عثمان يرحب بإيمان .. فهل من مشارك

الأخ تراث لست من الشعراء ولكن من الغاوون واهلا ومرحبا بايمان في البورد وفي كل مكان وسلام لي ناس السودان وبالاخص ناس امدرمان وبالتحديد ناس العرضه الحنان

الحلم والاكرام يرتادان مجلسنا بقدوم سيدتهما ايمان
لك المحبة والتجلة والاخوة الصادقة ويتقدمهم العرفان
ولابن خالكتك التباريك الجميلة والتباهى ومعاهما
الشوفان
وللجندرية مثل مالكما ست النساء جميعهن حناكيشا
وعربان
لك التحية ولبنت خالتك التمنيات باقامه سعيدة بيننا
ولخالتى الكريمه الجندرية المحبة الفائقة والتبجيل

عثمان تراث نعلها دي ايمان بتنا
عموما في كلا الحالات اهلا ومرحبتين
حبابا واليوم السعيد الليله جابا

تراث
إيمان دي
هتراشة زي شيري؟

طاعمة قضيم؟

بنت الأحفاد بتقرب ليك حاجة ؟ فكراًً؟

عندك كيبورد اشتر زي تماضر؟

هالة قوتة عزمتك لي ننفير التغيير؟

أسمك ورد في لستة المتشابهين المية؟
ولو لا بتقبلي نكون الشبه المية وواحد؟




انا بقبل

ابنوسي كمان

ايمان

قلب الناي مخطوف
وبابك نازف ويد الذين يودعونك
في المساء شفيفة
ماذا سيكتب عن يمام ابيض
من فرط هذا الليل شف
والحزن من دمع الندى رف
يا اجنبية يا سهول الروح
هل كل هذا التيه كف؟!

طار الزمان
ورك هذا السهو، أعلى المأذنة
في الناي ماء ام هو الغيم دنا
صلى عليك الطير من ألف سنة

معاد إلى صيغة الذات
ينهض منبثقآ من تخوم توحشه
ويراك- بأعذب من زمن فيالحنين معلقة فوقإشراقة المرء يا آدمية-
حينيراك معلقة بدم الناي،أعلى مساكنه ، فله الله
إما ان يصيغ السؤال الجديد عليك
وإما يسيغ ألأسى والجنون الشديد
يرعاك غائبة عن حضور الجسد
إن القلوب مؤسسة لاكتساب الحنين على كبد
والحنين مراوحة الروح بين الفؤاد وبين الأبد

{عثمان البشرى- الكائن الخلوي }

أهلآ وسهلآ ايمان

عثمان

يا خواف ، لليوم الثاني على التوالي حا تتغدى وين؟! والتستر وراء المزاح لن يحميك من ضفر مسنون وجارح ، ولا كوب طائر ، ولا مفراكة صقيلة أو كنش مدبب وقاتل

مرحب ايمان شرفتي الدار

ولجوه


-

ايمان
حللت اهلا و نزلت سهلا
منتظرنك
هيا حثى خطاك و تعالى
مع محبتى

يا ايمان
مرحب بيك
يا عنوان جميل فى البورد
و مادام قدمك عثمان
يبقى سلام و مرحب بيك
ة اهلا بالجديد انسان

مرحب بالاخت ايمان

الف مرحب بايمان
اثق وعن معرفة في انها ستكون لاعبة حريفة في منتخب الكبدة والمصران
وياريت يا عثمان لو كتبت شعرك انا وانت نعلم تماماً انها تستحق
ولكنت دعوت الموصلي لتلحينه ورقصت على ايقاعات فرحي بقدومها .
لن تنجح محاولاتك بحفر حفرة الوقيعة بيننا اخشى عليك انت ان تقع فيها.
ابوساندرا
ما تخاف عليه لو كنت استخدم الكمشة والمفراكة لنفق صاحبك ابو قلب خفيف من زمن ولما ترافقنا منذ 85 وحتى الان ، لكن اختك اتقنت الصنعة وعرفت متى واين تجعل العاشقة الغيورة تتراجع لتدفع بالصديقة الديمقراطية القادرة على الانصات حتى لتولهاته وغزله في الاخريات ثم تعرف متى تبادلهما الادور .والا فكيف استطعت الحفاظ على جمرة العشق وقادة ومودة الصداقة قائمة كل هذا الوقت ..
بعدين ياخوي انا ما قاعدة اعمل الغداء اساساً ، بدفع ربع مرتبي لاثيوبية جميلة لتفعل ذلك ، ثم اكل عقل عثمان بكلمتين حلوات عشان يعمل العشاء هو . طيب كدا كويس خليتنا كشفناورقنا ؟ هسي يقوم يتمرد ويعلن العصيان ونبيت القوى .
شكري لكل من رحب / ت او سيفعل واخص وليدنا ود الجعلي ..
ايمان
الف مرحب وبالاحضان وشوق السنين يا عزيزة

