مجموعة فريدة من اعمال الشاعر الراحل حميد

مات حميد ولا زال الشمال بحاجة الى بوستة ( انترنت )
ومدرسة وسطى ( تعليم في مستوى يليق بتاريخ التعليم في هذه الولاية

-----------

سنى على النضال أيدى ... سوكى بالهتاف فمى
شوارعك لى دروبها على ...
أذا ما أخر العلاج الكى ... مراويدك حمر يا أمى
حرقت لهاتى بالغنوات وقلت يبرد حشاك يا أمى
من التعب البلا صالح تقيفى ... تروقى ... تنجمى
تسوى مكانتك المطره ... تضوى البيت وتنحمى
تمرقى صبوحه للجيران قدح فوق أيد وفى أيد ألمى
يلاقوك شفع الكتاب نضاف وظراف بلا النسمى
يغنو ليك غناوى الساب وفى بيوضه مافى سراب
جبال كجمى وفيافى الكاب تقيف بالخضره منقسمى
فيافى الصى وبيوضه البراسيم فيك مفروضه
خدارا يرارى شوف عينى على الابواب
طواريها وحواريها وقماريها وبقت روضه
بقت تشرب من الحامداب
تشوفى رهاب بعد نجمى ... وأشوفو قريب قرب نضمى
بشوف العالم التحتانى هيلاهوب وقف ناهض
وهد عمايد الفوقانى جوه الجب رمى العارض
وفى الساب الجمال أفراد عريق الحب نبض نابض
متل نبض الحروف أسمى
وغناوينا القبيل رقراق علينا تصب برد قارص
وأجر نمى أدودى لهاتى بالغنوات
عقب يبرد حشاك يا أمى
وطنى ولا ملى بطنى ... سكاتى ولا الكلام النى
بـلـــيــلـــتى ولا ضبايح طى ... قليلتى ولا كتر سمى
سلام يا أمى ... سلام لا هكمى لا لكنى



سطوة محاسنك


كــــــــــــــــــــــــــــــــــــان نفسى أقولك من زمان
بالكاتمو فى سرى ومكتم فى حشاى .. مدسوس سـنين وسنين
بالشـــــــــايلو فى عيـــــنى معــزه وفى قلبى ريدا
بخــــــاف الغـــــــــربه والشــــــــوق والحـــــنين
زاملنى زى خاطر الفرح وكتبن يقاسم الهم عذاب
وكتين مسامعى تكون وتفتح مباهج الليل ظنون
كــــــــــــــــــــــــــــــــــــان نفسى أقولك من زمان
سـطـــــــوة محاســـــنك عندى ماكســرت جفـــون
وكت العـيون تعــــــبرنى زى خاطــــر المســــــاء
ســــــــطوة محاسنك ما الرخام الفى حــــــــــــرير
وكت الثغـــــــــــير يفجعنى بحـــــــــــرفا قــــــسى
ســــــــــطوة محـــــــــــاســــــــــنك عنـــــــــــــدى
وكتين كـــــــبريائك ينهزم لطــــــيبتى بلفظة حنان
وكتين مشــــــــاعرك تنســـــــــــجم فى عمــــــرى
تمســــــــح قلــــــــبى برعشــــــــة أمـــــــــــــــان
ســــــــــــــــطوة محــــــــــاســــــــــــنك عـــــندى
وكتين شوقى يصبح فى هواك ليل عزه مابتعرف هوان
عينيك وحاتك غربتى وأهلى وديارى الفيها ضايع لى زمن
عينيك وحاتك شوقى لزولا ولوف من بعد ماساب عينى سهن
وأنا كـنت داير أشرح حكايتى معاك ألف أحكيها وأزيــد القول ولف
وأتمنى لو قلبك عـــــــرف .... كان من زمــــــــــــــــــــــــان
من قبل ما فى قلبى يتحكــــــــر زمان الفرقه فى جرح الاسى
من قبل ما حــــــــرف الحقيقه الحـــــــــــــــــلوه يتبدل عسى
ويصبح أمانى كتيره فى خاطر الحنان .. كان نفسى أقولك من زمان



