إعلان دهانات ناشونال فيه إهانة واضحة للسودانيين وعنصرية بغيضة !

شاهدته بالأمس على قناة النيل الازرق ،
وألمني جدا .. مثل هذا الاعلان ..

..

واحدة بتضرب في بوهية سوداء ، وجمبها واحد ضارب وشو بنفس اللون ، ولابس جلابية بيضا وعمة .. !

...

أحتج بشدة على هذا الاعلان .. المهين !

Quote: شاهدته بالأمس على قناة النيل الازرق

هبة ازيك

طبعا القناة دي زمان من القنوات الحذفتها من الرسيفير

من ايام الانتخابات

Quote: واحدة بتضرب في بوهية سوداء ، وجمبها واحد ضارب وشو بنفس اللون ، ولابس جلابية بيضا وعمة

انا ما شاهدت الدعاية (بالطبع)

لكنني اجزم ان الموسيقى التصورية

والغناء المصاحب (مصري)

*********

و يقول ليك الجنوبيين دايرين ينفصلوا ليه ؟

ما اهو دا بنمط في روحنا بقروشنا و في تلفزينا كمان !


تحياتي يا هبة و رمضان كريم

حاتم ، رمضان كريم وتصوم وتفطر على خير ..

مصنع دهانات ناشونال حسب علمي انه اردني المنشأ ، والشركة المنفذة للاعلان مصرية ..

...

حقيقي دا تنميط وفيه ترسيخ واضح للعنصرية ..
ونحن قاعدين زي الهبل نتفرج في الدعاية ، القاعدة تُبث من محطة فضائية سودانية ..

..

دا استخفاف بالعقل السوداني ، ..

..

حاتم ،
ماهي الالية المناسبة للاحتجاج الرسمي على قناة النيل الازرق وعلى مصنع دهانات ناشونال .. ؟

Quote: مصنع دهانات ناشونال حسب علمي انه ادرني المنشأ ، والشركة المنفذة للاعلان مصرية

طبعا دا المتوقع يا هبة

البوهية بوهيتنا - الخامات محلية - و الحتنضرب بيها بيوتنا

ولكن جايبيين شركة (اردنية) عشان تبيع لينا بوهيتنا و الاردنيين

جايبيين (مصريين) عشان يسوقوا فينا بوهيتنا تتوقعي الطريقة الحايفكروا

يعاملونا بيها المصريين كيف غير ما انو نحنا نشيل البوهية (السوداء)

نجلبط بيها وشوشنا !


المصريين يوم احتاجونا لتشجيعهم قدام الجزائر في (اوم دور مان) زي ما بنطقوها

عملوا لينا شنو ؟ نمطونا على شاكلة بوابيين سود مرمين ينحنون للاعبين المصريين

ويفتحون لهم بوابة كأس العالم المغلقة - بركة الما صعدوا ذاتو

هاك الفيديو - ما بعرف بنزلوهو بالطريقة الجديدة كيف ؟


http://www.youtube.com/watch?v=QGK90as4pMc

Quote: ماهي الالية المناسبة للاحتجاج الرسمي على قناة النيل الازرق وعلى مصنع دهانات ناشونال .. ؟

طبعا الآلية شعبية ، اعملوا حملة اعملو Petition و رسلو التواقيع لكل من قناة النيل الازرق و دهانات ناشنونال

بعدين اهم شي دعوات المقاطعة للبوهيات دي و لقناة النيل الازرق لو امكن


المشكلة لسة في السودان ما اتكونت حاجة إسمها الرأي العام معظم الجهد المبذول بيقوم به مجموعة مدونيين - بلوقرز-

وهم يحسبون تقليديا ضمن الصفوة المستنيرة و هم بعيدون عن الجمهور العادي لتعقد وسائل المخاطبة - اتنرنت في بلد فيها

امية فك حرف خلي كومبيوتر و انترنت و عولمة ، في مقابل غياب الصحافة الورقية عن هذه الفضايا و تجاهلها لها بصورة عامة

اما القنوات التلفزيونية ففيك الخصام و انت الخصم و الحكم النيل الازرق شاهدا

هذا لا يمنع من العمل بالطبع على مناهضة هذه العنصرية المفروضة علينا في بيوتنا و في تلفزيوناتنا

