البشير: قاعدين نزيد الم ووجع حكومة الجنوب ونورم فشفاشهم ونفقع مراراتهم

Quote: نحن كل ما نمشي لقدام وكل ما نعمل انجاز واضح ان اخواننا البغادي ديك بيزيد وجعهم وبيزيد ألمهم، وبنورم فشفاشهم ان شا لله ونفقع مراراتهم ، لانو نحن كل ما نعمل حاجة هم بيزعلوا ، ان شالله كل يوم حا نزعلهم

الكلمه
كلام متوقع من رئيس لايجيد الدبلوماسية في كل شيئ
السياسة عنده هلال مريخ
ده فاقع مرارة بلد بحالها

(ههههههههههه)
والله فعلا هو طبيعي امثاله يكونوا رؤساء لامثال عزام!



شكرا يا واصل!

Quote: وقال مخاطبا والي القضارف الحصاد ما لاقين ليه ناس يا كرم الله ، نحن راجعين لي زراعتنا دي وح نطورها وح نرفع عائداتها ونرفع مزراعينها وح نزيد العائد منها واي مزارع ان شالله موعود وح نحقق كل الكلام الكان بيسمعوه من حزم تقنية ونهضة زراعية وح نتوسع في الزراعة افقيا وراسيا وح نعمل قيمة مضافة وح نصنع والمصانع ح تشتغل والتعدين ح يشتغل

يا لطيف لا نسالك رد القضاء لكن نسالك اللطف فيه

Quote: ورب ضارة نافعة ، الناس لقت قروش البترول واسترخوا وما عاوزين يشتغلو بقينا نجيب في العمال من كل اصقاع الدنيا لان اهلنا كل واحد خلف كراع فوق كراع وكل واحد بقى عمدة وما في زول عاوز يشتغل طلبة و وما في زول عاوز يشتغل كناس و ما في زول عاوز يشتغل عامل بناء ولا في زول عاوز يشتغل عامل زراعة

Quote: قالو شهرين ويقيف بترول الجنوب والحكومة تسقط، ياجماعة الناس ديل بعد ما قفلوا الانبوب ليه الدولار ماشي نازل؟؟، دة سؤال قفلوا الانبوب انتحروا ومصدر رزقهم كله هو البترول اللي عملنا ليهم نحنا عملناه غصبا عنهم وكنا بنقاتل وقدمنا الشهداء ودفنا عدد كبير من اولادنا هناك في مناطق البترول طلعناه جوا يمتنوا بيهو علينا ، قالو عاوزين يدونا منحة نحن يد عليا وح نظل يد عليا وما ح نكون يد سفلى ان شالله، و ما حا تقبل منحة منهم عندنا حقوق عندهم اما يدفعوها او نأخدها او يقفلو الانبوب دة ومحل ما يدوه يودوهو ان شالله ، وابوب الله والزرق فاتح

خطبة حماسية لرئيس ما عارف كيف يتصرف في مواجهة أزمات حكومته ..

Quote: قالو عاوزين يدونا منحة نحن يد عليا وح نظل يد عليا وما ح نكون يد سفلى ان شالله،

Quote: ووعد عمر البشير رئيس الجمهورية في الحوار الذي بثته قناة النيل الأزرق بانتهاء أزمة ارتفاع أسعار الدولار، وأضاف: وصلتنا أموال وستصلنا أموال لسد الفجوة لتقليل الضغط على الدولار، ولدينا ترتيبات لاستقرار الدولار بنهاية العام إلى ثلاثة جنيهات، وتابع: لاحظنا أن هناك أموالاً تنتقل من سلعة إلى أخرى وهناك مضاربات، وسنشبع السوق لكي لا يصبح الدولار سلعة مضاربة، مقراً بوجود كثير من الحديث حول تحويل الأموال إلى دولار، وقال: نحن نعلم حجم الكتلة النقدية في السوق وبكم نستطيع امتصاصها. وأشار محافظ بنك السودان المركزي د.محمد خير الزبير في وقت سابق إلى تحركات خارجية للحصول على مساعدات مالية من دول صديقة بهدف الوصول إلى الاستقرار في سعر الصرف وحددها بـ(الصين، إيران ، قطر، الكويت ، الإمارات ، السعودية).

هذا الشئ الذي سقط من السماء على عرش السلطة.. في ظرف تاريخي أرعن..
أكبر جريمة ارتكبها الترابي بعد مؤامرة إغتيال الاستاذ محمود محمد طه .. الإتيان بهذا (الشئ) و تسليمه مقاليد الأمر و النهي..
هذا الامر الذي يجب ان يحاكم عليه اكثر من محاكمته على التآمر و تقويض سلطة الشعب..
رئيس دولة يعتمد و يؤسس لثقافة البوبار .. كإمراءة ريفية بسيطة تفاخر بما عندها لتغيظ جاراتها..


الشريعة التي تغيظ.... الشريعة التي توجع القلب..

عندما يكون معتوه على رأس الدولة
تمتد المصائب الي دول الجوار

لا حولا و لا قوة الا بالله!

ضحكت و الله ... ضحكت ما شاء الله لى

ضحكت من شر هذه البلية و شر البلية ما يفقع بالضحك.


لا يعجز الله ... لا يعجز الله.


الله لا يبارك فى حسن الترابى ... ربنا يوسّع له مكان مااااهل فى الجحيم بقدر ما تسبب فى مأساة لشعب السودان.

الأخ واصل.

حديث الرئيس البشير يؤكد لي معلومة حصلت عليها من مسئول كبير في حكومة الجنوب، وهذه المعلومة تقول أن الرئيس عمر البشير هو شخصيا الذي يقف خلف منع تصدير أي سلعة لجنوب السودان عن طريق التجار الشمالين ويقف أيضا خلف الرأي المتشدد في مفاوضات البترول وفرض رسوم خيالية.

Quote: وبنورم فشفاشهم ان شا لله ونفقع مراراتهم ،

بالله دا كلام يقولو راجل.؟





لعنة الله عليك يالبشير

الأخ خضر الطيب
مثل هذه الصور تسيء لك أكثير مما تسيء للبشير،
وتفضح عقلية تستحق أن يكون عمر البشير بكل سواءته رئيسها وعنوانها الأبرز،
يجب أن نلتزم بأخلاق الفرسان عندما نناضل ضد عمر البشير وطغمة الجبهة الإسلامية وما بات يعرف بالمؤتمر الوطني،
أنا ضد الحكومة منذ يومها الاول الكالح السواد، ولا أظن أن هنا من هو في مثل كرهي لعصابات الإسلامويين في السودان،
كما أني على استعداد لتقديم روحي فداً لينعتق الشعب السوداني من ظلم هذا النظام الفاشستي ...
لكن لا يرضيني ابداً نضال كسيح كهذا ...
مع أكيد تقديري واحترامي

حاول تستخرج فرق وآحد بين الوآد منصور
والبشير واكسب جائزة.

الوآد البشير بيتكلم لغآت.
والله صحي...

أجدني - مضطراً - لإستعارة عبارة صديقي محمد فاروق سلمان عقب لقاء الرئيس الآخير :

من نصح هذا الغبي بالتحدث !

كونوا منصفين وتوجهوا باللوم ايضا الى العنقالي كير
ماذا تتوقعوا من البشير الاهوج بعد ان طلب منه كير ترك جو الخرطوم الساخن الى طراوة لاهاى وسجونها الخمسة نجوم
ابشروا بدولتين فاشلتين
جنى

جني.

لم أتوقع أن يكتب شخص ناقش ومتابع مثلك مثل هذا الكلام.
سلفا كير رجل معروف بأنه لا يتحدث كثيرا ولا يتحدث بمثل الطريقة التي يتحدث بها البشير ولا يستعمل لغة البشير السوقية التي لا تشبه حتى لغة البلطجية. حديث سلفا أتى بعد تهديدات الحرب الصادرة من الخرطوم بواسطة الرئيس البشير ووزير خارجيته تاجر الحديد. وحديث الرئيس سلفا كان حديث زول بجهز في مواطنيه وجنوده للحرب القادمة، التي أعلنها البشير.

