Post: #1
Title: أنا .. مغشوشة فيني .. ؟!
Author: سمرية
Date: 06-21-2010, 12:13 PM
الاهداء :
... .. إلي نفسي .. وحدها
نفسي اكون حاجة تانية غيري ..
نفسي اعرف انا منو ، بالضبط كدا ؟
سؤال قاعد من زمان يخربش في روحي ..
سؤال كبير وعريض زي شارع مفتوح على احزاني ..
سؤال شاسع زي وطني الما قادرة افهمو ولا يفهمني ..
سؤال عبيط ، زي كلام مرات بقولو وبندم عليهو .. شديد
سؤال منطقى ، برضو .. ليه الاجابة عليهو صعبة ومعقدة ؟
ومليانة تفاصيل .. غبية ؟
..
.
في زول ما بعرف هو منو ..؟!
..
في زول ما قادر يعرف هو شنو .. وجاي وين ، وماشي كيف ؟
دي انا .. .. ودا شكلي .. ؟
يمكن اكون مغشوشة فيني ؟!
يمكن اكون قايلاني حاجة تانية غيري ..؟
يمكن اكون ما عارفني ولا روحي هي ذاتها بتعرفني .. !
طيب انا منو ..؟!
...
..
..
عاوزة اكون زول تاني .. اشوف بيهو روحي .
اشوف بعينو ، واحس بي ..
من ناحية تانية .. وزاوية تانية .. بعيدة عني !
عشان يمكن اعرف حاجة عني ؟
.. اسمي منو ؟
ياهو دا اسمي ؟
ولا عندي اسم تاني . في عالم تاني .. غير اسمي .. ؟
ياهو دا شكلي .. ؟
منو الحدد لي شكلي ورسمي .. واختار اسمي ؟
عاوزة اطلع من جواي .. اشوف براي .. فوقو شنو ؟
امشي بعيد ، واعاين لي ... من وراء ضهري ..
واتكلم عني .. لزول تاني .. بعيد عنو وعني .. ..
واجي جمبي .. اقيف براي ..
واعاين لي زي كل صديق وصديقة ..
بعرفني .. وما بعرفني ..
واحد بحبني شديد..
واحد عندو رايء فيني ..
وواحد ماعارف يعرفني .. ؟
... عاوزة افهمني .. واعرفني شديد ..
اجمل حاجة فيني ، واسوأ حاجة .. عني ..؟
..
انا .. مغشوشة فيني .. ؟
شايفة روحي بشكل غير شكلي ..؟
شايفة .. روحي بزاوية بعيدة جدا .. عني ...؟
انا بسأل فيني ، ولا فيكم ولا السؤال بسأل عني ؟!
...
عاوزة افتح جواي طاقة ، ادخل بيها لروحي ..
امشي ليها في محلها ، او اخليها تجي برة عندي ..
.. اقعد معاها ، واحكي ليها ،، عنها وعني ..
وتكلمني .. بكل صراحة تحكي لي عني ..
عن رسمها وشكلها ، عن حزنها وصمتها ..
عن فرحها ، وضحكها ..
عنها .. ياخي .. وعني !
.. دي ياها روحي ..؟
مضلمة كدا .. وحاجبة الضو عني ؟
يارب هي نوري .. وانا ضوها .. ؟
هي يقيني .. وانا ظنها ؟!
هي .. نهري .. وانا بحرها .. ؟
... هي روحي .. وانا منها ؟
...
..
انا بسأل فيني .. وعنها ؟ ...
وعنها .. ياخي وعنها ..
...
...
...
|
Post: #2
Title: Re: أنا .. مغشوشة فيني .. ؟!
Author: Hassan Bakri Nugud
Date: 06-21-2010, 12:24 PM
Parent: #1
Quote: الاهداء :
... .. إلي نفسي .. وحدها |
مش لما تلقيها الأول !
تحياتي سمرية.
|
Post: #3
Title: Re: أنا .. مغشوشة فيني .. ؟!
Author: سمرية
Date: 06-21-2010, 12:27 PM
Parent: #2
سلامات يا حسن .. ازيكـ ؟
| Quote: مش لما تلقيها الأول ! |
الزول ما يكسر تلج لروحو ياخ ؟
|
Post: #4
Title: Re: أنا .. مغشوشة فيني .. ؟!
Author: Emad Abdulla
Date: 06-21-2010, 01:22 PM
Parent: #3
| Quote: هي يقيني .. وانا ظنها ؟! |
بسسسسس ..
أمسكي في دي قوي .
........
ظن اليقين
|
Post: #6
Title: Re: أنا .. مغشوشة فيني .. ؟!
