زوجة بمواصفات عالمية !

أحببت أن أعكس الآية فارحب بكم على طريقتي الخاصة بدلا من أن ترحبوابي فأنا أعرفكم جميعاولهذا انا افتتح معكم اولى كتاباتي كتحية للجميع وأخص الأزواج والزوجات الأحياء منهم والرياضيات.

بادئ ذي بدء الزواج نعمة من الله تعالى وهو اكما ل لنصف الدين ولا يوجد نعمة في هذه الدنيا تضاهئ نعمة الزوجة الصالحة والعكس صحيح بالنسبة للمرأة.
فماهي مواصفات الزوجة التي أحلم بها
* مواصفات عامة
- ما بحب المرة النقناقة التقول ليك في اي حاجة لي شنو وعشان شنو يا ناس شنو دي مابعرفها.

- برضوا ما بحب الزوجة الجنها طلبات يا راجل جيب وكلما تجيب تقول ليك تاني جيب وانا بدل ابقى زوج حابقى جياب والله جياب ذاتها ما عارف نصنفها تبع ياتوا وظيفة.
- برضوا مابحب الزوجة الجميلة شدييييييييد عشان دي حاتعمل لي وجع رأس لأنو بتفتكر لو ما انا أتزوجتها كان في مليون واحد واقف في الصف فالبنات الحلوات ديل ما تبعي خليهم يشوفوا ليهم زول غيري والعايز واحدة بالمواصفات دي مبرووووكة عليه.

- برضوا ما بحب الزوجة الما بتمشي كلامي صاح كلامي دة مرات بكون غلط لكن ما بكون غلط لحدي ما يخليها ما تمشيه يا خي مشي لي شوية وحا امشي ليك شوية.

- ايضا ما بدور الزوجة الاجنبية لانو دي حا تدخلني في مشاكل عندها عاداتها وتقاليدها وانا بحترم عادات وتقاليد الآخرين لكن دة ما مبرر أعيش عاداتهم جوة بيتي وبعدين حاندخل في مشاكل كثيرة أولاد وتربية وكدة مع احترامي لكل الأجنبيات وزوجاتهم وهم عايزين كدة بس هم حرين وانا مامعترض عليهم بس انا ماعايز كدة.

- برضو مابحب الزوجة الما بتعرف الصبر لانو دي ما ممكن تعيش معاي وممكن من أول فلسة تفلسع كما يقولون واها انا اقعد من غير زوجة والله شنو اذا كنت غير ميسور الحال؟

- صاح امي ما نقناقة وما عندها مشاكل معانا ناهيك عن زوجتي عشان كدة ما بحب الزوجة الما بتحب أمي لانو انا بحب امي شديد وعشانها ممكن اعمل اي حاجة مهما تكون.

- ابوي ما حايكون عندوا مشكلة لانو ما ليه في مشاكل الحريم ولا فاضي ليها عشان كدة ما حا تجي منها مشكلة
--

* زوجة بالمواصفات دي يا ربي القاها وين اللهم الا في الجنة

* يازول ما تهضرب ساكت دي ما مرتي ذاتها بدمها ولحمها
* عشان كدة لو دار بي الزمن وعايز اتزوج من أول حا أتزوجها ذاتها لانو بعرفها من وقت الجهل بعرف طبعها وبتعرفني تمام.

* دي ما بتعرف حاجة اسمها دهب لانو عارفة ما عندي حق الدهب ولو عندي يا ربي حا اشتريه ليها والله ماعارف ؟لانو الفكة لما تكتر في جيب الزول بحتار ذاتو يعمل بيها شنو

* ولو فرضنا حا اتزوج تاني - طيب خلينا واقعيين نعدل الصيغة لو فرضنا في واحدة حا تتزوجني تاني (بس بالله عليكم الكلام دة سري للغاية) الزوجة التانية دي لازم تكون بالمواصفات دي او بالاحرى انا لازم أكون بالمواصفات دي - ياربي حاكون بالمواصفات دي دة نخليهو للزوجة القادمة
* ختاما تحياتي لكل الزوجات المخلصات المرابطات مع أزواجهم في الشينة والحلوة أو في الحلوة والمرة
* يا ربي زي ديل في كثير ؟
* و الله راقدات وبالكوم وعايزات بس السترة لا اكثر لا اقل
* لكن الرجال بينى وبينك غلبتهم العيشة وسابو الحريم بس ما كلهم في برضوا رجال يعجبوك
* عشان كدة الحياة ليست لقمة سائغة ولا السماء تمطر ذهبا حتى نوزعه على النساء وخلينا نرضى ببت بلدنا البتتحمل أذانا ومشاكلنا

وكم أنت رائعة ورائعة يا بنت بلدي

أنور الطيب
أولا نرحب بيك ترحيب شديد و غليد و نورت البورد
هناك بوست إسمه فن البيان في سيرة النسوان ،، و أظنك قرأته.
على كل حال ،، مواصفاتك دي ما صعبة شديد ،، و لكن كما قال نبينا الكريم أنك لو تضايقت من زوجتك بسبب خلق ما ،، فتذكر خلق منها يسرك
تسلم أنور

شكرا أبوجهينة على الترحيب وأظل دائما ممتن لما تكتب فأنا أتمتع به غاية المتعة وأنت تدري لماذا فأنت حقيقة نجم يتلألأ في هذا البورد
تقبل تحياتي

الأخ أنور الطيب
مرحب بيك ،وإنت لمن ما بتحب كل هذه الصفات والله إلا تعرس في حرينا وهي لعبة شعبية قديمة لمن لم يمارسها تعتمد على عراك فريقين بيد واحده ورجل واحده - يعني من خلاف -

تحياتي الملا عمر وهي حرينا والله أم حرينا وتحياتي لك