Quote: ورب ضارة نافعة ، الناس لقت قروش البترول واسترخوا وما عاوزين يشتغلو بقينا نجيب في العمال من كل اصقاع الدنيا لان اهلنا كل واحد خلف كراع فوق كراع وكل واحد بقى عمدة وما في زول عاوز يشتغل طلبة و وما في زول عاوز يشتغل كناس و ما في زول عاوز يشتغل عامل بناء ولا في زول عاوز يشتغل عامل زراعة

بالله الزول ده بتكلم عن ياتو شعب؟ يبدو ان في مخيلته الفقراء الذين تحولو الي اثرياء بين يوم وليلة وسلاحهم رفع العصي ، والتهليل، والنصوص التي يجيدون تلحينها وتكرارها "سير سير " ياجماعة الزول ده كانه بيقول الشعب السوداني بعد البترول اصبح مترف ........لا يستطيع العمل ولا يرغب فيه ......وانتهي الاغتراب وانتهت البطالة ..........والله حكم

Quote: كونوا منصفين وتوجهوا باللوم ايضا الى العنقالي كير

الأخ العزيز حيدر ( جنى )
للأمانه القائد سلفا كير ليس بعنقالى
والأيام ستبرهن لك عظمة هذا الرجل والذى يعمل فى صمت..
.................................................
الأخ واصل
تحياتى

والله يا جني لو عمر البشير عنده ربع حكمة سلفاكير وصبره لصبرنا عليه.

يا اخي كفايه على سلفاكير انه صبر على هذا المعتوه 5 سنوات!!
جنس البقول فيه ده انت في عمرك ده سمعته رئيس سوداني قاله؟!ّ

يا اجني اختشي الراجل مفرج فيكم خلق الله!!

سلفاكير لم يخطيء.....سجن لاهاي ما كذب حوله.
نظيف ومرتب وبه مكتبه وملعب باسكت بول اها الراجل لا خدعه لا شيافه مكان مخيف!
وهو لو مكان البشير كان سلم نفسه.
حسه يا جني راجل بقول جنس الكلام ده يودوا لاهاي ولا باعشر؟!

Quote: ورب ضارة نافعة ، الناس لقت قروش البترول واسترخوا وما عاوزين يشتغلو بقينا نجيب في العمال من كل اصقاع الدنيا لان اهلنا كل واحد خلف كراع فوق كراع وكل واحد بقى عمدة وما في زول عاوز يشتغل طلبة و وما في زول عاوز يشتغل كناس و ما في زول عاوز يشتغل عامل بناء ولا في زول عاوز يشتغل عامل زراعة

تعال قول له انت منو ومؤهلاتك شنو ومستحمل شنو عشان تعيل كم اسره سودانيه؟!

زول ثلاثه ارباع ش ع ب ه طفشوا ويقعد يكذب على نفسه وكمان يصدقها؟!

قال ش ع ب ن ا رفض الشغل قال!!شوف المحن دي؟!

وبنورم فشفاشهم ان شا لله ونفقع مراراتهم ،













بالله دا كلام يقولو راجل.؟


معام انا برضو اتساءل ده ايه المعتوه ده

غايتو شر البلية هذا المجرم البشير

Quote: وح نحقق كل الكلام الكان بيسمعوه من حزم تقنية ونهضة زراعية وح نتوسع في الزراعة افقيا وراسيا وح نعمل قيمة مضافة وح نصنع والمصانع ح تشتغل والتعدين ح يشتغل

مستر ح
ح تفتح عمل الكيزان




اللهم انا لا نسألك رد القضاء ولكن نسألك اللطف

Quote: الناس لقت قروش البترول واسترخوا وما عاوزين يشتغلو

ديل منو؟؟؟؟؟

يأ ايها الظالم والجاهلُ
والشريرُ والكاذب
والشيطان تلميذ الجحود...

ألهي ربنا يحلك عنا ويأخذك أخذ عزيز مقتدر قادر يا كريم. مافي واحد
ورم فشفاشنا ووصل بلغتنا قاع الحضيض واذلنا وأهاننا مثلك...

يا واصل بالله جيب خطابو فى الجزيرة فى نص سكرة البترول وإحساس الشبع والتخمة اللحظى الشخصى الزائف بتاع حا نزرع بالليزر وكل زول حا يكون عندو (بوكسي هايلوكسى83) داك!!!!

(قفلوا الأنبوب) (قفلوا البلوفة)( جروا السلك) ميييييييييين اللى طفا النور,,

المؤتكل البطنى حانتو بقت تحلل


شر بليتنا يضحكنا والله..

علينا ان نخجل نحن شعب السودان
فهذا الرجل عار يلطخ وجوهنا
عار ان يكون رجل بكل هذا الانحطاط رئيسا لشعب وامة
ليس الذنب ذنبه انه عيبنا ان نجلس ونتفرج على هذا الهمبول

يا جماعة ويا شعب يا فضل ده كلام..؟؟؟ودي تصريحات رئيس دولة يعزف له السلام الجمهوري ويضرب الكركون سلاحه( بب بب) عند دخوله القصر الجمهوري
ويتهادي البيرق والنجدة (تونون) قدام موكبه..؟؟
رئيس سوقي ومتهتك المفردة و يدير دولة كاملة وفق اهوائه ووعية السوقي المبتزل...
اورم فشفاش
افقع مرارة
اقطع كلاوي
انها زمن الانحطاط والتردي وادارة الدول علي طريقة (الهبتلي) والانبعاج

ولك الله يا سودان
بالجد لك الله ياااخ

Quote: قفلوا الانبوب انتحروا ومصدر رزقهم كله هو البترول

البشير وجماعتو البقولوا هسي إنو وقف تصدير بترول الجنوب عبر الشمال هو مؤامرة لخنق الحكومة واسقاطها الخ الكلام الفارغ، عليهم أن يذكروا أن البشير هو أول من هدد وأكتر من مرة؛ حتى قبل 9 يوليو (بقفل الخط) حسب تعبيره في واحدة من خطبه الهوجاء مؤخراً المشابهة لدي.. ولو الجنوب الآن بنتحر بوقف الإنتاج، فدا معناه سيادتو كان عايز يبيد الجنوبيين جماعياً بقفل الخط.. طبعا بالنسبة ليهو الإبادة الجماعية دي حاجة عادية جداً يمارسها كل يوم من دارفور لجبال النوبة.. وعلى راي ود الباوقة نقول لسيدي الرئيس: أركز..

هييع،

ثم،


كعععع!


ثم;


(..................................)*


__
* يَوْريني الله فيك يوم يا عمر حسن أحمد البشير.. قَبُل سيد الوِداعي يَشيلا!

ناهيك عن كونه رئيس دولة و لكن كفرد فإن الاخ سلفا كير ميارديت يتصف بالصبر و الادب بشكل من الصعب ان تصدق بأنه كان مقاتلا في الاحراش

ليت يملك الاخ عمر البشير واحد على الف من تهذيب اخيه سلفا كير ميارديت

لو كان كذلك لكنا في وضع افضل

ناهيك عن كونه رئيس دولة و لكن كفرد فإن الاخ سلفا كير ميارديت يتصف بالصبر و الادب بشكل من الصعب ان تصدق بأنه كان مقاتلا في الاحراش

ليت يملك الاخ عمر البشير واحد على الف من تهذيب اخيه سلفا كير ميارديت

لو كان كذلك لكنا في وضع افضل

مكرر


مع الاعتذار

Quote: Quote: الناس لقت قروش البترول واسترخوا وما عاوزين يشتغلو ديل منو؟؟؟؟؟

إحتمال يكونو الجماعة القعدو يكتبو فى المذكرات ديل..

Quote: جني. لم أتوقع أن يكتب شخص ناقش ومتابع مثلك مثل هذا الكلام. سلفا كير رجل معروف بأنه لا يتحدث كثيرا ولا يتحدث بمثل الطريقة التي يتحدث بها البشير ولا يستعمل لغة البشير السوقية التي لا تشبه حتى لغة البلطجية. حديث سلفا أتى بعد تهديدات الحرب الصادرة من الخرطوم بواسطة الرئيس البشير ووزير خارجيته تاجر الحديد. وحديث الرئيس سلفا كان حديث زول بجهز في مواطنيه وجنوده للحرب القادمة، التي أعلنها البشير.

أحيي هذا الحس الوطني العميق لدى الأخ جورج بوك.

عُقْبال (عندنــا).