وفق المكانيات المتاحة من وسائل التعبير المتوفرة مع العمل قدر الامكان على توسيع دائرة التاثير

قدر الممكن

شكرا سمرية على فتح الموضوع
ورمضان كريم

فعلا شفت الإعلان أمس بالصدفة
ولا تتخيلي حجم الغضب الذي اجتاحني
وانا أرى قناة سودانية تبث إعلانا سخيفا
يسخر من السودانيين بطريقة مباشرة وواضحة
أين الجهة التي تشرف على الإعلانات في قنواتنا
وكيف نسئ لأنفسنا بأنفسنا

سبحان الله

يا جماعة برّدوا نَفَسكم شوية ...

شخصياً لم أشاهد الإعلان .. لكن الفكرة واضحة من وصفكم.

الإشارة إلى اللون، أسود كان أم (أسمر)، أو مفردة يا زول أو (آاي) التي يخصنا بها بعض الأخوة من دول عربية مختلفة، تثير معظمنا، وأقول لكم الحق، لا تلك الإشارات (سواء كانت بريئة أم غير ذلك) ولا غضبنا منها سيغير شئ، فنحن من نحن وكما نحن ليس لدينا ما نخجل منه أو نعتذر عنه (لون أو لهجة)، ولن ينقص مني شئ إذا ناداني أحد بـ" يا زول" أو وصفني بلوني.

هوّنوا عليكم .. لن ينقص الإعلان منّا شئ.

..
.

Quote: طبعا القناة دي زمان من القنوات الحذفتها من الرسيفير

لكن كدا ما حذفت الريسيفر كلو ؟؟؟
دى الاذاعة الاهم ..

---------------

رمضان كريم يا هبة
بالجد ما شفهمت الاهانة ووين ؟؟
ما نحنا لونا اسود .. يعنى بوهية اصلية

رمضااان كريم ..
بصراحة ما لاحظت شئ فى الدعاية احتمال
لانى وقت الداعايات بمشى بقضى اى شغلو برجع للمواصلة

رمضان كريم يا هبة

والله انا مزعلانى شديد الاعلانات المصرية دى وخاصة اعلان بتاع عصير كده ماعرف اسمو اعتقد الباشا وجايبن الملك فاروق وهلم جرا والمصيبة انو مصانع البوهية ولا العصاير مشت برجليها ودفعت قروش عشان تجيب لينا المسخرة لحدى عندنا

نتستغفر الله يا بت امى
نعمل شنو ؟

تحياتى

طارق .. تصوم وتفطر على خير ..

انا برضو زيك اول مرة اشوفو أمس ، حقيقي الاعلان مستفز شديد ..
ووجعني شديد .. الاهانة واضحة .. ودا استخفاف شديد بعقولنا ..

ـــــــــ

ياريت لو زول يتبرع وينزل الاعلان هنا ..

Quote: لكن كدا ما حذفت الريسيفر كلو ؟؟؟ دى الاذاعة الاهم ..

تبلدينا ازيك ياخي و رمضانك كريم*
اسوي شنو من كترت تطبيلها للمؤتمر الوطني
قلبي اباها و القلبي اباهو بلحقوا امات طه طوالي
ولو انو في رمضان مفكر ارجعها انشالله اغاني اغاني

