Post: #1
Title: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 02:23 PM
Parent: #0
تعال يا الجيت مدفور بفضولك ..
وما تستغرب كلامي الجاي ..
اصلاً انا قاعدة في بيت غريب وعجيب ...
فيهو الشئ وضد الشئ ...
خت اضانك واسمعني ...
اعتراف رقم (1)
انا شيوعية ضلامية ...
وحبيبي كوز مستنير ...
في الصباح بنحفظ قرآن ...
وبالليل بنقرا لينين ...
أبوي بيموت في الاتحادي ...
واخوي عمو البشير ...
اختي حزب امة ...
وأمي صوفية جد ...
جارنا جمال المسيحي ...
واخته رجاء أسلمت ...
لوال صديقي الجنوبي ..
وميري خطيبة محمد ...
وحوشنا لسة ملان ...
|
Post: #2
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: هجو الأقرع
Date: 05-28-2007, 02:36 PM
Parent: #1
اختنا الكريمة يا هو ده السودان ، جمعكم الله على خير.
|
Post: #3
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: احمد التجانى احمد
Date: 05-28-2007, 02:40 PM
Parent: #1
وفطورنا عصيدة باسكالوب
وعشاءنا بيتزا بويكاب
|
Post: #4
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 02:45 PM
Parent: #1
اعتراف رقم (2)
جيراننا ومعانا في نفس الحوش ...
أدروب ود بت حسونة ..
بيشتكي انو مهمش ...
ومجذوب ود سيد البلد... عامل منو مطنش ..
هارون بيحب المشاكل ...
واسحق زولاً مسالم ...
وجمعة الولد المشاتر .. حالف يكاوي العساكر ...
مشاعر بت جد لذيذة ... بس بتحب المظاهر ...
ومناهل ديك الرقيقة ...زمانا كلو تعافر ...
شايلة هم الحبايب ...وحايمة تجبر الخواطر ...
أميرة بتاعت المشاكل ...
تحب تباري الجداد ..وتنبش كوش الدفاتر ...
تكورك ... تضارب .. تناهد ...
بس عشان تثبت وجودها ...
وفي غمرة صراخها .. بتنسى وجودها ...
بتنهي وجودها ...
والحوش لسة ملان .... بالحبان والجيران ...
|
Post: #5
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: محمد فرح
Date: 05-28-2007, 02:48 PM
Parent: #1
أخت سناء لك التحيه
ومعاً لبناء مجتمع تتسع صدور أفراده لكل ألوان الطيف السياسي والعرقي والديني
نحن مجتمع متباين متعدد الأعراق والثقافات والأديان والأفكار وهذا الطيف الجميل شكل طوال الحقب الفائته شكل هذا السودان هذه التعدديه أصبحت مصدر ضعف لنا بدلاً من أن تكون مصدر قوة وتفرد ...
فلتتسع قلوبنا وصدورنا لبعضنا البعض حتى نتمكن من المضي قدماً بهذا الوطن ولننسى كل آلام وأحزان وجراحات الماضي وراء صدورنا ...
مؤونة عام من الود
|
Post: #6
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: GamarBoBa
Date: 05-28-2007, 02:53 PM
Parent: #5
لك التحية
ومعا من اجل ذلك السودان...وطن يتسع للجميع
|
Post: #7
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 02:57 PM
Parent: #1
| Quote: اختنا الكريمة يا هو ده السودان ، جمعكم الله على خير. |
الاخ الكريم هجو الاقرع ...
فعلا حوشي دة السودان بكل الوانه واطيافه وملله ... ربنا يجمعنا على الخير ويبعد عننا طيوف الشر ...
|
Post: #8
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: abubakr
Date: 05-28-2007, 03:03 PM
Parent: #1
سناء
سلام....
|
Post: #9
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: Deng
Date: 05-28-2007, 03:03 PM
Parent: #1
الاخت سناء.
عبابيرنا وين؟
دينق.
|
Post: #15
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 03:43 PM
Parent: #9
Quote: الاخت سناء.
عبابيرنا وين؟
دينق. |
الاخ الكريم دينق ...
تحياتي ..
لكن والله كلمة عبابيرنا دي ما فهمتها !!!
وريني معناها عشان ارد عليك مشت وين ...
|
Post: #10
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 03:03 PM
Parent: #1
الاخ احمد التجاني احمد ...
اصبحنا بلد ملئ بتناقضات محيرة ...
واصبحنا شعبا يتنفس التناقض في كل الامكنة ...
|
Post: #11
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 03:20 PM
Parent: #1
Quote: أخت سناء لك التحيه
ومعاً لبناء مجتمع تتسع صدور أفراده لكل ألوان الطيف السياسي والعرقي والديني
نحن مجتمع متباين متعدد الأعراق والثقافات والأديان والأفكار وهذا الطيف الجميل شكل طوال الحقب الفائته شكل هذا السودان هذه التعدديه أصبحت مصدر ضعف لنا بدلاً من أن تكون مصدر قوة وتفرد ...
فلتتسع قلوبنا وصدورنا لبعضنا البعض حتى نتمكن من المضي قدماً بهذا الوطن ولننسى كل آلام وأحزان وجراحات الماضي وراء صدورنا ...
مؤونة عام من الود |
اخي الكريم محمد فرح ...