تعديل (هذا) مكان (هذه)

الاستاذ/ واصل ، تحياتى، ماذكره الرئيس البشير وفى هذا الوقت بالتحديد لامبرر له ، وغير موفق ،خاصة بعد توقيع مذكرة تفاهم بين الدولتين لوقف العدائيات، والتى كانت تستلزم وقف التصريحات العدائية النارية والتى لاتخدم سير المفاوضات، بالرغم من التحرشات والبذاءات من بعض قادة الحركة الشعبية كان لابد من ضبط النفس وأعطاء فرصة للعقل والمنطق لكى تستقيم الامور، الشعب السودانى بأسره فى حالة ذهول مما يحدث ، الشىء الذى يتطلب من الجميع بذل الحكمة والعقلانية فهناك أمور مصيرية يجرى تحقيقها وحسمها من خلال جولة المفاوضات الحالية ، مودتى.

Quote: الاستاذ/ واصل ، تحياتى، ماذكره الرئيس البشير وفى هذا الوقت بالتحديد لامبرر له ، وغير موفق ،خاصة بعد توقيع مذكرة تفاهم بين الدولتين لوقف العدائيات، والتى كانت تستلزم وقف التصريحات العدائية النارية والتى لاتخدم سير المفاوضات، بالرغم من التحرشات والبذاءات من بعض قادة الحركة الشعبية كان لابد من ضبط النفس وأعطاء فرصة للعقل والمنطق لكى تستقيم الامور، الشعب السودانى بأسره فى حالة ذهول مما يحدث ، الشىء الذى يتطلب من الجميع بذل الحكمة والعقلانية فهناك أمور مصيرية يجرى تحقيقها وحسمها من خلال جولة المفاوضات الحالية ، مودتى.

نفسي أجد لي يوم كوز عندو شجاعة أدبية كافية لكي يقول الحقيقة.
أرجوا أن تأتي لنا بمثال، عوضا عن رمي الأتهامات بمثل هذه الطريقة المضللة الرخيصة.

عثمان رضوان
لو كنت تقرا ما كتبه جيدا لما قلت ماقلت
البشير وكير ميزهم على حساب الشعب في الدولتين
والسودانيين شمالا وجنوبا يدفعون تمن رعونتهم
يعنى لازم اشتم البشير واشكر سيلفا كير عشان اكون كويس في نظر
سيذهب البشير ولن يتغير سيلفا كير
سيلفا لا يضمر الا الشر لاهل الشمال
رجل تحكم تصرفاته العقلية الاستخباراتية ولن تجد منه. الا العمالة
البشير انا قلت فيه في هذا المنبر ما لم يقله مالك في الخمر
ولا احتاج لمزايدة
ماذا تريد من امثال رئيس الباقان الذى يطلب من امريكا تشديد القوبات الامريكية على الشمال ورفعها عن الجنوب
كير حليفا للبشير لستة سنوات نائب لرئيس السودان هل رايته يوما يهتم بامر الشمال وهو نائب اول
سيلفا لن تغمض له عين ختي ينهار الشمال
لا يملك رؤية سودان جديد بل سودان خردة
جني

والله الواحد ما عارف يقول شنو ؟!!


غايتو ..
معليش يا وطن !!

Quote: Quote: ورب ضارة نافعة ، الناس لقت قروش البترول واسترخوا وما عاوزين يشتغلو بقينا نجيب في العمال من كل اصقاع الدنيا لان اهلنا كل واحد خلف كراع فوق كراع وكل واحد بقى عمدة وما في زول عاوز يشتغل طلبة و وما في زول عاوز يشتغل كناس و ما في زول عاوز يشتغل عامل بناء ولا في زول عاوز يشتغل عامل زراعة بالله الزول ده بتكلم عن ياتو شعب؟ يبدو ان في مخيلته الفقراء الذين تحولو الي اثرياء بين يوم وليلة وسلاحهم رفع العصي ، والتهليل، والنصوص التي يجيدون تلحينها وتكرارها "سير سير " ياجماعة الزول ده كانه بيقول الشعب السوداني بعد البترول اصبح مترف ........لا يستطيع العمل ولا يرغب فيه ......وانتهي الاغتراب وانتهت البطالة ..........والله حكم

يا ابراهيم النعمة , وباقي مظعمطي الهامش ....

ما تتلقفوا ساكت , وتبقوا متلقين حجج , الزول دا قاصد ناس ود الباوقة وودالصايم ومن لف لفهم , وهو محق في ذلك , أكلوا معه السبع السمان , وكبوا الزوغه أو يكادون حين جاءت نذر السبع العجاف .

بعدين يا ود النعمة أهو جنس كلامك دا البخلي البشير ضد طريق الانقاذ الغربي .

Quote: سيلفا لا يضمر الا الشر لاهل الشمال

الاستاذ جني لك التحايا
وحركات المقاومة في دارفور وجنوب كردفان والنيل الازرق هل شماليون ويضمر لهم سلفا الشر المستطير ؟؟؟
ام ان سيلفا لا يضمر شرا لهذه الحركات وانصارها في جنوب كردفان والنيل الازرق ودارفور
لكن هذه الحركات لا تمثل دارفور وجنوب كردفان والنيل الازرق ولا وجود لها لذلك لا مكان ولا معنى لحب سلفا لهذه الحركات

ياأحباب ، تحياتى، أرجو ان نرتقى جميعا وبدون تعصب ,انفعال الى مستوى المسئولية الوطنية والتى تتطلب منا العمل على التوفيق بين كافة القيادات والاحزاب والاتجاهات الفكرية فى الوطن، وتكريس كل مايخدم مصلحة الوطن، أتركونا نعمل جميعا لمستقبل أولادنا وأحفادنا فكلنا زائلون قبل الحكومات والحكام، المهم لابد من استمرار العمل كل فى موقعه لما يجمع ولايفرق أختلافاتنا السياسية والفكرية ظاهرة صحية، يجب ان نحرص على ذلك وان يكون الخلاف والنقاش على مستوى الأحداث ، التى تستلزم عدم التجريح والاساءة والتقليل من شأن المعارضين لنا، فهذا لايخدم قضية ، ولذلك فأننى لا التف أو حتى أرد على مهاترات البعض ، لعدم جداوها وسطحية أهدافها، والله من وراء القصد، مودتى .

الأخ جــني
تحياتي
لقد قرأت ما كتبه الأخ دينق مقروناً بكتاباته السابقة..
وما وراء ما كتبته أنا (بين السطور) أن دينق
تلميذ غير نجيب لقرنق . ينتهج نفس الإستراتيجية وهي إستغفال الشماليين لأقصى درجة.
وسلاحه هو الإرهاب والإبتزاز الفكري تحت ستار حرب الكيزان تارةً وحرب العنصرية تارةً أخرى.
المسألة ليست في شتم هذا أو شكر ذاك.
الرئيس البشير رئيس جمهورية السودان بحكم الأمر الواقع وبحكم القوانين المحلية والدولية.
نختلف ونتفق معه. نثور عليه .. نغير نظام حكمه .. ندعو لمحاسبته ( في السودان).
ولكن نأبى أن يذله ويسبه (غير السودانيين).بالطبع هذه وجهة نظري الشخصية.
قد نتفق وقد نختلف حولها.
ولعلمك عندما كتبت أنا ما كتبته لم يكن على بالي ما كتبته أنت.

تحياتي للأخ واصل

Quote: البترول مصدر الـــرزق الوحيد لديها ونــحــن الــجــهــة الــتــي قــامــت باكتشافه وأشــــرفــــت عــلــيــه فـــي أجــــــواء الــحــرب والقتال، قائﻼً: «قفلوا وانتحروا ﻷنه مــصــدر رزقــهــم ونــحــن العملنا ليهم غصباًعنهم أثناءالحربودفنا أوﻻدنا الشهداء في أراضيهم».