Author: طارق الكوتش
Date: 06-21-2010, 01:27 PM
Parent: #4
| Quote: نفسي اعرف انا منو ، بالضبط كدا ؟ |
هبه
بت اسكول و سستر اسكول
وعاشقة مصطفى سيد احمد
واكتر من كده بتحصلى الدومه يا بتى
|
Post: #9
Title: Re: أنا .. مغشوشة فيني .. ؟!
Author: سمرية
Date: 06-21-2010, 02:19 PM
Parent: #6
Quote:
واكتر من كده بتحصلى الدومه يا بتى |
يا طارق يا كوتش .. ..
انا حصلتو زمااااااااااااااااااان .. ومشيت بغااااادي ... بهنااااك ..
ــــــــــــــــــــــ
الدومة منو ......؟؟؟!
( وش عامل فيها رايح )
|
Post: #8
Title: Re: أنا .. مغشوشة فيني .. ؟!
Author: سمرية
Date: 06-21-2010, 02:03 PM
Parent: #4
Quote: بسسسسس ..
أمسكي في دي قوي .
........
ظن اليقين
|
اليقين مرات ( بظن ) فيني ..
ومرات كتير .. انا دي ( بظن ) فيه ..
ياخي هي كترة ( ظنون ) ..
.. خليها ساي ,, ...
,,
و...
(... انظر كيف فرط فينا ربنا ..؟؟ ..)
|
Post: #5
Title: Re: أنا .. مغشوشة فيني .. ؟!
Author: Hassan Bakri Nugud
Date: 06-21-2010, 01:23 PM
Parent: #3
Quote:
الزول ما يكسر تلج لروحو ياخ ؟ |
هههههه ، يا ستي كسري بي راحتك ، وإحنا زاااتنا كان لقينا طريقة بنكسر معاك !
هي الواطة زاته سخّنت
|
Post: #7
Title: Re: أنا .. مغشوشة فيني .. ؟!
Author: الوليد الرشيد وراق
Date: 06-21-2010, 01:47 PM
Parent: #5
Quote: امشي بعيد ، واعاين لي ... من وراء ضهري ..
واتكلم عني .. لزول تاني .. بعيد عنو وعني .. .. |
سلام ياسمرية
بى طريقتك دى بتلقطى أكياس قريب
|
Post: #10
Title: Re: أنا .. مغشوشة فيني .. ؟!
Author: مزمل خيرى
Date: 06-21-2010, 02:28 PM
Parent: #7
بالبوست دا شكلك تانى ماحتجيبنا بهناك
وتخلى ناس طارق جبريل يشمتوا فينا.. 
|
Post: #13
Title: Re: أنا .. مغشوشة فيني .. ؟!
Author: طارق الكوتش
Date: 06-21-2010, 02:38 PM
Parent: #10
| Quote: الدومة منو ......؟؟؟! |
الدومة قالوا رئيسا صلاة النبى فوقو
عضة ادانى كديسا صلاة النبى فوقو
( اها كده لسه وشك عامل فيها رائح )
|
Post: #18
Title: Re: أنا .. مغشوشة فيني .. ؟!
Author: سمرية
Date: 06-22-2010, 07:07 AM
Parent: #13
الدومة قالوا رئيسا صلاة النبى فوقو
عضة ادانى كديسا صلاة النبى فوقو
بث خلاس .. يا كوتش
من أمس بفتش لي في غنية ألوكها وانا بلقط في الاكياس ...
اسكول جنوب السنتر صلاة النبي فوقها ..
كلية اوضة وعنبر .. صلاة النبي فوقها ..
ــــــ
هسي مووش حرام عليكـ تجيب سيرة اسكول في مصيبة زي دي ؟
|
Post: #17
Title: Re: أنا .. مغشوشة فيني .. ؟!
Author: سمرية
Date: 06-22-2010, 07:01 AM
Parent: #10
Quote: بالبوست دا شكلك تانى ماحتجيبنا بهناك
وتخلى ناس طارق جبريل يشمتوا فينا.. |
ايووووووووووووووووووووا ..
يا مزمل من كلامك دا شكلكـ بتعرفني ..
.. طبـــ .. انا منو ؟!
ـــــــــــــــ
وطارق جبريل ذاتو ان شاء الله يكون بعرفني ...؟
|
Post: #19
Title: Re: أنا .. مغشوشة فيني .. ؟!
Author: محمد الكامل عبد الحليم
Date: 06-22-2010, 07:17 AM
Parent: #17
تحية--يا سمرية سؤالك فلسفي--مجرد سؤال يعبر عن حالة رائعة من السمو--السمو المفترض والمأمول--يبدأ ارتباطنا بالاخرين عندما نعرف انفسنا--المساحيق التي يضعها الناس لزوم التواصل تفضحها شمس الحقيقة--الكامنة فعلا في الدواخل وفي الاحساس اليقيني الصادق--احساس بطهر الحقيقة والتعطر من فوحها وعطرها وعبيرها في اضعب الحالات او لنقل في حالة الحد الادني المطلوب--ومن ثم ياتي الارتقاء عبر سمو الروح--لكن كيف--- البقية في العدد القادم-
|
Post: #12
Title: Re: أنا .. مغشوشة فيني .. ؟!
