طلب، رجاء و اٍستعطاف خاااص من الاخوة الكيزان و المؤتمر الوطنى

عثمان ميرغنى التيار

Quote: في الصفحة الأولى .. وصفحة (التيار ليكس) اليوم وثيقة توضح كل شيء.. تكشف إلى أي مدى أموال هذا الشعب مستباحة.. تأملوا، ثم تألموا فيها.. وزارة الزراعة والغابات في حاجة لمدخلات وآليات زراعية.. القرض من بنك دبي الإسلامي.. إجمالي العملية حوالي (30) مليون دولار أمريكي.. الضمانات مقدمة من بنك السودان بناء على طلب وزير الزارعة.. القرض مدة سداده ثلاث سنوات مع فترة سماح سنة واحدة.. إلى هنا كل شيء عادي. شركة الأقطان.. لصاحبها عابدين محمد علي.. وشركاه محيي الدين عثمان وما خفي كان أعظم.. هي المنوط بها توريد هذه المدخلات الزراعية.. بالله احبسوا أنفاسكم لتكملة القصة..!! شركة الأقطان توقع (عقد وكالة) لشركة أخرى اسمها (شركة تاجا الهندسية) ومقرها في دبي.. أتعلمون من هو صاحب الشركة.. محيي الدين عثمان..!! اقرأوا خطاب الدكتور أحمد البدوي ممثلاً لوزارة الزراعة الموجه لبنك دبي الإسلامي.. الذي يقول للبنك بكلمات في منتهى القوة.. كل هذه الملايين من الدولارات هي تحت يدي محيي الدين عثمان يفعل فيها ما يشاء.. يختار ويطلب ويشتري ولا ترد تعليماته التي يطلبها من البنك.. كل ذلك نيابة عن وزارة الزارعة!!! ثلاثون مليون دولار.. ( في عملية واحدة).. تحت تصرف محيي الدين عثمان.. باسم حكومة السودان.. وبضمان من بنك السودان. أين الحكومة؟ وأقول (الحكومة!) لأني لست مستعداً لتقبل فكرة أن (وزارة الزراعة) وهي تفعل ذلك يمكن أن توصف بأنها جزء من (حكومة!).. هذه أعمال لا يقبل عقل أن توصف بأنها أعمال (حكومة!) إلا إذا تبدلت جيناتها وتمحورت في شكل (مافيا).. أين ذهبت شركة الأقطان؟ التي تحتكر لها الحكومة تسويق القطن .. وما يشبه احتكار توريد مدخلات الزراعة من مبيدات وسماد وآليات.. كل الذي فعلته شركة الأقطان أنها (من الباطن) حولت كل هذه الأموال لصالح محيي الدين عثمان.. تحت إدارة وتصرف شقيقه جمال الدين عثمان المقيم حتى الآن في إمارة دبي.. وكان شقيقه جمال الدين عثمان اتصل بي هاتفياً من دبي مع أول يوم بدأنا فيه نشر هذه الوثائق.. وقال لي: إنه لا يستطيع العودة إلى السودان خشية الملاحقة من جانب الأجهزة الأمنية. في وزارة الزراعة أو من خارجها، لا أعلم من أصدر الأمر للدكتور أحمد البدوي بكتابة هذا الخطاب العجيب.. لكن تجدون في صفحة (التيار ليكس) صورة لبطاقة أعمال الدكتور أحمد البدوي بعد أن تحول من وزارة الزراعة وصار مديراً لشركة (متكوت).. إحدى شركات محيي الدين عثمان. أعلمتم الآن لماذا نحن بلد زراعي لا يزرع.. وأكبر مشروع زراعي في العالم (مشروع الجزيرة) ينهار ويركع.. ونستورد البصل من الجيران والثوم والسمسم من الصين والطماطم من الأردن.. هل تبحثون عن سبب أكثر من هذا المعروض أمامكم؟ تحولت أموال الشعب السوداني الفقير المعدم.. والتي يفترض أن يشتري بها مدخلات الزراعة إلى غنائم.. يعطي من لا يملك.. إلى من لا يستحق.. بينما حراس المحليات والجباة يطاردون الشعب الفقير ويحلبون منه الرسوم والجبايات.. ومصانع المنطقة الصناعية في الباقير تتعطل وتقفل بالجزية المضروبة عليها من محلية الكاملين.. بينما أموالنا وبالعملة الصعبة.. بين أيدي عصابة منظمة تستغل مؤسسات الدولة وعلى عينك يا تاجر.. في وضح النهار.. وقولوا .. يالطيف..!!