الكلام للبشيرمــصــدر رزقــهــم ونــحــن العملنا ليهم غصباًعنهم أثناءالحربودفنا أوﻻدنا الشهداء في أراضيهم»

تحياتى
فى كل يوم يزداد ايمانى بهذا الشعب الصبور الطيب!!
كيف يتحمل انسان طبيعى مثل هذا (الوعل)!!!
ده انسان خارج (النص)!!!!
شىء من (اللامعقول)!!!!
خرافة!!!
وعند (البعض) ابداع!!!! زى (الم) الفراق!!!!
kofi
(كتابات الحضرة العمرية)

جوبا : لندن : عمار عوض

كشفت حكومة جمهورية جنوب السودان الى انهم اكتشفوا 300 بئر خلال عملية اغلاق ابار النفط و ان مزاعم الخرطوم طوال السنوات الماضية ان عدد ابار النفط هى 300 بئر كانت كذبة كبيرة حيث اننا خلال عملية اغلاق الابار وجدنا عددهم 600 بئر. وكان رئيس الجمهورية الفريق سلفا كير ميارديت توعد الحكومة السودانية وشركات البترول بمقاضاتها امام المحاكم الدولية المختصة حول هذه القضية. وقالت مصادر من داخل حكومة الجنوب وعلى صلة لصيقة بملف النفط في جنوب السودان ان تقارير الشركات طوال السنوات الماضية كانت تقول ان عدد الابار في ولاية الوحدة عددها 230 بئر ولكن الان وجدنا ان عدد الابار الاأبار الحقيقي هو 273 بئر منتج وفي حقل فلوج كانت التقارير والحسابات تقدم على ان عدد الابار في الحقل 301 بئر والان وجدنا العدد 613 بئر واضاف المصدر ( كان يقال ان حقل فلوج ينتج 280 الي 300 الف برميل يوميا والحقيقة انه ينتج مابين 480 الي 500 الف برميل في اليوم). وتم مواجهة الشركة الصينية بهذه الحقائق عندما أتو للضغط على الحكومة في جوبا لكي تتخلي عن قرار الايقاف وبعد مواجهتهم بالحقائق الاخيرة وابلاغهم بنية حكومة الجنوب باللجوء الى القضاء طلبوا من جنوب السودان التريث وحل المشكلة بالتفوض وجبر الضرر. ولفت المصدر رفيع المستوى ان حكومة جنوب السودان استطاعت ان تحصر الشركات التى كانت ( تنهب) نفط الجنوب بالباطن طوال السنوات الماضية وجدت انها شركات يمتلكها مسؤلين في الحكومة واقارب الرئيس عمر البشير من الدرجة الاولى وقال (نحن نعلم ان غضب البشير من اغلاق ابار البترول يعود الى تهديد مصالحة المالية الشخصية ومصالح اسرته وبعض الذين حوله من المسؤلين يشاركونه في الشركات التى كانت تنهب بترول الجنوب طوال الخمسة سنوات الماضية).

Quote: كونوا منصفين وتوجهوا باللوم ايضا الى العنقالي كير ماذا تتوقعوا من البشير الاهوج بعد ان طلب منه كير ترك جو الخرطوم الساخن الى طراوة لاهاى وسجونها الخمسة نجوم ابشروا بدولتين فاشلتين جنى

ياجني علاقتنا شنو بسلفاكير عشان نلومه ؟!!
نحن بنلوم البشير لانه رئيس السودان ..
وكلامه ده بقولنو اللوامات والكوايات والحجات *..




ـــــــــــــــــــ
حجات تانيات ..

Quote: عثمان رضوان لو كنت تقرا ما كتبه جيدا لما قلت ماقلت البشير وكير ميزهم على حساب الشعب في الدولتين والسودانيين شمالا وجنوبا يدفعون تمن رعونتهم يعنى لازم اشتم البشير واشكر سيلفا كير عشان اكون كويس في نظر سيذهب البشير ولن يتغير سيلفا كير سيلفا لا يضمر الا الشر لاهل الشمال رجل تحكم تصرفاته العقلية الاستخباراتية ولن تجد منه. الا العمالة البشير انا قلت فيه في هذا المنبر ما لم يقله مالك في الخمر ولا احتاج لمزايدة ماذا تريد من امثال رئيس الباقان الذى يطلب من امريكا تشديد القوبات الامريكية على الشمال ورفعها عن الجنوب كير حليفا للبشير لستة سنوات نائب لرئيس السودان هل رايته يوما يهتم بامر الشمال وهو نائب اول سيلفا لن تغمض له عين ختي ينهار الشمال لا يملك رؤية سودان جديد بل سودان خردة جني

جني أنت وبعض مثقفاتية الشمال مصرين أن تجرموا الضحية وتساونه بالمجرم. و هذه مشكلة حقيقية تعانون منها.
بدل ما ترمي الكلام ساكت كده على عواهنه، هات لنا أمثلة يا جني مثل أمثلة عمر البشير الكتيرة دي. سلفا كير صدقني رجل متزن جدا ولا أعتقد أن الكره يعرف قلبه. يا جني حجم الجرائم التي أرتكبت في الجنوب بواسطة الحكومات الشمالية المتعاقبة تعطي أي مواطن جنوبي الحق في كره ما كل هو شمالي ولكن لم يحدث ذلك، سلفا كير كان يتحدث عن الوحدة في أخر سنين نيفاشا. فكيف تتهمه أنت بكره الشمالين وبمثل هذه الطريقة؟ يا جني قول النصيحة. قول أن الحكومات الشمالية المتعاقبة هي التي دمرت السودان وهي التي فرضت العروبة والأسلام على أهل الجنوب وكرهتهم حاجة أسمها وحدة. والأن نفس الشئ يتكرر في دارفور وجبال النوبة والنيل الأزرق. ما هو السبب الذي جعل بعض أبناء الهامش الذين كانوا في الحركة الأسلامية كقيادات أن يخرجون منها ويتمردون عليها ويقدمون أرواحهم من أجل تغير الحكومة التي كانوا ينتمون اليها.
برضو "سلفا كير بكره الشمال" يا جني؟

خديث رئيس دولة جنوب السودان

Quote: ودعاه إلى تقديم استقالته والذهاب إلى لاهاي لتسليم نفسه إلى المحكمة الجنائية الدولية التي تتهمه بارتكاب جرائم إبادة جماعية وجرائم حرب في دارفور. وقال: "عليه أن يترك مناخ الخرطوم الحار ويذهب إلى لاهاي في هولندا لأنها باردة ليدافع عن نفسه في المحكمة الجنائية". وأضاف: "إذا كنت في مكانه لفعلت ذلك لأدافع عن نفسي، وهذا سيخفف الحكم ولقد زرت مقر المحكمة الجنائية وسجونها معدة بشكل جيد وبها أماكن ترفيه وتلفزيون في غرفة السجين".

حديثه حول البشير والمحكمة مع العلم ان ان سلفا ليس الاول في تقديم التوصية للبشير بضرورة تسليم نفسة للمحكمة سبقه شيخ اليشير والذي اوصله لسدة الحكم الدكتور الترابي
حديث سلفا موجه للبشير في شخصه بينما صب البشير جام غضبه على كل الجنوب باستخدامه صيغة الجمع في خطابه الحماسي العدائي
اي لم نجد في خطاب سلفا ما يشير الى كراهيته للشماليين وهذا الفرق بين الرجلين في اللغة المتبادلة

حكم السودان عند المحجوب .. كان محاولة لتطبيق أفكاره المنشورة في مجلة الفكر وغيرها

عند الأزهري .. كان تطبيقا لكتابه الطريق نحو البرلمان

عند قرنق كانت رؤيته المنشورة للسودان الجديد

عند عبد الخالق محجوب كانت رؤيته المنشورة في الماركسية وقضايا الثورة السودانية ونحو البرنامج وغيرهما

عند محمود محمد طه كانت بعث الأمة والإنسانية بالرسالة الثانية للإسلام


أما عند البشير

فهي المكاواة

التي تعلمها من شيخه الذي أدخل المكايدة لقاموس السياسة السودانية


الباقر موسى

حكم السودان عند المحجوب .. كان محاولة لتطبيق أفكاره المنشورة في مجلة الفكر وغيرها

عند الأزهري .. كان تطبيقا لكتابه الطريق نحو البرلمان

عند قرنق كانت رؤيته المنشورة للسودان الجديد

عند عبد الخالق محجوب كانت رؤيته المنشورة في الماركسية وقضايا الثورة السودانية ونحو البرنامج وغيرهما

عند محمود محمد طه كانت بعث الأمة والإنسانية بالرسالة الثانية للإسلام


أما عند البشير

فهي المكاواة

التي تعلمها من شيخه الذي أدخل المكايدة لقاموس السياسة السودانية

يا للبؤس

مافي واحد ساكت يكتب له كما كتب عون الشريف للنميري؟


الباقر موسى

Quote: وح نعمل قيمة مضافة وح نصنع والمصانع ح تشتغل

اي عليك الله اعمل لينا "قيمة مضافة" .. و واحد بيض بالطوة !!!











