*** أنا من الليلة إسمي هذي ***

جاني لقب جديد مجهول الهوية
والله صحي

المكاشفي سماني هذي
والله يا اخواني جنس حقارة لا بتتغطى ولا بتضارا

الحاضر يكلم الغائب يا أخوانا

شر البلية ما يغير الأسامي
والله صحي
غايتو يا بكري ود ابو بكر السويتها فينا قلعت اسماينا
والله صحي

البناغمني بي سوما وينسا اللقب الجديد بكون إتلوم لوم الجبال والحجار
ناس النيمة والحلة القديمة
هوي كلكم
جيبوا عتود ولا حلة بليلة واشهدوا على التسمية المجهولة
غايتو يا بكور بدرعها ليك في صلعتك , قدر ما تزلق برفعها تاني
النعمنو دي ملماتك المختارة برا دبارة
والله صحي

أسماء ما شفتها يا المكاشفي ود الخدر
الجنيد دي كلها ما شفتها ! ولا حقارة ودوسان بالكدارة ؟
البخليك تخاف على قزاز الأمجاد وما تخاف على رأس عوضية الهشموه ناسكم !!!
لازما ولا بد يخليك تتجاهل إسم جدي البغطي عين الشمس
غايتو حوشك يا بكري فيه مواقف تصيب الزول مش بالغثيان بس
كوفاااااااااااااااارة عديييل
والله صحي

جيبوا الليمون يا ناس الحوش وتعالوا الحقوني

يا..
هذي،
سلااام عليك..
وسلام لي صاحبي اب حمامه..
وسلام مربع للفاتح..


مكاشفي شنو الجاي يتور نفسك؟ هسع والله أصحي أميره الشيخ تلفخو زي العجب ولاااا تبالي!
زمن سخف يا أسما..

Quote: يا.. هذي، سلااام عليك.. وسلام لي صاحبي اب حمامه.. وسلام مربع للفاتح.. مكاشفي شنو الجاي يتور نفسك؟ هسع والله أصحي أميره الشيخ تلفخو زي العجب ولاااا تبالي! زمن سخف يا أسما..

حبابك يا موحومد ود ابوي عبد الرحمن
والله لكن يا ود امي توران النفس بجي بالساهل ؟
نان ما وجعتني الحقارة وقوة العين
إسم جدي ده كلو ما شافو ولا يعني عدم سعلة على قول حبوبتي الله يطراها بالخير
تسلم إت من كل بلا وسلامك يوصل تب لي صاحبك وابوه
يسلمن أيامك إن شاء الله

Quote: البناغمني بي سوما وينسا اللقب الجديد بكون إتلوم لوم الجبال والحجار ناس النيمة والحلة القديمة هوي كلكم

سوما ...
وسوما ...
وسوما .......... أها شنو ليك؟
البناديك بغير سوما يعلم الله اتلوم لوم العدو
والله صحي
يا ستهم وست السومات والبنيات لي حدهم
والله صحي
ده كلام شنو يا بت أبوي

Quote: جيبوا عتود ولا حلة بليلة واشهدوا على التسمية المجهولة غايتو يا بكور بدرعها ليك في صلعتك , قدر ما تزلق برفعها تاني النعمنو دي ملماتك المختارة برا دبارة والله صحي

عتود شنو يا بت أبوك؟
حرم نتكيلك المراح كلو ...... قال عتود قال
أنا اخوك يا سوما .. نان اتي شوية ولا شوية يعني
عاين دي كمان ....... عليك الله
شحنتين لا ندروبلات وشوية فيك كمان
والله صحي

Quote: غايتو يا بكور بدرعها ليك في صلعتك , قدر ما تزلق برفعها تاني النعمنو دي ملماتك المختارة برا دبارة والله صحي

دحين ما عصرتي على بكري ده شديد يا سوما ()
يا زولة لا تزعلي روحك ولا شيتن
ولا تجيبي لنفسك (دغت) ساكت
اسمعي بجاي وطلعي بهناك يا هناية ولا يا هذي
ودي احتياطي كده عشان ما تزعلي ..... والله صحي
..
..


اللمين البشاري حاضر عن (هذي) المدعوة سوما
وعن ناس النيمة والحلة القديمة
هيييييييييييييع وتاني هيييييييييع

سلامات الاخت اسماء


ولو كان من اطلق عليك ذلك هو اخونا دكتور المكاشفي الرجل الخلوق

فيلزمه اعتذار لك ولي ايضا

ولو كان غيره نرجو منه الاعتذار عن ذلك



مع خالص التحايا

Quote: سوما ... وسوما ... وسوما .......... أها شنو ليك؟ البناديك بغير سوما يعلم الله اتلوم لوم العدو والله صحي يا ستهم وست السومات والبنيات لي حدهم والله صحي ده كلام شنو يا بت أبوي