اصبح التعايش وتقبل الاخر حلما صعب المنال ...
وكل يوم يتزايد رفض كل منا للاخر ... لسبب او لاخر ...
المشكلة ليست في تعدد الاعراق والثقافات والاديان والافكار ...
الهند خير مثال لبلد يضم مئات الملل وما زال يعيش بسلام نسبي منذ زمان طويل ...
اذن المشكلة فينا نحن ...
والله لا يغير ما بقوم حتى يغيروا ما بانفسهم ...
وفعلا اتمنى ان تتسع قلوبنا وصدورنا لبعضنا البعض كي نخطو اول خطوة في طريق التعايش ...
|
Post: #12
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 03:26 PM
Parent: #1
Quote: لك التحية
ومعا من اجل ذلك السودان...وطن يتسع للجميع |
الاخ الكريم القمر بوبا ...
لك التحية ومعا من اجل ذلك السودان ... وطن يتسع للجميع ...
|
Post: #13
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 03:32 PM
Parent: #1
ابوبكر ...
سلامات كتاااااااار ...
تخريمة ..
انت المداخلة دي كتبتها وين ؟؟؟
زي المواعيد دي انت في العربية واقف في عز الزحمة ولسة ما وصلت البيت ...
|
Post: #14
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: أبو الحسين
Date: 05-28-2007, 03:34 PM
Parent: #1
بت العم سناء جعفر...
من أبي الحسين سلامات ندية...
هو حقيقي زي ما قال شاعرنا السر عثمان الطيب...
وطن واحد .. وطن واعد
وطن واعـــد .. بغنِّيلو
موحَّد .. والمصير واحد..بغنِّيلو
وطن من كسلا للفاشــر ** وطن من نمولـي لي حلفا
وطن بالوحدة يتعافــى ** ربوعــــــــــو تعمهــا الإلفــة
يقيف ناهض على حيلـو
شمالو البي الجنـوب قـوَّة ** جنوبـو مع الشمال خُوَّة
غربـو ال للشــــرق يهوى **وشرقو مع الغـرب يقوى
سلام .. .. والناس تناديلو
وطن ما فيهو قبليـــــة ** ولا نزعــــــــــــة إنفصاليــة
وطن زنجيتو عربيـــــة ** وعروبتو السمــــــرا زنجيــة
سوا سوا .. كلُّو حريـة
سوا سوا يا بجــة ونوبة ** سوا سوا .. فور وشايقيـة
مسيرية وشلك ، دينكــا ** سوا سوا زانـــدي ، لاتوكا
وطن حق كل زول .. هولو
سوا سوا صحرا والغابة ** سوا سوا وحـــــدة نرضابا
سوا سوا نخلة وابنوســة**روا روا فوق ضفــاف نيلو
وطن واحد .. ولا غـيرو ** جميــع نتهنى بـي خيــرو
نغــني مع عصافيـــرو ** وننقـــرش فـي طنــابــيـرو
نصفق له ونراقصو نشيل شبابيلو
ـــــــــــــــــــــــــــــــــــــ
عبرك أرسل التحايا النواضر والدعوات بالصحة والعافية لشاعرنا السر عثمان الطيب نبض الشارع السوداني...
ولك قواسيب مودتي...
أبو الحســـــــــين...
|
Post: #17
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 04:11 PM
Parent: #14
Quote: بت العم سناء جعفر...
من أبي الحسين سلامات ندية...
هو حقيقي زي ما قال شاعرنا السر عثمان الطيب...
وطن واحد .. وطن واعد
وطن واعـــد .. بغنِّيلو
موحَّد .. والمصير واحد..بغنِّيلو
وطن من كسلا للفاشــر ** وطن من نمولـي لي حلفا
وطن بالوحدة يتعافــى ** ربوعــــــــــو تعمهــا الإلفــة
يقيف ناهض على حيلـو |
الاخ الكريم ابو الحسين ...
اول شئ ربنا يدي شاعرنا السر عثمان الطيب الصحة والعافية ...
ونتمنى انو كلامو السمح يتحقق ...
وحية ومودة ليك وليهو ....
|
Post: #16
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: ismeil abbas
Date: 05-28-2007, 03:47 PM
Parent: #1
ألأخت/سناء
ما أروع السودان........كنا لا نعرف نفرق بين ألأجناس ...ونفرق بين المسلم والمسيحى..........
أصدقائى كانوا مسحيين...عاطف دينق جابريل ونعيم جون عبدالمسح وكانوا بفطروا معانا فى رمضان حياة جميلة مافيها إنت منو ولا شنو....
السودان يسع الجميع
إسماعيل محمد أحمد عباس.....................أم درمان
|
Post: #18
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 04:21 PM
Parent: #16
Quote: ألأخت/سناء
ما أروع السودان........كنا لا نعرف نفرق بين ألأجناس ...ونفرق بين المسلم والمسيحى..........
أصدقائى كانوا مسحيين...عاطف دينق جابريل ونعيم جون عبدالمسح وكانوا بفطروا معانا فى رمضان حياة جميلة مافيها إنت منو ولا شنو....
السودان يسع الجميع
إسماعيل محمد أحمد عباس.....................أم درمان |
الاخ الكريم اسماعيل عباس ...
انا اتربيت في حلة بيت مسيحي وبيت مسلم ... زميلتي في المدرسة من الجنوب الحبيب ... وصاحب اخوي اسمه مرسي من البقارة ...