ما عارف اذا كان ممكن أقول ليك مرحب لنج زيك وواحد عموما أن شاء اللة تكون قدمنا قدم خير علي المنتدي

اجمل حاجةفى ايمان، هى


تراث والجندرية


مرحب

سلام مربع

ايمان

الف مليون مراحب

تعالي اوضتناياايمان
وانت ياعثمان
ادخل صالون الرجال داك
وبيتنا نور بي جيتك
واتفضلي
احلى قهوة
من اهترش بت
الى احلى ايمان

كنا فرشنا السكه ورود
لو كلمتنا كان بالجيه
خطوه عزيزه ويوم موعود
لاخلاك تطرانا شويه
تسأل فينا وتجي حلتنا
طعم الفرحه الليله غشتنا
الحظ الجانا غشا سكتنا
تسلم سيرتك اهلا بييييييك

مرحبا إيمان
في ليمون وكمان منقه
اها قلت لي اي شربات
ok
حاجيب ليك العايزاه

آمنا بالانثى يازوربا
مرحبتين حبابك يا ايمان ماعارف لكن شكلك كده بعرفك شديد
لكن الغائب مني شنو ماعارف امكن قصة الشعر (برفع الشين) او شكل الشنطة ومحتوياتها أمكن انا ذاتي رايح
الاسماعلية رايح جاي
تراث
الحق شايف الجندر ناس رفاعة بزيدوها شبر بعد كده بتحتاج سلم ياخوي
انت منتظر رقية وراق لسة يا خوي

ايمان
مرحب بيك
والبجيبو تراث بالتأكيد حميل جدا

مليون مراحب

عبدالله جعفر

مرحباً بك يا إيمان أخت عزيزة في البورد .. ما تخافي تعالي لجوة .. تراث ود خالتك معاك .ز
شنو يا شيري طوالي عايزة تدخليها أوضتكم كدي خليها تسلم على الناس كويس وبعدين ملحوق الدخلة

لكم جميعاً الشكر ، شكر من نوع خاص مثل خصوصية شوقي لإيمان .

الفاتح ياسين

لخمتني ، كأنك تعرفني وتعرفها ، هل ذكّرتني ، أو أوضحت لي الأمر ؟

ود الجعلي

لماذا أنت ود الجعلي وليس الجعلي نفسه ، جسارتك في نظم هذه الكلمات تؤكد انك لست ود الجعلي فحسب ، بل جعلي بذاتك ولذاتك .

الموصلي

انها إيمان تاني خالص ، مع احترامي ومحبتي الكبيرة لإيمان التي تقصد .

تبلدي

بعض من أسئلتك تصعب إجابتها عليّ ، ومع ذلك أحاول :
- لا توجد هترشة مثل هترشة شيري . أما في الطعامة فهي أكيد أطعم من بت قضيم بكثر ، بالأقل لي انا (يبدو ان ذكر إسم شيري أصابني بالهترشة) .
- بت الأحفاد تقرب لإيمان بالمكان , على الأقل ، فإيمان وُلدت وعاشت ، ولازالت تعيش في نفس الحي الذي توجد فيه كليه الأحفاد بامدرمان .
- ربما يكون الكيبورد لدى ايمان أشتر مثل كيبورد تماضر ، ويالفرحتها وفرحة تماضر لو اشتراكتا في هذه الصفة . أو أية صفة أخرى .
- هالة قوته عزمتنا جميعاً . لكن أرجوكم لا تحشروا ايمان في زاوية الجندر والنسوية ، والكلام الصعب ده ، فهي أرق من ذلك كثيراً . انها مثل النسيم ، فهل يحتاج النسيم الى أيديولوجيا ؟ ، مثل الماء الزلال تعكرة أية عسرة … يمكنكم ان تسعدوا بمجرد وجودها معكم ، حتى لو إلتزمت الصمت مثلما تفعل الآن ، فكم هو صمتها جميل (دي هترشة طبعاً.. زي هترشة شيري وأكتر كمان، يعني مجرد مزاح) .
- إسمها لم يرد في لستة المتشابهين المائة ، وهذا يصعب جداً في أية لستة ، لأنه من الصعب أن يوجد من يشبهها (الهترشة مستمرة وواضح انها اختلطت كذلك بنوع من الهذيان)

