الزول ده والمكان ده ، وإنطباعات أخرى..

الزول : بكري ابوبكر.
المكان : موقع سودانيز أون لاين دوت كوم.

والله يا فارات لو ما أب صلعة الأصلي ده ، والمكان الإنتو قاعدين فيهو ده كنتو تكونوا راجين سماية جيرانكم عشان تقشروا!!
البني آدم في دنيتو دي بيكون منتظر ليهو فرصة يقدم نفسو وإمكانياتو للناس ، في أي مجال ، سياسة، إجتماع ،ثقافة ، رياضة، ونسة وخفة دم، سماجو وتقل دم، قطامة، خفة ولِفّة، غناء، موسيقى ، شعر، صحافة،
تحاليل، مُكاجرة، رجالة، ظهور وكلام عن النفس والانجازات والمعارف الاسمائهم كبار كبار، التأهيل الأكاديمي، المهنة ذات الاسم اللامع أو التجارة في مجال معين، الكرم، لهفة المنكوب،
النشاط الإجتماعي، جهة العمل التي ينتمي اليها، البلد القاعد فيها ...... الخ.
بل – ولأهمية هذا المكان – هناك بعض من الأسماء اللامعة في عدد من المجالات أصبحوا أعضاء هنا، شفت كيف.
وعشان تظّهِر حاجاتك دي ، لا بد من وجود نافذة تستطيع من خلالها تقديم عرضك، والنوافذ في السودان – زي ما إنتو عارفين – شباكين صغااار ، والناس كتيرة.. أها ،،،، الحل شنو؟؟
ما ياهو الحل في المكان ده، أعمل عضويتك وتعال قول وأعرض وأقدل وبشِّر زي ما عايز..

البعض كان فعلاً بحاجة لمثل هذه الفرصة ليقول يا جماعة أنا زول كويس وممكن يجي مني، وفعلاً بتتفتح ليهو طاقة يطل من خلالها ، على الجمهور العريض (البره من المكان ده) ويشوف نفسو وهي بتكبر ، والإسم يبدأ يلمع شوية..
والبعض لا يرقى ما يقدمه هنا الى القراءة والاطلاع عليه ، وطارحين نفسهم معلمين كبار، المشكة إنو البيقنع ( الديك ) منو!!!!!
عدد معتبر ويُحسب للموقع ده نجحوا في تغيير حياتهم، وحصلوا على ما يريدون، بعضهم بقى ظريف ظُرف عجيب، وهادي وطيب، وتانين بقوا شرانيين، وهم في الواقع طيبين،
وناس بقوا مرحين ودمهم كان ( قرادي ) وناس اتوظفوا على حس الموقع ده، وناس سافروا.... وعيييييييييييك.
حتى الناس المختفين من هنا، يمين ما زحّوا منو!! بيدخلوا يقروا ويتخارجوا ، هي ما مرضة كمان ، إنتو قايلين شنو.. وطبعاً في ناس ظروفهم ما بتسمح ليهم يدخلوا كتير هنا،
وفي ناس تانيين من الواقفين ديل ما بيحبو أجواء المشاكل والجوطة الفاضية، فيؤثروا البُعد..وهناك نوع آخر مشترك في مليون مكان، ففضل إنو ينشغل بهم عن هنا..
وفي نوع أسبابو ( أسرية وإجتماعية ) !!وفي نوع أخير ( مكنات ) ساي منهم، آي والله!!
لكن يظل لهذا المكان طعمو ونكهتو وتميزو..
الموقع ده خلق الكثير جداً من العلاقات الانسانية الراقية ، زواج أو صداقة، أو معرفة حوش ساي، وده مكسب – لو تعلمون – كبير.
أعرف ناس كانوا ما بيحلموا يقابلوا أو يتحدثوا مع فلان أو علان، فجأة وجدوا أنفسهم بيتونسوا مع ناس فلان ديل عديل كده!!! الله يسألني تسمعوا بيتكلم عن فلان ده،
إنت زاتك لمن تستغرب!! معقولة بس..
والمصيبة إنو بيكلفوا أنفسهم فوق طاقتهم لتبيان تلك العلاقة أو القيام بالواجب تجاهها ،، ليه ياخ ؟؟
أها قصة إنك تتناقش مع الناس هنا ده، وتقول رايك، دي البتحسس الزول إنو موجود وبيقدر يتناقش ويتكلم ويدلي برأي، الناس - اللأوريدي – متعودين على القصة دي في حياتهم العادية وما عرفوها هنا،
بيكونوا عاديين وما بتاثر فيهم كتير، أما غيرهم فممكن يرسل ليك رسالة أو يضرب ليك من آخر الدينا وفي أوقات غريبة جداً عشان يحكي ما دار في البوست الفلاني، وقال لفلان شنو وفلان قال ليهو شنو، وإنت تكون في وادي تاني وما عارف الحاصل في الدينا شنو!!
وممكن يطلب منك تدخل وتقول حاجة ( إن شاء الله upــاية صغيرونة كده ) ومؤكد ح يكون ضامن – بعد نقتو معاك دي – إنك ح تكون لحام مع كلامو!!
وديل مشكلتهم إنهم جعلوا من الموقع ده محور حياتهم، وأتصور إنو حياتهم الإجتماعية كانت شبه خالية - إن لم تكن مُعلِّمة الله - فما يدور هنا يؤثر بشكل مباشر على حياتهم (الأسرية) العادية..
المهم كونوا يعيشوا الحياة دي ويحسوا بالاحساس ده ، فذلك مكسب كبير والله، إحساسك إنك ممكن تتواصل مع الناس ديل وتناقشهم وتمازحهم وممكن تقابلهم دي بيقلب كيانك زاتو ،
وبيخليك تحس إنك إصبحت ( رقم )..




