Post: #1
Title: الجبهة الثورية.........
Author: الامين موسى البشاري
Date: 02-24-2012, 10:30 PM
Parent: #0
لا اتفق معها 100%
|
Post: #2
Title: Re: الجبهة الثورية.........
Author: الامين موسى البشاري
Date: 02-24-2012, 10:34 PM
Parent: #1
لا يمكنني أن أدعم أي جهة تسعى للوصول الى السلطة
عبر فوهة البندقية وهو ذات السبب الذي يجعلني لا أؤيد الانقاذ
إن انا وافقت على ذلك من أين لي أن اضمن أن لا تملي
علي وعلي الشعب السوداني أجندتها الخاصة
|
Post: #3
Title: Re: الجبهة الثورية.........
Author: الامين موسى البشاري
Date: 02-24-2012, 10:37 PM
Parent: #2
عضم الجبهة الثورية مكون من :
الحركة الشعبية قطاع الشمال
حركات دارفور المتمردة
التمرد في جبال النوبة
التمرد في النيل الازرق
وهؤلاء قطعا لا يمثلون كل الشعب السوداني
ولا يمثلوني............
ولهذا لا أجد نفسي متعاطفاً معهم
|
Post: #4
Title: Re: الجبهة الثورية.........
Author: الامين موسى البشاري
Date: 02-24-2012, 10:41 PM
Parent: #3
المبدأ الثابت عندي والذي لا اتزحزح عنه
هو أن تداول السلطة يجب أن يتم عبر صناديق الاقتراع
وليس عبر حمل السلاح وازهاق الارواح
حتى يتمكن الشعب السوداني من اختيار من يحكمه
|
Post: #5
Title: Re: الجبهة الثورية.........
Author: حافظ انقابو
Date: 02-24-2012, 10:45 PM
Parent: #4
متابعين
|
Post: #6
Title: Re: الجبهة الثورية.........
Author: الامين موسى البشاري
Date: 02-24-2012, 10:46 PM
Parent: #4
أتفق معهم في ضرورة اسقاط النظام
واختلف معهم في الاسلوب...........
..
..
|
Post: #7
Title: Re: الجبهة الثورية.........
Author: الامين موسى البشاري
Date: 02-24-2012, 10:48 PM
Parent: #6
شكراً للمتابعة يا ريس
|
Post: #8
Title: Re: الجبهة الثورية.........
Author: الامين موسى البشاري
Date: 02-24-2012, 11:00 PM
Parent: #7
الليبيين كلهم قاتلوا القذافي فاسقطوه
وكذلك فعل اليمنيين
والآن السوريين يفعلون ذلك
..
..
|
Post: #9
Title: Re: الجبهة الثورية.........
Author: حافظ انقابو
Date: 02-24-2012, 11:10 PM
Parent: #8
مع انك اديتني ضربة الانكل
وكلت لي بوست ما ح اقدر انزلوقريب للتشابه
لكن بقول ليك
واصل وصلت نفس الفهم
|
Post: #10
Title: Re: الجبهة الثورية.........
Author: الامين موسى البشاري
Date: 02-24-2012, 11:21 PM
Parent: #9
الحركة الشعبية قطاع الشمال لا تمثل كل الشمال
وحركات دارفور لا تمثل كل أهل دارفور
النوبة في كردفان يمثلون النوبة فقط
مالك عقار لا يمثل كل أهل النيل الازرق
ولهذا اقول أن الجبهة الثورة لا تمثل كل السودانيين
وحمل السلاح واشعال الحروب في اطراف السودان
لا يحل القضية ولا يسقط الانقاذ بل يمنحها سببا للبقاء أكثر
حيث يمكنها أن تسحق 5000 مقاتل من الجبهة الثورية
في معركة واحدة ......... بذريعة محاربة التمرد
..
..
ولكنها لا يمكن أن تسحق 5000 متظاهر في الخرطوم
لأنها إن فعلت سيواجهها المجتمع الدولي
|
Post: #22
Title: Re: الجبهة الثورية.........
Author: فايزودالقاضي
Date: 02-25-2012, 10:12 AM
Parent: #10
البشاري ...سلامات ...
دعني اليوم اختلف معك رغم اتفاقي في الكثير من اراءك السابقة
Quote: عضم الجبهة الثورية مكون من :
الحركة الشعبية قطاع الشمال
حركات دارفور المتمردة
التمرد في جبال النوبة
التمرد في النيل الازرق |
ماعارف ليه حركات دارفور وجبال النوبة اتت متمردة والحركة الشعبية قطاع الشمال حاف كده ؟!!!
Quote: الحركة الشعبية قطاع الشمال لا تمثل كل الشمال
وحركات دارفور لا تمثل كل أهل دارفور
النوبة في كردفان يمثلون النوبة فقط
مالك عقار لا يمثل كل أهل النيل الازرق
ولهذا اقول أن الجبهة الثورة لا تمثل كل السودانيين |
يعني انا هسه لو عرضت بضاعة لازم يشتروا منها كل الناس عشان تكون مقبولة ؟!!
ياامين هذه الحركات لم تقم كأحزاب في ظروف طبيعية بل هي حركات فرضتها ظروف معينة لمناطق معينة ومن الطبيعي ان تكون ذات شكلية معينة ..فاهل دافور عانوا من الانظمة الحاكمة ومن هذا النظام وخرجوا يدافعون عن ارضهم وانسانها باعتبارهم اهل وجعة ولن ينتظروا اهل شندي او كسلا او مروى لاعطاءهم الضوء الاخضر للتعبير عن مطالبهم ...
هل يجب على هذه الحركات ان تأخذ المباركة والشرعية من اهل الشمال والوسط والشرق ؟!!
فصراحة منطقك هنا غريب !!
معقولة انا عشان ادافع عن اهلي ومنطقتي اقوم الف واجمع توقيعات من الجهات الخمسة عشان اقاوم وادافع عن حقي المشروع ؟!!!
ياالبشارى كلام ممكن يكون مقبول لو قلت انك لا تؤيد التغيير بالسلاح وده قابل للرد والاخذ لكن ان يكون منطقك انهم لايمثلون كل السودان فده اعجب تبرير قرأته في حياتي ...
بعدين هل حزب الامة يمثل كل السودان ؟
ام الاتحادي يمثل كل السودان ؟
ام مؤتمرالبجا يثمل كل البجا خلى السودان ؟
تحياتي ،،،
|
Post: #24
Title: Re: الجبهة الثورية.........