حباب ود ابوي البشاري
البشحن اللواري لي ناس الضهاري هيــــــــــع
حباب اهلي المن عز الأهل وبطن الحنان
تعرف يا اللمين اخوي الحقارة لامن تفوت حدها بتخلي الزول يحن في نوعية الناس دي
دحن هسه الزول ده كان برد نفسو وقعد في بطن الواااااطـــة وقال بسم الله
يعينة الكلام الكتبوا في بوست الوجعة داك مو مردود عليه ؟
دحين زول يخاف على قزاز عربيتو وما يخاف الله في الناس البدافع عنهم وقتلوا رقبة عديـــــــــــل
الله هونيني على قول نوريت
علا هذي بالحيل وجعتني يا اللمين يا خوي
والله صحي

Quote: أنا من الليلة إسمي هذي ***

تصدقى لا هذى و لا تلك و لا الدنيا باكملها تعادل سكر الجنيد فى ود السيد يا اسماء
او كما قال سيد خليفة..
ولا يهمك يا بت القبائل.. البحر بعدى الفطيسه لابتنقصه لابتغير ريحته
ويبقى الود،،،

Quote: دحين ما عصرتي على بكري ده شديد يا سوما () يا زولة لا تزعلي روحك ولا شيتن ولا تجيبي لنفسك (دغت) ساكت اسمعي بجاي وطلعي بهناك يا هناية ولا يا هذي

اللمين يا هذا قول النصيحة وما تخاف من سيد الحوش
النبي فيك عصرت عليه انا ولا هو العصر علينا لامن غيروا أسامينا
انا اصلي طالباه سماية قبال اليوم
والله صحي

Quote: ودي احتياطي كده عشان ما تزعلي ..... والله صحي .. .. اللمين البشاري حاضر عن (هذي) المدعوة سوما وعن ناس النيمة والحلة القديمة هيييييييييييييع وتاني هيييييييييع

مافي زعل يابا
اسمعني جاي هسة يجيك ود الموج ولا ود المدير ويقوموا بالإسم الجديد سداري
والله صحي
ده كان ما لفحوا ود الموج بالتلفون لي صاحبو المريخابي ود الجنيد
آآآآخ وبرضو تقول لي عصرتي على بكري ؟؟
بكري زاتو الله بريدو وداه آخر الدنيا
والله صحي
علا اخوي موحومد ود ابوي عبد الرحمن بخلص لي حقي
عفيتو منو الكلس

Quote: سلامات الاخت اسماء ولو كان من اطلق عليك ذلك هو اخونا دكتور المكاشفي الرجل الخلوق فيلزمه اعتذار لك ولي ايضا ولو كان غيره نرجو منه الاعتذار عن ذلك مع خالص التحايا

مرحبابك اخوي عمر أريتك طيب
عليك الله في مكاشفي في البورد ده غيره ؟؟
ياهو زاتو بي لحمو وشحمو ودكترته
النبي فيك قلت لي دكتور ؟؟
مالو ياناس علمنا الزمن ده بقى مقصوص رقبة
الناس ديل بقروهم شنو ؟ والشهادات البدوها ليهم دي اللت شنو ؟
والله فعلا الزول يحتار
علما ما خلاك تحترم نفسك والآخرين ، اخير عدمو ضــــمة
والله صحي
ممكن اقبل الكبوة دي من جاهل لم يتعلم حرف واحد
واقبل اعتذاره رافة في حاله وعدم تعليمه ,
لكن من دكتور يفترض إنه يكون فاهم كيف يتعامل مع الناس في موقع حوار عام !!
دي ما بقبلها كلو كلو ولا بتنبلع يا عمر يا خوي
والله صحي
شكرا ليك إنت وكتر خيرك ياها المحرية فيك
قلتها ليك وبقولا لآآآآآ يوم باكر
إنت إنسان مشهود ليك بكريم الخصال , زول حقاني
والله ما بتشبه ناسكم ديل واللـــــــــــه ومليت خشمي بي قولة الله
الله يديك قدر يرضيك ويشيل الغشاوة الفي عينيك
وتسلم كتير والله يا أخي عمر ,,

Quote: علا اخوي موحومد ود ابوي عبد الرحمن بخلص لي حقي عفيتو منو الكلس

يمين الله آأسما حديسك ده خلاني انفوجج لامن بت اخيتي اليهوديي قالتلي: آر يو أوكي خالو؟
قتلا يخلخل ضروصك..
سماية سوما، البي قدرة قادر، بكري سماها أسماء الجنيد، ما ضقناها..
يجينا دكتور* المكاشفي بي تسميتن جديدي!

*دكتور يعني شنو؟
جاااااادي والله!

سوووووووووووووووووووووووووووووووووووووووووووووووووووووووما !!!!!!