المواد الفى البوست دى انا جبتها من بوست زميل المنبر محمد اٍبراهيم على له الشكر على توفيرها هنا و الشكر لصحيفة التيار التى نشرتها اٍبتداً. ادناه بوست ود اٍبراهيم:
خطاب وزراة الزراعة لبنك دبي الاسلامي – فضايح ليكس

كما ترى أخى الكوز الكريم، الوثائق توضح عملية مرابحة من بنك دبى الاسلامى لصالح وزارعة الزراعة و الغابات، قاااامت وزرارة الزراعة و الغابات كتبت خطاب شاااامل مطلق يملّك شركة خاصة كامل حقوق و حرية التصرّف فى هذه المرابحة المليونية. و الشركة الخاصة هذه ملك لواحد أخوكم و هو مسؤول فى شركة الاقطان و يديرها شقيقه من دبى، نظام زيتنا فى بيتنا.

يا جماعة انا المواطن ابوبكر صديق محمد صالح أخوكم فى الوطن و الانسانية ارجو منكم الاتى:

يا جماعة رجاء و رجاء حار جداً و نستحلفكم بكل عزيز لديكم. بالله اسرقوا من العندنا، أصلو نحنا السرقة دى ما مانعكم ليها بس أسرقوا من العندنا، ما تديّنوا على حسابنا و باسمنا و تسرقوا، لانو بالطريقة دى بتكون ركبتونا فى خازوق كبير خلاص. أسرقوا من الموجود العندنا مانا سألنكم أبداً الى حين. بس مافى داعى للمضرّة الشديدة دى!.

هسه زى عملية اخوكم و شركة تاجا ديل بيكونوا اشتروا مدخلات زراعية تعبانة و باسعار فلكية عشان يربحوا ما شاء الله لهم، المدخلات دى ما بتقضى غرض و بتخرب من الميناء … عليه بيكون نحنا ما اٍستفدنا حاجة فى نفس الوكت ركبتنا ديون ملايين الدولارات. دى ورطة تجهض حتى الاحلام بمستقبل أفضل، عليه نرجوكم رجاء حار اسرقوا من الموجود.

أسرق من الموجود اخى الكوز جزاك الله خير.

يا المواطن ابوبكر صالح ..السودانى الجنسية
هولاء الحرامية تجاوزا مرحلة المحلية لمرحلة
العالمية ...ديل تلاميذ مدرسة عدنان خاشقجى
العالمية ...ياخ ديل باعوا المقابر ..واستثمروا حول
سور مقابر فاروق فى تجارة الفواكه (المستوردة)!!

يعنى تموت بالملاريا وسوء التغذية وتندفن ..جنب
سوق الفواكه ....حتى فقراء الوطن سموا الشارع
بتاع العمارات قصاد شارع (1) حتى شارع (15)
شارع النار والجنة ...


هولاء لايستحون ..لصوص معترفين ...ليهم يوم
مع فقراء الوطن ....وختامة فى جنهم وبئس المصير



تحياتى

Quote: هولاء لايستحون ..لصوص معترفين ...ليهم يوم مع فقراء الوطن ....وختامة فى جنهم وبئس المصير

عارفهم يا معاوية بس برضو ممكن نتفاهم معاهو يعنى.
مافى زول سائلهم يسرقوا طوالى هذا رزق ساق الله اٍليهم الى حين.
لكن ياخى مافى داعى الضر الشديد دا، يدينوا قروش باسم الشعب السوداني
و يلهفوها و هى طايرة … It is really‪,‬ too much

أسرق من الموجود أخى الكوز بارك الله فيك.

الأخ أبو بكر صالح

تحياتي - أنا خايف إنو هيئة أخونا أبو قناية دي تتعب من أول ثلاث ملفات فساد وتقول الشئ دا إلا بتر عديل كد

من المؤسف و المحزن أن تكون درحةالفساد قد وصلت لدرجة أن يستدينوا بإسمنا ويتحول الدين بقدرة قادر لمجموعة نافذة دون المرور بأي محطة سودانية تشم الريحة بتاعتة الدولارات دي مجرد شم.