- ابو ساندارا

أراك وقد تقمصتني باختيارك لهذه الكلمات الجميلات لعثمان بشرى . وهل جاء أسم الشاعر الأول مطابقاً لاسمي صدفةً ؟
كفاني الله وإياك شر الجندريات . الغداء أستطيع توفيره ، ولكن كيف أوفر لنفسي السلامة ، هل تعلم ان الجندريات يمكنهن الذبح ، لا أنسى أنها ذبحت وريدي بسكين لتقطيع الورق ، وكانت تلك بداية علاقتنا ، ولا أدري كيف ستكون النهاية ، عفواً ، أقصد الاستمرار الى ما لانهاية .

هوبلس

لماذا تسمى نفسك عكسك ؟ لا تقصر أبداً في الترحيب بالقادمين الجدد ، وهذه سمة الكرماء والرحباء ، وكل أملنا يتركز في أمثالك . اسمك لا يوصفك أبداً . ليتنا جميعأ صرنا بمثل رحابتك .

لنا مهدي

تعاطفت كثيراً معكم في ذلك الهجوم الضاري عليكم ، وبدأت أتعلم منكم هذه المحبة .

الخواض

أنت تطلبني العمر كله فداءً لذوقك الأصيل ، أكرر انني لا انسى أبداً انك كنت أول من شجعني عندما بدأت مساهماتي في هذا المنتدى الحميم وصدمتُ بقلة المشاركين في بوستي الأول ، لقد قدمت لي درساً في الذوق والتعامل . وظللتَ تواصل هذا الدور بصدق حتى أخر بوستاتي : هذا البوست وبوست الترحيب بزوربا . ليتني أكون مثلك ولو إدعاءً .

اسامة الخاتم

ازيك كم أحن لزمنك في السودان . كيف اشكرك ؟

الشريف

شكراً لترحيبك المختصر الجميل بايمان ، وخير الكلام ما قل ودلّ .

الجندرية

لماذا شعرت بالخوف من هذه الكلمات الجميلة ، يبدو أن نظرية المؤامرة سيطرت عليّ حين قرأتها ، ربما حدث ذلك بايحاء من أبو ساندرا . وربنا يجيب العواقب سليمة ، فلقد أكدت في موضوع البوست انني أمزح ، ثم أكدت أكثر من مرة أنني اهترش مثلما تهترش شيري وأهزؤ .
بصراحة خوفي ازداد عندما قرأت قولك لأبو ساندارا : (لنفق صاحبك أبو قلب خفيف من زمن) فالنفوق لا يوصف به الإنسان ، بل الحيوان ، وعليه فقد شعرت بأن هناك شتيمة مضمرة ، قرأت جملتك وهي تقول في مضمرها (لنفق هذا الحيوان من زمن) .
وطالما كنت في حالة شهادة المحتضر ، وهي شهادة قوية الحُجة ، دعني أوكد يا ابو ساندرا انها لا تأكل عقلي بكلمتين حلوات حتى أقوم بعمل العشاء ، لقد ظلت الشغالة الأثيوبية الجملية تطعمنا وجبة الغداء دائماً ، وظللت أتولى مهمة عمل العشاء ، طوعاً أو كرهاً ، لأوكد لنفسي ادعاءات أدعيتها قبل الزواج ، وكنت حينها أدعي أنني مثقف ثوري (شخص متحرر من الجندرة) ، وبصراحة كده انا نادم وسافي التراب . فلتذهب الثقافة والثورية الى الججيم مقابل أمراة عادية ، (لأ اقصد أمرأة غير زوجتي هذه) .
يبدو إنني إنحزت بفعل تداعيات الكتابة الى ذاتي الخفية الكامنة ، ضد الذات التي أدعيها ، كيف بالله نصالح بين هاتين الذاتين ؟ أستطيع الآن أن اقول عكس كل ما قلته سابقاً ، وأن أحس بالصدق في القولين : إنني سعيد وفخور بان تكون الجندرية زوجتي . وسعيد بعمل العشاء والاعتماد على شغالة تقوم بجل أعباء البيت اليومية ، ولكني أيضاً ، أحب الركون الى حياة أسهل ، حياة ربما كانت متاحة لي لو اخترت غيرها . لو اخترت بنت خالتي مثلاً . (كلو هترشه .. مجرد مزاح) انا سعيد جدأ بحياتي هذه . (هل تصدقون؟) .

