طــــــــه السـمـســــــار

جاء فى صحيفة السودانى الآتى : -

الفاتح يوسف جبرا
عاد حاج محمد من (السوق) نهاية اليوم (تعبان) ومجهدا بعد يوم عمل مضنٍ وشاق، لكن لم يجد اُم الاولاد (حاجة نفيسة) وبعد اكثر من نصف ساعة عادت الحاجة نفيسة.
= يا ولية مشيتي وين الجوع طلع عينا؟
- (زينب) جارتنا دي فضل ليها قسطين بتاعات (ثوب شفون) قلت الدنيا أول شهر احسن امشي اجبيهم منها.
= عليك الله شغلانة (الدلاليات) دي شغلانية يا ولية؟
- يعني عاوزني اشغتل شنو... دكتورة أسنان.
= ياها فلاحتك... النسوان يسمسروا في (اليخوت) وانت تتحاومي لي بالبيوت.
- ومالو كل زول بي رزقو.. والعافية درجات.. الليلة (شفونات) وبكرة (يخوتات) ما كثيرة على الله.. ثم (مواصلة)... لكن يا ابو محمد هسع سمسرة اليخت الرئاسي دي تكون كم؟
= عليكي الله قومي سوي لينا الغداء مصارينا انقطعت بالجوع وخلينا من الكلام دا.
- وبعد ان وضعت (الحاجة نفيسة) صينية الغداء امام (حاج محمد) طلب منها اعداد الشاي مباشرة كعادته دائماً.. فذهبت ووضعت (الكفتيرة) على النار وبينما هي كذلك تراءى لها أن هناك شخصا (يدق) في باب الشارع.
= اذيك يا حاجة نفيسة.
- أهلاً يا عزيزة يا اختي.
= والله يا حاجة نفيسة انا جاياك ومستعجلة عندي بس شغلانة عاوزة اقضاها.
- إن شاء الله خير.
= لا خير... سمعت تحت تحت انو (القصر الجمهوري) دا عاوزين يهدوهو ويبنوا واحد جديد عشان بقى قديم وشكلوا بقى ما (سياحي) قمت كلمت (طه) السمسار قلت ليهو تعال نشتغل الشغلانية دي سوا قام قال لي اجي اكلمك عشان تكلمي (حمادة) ولدك يدخل (الانترنت) يشوف لينا شركات تقدر تقوم بالمهمة دي.
= وانتو مصلحتكم شنو؟
- كيفن عاد... ما بنشيل (الكوم... ميشن)
= والكوم (دشن) دي تكون زي كم كدا؟
- خليها ساكت دي بالشئ الفلاني.
عندما جاء حمادة من الكلية اخبرته والدته (بالمهمة).. وحيث ان حمادة ولد حريف في مسألة (النت) وكل يومو (داكي) المحاضرات وقاعد في (النت كافيهات) فقد جلس جلسة واحدة استخدم فيها كل ماكينات البحث ےےےےgoogle..yahoo..alta vesta.... واخيراً استطاع الحصول على عناوين أكثر من عشرين شركة متخصصة في بناء القصور الملكية والجمهورية.
= هسع يا حمادة قلت لي الشركات دي كلها بتقدر تبني (القصر) دا؟
- ايوه يا عم (طه)
= طيب عليك الله رسل المواصفات المكتوبة في الورقة دي وشوف ح يعملوا لينا القصر دا بي كم؟ وما تنسى تقول ليهم (تسليم مفتاح).
- حاضر يا عم (طه)
وأرسل حمادة وE-Mail لكافة الشركات العشرين بعد أقل من 48 ساعة جاءته الردود فشركة (مازولا) الاسبانية ارسلت له صورة للقصر المزمع اقامته مع جملة التكلفة التي بلغت 250 مليار دولار.. شركة (بي زولا) البلجيكية لبناء القصور الملكية فقد كان عرضها اقل حيث بلغ 157 مليار دولار.. وكانت هذه احسن العروض.. وقد قام (حمادة) بتسليم الطرفين بعد طباعتها للعم (طه السمسار)..
بعد اسبوع
= أهلا يا عزيزة اتفضلي.
- اتفضل شنو اول حاجة باركي لي.. العطاء بتاع القصر وقع لينا انا وطه السمسار.. وهسع جيت اقسم معاك (الكوم ميشن) بتاعتي الحلال بالبلال.. كل واحدة مليون دولار..
وعندما رأت (حاجة) نفيسة وهي تفتح الشنطة المليئة بالدولار الاخضر (اتخلعت) مما جعلها تستيقظ من (غفوتها) وهي تقول:
- ووب علينا.. دي نومة شنو؟ الكفتيرة ما بتكون اتحرقت.
























:::