بحيراوي

Quote: تحياتي - أنا خايف إنو هيئة أخونا أبو قناية دي تتعب من أول ثلاث ملفات فساد وتقول الشئ دا إلا بتر عديل كد من المؤسف و المحزن أن تكون درحةالفساد قد وصلت لدرجة أن يستدينوا بإسمنا ويتحول الدين بقدرة قادر لمجموعة نافذة دون المرور بأي محطة سودانية تشم الريحة بتاعتة الدولارات دي مجرد شم.

سلامات و تحيات مولانا البحيرى ... و الله الجماعة ديل لا ابو قناية بنفع معاهم ولا ابو عصاية، الناس ديل دواهم البتر التام
بايدي الشعب السودانى و ما ذلك على الله و على شعب السودان ببعيد. لكن حتى ذلك الحين فقط نرجوهم رجاء خاص و من
منطلق وطنى صاااادق ان يكفوا عن الاستدانة باسم السودان و لهط الاموال لان هذا سوف يضر بالاجيال القادمة ضرر كبير.
فلينهبوا مما هو موجود.

أسرق من الموجود أخى الكوز الكريم و ليوسّع الله لك فى الرزق الحرام.

سلام بكري
ما كفاهم البسرقو محلي بقوها علينا اتنين سرقة ومساككة ديانة
اللهم افضحهم واحد ورا التاني

Quote: أسرق من الموجود اخى الكوز جزاك الله خير.

التحية لكم ابوبكر صالح , محمد علي , والطوربيد معاوية الصائم وانتم تلاحقون بؤر الفساد .

اقترح انشاء هيئة شعبية تنسق عبر المنتديات ولتكن باسم : مدونون ضد الفساد , تكون مهمتها كشف الفساد المستشري وعرض صور المستندات

ومخاطبة الممولين والمقرضين بعدم مسؤولية الاجيال المقبلة عن سداد هذه الديون .

اعلم ان العملية معقدة في نظام مالي عالمي مصمم لاستنزاف موارد الشعوب الفقيرة بمساعدة حكومات محلية فاسدة.

ولكن وبمرور الوقت سيكتسب جهدكم زخما اضافيا خصوصا من داخل مؤسسات الخدمة المدنية التي لا تخلو من الشرفاء .

ما عندي تعليق يا ابو بكر ومحمد ابراهيم، غير حسبنا الله ونعم الوكيل
والله يأخدهم وينتقم منهم الليلة قبل بكرة

سدو نفسنا الله يسد نفسهم

Quote: سلام بكري ما كفاهم البسرقو محلي بقوها علينا اتنين سرقة ومساككة ديانة اللهم افضحهم واحد ورا التاني

الله يحرجهم يا ود اٍبراهيم و يفضحهم فى الدنيا الاخرة، بحق مال الفقراء الذى نهبوه.

هؤلاء هم لصوص القرض الدولارى المليوني.
شوف بالله عمك ابو دقن دا اليشوفوا يقول نبى، طلع مجرّد لص صغير لا يختشى.


شكراً لمعاوية عبيد الذى وفّر هذه الصور بالمنبر، اخذتها من بوسته.

Quote: اقترح انشاء هيئة شعبية تنسق عبر المنتديات ولتكن باسم : مدونون ضد الفساد , تكون مهمتها كشف الفساد المستشري وعرض صور المستندات ومخاطبة الممولين والمقرضين بعدم مسؤولية الاجيال المقبلة عن سداد هذه الديون . اعلم ان العملية معقدة في نظام مالي عالمي مصمم لاستنزاف موارد الشعوب الفقيرة بمساعدة حكومات محلية فاسدة. ولكن وبمرور الوقت سيكتسب جهدكم زخما اضافيا خصوصا من داخل مؤسسات الخدمة المدنية التي لا تخلو من الشرفاء .

سلامات عزيزي الارباب. مقترحاتك سمحة بالحيل بخصوص مدونون ضد الفساد
هذه المنبر توجد به مكتبة للفساد ترصد هذه الحالات يكمن الاستعانة بها.

و كذلك مقترح مخاطبة الممولين و دى أفكار بناءة شديد، اتمنى ان تجد من يلتف حولها.
عنى انا شخصياً موافقاً مبديئا للمشاركة فى مجهود بهذا الخصوص.

يا كيزان بالله اسرقونا قدر قدرتنا ولا تحمّلونا ما طاقة لنا به.

شكراً للشقيق أحمد عبد الله على التضامن و مناشدة الكوز بأن يسرق الموجود فقط.

