ادريس ديبي ... سنحملك المسئولية كاملة اذا ارتفعت المهور وبار الشباب

شوف يا معلم ..

البوره لاحقه الجنسين في السودان

وحركتك بصراحة ########ة ... تحجز فندق كامل ومهرك بالدولار ذو الستة اصفار، عارفينك ما داقي فيها حجر دغش

واعذرونا يا اهل تشاد على تبذير اموالكم في سودانكم الحبيب

لكن يا عمك بزار زي دا ما سمعنا بيهو في السودان قبل كده، وعندنا عادة سودانية ام اسلامية لا ادري،
ان لا يدفع مهرا لبنت اكثر من ما تم دفعة لبنات اهلها وقريتها وان كان العريس مقتدر، حفاظا على حاجات كتيرة

دحين يا ابو الشباب (موش الزول عريس برضو يا اخوانا ) خليونا ندلعو شوية

اها، بكرة يجي واحد من اولادنا ويقول داير يعرس، والشروط تبقى

1. الا تحجز فندق السلام روتانا كله
2. والمأذون من الجزائر
3. والبشير يكون حاضر ومعاه كم وزير،
4. المهر بالدولار ويكون مكون من سبعة ارقام عييييييك

وما خفى اعظم

شهر العسل وين يا عمك؟؟ اوع تقول لينا امارة موناكو، ياخي سندوتش الفول فيها قالو بالشيء الفلاني

سد المال 26 مليون دولار
ده سد مال و للا سد مروي و المناصير!

إرتفاع المهور هين ...الخوف البنات يقولو ما بنرضي بأقل من منصب سيده أولي...

وبيني وبينكم ظريفه قصه السيده الاولى دي :)

Quote: اها، بكرة يجي واحد من اولادنا ويقول داير يعرس، والشروط تبقى

سلامات هبيب
افتكرتك كسرو ليك الدش في يدك بعد ما جمعت 50% من الشيلة لكن الحمدلله لقيتك شايل هم للاولاد.
يا اخي ولا يهمك ديلك بتصرفو لما زمنهم يجي

سلام يا سناء

Quote: ده سد مال

ده بيت مال عديييل

Quote: وبيني وبينكم ظريفه قصه السيده الاولى دي :)

والله فرصكن صادقت يا سارة

غايتو الا نشوف ليكم من القارات المجاورة لووووول

سلام يا محجوب

Quote: سلامات هبيب افتكرتك كسرو ليك الدش في يدك بعد ما جمعت 50% من الشيلة لكن الحمدلله لقيتك شايل هم للاولاد. يا اخي ولا يهمك ديلك بتصرفو لما زمنهم يجي

يتصرفوا كييييف لو ما هيأنا ليهم الارضية الصالحة البخربو فيها الكيزان كل يوم ديل

الأخ أحمد ابن عوف

تحياتي - والله أنا محتار في مجموعة الروابط والهيئات والمنظمات السودانية التي تعيش في كنف الدولة السودانية وما فتئت ليل نهار تدعو للزيجات الجماعية وتخفيف غلاء المهور . يجي رئيس الدولة شخصياً يحضر ليه عرسة بهذه التكاليف حتى تصبح حديث المجتمع والصحف السودانية . كيف لنا أن نطمئن على ما نسمع ونرى ؟ ألا يحق لنا أن نتهم الجميع بالنفاق والتمثيل !! وأين هذه الجمعيات والمنظمات من الذي يحدث ؟ وهل لنا أن نسمع ناس دكتور عصام أحمد البشير ودكتور عبد الحي وكافة الإئمة في الجمعة القادمة يستنكرون الذي حدث ؟ وهل سوف نسمع هئية علماء السودان تعلق على ما حدث !!

بحيراوي

كان زمان زمن السلطنات: الفور،الفونج،نبته، التنجر، تمبكتو...إلخ كان الناس إذا شاهدوا أي فتاه جميله في أي قبيله علي طوووول يذهبون للسلطان ويرموا ليهو الشمار –ياسيدي السلطان الله ينصرك خلي بالك القبيله الفلانيه فيها بنت والله ياسيدنا لقطه عسل بتنقط ، ما حتستاهل زول غيرك ويسردوا ليهو محاسنها ومفاتنها ....علي طووول صاحبنا السلطان لعابه ينقط يقوم يأمر حراس الخزن أن يجهزوا كم خريطة ملئ بالدراهم أو الدننانير وكم رأس من الماشيه وكم كيلات من الغلال وكم رأس من الأسري كخدم لأهل الفتاه ويجهزهوا حصان أصيل ود مهر المهور ومعه فارس بكامل سلاحه لإحضار الفتاه للسلطانفي الموعد المحدد ليحضروها و.ليدخل عليها السلطان تقريباً ساعه أو ساعتين ومن ثم يرموا بها في الحوش بتاع زوجاته العددهن يفوق العشرات لتتم حراسة النسوان من قبل حراس مطوشين(مخصين)....آهــه بختك يامني موسي هلال الحوش مستنيكي بس ياريت حراسوا مطوشين! البترول إتلحس ورجعنا ندعم إقتصاد الدوله بالفتيات.
.
.ياسلفاكيرعليك الله أشفق علي الإنقاذ وقلل الضغط والعصرعلي الانقاذ.

أنا محتار!!!! كيف وإزًي إدريس دبي تعرف علي هذه الفتاه ؟
.