اتعودنا نقبل بعض ونتعايش مع بعض بدون تفكير ...هسة الوضع اختلف ... ظهرت نعرات حتى بين الملة الواحدة .. واختلافات بين الدين الواحد ... اتبدلت افكار ... اتغيرت طباع ...
وما محتاجين نمشي بعيد ... سودانيز اون لاين مثال لوطن صغير ... وفيه كل محاسن ومسالب الوطن الكبير ... فيه الود والاحترام .. وفيه التعصب والعنصرية وعدم التسامح وعد القبول ...
يا ربي احنا ماشيين على وين ؟؟؟
|
Post: #19
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: abubakr
Date: 05-28-2007, 04:23 PM
Parent: #16
Quote: انت المداخلة دي كتبتها وين ؟؟؟
زي المواعيد دي انت في العربية واقف في عز الزحمة ولسة ما وصلت البيت ... |
وفي اكتر من المعينات الاليكترونية الصغيرة والمتحركة وووووو الايام دي ؟ دبي دي ما كلها هووت زوون ؟
____
في خلال العام الذي صرت فيه عضوا نشطا او علي الاقل اقرء رغم انني مسجل منذ 2001 (بداية اولية للمنبر) فلقد عرفت اشياء كثيرة وتعرفت باناس طيبين وصار لي اصدقاء واسرة اسفيرية سعيد بها وكذلك تعرفت علي تعابيير كثيرة بعضها فهمتها بعد فترة وبعض لم اعرف لها معني محدد وعلي راسها "ظلامي /ية " او "ضلامي/ية " وللان لا اعرف كيف يكون الانسان ظلامي او ضلامي هل يسكن الظلام ام يسكنه ام يظلم المكان وفي كل الاحوال الغاء لروح وعقل وعاطفة ...عاصرت منذ ان كنت تلميذا في الاولية الي ان تخرجت وعملت انواع الاختلافات السياسية بين يسار ويمين كعضو فاعل او مراقب ..الخ ولكننا كنا نسمي الاشياء باسماءها ولا نحتاج في صراعاتنا السياسية الطلابية ثم العام الي تورية وجناس ..كان الشيوعي شيوعي والاخو مسلم اخو مسلم وكان الصراع وفق المسميات الواضحة اما التعبير ظلامي او ضلامي فلا يبين شيئا لا فكرا ولا توجها فيمكن يسار ظلامي ويمكن يمين ظلامي كما اقرء هنا وبالتالي هو تعبير عائم لا يفيد في توضيح الاشياء....
وددت لو ان اختلافاتنا الفكرية وتوجهاتنا السياسية طرحت بوعي وخطاب انساني يمكننا من البحث في هذه الخلافات فلقد صار لهذه الخلافات نتائج سيئة وقاهرة من اعدامات وتعذيب واهانة وقهر وقتل عشوائي ومجاعات وتفريغ اراضي وبلاد من اهلها وكوارث لا حصر لها ..التعابير مثل "ظلامي" لا تساعد في طرح الخلافات بمعني ونقاشها بوعي ....
انا ضد كل هذه التعابير الهلامية .. دعنا نسمي الاشياء باسمائها لنكون صادقيين واعيين بها لا ان نزيدها غموضا والبلاد في محن والوقت يجري والخسائر تزداد فكل خسارة لاي جانب هي خسارة عامة ومن يظن غير ذلك واهم ..
____________________
حاشية :
سنوية ... معليش اوع نكون طلعنا برة ظلامياتك
|
Post: #20
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 04:25 PM
Parent: #1
اعتراف رقم (3)...
وما زلنا في الحوش ... ووسط الجيران ....
عمي حسين وهابي اصيل ...
وولده الزين بتاع ربة عديل ...
بته الروضةبتحب المقيل ..
في قبة شيخها ود عقيل ...
|
Post: #21
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 04:48 PM
Parent: #1
اعتراف رقم (4) ...
خالي العبيد.. سلفي شديد ..
جنو فتاوي صعبة وغريبة ..
يجي صباح يكفر زول ...
وتاني صباح يزندق زول ...
لكن ..
مرة سمعته ...
بيدندن سراً ...
اغاني الحقيبة ...
اخوهو المكمل مشاكس عنيد ...
غرامو الوحيد ...
يقعد في علاهو ... ويقسم البشر ...
دة كوم اسياد ... ودة كوم عبيد ...
واقعدوا لسة ... النوصف ليكم باقي ناس بيتنا ...
|
Post: #22
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: Deng
Date: 05-28-2007, 06:04 PM
Parent: #1
Quote: الاخ الكريم دينق ...
تحياتي ..
لكن والله كلمة عبابيرنا دي ما فهمتها !!!
وريني معناها عشان ارد عليك مشت وين ... |
الاخت سناء.
ما بتعرفي العبار وعبابير في حالة الجمع.
العبار هو إناء خاص يتم به شراب ألذ المشروبات.
دينق.
|
Post: #23
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 06:14 PM
Parent: #1
Quote: حاشية :
سنوية ... معليش اوع نكون طلعنا برة ظلامياتك |
ابوبكر ...
حنرجع ونتناقش بعمق في المصطلحات الجديدة الطلعت من خانة التعابير الوصفية وبقت تهمة او تصنيف ...