نــوره
محمد الحسن سالم حميد

وكتين يضيع عرق الجباه الشم شمار فى مرقه .. يا نوره اه
من دربك التور نفس خيل الصبر .. فتر خطاوى الشوق وراك
تعطش شموس الغر تهضلم فى المغارب ... يسترالضو الكهارب
تستر المدن الضبابيه السرابيه الكابه حائط التيه والطشاشات فوق قصير
يا أم عوارض مو دعاشه ماها شبوره وتقيف جاى ليك يا نوره غيمه
تملا ماعونك خريف يملا عينيك ويفضل ... يروى جواك العطاشه
يا نفس فجر القصائد ... يــــــا بـــــــــلادى
ده القطع صوت الروادى بالواج الجاى وغادى ماهو صوتك
ولاها صورتك دى البترقش ناديه فوق صدر الجرايد
وأنت يا حضن الصحارى ... وشفع العرب الفقارا
البفنو الشايلا أيدهم ... ويجرو كايسين القطارا
لا سراب الصحرا مويه ... لا حجار سلوم موائد
حالكم البصرخ ينادى ... يا وطن عز الشدائد
يا هدى الناس الحيارى ... يا ندى الفجر البلل نور عوينات الفقارا
جاى ليك يانوره افه ... للدود البنقر عود عشيما داخرو فيك
أصلى لما أدور أجيك بجيك لا بتعجزنى المسافه
لابقيف بيناتنا عارض لا الظروف تمسك بأيدى ولا من الايام مخافه
يا نفس فجر القصائد ... ما ضهب فى بعدى عنك أصلى متغرب عشانك راضى بالجاينى منك ماشكيت شح الليالى .... ما بكيت نحت شلتو حالى
ورغم أنو الحال بيفضح الا كت فى الحاره بصرخ يا وطـــــــن عز الشدايد





طيبــــــه
محمد الحسن سالم حميد

كلما تباعد بينا عوارض ... كلما ما هواك ياطيبه مكنى
تلد الغربه القرب الواحد ... بيكى أسمى الشوق وأكنى
لما أفوتك من غير خاطر ... أو دون خاطر منى تفوتى
بلقى حبايب فى كل حته ... وكل بيوت الفقراء بيوتى
لا غيرت وراك الجته ... لا بدلت ملامح صوتى
لا غافلنى وهادن فنى ... هامل المدن الماعرفتنى
جيت بالشوق الصبرو مصوبر ... للارياف الكم وفتنى
وللاطفال الناشفه ضلوعا ... ونازفه تغنى
أطمئن روعا ... وأهدى دموعا بسمة بكره الماها تمنى ولا مصنوعه
أغنى لشعبى ومين يمنعنى ... أغنى لقلبى اذا لوعنى
غير حزنى الما رجعنى ...
أذا طلعنى نخلة القرب ولا الغربه المشغوليه ينزل غنواتى بقمريه ..
أو وقعنى فى بطن الجب ... بطلع يوسف بالاغنيه ...
أغنى للناس الما بتسمعنى ... ال منى بعيد والمبعد عنى
النادا نشيدا وكت المعنى ... الايدى فى أيدا
وأيدك تبنى لدنيا جديده ... اليوم راح تبنى
وريت غنواتى فى ناس شغاله تكون سنداله وعود طوريه
ضراع رجالا .. كتاب أطفالا ... وجملة فالا الما مقريه
سدت مالا ... وبقة فالا ... وليلة الدخله على أسمى قضيه
حبيبة قلبى يا سودانيه ... يا أسمى معانى الزول بيعاين
يا ود ضكران ... يا بت دغريه
وأنا أن سامعانى فضلت أغانى غبش فقريه وروح بانيانى
حويتك منك يا دافعانى براحة أيديك كما الاشواق
يا جابدانى برفق عليا
وما بتحير بين الفوق ... والناس التحتانيه
الا مغير والا عقور ... أو كفيف الانسانيه
منك وين يا كاشفه عينى ... بنور الالفه ضيا الحنيه
وحلم العالم ناس بتسالم ... والبنى ادم صافى النيه
والاطفال النازفه ضلوعا تطمن روعا وتبقى تغنى
غناوى البكره الكم مسموعه
حسيس طنباره .. مع نقاره .. صفقتا حاره ... وداره تغنى
يا حلتنا عليك ترابك وأنت شبابك ريحة الجنه
أحلى عروس "البلد اللتنا"
والله الغبش الرابه تغنى
ولا هدير المدن التصحى وتمحى ظلام الحاصل عنى
كلما تباعد بينا عوارض ... ألقى هواك يا نوره مكنى