نجي للكلام دا يا تبلدينا

Quote: بالجد ما شفهمت الاهانة ووين ؟؟ ما نحنا لونا اسود .. يعنى بوهية اصلية

عاد يا تبليدنا الاهانة دي ما واضحة يا الحبيب

دا ما اسمو التنميط الما بعدو تنميط

تتذكر موضوع الحضري لمن كان داير يسجلوا فريق سوداني

اظنو المريخ - الرياضة دي انا ما من ناسا -

المهم جريدة مصرية عملت الحضري ضارب وشو

بوهية (سوداء) كناية عن ان تجنيسه بالجنسية

السودانية يستتبع ضرب وجهه باللون الاسود

ودي ما اول مرة يعملوها المصريين

اصبر النمشي نبحت ليك كلامي في البوست داك

Quote: يا جماعة القصة ليست كاركتير فقط نحن لا نحتج على وصفهم لنا بالسواد الحمد لله الذي خلقنا سوداً و سمانا سودانيين القصة أن الإعلام المصري - و العربي عموماً - ظل يقدم صورة سيئة و مشوهة للسودانيين بأنهم قوم (سود البشرة) يعيشون في جهل و فقر و تخلف و كسل فظيع، و لا يصلحون لمهن سوى (طباخ) و (بواب) الخ هذه الصورة (المنمطة) تعطي إنطباع (للمتلقي) أن جميع (السودانيين) على هذه (الشاكلة) فأنا لو كنت طفلاً (مصرياً) أشاهد التلفزيون - مثلاً - تعرض فيه صورة السودانيين بأنهم قوم (سود البشرة) قباح (الخلقة) يعانون (الكسل) و لا يصلحون لمهن سوى (طباخ) و (بواب) الخ ، سيكون هذا - الانطباع المترسخ - في ذهني عن هذه الجنسية. لذا المواطن السوداني - البسيط - الذي يمارس عليه هذا - الاستهزاء و الاستعلاء - عبر وسائل الاعلام المصرية لبمختلفة، لن يشعر سوى بالإهانة من مشاهدة هكذا مشاهد لأنه تعود من الاعلام المصري على مشاهد مماثلة نأخذ مثال هنا : لمبة شو في السودان ----------------- كذلك هنا: نلاحظ استمرار عملية ( تنميط) السودانيين باحتراف في هذه الدعاية الكروية -التي اطلقها المصريون قبل مباراتهم مع الجزائر في ام درمان - فهم سود البشرة كسالى بامتياز يتعاطون الشاي و القهوة لطرد الكسل يقفون (بوابين) على بوابة كأس العالم ليسمحوا للمنتخب المصري بالدخول. المؤلم المدهش هو استطاعة المخرج اختزال كل اساليب التنميط و الاساءة المعروفة للسودانيين في فيديو طوله دقيقيتين فقط و اشهد له بالاحتراف المهني في هذا المجال دقوا الجزائر ------------ التنميط هو آفة العصر و سبب العداء و انعدام المودة لأني آتي ب(فكرة مسبقة) عن الآخر مسبقاُ ، و أضعه في إمتحان (عسير ) لإثبات (انه ليس كذلك) - كما روى لي الاعلام - و بالتالي يصبح الانسان فجأة مطالباٌ بإثبات (إنسانيته) و هنا مصدر - الاهانة العميقة - بالمناسبة ======================= سبق أن تحدثت الروائية النيجيرية (تشيماماندا أديتشي) عن خطورة النظرة الاحادية - المبنية - على تصنيف الاعلام - في أنها تسلب الاخرين انسانيتهم راجع هنا : بالتالي و مع إحترامي لكل من لا يقول أن هذه إساءة ، كلا هذه إساءة كاملة ، كمثال فقط الهنود الحمر في اميركا - لونهم اصفر - تعتبر قمة الإهانة لديهم في ثقافتهم أن يقال لأحدهم يا (إبن البيضاء) أو يا (أبيض) والإشارة الى الوان الناس - بغرض التهكم و السخرية منهم - تعتبر من الجرائم العنصرية حسب العهود و المواثيق الدولية. وستستمر هذه الإساءات مالم نتصدى قانونياٌ على وسائل الإعلام التي تمارس هذه الإهانات ، ماذا حدث لعمرو اديب و حجازي بعد إهاناتهم لنا ؟ لا شئ ؟ من الطبيعي عندما لا تسلك الدرب القانوني للأخذ بحقوقك أن يتجرأ عليك غيره تحياتي للجميع

كاريكاتير مصري عنصري حول انتقال الحضري للمريخ (السوداني) .. توجد مهزلة !!!














