يا خازن الأحزان

حلمك مَدمدَم ومِتكى
والليل شرب باقى الدوايه
عطشك مَتاوقة البيوت
تالا البحر
ريقك نشاف الأمنيات
همك ملافات البدايه
نوح الحروف
جمر السفر
لامن مواعيد الحكايه
طارت بعيد
ركت قريب وش القمر
وتِلت التلاتة
الأصلو واحد وانقسم
بلدا كبير
مِرْق المودة الإنكسر
فرحا يدافر ما فتر
روح الكحل
ريحة الحليب
روح الحليب
ريحة الكحل
معطونة فى دم البلد
والطين معاهن منسجم
خَتّ الحلم فوق الهجير
سواهو ضل
لفحة سمومك همبريب
لون الكحل
روح الحليب
ولامِن نشيدك ينصلب
يزعل يفوت يختا الدرب
يحرد يلوّن ليل صفاك
تبقى الريشه نغمة غنيتك
واللوحة تتحدى السكوت
تبراك تصفق بى قفاك
والمعنى شهقات الوتر
فرح الوجيع البشتكى
حلم التراب المتكى

جلد الشدر
ملدوغ رقد
هوى يا بشر
خلو النضم
نادو الفكى
وقصو الأتر
الداهية وين ؟
دخلت جحر حيطة الكلام
ولا اللسان اصبح حجر ؟
حلمك مدمدم ومتكى
دفق محايتك يا الفكى
النمة ترياق الوجع
الغنية مخلاية الوئام
الضحكة مقلاع الفزع
بلدا مِبحلق فى الشمس
حاضن نهارات السؤال
حسًا مصنقع من أمس
ينده تساويف المحال
حلمًا هناك لابس الضيا
بهرج حقيقتك
وإنكسف حد الخيال
ويا طالع الأكوان
جيب لى معاك وصال
يربط يكفينا
يا خازن الأحزان
خلى الوجع ينشال
زح همنا الفينا
أملا المخالى أمان
بلدك بشاره وفال
عرّج على الحبان
خلى المحبة تجى
ترقص مع الموال
وتدى البلد شبال

يا خازن الأحزان

الحبيب أب آمنة .. المطر

الشوق بحر ياخي

انت لسة في جمالك دا
بس الجديد عومك في بحرين
بديت بي بحر أبيض الرقراق
وختمت بي الأزرق الدفاق
وفي الحالتين كلك .. كلك .. حلوو
شغلني الشكل عن المضمون
وتهت في يغني المغني وكل يبكي على ليلاه
بحثت عن ليلاي في حروفك فتوارت ولوحت
بكفها المخضب ثم احتجبت
احتاج لإرجاع البصر كرتين لعلي آتي منها بقبس أو أجد على النار هدى
تحياتي يا أبا الفيض
ومودتي التي تعلم
وأسمح لي بسؤال المشتاق
وييييييين جبران ياخي

أخانا العزيز سنجاوى

وبعد التحايا والترحاب والسلام
نبدا من الختام

واراك هيجت الذكرى
اثرت لواعج الأشجان
وكلما اضاءت الحروف وهلت اقمار الكلام
يخضر حضور شيخنا امام الطيبين جبران