صبرك علي شوية ... وانت جوووووووووووووة ظلامياتي ...
|
Post: #24
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 06:19 PM
Parent: #1
Quote: الاخت سناء.
ما بتعرفي العبار وعبابير في حالة الجمع.
العبار هو إناء خاص يتم به شراب ألذ المشروبات. |
الاخ دينق ..
المعلومة جديدة لنج ... معليش اختك بت خرتوم ساكت ...
تحياتي ...
|
Post: #25
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: Deng
Date: 05-28-2007, 06:23 PM
Parent: #1
Quote: الاخ دينق ..
المعلومة جديدة لنج ... معليش اختك بت خرتوم ساكت ...
تحياتي ... |
يا سناء.
وفي أجمل من عبابير الخرطوم.
يا حليل الخرطوم بالليل.
دينق.
|
Post: #26
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: هاشم أحمد خلف الله
Date: 05-28-2007, 06:57 PM
Parent: #25
سناء جعفر سلام في حضرة السودان , سلام في داركم العمران سلام في روبي ام درمان سلام شايل هموم
الناس كل الناس وليك بالذات سلام مليان .
إنتِ عارفة يا سناء في ساعات كده الواحد لازم يصرخ ويخرج ما في دواخلو أكيد حايرتاح شديد وكمان
يريح معاهو الناس وإعترافاتك فيها محبة وحنية فيها شعور بالإنسانية , تسلمي يا سناء وشكراً .
|
Post: #28
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: magdi elmahi
Date: 05-28-2007, 07:41 PM
Parent: #26
سناااااااااااااااااااء
يارائعه
ان شاء الله مانصحى ونقول اللهم اجعله خير
ولك عبق التحايا
مجدى
|
Post: #44
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: مجاهد عبد الرحمن
Date: 05-30-2007, 12:29 PM
Parent: #25
دينق
أبعد من البت ما تفسد قاموس لغتها بمفرداتك النجسة دي
شوف واحد مستنير حلمان إنو في العمليات
بالعدم شوف بريمة
عبابير قال
قوم لف
التحية لأبوعاج الذي وقف الإزعاج
وهدم الخمارة
وصيع السكارى
وأهدى للحيارى
إلى دين الحق
|
Post: #27
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-28-2007, 07:37 PM
Parent: #1
اعتراف رقم (5) ...
جدي قال امنجي ..
ما بيعرف غير يمشي ويجي ...
في دروب الانكسار ...
مهمته المقدسة ..
يكتب للجماعة تفاصيل مفصلة .. مدنكلة .. مدبجة ...
عن احوال الكبار .. والعاب الشفع الصغار ...
الليلة اصبح جدي محتار ...
ما لاقي كلام يتقال في التقرير البيولد الدولار ...
فكر ... فكر ... فكر ...وفي النهاية اختار ...
جدي كتب تقرير عن حبوبتي ام الجهال ...
قال انها زولة ممغوسة وشايلة للحكومة التار ...
وانها بتحرش الثوار ...بتولد الاخيار وتقتل الاشرار ...
وانها اخطر عميل عرفته الامصار ...
اوصى بسجنها وضربها بالنار ...
كانت ضربة معلم بسيف بتار ...
ربج جدي وقبض الدولار ...
خلص من حبوبة ست التار ...
وعرس ميمونة العمرها فوق العشرة بسبعة قصار ...
ولسة مشاكل الحوش ما خلصت ...
بس انا نعست وباحكي ليكم الباقي بكرة ...
|
Post: #29
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: bayan
Date: 05-29-2007, 01:42 AM
Parent: #27
Quote: اعتراف رقم (5) ...
جدي قال امنجي ..
ما بيعرف غير يمشي ويجي ...
في دروب الانكسار ...
مهمته المقدسة ..
يكتب للجماعة تفاصيل مفصلة .. مدنكلة .. مدبجة ...
عن احوال الكبار .. والعاب الشفع الصغار ...
الليلة اصبح جدي محتار ...
ما لاقي كلام يتقال في التقرير البيولد الدولار ...
فكر ... فكر ... فكر ...وفي النهاية اختار ...
جدي كتب تقرير عن حبوبتي ام الجهال ...
قال انها زولة ممغوسة وشايلة للحكومة التار ...
وانها بتحرش الثوار ...بتولد الاخيار وتقتل الاشرار ...
وانها اخطر عميل عرفته الامصار ...
اوصى بسجنها وضربها بالنار ...
كانت ضربة معلم بسيف بتار ...
ربج جدي وقبض الدولار ...
خلص من حبوبة ست التار ...
وعرس ميمونة العمرها فوق العشرة بسبعة قصار ...
ولسة مشاكل الحوش ما خلصت ...
بس انا نعست وباحكي ليكم الباقي بكرة |
انت ما مجنونة جن عديل وجنك مصرم في فتيل وبالع حبوب المسكنة..*
________
من قصيدة لعبس المعهدي...
|
Post: #30
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: محمد أبوالعزائم أبوالريش
Date: 05-29-2007, 05:32 AM
Parent: #1
الأخت سناء
| Quote: يا ربي احنا ماشيين على وين ؟؟؟ |
لو عرفنا الإجابة على السؤال دة ... نكون قطعنا نص المشوار.