صـــــابرين
محمد الحسن سالم حميد
صابرين يا حزن الغنا ... من بعد الضنا على وعد الهنا ..... صابرين
لا الليل ولا حزن طايل ... لا صد ولا دمع سايل لا هم جاك يا أم نفايل والنيل فاض وأنحنى ... نيلين وأكرمك أنا فى العين (فرعين) شايلين جنا صــــــــــــــــــــــــــــــــــــــــــــــابــــــــــــــــــــــــــــــــــرين
عشرات حبابك .... سلامات ... يسلم شبابك .... سلامات
شايل سحابك .... سلاما ... والقبلى شـــابك .... سلامات
خيلك سنابك .... سلامات ... وهــــواك هنا .... سلامات
عاشقين ترابك .... سلامات ...صابــــــــــــــــــــــــــرين



يا مطر عز الحريق

حميد
يا مطر عز الحريق ... يا مصابيح الطريق
يا المراكبيه ال بتجبد من ... فك الموج الغريق
جينا ليك والشوق دفرنا ... يا نشوق روحنا وتمرنا
يا المحطات الحنينه .... القصرت مشوار سفرنا
ياما شايلك فينى حايم ... لا الليالى المخمليه ..لا العمارات السوامق
لا الاسامى الاجنبيه ...تمحى من عينى ملامحك
وأنت جايه المغربيه ... داقسه ... دايشه المغربيه
وشك المكبوت مكندك .... سامسونايتك زمزميه
كون شبر .. طوريه منجل ... سبحى ... فانوسا مدردح
قلت ليهن ولى زمانك ... يازمان الحاجه عندك
يازمان الاهه حدك ... لا تطــــــأ الوردة الصبيه


يوم بكره جميل
حميد
متخبيه والناس شايفاك باباى ونخيل
متخبيه والناس عارفاك قران وأنجيل
وشفنا معاك أخوانك طاوين الليل
لكن عارفنك رويانه بلحيل
لا عيون تحزن لا دموع بتفيض
يوم بكره جميل ضواى و وثير .. باكر دافر
أبدا لا أتغرب لا مسافر .. يوم بكره جميل
وجميل الليل ... ال ما سواى
كان حاول يطفئ أتمارو... أبيض ريحو
من فالو النيل يطلع طوفان
ويخاف من موجو تماسيحو ... باكر ضواى
كلمات وأناشيد وقيام ... باكر ضواى
يوم بكره جميل






عمنا الحاج ود عجبنا


عمنا الحاج ود عجبنا ديما في اخر صلاته
بسأل المولى السلامة وسترت الحال والكرامة
وعشاء الضيف عنده زي فريضة وفي البيوت ياهو الركيزة
في ليلة من ذات الليالي جاه ضيف في راس حداشر
رحبوبه وفرشله فتشوا العشاء ما لقوهوا
الرقيف ممحوق مقصر والبلد في حال معسر
جاته فكرة امشي الفرم المجاور لرجال العيش يشاور
بس عشاء الضيف يا جماعة ضيفي نازل ليه ساعة
شاكله ودفروه ودوه محكمة الطواري
اهله جنو بي وراهو لي الصباح ما عرفوا حاجة
جاهم الخبر الماكد ود عجبنا بايت في الحراصة
حاكمه الولد المنصب كتفه بالدبور مقصب
ده شنو يا راجل يا مخالف
زول مخرب عقله تالف
انت ما داري بزلت الناس في الطواري
اجلدوه قرموه نفذوا الحكم البهينه
شان يفتح تاني عينه
تسمع السوط في ضهر الحاج ليه خاوية
كل جلدة جبل مزلة في ضمير الحاج الف علة
وفجة رفع راسه شاف بنات ولده وبناته
دمعتن في الخد تسرب وجعتن في الجوف تحرق
نفذوا حكمه راح بيوته
النفس مكسورة وحزينة كيف ملاقات الحليلة
وفي البويتات الوره قادي عمنا الحاج ما عتيادي
وفجة السكيلي ضرب حزاين ود عجبنا ناداه المنادي
وتسمع من يوصي في فراش ود عجبنا
قفلوا الحيشان يا جماعة
اطفوا انوار الرتاين
قفلوا الحيشان يا جماعة
اطفوا انوار الرتاين
داك حرس حصر التجول من بعيد ليكم بعاين
يا زمن حصر التجول
يا زمن حصر التجول
يا زمن حصر التجول For more options, visit this gro


