح !!! قالت لو: أها، ومشيت قابلت الجرآح ؟؟؟ قال لها: لا !!! قالت لو: لييه ؟؟؟ قال لها: يا بت همزة إنت جنيتي، بمشي اقابل الجرآح عشان يجرحني !!!
تعرف بعد فترة أنا إكتشفت إنوا قريبنا دا كان حويّط جداً، جداً.
Quote: دي مش ياها المسشتفى ذاتا الإشتغل فيها بتاع الركشة داك طبيب لمدة سنة
حكايتكم شنو كل مرة ناطي ليكم واحد
الله يكون في عون الأهل في عطبرة
سلآمات يا محمد علي.
ياها المستشفى زااااااتا الإشتغل فيها الطبيب طيّب الذِكر.
والزول اب عيوناً منططات دا يا هو الطبيب المعني. نسأل الله ان يجعل إجتهادوا في ميزان حسناتو. عليك الله ما كتّر خيروا القبِل يشتغل في مستشفى زي دي. الحادثة دي تنم وتدل علي تفرّد لا يمكن تجدوا غير في السودان، فهو البلد الوحيد الذي يمكن ان تجد فيه مثل هذه الظاهرة التي يمكن أن نتحدى بها بقية بلدآن العالم.
Quote: نسأل الله ان يجعل إجتهادوا في ميزان حسناتو.
ههههه يا ود المدير وقوع الضب دا قضاء وقدر لكن تقول شنو في الدكاترة البنسوا ويسرحوا؟ عان زي دا
في إجازتي الفاتت قلت لصاحبي عاوز أمشي لطبيب أسنان قال لي نصيحتي ليك أوووعك تغمت ساعت القلع وشيل معاك مراية من البيت (: قلت ليه لييه؟ قال لي كان عندي ضرس حاميني النوم شهور وعشان بخاف من القلع كنت زايغ من حكاية الدكتور دي ناس البيت لمن زهجو من آخ آآآخ كل يوم قالوا لي أمش أقلعوا عشان نقدر ننوم (: قال لي لمن بقى ما في حل إتشجعت ومشيت وقلعوا لي الضرس لمن صبحت الصباح لقيت الألم لسة في حالو، عاينت في المراية لقيت الدكتور قلع الضرس الجنب المسوس (:
Quote: والله صحى التكل ذاتو نادر مايقع ضب جو حلة الملاح .... حاجة محزنة الاخ معاوية وآ آسفى على التدهور الوصلت ليهو مستشفيات الوطن..
سلآمات أُختي نجاة.
التدهور أُختي نجاة طال كل مرافق الوطن وتخطاها للمواطن في ذآت نفسه حيث أصبح المواطن لا قيمة له. تصدقي، بت أُختي دي زآتا حكت لي حكاية حدثت في مستشفى عطبرة أغرب من الخيال. في عطبرة عندنا الكهرباء كانت دائماً تقطع، فحكت لي إنه في أثناء إجراء عملية لمريض الكهرباء قطعت فجأة، وصارت غرفة العمليات تسبح في الضلآم، فما كان من الدكاترة إلا الإستعانة بموتر فسبا تابع لأحد الدكاترة. دوروهو ووجهوا النور داخل غرفة العمليات وواصلوا. قلت ليها، والله العظيم حِلآقة ما ممكن يتموها بنور فسبا، خليك من عملية.
بكل أسف أُختي نجاة الحزن أصبح هو المسيطر. تُرى أين يتعالجون ويعالجون فلزآت أكبادهم ؟؟؟
صورة تانية للضبيب الضب. يعني !!! وجاهة بتاعت دكتور صحي، صحي. والله صحي.
خاص بالسودان. مثل هذا لا يحدث إلا في بلآدنا المغلوبة علي أمرها...
Post: #27 Title: Re: الـحـقـو مُـسـتـشـفـى عـطـبـرة ... ضـب فـي بـطـن الـمـريـض ... Author: محمد عبدالرحمن محمد Date: 04-05-2012, 09:13 AM Parent: #26
Quote: جخانين: جمع جخنون وهو المارقون. تُكُل: مُفرد تَكَلَة وهو الخُس.
والمعنى واضح..