الناس العايزيننا نحس إنهم جايين من دنيا تانية عاشوا معانا في حوارينا، ودرسوا معانا في نفص الفصل ... وإتشابكت يدينا وإتلاقت في صحن الطلس المليان فول. ....... وفجأة قالوا ده مسلم .. وده كافر .. وده زانداوي .. وده غرابي .. ده بيجاوي. مش ياهم نفسهم "مرقص" و"لوال" الكنا بنتنافس في الفصل في الأكاديميات ... وفي الفسحة في حب الهلال والمريخ؟
واصلي إبداعك .. وكل واحد فينا حيلقى نفسو في لوحتك الواقعية.
دمتي
|
Post: #31
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: ABU QUSAI
Date: 05-29-2007, 05:51 AM
Parent: #30
Quote: واصلي إبداعك .. وكل واحد فينا حيلقى نفسو في لوحتك الواقعية.
|
|
Post: #32
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-29-2007, 05:35 PM
Parent: #1
Quote: إنتِ عارفة يا سناء في ساعات كده الواحد لازم يصرخ ويخرج ما في دواخلو أكيد حايرتاح شديد وكمان
يريح معاهو الناس وإعترافاتك فيها محبة وحنية فيها شعور بالإنسانية , تسلمي يا سناء وشكراً . |
الاخ الكريم هاشم احمد خلف الله ...
تعرف لو ما كنت طلعت صراخي دة ...
كنت اتخنقت بيهو ...
هسة انا معاكم مرتاحة لاني قلت الجواي ... ولانكم قبلتوهو ...
|
Post: #33
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-29-2007, 05:38 PM
Parent: #1
Quote: سناااااااااااااااااااء
يارائعه
ان شاء الله مانصحى ونقول اللهم اجعله خير
ولك عبق التحايا
مجدى |
مجدي يا اخوي ... انت عاوز تصحى ؟؟
والله انت زاتي عاوزة اصحى واقول اللهم اجعله خير ...
|
Post: #34
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-29-2007, 05:41 PM
Parent: #1
| Quote: انت ما مجنونة جن عديل وجنك مصرم في فتيل وبالع حبوب المسكنة..* |
بينونة ... ازيك ... كيف الصحة يا اختي ؟؟؟
معليش اليومين دي مخاصمة الماسنجر .. لكن ليك وحشة والله ...
تحياتي ...
|
Post: #36
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: waleed500
Date: 05-29-2007, 05:48 PM
Parent: #34
تحياتى سناء
لقد اسعدنى البوست ده كثيرا
|
Post: #35
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-29-2007, 05:48 PM
Parent: #1
| Quote: الناس العايزيننا نحس إنهم جايين من دنيا تانية عاشوا معانا في حوارينا، ودرسوا معانا في نفص الفصل ... وإتشابكت يدينا وإتلاقت في صحن الطلس المليان فول. ....... وفجأة قالوا ده مسلم .. وده كافر .. وده زانداوي .. وده غرابي .. ده بيجاوي. مش ياهم نفسهم "مرقص" و"لوال" الكنا بنتنافس في الفصل في الأكاديميات ... وفي الفسحة في حب الهلال والمريخ؟ |
ابو الريش ...
تعرف المخيف في الموضوع دة شنو ؟؟؟ انو طلع فجاة زي نبت شيطاني وبدا يمد فروعه في كل مكان ...
لغاية زمن قريب كانت الناس بتستحي تقول الكلمات دي بصوت عالي ... كانت بتقولها همسا ...
هسة بقت زي موضة كدة ... نقولها بصوت عالي شديد .. وكل ما يعلى الصوت يتدق مسمار جديد في نعش بلدنا ...
وتاني بسال ... يا ربي احنا ماشيين لوين ...
|
Post: #37
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-29-2007, 05:52 PM
Parent: #1
الاخ الكريم ABU QUSAI
يا زول حوشي دة حتلاقي فيهو العجب .. انت بس خليك جوة ...
|
Post: #38
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-29-2007, 05:54 PM
Parent: #1
Quote: تحياتى سناء
لقد اسعدنى البوست ده كثيرا |
تحياتي وليد ...
واسعدني حضورك اكثر ...
|
Post: #39
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-29-2007, 05:59 PM
Parent: #1
اعتراف رقم (6) ...
حبيبي بيكره اخوي ...
اختي خاصمت ابوي ...
امي بتنق في رجاء ...
ومحمد بينافق لوال ...
ميري لبست حجاب ...
مشت بيهو الكنيسة .. بس عشان ترضي محمد ...
ادروب مصاحب هارون ...
جمعة مقاشر مجذوب ...
نفيسة عرست جورج ...
وانا قلت الروووووووووب ...
|
Post: #40
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-29-2007, 06:12 PM
Parent: #1
اعتراف رقم (7) ...
حبيبي شاكل اخوي ...
ضربه بلسانه وشتت كرامته شتات ...
اخوي لم ناسو .. وشال ليهو سيخة ...
وداك لم كوموا ... وضبحوا الكديسة ...
وكبـــرت المشاكــــل...
طــالت العــروض ...
وكــسرت العهـــود ...
بحرمة الكلام ... في اسرار البيوت ...
قل الانسجام ...
ضاع الاحترام ...
وقعت الحيطان ...
وبقينا فرجة للعيان ...
بقينا فرجة بالمجان ...