Author: سمرية
Date: 06-21-2010, 02:38 PM
Parent: #7
| Quote: بى طريقتك دى بتلقطى أكياس قريب |
الوليد .. نهارك طيب ..
الاكياس دي موضة قديمة بالنسبة .. لحالتي دي .. ..
زمان كنت اخترت لي صينية كدا ، عشان اقيف فيها ..
قاموا كسروها ... ياخي ..
....
|
Post: #11
Title: Re: أنا .. مغشوشة فيني .. ؟!
Author: سمرية
Date: 06-21-2010, 02:34 PM
Parent: #5
Quote:
هههههه ، يا ستي كسري بي راحتك ، وإحنا زاااتنا كان لقينا طريقة بنكسر معاك !
|
هوي كل زول يكسر لروحو .. .. ..
|
Post: #14
Title: Re: أنا .. مغشوشة فيني .. ؟!
Author: نور الدين عثمان
Date: 06-21-2010, 02:57 PM
Parent: #11
اللوحة الفوق دى ابداع وحكيك وظنك بى نفسك برضوابداع
وشكرا على الابداع ولى قدام
|
Post: #15
Title: Re: أنا .. مغشوشة فيني .. ؟!
Author: nazar hussien
Date: 06-21-2010, 03:01 PM
Parent: #14
أعملي ليها مس كول
امكن تعرفيها كان ردت
|
Post: #16
Title: Re: أنا .. مغشوشة فيني .. ؟!
Author: ابو جهينة
Date: 06-21-2010, 10:03 PM
Parent: #15
سمرية
تحياتي
رغم إن الإهداء منك إليك
إلا أن الأسئلة لا تخلو من فلسفة و تصالح في حدود مع النفس و تمرد على الذات
عاوزة اطلع من جواي .. اشوف براي .. فوقو شنو ؟
امشي بعيد ، واعاين لي ... من وراء ضهري ..
واتكلم عني .. لزول تاني .. بعيد عنو وعني .. ..
لا أدري إن كان ما أشعر به حيال نفسي جراء نفس الأسئلة هي التي إنتابتْك لدلق هذه الأسئلة .
و لكن أحيانا تمر بي لحظات أريد أن أنعتق من دواخلي لكى أري نفسي بمنظار الآخرين ، ليس الشكل ، و لكن التصرف و الحديث و التفاعل
و هي من وجهة نظر علماء النفس أنها حالة من عدم رضا النفس بما تختزنه من كل المشاعر ، بل هي حالة تنطبق عليها المقولة الشعرية :
إذا كانت النفوس كبارا تعبتْ في مرادها الأجسام
عذرا إن إقتحمنا خلوتك
|
Post: #22
Title: Re: أنا .. مغشوشة فيني .. ؟!
Author: othman mohmmadien
Date: 06-22-2010, 07:41 AM
Parent: #16
قدر شنو...؟
|
Post: #25
Title: Re: أنا .. مغشوشة فيني .. ؟!
Author: سمرية
Date: 06-24-2010, 02:21 PM
Parent: #22
يا عثمان ...
قدر الامل الكبير الموجود ، في الرسم الفتنازي .. الاضفتو لردك
...
شكرا كتير والله ..
|
Post: #23
Title: Re: أنا .. مغشوشة فيني .. ؟!
Author: سمرية
Date: 06-23-2010, 01:36 PM
Parent: #16
Quote: لا أدري إن كان ما أشعر به حيال نفسي جراء نفس الأسئلة هي التي إنتابتْك لدلق هذه الأسئلة .
و لكن أحيانا تمر بي لحظات أريد أن أنعتق من دواخلي لكى أري نفسي بمنظار الآخرين ، ليس الشكل ، و لكن التصرف و الحديث و التفاعل
و هي من وجهة نظر علماء النفس أنها حالة من عدم رضا النفس بما تختزنه من كل المشاعر ، بل هي حالة تنطبق عليها المقولة الشعرية :
إذا كانت النفوس كبارا تعبتْ في مرادها الأجسام |
ابو جهينة ..
هي لحظة تأمل قصوي ، لحظة لا تنفكـ تثير غبار الاسئلة الحمقاء .. فوق رصيفي ..
اسئلة تكاد تفتكـ بعقلي ، من انا ؟ ..
وكيف الج الى اعماق روحي لاعرف كل شيء عنها ..
كيف اطاوعها واروضها .... ؟؟
..
اسئلة تمتطي لجام .. عقلي الجامح ..