-------

يا شعبنا ...
بالغت و شذيت و الله!!

جني.

تعال شوف الفرق بين كلام الرئيس البشير والرئيس الجد جد سلفا كير.
_____________________________________________________________________

سلفا كير: حديث البشير الاخير يعنى انه اعلن الحرب على الجنوب وعلينا اخذ حديثه هذا بجدية

الثلاثاء, 07 شباط/فبراير 2012 10:42


سارسل ابنائي الاربعه للحرب حال قيامها للدفاع عن بلدهم ولكن كيف يقنعوا ابنائهم بمبررات الحرب

نظام البشير (حرامى) وسنتجه لمقاضاة حكومة الخرطوم وشركات النفط التى تآمرت على الجنوب

على البشير تسليم نفسه للمحكمة الجنائية بدلا من ان يدخل بلده في مشاكل مع المجتمع الدولى



جوبا : لندن : عمار عوض

كشف الفريق سلفا كير رئيس جمهورية جنوب السودان ان السودان ومعه عدد من الشركات كانوا يخدعون الجنوب طوال السنوات الماضية بالغش في كميات البترول المنتج في الجنوب وقال ( بعد ان قررنا اغلاق ابار البترول اكتشفنا عدد من الابار كانت غير مسجله في السجلات التى معنا ) ووصف نظام البشير بانه (حرامى ) وان الجنوب سيتجة لمقاضاة حكومة السودان والشركات التى تامرت على الجنوب في المحاكم الدولية المختصة لاستعادة اموال جنوب السودان التى تم نهبها.

واوضح الرئيس سلفا انهم سيقومون بعملية تقشف كبيرة في الميزانية وقال في خطاب امام حشد من العسكريين بثه تلفزيون جنوب السودان (لن نوقف المرتبات فنحن لدينا اموال كثيره ولكن سنرشد الصرف في الميزانية مثل الصرف على استيراد المياه الصحية والمشروبات الغازية والسلع الكمالية سنتجه لتوظيف هذه الاموال لتوفير الحاجيات الاساسية للمواطن ) واضاف سلفا كير ان قرار ايقاف انتاج النفط هو قرار يتعلق بالسياده للوصول الى الاستقلال الحقيقي وقال ( لايمكن ان تقول انا بلد مستقل وهناك بلد اخر يتحكم في اقتصادك لذا علينا ان نتحمل بعض الصعوبات لعام واحد فنحن عشنا طوال سنوات الحرب بدون بترول ) واشار الرئيس سلفا ان الجنوب سيعتمد على الزراعة وان الحكومة ستقوم ببناء مصفاة للبترول خلال هذا العام بجانب خط الانابيب ليصل الجنوب الى الاستقلال الحقيقي بعد عام .
وجدد الرئيس سلفا كير قراراه باغلاق ابار النفط وقال ( منذ ان اجاز السودان قرارا في المجلس الوطني باخذ رسوم العبور بشكل عينى انا اتصلت برؤساء دول شرق افريقيا جميعهم وطلبت منهم التحدث للبشير بالتراجع عن هذه الخطوة ولكن البشر نفذ قراره واضطرينا نتخذ هذا القرار لاننا دولة ذات سيادة ولازم نحافظ على ثروتنا )
وعن المحادثات التى جرت في اثيبوبيا اوضح سلفاكير انه عند وصوله اديس ابابا طلب منه الدخول الى غرفة تضم الرؤساء (ابلغت بانهم ينتظروننى وعندما دخلت ووجدت البشير وتحدثنا بشكل مرح وبعد قليل قدموا لنا وثيقة الاتفاق ولكننى بعد أن اطلعت عليها طلبت منهم ان تعرض على اللجنة التى يوجد بها باقان وادريس عبدالقادر لان هذه المقترحات يجب ان تناقش في هذه اللجنة اولا قبل ان نتخذ فيها قرارا ) .
وجدد الرئيس سلفا كير مطالبته بالوصول الى اتفاق شامل حول ابيي والحدود والمناطق المختلف على تبعيتها حتى لاتحدث مشاكل في المستقبل .
وعن حديث البشير بان البلدين اصبحوا قريبين من الحرب قال الرئيس سلفا كير ( حديث البشير الاخير يعنى انه اعلن الحرب على الجنوب وعليكم ان تاخدوا حديثه هذا بجدية وماتنوموا ) ولفت سلفا كير الى انه بعد حديث البشير الاخير قام باستدعاء كل السفراء الاجانب الموجودين في جوبا وقدم لهم تفاصيل كاملة عن الاوضاع وتهديدات البشير لحكومة جنوب السودان بمافيهم (سفير حكومة البشير في جوبا ) واجهزة الاعلام ايضا.

وشدد الرئيس سلفا كير في خطابة للجيش الشعبي من عدم التعرض للشمالين الموجودين في جوبا وقال ( شوف يا جيش شعبي كلامى دا تسمعوا كويس انا ما داير اسمع انو في واحد منكم عمل مشكلة مع التجار الشمالين الموجودين في جوبا او الناس الذين ياتون في زيارات لجوبا ولا اى شمالى اتى الينا هربا من الحرب في منطقته او من هربوا من بطش نظام البشير لان كثير من الشمالين زهجانين من البشير ).
وعن حديث البشير بوجود دول اجنبية دفعت الجنوب لاتخاذ قرار اغلاق ابار البترول وقال الرئيس سلفا كير ( ليه نحن ماعندنا مخ عشان نفكر في مصلحتنا وكرامتنا وسيادتنا وانا اريد ان أسال البشير سؤال زمن الحرب من الذي الكان يضع الخطط والتكتيكات والاستراتجيات الى ان وصلنا لبلد مستقل ماياهو ديل نحن زاتنا العملنا الكلام دا كلو) وواصل قائلا ( هو دائما يحتقرنا بمثل هذا الحديث كانما نحن لانستطيع ان نفكر في مصلحتنا ونحن الان اصبحت لدينا الخبرة لكشف كل مقالبهم والاعيبهم ونفشلها لهم) .
واشار الرئيس سلفا كير الى ان البشير يقول للجنوبيين الموجودين في الخرطوم انه سيوحد الجنوب بالقوه وقال ( هو يقول للجنوبيين الذين يوالونه انه سيوحد السودان من جديد بالقوة وانه سيعطيهم حكم ذاتى في الجنوب ) واضاف قائلا ( اذا هم قرروا الحرب سيجدونا امامهم في جودة- على الحدود مع النيل الابيض- وهم حاولوا ذلك من قبل لكنهم فشلوا , وهو لايستطيع ان ياتى لنا عن طريق الحدود مع النيل الازرق ولا جبال النوبه وهو لا يفكر بطريقة جيدة فمن الافضل له ان يجد حلول لمشاكل الذين يحاربونه في الشمال بدلا من ان يفتح جبهة حرب جديدة ) وضرب مثلا عن وضع حكومة البشير بقوله (الحصان ولا اى حيوان كبير لمن يجى يموت ياهو برفس كثير قبل الموت) .
ونصح الرئيس سلفا كير البشير بتسليم نفسه للمحكمة الجنائية الدوليه ليدافع عن نفسه بدلا من ان يدخل بلده في مشاكل مع المجتمع الدولى وقال ( انا زرت مقر المحكمة واطلعت على نظام عملها كما شاهدت مركز الاعتقال فهو مكان جيد به تلفزيون وباسكت بول ومكتبة)
وقال الرئيس سلفا كير مخاطبا ضباط وجنود الجيش الشعبي ( اذا بدات الحرب انا حارسل اولادى الاربعة معكم للحرب في الصفوف الاولى لانهم سيقاتلوا دفاعا عن بلدهم وعليهم ان يرسلوا ابنائهم بدلا عن ارسال ابناء الاخرين ليموتوا في حرب لا مبرر لها ) واضاف نحن لانريد ان يقتل اهلنا في الحرب ولا نريد ان يموت الشماليين ايضا في حرب لاداعى لها وقال ( نحن ليست لدينا مشكلة مع الشماليين لانهم هم اهلنا ان كانوا في جبال النوبة او دارفور او البجة او الشمال نحن مشكلتنا مع العصابة التى تحكم وتخطط لسرقة اموال الاخرين) .
ـــــــــــــــــــــــــــــــــــــــــــــــــــــــــــــــــــــــ

شوف يا جني ويا بقية رجرجة الكيزان. الفرق بين حديث الرئيس الجد جد سلفا كير ورأيه في الشمال والشمالين. وفي حديث الرئيس الذي أغتصب السلطة وحديثه عن الجنوب والجنوبين.