يا عملات عبدالله الطيب
بعدين آجنا المَدير، الأخ ده
قصتو كانت حايمي هني وانا ما جبلها خبر؟ - والله يا معاويه آخر مره شفت فيها مستشفى عطبره، في زياره للصديق د. السر بيْن، أوايل التمانينات.. يعلم الله كانت من أنضف ما يكون.. هسّع بعد القريتو وشفتو في مقطع الفيديو، ما أكعب ملاها إللِّي مستشفى الباوقه.. نسأل الله السلامه ياخ
Post: #28 Title: Re: الـحـقـو مُـسـتـشـفـى عـطـبـرة ... ضـب فـي بـطـن الـمـريـض ... Author: Ahmed al Qurashi Date: 04-05-2012, 09:35 AM Parent: #26
Quote: عليك الله قول للدكتورة .. لازم تقبضوا الضب .. وتتأكدوا من ضنبو .. مايكون خلاهو في بطن المريض
انحن عارفين الضبوب ديل وقت الزره بفكو ضنبهم وبكبوا الزوغه
ربنا يستر والمصيبة لو كان الضب من النوع الاسمو ابوشالايه
اللونه اسود وراسه وضنبو ابيض ، دا وقت يرفع راسه وينزلوا في الحيطة جسمك يكش
Quote: لاول مرة اشعر بصعوبة التعليق علي موضوع مهم نضحك ام نبكي علي الحال ربنا يلزم اهلنا الصبر و يعطيهم الصحة و العافية
سلآمات يا حاتم.
يا حاتم أخوي أهلنا ديّل كان بقت علي الحكومات كان عِدموا نفاخة النار. لكن ربنا كريم. المصايب الحاصلة ما تديك الدرب. مرّة مشيت مستشفى بحري عندنا حبوبتنا كانت رآقدة. يا زول لقيت لك العنبر متروس نسوان، والعيانات كل إتنين في سرير. لآحظ مع تنوع المرض، وفيهِن المرضا مُعدي. الجايات زيارة مترصات معاهن فوق العناقريب، والعنبر ما فيهوا لا ممرضة، لا سِستر لا يحزنون. إتعجبت في الحاصل، وعامل فيها حريف مشيت اتبرا أحكي لآهلي الشفتو وإنوا السرير مرقدين فوقو اكتر من مرا. كان نطت أُختي قالت لي، وحات الله أنا القدآمك دي رقدوني في مستشفي عطبرة عيانة. كان بعد شوية جابوا راجل مرضان رقدوهو معاي في نفس السرير. قتلهم يهوووون الله، كمان جانا دا ؟؟؟!!!، وقمت إتنفضت وخليت مرضي وعليك يا أهلي.
Quote: بعد أن فاق أعضاء التيم من الدهشة التي عقدت لسناتهم، دخلوا في مطاردة عنيفة جداً مع الضب في أنحاء الغرفة تاركين المريض وشأنه
هم لكن فى الحالة دى يجروا ورا الضب واللا يطهروا بطن المريض قبل إنتشار الجراثيم والبكتيريا والفايروسات التى محتمل يكون شايلها معاه السيـد الضب، ويعيدوا تعقيم الغرفة وأدوات الجراحة..
مافى زول فى السودان بيعرف شغلـه؟
فى جهة اسمها أنيمال كنترول (او ايا كان اسمها) هى المسؤولة عن سك الثعابين والضببـة. الأطباء فى وسط العملية، والمريض فى life support ، وهم يسكوا ضب فى الحجرة زى الشفـع.
Quote: في عطبرة عندنا الكهرباء كانت دائماً تقطع، فحكت لي إنه في أثناء إجراء عملية لمريض الكهرباء قطعت فجأة، وصارت غرفة العمليات تسبح في الضلآم، فما كان من الدكاترة إلا الإستعانة بموتر فسبا تابع لأحد الدكاترة. دوروهو ووجهوا النور داخل غرفة العمليات وواصلوا. قلت ليها، والله العظيم حِلآقة ما ممكن يتموها بنور فسبا، خليك من عملية.
آآآآخ يامعاوية والله قلبى وجعنى من الكلام دا .... غايتو ااتخيل لى نحن اتعس واطيب مخلوقات على وجه الارض والله صحي جدآ. والعجب قريبتك الجابو ليها راجل يخمس معاها السرير دى حكاية عاوزة ليها كتاب بعنوان عليك الله يا الله ما أمرض فى السودان....
