إلغاء زواج إدريس دبي علي كريمة موسى هلال .. طـلقوها

إلغاء زواج إدريس دبي علي كريمة موسى هلال
11 يناير 2012
الخرطوم – هبة محمود – كان من المفترض أن يشهد فندق السلام روتانا بالخرطوم أمس حفل زفاف الرئيس التشادي إدريس دبي على كريمة زعيم قبيلة المحاميد موسى هلال، حيث تم حجز الفندق.. و علمت آخر لحظة أن أسرة العروس قامت بتأجيل الزواج إلى أجل غير مسمى لمزيد من الترتيبات والتحضيرات لاستقبال الضيوف، غير أن مصادر تشادية أكدت أن أسرة الرئيس إدريس دبي قد عقدت اجتماعاً بداية الأسبوع الجاري بانجمينا نصحت فيه الرئيس دبي بالتأني والعدول عن هذه الزيجة بحجة أن والد العروس مطلوب من المحكمة الجنائية الدولية، و قد يدخل القرب منه بالمصاهرة تشاد في مشاكل مع المحكمة الجنائية التي ستطالب تشاد بتسليمه لها كلما زار ها، مؤكدين بأنهم لن يستطيعوا تسليمه باعتبار أنه صهرهم.. ونقل المجتمعون للرئيس دبي اتهام بعض زعماء القبائل التشادية للشيخ موسى هلال بإدارة ما يعرف بالجنجويد في دارفور الأمر الذي سيدخل تشاد في احتجاج من بعض القبائل التي تعتبر أن لزعيم المحاميد دوراً في تأجيج الصراع بدارفور، مشيرين إلى مساندة تلك القبائل للمحكمة الجنائية.

وأوضحت المصادر بأن هذه القبائل تعتقد بأن زعيم المحاميد قد أدخل السودان في مشاكل بسبب ما يعرف بالجنجويد وقد ينقلها إلى تشاد عبر مصاهرته للرئيس، ونفت المصادر عن ما تناقل في الإعلام حول دفع الرئيس دبي 26مليون دولار كمهر للعروس ووالدها، وفي ذات الوقت أكدت أن دبي قدم مبالغ مالية لم تكشف عنها كهدية للعروس وأسرتها، وقطعت المصادر المقربة من الرئيس أنه في حال عدم إكمال الزواج فإن دبي لن يسترد هذه الأموال لأن العروس وأسرتها لم يرفضوا الزيجة، ولكن ظروفاً سياسية وأسرية منعت دبي من الزواج من كريمة موسى هلال أماني خريجة جامعة الرباط.
وأكد زعيم المحاميد والد العروس من قبل أن دبي كان قد زارهم في المنزل في زيارته الأخيرة للسودان ليطلب يد ابنته وأن ابنته قد جلست معه بنفسها ووافقت، مشيراً إلى أن كل الأسرة باركت الزيجة.

ويعتبر طلب دبي لمصاهرة السودانيين الثانية من نوعها حيث تزوج من السيدة سعاد زكريا في العام 1982م، وهي تنحدر من قبيلة الزغاوة، وكانت الزوجة الثانية له ولديه منها أربعة أبناء وهي والدة ابنه عمر الذي سماه علي الرئيس عمر البشير، وتقيم عائلة السيدة سعاد بمنطقة بري فيما يوجد منزلها بمدينة أمدرمان حي المهندسين. وظلت سعاد تنتقل بين منزلها في أنجمينا والخرطوم وتقضي معظم إجازاتها وسط أهلها بالسودان، بعد أن تزوج دبي بعدها أربعة زيجات قبل أن يتقدم لطلب كريمة موسى هلال.

معليش يا جماعة انا عارف انه الخبر ده ما بمستوى سودانيزاونلاين وما مفروض نديه اهتمام وننله في البورد ,, لكين نعمل شنو , كانو قاديننا جماعة المؤتمر الوطني الفترة الفاتت انه علاقة ادريس دبي بالسودان مية المية و انه حا يتزوج بت زعيم الجنجويد!

ده المصدر يا ناس المصادر عشان ما تعملوا اي سييك ميييك
http://www.assudan.net/2012/01/11/4954.html/

واخر لحظة ما قالت رجعوا لى قروشو ولا لا ؟؟

تحياتي أخ أحمد محمد بشير

غايتو العرسة دي كانت وكان من الممكن أن تكون إمتحان صعب جدأً جداً لأطراف عديدة لأن ما قبلها وما بعدها مياه كثيرة جرت تحت الجسور ولأطراف كثيرة!!! برغم أن كل طرف حاول أن يقرأها بما يليه من شأن .