بجيكم.

((منبر سودانيزاونلاين اعظم وابلغ اثراً مما يتخيله بعضنا وفي ذات الوقت أقل مما يتوهمه البعض الأخر والعاقل من بقي بين المنزلتين))

Omer Osman

صلاح
صباحك قشطه
الموقع كما قال جنابو عمر فعلا له بعض التاثير لكن من الخطا انك تظن انه محور الدنيا والخطا الاكبر انك تعتقد بان ليهو تاثير في مجرى الحياه في البلد
والله يا صلاح ده ما كلام زول بيناصر الحكومه وضد المعارضه لكن كلام زول عنده حسابين في الفيس بوك وتويتر وفيهم شباب زي الورد وعدد ما ساهل من جيلي
تصدق ما عندهم علاقه بالبيحصل هنا وبيعتبروني عايش بره الزمن ومضيع وقتي في الاونلاين
المهم دي عينه من الناس البتتعامل مع النت
في عينه تانيه ودي معظم الشعب السوداني ما بيعرفوا نت زاتو يعني شنو خليك يعرفوا الاونلاين
فقصه الواحد يعمل مشهور هنا وانو خلاص وصل للنجوميه لمجرد كتابه كم بوست وصل عدد قرائها لاربعه او خمسه الف دي حاجه تدعو للدهشه ورسم ابتسام اشفاق على الناس دي
والاعجب لمن واحد يقول ليك انت قاعد تحاول تصطدم معايا عشان تشتهر والله لمن اقراء الكلام ده اقرب اقع على ضهري من الضحك
مفهوم الشهره هنا غريب وعجيب وفهم الناس انها مشهوره ومؤثره في مجريات الاحداث في البلد ده عايز ليهو مئات البوستات
هذا لا يلغي الجانب الاجتماعي والانساني والتعريفي الهائل الذي يقدمه الموقع كاكبر تجمع اسفيري للسودانيين على الشبكه العنكبوتيه

فدياس يا صديقي ..

القول ما قلت يا صديقي..
تصدق أنا موضوعي كلو عايز الناس تعترف لبكري وللموقع ده بفضلوا الباين..
وبرضو الناس تكون متوازنة في حاجاتها..






والله في أفكار بتاعت انطباعات كده غايتو يا كسّبتني صداقة بعض الناس ، واللا خسرتني الناس كلهم..