Quote: ألأخ/معاوية المدير السلام عليكم. ضب فى بطن مريض..مقص .شاش معقولة..بلادى تفقد المقومات الدنيا من الصحة وبالطات فى ألأقاليم..صرصور قطة ضب فأر . والله دى مصيبة..على ألأقل غرفة العمليات دى تكون نظيفة ومهتمين بيها. دى أرواح ناس مالعب.
تحياتي معاويه والله البلد دا بقت عجيبه جدا وكل شي منوقع فيها نسأل الله السلامه والعافيه وما تمشي ليك لي طبيب او مستشقي اخطاء التشخيص حدث ولا حرج الاخطاء الطبيه علي قفا من يشيل وحاجات ومواقف عجيبه جدا عن العلاج ورحلات ومعاناة المرضي الباحثين عن العلاج...
Quote: معاوية اخوي والله غلبني التعليق انا كمان ولكن.
دي مبالغة وكأني اسمع صوت الجمبلغ والله السودان دا الا ياخد جائزة نوبل لعدم الاهتمام
زمراوي أخوي، سلآمات.
يا زمراوي أخوي جائزة نوبل لعدم الإهتمام الهيّنة دي !!! كدي هاك الإقتباس دا وأُخُدلك جولة مع الرآبط المُرفق.
Quote: رحمه الله مستشفى عطبرة لكم موقف ربما كان اسوأ موقف في مستشفى عطبرة رايته بعيني تم تصوير احدى عمليات الجراحة من احد الاطباء القدماء بعطبرة واثناء الجراحة انقطعت الكهرباء المحزن ان قام احد الجراحين الموجودين بزهج شديد بسبب الانقطاع برمي المشرط في بطن الشخص الذي تجرى له الجراحة . منظر مؤسف للغاية ومهما تتطورت المستشفى سوف تبقى هي مستشفى عطبرة.
تشكو ساكت ما جايبلين خبر ، تصدق الضب مرق يشكى للسحلية قاليها الليله اكتشفت انو السودان ده اقــ ـذر مكان فى الدنيا ، عارفة يا اختى مشيت قلت الاقى لي حته نضيفه اترمى فيها ، قلت مافى غير المستشفى وفى المستشفى اخترت غرفة العمليات باعتبارها تكون نظيفة و معقمة قطاعتك تقطعنى يا السحليه من القــ ــذارة الفى الغرفة والريحة الكريهة بطنى طمت و راسى داش وما اشعر الا بوردلب وقعت من فوق ووكتين صحيت القى روحى فى بطن زول جيت امرق عترن لى المصارين بس ربك رب الخير ختفت كرعى وجرى وسكونى الدكاترة البى سفنجه والبى برطوش والفكا فينى مشرط والجدعنى بى صحن حقن المهم اتخارجت وحلفت وجزمت انا البلد دى مالى فيها قعدة ، وهسه بفتش لى فى تاشيرة لى اى مكان فى الدنيا دى اطير عليهو، الله انعل السودان وسكنتو. تجى ياود المدير تشتكى من الضب هو المسكين الضحية مخير الله!! وسكت الضب عن الكلام المباح،،،
يا سعد سقف غرفة العمليات الرآقية دا، صدقني بيكون فيهو ضب. بس، ضب لضب يفرق. الجماعة ديل ضبهم ما بيقع نعمنو تريان ورويان ومربى تربية صحيحة. عشان كدا ممكن من العلآلي بمزاج يتفرج علي العملية وهو طابي ب######شاتوا في العرش و مطمئن غاية الإطمئنان. لكن بتاعنا نحن الموديهو يتفرّج شنو؟؟؟ وهو عارف إنوا حشراتنا البياكُلآ دي كلها عندها سوء تغزية وفاقدة فتمينات وسوائل، وعارف إنوا عضلآت جسمو كلها تتركض زي الضارباهو كهربا، وعارف إنوا هو وبني البشر من غير جنسه في بلدنا دايشين وليسوا عايشين، وعارف البشتنة الحاصلة علي البلد، وعارف إنوا دهاقنة البلد مستكترين عليهو وعليهم حتي فتات الفضلآت. عليك الله البيوديهو يتفرج شنو؟؟؟ غير الشلآقة. بعدين الجماعة الفي غرفة العمليات ديل يقبضوهو كيف وهُم زآتُن بتكون ريحة البنج خدرتهم ؟؟؟. هسّع عليك الله كان ما حِرّة قلب منهم سااااكت يقعدوا يساكِكوا في الضب واللآ يساكِكوا في معايشهم ؟؟؟
