Post: #1
Title: الله لا يكسبكن ولا يغز فيكم البركة يا شركات الاتصالات السودانية
Author: عبدالله ود البوش
Date: 03-08-2012, 12:15 PM
الاتصال على الاهل بالسودان بقي لحسة كوع
الشبكة دائما مشغولة ومعاها لحسة رصيد
الهاتف خارج الخدمة تخدموا الضنقل والفار انقل بركة من صلى وقال يا الله
قريشاتنا ابقن ليكن باربحاء وعقاب شهر
والعجب العجيب اردوا عليك ناس من بلدا طيرا عجمي
مكالمتك لاتتم حسب الطريقة التي استخدمت فضلا تأكد من الرقم الصحيح وشكرا
بصوت اخونا هشام بدرالدين من النظام الصوتي للاتصالات السعودية
يعني مكالمتك تنتح قبلا .... تنتح فيكم العقرب ما تنقلب كلو كلو
.
.
.
قال احدث شبكة اتصالات في العالم قال
جشع ونهب وسرقة
تبيعوا ساهي في الشرائح بالمكروفات التقول سكسك اسكك تور حاج سعيد
والشكية لغير الله مذلة
شكيتكن علي الله
|
Post: #2
Title: Re: الله لا يكسبكن ولا يغز فيكم البركة يا شركات الاتصالات السودانية
Author: خالد المحرب
Date: 03-08-2012, 12:30 PM
Parent: #1
Quote: هاتف خارج الخدمة تخدموا الضنقل والفار انقل بركة من صلى وقال يا الله
قريشاتنا ابقن ليكن باربحاء وعقاب شهر |
الهاتف خارج الخدمه وسعود واقف فى البلكونه
|
Post: #4
Title: Re: الله لا يكسبكن ولا يغز فيكم البركة يا شركات الاتصالات السودانية
Author: عبدالله ود البوش
Date: 03-08-2012, 12:49 PM
Parent: #2
| Quote: الهاتف خارج الخدمه وسعود واقف فى البلكونه |
مرحبا شيخ العرب
يا اخوي ديل عندهن حكومة رشيدة الله راضي عليها
علي الليمان الخطوط تشخشخ ساهي يوم واحد بس
علا املو خشمن ملح ......
.
.
سعود البوقفوا في البلكونة شنو في الصقط دا ؟
.
.
قت ليك يا خالد حمودي ولدي لمن كانت الخطوط ممتازة بسعل فيهو
كيف يا حمودي
حمودي : الحمد لله يابا كويسين
المدرسة كيف يا حمودي
حمودي : الحمد لله يا با الحمد لله
كلما اسألوا من حاجة الجنا شابكني ليك الحمد لله الحمد لله
قلت يا حمودي الحكاية شنو صاح الحمد لله لكن كمان وريني حالك كيف
واخبارك شنو ؟
حمودي : يابا هنا السودان كلو ائ واحد تسعلوا تقوليهو كيف ؟ اقوليك الحمد لله
لانو هنا الورط كتيرة كلما تدخل في ورطة وتمرق منها تقول الحمد لله
الورط شنو يا حمودي
حمودي : الحمد لله يا يابا
تاني يا حمودي
الورط يا با تكون عيان تبقى كويس تقول الحمد لله
تكون معوق تبقى كويس تقول الحمد لله
الاستاذ اجلدك الجلدة تبرد تقول الحمد لله
ياهو كدا زي دا كدا بس الحمد لله
|
Post: #3
Title: Re: الله لا يكسبكن ولا يغز فيكم البركة يا شركات الاتصالات السودانية
Author: عبدالله ود البوش
Date: 03-08-2012, 12:33 PM
Parent: #1
لمن الجرس يرن افرح والصق التلفون طاب علي الاضان
عشان المختصر المفيد سريع سريع
يرن ويرن ماذا يقول الجرس يقول يا اولاد البقز
ولا التكتح .... كلة رنة 28 هللة
الرنة بـ 28 هللة
والليام الجاية في تخفيض على الرنات بـ 25 هللة بس
.
.
شكلنا نرجع تاني للجوابات الفيها صورة الطيارة
وشكرا لساعي البريد
وكيف حالكم واحوالكم في هذه المدة الطويلة التي لم نراكم فيها
واذا طاب لكم السؤال عنا فنحن بخير وعلي خير ولم ينقصنا الا عدم رؤياكم الغالية
.
.
.
ملحوظة : النت برضو بقطع بالطريقة دي كلو ما ياهو السلك المقطع في راسكن الغليد دا
|
Post: #5
Title: Re: الله لا يكسبكن ولا يغز فيكم البركة يا شركات الاتصالات السودانية
Author: عبدالله ود البوش
Date: 03-08-2012, 01:17 PM
Parent: #3
بالله اتخيل الرنة في الفاضي ساهي بـ 28 هللة
والمغالت اجرب اسع
انا المسكين دا في اليوم برن عشرة مرات
عشرة في تمانية وعشرين صفر معاك التمانية وتطلع باللتين بقوا كم
ريالين اتنين وتمانين هللة اها في كم شفقان زي كدا على اهلو ويرن ويرن
طيب كدا احسن ليهن من اشغلوا الخطوط
مش الحكاية ربح وخلاص
خليتكن لي الله اخلص لينا منكن يوم الحق عزل وجل
.