يازول اكتب انطباعاتك ساكت
الحبه ما بتجيك
الناس هنا ذاكرتك رخوه
ربع واحد وينسوا انت قلت شنو؟
ما شايف عمك الترابي هسه بقي نيلسون مانديلا السودان
والدباب خليل بقي الرفيق الشهيد
اخر حاجه تخاف منها هنا هي ذاكره الناس
اكتب وامتعنا وسلم لي على عماد عبدالله

Quote: ((منبر سودانيزاونلاين اعظم وابلغ اثراً مما يتخيله بعضنا وفي ذات الوقت أقل مما يتوهمه البعض الأخر والعاقل من بقي بين المنزلتين))

يا سعادتكم ،

المفيد المختصر .. والله إختصرت الموضوع كلو في كلمتينك ديل يا عمر..






الصاح : المختصر.

الإنطباعات الأخرى ، اللي هي زي:
- الإخطاء الإملائية ( غير المغفورة ) خاصة في العناوين ،، الأخطاء الطباعية ما فيها مشكلة.
- التِمِّسِح في الأسماء الكبيرة كبيرة ، وديل بيسموهم النحل ، والبعام.
- الاحتفال بمناسبة عدم الاحتفال.
- تصوير غدا ناس عشة يوم الجمعة الفات.
- الألقاب الممنوحة سااااي كده، ودي داخلة فيها المجاملات على حساب حاجات تانية.



والله الحاجات دي مضايقاني جنس ضيق، لكن منو البيقول البغلة في الابريق؟؟




ما أنا غايتو.

Quote: البني آدم في دنيتو دي بيكون منتظر ليهو فرصة يقدم نفسو وإمكانياتو للناس ، في أي مجال ، سياسة، إجتماع ،ثقافة ، رياضة، ونسة وخفة دم، سماجو وتقل دم، قطامة، خفة ولِفّة، غناء، موسيقى ، شعر، صحافة، تحاليل، مُكاجرة، رجالة، ظهور وكلام عن النفس والانجازات والمعارف الاسمائهم كبار كبار، التأهيل الأكاديمي، المهنة ذات الاسم اللامع أو التجارة في مجال معين، الكرم، لهفة المنكوب،النشاط الإجتماعي، جهة العمل التي ينتمي اليها، البلد القاعد فيها ...... الخ.

سـلامات عزيزنا صـلاح ومشتاقون! تصدق؟..تعـرف ـ في البداية ـ كلامك دا ذكرني قصة الزول المشى للعرضحالجي ولامن قرا ليهو القصة التي كتبها بناء على ما حكاه المظلوم تأثر الرجل بشدة وبكى لسماع قصته وقال: والله ما كنت قايل روحي مظلوم قدر دا.. أها بالله هسي سودانيس دا بعمل كلامك دا كللللو وأنا ما جايب خبر.. يا خسارة سنيني فيك يا بورد بكري! بالمناسبة برضو أذكر إنك قبل كدة علقت على قلة مشاركاتي وأظن وقتها كانت حوالي خمسية في أربعة سنة.. أها عملناها ليك تسعمية في سبعة سنين.. قصرنا معاك يا ابن العـم؟.. لو جينا للجد، نعـم فالبورد وسيط إعلامي مهم ومؤثر، زي ما كنا بنقول قبل أيام في بوست الأخت تيسير عووضة حول: لماذا تفكر المعارضة في البورد بصوت عالي؛ وأعتقد أن قراء البورد أكبر من عدد قراء الجرايد السودانية المطبوعة مجتمعة؛ بسبب وجود عـدد كبير من القراء والمشاركين بالخارج.. هناك مميزة مهمة جدا للبورد لا تتوفر للصحف هي الحرية الكاملة في النشر بالنسبة للأخبار والأحداث السياسية بعيدا عن الرقابة الأمنية والحجب والمصادرة الخ؛ لذلك فبعض الأخبار لا يمكن أن تجدها في أي وسيط آخر غير هذا البورد.. وبرضو زي ما قلت في بوست تيسير أتمنى أن يدرك الجميع من حكومة ومعارضة ومثقفين وسياسيين آخرين وكل المهتمين بالكتابة في المجالات الذكرتها إنت في الإقتباس، أن يدركوا أهمية ومقدار التأثير هذا ويتعاملوا معها بمسؤولية وجدية كبيرة بدل الإثارة والصراخ والعك والسائد الآن..
وفي النهاية طبعاً ولابد أن نزجي معاك آيات الشكر والعرفان لبكري ومقدرته الفائقة على إدارة البورد بكل الصبر والكتير من الحكمة، وبريادته لمواقع الحوار السودانية المحافظة على استمراريتها وتاثيرها.. وربنا يوفقو ويعينو..وتحياتي يا صلاح..