والظاهر كدا والله أعلم وراء كل مصيبة كبيرة ضب كبير والله صحي الضب موجود في عقليات من يديرون الحياة السياسية هاكـ القصتين ديل عليكـ الله
أها قول واحد يا عمكـ
Quote: أثر توالد عدد كبير من القطط الضّالة بمستشفى امدرمان، قامت وزارة الصحة بحملة مطاردة لهذه القطط بعنابر المستشفى وغرف العمليات ، وأدى دخول بعض القطط الضالة إلى سقف غرف العمليات "المستعار"، أدى الى انهيار سقوفات غرف العمليات الشئ الذي أدى الى تلوث الغرف بالغبار والأتربة التي ملأت أنحاء الغرف بعد انهيار سقفها المستعار. وقامت إدارة المستشفى بصرف جميع المرضى الذين كانوا في غرف الإنتظار لإجراء عمليات جراحية، مُعلنة توقفها عن العمل لمدة يومين ، بسبب مطاردة القطط .
قول أثنين يا عمكـ يومان فقط لمطاردة القطط الكبيرة أها أنت أحسب الضببه (جمع ضب) عايزين ليهم كم يوم
تحاياي
Post: #49 Title: Re: الـحـقـو مُـسـتـشـفـى عـطـبـرة ... ضـب فـي بـطـن الـمـريـض ... Author: مها عبد الله Date: 04-07-2012, 10:41 AM Parent: #46
Quote: تشكو ساكت ما جايبلين خبر ، تصدق الضب مرق يشكى للسحلية قاليها الليله اكتشفت انو السودان ده اقــ ـذر مكان فى الدنيا ، عارفة يا اختى مشيت قلت الاقى لي حته نضيفه اترمى فيها ، قلت مافى غير المستشفى وفى المستشفى اخترت غرفة العمليات باعتبارها تكون نظيفة و معقمة قطاعتك تقطعنى يا السحليه من القــ ــذارة الفى الغرفة والريحة الكريهة بطنى طمت و راسى داش وما اشعر الا بوردلب وقعت من فوق ووكتين صحيت القى روحى فى بطن زول جيت امرق عترن لى المصارين بس ربك رب الخير ختفت كرعى وجرى وسكونى الدكاترة البى سفنجه والبى برطوش والفكا فينى مشرط والجدعنى بى صحن حقن المهم اتخارجت وحلفت وجزمت انا البلد دى مالى فيها قعدة ، وهسه بفتش لى فى تاشيرة لى اى مكان فى الدنيا دى اطير عليهو، الله انعل السودان وسكنتو. تجى ياود المدير تشتكى من الضب هو المسكين الضحية مخير الله!! وسكت الضب عن الكلام المباح،،،
كامل تضامني مع هذا ( الضب )! سلام ود المدير معاوية
Quote: ثقافة الإستهتار .. اللامبالاة ... التساهل مع عدم الكفاءة يدفع السودانيون ثمنها أعماراً أقصر .. و الام أكثر ... موت مبكر ... و حياة أكثر معاناة
الجميع مشارك في الإثم ... لولا تساهل الناس مع هذا الإستهتار الذي يتخلل جميع مناحي الحياة في السودان لما كان أن يستمر
الموضوع أكبر من تقصير حكومي أو طبي
سلآمات أخي أمين.
نهديك هذا الرآبط : http://www.sudanair.org/?p=8905 يا أمين أخوي، والله العظيم في أحد إجازاتي كنت ماشي مع ود أخوي في سوق عطبرة ولآحظت إنوا في شبه فرحة كدا بادية علي وجوه الناس. سألت ود أخوي من الحاصل؟؟؟ قال لي الجماعة قابضين المُرتبات. قلت لهو كويّس إنهم قابضين مُرتبات تفرّح. قال لي يا عمّك دي مُرتبات شهر خمسة الفات. هل تصدق الكلآم دا كان في شهر سبعة!!! يعني الجماعة الفرحانين ديل قابضين مُرتب شهر خمسة في شهر سبعة، ولِسّع باقي ليهم شهر ستة وسبعة !!!