في السما الحيران ...
اتجمعت عقبان ...
منتظرة لحظة ضعف ...
لحظة سقوط انسان ...
شان تبدأ تنهش لحمو ...
احي يا حوشنا ...
ناسك فقر بالحيل ...
فعالهم تهد الحيل...
وتشمت العزال ...
احي يا حوشنا ...
ناسك نسوا الخوة ...
وطلعوا لجوة ...
حاربوا الحشمة ...
وهتكوا عرض الستر ..
احي يا حوشنا ...
ناسك بيعملوا طمام ...
ولسة الحوش مليان ... بس خلوني امص ليمونة تودر الطمام من بعض اخواني ... وبعض اعمامي .. وبعض خيلاني ... وبعض اصحابي ...
بجيكم راجعة ... استنوني ...
|
Post: #41
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: wesamm
Date: 05-29-2007, 06:40 PM
Parent: #40
نوع الكلام بريح الكيزان المجرمين ود نوع اختلاف الرأي لايفسد للود قضية والكلام الفارغ دا
عشان كدة جوك الكيزان يتجارو مهللين ومبشرين شوفو الناس الفوق الردايين ليك كلهم مطبليين للنظام الانقاذ
الحساب والقصاص لكل المجرمين مطلب اساسي ولا لتميع الصراع بمثل هذه المواضيع
وشوفتي ليك في كوز مستنير
ولو انت ظلامية تبقي ماشيوعية اساسا!!!!!!!!
|
Post: #42
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-30-2007, 12:14 PM
Parent: #1
Quote: نوع الكلام بريح الكيزان المجرمين ود نوع اختلاف الرأي لايفسد للود قضية والكلام الفارغ دا
عشان كدة جوك الكيزان يتجارو مهللين ومبشرين شوفو الناس الفوق الردايين ليك كلهم مطبليين للنظام الانقاذ
الحساب والقصاص لكل المجرمين مطلب اساسي ولا لتميع الصراع بمثل هذه المواضيع
وشوفتي ليك في كوز مستنير
ولو انت ظلامية تبقي ماشيوعية اساسا!!!!!!!! |
الاخ الكريم وسام ...
انا اقتنعت تماما انو اختلاف الرأي بيفسد كل قضايا الود ...
المهم في الموضوع اني ما عندي صراع مع اي زول ... لاني ما بانتمي غير لنفسي ...
يعني بصريح العبارة .. لا كوزة ولا شيوعية .. ولا حزب امة ولا اتحادية ...
ولو كنت بانتمي لاي جهة مذكورة اعلاه عن قناعة ... كنت باعلنها على الملا ... لانو المسالة قناعات ما مجاملات ...
وكلامي ما تمييع صراع ... دي رؤية شخصية لوضع حسب ما انا شايفاهو ...
وانا قصدت اعكس الالفاظ المتداولة .. يعني ما كتبتها بالغلط .. ولا سهيت .. ولا نسيت ... ولا غبيت ...
لكن اقول ليك كلام ؟؟
في رائي الشخصي ... وصف انسان بالظلام او الاستنارة وصف غريب ...
هل مفترض دواخل الانسان تتحدد بانتماؤه السياسي والحزبي ؟؟؟
صدق او لا تصدق ... في الدنيا دي في ناس كتار جواهم اسود من جناح الغراب .. لكن ما عندهم اي انتماء حزبي ...
وفي ناس شايلة جواها النور ... وبرضو من غير انتماء حزبي ...
دي اوصاف بعض الناس ابتدعوها وصدقوها ...
ظلامي ومستنير ؟؟!! كلمات ما بتحمل الا معناها اللفظي فقط ... ولا يمكن تجسد رؤية انسان ...
وزيها اوصاف تانية كتيرة ..
اديك مثال ؟؟؟
ولا مافي داعي .. ما البورد حافل بالكلمات الطلعت من صفتهااللفظية المعروفة وبقت تهمة او شتيمة ...
العاوزة اقوله ليك يا وسام ...
انا كافرة بالانتماءت الحزبية بكل اشكالها والوانها ...
لكن باحترم خيارات البشر ... وباتعامل مع اي زول باعرفه وعنده انتماء بدون تحيز وبدون تحفز ...
عندي اصدقاء اعزاء جدا جدا ... وشيوعيين ...
مقتنعة بيهم زي ما هم ... وباحبهم زي ما هم ...
عندي اصدقاء اعزاء جدا جدا ... و كيزان ...
مقتنعة بيهم زي ما هم ... وباحبهم زي ما هم ...
عندي اصحاب مسيحيين .. اتربيت معاهم واكلت اكلهم وحضرت اعيادهم ...
وبرضو مقتنعة بيهم وباحبهم زي ما هم ...
عارف ليه ؟؟؟
لاني ما باحدد تقبلي للناس بطريقة تفكيرهم ... ولا باحاكمهمم على اختيارهم ...ولا باصنفهم حسب الدين ...
ودة الموضوع بكل بساطة ...
وخليك قاعد جوة الحوش ...
تحياتي ...
|
Post: #43
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-30-2007, 12:20 PM
Parent: #1
وصلنا وين ؟؟؟
احنا لسة جوة الحوش ...
الود عارف اخو عمي التوم ... قاعد عاطل ...
حايم من فجة لفجة ...