حذف للتكرار، بورد بكري (شكروه رقد أو بالحرى: كرّر)..

Quote: نعـم فالبورد وسيط إعلامي مهم ومؤثر، زي ما كنا بنقول قبل أيام في بوست الأخت تيسير عووضة حول: لماذا تفكر المعارضة في البورد بصوت عالي؛ وأعتقد أن قراء البورد أكبر من عدد قراء الجرايد السودانية المطبوعة مجتمعة؛ بسبب وجود عـدد كبير من القراء والمشاركين بالخارج.. هناك مميزة مهمة جدا للبورد لا تتوفر للصحف هي الحرية الكاملة في النشر بالنسبة للأخبار والأحداث السياسية بعيدا عن الرقابة الأمنية والحجب والمصادرة الخ؛ لذلك فبعض الأخبار لا يمكن أن تجدها في أي وسيط آخر غير هذا البورد.. وبرضو زي ما قلت في بوست تيسير أتمنى أن يدرك الجميع من حكومة ومعارضة ومثقفين وسياسيين آخرين وكل المهتمين بالكتابة في المجالات الذكرتها إنت في الإقتباس، أن يدركوا أهمية ومقدار التأثير هذا ويتعاملوا معها بمسؤولية وجدية كبيرة بدل الإثارة والصراخ والعك والسائد الآن..

عيسى ، صاحبي ..

وينك ياخ .

كلام يتوزن بالدهب . أوافقك لو الناس العندهم إهتمامات في أي مجال كان وبقليل جداً من الاجتهاد والتركيز
ممكن يكون حاجة في يوم .. في ناس هنا والله يمحنوك محنة بالبيكتبوه، وتتحسر إنهم بيكتبوا هنا بس ، ديل ممكن
ببساطة يكون أعلام في مجالهم، لكن ما تعرف كسل واللا زهد واللا ما عندهم زمن.
بوست تيسير ما قريتو ، من دربي ده عليه.
وبعدين طبعاً أنا قصة أفتح لي بوست دي ما حقتي ، عشان كده مرات بحس بي نفسي أشتر أشتر كده،
بهبش في مواضيع الناس عارفاها لكن ما في زول عايز يتكلم عنها..



---------
يا زول إنت مشاركاتك ما وصلت التسعمية زاااتا، ما تاكلنا حنك ساي.
سعيدين بالطلة والله.

Quote: - الإخطاء الإملائية ( غير المغفورة ) خاصة في العناوين ،، الأخطاء الطباعية ما فيها مشكلة.

والله يا عمك انا مافي شي بقطع قلبي و يبوظ اعصابي زي كتابة اسم الجلالة بالهمزة أو بالتاء المربوطة
أما ناس يتثنى و مذيد و لخبطة الألف المقصورة مع الياء فديل مقدور عليهن

والعجب ياصلاح التكفيريين
والبقولو لينا شوفو ليكم بلد تانى
اها زى ديل تقول ليهم شنو؟
كاننا "كفار " بعيد عنك

Quote: والعجب ياصلاح التكفيريين والبقولو لينا شوفو ليكم بلد تانى اها زى ديل تقول ليهم شنو؟ كاننا "كفار " بعيد عنك

سلمى يا سلمى، طوّلنا منك..

تصدقي ورغم إني كيشة في موضوع فتح البوستات ، لكن والله ده واحد من الأسباب الخلتني فتحت البوست ده.
ياخ يغيظوك لمن تقّرب تبكي.



الناس بتجي تكشف وتتخارج ، طرف السوط هبشهم.