زوربا

مرحباً بك وبها .. كم نحن سعيدون بوجودكما بيننا . أغار من دخولك المنتدى معها في يوم واحد . (وهذا طبعأ مجرد مزاح لافي غيرة ولا يحزنون .. ولماذا أغير ؟)

تماضر

وأجمل حاجة في منتدانا هذا هو انت .

شيري :

سلام دائري . وشكر مستدير .
لقد استعنتُ بادعاء هترشتك في محاولة للخروج من الورطات والمآزق التي يمكن ان يلحقها بي هذا البوست ، أعلم أنني لن استطيع ، ولن يستطيع أحد ان يشاركك هذا القدر من الهترشة .
ولكني أتحداك بسلامي الدائري اليك ومحبتي الدائرية ، فسلامي الدائري أكمل من سلامك المربع ، الدائرة أكمل من المربع كثيرا ، فهي لا بداية لها أو نهاية ، إنها مثال المطلق المكتمل ، الأول والأخر معاً في لحظة واحدة . او هي بالأقل أبسط صورة لتمثيل الكمال .
ومع كل تلك المحبة أعترض عليك : أنا الذي دعوت إيمان الى هنا ، وارفض بشدة فصلنا : انا في صالون الرجال وهي في غرفة البنيات كما قلتِ . ما الفائدة إذاً ، فلقد ظللنا مفصولين كل العمر ، وظللت أتمني أن نلتقي في غرفة واحدة (أقصد في هذا المنتدى) وهي غرفة تجمعنا جميعاً ، ولا تسمح بأي خلوة ، بل هي لا تسمح حتى بنسيان وجود الآخرين مع هترشتك المستمرة .
شيري لك مني دوائر محبة . أو بالأصح دائرة محبة كبيرة ، بل أكبر .

الفاتح

تقمصتني أيضأ .. أعطنا أي شربات للفرح .. وإذا لم تأتٍ الزغاريد فسنتخيلها .

هدهد

لا يمكنك ان تعرف ايمان من سابق .. فهي جيل بعدك (سافضحك بسبب الغيرة) . نعم انتظرت رقية وراق كثيراً ، ولكنها أخيراً جاءت فشكراً لها ، لكن وحتى لا أضطر لمكابدة ذلك الموقف ثانية أتيت ببنت خالتي ايمان لتغنيني عن مثل ذلك الانتظار المر ، انها محاولتي الناجحة لتحقيق الاكتفاء الذاتي .

عبد الله جعفر

انت كذلك جميل وحميم . ملايين المحبة لك اذا كانت المحبة قابلة للتعداد .

فيصل النعيمة

ترحيبك حميم ومطمئن ,, أراك تؤيدني في منع شيري من أخذ ايمان منا ، أحتاج مزيداً من التأييد .

مرحب بيك ايمان نورت البورد ومنتظرين وعد عثمان

الزعيم بكري
كيف يمكننا شكرك ، وعلى أي من فضائلك علينا يتوجه شكرنا؟ وهل يكفي هذا الشكر ؟
أكرمك الله بقدر ما أكرمتنا وضاعف لك الأجر بقدر لا محدود .