.
الحساب دا يوم الحساب
لكن كيف نكلم اهلنا وانتو شغالين نشل ... نشل عديل كدي
في سوق سرحان لقيت واحد شايل شوال ملان شرائح كنت قايلو شايل شوال تبن
تبنتو كشكش كششششششش دا شنو آ جنا قال لي دي شرائح وبارت ذاتا
كان داير ليك شريحة يا حاج بالف والتانية هوادة
|
Post: #6
Title: Re: الله لا يكسبكن ولا يغز فيكم البركة يا شركات الاتصالات السودانية
Author: عبدالله ود البوش
Date: 03-08-2012, 02:20 PM
Parent: #5
الهول ضرب التلفون
والعسكر واقف طابور
والجبة وقعت في البير
صاحبا واحد خنزير
فات وفات في دينو
سبعة لفات في دينو
الله لا يكسبكم ولايغز فيكم البركة
ياكفرة يا اولاد الحرام
|
Post: #7
Title: Re: الله لا يكسبكن ولا يغز فيكم البركة يا شركات الاتصالات السودانية
Author: عبدالله ود البوش
Date: 03-08-2012, 02:33 PM
Parent: #6
| Quote: ياكفرة يا اولاد الحرام |
عشان ذنبكم ما ادرعني ساهي والدنيا قبايل جمعة
كفرة يا اولاد الحرام دي قالوها الافغان للامريكان
لمن عملوا ليهم انزال جوي للجداد نجيض جاهز
بعد الحرب وضعت اوزارها
صنقعوا للطيارة وقالوا ليهن
وين الكتشب يا كفرة يا اولاد الحرام؟!
لكن انتو حرامية واولاد بقز
|
Post: #8
Title: Re: الله لا يكسبكن ولا يغز فيكم البركة يا شركات الاتصالات السودانية
Author: محمد فرح
Date: 03-08-2012, 02:44 PM
Parent: #7
تحياتي استاذ عبدالله
ياخوي ريح بالك وبرد اضانك ولم هللاتك وخلي الوليدات يشترولم ام دي اس ال الليل سوداني ون ويعملوا ليهم اسكايب
صوره وصوت ياحبيب
وحاة نظري انا الاسكايب حسي سويتو في موبايلي الاندرويد وبكلم العالم جت مجاني ساااااااااكت
ربنا يحفظ ليك الوليدات من كل شر وتشوفهم متخرجين وفي اعلى الدرجات وتشيل جنياتهم
مؤونة عشرة أعوام من الود
|
Post: #9
Title: Re: الله لا يكسبكن ولا يغز فيكم البركة يا شركات الاتصالات السودانية
Author: ismeil abbas
Date: 03-08-2012, 02:55 PM
Parent: #8
عبدالله ودالبوش..يا حبيب...........الله يطمنك على ألأولاد .ماقربوا يجوك ونرتاح كم شهر ؟الله يجيبهم بالسلامة يارب.
عليك بالنت زى ماقال ليك ألأخ/محمد فرح...ومومبايلى STC من مانزلت الخدمة الجديدية دى بتاعة شريحة بهناك وشريحة هنا الشبكة بدأت تطش..وبالطريقة دى نحن زاتنا بنطش.
الله يكون فى العون وزى مابقول ودالباوقة أركز بس.
تقديرى وإحترامى.
|
Post: #10
Title: Re: الله لا يكسبكن ولا يغز فيكم البركة يا شركات الاتصالات السودانية
Author: عمران حسن صالح
Date: 03-08-2012, 03:04 PM
Parent: #9
يا حبيبنا
في اتصال من كوز ( سابق ) أكد أن شريحة السوداني بتاعة التسعة الواحدة تستقبل مية المية وجربتها أنا مع الوالدة ( 00249 ) وطوالي معاها الرقم 1230000000 ( معليش بفهم الفرق كده ، الحاجات جات بعد إتخارجنا )
المبرر أن جماعة الحكم في السودان زادو من أبراج سوداني حول البلدات
بس
|
Post: #11
Title: Re: الله لا يكسبكن ولا يغز فيكم البركة يا شركات الاتصالات السودانية
Author: ندى صالح الطيب
Date: 03-08-2012, 05:39 PM
Parent: #10
الاخ عبد الله البوش لك التحية
غيظ فيهم هاك البرامج دى بالنت ملح ساكت
viber.com
Tango.com
مجانا مع اى شخص منزل نفس البرنامج بس انها فى السامسونج اندرويد
جرب وح تدعى لى انشاء الله
زمان شرطنا فاتورة الاتصالات الا مجاملة زول لسانو طويل ما بيرضى تجاملو ملح....
|
|