Author: الامين موسى البشاري
Date: 02-25-2012, 11:26 AM
Parent: #22
ود القاضي
سلامات يا قريبي.....
| Quote: ماعارف ليه حركات دارفور وجبال النوبة اتت متمردة والحركة الشعبية قطاع الشمال حاف كده ؟!!! |
والحركة الشعبية أيضا متمرده
قد نحتاج الى تعريف التمرد فالصمت ايضا نوع من أنواع التمرد
Quote: ياامين هذه الحركات لم تقم كأحزاب في ظروف طبيعية بل هي حركات فرضتها ظروف معينة لمناطق معينة ومن الطبيعي ان تكون ذات شكلية معينة ..فاهل دافور عانوا من الانظمة الحاكمة ومن هذا النظام وخرجوا يدافعون عن ارضهم وانسانها باعتبارهم اهل وجعة ولن ينتظروا اهل شندي او كسلا او مروى لاعطاءهم الضوء الاخضر للتعبير عن مطالبهم ...
هل يجب على هذه الحركات ان تأخذ المباركة والشرعية من اهل الشمال والوسط والشرق ؟!!
فصراحة منطقك هنا غريب !! |
وين الغرابة يا فايز؟
رأي إنو التغيير السلمي للسلطة هو أكثر نجاعة
وأفيد لنا عبر توافق الجميع وخروجهم للشارع لاسقاط النظام
هذه وجهة نظري وغير ملزمة لأي شخص
سؤال يا فايز : هل تستطيع الحكومة قتل 5000 متظاهر
بدم بارد كما تفعل مع المتمردين الذين تقاتلهم؟
هذه الجبهة ينبغي أن لا تنفصل عن بقية مكونات السودان
والا سنعيد انتاج الازمة مرة أخرى
الانتفاضة الشعبية والتغيير السلمي سيكون مرضي للجميع
ثم إن التاريخ يقول لم تنجح الحروب المسلحة في اقتلاع حكم العسكر
Quote: بعدين هل حزب الامة يمثل كل السودان ؟
ام الاتحادي يمثل كل السودان ؟
ام مؤتمرالبجا يثمل كل البجا خلى السودان ؟ |
بالطبع لا ..... والسودان يمثله ارادة شعبه
فقد فشلت النخب والاحزاب في تحقيق آمال وطموحات الشعب السوداني
وكذلك فعل العسكر.........
الفكرة بوضوح وبدون لولوة يا قريبي هي:
Quote: لا يمكنني أن أدعم أي جهة تسعى للوصول الى السلطة
عبر فوهة البندقية وهو ذات السبب الذي يجعلني لا أؤيد الانقاذ
إن انا وافقت على ذلك من أين لي أن اضمن أن لا تملي
علي وعلي الشعب السوداني أجندتها الخاصة |
تحاياي
|
Post: #11
Title: Re: الجبهة الثورية.........
Author: الامين موسى البشاري
Date: 02-24-2012, 11:24 PM
Parent: #9
Quote: مع انك اديتني ضربة الانكل
وكلت لي بوست ما ح اقدر انزلوقريب للتشابه
لكن بقول ليك
واصل وصلت نفس الفهم |
تمام يا حافظ قول رأيك وافتح بوستك
ففي التنوع رحمة والبورد يسع الجميع
المافي شنو؟
|
Post: #12
Title: Re: الجبهة الثورية.........
Author: Mohamed Foto7li
Date: 02-24-2012, 11:29 PM
Parent: #11
سلام ياحبيب
كلامك منطقي لاكن ناس الحكومة قالو الدايره يجي بالسلاح
|
Post: #13
Title: Re: الجبهة الثورية.........
Author: الامين موسى البشاري
Date: 02-24-2012, 11:47 PM
Parent: #12
| Quote: كلامك منطقي لاكن ناس الحكومة قالو الدايره يجي بالسلاح |
وعليكم السلام يا حبيب
وهل يتوجب علينا أن نسمع كلام ناس الحكومة؟
قول لناس الجبهة الثورية ادوني 5000 مقاتل
اتظاهر بيهم في الخرطوم وسأسقط بهم النظام
الحرب تعطي الحكومة ذريعة للاستمرار وللقتل
بالحرب نضيع ونهدر طاقات السودان الشحيحة أصلاً
وبها نفقد شباب السودان ونحن في حوجتهم بلا شك
تحاياي
|
Post: #14
Title: Re: الجبهة الثورية.........
Author: محمد البشرى الخضر
Date: 02-25-2012, 00:02 AM
Parent: #13
Quote: ولكنها لا يمكن أن تسحق 5000 متظاهر في الخرطوم
لأنها إن فعلت سيواجهها المجتمع الدولي |
وهل خرج خمسة الف متظاهر في الخرطوم ؟ خليك من خمسة آلاف هل خرج خمسمية حتى ؟
|
Post: #15
Title: Re: الجبهة الثورية.........
Author: Mohamed Suleiman
Date: 02-25-2012, 01:06 AM
Parent: #14
الإيدو في الموية ... ما زي الإيدو في النار !!!!
تدهشني أحيانا نظريات اليوتوبيا السودانية .....
هل تتعاطف مع الشعب الفلسطيني؟؟!!
إذا كانت الإجابة بنعم
هل هم يمثلوك؟؟!!
إذا الإجابة بلا .....
أسجل لك نقطة أنك متوافق في مواقفك .... consistent
|
Post: #16
Title: Re: الجبهة الثورية.........
Author: Tragie Mustafa
Date: 02-25-2012, 04:32 AM
Parent: #15
الفاضل الامين بشاري
انت يا حبيب ما تعمل لينا زي بله موسى
القاعد هنا ينتقد في المعارضه ليه 8 سنوات!
بدل يقدم لينا نموذج لما يجب ان تكون عليه....المعارضه!
اها الحركات دي الما بتمثلك دي ربك....قدرها تعمل الجبهة الثوريه!
انتو الما بتمثلكم ديل ولكنكم برضو معارضه طلعوا انتو المظاهره ام ال 5000!ولا شنو؟!
يا امين العرقيه لا تخفى على احد في اي طرح هنا....
فاذا كنت تعتبر نفسك كعرب دارفور غير ممثل فانت محكر وممثل في كل حركات دارفور وفي الحركه الشعبيه نفسها!