Quote: يا ود المدير وقوع الضب دا قضاء وقدر لكن تقول شنو في الدكاترة البنسوا ويسرحوا؟
سلآمات يا أشرف.
أُقسم بالله العظيم هذه قمّة المأساة. تخيل الطفل دا لما يكبر ويعرف الحقيقة المؤذية دي موقفو حايكون كيف ؟؟؟ غايتو بس، الله يكون في العون.
أغرب حاجة في التعليقات في ناس متعاطفين مع الطبيب !!!
هاك دا تعليق من أحد المعلقين:
Quote: الله يكون في عونك،أنا حصل لابن قريبي أسؤ من ذلك،مساعد طبي اجري عملية طهور لابن قريبي هذا ،وبعد يومين حصل تيبيس بقضيب الطفل وتم أحضاره للخرطوم ومقابلة أخصائي المسالك البولية فأولي ببتر القضيب فورا حتي لا يحصل قرقرينة ،وبعد خمسة أيام من الطهور تم بتر قضيب الطفل وعمره عشر سنوات،وتم إرساله للقاهرة ،للمسائل التجميلية ،والطفل الان عمره خمسة عشر عاما واصبح يستوعب الذي حصل له واصبح عصبيا،ونسأل الله له الصبر
Quote: في إستهتار حاصل، قريبي عندو عملية زايدة عملوا ليه عملية بواسير عشان إسمه مطابق لي بتاع البواسير،، والمحيرني لحدي الآن الزول ده عملوا ليه شنو في الشرج وهو أصلا ما عندو بواسير؟؟؟؟؟ رجاء للمتداخلين ما يظلموا الجزارين بوصف الأطباء بالجزارين
يا الحلبي في التعليق دا الضحك قررررب يكتلني، وشر البلية ما يضحك. يا أخي فعلاً السؤال البيطرح نفسو، الزول دا صاطوا ليهو شنو وهو العِدة بتاعتوا بكامل صحتها العقلية ؟؟؟ صرآحة كدا، أنا بالجد محتااااااااار. والله صحي...
Quote: بعدين آجنا المَدير، الأخ ده قصتو كانت حايمي هني وانا ما جبلها خبر؟ - والله يا معاويه آخر مره شفت فيها مستشفى عطبره، في زياره للصديق د. السر بيْن، أوايل التمانينات.. يعلم الله كانت من أنضف ما يكون.. هسّع بعد القريتو وشفتو في مقطع الفيديو، ما أكعب ملاها إللِّي مستشفى الباوقه.. نسأل الله السلامه ياخ
سلآمات يا المطرطش. ويييين الحي بيك ؟؟؟
والله يا المطرطش، الجنا دا السواها في إستبالية اتبرا، الـكـلـب في الخُمارة ما سواها يا قول أهلنا. لكن نسوي شنو في الفوضى الحاصلة ؟؟؟
يا حليل مستشفى عطبرة يا محمد لمان كانت بتأخد حصتا كاملة من الألبان والأ######## والبيض من معمل الألبان بعطبرة، وكانت الوجبات تقدم للمرضى علي الدوآم. حليل مستشفى عطبرة يا محمد لمان كانت بتأخد حصتا كآملة من الخضروات والفوآكه واللحوم من سوق عطبرة. يا محمد أخوي، خليّك من مستشفى عطبرة. بتتذكر محطة عطبرة كيف كانت نضيفة وجميلة، وكانت دائماً بتأخد جائزة أجمل وأنضف محطة في أفريقيا .
Quote: فى جهة اسمها أنيمال كنترول (او ايا كان اسمها) هى المسؤولة عن سك الثعابين والضببـة. الأطباء فى وسط العملية، والمريض فى life support ، وهم يسكوا ضب فى الحجرة زى الشفـع.
سلآمات يا أبو الريش.