هو جبران براهو نان ؟

عقد فريد انفرط يا سنجاوى
زى حبات مسبحة خضراؤ ونضيرة الملامح
انفرطت واتشتت

مشو ومشينا
لا كمل المشوار ولا الزمن جبد نفسه ووقف ينده معانا

عبد الله جعفر
برضو هو حت كمان
انتبذ ركنه القاصى البعيد وخلانا

بقينا نبرك فى الفقرا وننده

مدد يا ناس فوق
مدد يا ناس فوق

اغيثونا وامطرونا واسقونا

مالك علينا يا سنجاوى ياخ

كدى خلينى هسه النتكرف عبق واريج جيتك دى

النفرح بيك

اصله الفرح بقى ممحوق والله فى ايامنا دى

وتانى غقب بجيك صاد

الحبيب المطر

يا زول طمنتني ماني وحيدي المعبور
وخانقني الشوق لأخوان الصفا وخلان الوفاء
يعلم الله كل فترة بستعين بي عمك قوقل
وافتش عن المحراب لأعانق حروفهم واقالدها
شيخنا جبران والراهب عبد الله جعفر
وحبيبي بناديها وتوأمه السارا أميرة البنفسج
نورا ... صلاح درار.. سودانية .. دريييمز
الرحمابي /.. سماح .. يا حليلهم دوام بطراهم
يعلم الله يا حبيب قبل فترة اتذكرتك واتذكرت
أمحمد زين مكتول أم عيسى وإكرامك لينا
بي بكاهو الما خمج .. وقوقل عامل زي مركبة السفر عبر الزمن ديك
كل ما هاجت الذكرى بنقرات كيبورد يرجعك كم سنة لي وراء للزمن الأخضر
قبل دكتاتورية ساس يسوس فهو ممسوس وقبل عواصف العنصرية النتنة
التي شاكلت الرماد .. كان شالوا ما بنشال .. وكان خلوا سكن الدار
إيييييييييه يا حبيب .. الليل قسم .. و2011 في آخر يوم فيها فجعتنا بخطف حبيب
لذا تجدني تايه الخطى .. مخمور العبارة .. مضطرب العاطفة
اقتبس مني واقول :
إلا في آخر خطابي
كل قصدي أقول فراقكم سر عذابي

الله على الوجع النبيل
الله على الدمع البرف
على الالم النزيف
على كلامك البوجع ياخ

اتمنى ان يعود هذا العام على الوطن بالخير وينسدل اخر ستار للاحزان

كيفنك يا سلمى

سلام ليك وعليك
واريت حالك زى ما بتتمنى وتشتهى

ان شاء الله

ومن خشمك ولى الله

ينعدل حال البلد وينصلح حال الناس

عزيزى السنجاوى

وزى ما جاء فى أثر الشعر

لكل شئ اذا ما تم نقصان

أو كمان زى ما بقول اهلنا
كل اول لهو آخر

نقعد نحن "نتشعلق" فى بدايات الأشياء بى يد واحدة
وبالتانية نراود فى النهايات عن نفسها الأولى

نتشبث بحبال الذكرى الأوهن من حبل العنكبوت داك واقرب من حبل الوريد

نغنى للشموس وندوبى للنجمات
علنا نفوز بشوية ضوء ونور وحبة فرح نستعين بيه على وعثاء الغياب
ويخدر لينا شوية حيضان وتقانت فى واطاتنا اليباب

وبكل تداوينا

باقى لى مافى شى فضل غير العلاج اللخرانى داك

الجرحو نوسر بى
غور فى الضمير
فوق قلبى خلف الكى
يا ناس الله لى

خلينا نمشى يا صاحبى فى درب التلاقى
والسايقه واصله

وكان حيينا بنلاقى اؤلئك القوم الجميلين

وعساك انت بخير وعافية وسعادة

العزيز جد

ابوذر
برضو العائد سنجاوي

الشوق مليون

وكدي يا ابوذر خليك في البوست دا مواصل يمكن الباقين يجو

وبرض يا خازن الاحزان

ويذات الحلم القديم

زي ما انت!!!!!!!!!!!!

مادام طريقك لي سفر
وحلمك مدمدم ومتكي
يبقي الحلم رجع السراب
الجاي من وجع العتامير
التشابي علي المطر
والدنيا صيف
لفح السموم
عطل مقاديف المراكب والشدر
لا غيم يضل
شوق الارض
للجاي باكر
من سفر
لا ضحكة
لا كبة دموع
شان خاطر
الولد البناتق للرجوع
ياقلبي هوي
فترت خيول احلامنا
من شيل الغنا
المليان بكا
ياربي من جودك
فرجك مطر
تغسل خطاوي الرجعة
من تعب البهادل والسهر
يالله من كرمك مطر

الود اقصاه ياصديقي

عبد الله جعفر

يا مطر..

كتر رزازك ياخي..

ما ممكن ابداع زي (خازن الاحزان) تكون في صفحة 7

ياخي كلمة ابداع ما كفاية ..

كلام بدوزن عصب الروح..

شكرا يا مطر شكرا ياخ