وقاعد سيادتك في كاودا(ههههههههه)ومحكر بلا علمك...عفوا اقصد من ينتمون لك!
يلا طلعوا لينا انتو ال 5000 متظاهر هؤلاء...وما تنسى كلم ناس الكونت معاك
لانهم برضو رافضين لكاودا وقاعدين يجعجعوا بانهم اكبر حزب
وغالبهم يطلعوا مظاهره واحده!!ويتضاروا بلا خجله وراء المناصير!!
قول لهم اتحزموا....حزب الامه و الاتحادين وطلعوا لينا مظاهره!
وجايك بمهل...ده كده على سريع!
|
Post: #19
Title: Re: الجبهة الثورية.........
Author: الامين موسى البشاري
Date: 02-25-2012, 09:12 AM
Parent: #16
| Quote: وجايك بمهل...ده كده على سريع! |
تراجي مصطفى
سلام يا ام حازم ..... ولم تخيبي ظني فيك
فقد كنت أتوقع حضورك ......
عموماً مرحبا وأنا ايضا سأعود للتعقيب
على مداخلتك اعلاه برواقه
كوني بخير
|
Post: #23
Title: Re: الجبهة الثورية.........
Author: الامين موسى البشاري
Date: 02-25-2012, 11:06 AM
Parent: #16
أم حازم رجعنالك
Quote: انت يا حبيب ما تعمل لينا زي بله موسى
القاعد هنا ينتقد في المعارضه ليه 8 سنوات!
بدل يقدم لينا نموذج لما يجب ان تكون عليه....المعارضه! |
يا تراجي أنا ما زي بله موسى
ولكنني طرحت رأي ونموذج واضح لكيفية اسقاط النظام
وهو عن طريق تعبئة الشارع والخروج في انتفاضة شعبية
تطيح بالنظام يشترك فيها جميع المتضررين من الانقاذ
Quote: لا يحل القضية ولا يسقط الانقاذ بل يمنحها سببا للبقاء أكثر
حيث يمكنها أن تسحق 5000 مقاتل من الجبهة الثورية
في معركة واحدة ......... بذريعة محاربة التمرد
..
..
ولكنها لا يمكن أن تسحق 5000 متظاهر في الخرطوم
لأنها إن فعلت سيواجهها المجتمع الدولي |
وليه اتجاوزتي الكلام الفوق ده وهو الحقيقة التي لا تريدين الاعتراف بها
Quote: اها الحركات دي الما بتمثلك دي ربك....قدرها تعمل الجبهة الثوريه!
انتو الما بتمثلكم ديل ولكنكم برضو معارضه طلعوا انتو المظاهره ام ال 5000!ولا شنو؟!
|
البوست ده واحد من الآليات التي تبصر الناس
Quote: يا امين العرقيه لا تخفى على احد في اي طرح هنا....
فاذا كنت تعتبر نفسك كعرب دارفور غير ممثل فانت محكر وممثل في كل حركات دارفور وفي الحركه الشعبيه نفسها!
وقاعد سيادتك في كاودا(ههههههههه)ومحكر بلا علمك...عفوا اقصد من ينتمون لك! |
وهل هم قدوة لك لمحاربة العرقية بمزيد من العرقية
يا جماعة وين استنارتكم البتتكلموا عنها دي؟
تحالف كاودا لا يمثلني ولا يمكنني تأيد من يريد الوصول
الى السلطة وتغيير الواقع عبر السلاح
Quote: قول لهم اتحزموا....حزب الامه و الاتحادين وطلعوا لينا مظاهره!
|
وديل برضو لا يمثلونني يا تراجي وانت سيدة العارفين
ومنتظر عودتك بالسلامة
تحياتي
|
Post: #18
Title: Re: الجبهة الثورية.........
Author: الامين موسى البشاري
Date: 02-25-2012, 08:51 AM
Parent: #15
محمد سليمان
سلامي وتحياتي،،
| Quote: الإيدو في الموية ... ما زي الإيدو في النار !!!! |
أكيد أنت لست أحدهم
نتفق بأنك لك قضية وقضية عادلة كمان
رأيك هو ان تحمل السلاح لنيل حقوقك
رأي هو أنك توفر للحكومة فرصة للبقاء اكثر
وذلك بتصويرك كمتمرد ومقاتل للحكومة
العمل السلمي أكثر نجاعة من حمل السلاح لو كنتم تعلمون
قل لي أي الحكومات في الدنيا ترضى بأن يحمل عليها أحد السلاح
ثم تقف متفرجة؟
حدث هذا في عصر صدر الاسلام زمن الحجاج
وإن كان حمل السلاح في رأي خطأ كبير
فإن ردة فعل الحكومة العنيفة والمبالغ فيها
هي خطأ أكبر من عملية حمل السلاح نفسه
موقفي واضح لا يمكنني تأييد من يصل للحكم عبر السلاح
حتى لا يفرض أجندته علي ...........
| Quote: تدهشني أحيانا نظريات اليوتوبيا السودانية ..... |
ويدهشني أيضا من يعيش في بلد ديمقراطي
ويحمل قدرا من العلم ثم يختزل كل مشاكل السودان
في مسائل عرقية تضر بقضيته أكثر مما تنفعها
ويدهشني أكثر أن تمكن أنت بذات نفسك للنظام
ثم تنقلب عليه فتحمل السلاح وتدعوا الآخرين
لكي يقفوا معك..... contradiction
Quote: هل تتعاطف مع الشعب الفلسطيني؟؟!!
إذا كانت الإجابة بنعم
هل هم يمثلوك؟؟!! |
لا اتعاطف معهم بالمطلق هكذا.........
بالرغم من أن المقارنه عسيرة الفهم هنا
يا محمد صدقني إن اخرجت متظاهرين يمكنك اسقاط النظام
أما قتالك للحكومة فهو زاد لها للبقاء أكثر
تخيل إن احدى الولايات في أمريكا قد حملت السلاح
في وجه الحكومة الامريكية ... فماذا سيكون رد الحكومة الامريكية؟
... المهم............
|
Post: #17
Title: Re: الجبهة الثورية.........
Author: الامين موسى البشاري
Date: 02-25-2012, 06:48 AM
Parent: #14
| Quote: وهل خرج خمسة الف متظاهر في الخرطوم ؟ خليك من خمسة آلاف هل خرج خمسمية حتى ؟ |
ود البشـــرى
ســـلام يا حبيب.....