وفي كل مكان بيخت عنوان ..
( داتا) جديدة ولقب رنان ...
هنا فاهم ...
هناك إنسان ..
وفي مكان تاني سيد الوجعة وحامي الحميان ...
يكب بيجاي حبة نقة ...
ويمشي هناك يخت السم مدسوس ومغتى ...
عامل فيها ابن الفارض ...
وين ما يكون قاعد ينظّر...
فلان ما بفهم !!!
فلانة حمارة !!!
داك غبي !! ... وديك غبيانة !!!
وهو المعجم ... هو العلامة ....
|
Post: #45
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: مجاهد عبد الرحمن
Date: 05-30-2007, 12:33 PM
Parent: #43
تعرفي يا سناء
تحياتي لك
ولهذا الحوش السودان
وعسانا نصوغ حياة ملئها الحب كما في الحوش
أما
اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
أقول ليك
انت جميلة في كل حالاتك
بس خليك كدا
مودتي
|
Post: #47
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: علي محمد علي
Date: 05-30-2007, 12:43 PM
Parent: #45
Quote: وطن ما فيهو قبليـــــة ** ولا نزعــــــــــــة إنفصاليــة
وطن زنجيتو عربيـــــة ** وعروبتو السمــــــرا زنجيــة |
التحية لصديقي ود الحسين ، والتحية لكل المعتدين بانفسهم المستقلين برايهم الذين يترفعون على الحقد الاعمي او التطبيل الاجوف ، والتحية لكاتب او كاتبة البوست .
|
Post: #51
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-30-2007, 07:39 PM
Parent: #47
| Quote: التحية لصديقي ود الحسين ، والتحية لكل المعتدين بانفسهم المستقلين برايهم الذين يترفعون على الحقد الاعمي او التطبيل الاجوف ، والتحية لكاتب او كاتبة البوست . |
الاخ الكريم علي محمد علي ...
التحية لكل اهل السودان من شماله الى جنوبه ومن شرقه الى غربه ...
ويا علي المقال ... مكتوب بيد كاتبة ...مع انو اسم سناء بيحتمل التذكير والتانيث ...
تحياتي ....
|
Post: #46
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: Adrob wad Elkhatib
Date: 05-30-2007, 12:37 PM
Parent: #43
حديث حلو من الزمن الجميل , قبل ماينقذونا
|
Post: #48
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-30-2007, 12:50 PM
Parent: #1
Quote: تعرفي يا سناء
تحياتي لك
ولهذا الحوش السودان
وعسانا نصوغ حياة ملئها الحب كما في الحوش
أما
اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
أقول ليك
انت جميلة في كل حالاتك
بس خليك كدا
مودتي |
الاخ الكريم مجاهد ...
زمان .. لما الزمن كان زين ...كنا بنقول السودان دة احسن بلد في الدنيا ...
كنا برغم الظروف الصعبة ... الغلا ... التعب ... الحر ... البرد ... العدم والصرم ..
كنا بنراهن على الانسان ...
بنقول بلدنا كعبة ... لكن ناسها سمحين ...
كنا بنتحدى الدنيا بسماحتنا ...
اها هسة ما بقت عندنا سماحة ولا مسامحة ... حنتحدى بشنو ..
بالاساءة ؟؟؟ بالتعدي على بعض ؟؟ بعدم الاحترام لبعض ؟؟؟
بقينا نعمل طمام بطن ...
بس كتروا الليمون ...
|
Post: #49
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-30-2007, 12:54 PM
Parent: #1
حديث لو من الزمن الجميل , قبل ماينقزونا
ادروب ...
تحياتي ...
رابط الصور رفض يفتح لي تماما وبتجي رسالة انو صلاحية الصفحة منتهية ...
وما زال عندي امل اني اشوفها ... لاني لسة مليانة بحسرتي من اني مشيت اجازتي السودان بدون كاميرا ...
|
Post: #55
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: Adrob wad Elkhatib
Date: 05-31-2007, 06:35 PM
Parent: #49
سلام سنا الربط هنا ....مع تحياتى
http://flickr.com/photos/7708594@N02/
|
Post: #50
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-30-2007, 01:43 PM
Parent: #1
ود حاج مبروك بيحب اللمة ...
عندو غرام مع حاجتين ...
قولة كفارة .. وقولة مبروك ...
مجامل حيل ما بفوت شئ ...
في أي مناسبة بيقعد وش ...
كان اول زول ..
لمن :
حليمة طهّرت نملتها...
خديجة كسرت غويشتها ...
ميمونة شاكلت ضرتها ...
الزينة حلبت بقرتها ...
لولا صدمت عربيتها ...
حنينة خاصمت صاحبتها...
بخيتة عاست كسرتها ...
وسوسو حرقت بصلتها ...
وكان اول زول
لمن :
ود الامين رقوهو ...
وعم جد حاج صلاح حجبوهو ...
وخال الطاهر حفيد محجوب جار حبوبة الجيران مرتو ولدت وجابت تيمان ...
ولمن علي الهملان فتح دكان ...
وصاحبو بخيت السجمان سافر برة وهجر السودان ...
طب ياخ مالو ؟؟!! ود حاج مبروك بيحب يجامل ..
بيحب قولة كفارة ومبروك ...
المشكلة شنو ؟؟؟
المشكلة ...