Quote: ما عندي تعليق يا ابو بكر ومحمد ابراهيم، غير حسبنا الله ونعم الوكيل والله يأخدهم وينتقم منهم الليلة قبل بكرة سدو نفسنا الله يسد نفسهم

يا الشفيع المسألة دى خربانة، اى سلطة دكتاتورية بالضرورة بالضرورة فاسدة. لان الناس الشرفاء دائماً، بالطبيعة بيبتعدوا عن أمكان الشبهات، الرجل الشريف دائما ما ينائى بنفسه عن الاشياء المشبوهة و مثار اللغط، و على العكس فالانتهازيين عديمى الضمير و الذمة ينتعشون فى مثل هذه الاجواء. عليه، دى النتيجة الطبيعية. بدون دولة ديمقراطية حقيقية و حزب ديمقراطى بحق و اٍعلام حر و شعب مرفوع الراس خالى من الخوف و التهديد بدون كل هذى الاشياء، هى دولة مرتع للفساد و اللصوصية، ما تراه هو رأس جبل الجليد و ما خفى كان أظرط.

انتا قريب منهم و معاهم بالله انقل ليهو رسالتي دى، قول ليهم يا جماعة جاسفوا من الموجود بارك الله فيك و وسّع لكم!. عشان ما يقطعوا عشمنا فى مستقبل أفضل.

Quote: ما عندي تعليق يا ابو بكر ومحمد ابراهيم، غير حسبنا الله ونعم الوكيل والله يأخدهم وينتقم منهم الليلة قبل بكرة سدو نفسنا الله يسد نفسهم

يحاول الشفيع ومشايعه من ابواق المؤتمر الوطني تصوير الامر وكانه ، ازمة اناس معدومي الضمير وطممو بطنه وسدو نفسو ، الامر اكبر من الاشخاص ....فمن دفعهم للسرقة ليس فساد الذمم ، وما يدفعهم للنزاهة ليست حسن التربية ومخافة الله كما تحاولو تصويره.....ولكن هو منهج فاسد ونظام غيب العدالة وتعامل مع هؤلاء بمنهج انهم اناس يخافون الله ومشهود لهم بالوضوء علي راس كل مترين ، وعند كل غفوة ......وظللتم تسوقونهم لنا بهذه الطريقة حتي خلناهم اناس في طريقهم لمصاهرتكم وليس اناس مطلوب منهم العمل لقيادة العمل والانتاج.
فالعلة في النظام كما ذهب الاخ بكري فان كان لك موقف من الفساد يحتم عليك الاصطفاف في صف كنس الانقاذ ومحاسبة عرابها سواء تم ذلك في المحكمة الجنائية او علي يد قضاء سوداني صارم وعادل.
اما طريقة القفذ من السفية ، ساعة الغرق فدي مكنة لن تقسم معانا ، ومحاولة الانقاذ التذاكي علي الناس ، واستبدال الاشخاص مع بقاء النظام بلون اخر ، هذه ليس مطالب الجماهير ، فالنظام الطفيلي والاستبدادي لا يتوقع منه اقل من الفساد السياسي والعدلي والاقتصادي والمحسوبية .

المال السايب بعلم السرقه
الناس دى بعد تمشى حنكتشف انو احنا ذاتنا باعونا واستلمو!!!!!!!!!!!!
اسوا واقذر خلق الله ياخى ربنا ينتقم لينا حقنا الليله قبل بكره
ونشوف فيهم يوم
واجعنى فى البحر السكات
وواجعنى زيف الدقون والسرقه باسم الدين
الاختشو ماتوا




-----------------------------------------------------------
يا ابوبكر عجبتنى صوره البروفايل ممكن اسرقا (سرقه باذن)

Quote: يحاول الشفيع ومشايعه من ابواق المؤتمر الوطني تصوير الامر وكانه ، ازمة اناس معدومي الضمير وطممو بطنه وسدو نفسو ، الامر اكبر من الاشخاص ....فمن دفعهم للسرقة ليس فساد الذمم ، وما يدفعهم للنزاهة ليست حسن التربية ومخافة الله كما تحاولو تصويره..

فعلاً يا اٍبراهيم المشكلة الاساسية لست فى الاشخاص المشكلة اساسها فى النظام السياسي. فى كل دول العالم ضوابط التعامل مع المال العام لا تتركز حول شخصية المسؤول، اٍنما فى شفافية النظام السياسي، اٍستقلالية القضاء و حرية الاعلام دى الضمانات الاساسية لدولة العدالة و الشفافية. لو ملاحظ فى القضية الحالية الفساد بلغ درجة حتى انه اصبح ينجز بسهولة و دون كثير تدابير لإخفاءه، لاحظ ان مدير تاجا هو شقيق محى الدين عثمان المسؤول بشركة الاقطان يعنى فى وضح النهار و على عينك يا تأجر و لا حتى مجهود للتمويه ساكت مافى. و البدوى بتاع وزراة الزراعة دى يقال انو اٍنتقل من الوزراة لادراة شركة خاصة تتبع لفكى محى الدين دا و هكذا.