Quote: سيلفا لا يضمر الا الشر لاهل الشمال رجل تحكم تصرفاته العقلية الاستخباراتية ولن تجد منه. الا العمالة

الأخ حـيدر (جـنى )
مثل هذه الإعتقادات والإصرار عليها, فى رأى هى التى أدت الى تسارع الخطا لفصل جنوب السودان.
وبكـل تأكـيد فإن مواصـلة السـير فى نفس المنحــى سـيؤدى لإنفصـال وتفتيت ما تبقى من الســودان.

الرئيس الجد جد


دا منو يادينق



الشاويش سلفاكير المابقدر اتخذ قرار الا بعد الرجوع لي باقان وروجر ونتر؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

حديث معقول جدا لرئيس دولة يخاطب شعبا..

Quote: (لن نوقف المرتبات فنحن لدينا اموال كثيره ولكن سنرشد الصرف في الميزانية مثل الصرف على استيراد المياه الصحية والمشروبات الغازية والسلع الكمالية سنتجه لتوظيف هذه الاموال لتوفير الحاجيات الاساسية للمواطن ) واضاف سلفا كير ان قرار ايقاف انتاج النفط هو قرار يتعلق بالسياده للوصول الى الاستقلال الحقيقي وقال ( لايمكن ان تقول انا بلد مستقل وهناك بلد اخر يتحكم في اقتصادك لذا علينا ان نتحمل بعض الصعوبات لعام واحد فنحن عشنا طوال سنوات الحرب بدون بترول ) واشار الرئيس سلفا ان الجنوب سيعتمد على الزراعة وان الحكومة ستقوم ببناء مصفاة للبترول خلال هذا العام بجانب خط الانابيب ليصل الجنوب الى الاستقلال الحقيقي بعد عام

Quote: نحن ليست لدينا مشكلة مع الشماليين لانهم هم اهلنا ان كانوا في جبال النوبة او دارفور او البجة او الشمال نحن مشكلتنا مع العصابة التى تحكم وتخطط لسرقة اموال الاخرين

Quote: شوف يا جيش شعبي كلامى دا تسمعوا كويس انا ما داير اسمع انو في واحد منكم عمل مشكلة مع التجار الشمالين الموجودين في جوبا او الناس الذين ياتون في زيارات لجوبا ولا اى شمالى اتى الينا هربا من الحرب في منطقته او من هربوا من بطش نظام البشير لان كثير من الشمالين زهجانين من البشير ).

Quote: نحن كل ما نمشي لقدام وكل ما نعمل انجاز واضح ان اخواننا البغادي ديك بيزيد وجعهم وبيزيد ألمهم، وبنورم فشفاشهم ان شا لله ونفقع مراراتهم ، لانو نحن كل ما نعمل حاجة هم بيزعلوا ، ان شالله كل يوم حا نزعلهم

يبدو ان الحكومة ومن حيث لا تدري فقعت مرارة (آخرين)
هؤلاء (الآخرين) كانوا يظنوا ان حياة (الشمال) معلقة بتيوب النفط، وخاب ظنهم

Quote: وَآَخَرِينَ مِنْ دُونِهِمْ لَا تَعْلَمُونَهُمُ اللَّهُ يَعْلَمُهُمْ

ولسه يا ما ح تشوفوا ورم الفشفاش الجد جد

يبدو ان الحكومة ومن حيث لا تدري فقعت مرارة (آخرين)

وبرضو تلوموا البشير ؟؟ أهو جاهل وأبتلانا الله به

أهم المتعلماتية بيستعملوا نفس اللغة


المشكلة كبيرة جدا جدا

Quote: شوف يا جني ويا بقية رجرجة الكيزان. الفرق بين حديث الرئيس الجد جد سلفا كير ورأيه في الشمال والشمالين. وفي حديث الرئيس الذي أغتصب السلطة وحديثه عن الجنوب والجنوبين.

يا دينج انا متمنى يوم واحد تنتقد اداء سيلفا كير و حكومته وفسادها
دى ما ياها سيري سير يا كير
يا اخ كلام كير دا كله مطاعنة ما فرق من كلام بشير
انا عندى اربعة اولاد برسلهم حرب خلي يرسل اولاده
يا دينج انا عندى راى فيهم الاتنين من زمان ودا ما الليلة وكل يوم يمر يثبت صحة رايي
الجنائية دي ليها سنين وهو نائب رئيس ليه ما اعترض والبشير زاره مرتين وهو رئيس لمذا لم يرفض
وفى الحالة يا منافق يا ######## والخيار لك وله!
جنى

يا أخوانا الناس البدافعو عن كلام البشير ده لا عندهم مرارات ولا فشفاشات عشان تنفقع ولا تنقد. هو البشير ذاتو كان عندو فشفاش ولا مرارة ولا حياء ولا دين ولا أخلاق.. موش كان يمكن البلد دي رضت بيهو؟ زول حرامي وقالها في التلفزيون أنا حرامي وبقلع من بترول الناس ديل بضراعي، يعني همباتي كمان، وبدون خجل بيعترف بكده للدرجة الخلت المذيع وجهه يصفر خجلاً لزول بيعتبر نفسو رئيس همباتي قلع الحكم وولع الحرب في كل البلد وقال لعساكره ما عاوز جريح ولا أسير وأخيراً طلع قادي أنبوب البترول بتاع دولة تانية بيشفط منه.

الكلام القالو ده رد غبي لكلام سلفا كير ليهو بأنو يمشي يسلم نفسو للمحكمة الجنائية وتريقة كير عليهو بأنو رطوبة لاهاي أفضل ليهو من حر الخرطوم. ويضاف للفضيحة الكبيرة بتاعت سرقة البترول.. وأرزمة الدولارات والربيع العربي.....


____________

وســلام يا واصل

Quote: جني أنت وبعض مثقفاتية الشمال مصرين أن تجرموا الضحية وتساونه بالمجرم. و هذه مشكلة حقيقية تعانون منها. بدل ما ترمي الكلام ساكت كده على عواهنه، هات لنا أمثلة يا جني مثل أمثلة عمر البشير الكتيرة دي. سلفا كير صدقني رجل متزن جدا ولا أعتقد أن الكره يعرف قلبه. يا جني حجم الجرائم التي أرتكبت في الجنوب بواسطة الحكومات الشمالية المتعاقبة تعطي أي مواطن جنوبي الحق في كره ما كل هو شمالي ولكن لم يحدث ذلك، سلفا كير كان يتحدث عن الوحدة في أخر سنين نيفاشا. فكيف تتهمه أنت بكره الشمالين وبمثل هذه الطريقة؟ يا جني قول النصيحة. قول أن الحكومات الشمالية المتعاقبة هي التي دمرت السودان وهي التي فرضت العروبة والأسلام على أهل الجنوب وكرهتهم حاجة أسمها وحدة. والأن نفس الشئ يتكرر في دارفور وجبال النوبة والنيل الأزرق. ما هو السبب الذي جعل بعض أبناء الهامش الذين كانوا في الحركة الأسلامية كقيادات أن يخرجون منها ويتمردون عليها ويقدمون أرواحهم من أجل تغير الحكومة التي كانوا ينتمون اليها. برضو "سلفا كير بكره الشمال" يا جني؟