خوفي من تلحق رفيقك

خوفي من تلحق رفيقك
يا بريق نجم الحيارى
وإنت لا نّور طريقك
لا شرق فجر السهارى
من زمن يا صحوة طلعك
غصة في حلق الصحارى
حتى شال النمة فرعك
دودى زي وهج البشارة
قلنا يا سعد المواسم
عودك المليان جسارة
عودك الفجري المصادم
بالبصيرات والبصارى
مستحيل يرضخ يساوم
مهما كان الريح حصارا
يفضل النخل البقاوم
في السقوط نخل الفقارى
يااندلاع صوت الغفاري
في حلق دغش الغلابا
لو خريفك تاني يطرح
آه يا اخر سحابة
لمايا شرف المواكب
يبقى هم الناس إمارة
تندحر كل المناصب
ينكسر كرسي الوزراة
كنتو وين وين إنتو كنتو
كنتو وين
لما الشوارع ما ثبت قداما مرتق
نفضّت صمت المسافة
مّدت الشوق المضارع
للصباحات التجرتق
كف شهيدا البق مارق
من فرقة الظلمة فجرًا
تم بي دموّ الشرافة وضم حضن الارض عاشق
كنتو وين وين انتو كنتو
لما كان في سجنو ثائر
بي جلابة السونكي نومتو
ويصحى بي امر العساكر
قومتو في الزنزانة يمحى
ويفتح الاف الحناجر
ت.. الاطفال ويكتب انبل الاشعار لباكر
تشطب السجان وصوتو ويبقى فنانا البساسق
كنتو وين . وين انتو كنتو
لما فضل الدين عباية
تربي فوق كتف الغنايا
تنتصب في الجو طوابق
تنقلب في التو بنوكة
للبداهن
والبنافق
والبوافق
لما كان نفس العبايا
تتنفخ بي قدرةحبلا
لي قصار عمر الكحايا
من جُنب تنسلا سيفًا
عبّر السواهو سارق
شدة الفقر الخرافي
حدة الشغل اللي مافي
رُغم الاف المتاجر
والخوازيق والمرافق
كنتو وين انتو كتو
لما البيوت في الشمال قامت خنادق
بالكتابات البتنزل فوق ضهاريهم
مطارق
لما طلاب الحقيقة كانو بختارو المشانق
ولما لسة الله بموت في الجنوب
بين البنادق
كنتو وين وين انتو كنتو
آه يا وطني المستف
في المطارات القصية
آه يا كفني المنتف
في مدارات القضية
آه يا صمتي المكتف في العبارات الندية
آهي يا نفسي الملطف بالنهارات الصبية
آهٍ من رفع المصاحف بالرماح الاجنبية
المعاطف اجنبية
العواطف اجنبية
الجلاليب اجنبية
الدولايب اجنبية
الدهاليز اجنبية
السراير اجنبية
المساير اجنبية
صبة الكآس اجنبية
ختت الراس اجنبية
رشة الدلكة اجنبية
رعشة الفركة اجنبية
طفية النور اجنبية
والخوازيق
عربية
عربية
عربية
فضي نارك يا محارب
ولا هات البندقية
غني عشقك يا صبية
احنا قدامك مدارك
غني للوطن المفارق
عشت يا وطني المبرق
بالندى ولون المشارق
يامحرق
يامحرّق
يا مجرب
عشت بي شرف البنادق
ويسقط
العفن ال بتلب فوقنا من شُرف الفنادق
يسقط
يسقط
يسقط