اها يا جماعة عشان ما نقوم بيكم سداري ساي
الناس الما عارفين وين ومتين سماني اللخو المكاشفي ولا ناغمني بي يا هذي !!
ياها مداخلته هنا في بوست الشهيدة عوضية الله يرحمها
ما بحب ابداااا فتح بوستات فرعية خالص
لكن وبما إنه التسمية أو إسلوب المخاطبة حرقني وفي نفس الوقت البوست الخاص بالشهيدة ما دايراه ينحرف عن مساره
فردت المساحة دي هنا عشان ما اي تجاوز يحصل في حوش بكري ده الناس تمشي فيه ساااي
ودي المداخلة المعنية مكوتة ادناه:

Quote: إنت بتعرفى شنو عن الشعب السودانى ؟ حادث لا يتكرر تتحدثون عنه وكأننا نعيشه كل يوم .. ياهذى.. ماذا عن أفراد الشرطة الذين يموتون وكل يوم فى سبيل أن تشعري أنت بالامان وتقعدى فى النت وتهزى بكل ماهو قبيح فيهم ؟ إذا تعرضتى لمحاولة إعتداء من أى شخص تتوجهين الى الشرطة لحمايتك وأقسم على ذلك .. وإذا جاور منزلكم منزل سكر ودعارة فأين تتوجهين؟؟؟؟؟ تتوجهين الى الشرطة لترحل هؤلاء المعربدين من حيكم ..اليس كذلك؟ دعكم من إدعاء البطولات وإصطيادكم فى (الخيران) لتعودوا بالبلاد الى مربعها الاول الذى خرجت منه وبدأت تتنفس بعضا من الهواء العليل الان دعكم من كل هذا وعالجوا الموضوع نحاسب الذين إعتدوا على عوضية ومن قبلها السكارى الذين هاجموا قوة الشرطة الذين كانوا يأدون فى واجبهم فى حمايتنا .. والحل ليس بحرق الاطارات فى الشارع العام وحصب العربات بالحجارة فما ذنبى وأنا فى طريقى الى البيت يهشم زجاج أمجادى الباكل بيها عيش ..

Quote: الناس الما عارفين وين ومتين سماني اللخو المكاشفي ولا ناغمني بي يا هذي !!

نحن عارفين يا بت ابوي ....

إلاّ باقي لي ما عندك شغلة ساكت .....

الله يسألك، واحد يقولوا ليهو البوليس ضرب البنية بي طبنجتو قتلها ........ يجي يقول ليك: وانا كمان كسروا لي قزاز الأمجاد.

ده راجية منو شنو؟

يقولوا ليهو شنو بلا: الله يكسر راسك الفاضي ده.

Quote: ياهذى.. ماذا عن أفراد الشرطة الذين يموتون وكل يوم فى سبيل أن تشعري أنت بالامان وتقعدى فى النت وتهزى بكل ماهو قبيح فيهم ؟ إذا تعرضتى لمحاولة إعتداء من أى شخص تتوجهين الى الشرطة لحمايتك وأقسم على ذلك ..

النبي فيك إنت بي صحك ؟؟؟؟
يموتون كل يوم ؟
ديل ياهم ناس الشرطة الشرطوا عينا ولا ناسا تانيين ؟
يموتون كل يوم ولا يقتلون الناس كل يوم ؟؟
كدي حدد موقفك واتصلح معانا
عاد الليلة يحلك مني الحلا بكري من سوما ولفترة مؤقتة فقط
بدور افضالك إنت

بعدين قلت اشعر بالأمان واهزأ على قولك إنت مو نضمي انا ده
صحي ماني دكتورة لكن ما بكتب تهزى كده ؟
والله صحي
بعدين الهزي عرفناه ن اها ماهو قبيح ده وينه ؟
انا جبت لي نضمي من عندي . ؟ لفحت لي خبر من الجرائد وجيت قلت في عسكري قتل بت الناس في صمة خشمها ؟
ولا الكلام بالصح والقبيح ده اصلو فيهم ومندرع فيهم متل درعة الحسكنيت حكومتكم في ضهرنا البقى كلو بقاق

إن ما عرفت كلمة بقاق اسعل منها موحومد ود ابوي عبد الرحمن ولا اللمين ود البشاري ، بجيهوك تب
والله صحي

بعدين قلت لي إن تعرضتي لمحاولة إعتداء من اي شخص ، قلت لي تقسم على إني بمشي لي شرطتك المعنية ؟؟
يمين كضبا كااااااااااضب ويمين الله المو بالكضب شرطتك دي مخوفة الناس وراعباهم أكتر مما تتخيل
حليل الشرطة في زمن الأمان وحليل رجل البوليس البهابو الرئيس !!!
بعدين ياخوي انا يمين وراي رجال يشدوا الحيل ويسندوا الضيف نص الليل
رجال ركازة قبيلة وضرا امات وسند خالات وعمات ، رجال حوبات لا بالخشوم ولا الضرعات
تقولي شنو وتقولي منو ؟
كدي امشي صلح قزاز امجادك وعوضية الله يرحمها ويخلص حقها من المجارمة قتالين القتلة

Quote: تصدقى لا هذى و لا تلك و لا الدنيا باكملها تعادل سكر الجنيد فى ود السيد يا اسماء او كما قال سيد خليفة.. ولا يهمك يا بت القبائل.. البحر بعدى الفطيسه لابتنقصه لابتغير ريحته ويبقى الود،،،

حباب الموج الجانا هادر بي قوف
إت يا يابا تعلا ما تدلا ، بركة الله ورسول الله
يديك قدر يرضيك يا الصديق اخوي

شفت الهملة وموية الطملة يا الموج يا خوي
نحمد الله
طول مانا في حوش بكري ده بنخوض الطملة وبنشوف الهملة
الله غالب