مين جرم الضحية
ياخ الحركة الشعبية حليف الكيزان
والحركة الشعبية وقفت ضد ثورة ابريل وحاربتها
انا لا احترم لا بشير لا سلفا لا باقان لا نافع ولي منطقي فى ذلك
خطاب سيلفا كله مطاعنات وليس خطاب سياسي محنك
انا سمغت كلامه موش المنقح الجبتوا ده
سيلفا قال بي عضمة لسانو قبل بداية الاجتماع " we are creating jokes زى عادة بتاع سودانيين
طيب اذا كان دا لتلطيف الجو حسب قناعته
طيب ليه المطاعنة وتعكير الجو
يا اخ بشير بكره الجنوبيين وبكره الشعب السوداني وبكره نفسو ذاتا
خطاب سلفا كير لم يقم به كل من اختلف مع السودان شرقا وغربا وشمالا وجنوبا
يا اخ سيلفا اذا هو رجل دولة بحق حقيقة ويخشى على مصالح الجنوبيين لا يقول مثل هذا الكلام لدولة 98 فى المائة من اقتصادها يعتمد على النفط مفروض يفاوض بصبر وحنكة
بدل ما يخلى المنطقة عرضة لصراع امريكا والصين
افرض انه باع نفطه تحت الارض بثمن بخس واشترى به سلاح فى ظل هذا الاحتقان ماذا يستفيد المواطن فى الجنوب
تاخر النهضة فى مجال النفط وفقدان الصناعة التحويلية والمصاحبة للنفط وذهاب كل اموال الجنوب لشراء تناكر وشاحنات لاستيراد النفط وفقدان فرص وظيفية كانت ممكنة اضافة الى استشراء الفساد بسبب عدم الشفافية فى ضبط اموال القروض والاعانات
يا دينج رايي فى بشير انت عارفو فلا داعي
يا اخ انا لو قلت لي باقان انا ما جلابي بصدقني
يا اخ فى ثوريين بستخدموا خطاب زى دا اذا ما كان عندهم اجندة خفية
يا دينج انا فى حياتي لا احترم الا المنطق ولغة الارقام لانها
what counts at the end of the day
ولو شفت مني اى حاجة غير كدة فى المنبر دا قول لى واذا حدثتلم اتوانى يوما فى الاعتذار عنها
جنى

Quote: يا دينج انا متمنى يوم واحد تنتقد اداء سيلفا كير و حكومته وفسادها

شكرا جنى
وعلى قولة اولاد بمبة
ما اتعس من سيدي الا ......................
او في رواية اخرى
العيس و .................ز الرجا

Quote: يا دينج انا متمنى يوم واحد تنتقد اداء سيلفا كير و حكومته وفسادها دى ما ياها سيري سير يا كير يا اخ كلام كير دا كله مطاعنة ما فرق من كلام بشير انا عندى اربعة اولاد برسلهم حرب خلي يرسل اولاده يا دينج انا عندى راى فيهم الاتنين من زمان ودا ما الليلة وكل يوم يمر يثبت صحة رايي الجنائية دي ليها سنين وهو نائب رئيس ليه ما اعترض والبشير زاره مرتين وهو رئيس لمذا لم يرفض وفى الحالة يا منافق يا ######## والخيار لك وله! جنى

جني.

عدم إنتقادي في هذا المنبر لسلفا كير لا يعني بأنني لا أنتقده أو أنني راضي على أداء حكومته. وصدقني موضوع الفساد ده نحنا بنسمعو للمتهمين به مباشرة. وأي زول بعرفني من قرب يعرف أنني لا أجامل أحد ولا أتمسح بساسة أو أسعى لسلطة أو لمنصب. لا يمكن أبدا أن تساوي سلفا كير بالبشير.

Quote: جني. عدم إنتقادي في هذا المنبر لسلفا كير لا يعني بأنني لا أنتقده أو أنني راضي على أداء حكومته. وصدقني موضوع الفساد ده نحنا بنسمعو للمتهمين به مباشرة. وأي زول بعرفني من قرب يعرف أنني لا أجامل أحد ولا أتمسح بساسة أو أسعى لسلطة أو لمنصب. لا يمكن أبدا أن تساوي سلفا كير بالبشير.

يا دينج
بشير انسان قدراته متدنية واختاره على عثمان وسيلفا كير كمغفل نافع ورجل مرحلة لكنه تغدى بهم قبل ان يتعشى بهم بسبب غباؤهم وليس بسبب ذكائه لانهم لم يتعلموا من درس جعفر نميرى الذى لعب بهم وباليساريين ولولا الانتفاضة لنحرهم نحر البرامكة!
سيلفا سببوا شنو ماسك ضنب الباقان!
لو كان محنكا لقبل بالافريج او المين يعنى النصف اصلهم كانوا سارقنو كما يقول وفى نفس الوقت يبدا جديا فى التفاوض فى خط بديل يا اتراجعوا ناس البشير وخفضو السقف يا عائدات السنتين ستعينه عى استتباب الامن وتكفي شعبه شر المجاعة بتوفير مليارات الدولارات للصناعة والزراعة والمرافق والامن وتوفر وظائف وعائدات الصناعة والزراعة والمردود منها قطعا سيزيد عن مادفعه للبشير وان لم يتراجع البشير فله ان يمضى فى انشاء الخط البديل!
بدلا عن ان يجرى خلف باقان الاحمق الموتور!
انشاء خط بديل ليس امرا مستحيلا الناس بتطير عكس الجاذبية الامر المهم الجدوى والكلفة وتامين الخط!
جني
سينهار الشمال والجنوب واذا انهار اى منهما فسيكون ذو تاثير سالب على الاخر!

Quote: مين جرم الضحية ياخ الحركة الشعبية حليف الكيزان والحركة الشعبية وقفت ضد ثورة ابريل وحاربتها انا لا احترم لا بشير لا سلفا لا باقان لا نافع ولي منطقي فى ذلك خطاب سيلفا كله مطاعنات وليس خطاب سياسي محنك انا سمغت كلامه موش المنقح الجبتوا ده سيلفا قال بي عضمة لسانو قبل بداية الاجتماع " we are creating jokes زى عادة بتاع سودانيين طيب اذا كان دا لتلطيف الجو حسب قناعته طيب ليه المطاعنة وتعكير الجو يا اخ بشير بكره الجنوبيين وبكره الشعب السوداني وبكره نفسو ذاتا خطاب سلفا كير لم يقم به كل من اختلف مع السودان شرقا وغربا وشمالا وجنوبا يا اخ سيلفا اذا هو رجل دولة بحق حقيقة ويخشى على مصالح الجنوبيين لا يقول مثل هذا الكلام لدولة 98 فى المائة من اقتصادها يعتمد على النفط مفروض يفاوض بصبر وحنكة بدل ما يخلى المنطقة عرضة لصراع امريكا والصين افرض انه باع نفطه تحت الارض بثمن بخس واشترى به سلاح فى ظل هذا الاحتقان ماذا يستفيد المواطن فى الجنوب تاخر النهضة فى مجال النفط وفقدان الصناعة التحويلية والمصاحبة للنفط وذهاب كل اموال الجنوب لشراء تناكر وشاحنات لاستيراد النفط وفقدان فرص وظيفية كانت ممكنة اضافة الى استشراء الفساد بسبب عدم الشفافية فى ضبط اموال القروض والاعانات يا دينج رايي فى بشير انت عارفو فلا داعي يا اخ انا لو قلت لي باقان انا ما جلابي بصدقني يا اخ فى ثوريين بستخدموا خطاب زى دا اذا ما كان عندهم اجندة خفية يا دينج انا فى حياتي لا احترم الا المنطق ولغة الارقام لانها what counts at the end of the day ولو شفت مني اى حاجة غير كدة فى المنبر دا قول لى واذا حدثتلم اتوانى يوما فى الاعتذار عنها جنى

جني.