______________________________

* يا تبلدينا ياخي حبيبينا (امين نوتة) قال: من لا يشكر الناس لا يشكر الله
فدحين ياخي انا داير اشكرك ياخي على موقفك الداعم لي ابان غزوة ذات الIP
و أيام حاتم E النويري ، فبرغم عدم تداخلنا من قبل مطلقا لكن اثبت لي
ان هناك اشخاص بهذا المنبر يتجردون للدفاع عن الحقيقة بدون حتى معرفة بعكس
الشللية التي منعت الكثيريين ممن نعرف - حق المعرفة - من قول الحق في زمن اغبر
تحياتي و معذرة يا هبة على الخروج عن النص دا

يا صالح .. تصوم وتفطر على خير ..

......

الاهانة شديدة ياخي ، كدي بعدين شوف الدعاية وركز في اخرها ..
عشان تشوف البوهية السوداء .. ومعاها الجلابية البيضا ، وعمكـ الضارب وشو أسود ،..

الدعاية بتحاول تفهمنا بما اننا ( سود )..
فاكيد البوهية السوداء حتكون مناسبة شديد معانا .. وحتعجبنا ... خاصة مع الجلابية البيضا الناصعة ...

...

يا ابو الريش ، رمضانك كريم .. وربنا يتقبل مننا ..

....

الاهانة تجاه ( للزول ) السوداني ، كثيرة في معظم البلدان العربية ...
لا اكترث بها الا اذا تعدت الحدود ..

...
ودهانات ناشونال تعدت الحدود تماما ..
لان هذا الاعلان فيه اهانة واضحة واستخفاف وعنصرية ،
والمصيبة في بلدنا .. وقناة بتمثلنا .. .. لانها سودانية .. !

Quote: لان هذا الاعلان فيه اهانة واضحة واستخفاف وعنصرية ، والمصيبة في بلدنا .. وقناة بتمثلنا .. .. لانها سودانية .. !

هبة .. رمضانك كريم ...

واحدة واحدة ...

زي ما قلت ليك .. أنا ما شفت الإعلان ....

لكن وين الإهانة والإستخفاف والعنصرية؟

زول لابس جلابية؟ ......... كلنا بنلبس جلاليب.
لونو أسود؟ ............ كلنا تميل بشرتنا للسواد إن لم تكن سوداء تماماً.

أتذكر سنة كم وسبعين كده ... دخلت سينما النيل الأزرق (السينما مش القناة) الـ BN، ما متذكر إسم الفيلم، لكن هو فيلم أمريكي يحكي عن صديقين واحد أبيض والآخر أسود (ذو أصول أفريقية) .. يدخل الصديقان في مواقف متباينة تنتج عن الشقاوة المتوفرة بشدة في كليهما.

في إحدى لقطات الفيلم كانا يجلسان إلى طاولة في مقهى، طلب أحدهما كوباً من الحليب، والآخر قهوة سادة. عندما وضع الكوبين على الطاولة، دفع الأبيض بكوب القهوة حتى لامس يد صديقه قائلاً:(You are not so black)، فرد عليه الأسود بدفع كوب الحليب حتى لاصق يد صديقه الأبيض قائلاٍ: (And you are not so white).

عموماً إذا كان واضع الإعلان قصد به الإهانة والإستخفاف والعنصرية، فهو قصور في تفكيره .. وشخصياً أرثى له.

توّرتي لي نفسي ياخ.

جمال .. كل عام وانت بخير ..


الاعلانات السودانية .. بائسة جدا وتفتقر للافكار الجيدة ..
كان دعايات شامبيون ولا دعايات زيت صباح ، ولا دعايات الاثاثات ... وشاي الزارفتين ..

كلها دعايات فيها رسائل خاطئة جدا .. للمتلقى ...

لكن كمان تجيب ليها اهانة و استخفاف بالعقول ؟

إعلان بائس جدا .. كل يوم بنعلق عليهو!
أصلا الإعلانات في القنوات السودانية أغلبها بائس!
بائس بالجد ياخ!
وبعدين ماف إبداع سوداني؟
شنو الإعلانات كلها مصريين وسوريين وووو إلخ؟