لمن تكون في مشكلة محتاجة وقفة ودقة صدر ...
صاحبنا دة بيختفي ... بدون اثر ...
|
Post: #52
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-31-2007, 02:45 PM
Parent: #1
الاعتراف ما قبل الاخير ...
اخوي وديدي منفوخ شديد ...
وملان محن ..
لونه طيف ...
مرة اخدر ... مرة احمر ...
مرة اصفر ... ومرة ازرق ...
مرة بينقط عسل ...
ومرة حنضل وشوال بصل ...
مرة افهم من فهيم ...
ومرة ابلد من بليد ...
مرة حاتم ... ومرة جاحظ ...
ومرة بيعمل ما ملاحظ ...
خوفي ليهو من الابر ... ومن الدبابيس والمرايات المكسرة ...
وحتى من شوك السدر ...
طعنة واحدة ... ويبقى مافي ...
|
Post: #53
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-31-2007, 04:33 PM
Parent: #1
آخر كلام ....
الود محبوب ...
قاعد في السوق وقابض الجو ...
فاتح بوتيك .. وبضاعته كلام ...
اسعاره مهاودة ... وممكن تقسيط ...
بيبيع بمزاج ... وحسب الاشكال ...
جاتو فلانة الناعمة ؟؟!! ...
يقوم يديها بضاعة نضيفة ...
ملفوفة بورق سوليفان ..
مربوطة بشريطة ستان ...
ولو جات علانة الجادة ؟؟؟!! ...
دي بضاعتها غير ..
بدون تزويق .. بدون تربيط ...
كلام ثابت ومدعوم باسانيد ...
طيب ولو جات فلانة ؟؟؟
فلانة فلانة ؟؟!! ...
دي بضاعتها من الخاص .. وتمشي ليها الخاص ..
ويبدا الود محبوب يكب مكنات ...
ويكسر تلج ... يسقي بلاد ...
ولسة خليكم مع الولد محبوب ... ما دة آخر العنقود ...
|
Post: #54
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 05-31-2007, 05:33 PM
Parent: #1
آخر .. آخر الكلام ...
الود محبوب تلفونه ملان ...
ارقام من كينيا وباكستان ...
من استراليا والسودان ...
الود محبوب مايسترو فنان ...
عمرو ما بيغلط في عنوان ...
واصلا ما بيخلط بين جوقة الفرقة ..
يحمد ربو .. ما عندو عمى الوان ...
واضانه سليمة بتقدر تفرز صوت الدربكة .. من الكمان ...
الود محبوب ؟؟!!
جد فنان ....
|
Post: #56
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: مدثر محمد ادم
Date: 05-31-2007, 08:34 PM
Parent: #54
الاخت الرائعة سناء لك اجمل التحايا
بهديك القصيدة دي
قريت في عيونك
معنى الوجود
ورسمت فيها
وطن
من غير حدود
ضل علي الجميع
ممدود
اطفال بتلعب
بالورود
والضحكة فوق
الخدود
وطن مخاصم
الجوع
الكضب ممنوع
عرش الظلم
مخلوع
صوت الهوس
مفجوع
علم السلام
مرفوع
محمد اخو اليسوع
وصوت الفقراء
هو المسموع
وطن جائهو من
واقع
بالحرب موجوع
من زمن مشاتر
تاني مافي ليهو
رجوع
بونس بيهو شافع
في قلبو حبك
هو المزروع
وطن رسمتو بي
قلم مكسور
في زمن مجنون
وطن واسع بصدر
حنون
بين الناس كلمة
ريد
بالحب مسكون
والرسم في عيون
من اجمل الفنون
ووطن عيونك لابد
من يوم حياكون
تكوين 2001
تيف تيف
|
Post: #57
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 06-01-2007, 08:38 AM
Parent: #1
الاخ الكريم مدثر محمد آدم ...
اجمل احلامنا هي التي تسير امامنا ...
اجمل احلامنا هي التي لم تتحقق بعد ...
احلامنا للوطن ... عريضة ... مضيئة ...
تملانا بامنيات لا تعرف الياس ...
وما زلنا نحلم بيوم تصبح فيه احلامنا واقعا ...
فنعود ... ونبقى ...
اعز مكان وطني السودان ...
|
Post: #58
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: وليد محمد المبارك
Date: 06-01-2007, 09:11 AM
Parent: #57
يا سلالالالالالالالالالالالالالالالالالالام
|
Post: #59
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: وليد محمد المبارك
Date: 06-01-2007, 11:40 AM
Parent: #58
|
Post: #60
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: فيصل نوبي
Date: 06-01-2007, 07:54 PM
UP
|
Post: #61
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 06-03-2007, 06:01 PM
Parent: #58
| Quote: يا سلالالالالالالالالالالالالالالالالالالام |
ويا سلام يا وليد على الكلام السمح الجبتو لينا ....
تحيات كتار ...
|
Post: #62
Title: Re: اعتـراف صريـح : أنا شيـوعـيـة ظـلامـيـة ... وبأحـب كـوز مسـتـنـيــر
Author: sanaa gaffer
Date: 06-03-2007, 06:01 PM
Parent: #58
| Quote: يا سلالالالالالالالالالالالالالالالالالالام |
ويا سلام يا وليد على الكلام السمح الجبتو لينا ....
تحيات كتار ...
|
|