نادوس

الحال وراك كيفن تسر باقيلك انتي بلاك في زين
ما تهشم ابريق الرضا خنست نسيمات السمح
والبسمه زي حبه قمح
لفحا وطفر طيرآ كتر
أورث غصافيري الضنى يبس غناها مع الفجر
هطل على الشجر الهموم وشاشات نهارات العنا
عانيت وراك جنس عنا
بوغ سهادي كرو النجوم
خطو المواويل ارتعش
حرس عصاتي بنات نعش
دومست فوق حجر البتول
هلوست بي صلب المسيح
دروش شردت من الضريح
شويمت بي ظلم الحسين
أومت على كم ميضنه
وما بين عيونك والمغول
ساهد بي قافله الحروف
وايقاع ظنابير الزمن
انصربع ايقاع الفصول
هبطت غمامه ورا الجبل
راحت من الليل الجروف
شهقت شعاب انساني خوف منك عليك على أي زول
وك نياق شوقا الضنا سرح عصا التسيار قبل
درب الحياه المرمول فنا
يا وقعة الواقفين هنال يا وقفه الواقعين هنا
يا آفة الوطن الجريح اشمعنى لا وصلك دنا
لا آفه الزمن المشيح قدرت رويحتي تيقنا
من جيتك المرقت بسيم الدهدهك روحت وين
يا زين مرقت مشيتي وين
غربل عليك ليل المدائن الكان زمانك حالا زين
ناشدتها وفتش نهارات القرى المتكيه فوق شعب الصبر
ساندتها علم بطانا الشيطنه
غنيت معاهم سودانا يا سودانا….
للمتهم والدنيا ليل والقمره بت فاتا القطر
وصف لهم حتة شليل
ردد حروفهم ردتها
وقف سحابي مع الدغش شهدتها
شهدت معايا على العذاب الهد أضلاع الغبش راعفتها
تكلت خدودا على بكاي لا قيت سجون جاهد بها
بي جيهة الجذب القديم دخلت مكندك بالشباب خنت التراب راودتها
فوق ها التراب واعدتها
لا انتي جيتي ولا هي آه روحت وين
يا وين مرقت مشيتي وين
كل البنات جو من المللى
هشت بكت شدت حكت وأزيارنا والمرحات خلي
يا انتي يا مرت العدل ماك في صعيدا تترجي
روحت وين قوليلنا بس من الغلبان تجي


الجابرية


كان ضحوية وكانت عين شمس الله قوية
وكنا نسند في المحروت
وفجاة اضوي فينا مكبر صوت
قالوا الريس مار بفوقنا
قالوا الريس ماري علينا
تكيناله حبال واسوقنا
ونجمعنا يطمن روعنا
والبشوفنا يقول واشوقنا
وتعبينا هتافا واحد
سحقا سحقا للرجعية
لا تفريط في قوت الشعب
الجابرية تحي الثورة
دايرين بسط ومدرسة اسطة
والشفخانة وسوق منضبطة
والتومين زيات الحصة
وكان الريس فوق عربية
تر عبايته وهز عصايته
هزوا بنادقهم الضابتية
وقام خاطبنا بنهج الثورة الصارم وحازم
اما اللازم من شفخانة ومدرسة اسطة
اما البسطة بنظر فيها
اما السوق السوق منضبطة
الاسعار للتجار باينة وواضحة
وان فرطتوا بتبقا القلطة
القصيدةطويلة وزي ماقلت ما بستحضرها كاملة
والوفود الحكومية تروح وتجي بقول فيها
وفد في وفد امشي وجينا
مرة عربي ومرة رطانة
مدرسة اسطة واجراءت
مدرسة بسطة وحاحاات
وتذكرنا العون الزاتي
وقلنا نقوم للشفخانة
طوبة في طوبة لامن تمت
وجات السلطة
انتو بنيتوا الشفخانة محل النقطة
وقومتوها بدون زنزانة
فجاة تنشك بينا الشرطة
ونحنا اهل ودنا صافي
وان قامت عكة في شيخ الحلة
وقصبا عنك يالجابرية وقصبا عنك يا احوالها
الجابرية حلة تعافر مقطوع راسها
ماسي شيوخها قواسي اطفالها
من قراسها لي قراسة
صبيا تساسك عشرين كيلو بكراسها
تاني بقول ما معناه
فات العسكر وجا الاحزاب
وشيخ الحلة لما الناس وقال ليهم
جايهم زول مساول كبير وده البصلح الاحوال
ولازم اصوتوا ليه واصلن الزول منهم بس قراء
في الخارج وزوج مصرية

Quote: وطنى ولا ملى بطنى ... سكاتى ولا الكلام النى بـلـــيــلـــتى ولا ضبايح طى ... قليلتى ولا كتر سمى سلام يا أمى ... سلام لا هكمى لا لكنى

خالص التعازى والبركة فى شعبه