_
رمضان كريم يا سمرية

Quote: طبعا الآلية شعبية ، اعملوا حملة اعملو Petition و رسلو التواقيع لكل من قناة النيل الازرق و دهانات ناشنونال بعدين اهم شي دعوات المقاطعة للبوهيات دي و لقناة النيل الازرق لو امكن المشكلة لسة في السودان ما اتكونت حاجة إسمها الرأي العام معظم الجهد المبذول بيقوم به مجموعة مدونيين - بلوقرز- وهم يسبون تقليديا ضمن الصفوة المستنيرة و هم بعيدون عن الجمهور العادي لتعقد وسائل المخاطبة - اتنرنت في بلد فيها امية فك حرف خلي كومبيوتر و انترنت و عولمة ، في مقابل غياب الصحافة الورقية عن هذه الفضايا و تجاهلها لها بصورة عامة اما القنوات التلفزيونية ففيك الخصام و انت الخصم و الحكم النيل الازرق شاهدا هذا لا يمنع من العمل بالطبع على مناهضة هذه العنصرية المفروضة علينا في بيوتنا و في تلفزيوناتنا وفق المكانيات المتاحة من وسائل التعبير المتوفرة مع العمل قدر الامكان على توسيع دائرة التاثير قدر الممكن

فكرة معقولة جدا يا حاتم ...

.يدك معانا ...

ابو الريش ...

كدي انت روق شوية ، وبعدين بعد الفطور جيب النيل الازرق وشوف بعينكـ .. الدعاية دي
حتعرف انا قاصدة شنو ...؟

ياخي بقول ليكـ جايبين واحد مصري ، مرتو واقفة بتضرب في بوهية (سوداء) على الحيطة ...

وهو ضارب وشو من نفس البوهية ( اسود يعني ) ولابس جلابية بيضا وعمة .. فهمت حاجة ؟

....

ود الصائم ، كل سنة وانت طيب وربنا يقبل ..

.. البؤس في الافكار المحلية محزن شديد ...
والمستوردة فيها استخفاف بالعقول ..
باعتبار اننا سودانيين (وهم ساي ) وما في داعي يتعبوا لينا في الاعلان ..

زي بتاع خديجة وقعت من البلكونة وبرضو دا حق دهانات ناشونال..

.. الابداع السوداني قاعد ، بس مدفون للاسف ... ومافي زول بديهو فرصة عشان يقدم نفسه ؟

سمرية إزيك ورمضان كريم

فى سؤال محيرني عديييل

اللبنانيين يغلطوا علينا وينبذونا ... نتمترس نحن فى سودانيز اون لاين ونأخذ حقنا (بحاجة قريبة من يدنا)

مكتبة الشرق الاوسط تفتري علينا ندافع نحن برضو من سودانيز اون لاين ونأخذ حقنا

سوداني متوفى منذ شهرين وجثته فى ثلاجة من ثلاجات دول الإغتراب وما سأل عنه واحد ... نتحرك نحن من سودانيز اون لاين ونفتش على اهله ونلقاهو

(والأمثلة كثيرة جداً لا تحصى ولا تعد)

أخيراَ وبالتأكيد ليس آخرا ... دهانات ناشونال !!!

سؤالي للكل

البلد دي ما عندها سيد ولا سيادة ؟

الاخت سمرية ،،
رمضان كريم،،

قرات ما اثرتيه من غضب وانزعاج لهذا الاعلان الذى لم يتسنى لنا مشاهدته... ومن كلامك يبدو انك لمستى فيه اهانة وعنصرية لربطه سواد اللون بالسودانيين ... وبالتأكيد اذا كان الامر كما تقولين خلفه اشارات عنصرية وتقليل شأن ... دون شك الجميع يستنكر هذا الاعلان ...
ولكن قبل ان نغضب على كل من يصفنا بالسواد او يدهن وجهه بالسواد للاشارة الى السودانيين... والى الحساسية الكبيرة تجاه من ان يصفنا بسواد اللون او يلمح له ... فى هذه الجزئية دائما ما استغرب بان تكون دولتنا نفسها نحن اسميناها ( السودان) اشارة الى سواد اهلها... ونتغنى بهذا الاسم ونفرح به وارتضيناه لانفسنا عن طيب خاطر ... اذا فلم الغضب عندما يلمح غيرنا او يشير غيرنا الينا بهذا اللون ... هنا ارى ان الامر يحتاج الى مراجعة وازالة هذا التناقض... وكثيرا ما اسال نفسى لماذ سمى السودان بناء على اللون اذا كنت محقا فى ان تسمية السودان جاءت هكذا... فاذا كنا فرحين بسوادنا يجب ان لانغضب اذا ما اشار به غيرنا الينا...و منذ فترة تراودنى فكرة فتح بوست عن اسم السودان نفسه رغم ان كثيرون تناولوا مثل هذا الموضوع بل طالبوا بتغيير اسم السودان لما فيه من عنصرية لونية...كان الله فى عوننا نحن بنو السودان لا الابيض عاجبنا( حلبى ) ولا الاسود عاجبنا(عب)...واخر دعوانا اللهم نسالك الرضا بما قسمته لنا خيره وشره...