لم يخرجوا مع الاسف في الخرطوم
وإن خرج 500 سيلحق بهم البقية بلا شك
يعني ده الطلعت بيهو من الكلام ده كلو
|
Post: #20
Title: Re: الجبهة الثورية.........
Author: محمد البشرى الخضر
Date: 02-25-2012, 09:30 AM
Parent: #17
لا مش دا بس الطلعت بيه يا ود البشاري, بالإضافة لإنك شايف حاجات الناس من زاوية شوفك و تقديراتك انت و بتحاسب فيهن على الاساس دا
طلعت بإنك ملخبط في تقسيمك لعضم - يا قولك - الجبهة الثورية Quote: عضم الجبهة الثورية مكون من :
الحركة الشعبية قطاع الشمال
حركات دارفور المتمردة
التمرد في جبال النوبة
التمرد في النيل الازرق
|
|
Post: #21
Title: Re: الجبهة الثورية.........
Author: الامين موسى البشاري
Date: 02-25-2012, 09:45 AM
Parent: #20
| Quote: بالإضافة لإنك شايف حاجات الناس من زاوية شوفك و تقديراتك انت و بتحاسب فيهن على الاساس دا |
يا ود البشـــرى
أنا (واعوذ بالله من أنا) وضعت أيقونة وقلت دا رأي
وما بحاسب في زول وفي نفس الوقت ماف زول يحاسبني
ممكن نتناقش حول الامرين ..........
رأي ما فرضته على زول يا ود البشــرى
المهم أنت رأيك شنو ؟
قلت لي (ملخبت) في الجبهة الثورية ؟
تحاياي
|
Post: #25
Title: Re: الجبهة الثورية.........
Author: فايزودالقاضي
Date: 02-25-2012, 11:30 AM
Parent: #21
| Quote: وهو عن طريق تعبئة الشارع والخروج في انتفاضة شعبية |
لو ماتعبأ الشارع وماقامت انتفاضة شعبية ؟!!!
هل تظل الشغلة مفتوحة حتى قيام الساعة ؟
ام هناك حلول أخرى ؟!!
|
Post: #26
Title: Re: الجبهة الثورية.........
Author: الامين موسى البشاري
Date: 02-25-2012, 11:38 AM
Parent: #25
Quote: لو ماتعبأ الشارع وماقامت انتفاضة شعبية ؟!!!
هل تظل الشغلة مفتوحة حتى قيام الساعة ؟
ام هناك حلول أخرى ؟!! |
أول حاجة أنت رأيك شنو؟
مع التغيير السلمي الجماعي
أم مع التغيير عبر السلاح عن طريق فئة معينة؟
وبعدين نكمل الباقي..........
والحاجة التانية يا فايز أيهما أسهل :
تعبئة الشارع وتحريكه ام الكفاح المسلح
والذي هو بالتأكيد في غير صالح الحركات التي تحارب دولة
وجيش نظامي كامل العدة والعتاد زائدا مليشياته المسلحة
الحل هو في تعبئة الشارع والتغيير السلمي سيأتي لا محالة
تفعيل مؤسسات المجتمع المدني والنقابات والاتحادات ... الخ الخ
فايز خليك مننا هناك بعضاً من ناس الحكومة مقتنعين
بضرورة وحتمية التغيير ..........
كن بخير
|
Post: #27
Title: Re: الجبهة الثورية.........
Author: فايزودالقاضي
Date: 02-25-2012, 12:36 PM
Parent: #26
ياقريبي ...سلامات ..
Quote: أول حاجة أنت رأيك شنو؟
مع التغيير السلمي الجماعي
أم مع التغيير عبر السلاح عن طريق فئة معينة؟
وبعدين نكمل الباقي.. |
ياامين كل الناس مع التغيير السلمي
وحتى بعد الانقلاب المشؤوم الناس كانت ترفض المواجهة المسلحة والحكومة هي التى اجبرتها بعنجهيتها وغطرستها على رفع السلاح ...
وكل هذه الحركات جلست في اتفاقيات مع الحكومة ولكن مع الاسف لم تلتزم الحكومة كعهدها بالمواثيق ..
نحن الفي الشرق ديل كذبوا علينا باتفاقية الشرق بعد ان جنحنا لها بضرورة السلام ..والنتيجة ضربوا صندوق اعمار الشرق والمنحة التى منحتها الكويت والمانحين للشرق لم تجد طريقها للتنمية ..فلا تنمية في الارض ولا مشاركة حقيقية في الحكومة الاتحادية ... حكومة طويلة عريضة مافيها من الشرق الا وزير واحد هو ابراهيم محمود وده لانه مؤتمر وطني ..والبقية مساعدين يايات كان موسى محمداحمد ولا آمنة ضرار ولا مبروك سليم..اوليس ذلك استحماراً لنا كأهل اقليم شرقي عريض نمثل رقم في الاقتصاد السوداني من دهب وميناء وزراعة وغيره ؟!!
هسه لو شلنا السلاح في زول بلومنا بعد ان جنحنا للسلم ولم نجني الا التهميش ؟!!
ياامين تظل المقولة (الايدو في الموية مازي الايدو في النار ) منطقية ومقنعة بالنسبة لي..
لو كتلوا والدينك واخوانك وحرقوا بيتكم ياامين هل ستبحث عن سلام مع من فعل ذلك ؟!!
تحياتي ،،
|
Post: #28
Title: Re: الجبهة الثورية.........
Author: الامين موسى البشاري
Date: 02-25-2012, 03:12 PM
Parent: #27
Quote: ياامين تظل المقولة (الايدو في الموية مازي الايدو في النار ) منطقية ومقنعة بالنسبة لي..
لو كتلوا والدينك واخوانك وحرقوا بيتكم ياامين هل ستبحث عن سلام مع من فعل ذلك |
مهما يكن يا فايز
أي مجموعة تتسلم الحكم عن طريق السلاح
أنا ضدها ....... وانا مع الديمقراطية وسيادة حكم القانون
ومع التغيير السلمي لسلطة الانقاذ..... وضد
استخدام السلاح لحل القضايا السياسية ....
ورأيك شنو لو قلت ليك ناس الحركات المتمردة
في دارفور ديل كتلوا 10 من أعمامي واخوالي
في يوم واحـــد فقط والعديد من اهلي واقربائي
..