Quote: واجعنى فى البحر السكات وواجعنى زيف الدقون والسرقه باسم الدين الاختشو ماتوا

سلام الاخت اٍبتهال، و الله الجماعة ابو دقون و يسرقوا ديل أمرهم محيّر. الزول بتوقع انهم يكونوا ناس كويس و خايفين من عذاب الاخرة و ذاهدين فى الدنيا بالله يطلعوا اخطر لصوص، محنة كبيرة الله. انا لقيت كل الاوراق دى فى بوست محمد اٍبراهيم و كنتا داير مداخلة هناك لكن اٍحترتا أكتب شنو. فى الاخر الناس ديل نناشدهم انهم بس ما يدخلونا فى الديون و يسرقوا الموجود.

أقصى ضرر ممكن يصيبنا من سرقة الموجود عندنا من الدخل القومى هو اننا نصل الصفر يعنى نقعد على الحديدة، لكن لمن يشيلوا قروض من العالم و يلهفوها بيكون دخلونا فى الديون و خرّبوا علاقاتنا بجهات التمويل المختلف، يعنى خراب عام للمستقبل. عشان كدا نناشدهم بسرقة ما تيسّر فقط. صورة البروفايل حلال بلال عليك و معاها تحية كمان.

اخى العزيز ابوبكر صراحة مناشدتك دى انا عايز بكرى يعلقها فوق عشان القاشى والماشى يشوفها وكمان عشان
الارزقية المساكين المكتفيين بالفتات يشوفوا بلاوى اساتذتهم ,, اما بالنسبة لخازوق المستقبل فما
اظن فى اكبر من التفريط فى تراب الوطن وديل فرطوا فى اجزاء عزيزة وغالية من السودان الله ينتقم منهم .

تحياتي أخي ابو بكر صالح
الفن هنا ، رفضوا الجلوس ومشاركة الغير في السلطة والثروة ، آثروا الإنفراد بالسلطة وأختاروا أقصر الطرق الإنقلاب ، وسرقوا الدولة والوطن ، وكان الوطن طله (شملة) وغطاء حاولوا به عبثا ستر عورتهم ، لكنها كانت عورة لا تنستر وأكبر من الوطن والحزب ، خدعوا بهذا اللباس الأبرياء من العربان والعجم ، ونصبوا لهم الكمين المحكم بالطعم الذي لا يرفضه مسلم وهو ( الإسلام) - باسمه قتلوا وذبحوا واعتقلوا وقسموا الدولة لدويلات ... وسرقوا مدخرات البلد أصولها ومتحركها قطاراتها وطائراتها وبواخرها ، نضبت ونشفت بالداخل وعلم الداني والقاصي منهم ما فعله ( شيوخهم) بمدخرات الداخل ، فكانت الفكرة الذكية الاحتيال والتحايل على الأبرياء
بالخارج فضيحة أحمد البدوي وأحمد بهجت وجمعة الجمعة نموذجا ... والشغلانة اصبحت نهجا ومنهجا وفعلا واجب القيام به وسنة مؤكدة عن شيوخ بنو كوز
أن تسرق وتلحس المال السائب أينما كان مكان وجوده ولا حياء في ذلك ..
معكم نناشدهم بالرجوع لمبداء محلية اللحس ليتهم يسمعون .
الشفيع إبراهيم

أخي الكريم أبو بكر صالح
جزاك الله خيراً
أرجو أن تثبت هذه النصيحة الغالية على بروفايلك لأنها بالجد معبّرة وتغني عن ألف بوست ..
بارك الله فيك أخي الكريم..

أخوك في الله: نصر الدين البشير

Quote: يا جماعة انا المواطن ابوبكر صديق محمد صالح أخوكم فى الوطن و الانسانية ارجو منكم الاتى: يا جماعة رجاء و رجاء حار جداً و نستحلفكم بكل عزيز لديكم. بالله اسرقوا من العندنا، أصلو نحنا السرقة دى ما مانعكم ليها بس أسرقوا من العندنا، ما تديّنوا على حسابنا و باسمنا و تسرقوا، لانو بالطريقة دى بتكون ركبتونا فى خازوق كبير خلاص. أسرقوا من الموجود العندنا مانا سألنكم أبداً الى حين. بس مافى داعى للمضرّة الشديدة دى!.