بحيراوي

احمد محمد بشير

كيف حالك... قلت لي جايب الخبر وعامل ساتر

Quote: الخرطوم – هبة محمود – كان من المفترض أن يشهد فندق السلام روتانا بالخرطوم أمس حفل زفاف الرئيس التشادي إدريس دبي على كريمة زعيم قبيلة المحاميد موسى هلال، حيث تم حجز الفندق.. و علمت آخر لحظة أن أسرة العروس قامت بتأجيل الزواج إلى أجل غير مسمى لمزيد من الترتيبات والتحضيرات لاستقبال الضيوف، غير أن مصادر تشادية أكدت أن أسرة الرئيس إدريس دبي قد عقدت اجتماعاً بداية الأسبوع الجاري بانجمينا نصحت فيه الرئيس دبي بالتأني والعدول عن هذه الزيجة بحجة أن والد العروس مطلوب من المحكمة الجنائية الدولية، و قد يدخل القرب منه بالمصاهرة تشاد في مشاكل مع المحكمة الجنائية التي ستطالب تشاد بتسليمه لها كلما زار ها، مؤكدين بأنهم لن يستطيعوا تسليمه باعتبار أنه صهرهم.

بصراحة خبر لا يرقى أن يكون هنا أو حتى في جريدة سودانية
قول لي ليه؟
هو وقت ادريس دبي ده خايف على ضنبو كده
ما ياهو البشير كل شهرين ينفجط ويبرتطع في تشاد
عملوا ليهو شنو ناس الجنائية ......
غايتو بس عرسه وطارت وشيل شيلتك مع بريمه

بـعض من ردود الاخوة القُراء

Quote: والد العروس مطلوب من المحكمة الجنائية الدولية، و قد يدخل القرب منه بالمصاهرة تشاد في مشاكل مع المحكمة الجنائية التي ستطالب تشاد بتسليمه لها كلما زار ها، مؤكدين بأنهم لن يستطيعوا تسليمه باعتبار أنه صهرهم..

تحياتي يا أحمد
يعني الزاروهم قبل كده وكانوا مطلوبين سلموهم؟؟
بقت على موسى هلال.
معناها القصة ما المحكمة الجنائية!!!

Quote: بعد أن تزوج دبي بعدها أربعة زيجات قبل أن يتقدم لطلب كريمة موسى هلال.

الزول دا بفضى للرئاسة متين طيب؟

إن لم يترجع دبي و يكمل زواجه


بذلك تكون أماني موسى هلال اول ضحايا لاهـاي

او شبيحة المجرم موسي هلال، كل.ب، الجلابة، عندهم نفس يشتمو الاخرين في دارفور ك"تشاديين"!

سَمَك لَبَن تَمْرِهندي

و:

يا قلبي لا تحزن

ما اعرفه ان موسى هلال غير مطلوب للجنائية الدولية -- غير ان زعامته لمليشيات الجنجويد كانت ستدخل ادريس دبي في مشاكل مع بعض القبائل الحدودية التي كانت ضحية لمليشيات موسى هلال -- الا في حالة التوصل لاتفاق سلام بين مليشيات موسى هلال وتلكم القبائل ربما كانت المصاهرة عامل تراحم بين الاثنين بعد تسويات تتم بين الطرفين

عموما التصاهر تاريخيا لا يشفع في العمل السياسي لا في السودان ولا في غيره هو سلاح ذو حدين لك او عليك والاغلب عليك مهما بلغت درجة التصاهر والتراحم فالسلطة لا تعرف العواطف ابدا

في دي انا طبعا مع اماني وضد ابيها وزوجها!

لانه دي ما زيجه دي كانت بيعه.

ربنا ينصرها كشابه سودانيه .





اما موسى هلال وادريس دبي

فنقول لهم هذه اول الغيث....
ولسه روح د.خليل ابراهيم حتوديكم جميعا في داهيه!