..
مع العلم أنني لم أُسس موقفي هذا على ذلك
تحياتي
|
Post: #29
Title: Re: الجبهة الثورية.........
Author: محمد البشرى الخضر
Date: 02-25-2012, 04:51 PM
Parent: #28
عارفنو راي يا ود البشاري هو اصلا لا يمكن ان يتجاوز حتة الراي دي
الناس الشالت السلاح ما شاوروا زول او عملوا استطلاع راي قبل ما يتخذوا خيارهن دا
ولما قلت ليك بتحاسبهن ما بالمعنى الحرفي للحساب لكن بمعنى انك بتقول خياركم الاخترتوه خاطئ عشان كيت وكيت
وكيت وكيت دي وانت على بعد آلاف الأميال و الأيام من الظروف التي اجبرتهن على اتخاذ هذا الخيار
المهم انا رأيي ان شيل السلاح و الحرب ليست نزهة ومن يضطر لهذا الخيار فما دفعه له إلاّ نفاذ الخيارات الاخرى
وإندلاع الحرب في السودان نتاج مظالم وغياب للعدل وإستمرارها نتاج غباء سياسي وضيق افق و نظرة ضيقة لمصلحة النظام لا البلد
وكان في يد الحكومة الفرصة لإخمادها بتقديم بعض التنازلات الحقيقية وما اتفاقية اديس ابابا التي وقعها نافع الليلة و بلاّها و شرّبوا مويتها البشير بكرة إلاّ ابلغ دليل على ذلك
بالنسبة للخبطتك في (عضم) الجبهة الثورية فانت كتبت الحركة الشعبية قطاع الشمال في الأول واردفتها بالتمرد في النيل الازرق و جنوب كردفان في تلاتةو اربعة
وجملت التمرد في دارفور في رقم اتنين
في حين الحركة الشعبية هي نفسها التي تقاتل في جنوب كردفان و النيل الازرق وممثلة في التحالف بسهم واحد اما حركات دارفور فهي ثلاث حركات مختلفة و لها ثلاثة اسهم مختلفة في التحالف
|
Post: #30
Title: Re: الجبهة الثورية.........
Author: Mohamed Suleiman
Date: 02-26-2012, 02:43 AM
الأمين موسي البشاري:
Quote:
ويدهشني أكثر أن تمكن أنت بذات نفسك للنظام
ثم تنقلب عليه فتحمل السلاح وتدعوا الآخرين
لكي يقفوا معك
|
الآن بدأت أشك في حقيقة أي شئ تورده أنت ... حتي حقيقة معلومات التقنية عن الحاسوب و أدوات الإتصال الحديثة ...
لأن الحقيقة لا تتجزأ ...
أنا أحترم خصمي عندما يفحمني بالحقيقة ..
و لا احترم صديقي الذي يلجأ الي الكذب و البهتان .. عندما يغادره المنطق و يعجزه البرهان ....
لا نقاش لي معك يا صاح
ء
|
Post: #31
Title: Re: الجبهة الثورية.........
Author: الامين موسى البشاري
Date: 02-26-2012, 08:09 AM
Parent: #30
محمد سليمان ..... تحياتي
Quote: الآن بدأت أشك في حقيقة أي شئ تورده أنت ... حتي حقيقة معلومات التقنية عن الحاسوب و أدوات الإتصال الحديثة ...
لأن الحقيقة لا تتجزأ ...
أنا أحترم خصمي عندما يفحمني بالحقيقة .. |
وأين خرجت أنا من نطاق الاحترام لشخصك؟
قلت كلام واضح لا يمكنني دعم أي شخص أو مجموعة
تحاول الوصول الى السلطة عن طريق البندقية
وقلت أنت الايدو في الموية مش زي الايدو في النار
لديك دوافعك الخاصة التي تقاتل من أجلها
أما أنا فلا يوجد لدي نفس الدوافع لاقاتل من أجلها
أتفق معك فقط في ضرورة اسقاط النظام ونختلف في الاسلوب
أنا مؤمن بضرورة التغيير السلمي ومع حكم وسيادة القانون
أنا ضد رأيك فقط فجعلتني خصمك
يا رجل مالك كيف تحكم؟
نحن زملاء في منبر عام ولسنا خصوم أو اصدقاء بأي حال من الاحوال
الخلاصة أننا نناقش الافكار فقط .....
| Quote: لا نقاش لي معك يا صاح |
It is up to you
هذا خيارك يا حبيب
احترامي
|
Post: #32
Title: Re: الجبهة الثورية.........
Author: عبدالرحمن عزّاز
Date: 02-26-2012, 11:09 AM
Parent: #31
أستاذى القدير ... البشارى
تحياتى و تقديرى و إحترامى ... أتفق معك جملة و تفصيلا
و أعود بمهلة
......
|
Post: #34
Title: Re: الجبهة الثورية.........
Author: الامين موسى البشاري
Date: 02-26-2012, 09:43 PM
Parent: #32
Quote: أستاذى القدير ... البشارى
تحياتى و تقديرى و إحترامى ... أتفق معك جملة و تفصيلا
و أعود بمهلة |
عبد الرحمن عزاز
ولك من التحايا اضعاف
في انتظار عوتك يا عزيز
|
Post: #33
Title: Re: الجبهة الثورية.........
Author: الامين موسى البشاري
Date: 02-26-2012, 03:42 PM
Quote: بالنسبة للخبطتك في (عضم) الجبهة الثورية فانت كتبت الحركة الشعبية قطاع الشمال في الأول واردفتها بالتمرد في النيل الازرق و جنوب كردفان في تلاتةو اربعة
وجملت التمرد في دارفور في رقم اتنين
في حين الحركة الشعبية هي نفسها التي تقاتل في جنوب كردفان و النيل الازرق وممثلة في التحالف بسهم واحد اما حركات دارفور فهي ثلاث حركات مختلفة و لها ثلاثة اسهم مختلفة في التحالف |
ود البشـــرى
لسه مصر اني ملخبت؟ أها لا ملخبت ولا حاجة يا زول
كده امشـــي أقرأ مقال تراجي ده يمكن تفهم حاجة
الحركة الشعبية لتحرير السودان/ قطاع الشمال .. إنهيار نظرية "التوطين"!