الطاهر الحبيب
ألم ينحقق الوعد بعد؟
كنت اعتقد ان مجرد ذكر الاسم يكفي .
يبدو اننى اسقطت ذاتي في ذواتكم .
(هترشه)
(أبو ساندرا بطّل التحريش)

مرحبا بإيمان
خالص الود
دبيب

تراث

حبات القمح التى ألقيتها الى هذا البورد نبتت ونمت وهاهى

السنابل منها تقف شاهرة مالهامن جنى

فهيا لنحصد

مرحب السنبلةايمان

مرحب القناديل زوربا

ابن النخيل

مرحب بإيمان آلاف المرات
مرحب بكِ حديقةً إضافية في هذا الحوش الواسع

وبانتظار كلامك ، أو حتى صمتك البليغ ،، الذي أوحى لنابه تراث

::

عثمان تراث والجندرية
أنتما ألذ زوجين أقرأهما في حياتي
أتمنى لكما دوام السعادة ،، والمناكفة المُنِمَّة عن حب كبير

ـــــــــ
سمنـــدل

يااهلا والف مرحب بايمان
اتفضلى ياايمان لى جوه
وخلى همبريب البورد الصاقط ده يضربك من هجير الزمن الكعب ده
خشى وامنياتنا ليك باقامه طيبه
وربنا يجمع الشتات ياعثمان ويقرب البعاد
والف مرحب بيك يا ايمان

ح الشيخ

searching for a heart of gold

الأعزاء دبيب وابن النخيل والسمندل ومحمد الشيخ
كيف اعلق على هذا الكلام الطاعم الحميمم .
شكراً حد الشكر .
ايمان :
اتعبني هذا البوست ، فلماذا لا تدخلين وتتحملين عني محاولة الشكر على المرحبين بك , حتى لا اهترش اكثر .

الحبيب تراث
صاحب صاحبك صاحبك
من الباب دا نرحب بايمان
الاسرة الجندرية حقتكم دى انا لدى معها اجمل الذكريات
الونسة الممتعة الشعر المسرح القات الغناء والجندر امانى لسه بتضحكك قصة المرا القالت كلام فارغ على كلام الندوة انا حكيتا كتير و انت كل مرة تضحكى احكيها تانى
تراث الحبيب لسةه عشاك الكارب داك والشواءات الرهيبة
طبعا ياشباب تراث مع الموهبة المعلنة فى الكتابة الرائعة حكاى مدهش يطرز القصص فى سرد مدهش مش زول مسرح

ايمان اهلا ومرحب بيك ومع الفرحه وحلاوة القول.....وقت تبقى الدروب سمحه وخطاوى اللهفة فيها تطول نقول اهلا.


اهلا ومرحب بيك اخت ايمان اهلا اهلا اهلا اهلا .

اها بعد ما رحبت والله ياجماعه دايره ادخل فى الموضوع طوالى وانا رغم انى اثرته من قبل لكن لسه حارقنى .
الموضوع:

ليه يا جماعة حتى البورد بقى فيه خيار وفقوس كل يوم ترحيب وسلامات بى عضو جديد انا ماالى مالكم ما بترحبوا بى ما انا جيتكم متحاننه معاكم وجيت مشتاقه ودايراكم ومعجبه بيكم كلكم مالكم ما بترحبوا بى كل يوم اقراه ترحيب بى زول ويا ايمان ويا ود خالتها معليش انا ماقاصداكم فى الكلام الجاى انا يعنى عشان ما عندى ود خالة هنا اها انا الموصلى ود خالتى .......... الموصلى امه وامى اخوات شقيقات بنات ام وابو بعد ده ما بترحبوا بى؟؟؟؟؟ وانت يا الموصلى يا ود خالتى ما بترحب بى برضو؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يعنى الاغنية ما دايرنها بس كلمة ترحاب منكم بتبرد على اها بعد القلته ده كله ما بتقولوا لى حاجه وما بتهدوا لى اغنية انا منتظره .ولو ما عبرتونى انا حانسحب

تراث الفين مراحب بك الاخ العزيز
والاخت الكريمة ايمان
ننتظر ابداعاتكم الجميلة
ali adab

الأخت ايمان مرحب بيك والبيت بيتك, بس خليك زيي, انا ذاتى جديد, لكن ما عليك قبل ما اخش الصالون, ذى الضيوف واشرب الليمون واكل الحلاوة والتمر, توش على التكل عست كسرتى ومسكت كنشى وفركت ملاحى, واجرك على وما تخجلى انتى ست بيت

لطفى