الحديث من شاكلة الحركة الشعبية كانت حليفة للكيزان، وأن الحركة الشعبية كانت ضد ثورة أبريل. أعتقد أنه حديث مبتزل وتزوير متعمد منك. أنت تعرف جيدا موقف الحركة الشعبية من حزب الأخوان المسلمين. والسبب الرئيس الذي دفع الحركة الشعبية للتوقيع الى نيفاشا هو فشل وتخاذل القوى السياسية الشمالية في العمل المسلح لأذالة نظام الجبهة القومية المجرم. والحركة الشعبية لم تكن ضد الإنتفاضة الشعبية في ابريل، ولكن كان لها تخوفات من الذين يريدون سرقة الثورة أهدافها، ولقد حدث ذلك لاحقا فعلا. أنت هنا مصر أن تساوي نظام الإنقاذ بالحركة الشعبية لتحرير السودان، وهنا تكمن مشكلتك مثل عدد كبير من مثقفاتية الشمال الذين كانوا يحلمون بأن تواصل الحركة الشعبية كفاحها المسلح وفيما بعد تجو أنتو تلقوها باردة. تلقوها عند الغافل يا جني. ياهو ده نظام الإنقاذ الأن موجود وجاثم على صدوركم، ماذا أنتم فاعلون؟
جني بطل حركات الأستهبال دي. لا يمكن أبدا أن تقارن خطابات البشير بخطابات كير. إلا إذا كان هنالك شئ في نفسك.
بعدين موضوع النفط ده أفتكر أنت لن تكون أكثر حرصا فيه من أهله، وحكومة الإنقاذ لم تدع لحكومة الجنوب خيار أخر غير أن يوقفو ضخ وتصديرالنفط عبر الشمال. يا جني حكومة الخرطوم لا تفاوض على حسب القوانين والاسعار الدولية المتعارف عليها. بل أنهم يفاوضوع على حسب أحتياجاتهم هم ويطالبون بسداد العجز الذي حدث لهم بع الإنفصال. هذا هي الحقيقة التي لن تسمعها من البشير صاحب "اليد العليا" علنا واليد السفلى" سرا. كرهك لباقان أموم النابع من ماكينة إعلام الأخوان المسلمين من الأفضل لك أن تكتشف حقيقة هذا الرجل لوحدك. لأنك لا تعرف عنه شئ. أنا بقول لك الرئيس البشير نفسه متخذ موقف متشدد جدا من المفاوضات وفارض شروط تعجيزية من أجل أفشال دولة وحكومة الجنوب.

جني.

أنت تتحدث وكأن باقان أموم هو لوحده سبب مشاكل الشمال مع الجنوب، هذه المشكلة وجدت من قبل ميلاد باقان نفسه.
ثم باقان أموم رئي المفاوضين نعم ولكنه يترأس فريق به ناس محترمين ومعروفين وهم ليس مجرد أمعات يقودهم باقان أموم على كيفه. بالمناسبة يا جني. هنالك أعتقاد كبير وسط الشباب الجنوبي يعتبرون باقان أموم بأنه بطل بحق وحقيقة. لأنه كان يقف دائما ضد أطماع المؤتمر الوطني ولقد عمل على الحفاظ على مصالح أهل الجنوب. لذلك لا تصيع وقتك في شخص واحد أو أثنين(سلفا وباقان) وتحملهم المسئولية. المسئولية الحقيقة هي مسئولية الذين حكموا السودان منذ الأستقلال ولم يراعو فيه التنوع العرقي،الديني والثقافي للبلاد.

Quote: المسئولية الحقيقة هي مسئولية الذين حكموا السودان منذ الأستقلال ولم يراعو فيه التنوع العرقي،الديني والثقافي للبلاد.

صدقت يا عزيزي جورج.. وهذة مسئولية تاريخية إتخذها هذا النظام القمعي الحالي كأرضية خصبة لتنفيذ مأربه الدنـيئة للإجهاز على خيرات الجنوب دون مراعاة لأهله ورغبتهم في العيش بكرامة وبكامل حقوقهم الشرعية.

لم نجد سياسي واحد وضع نفسه في خانة أهل الجنوب ليحس بمدى الألم والعزلة التي فُرِضت عليهم. فنحن فرض علينا الصيام لنحس بجوع الآخرين.. ولكنا صرنا نصوم لننعم بوجبات فاخرة، ونسينا أسباب فرض الصيام‘ فلم نحس بالجوع أو العطش، ولم نحس بالألم من عدم إستطاعتنا تناول الطعام في نهارنا! وهذا ما ظل الجنوب يعانيه بصورة مزمنة.. لقد رأوا خيراتهم تنهب وثرواتهم تصدر للخارج لينعم بها قلة. لم يحسوا بكامل المواطنة ولم تتاح لهم فرص عادلة للممارسة السياسية أو التعليم أو التنمية أو ممارسة حرية العقيدة. لقد تم التعامل معهم على أنهم مواطنون من الدرجة الثانية - إن لم تكن الرابعة - وتجاوزتهم عجلة التنمية.. وأضحت زيارة الجنوب كزيارة مجموعة من الغرباء أو البدائيين.

فأنفصل الجنوب.. ولكن عاد البعض ليردد أنهم أهدوا الجنوب الأستقلال على طبق من ذهب!

لقد أرادوا بذلك أن يمحوا من تاريخه نضال شعب الجنوب وتضحيات أبناؤه وإنتزاعهم لإستقلالهم بحد السيف وقوة الحجة عند تفاوضهم مع سـفلة الإنقاذ. إن إرادة الشعب الجنوبي هي من صنع الإستقلال.. ومكابر من يدعي غير ذلك. وقد أتاحت الظروف للحركة الشعبية لأن تقود هذا النضال الطويل، فنالت حق قيادة أهلنا في جنوب السودان وحققت له الحرية من براثين نظام الموت قبل أن تحقق له الأستقلال التام والكامل من بلد المليون ميل. والمؤسف هنا أنهم مازالوا يعتقدون أن بأمكانهم السيطرة على ثروات هذة الدولة الجديدة بحسبان أنهم سادتها وأصحاب الفضل عليها.. وتناسوا المأسي التي إرتكبوها. وذادوا على هذا تحليلهم لهذة الثروات على أنفسهم وأخذوا في سرقتها (رجالة) ودون إحترام لسيادة دولة أو لقانون. وهذة هي الهمجية التي أدت لتفاخرهم بسرقة بترول الجنوب (همبتة) وهي نفس الهمجية التي خاطب بها كبير مجرميهم دولة الجنوب في هذا الخطاب الذي أتانا به الصديق واصل بهذا البوست بلغته الهابطة.

فيا صديقي الغالي، دع هؤلاء المكابرون في غيهم.. فهم أدمنوا لبس النظارات القاتمة والتي أعمت عقولهم قبل قلوبهم. وبدورنا نناشدهم بخلعها ليروا عالم اليوم على حقيقته.. وليشاهدوا علم تلك الدولة الجارة لنا يخفق أمام مبنى الأمم المتحدة معلناً عن إستقلال دولة جنوب السودان كحقيقة مرة لهم.

نأمل أن زوال نظام المؤتمر اللاوطني سيتيح لنا فرصة تصحيح التاريخ، ورسم معالم مستقبل زاهر بين الشعبين.

العنصري الــــوقـــح مدثر كنة.

عندما فتحت لك بوست من قبل وكشفت فيه عنصريتك الوقـــحــــة أتي بعض الأعضاء يدافعون عليك وعلى قــــرفــك وعنصريتك.
وأتيت أنت وحكيت لنا عن كيف أن الحركة الأسلامية قد تكونت في منزلكم.
بالله المرة دي تعال وأحكي لينا كيف أن العنصرية أيضا قد تأسست في منزلكم. لعنة الله عليك وعلى عنصريتك الـــوقــــحة.
من أين تأتي بأمثال هذا الزبـــــــالـــــة يا بكري؟ وما فائدة أن يكون البورد مرتع للعنصرية وللعنصرين؟

Quote: المسئولية الحقيقة هي مسئولية الذين حكموا السودان منذ الأستقلال ولم يراعو فيه التنوع العرقي،الديني والثقافي للبلاد.

المسؤولية الحقيقية هي مسؤولية الإنجليز الذين وضعوا قوانين المناطق المقفولة.

( ومنهم نتعلم أبسط قواعد علم التخطيط الإستراتيجي).

تعديل كلمة الذين مكان الذي

Quote: المسؤولية الحقيقية هي مسؤولية الإنجليز الذي وضعوا قوانين المناطق المقفولة.

لا والف مليون لا
المسؤولية الحقيقية هي مسؤولية الحكام الذين تولو الامر بعد الانجليز والخربها ووقعد على تلها البشير والاسلامويين

ما تدفنو رؤوسكم في الرمال
تصدوا لمشاكل صنعتوه مش ترموه للخارج

وبعدين ماليزيا وسنغافورة كانوا مستعمرينها العروب ول الاسلامويين
ما هم انطلقوا ورموك خلفهم
قال الانجليز