اهلنا قالوا الصلاة فيها الســـر وفيها الجهر
أها الجهر موجود والسر عليك قراءة ما بين السطور يا حبيب
ود البشـــرى اية كلمة بكتبها هنا بكون متأكد منها تماماً
لاحظ أنا قلت عضمها وعضمها دي خت تحتها خطين
الجبهة الثورية بحروبها دي ممكن تجر الســودان كله
الى حروب عرقية وأهلية بين مكوناته المختلفة
تحياتي
|
Post: #35
Title: Re: الجبهة الثورية.........
Author: محمد البشرى الخضر
Date: 02-26-2012, 11:12 PM
Parent: #33
عليك النبي يا ود البشاري فكّني من قولة بين السطور دي
كرهتي ليها عن جني وجادات
و المقال دا مشيت لقيتو طويل وممل كدي اديني النجيضة
شنو يعني الحركة الشعبية مشيّلة الشعب السوداني كلّو القفة ما عداكم انت وتراجي و الزول ابو بال سلبة الكتب المعلقة ديك !!
قادر الله !!
|
Post: #36
Title: Re: الجبهة الثورية.........
Author: الامين موسى البشاري
Date: 03-01-2012, 09:19 PM
Parent: #35
Quote: عليك النبي يا ود البشاري فكّني من قولة بين السطور دي
كرهتي ليها عن جني وجادات |
يا ود البشــرى لو دايرين يقولوه ما كان بقى ما بين السطور
|
Post: #37
Title: Re: الجبهة الثورية.........
Author: الامين موسى البشاري
Date: 03-13-2012, 10:02 PM
Parent: #36
*
|
Post: #38
Title: Re: الجبهة الثورية.........
Author: غالب شريف
Date: 03-14-2012, 02:34 PM
Parent: #37
هدا هو الراي السليم منطقيا واخلاقيا
ويتسم بالوضوح التام وهو راي الفطرة السليمة
لغالبية جموع الشعب السوداني
وما سواه صراع على السلطة والكيكة
والله ياود البشاري جننونا ناس المشهد السياسي ديل
مرة يوالو ومرة يعادوا حسب القسمة والنصيب من الكعكة
القيم والمبادئ والشعب ليهم الله والكتاحة
لوعاوز كوميديا وتراجيديا معا فقط كمثال وليس حصرا
اقرا كلامات عفار الترابي عرمان اركو مني الصادق. الميرغني
الشيوعي الجن الاحمر.....الخ قبل الكرسي ومابعده ومابعد بعده
|
Post: #39
Title: Re: الجبهة الثورية.........
Author: الامين موسى البشاري
Date: 03-16-2012, 12:06 PM
Parent: #38
Quote: هدا هو الراي السليم منطقيا واخلاقيا
ويتسم بالوضوح التام وهو راي الفطرة السليمة
لغالبية جموع الشعب السوداني
وما سواه صراع على السلطة والكيكة |
غالب شريف ....... تحياتي
هذا هو رأي الاغلبية الصامتة التي ليس لها في العير او البعير
ولكنها صامتة فعلاً ...
لو كان التغير عبر السلاح هو خيار كل الشعب السوداني
لكان الامر أهون قليلا
شكرا لرأيك الواضح والدعم والمؤازرة
كن بخير
|
Post: #40
Title: Re: الجبهة الثورية.........
Author: الامين موسى البشاري
Date: 03-29-2012, 09:30 PM
Parent: #39
لا زال موقفي كما هو من الجبهة الثورية
|
Post: #41
Title: Re: الجبهة الثورية.........
Author: الصادق الزين
Date: 03-30-2012, 03:19 AM
Parent: #40
الأخ الأمين،
تحياتى..
لا أحد يرغب فى الحرب، و لكنها إرادة الله التى جعلت ابغض الحلال إليه الطلاق، فحكم الدخول فى الحرب او القتال لتحقيق منفعة ما أو درء شبهة أو فتنة، شبيه بحكم الطلاق، أمسك الكلام دا من المسلمات، لأنى حتفق معاك فى كلامك الداعى إلى التغيير السلمى، لكن أخشى على كلامك دا ما خشاه محمد سليمان عندما أطلق عليه "يوتوبيا" الواقع يا أمين يقول أن هذه الحكومة جاسمة على صدر الشعب أربعة و عشرون عاماً و التعبئة الإنت قاصدها دى زى تعبئة أهلنا للقربة المقدودة يعنى المحصلة النهائية صفر كبير، بعدين حكاية تعبئة النقابات و الإتحادات و عصيان مدنى، يا أخى و الله هذه يوتوبيا أخرى، الحكومة يا خوى شغالة عشرة سنين فى برنامج إسمه التمكين Institutionlization، يعنى عندما بلغت سن العاشرة هى سيطرت سيطرة كاملة على كل مفاصل الدولة بخدمتها المدنية و جيشها و ضافت ليهو كمان مليشيات أمن و ترسانات و شرطة شعبية و قوات تحت الأرض و دا كل عشان قربتك المقدودة دى تظل مقدودة و ما تتملى، طيب حتغير سلمى كيفن؟؟ مثل آخر أهلنا بقولوا المضطر باكل النجيلة، الناس الشالوا سلاح و قعدوا فى الغابات و الصحارى و الجبال ديل هم أكثر الناس يتمنون السلم و العودة إلى الداخل، لكن بس عاين ود القاضى قال ليك شنو؟ الناس وقعت إتفاقيات مع الحكومة عشان ينهو الحرب و يعيشوا فى سلام، الحكومة غدرت بكل ذلك و بقتهم مساعديين يايات و حلل و العهدة على ود القاضى، صحيح حدث تغيير سلمى فى السودان فى ظل أنظمة دكتاتورية، لكن الوضع كان مختلف تماماً و لا يصلح كقياس البتة، الشيئ الآخر و المهم جداً يا البشارى هو التغيير نفسه؟ يا أخى الناس دى خايفة من التغيير فى حد ذاته و الخوف دا مصدره الحكومة ذات نفسها هى البثت ثقافة الرعب فى الناس بإعتبار أن القوة التى تحمل السلاح قوة لاتريد الخير بالناس و بالتالى الناس ما حتطلع مظاهرات و لا حتعمل ثورات لأنها خايفة من التغيير الشوهت الحكومة من شكلوا!! و يا دوب نظريتك نظرية التغيير السلمى البيقولوا عليه أهلنا أيضاً "حشاش بدقنو" طولت من عمر الحكومة، حمل السلاح لقتال الحكومة لهزيمتها هو الحل يا البشارى، و هو فرض عين على كل زول يعارض هذا النظام، صحيح حيهدر موارد متعددة لكن لا سبيل من ذلك، ما فقده و سيفقده السودان بسبب وجود هذه الحكومة أكبر بكثير من تكاليف الحرب مهما عظمت، الحكومة هى الشيطان الذى يجب أن يذهب و القوى التى تحمل السلاح هى قوى فى النهاية سودانية ممثلة لكل أنواع الطيف و دى الضمانة الحقيقية التى تمنع أى جهة ما من فرض أجندتها على الأخرى و سيكون عنئذِ الطريق ممهداً للديمقراطية و العدالة و الحريات و لعقد جديد يتساوى فيه الناس جميعاً...
|
Post: #42
Title: Re: الجبهة الثورية.........