ـــــــــــــــــــــــــــــــــــــــــــــــــــــــــــــــــــــــــــــــــــــــ

الاخت الفاضلة سمرية وين بوست اركويت ؟؟
امانة عليك امشى عليهو شوية ... وخبرونا اركويت عاملة كيف فى رمضان ...

فائق ودى وتقديرى ،،،

علي الخير ، تصوم وتفطر وعلى خير ..

غضبي ليس بسبب وصفنا بالسود ، ان الاعلان فيه سخرية واضحة من السودانيين ،
لو شاهدت الاعلان ستعرف كيف ان الاعلان فيه تنميط للسودانيين .. بشكل مستفز جدا ..
في الاعلان ظهر مؤدي الاعلان بعدد من الشخصيات من جنسيات مختلفة باللباس القومي لكل بلد ،
والمؤدي للاعلان كان رجل ابيض البشرة ( مصري ) ،
وحين ظهر بالجلابية السودانية والعمة ، ضرب وشو باللون الاسود .. ماذا تفهم من ذلك ؟

اسم السودان يجب تغييره ، لاننا لسنا من اخترناه ، فهو حتما كان اختيار المستعمر ... والاسم فيه عنصرية شديدة ..تجاهنا

(الدكتور عبدالله الطيب تناول اسم السودان بأنه صفة كما ورد في كتاب فضل السودان على البيضان، على وزن فعلان: بُيضان، صُفران، حُمران، الخ )


ــــــــــــــــ

شكرا على اهتمامك ببوست اركويت ..

بفكر في نقل بعض احوال اركويت الرمضانية على صفحات البوست .. وبالصور ...

قريبا جدا

ازيك يا هبة

فى نفس الخط تقريبا

شوفى الرابط ده

تكريس ثقافة الغير


لحدى ما قرب تجينى قناعة بإنه نحن قبلانين بالشى الحاصل ده

او يمكن كمان نكون فرحانين كمان

سلام

كدي اشرحي لينا تاني

كيف واحدة بتضرب اسود وجمبها واحد ضارب وشو اسود؟

لو كان مثلاً ضارب وشو بنفسجي كان بكون عادي مش؟

الفاتح ، كل سنة وانت طيب ..

حيرتكـ منطقية جدا وموضوعية ، .. لاني مرات بفكر واقول البلد دي مافيها وجيع ولا شنو ؟

في حاجات كتيرة مؤلمة قاعدة تحصل حولنا ، وقلائل هم من يهتموا لها ..

في سوانيز اون لاين ، هناك مجموعة كبيرة من اصحاب العقول المضيئة والقلوب البيضاء ..

هذا ما جعل كثيرا من المستحيلات ممكنة .. اتمنى ان يظل صوتنا هنا ، هو الاعلي دائما ...

والبلد دي يا الفاتح ، سيدها ( الخوف ) ،،،


وشكرا ليكــ ... كتير

سمرية.

سلامات ومشتاقين.

التنميط الذي يمارسه العرب ضد السودانين شئ سخيف ويجب على جميع السودانين الوقوف ضده ورفضه.

شكرا لك لفتح هذا البوست الهام. من هنا يجب مطالبة قناة النيل الازرق بوقف هذا الاعلان المهزلة فورا.

انا شاهدت هذا الاعلان القبيح بالامس وشخصيا ضد الاعلانات التجارية المصرية لمنتجات سودانية ومع فكرة مقاطعة اى منتج سودانى يختار معلين مصريين