Quote: كانو قاديننا جماعة المؤتمر الوطني الفترة الفاتت انه علاقة ادريس دبي بالسودان مية المية

يعني علاقة ديبي ولا زناوي ولا أفورقي ولا هو جين تاو بالسودان مشروطة بالزواج من سودانية؟؟؟

Quote: ده المصدر يا ناس المصادر عشان ما تعملوا اي سييك ميييك

سيك ميييك

Quote: معليش يا جماعة انا عارف انه الخبر ده ما بمستوى سودانيزاونلاين وما مفروض نديه اهتمام وننله في البورد ,,

سلام يا محمد
الحمد لله قلتها براك. لكن ياخي حتى لمن تجيب حاجة زي دي نجضها... كيف يكون طلقوها قبل العرس؟

Quote: واخر لحظة ما قالت رجعوا لى قروشو ولا لا ؟؟

دينا خالد همك القروش بس , اسع ما تقولي كفارة للبت ولا حاجة (ولا هو بيقولو شنو اصلا في الحالات دي. بالجد كده بت هلالي دي سمحة وما بتستاهل دبي الشين دة

Quote: غايتو العرسة دي كانت وكان من الممكن أن تكون إمتحان صعب جدأً جداً لأطراف عديدة لأن ما قبلها وما بعدها مياه كثيرة جرت تحت الجسور ولأطراف كثيرة!!! برغم أن كل طرف حاول أن يقرأها بما يليه من شأن .

كلامك صح يا البحيراوي الزواج دة كان لاهداف سياسية بحتة و لكن الله ما اراد.

Quote: كيف حالك... قلت لي جايب الخبر وعامل ساتر

البشاري كيفنك , و الله انا عارف ناس البورد ديل عشان كدة قولتا اعمل ساتر ابتداً من اول مداخلة... انا كنت مفتكر انه مافي زول حيجي يرد على البوست لانه زي ما قولتا الموضوع ما مهم (لكن الناس شكلها بتحب المواضيع الزي دي ) , وبالصراحة إتفاجآتَ بي رودو البورداب ديل

Quote: يعني الزاروهم قبل كده وكانوا مطلوبين سلموهم؟؟ بقت على موسى هلال. معناها القصة ما المحكمة الجنائية!!!

تقول شنو بس يا صلاح عبد الله , اهم ما في العرسة دي انه كشفت ديبي , طلع جبنة ساكت , بعدين زول زي ده ما مفروض يزوجو ليه البت المسكينة دي... غايتو السياسة دي قرف.

Quote: الزول دا بفضى للرئاسة متين طيب؟

ههههههه, و الله علمي علمك يا ابوبكر صالح , دة الشيء المحيرني زاتووو

Quote: إن لم يترجع دبي و يكمل زواجه بذلك تكون أماني موسى هلال اول ضحايا لاهـاي

كيف الكلام دة يا عبد الله احيمر , دة تشريع جديد ولاّ شنو

Quote: او شبيحة المجرم موسي هلال، كل.ب، الجلابة، عندهم نفس يشتمو الاخرين في دارفور ك"تشاديين"!

بشاشا الله يهديك , جلاّبة شنو يا زول , في زول قال تشاد في البوسط دة حسع؟؟ , بس جاري تهبش براك ههههههههه, يا زول ديبي هوّ العمل زوغ بير , هو الانسحب مش ناس الجلابة الانسحبوا, على العموم الحصل دة خير وكويس مع البت المسكينة دي.

Quote: سَمَك لَبَن تَمْرِهندي و: يا قلبي لا تحزن

محمد عبد الرحمن كيف حالك , انا الغايظني يا محمد الزول الصاغ الخبر دة ليه كتب "الغاء" اصلها هي كورة عشان يقول لغوها ؟!, المفروض يكتب تأجيل و اي حاجة.

Quote: عموما التصاهر تاريخيا لا يشفع في العمل السياسي لا في السودان ولا في غيره هو سلاح ذو حدين لك او عليك والاغلب عليك مهما بلغت درجة التصاهر والتراحم فالسلطة لا تعرف العواطف ابدا

صحيح يا اخ محمد حسن العمدة , الزواج كان لاهداف سياسية , ولكن ربنا جعل كيدهم في نحرهم .

Quote: في دي انا طبعا مع اماني وضد ابيها وزوجها! لانه دي ما زيجه دي كانت بيعه. ربنا ينصرها كشابه سودانيه . اما موسى هلال وادريس دبي فنقول لهم هذه اول الغيث.... ولسه روح د.خليل ابراهيم حتوديكم جميعا في داهيه!

يديكي العافية يا تراجي, عبرتي عني تمام , واعجبني تضامنك مع ابنة هلالي المسكينة.

Quote: يعني علاقة ديبي ولا زناوي ولا أفورقي ولا هو جين تاو بالسودان مشروطة بالزواج من سودانية؟؟؟

لا لا الحكاية دي ابدا ما كدة يا كمال فرانكلي , ولا في زول قال انها كدة , الزيجة دي كانت لاهداف سياسية واظن انه جنجويد دارفور هم اللي عرضو على ديبي الزواج من ابنة هلالي , و الله اعلم.