Author: الامين موسى البشاري
Date: 03-30-2012, 08:24 PM
Parent: #41
الصادق الزين
وعليكم السلام ورحمة الله،،،
| Quote: الواقع يا أمين يقول أن هذه الحكومة جاسمة على صدر الشعب أربعة و عشرون عاماً و التعبئة الإنت قاصدها دى زى تعبئة أهلنا للقربة المقدودة يعنى المحصلة النهائية صفر كبير، بعدين حكاية تعبئة النقابات و الإتحادات و عصيان مدنى، يا أخى و الله هذه يوتوبيا أخرى، الحكومة يا خوى شغالة عشرة سنين فى برنامج إسمه التمكين Institutionlization، يعنى عندما بلغت سن العاشرة هى سيطرت سيطرة كاملة على كل مفاصل الدولة بخدمتها المدنية و جيشها و ضافت ليهو كمان مليشيات أمن و ترسانات و شرطة شعبية و قوات تحت الأرض و دا كل عشان قربتك المقدودة دى تظل مقدودة و ما تتملى |
الصادق الزين يا اخوي لو أخذت هذا الكلام كمسلمة
يبقى هذه الحكومة سوف لن يغيرها النضال المدني أو العسكري
لأنها وبنفس القدر الحكومة مكنت لنفسها عسكريا
ما تقوله هو نفس تصوير العرب لاسرائيل كأسطورة لا تهزم
يعني هم هزموا انفسهم قبل أن يحاربوا اسرائيل
وبعدين كلامي واضح يا الصادق وهو
لا يمكن أن ادعم فئة من الشعب السوداني تسعى للوصول الى السلطة
عبر فوهة البندقية وارجو أن تركز في كلمة فئة هذه
وصول الفئة التي تقاتل للوصول الى الحكم هو اعادة انتاج للازمة
..
..
نظام الانقاذ الذي تقول مكن لنفسه ليس أقوى من أنظمة اخرى
مثل نظام القذافي و(البعث في سوريا والعراق ) ومصر ..... الخ
وهذه الانظمة كما رأيت تهاوت تحت صحوة الشعب ورغبته في التغيير
لو فرضنا انها اقوى من كل هؤلاء فهي بلا شكـ ليست أقوى من نظام
نيكولاي شاوسيسكو في رومانيا الذي كان يتجسس على الناس
في غرف نومهم وكان يحكم رومانيا بالحديد والنار
..
..
التفاقيات مع الحكومة هي اتفاقيات منقوصة وفردية ولا تشمل
كل الوان الطيف وهو تكتيكـ من الحكومة لاضعاف الحركات
والدليل عندما فاوضت الجنوبيين متحدين لم تستطع التراجع
عن اتفاقية نيفاشا قيد أنمله
..
..
| Quote: القوى التى تحمل السلاح هى قوى فى النهاية سودانية ممثلة لكل أنواع الطيف و دى الضمانة الحقيقية التى تمنع أى جهة ما من فرض أجندتها على الأخرى و سيكون عنئذِ الطريق ممهداً للديمقراطية و العدالة و الحريات و لعقد جديد يتساوى فيه الناس جميعاً... |
اثبت لي أنها ممثلة لكل ألوان الطيف؟
صدقني لو كل الوان الطيف من الشعب السوداني
قرر حمل السلاح لاسقاط الحكومة لما كتبت هذا البوست
ولكنت أول الخارجين والحاملين للسلاح
نحن متفقين في حتة إنو الانقاذ نظام عقائدي سيطر على كل مفاصل الدولة
وقد لا يمكن اسقاطه عبر عصيان مدني أو مظاهرات
ولكن يجب أن نحاول أولا هذه وبعدين يحلها الله
ربما احتاج الشعب الى مقاتلة الانقاذ واجباره على ترك السلطة
ولكن!
يجب أن يكون هذا هو خيار الغالبية العظمى من السودانيين
وقد ذكرت هذا في صدر البوست أن الشعب الليبي بكامله
قاتل القذافي واسقطه ......
أما أن تحارب جهة او فئة نيابة عني وانا ليس متفق معها في اجندتها
هذا لا يضمن لي أن لا تفرض اجندتها علي...
..
..
الانقاذ تخشى المظاهرات والعصيان المدني أكثر من خشيتها
التمرد وحمل السلاح وهي تستغل هذا في العزف على وتر الوطنية
والخيانة والعمالة والارتزاق مما يوفر لها غطاء لضرب المقاتلين
السلاح سوف لن يحل القضايا السياسية بل الحوار فقط
وما حققته الحركة الشعبية لجنوب السودان عبر التفاوض
لم تستطع تحقيقه عبر 50 سنة من القتال
فهل تريدنا أن نتخلف 50 سنة اخرى ويأكلنا الجهل والفقر
قوى الهامش التي تقاتل الآن هي التي احنت ظهرها ليركب عليها المركز
هي أكثرية عدداً ولكنهم غثاء كغثاء السيل
لماذا لم تكون احزابها وتنظم نفسها لتأتي للسلطة عبر صناديق الاقتراع
في وقت الديمقراطيات السابقة قصيرة الاجل
تحياتي
|
Post: #43
Title: Re: الجبهة الثورية.........