أبو الريش يا صاحب، يأخي البلد كلها عآيرة. تقول لي أنيمال كنترول؟؟!!! غايتو ربنا يهوّن القواسي.
Quote: آآآآخ يامعاوية والله قلبى وجعنى من الكلام دا .... غايتو ااتخيل لى نحن اتعس واطيب مخلوقات على وجه الارض والله صحي جدآ. والعجب قريبتك الجابو ليها راجل يخمس معاها السرير دى حكاية عاوزة ليها كتاب بعنوان عليك الله يا الله ما أمرض فى السودان....
سلآمات أُختي نجاة.
الجابو ليها راجل يخمّس معاها السرير دي أُختي شقيقتي عديييييل. يا نجاة البلد ما عندها وجيّع، ووقعت تحت قبضة إنجس وأرذل خلق الله. ما علينا إلا أن ندعو الله يعجل برحيلهم ويرفع البلاء عن أهلنا.
Quote: تحياتي معاويه والله البلد دا بقت عجيبه جدا وكل شي منوقع فيها نسأل الله السلامه والعافيه وما تمشي ليك لي طبيب او مستشقي اخطاء التشخيص حدث ولا حرج الاخطاء الطبيه علي قفا من يشيل وحاجات ومواقف عجيبه جدا عن العلاج ورحلات ومعاناة المرضي الباحثين عن العلاج...
الكباشي سلآمات. يا زول وين الحي بيك ؟؟؟
التعليم والصحة والأمن كان إنعدمن في الدولة معناتا البلد صارت غير مؤهلة كي يعيش فيها بني آدم، ودا الحاصل علي بلدنا بكل أسف يا الكباشي أخوي. فعلاً البلد بقت عجيبة وكل شئ متوقع فيها وهذا ما نأسف له، والأكثر اسفاً من كل هذا إنو البلد مافي زول باقي في دابا، وصبحت ما عندها وجيع. مسألة الذهاب للطبيب أصبحت هاجس كبير وكابوس مُرعب ومُخيف، فنسأل الله السلآمة، ونجأر إليه متضرعين أن يرفع البلاء عن أهلنا ويصلح حال البلد.
Quote: تشكو ساكت ما جايبلين خبر ، تصدق الضب مرق يشكى للسحلية قاليها الليله اكتشفت انو السودان ده اقــ ـذر مكان فى الدنيا ، عارفة يا اختى مشيت قلت الاقى لي حته نضيفه اترمى فيها ، قلت مافى غير المستشفى وفى المستشفى اخترت غرفة العمليات باعتبارها تكون نظيفة و معقمة قطاعتك تقطعنى يا السحليه من القــ ــذارة الفى الغرفة والريحة الكريهة بطنى طمت و راسى داش وما اشعر الا بوردلب وقعت من فوق ووكتين صحيت القى روحى فى بطن زول جيت امرق عترن لى المصارين بس ربك رب الخير ختفت كرعى وجرى وسكونى الدكاترة البى سفنجه والبى برطوش والفكا فينى مشرط والجدعنى بى صحن حقن المهم اتخارجت وحلفت وجزمت انا البلد دى مالى فيها قعدة ، وهسه بفتش لى فى تاشيرة لى اى مكان فى الدنيا دى اطير عليهو، الله انعل السودان وسكنتو. تجى ياود المدير تشتكى من الضب هو المسكين الضحية مخير الله!! وسكت الضب عن الكلام المباح،،،
أووووه جدو صديق. سلآمات وإشتياقات.
الضب يا صديق الموج إن شاء الله يسكُت حِسو الغبيان. عليك الله أكان مو غبيان يخلي بيوت الجماعة الفي كافوري والمنشية المجيهات، المكندشات، الممشهدات ويمشي يسكن في غرفة العمليات محل الكدوب والعفن !!!. كلّم السحلية خلها التقولو، ينسى حكاية التأشيرة دي ويتوجه فوراً لكافوري عشان يجدّع ويتنغنغ، ويخلف كُراع فوق كُراع تحت المكيفات الصصصصاقطة، ووكت يبرد يقوووول كدي يتكرفس جووووا الستارات الأمريكية، تضربوا ريحة العطور الباريسيّة، فينوم نومة هنيئة لا ينعس بعدها ابداً. بعد يقوم يقول كدي يمشي علي سُباتة الوساخة يلقاها مليانة جداد ولحوم، وفواكه، يترشد زييييين لآمن يِدشى، وبعد يلحس بواقي العصاير والشايات يكووع فوق راس الإسبِلِت يقعد يشاهد في التلفزيون. ما في سبب بيخليهو يفتش لتأشيرة، عِلآ يبقى كايسلوا إنطلآقة ساكت. والله صحي.