Quote: سيك ميييك

فعلا السيك ميييك حصل يا الفضلابي, الروابط ابت تشتغل اليوم تتخيل! مع انه انا امس طلّعت الخبر دة من نفس الروابط الفوق وعن طريق القوقل , ولكن الليلة ما دايرة تشتغل , حاجة غريبة

Quote: الحمد لله قلتها براك. لكن ياخي حتى لمن تجيب حاجة زي دي نجضها... كيف يكون طلقوها قبل العرس؟

وعليكم السلام اخي العوض, و الله تقول شنو بس, اخوك ما عندو ثقافة في الحاجات دي , المهم كان في خطوبة وما ظبطت , انا ما عارف في الحالة دي الناس بتقول شنو وبتستخدم ياتو مصطلح.

المنبر دة يا جماعة مؤثر جدا , امس الخبر كان منشور هنا في البورد و اخر لحظة وموقع انا سودان , اليوم النت و المواقع كلها منزله الخبر , غايتو يا بكري انت عندك بورد فعّال جدا ومشاهد في كل انحاء العالم :)


عينة من بعض ردود القراء في المواقع الاخرى

ردود من المواقع الاخرى

بعض الردود من المواقع السودانية :)

بعض الردود (المتباينة) منالمواقع السودانية :(

معظم الرؤساء الأفارقة لايعيشون في امان
سواء العسكر منهم أو المدنيين لأنهم متشبثون بالسلطة
وجميعهم يعلمون تماماً أن قصورهم الجمهورية المرفهة يمكن ان تتحول الى كوم رماد
ولولا طيبة الأفارقة وتعاملهم الإنساني الراقي لما وجدت زوجة رئيس افريقي واحد حائمة
فحتى بعد الانقلابات لايصلها أذى حتى من اعداء الرئيس
ويعلم الجميع كم مرة تم حصار هذا الرئيس المعتوه
والمشكلة لايزال يحكم تشاد
تشاد الدولة الأفريقية الجائعة والفقيرة جدا
ومعظم سكانها في بيوت من قش وطين
وكثيرون منهم هائمون في ارض الله الواسعة يبحثون عن رزق في بلاد غير بلادهم
لم يغير شيئا في شاد
بل حتى جوازات السفر كانت تأتي من فرنسا
وفرنسا ان قالت لهذا المعتوه { اعطس } فإنه سرعان مايعطس !!!
وقد تحديت اصدقائي ذات يوم وأنا أرى آلاف الأطفال يهربون عن طريق مطار انجامينا الى فرنسا
وتم قبض فرنسيين لهم باع طويل في ذلك
واخذت صورة بمقاس كبير جدا علفتها على جدار منزلي
وكتبت عليها {ROOTS} يعود من جديد !!!
اي نفس مشاهد جذور رأيناها من خلال الطائرات التي تنقل الأطفال الى فرنسا
لكنها صورة مختلفة قليلاً عن تلك التي قراناها
تحديتهم بأن هذا الرجل سيطلق سراح الفرنسيين
بل سينقلهم بطائرة خاصة الى مطار شارل ديغول
وهذا ما حدث بالفعل !!
هؤلاء القادة وغيرهم لاينامون في امان
حتى لو تظاهروا بذلك
اذن ما الذي يدعو هذه البنت الصغيرة لأن تعيش في رعب
الزواج حق من حقوقها ولاضير في ذلك
لكن 00
لماذا لاتتزوج من عامة الشعب
من ابناء بلدها وقبيلتها وعشيرتها وأهلها
على الأقل يمكنها بعد ذلك ان تستقبل ضيوفهاواهلها في اي وقت يشاؤووون
وتعيش في امان ورغد
وتستمتع بحياتها
صدقني هؤلاء القادة حينما تحدث مصيبة فاول طريقة يحاولون ان يخارجوا أنفسهم
رغم أنه اذا الواحد حكم 40 عاماً
فإنه يعجز عن وضع خطة خلال الأربعين عاماً لهروبه
يعجز والله عن التخطيط لذلك
فكيف بالله يخطط هؤلاء لبناء بلدانهم وأمتهم وشعوبهم ؟؟؟

Quote: ]ده المصدر يا ناس المصادر عشان ما تعملوا اي سييك ميييك

<<<<<<<<<<<<<<<<<<<<<<<
ما دام جبت المصدر يا أحمد ما عندنا كلام .. وصدقناك
والله يديك العافية