اولادنا ما عندهم ذنب

اسرقوا حقنا .. نحن نستاهل اي حاجة ذاتو
بس عليكم الله .. بتعرفوا (الله) بالمناسبة !؟
ؤ موقنين بلقاءه؟
اذا كانت اجابتكم نعم
بطلوا السرقة

اما اذا كانت بلا .. فاسرقوا ساي
المافي شنو!؟

"ويلٌ للمطففين"










-------

لما قريت العنوان قلت بكور مهكر .. ول قلب عديييل كدا!
لكن صراح ما عندها حل غير مناشد تليق ..
فاستلفت البروفايل يا فردة

عزيزى الكوز ..اسمع كلام بكور ده الله يهديك وجزاك الله خير

وما خفي يا بكري
والله المستور يبين ما تعرفوا تقولوا شنو ذاتو، الكيزان ديل استباحو البلد وعاسوا فساداً غير مسبوق، الله في غايتو، والله صحي
عليك الله فتش صاحب {والله صحي} دي عشان الضحك يشرطك، بوست فكي من طفيلية آخر الزمن العلينا ده، منزل ليهو بوست الأمين البشاري

سلامات يا شباب آسف على الغياب عن البوست، انشغلت شوية. لكن الى حين عودة و مواصلة فى التفاهم و الاستعطاف للاخوة الكيزان. الى حين عودة هذا شعار بروفايل اضافى لمن يرغب من الاصدقاء فى وضعه:

ليظل هذا البوست عالياً

UP

عمر البشير بقول إنو مافي فساد أها يا أخونا العواسة دي شنو؟ 30 مليون دولار دي شكلها بسية وما تستحق يتقال عليها فساد ولا شنو؟

Quote: اخى العزيز ابوبكر صراحة مناشدتك دى انا عايز بكرى يعلقها فوق عشان القاشى والماشى يشوفها وكمان عشان الارزقية المساكين المكتفيين بالفتات يشوفوا بلاوى اساتذتهم ,, اما بالنسبة لخازوق المستقبل فما اظن فى اكبر من التفريط فى تراب الوطن وديل فرطوا فى اجزاء عزيزة وغالية من السودان الله ينتقم منهم .

سلامات أخى العزيز نور الدين عثمان
خازق المستقبل كبير يشهد الله، الناس ديل قسموا البلاد و اٍضطروا الاخوة الجنوبيين لاختيار الانفصال و هذه الايام يجهضون حتى فرص الوحدة المستقبلية عن طريق نهب بترول الجنوب و اٍستفزاز اهله. مين أين أتى هؤلاء اللصوص الاشقياء لا ندري. الهم هسه نحنا دايرنهم يكتفوا بنهب الثروة الموجودة فقط بدل الديون عسى يجى علينا يوم نقدر نبنى ما خرّبوه.

Quote: ونصبوا لهم الكمين المحكم بالطعم الذي لا يرفضه مسلم وهو ( الإسلام) - باسمه قتلوا وذبحوا واعتقلوا وقسموا الدولة لدويلات ... وسرقوا مدخرات البلد أصولها ومتحركها قطاراتها وطائراتها وبواخرها ، نضبت ونشفت بالداخل وعلم الداني والقاصي منهم ما فعله ( شيوخهم) بمدخرات الداخل ، فكانت الفكرة الذكية الاحتيال والتحايل على الأبرياء

طبعاً يا الشفيع اٍبراهيم مسألة اٍختلاط الاسلام بموضوع اللصوصيين ديل من الاشياء المدهشة و المحيّرية. أكثر زول بتكلم عن الدين و الله و القيامة هو من يتخذ ذات الاشياء كمشروع للنهب و السرقة. يأخى دى روح اٍجرامية فظيعة يشهد الله. الحرامى العادى افضل بمليون سنة ضوئية من شخص يسرق بأسم الله و دينه الحنيف، دى صعبين عديل.
مرات كدة لمن أتامل مسألة المشروع الدينى بتاع الكيزان و شعارتهم المرفوعة و بين لصوصتهم المشهوده، يبدو لى ان الجماعة ديل فى دواخلهم غير مؤمنيين بالله و الحساب و الاخر و الموضوع دا كلوا، صراحة كدة لو فى زول كافر بالقيامة و الحساب و كل دا هم الكيزان ديل، لانو ما ممكن الواحد منهم يطربق اليوم كلو عن القيامة و الجنة و النار و اول ما يتولى أمر المال العام يهلفه لهف من لا يخشى القيامة و لا النار و لا الحساب.