Author: الرفاعي عبدالعاطي حجر
Date: 03-30-2012, 09:29 PM
Parent: #42
Quote: الحركة الشعبية قطاع الشمال لا تمثل كل الشمال
وحركات دارفور لا تمثل كل أهل دارفور
النوبة في كردفان يمثلون النوبة فقط
مالك عقار لا يمثل كل أهل النيل الازرق
ولهذا اقول أن الجبهة الثورة لا تمثل كل السودانيين
وحمل السلاح واشعال الحروب في اطراف السودان
لا يحل القضية ولا يسقط الانقاذ بل يمنحها سببا للبقاء أكثر
حيث يمكنها أن تسحق 5000 مقاتل من الجبهة الثورية
في معركة واحدة ......... بذريعة محاربة التمرد
..
..
ولكنها لا يمكن أن تسحق 5000 متظاهر في الخرطوم
لأنها إن فعلت سيواجهها المجتمع الدولي |
يااللمين اخوي
حقيقي حديثك مخيف ومليان تخويف وزراعة شك وربما (ااسف) بـساطة في الطرح متعمدة
كما خطاب الانقاذ المخاطب للعواطف بأن خطر الهامش الحاقدين على العروبة والدين آت .
اجيك من الاخر نظام الخرطوم لن تغيره الامنيات بأي حال وقول خروج 5000 شخص في الخرطوم
او مليون لن يغير نظام القبضة الامنية , كل عوامل ذهاب الانقاذ بالتحانيس لن تجدي نفعا
ومناوشات الاطراف وحرب الاستنزاف هذه ستُجدي وفي وقت قصير متى ضيت الخناق واسقطت المدن
فمن يقاتل عن تحقيق عدالة خلاف من يدافع لحماية ما ليس حقه والانقاذ وجوقة النهب لن تثبت
كثيراً في مواجهة الثوار ودونك دخول خليل ام درمان واجهته بعض الاجهزة الامنية واختبئ كافة
المعنيين من اللصوص والسارقين للآمان والامن والقاتلين من اجل ملاذات الحياة وربما جميعهم
هرب الى الاقاليم واطراف الخرطوم للاختباء .
دورالشعب هو البقاء بعيداً عن مواجهة الجبهة الثورية وليتركوا للداخلين امر لتصرف وليلتزموا
بيوتهم ليس إلا ...كما حالة الصمت بقوة الجوع والمرض والتخويف التي مارسوها على شعبنا طوال
23 عاماً عجافاً.تتحدث وكأنما الانقاذ احترمت من خروا على قلتهم , الانقاذ ستواجه اي خروج بعنف
لاخافة السائبة كما في المثل ولو ان الانقاذ يسقطها خروج 5000 سوداني ولن تقتلهم فلنجرب ونعود
للخرطوم للخروج .
يا اللمين اخوي ,,, احس في خطابك تعجيز واعتقد منذ اليوم الاول للتجمع لو التزم جععير احزابنا
بدعم انتفاضة محمية بالسلاح لما تجرأ علينا وتاريخنا وشعبنا من فضحهم كتاب الخندق برفع شعارات
التعمية الدينية في سبيل ان يستمتعوابمثنى ورباع واموال البترول المنهوبة ورشى اهل الدولار من
بلاد العم سام وتبديد واهدار اموال الشعب في سبيل كسب القضايا الخاسرة .
الخرطوم في ظل حكم القهر والاستبداد لن يغيرها غير استخدام القوة المفرطة وبعدها لكل حادث حديث .
.........................................................................حجر.
|
Post: #44
Title: Re: الجبهة الثورية.........
Author: الامين موسى البشاري
Date: 03-30-2012, 09:57 PM
Parent: #43
الرفاعي عبد العاطي حجر
سلامي وتحياتي،،،
Quote: حقيقي حديثك مخيف ومليان تخويف وزراعة شك وربما (ااسف) بـساطة في الطرح متعمدة
كما خطاب الانقاذ المخاطب للعواطف بأن خطر الهامش الحاقدين على العروبة والدين آت . |
أين هو التخويف يا رجل؟
قد نحتاج الى تعريف ما هو الهامش؟
ومن هم؟
انا نفسي من ابناء الهامش هذا ولم اؤكل احدا بالحرب نيابة عني
قلت وبلغة واضحة لا تقبل الجدل او المزايدة
Quote: صدقني لو كل الوان الطيف من الشعب السوداني
قرر حمل السلاح لاسقاط الحكومة لما كتبت هذا البوست
ولكنت أول الخارجين والحاملين للسلاح
نحن متفقين في حتة إنو الانقاذ نظام عقائدي سيطر على كل مفاصل الدولة
وقد لا يمكن اسقاطه عبر عصيان مدني أو مظاهرات
ولكن يجب أن نحاول أولا هذه وبعدين يحلها الله
ربما احتاج الشعب الى مقاتلة الانقاذ واجباره على ترك السلطة
ولكن!
يجب أن يكون هذا هو خيار الغالبية العظمى من السودانيين
وقد ذكرت هذا في صدر البوست أن الشعب الليبي بكامله
قاتل القذافي واسقطه ......
أما أن تحارب جهة او فئة نيابة عني وانا ليس متفق معها في اجندتها
هذا لا يضمن لي أن لا تفرض اجندتها علي... |
أعتقد الكلام دا ما فيهو أي اثنين ثلاثة
الهامش أو القوى التي تقاتل الانقاذ مطالبة بارسال
تطمينات لكل أهل السودان بعدم فرض أي أجنده عليه عند سقوط الانقاذ
وأي عدم اتفاق على مبادئ عامة وفترة ما بعد الانقاذ سيقود
حيدر الزين وعزام ومن لفه لفهم لحمل السلاح
ومقاومة التغيير الجديد باعتباره لا يمثل رؤاهم
الحرب يا الرفاعي يقودها العنصريين من الطرفين
| Quote: الخرطوم في ظل حكم القهر والاستبداد لن يغيرها غير استخدام القوة المفرطة وبعدها لكل حادث حديث . |
بشروط يتفق عليها وليس هكذا
وان يشترك كل المغبونين فيها ولا تكون حكرا على احد
وبعد ان نجرب كل وسائل التغيير السلمية
سؤال هل توافق على كل اجندة حركات دارفور المسلحة مثلا؟
تحاياي
|
Post: #45
Title: Re: الجبهة الثورية.........
Author: الامين موسى البشاري
Date: 03-30-2012, 10:07 PM
Parent: #44
لو قدر لشهداء 28 رمضان ان ينجح انقلابهم
لكنا اليوم في نظام الخلاص الوطني كما اسموه
ولكان هناك من يقاتلهم اليوم ......... ولا شنو؟
|
|