Quote: ضب ؟ معاوية ياخ مالك ؟ هسع يمكن الجماعة ديل عندهم تجارب . و ياخ التجارب اسرار . .. عاين يا معاوية ! الحمار العار من سيدو ودخل الصيدلية سمعتبو ؟؟؟
عثمان موسى، سلآمات وإشتياق.
أيّ والله ضب يا عثمان، تصدق. علي قولك نقول تجارب، والله يكضّب الشيّنة.
حكاية الحمار دي ما سمعتبا. لكن شوف عيني الصيدليات في السودان بيبيعوا فيهن دويات الناس، ودويات الحيوانات مع بعض. يعني بالرآحة كدا ممكن تلقى دواء ملآريا وجنبو جِزال بتاع شعرآنة. والله صحي.
يا أشرف وقفة الزول دا، علي اليمين الوآحد في حوآشة ما يقيفا، خليّك من غرفة عمليات !!!. زولك دا إستند علي يديه من النشاف كي ينقذ روح إنسان ناشف. عجبي !!!
خلي بآلك دا النوع البيكون في نص العملية ويسمع صوت الحفلة برا يروح كاشح العِدة في بطن المريض ويطلع رآقص من غرفة العمليات لحدي ما توووووشك، في نُص الدارة. دكتور فرايحي لمان غلط. والله صحي.
شوف عينى العصافير بقيادة ود ابرق تتفسح فى غرفة العنايى المركزة فى مستشفى سووووووووووبا التعلييىىىىىىىمى
وتدخل وتمرق على كيفها بكسرة فى الشباك
تقولى مستشفى عطبرة!
اللهم لطفك باهل السودان
تحياتى
سلآمات أُختي مهيرة. نسأل الله أن يلطف بأهلنا.
يظل الحال هكذا بينما أنجاس الأرض ينومون ويصحون علي مخدات الطرب. ياريت يورونا هم وأُسرهم وأولآدهم قاعدين يتعالجوا وين؟؟؟. شيخ علي عثمان دا قالوا عيّان، ياريت نعرف لو قاعد يمشي لمستشفى سوبا أو عطبرة عشان يتعالج. سيظل ود ابرك يسبح في فضاءات غرفة العناية المركزة بمستشفى سوبا، وسيظل الضب يسرح ويمرح في أنحاء غرفة العمليات في مستشفى عطبرة طالما البلد تُحكم بأفراد هذه العصابة الذين نُزعت الرحمة من قلوبهم، فتحجرت. نسأل الله أن يجعل معيشتهم ضنكا ويحشرهم إليه عُميان.
ضب يخش فى انسان (ما مشكلة) (المشكلة)لو الانسان دخل فى الضب
سلآمات يا معتصم.
العسكر ديل يا معتصم الوآحد فيهم كان بيلقى الضب في سروالو ومرآت في شعر راسو يطارد في القمُل. هسع لو شافو الضب في صورة الوآحد فيهم يقول يييييييييييياي تصدق. دا طبعاً بعد ما حكمو الناس بالزندية ونهبو خيرات البلد وسكنو في الدُوّر والعلآلي، وتنكرو لوطنهم وبني جلدتهم. العنوهم لعنهم الله. أقول قولي هذا واستغفر الله لي ولكم.
Quote: الصب ده بكون شغال في المستشفي عامل نظافه ..
افتكر الجماعة خلصوا جاء نازل ...
الله يكون في عون البلد....
شكرا اخ معاوية
سلآمات يا عماد.
الله يكون في عون البلد الما عندها وجيع يا عماد أخوي. حليل عُمال النضافة يا عماد، وحليل البلد في عضُما البقت محكومة بالنطيحة والمتردية وما أكل السبع. غايتو ربنا إبتلآنا، ونسأله أن يرفع عنّا البلآ.