يُرفع .. حراق روح ساي!!

Quote: يُرفع .. حراق روح ساي!!

ما ياهو حراق الروح ده زاتو الخلانا نكتب الكلام ده.
وباعتبارك حريف بوستات أكيد بتكون عارف إنو ده بوست (تقريري)
صعب جداً المشاركة فيه، كل البيجي بيسردب ويتخارج بهدوء
لأنو (صم هاو) اتهبش!!
هذا ما كان من أمر الزول والمكان، أما الإنطباعات الأخرى
فدي قصة تانية ما في وكت ليها هسي، لكن راجع ليها في الويك أيند.

بيني وبينك في زول حرق لي روحي، ووقف لي هنا.




شكراً على (الرفع).

ود البشري
أسمح لي طال عمرك، وأللة ماشفتك
الأيامات دي أخوك مقبوض من جنة الجداد بتاعو
زنقة ستمية.

شفت العالمين ديل متعبين كيف!
لكن بجي أقزقز بيهم نهاية الأسبوع.

Quote: ده بوست (تقريري) صعب جداً المشاركة فيه، كل البيجي بيسردب ويتخارج بهدوء لأنو (صم هاو) اتهبش

آمال حراق الروح دا جا من شنو!!
ما ياهو الـ حراق الروح ولا السردبة!!


مع كامل تضامننا مع (يوركومبو)!

زول يقول لينا الكنته شنو .. !!
بيض وللا جنى جداد وللا الكبه شنو هنا ؟؟
كلو من بكري .. شكيتو علي الله اب صلعة ده .


........
ود الصايم و ود البشرى و ود اب كرنك في حتة واحدة ؟؟
الله يدينا فطور الليلة .

أووووووه العمدة يا

خرمانين والله..
الحواّم عامل له (كِفلِي ودي عكوش) نتكلم كيف نحن.
سِمِّعنا يا.
طوالي أنا زكريا البشحي،ناس إنتو، و دوالجاني، وكودة، وقوس الميد (رزق الله في أبورجيلة) دلع الدلع.


والله يا أخو زي ما قال ليك أخونا دو المايص ، فِرتيقة ساي لي الله سيدي ده.
شفت الاتنين الشفوت الفوق ديل، أحرف من يلعب في كلو.Tom and Jerry
تكتب أي حاجة، عندهم البيقولوه ليك ... كوارث الله يكفينا شرهم..





-----
أنا ود أب كرنك؟؟؟
الليلة كان تلقى ليك فطور.

صلاح
من الحاجات الزعاطه جدا هنا النفخه الكضابه
يعني في ناس فكاها في روحها بطريقه تدعو للشفقه

غايتو ربنا يشفيها ساكت

بالنسبة لي فاذا لم يخصم مني المنبر فهو لم يفدني
كتا قبل المنبر اكتب فيرد على كتاباتي علية القوم من لدن البروف شداد
ومحمد الياس محجوب وعمر البكري أبو حراز وجمال الوالي وأتلقي رسائل المعجبين من الجنسين
وأمش في الشوارع والأسواق والمحلات العامة فتتابعني نظرات الصغار والكبار والأولاد والبنات
بالإعجاب والدهشة..الخ..
والآن في هذا المنبر الظالم أهله نزلت إلى درجة أن أشيل وأدي مع كائنات إسفيرية عجيبة
فيرد علي أمثال جرجير ويغالطني ود القاضي ويصنفي ملطشة البورد المدعو أساسي.
مخير الله بس .

Quote: مخير الله بس .

ونِعم بالله.
والله قلبي معاك يا طلحة ياخ..

لكن الجماعة الإنت قلتهم ديل صعبين شوية، بيطقطقوا من طرف.
إنت ما لقيت غيرهم؟؟
غايتو، نسأل الله أن يجعل كلامك خفيف عليهم.

قلنا نساعد بـ (الرفع)!!

Quote: قلنا نساعد بـ (الرفع)!!

الله يقويك..









-------
إنت أقعد (أرفع) هنا ، وخلي الكيتة المُدوّرة من أمبارح دي تفوتك..