Quote: أخي الكريم أبو بكر صالح جزاك الله خيراً أرجو أن تثبت هذه النصيحة الغالية على بروفايلك لأنها بالجد معبّرة وتغني عن ألف بوست .. بارك الله فيك أخي الكريم.. أخوك في الله: نصر الدين البشير

سلامات أخى العزيز نصر الدين البشير،
تحياتى يا ود البشير أنا ح أثبّت النصيحة دى فى بروفايلى عسى و لعل الاخوة الكيزان يراعو ظروفنا و يسرقوا ما تيسّر. ياخى القروض الاجنبية دى زاتها ربيوية و بالتالى هى مال سيئ شديد و محرّم لذلك ندعو الاخوة الكيزان للابتعاد عنها اٍبتغاء مرضاة الله و يعصروا على المال الوطنى فقط. خليك و طنى و اعصر على الوطنى عزيز الكوز اللِغِّيف.

Quote: اولادنا ما عندهم ذنب

عزيزي العزيز قيقراوي، بس دا الكان فى رأسي، نحنا اليسرقونا طووووالى حلال بلال عليهم، لكن ما يسرقوا مستقبل أطفالنا. ها نحنا نتنازل لكم الحاااضر تمام أخوتى الكيزان فداء مستقبل أطفال القادمين نرجو ان تقدّروا هذا النداء. القروض الاجنبية سرقة للمستقبل نرجو الابتعاد عنها، خطورتها ليست فى مراكمة الدين فقط اٍنما فى تخريب فرصة التعامل المستقبلى ما الجهات الممولة من بنوك و صناديق مالية مختلفة.

و الله يا قيقراوى المناشدة للخصم دى سببها الشديد القوى، هل فى أشد من سرقة المستقبل؟.

أسرق ... أسرق عزيزى الكوز حتى تُكتب عند الله سرّاقا.

Quote: وما خفي يا بكري والله المستور يبين ما تعرفوا تقولوا شنو ذاتو، الكيزان ديل استباحو البلد وعاسوا فساداً غير مسبوق، الله في غايتو، والله صحي عليك الله فتش صاحب {والله صحي} دي عشان الضحك يشرطك، بوست فكي من طفيلية آخر الزمن العلينا ده، منزل ليهو بوست الأمين البشاري

شكراً كتير عزيزي نادر على المشاركة و الاعتناء بالبوست، نتمنى انو الجماعة ديل يفهمونا و تفعالوا مع دعوتنا ليهم دى. طبعاً زى قالت ما خفى كان أصعب و أخطر، انا شايف حكاية التسريبات الحالية ممكن تكون جزء من صراعات داخلهم و تصفية حسابات و على الاقل مشروع لإلهاء الناس و تخديرهم بانو فى متابعة لموضوع الفساد، طبعاً فى محاسبات حقيقية للمفسدين ما كان ناس عبد الرحيم محمد حسين بيتلقوا الترقيات مباشرة بعد فضائح الفساد. على كل حال نحنا ما سألنهم أبداً فى السرقة مما تيسر فقط نطالبهم بعدم سرقة مستقبل الاجيال القادمة عن طريق اٍرهاق بالبلاد بالديون و تخريب سمعتها لدى مؤسسات التمويل المختلفة.

نحنا حسابنا معاهم براهو، ولابد من الفجر و اٍن طال السفر.

تعرف المنشود اليهم يكون بقولوا الشيوعي ده ما ضاق (الكيزان كلهم بقولو ضاق) الديون .. الديون الما راجعة أحلى من تمر بلدنا...
طلبك يا شيخ بكري يبدو بسيطاً! لكنه غالي و صعب فالحسابات و البنوك فاتحة أحضانا والضامن حكومة ووزارة، و الحياة واااحدة ما بتتكرر و الشعب (عوالــيق) .. و ربنا سبحانه و تعالى قال و أما بنعمة ربك فحدث (ونعم بالله)..
جزاك الله خير..
وبلاي لوسمحت ما تعصر علينا شديد (يرزق من يشاء بغير حساب) صدق الله العظيم.

http://www.facebook.com/emcoder


معآ لكشف الفساد

المحلى والمهاجر

شكرآ ابوبكر

الاخ ابوبكر

اقترح تبنى الشعار اعلاه فى البروفاليات

ودعم الحمله المذكوره فى الفيسبوك

شكرآ

سلام يا متوكل

Quote: تعرف المنشود اليهم يكون بقولوا الشيوعي ده ما ضاق (الكيزان كلهم بقولو ضاق) الديون .. الديون الما راجعة أحلى من تمر بلدنا...

لكن بكور يسو شنو عاد!؟
البعملوا فيو (الجماعة) ديل يعتبر إكراه على ممارسة الفاحشة مع النملة عديل كدا ياخي!!
ما ممكن اصلو ياخي!
الا تكتفي جهنم الجشع دي .. ابداً!!؟
طمسوا الماضي .. و بهتوا الحاضر .. كمان عاوزين يصادروا المستقبل!؟

سئمنا ياخي .. كرهنا روحنا دي بي الله واحد ذاتو و الله!
كفاااااااااية











--------

زمان الشغلة كانت فهلوة و سلفقة باسم الله .. و حبة شطارة .. برضو لله!
لا لسلطة و لا لجاه ( و ردد الإيكو) :جاهـ .. آهـ .. آهـ .. آهـ (وكاد ان يمد لسانو!)

يدعوا الناس للجوامع .. و يتفرغوا هم للسوق، و حبك المؤامرات .. بليل بهيم
زي اليوم الاسود .. المشؤم الرماهم في طريقنا

قاتلهم الله عبدة المال .. ضعاف النفوس

العندو دين ما بسرق البلد العبادو موحدين!
العندو دين ما ببنى قصرو العالى فوق جوع الغلابا المعدمين

العندو دين ما بسرق البلد العبادو موحدين!
العندو دين ما ببنى قصرو العالى فوق جوع الغلابا المعدمين

Quote: يا جماعة انا المواطن ابوبكر صديق محمد صالح أخوكم فى الوطن و الانسانية ارجو منكم الاتى: يا جماعة رجاء و رجاء حار جداً و نستحلفكم بكل عزيز لديكم. بالله اسرقوا من العندنا، أصلو نحنا السرقة دى ما مانعكم ليها بس أسرقوا من العندنا، ما تديّنوا على حسابنا و باسمنا و تسرقوا، لانو بالطريقة دى بتكون ركبتونا فى خازوق كبير خلاص. أسرقوا من الموجود العندنا مانا سألنكم أبداً الى حين. بس مافى داعى للمضرّة الشديدة دى!.

يا بكور
أها ... الرجاء الحار جدآ جدآ جاب نتيجه؟

Quote: مافى داعى للمضرّة الشديدة دى

انت نسيت انو "الما بسوى الضُر ... ما كوز حُر"

ابوبكر صالح سلامات و تحية والبركة فينا وفيكم فى وردى

هيييييييه دنيا والله
وما دائم الا وجه الدائم

انا بفتكر انو دى ممكن تكون واحدة من توصيات لجنة محاربة الفساد
يعنى فى نهاية التقرير
يكتبو
وقد اتضح لنا بعد البحث والتقصى انو الاخوة الكرام
ما كانو يعملوا الا لاعاشة اسرهم و ان يكفوا اهلهم شر الفقر
والمذلة
وما كانوا يعملوا الا من اجل ان يتركوا لابنائهم ما يعيلهم ليكفوهم
شر السؤال و حتى لا يتخطفهم الناس
واننا لا نرى فى هذا الا اتباع سنة النبى المصطفى الذى حثانا
على ذلك اوصانا باهلنا وابناءنا خير
ولكننا نوصى اخوتنا فى الله ان يغرفوا من القدامهم
ولا يستدينوا من البنوك الاجنبية
حتى لا يعوقوا الحاكم بامر الله

اما بخصوص ما تحدث به البعض عن ضرر ذلك على الاجيال القادمة
فهو الكفر بعينو فرب العالمين ما شق حنكاضيعوا

واخيرا نشكر اعضاء اللجنة و بنقول ليهم مجهوداتكم
فى ميزان حسناتكم و فى ميزان حساباتكم فى بنك امدرمان
بأذن الله

لا اعتقد ان هناك وقت لمناقشة التقرير فقد دخل علينا وقت الصلاة
قوموا الى صلاتكم يرحمكم الله