حين تسأل نفسكـ ، كيف تبدو بنظر الاخرين ؟
هل تتطابق صورتكـ الذاتية مع صورتك الحقيقية .. مع نظرتهم لكـ ..؟
وان كان ثمة اختلاف ، ما سببه ؟؟
وما مقدار التباين في المحصلة النهائية ؟
...
هي مساحة مشروعة للجميع ، ليست لنفسي وحدها .. لكـ / لها ، لهم ..
اسئلة مطروحة لنا ، لدواخلنا .. .. للكائن الرابض في عرين ذاتنا ....
ـــــــــــــــــــــ
.. شكرا يا ابو جهينة لانكـ تجيد قراءتي دوما ...
...
شكرا مجيدا ..
|
Post: #21
Title: Re: أنا .. مغشوشة فيني .. ؟!
Author: سمرية
Date: 06-22-2010, 07:40 AM
Parent: #15
Quote: أعملي ليها مس كول
امكن تعرفيها كان ردت |
لما اعرف رقمها الاول ...
ـــــــــــــــ
ازيكـ يا نزار .. ؟!
|
Post: #20
Title: Re: أنا .. مغشوشة فيني .. ؟!
Author: سمرية
Date: 06-22-2010, 07:27 AM
Parent: #14
Quote: اللوحة الفوق دى ابداع وحكيك وظنك بى نفسك برضوابداع
وشكرا على الابداع ولى قدام |
نور الدين .. في لحظة كتابتي للنص ( المكعوج ) اعلاه ..
كنت مستغرقة في ذاتي بشكل عجيب خلاص ..
هل حقا نحن نعرف انفسنا جيدا .. هل نستطيع ان نتكهن بكل ردود افعالنا استباقيا .. ؟
هل نستطيع ان نقول ..: - انا بعرف نفسي كويس ..
ونكون على ثقة من ذلك .. ؟
غايتو ....
..
.
ــــــــــــــــــــ
شكرا على الاضاءة الساطعة ..
|
Post: #24
Title: Re: أنا .. مغشوشة فيني .. ؟!
Author: نور الدين عثمان
Date: 06-23-2010, 02:19 PM
Parent: #20
والله صراحة وعن نفسى احيانا بتجينى افكار بحس انو ده ما انا واقعد ذى المجنون اخاطب فى نفسى واقول والله شكلك ياجنيت فعلا يا قربت تجن واحاول بقدر الامكان اخرج نفسى بى سرعة .
|
Post: #26
Title: Re: أنا .. مغشوشة فيني .. ؟!
Author: معاوية عبيد الصائم
Date: 06-24-2010, 09:33 PM
Parent: #24
سمرية
بالطريقه دى ؟ ربنا يكضب الشينة؟؟
المداخلات جابت ليها لقيط اكياس؟؟
المدعو طارق جبريل00خلى لى اصلو اليومين ديل دخان كوشة الجبل الزمان دااااك يادوب طلع فى راسو؟؟؟
كان جابت ليها لقيط اكياس ؟؟؟ ركزى ع العمارات ؟؟؟
سلام كتير يا مبدعة؟؟؟ اظهرى بهناك 00
|
Post: #27
Title: Re: أنا .. مغشوشة فيني .. ؟!
Author: سمرية
Date: 06-27-2010, 10:11 AM
Parent: #24
Quote: والله صراحة وعن نفسى احيانا بتجينى افكار بحس انو ده ما انا واقعد ذى المجنون اخاطب فى نفسى واقول
والله شكلك ياجنيت فعلا يا قربت تجن واحاول بقدر الامكان اخرج نفسى بى سرعة . |
ياخي اجمل حاجة يا نور الدين الحوارات القاعدة تدور ما بيننا وبين انفسنا ، دي حوارات بتكون صادقة جدا ومجنونة .. ..
... غايتو انا بحب اخلق جنون زي دا كل فترة وبنكش ليك حاجات روحي دي بطريقة ، فوضوية ومرتبة في آن واحد ..
وبعدين الجنون مالو ، عيبو لي ؟
|
Post: #28
Title: Re: أنا .. مغشوشة فيني .. ؟!
Author: othman mohmmadien
Date: 06-27-2010, 03:34 PM
Parent: #27
Quote: يا عثمان ...
قدر الامل الكبير الموجود ، في الرسم الفتنازي .. الاضفتو لردك
...
شكرا كتير والله .. |
مغشوشة قدر الأمل ... يعني مغشوشة بقوة لأن الأمل .. قوة ... و اليأس ضعف ... الأمل حياة ... واليأس موت ... تمنيت لو أنك مغشوشة بقدر اليأس ... عشان تكوني مغشوشة بصورة أضعف ... سمعنا بخداع النفس ... هل هو ذاته الغش...
عموما شكرا على الأمل الأخرجتيه من الرسمة ... فلم أكن أراها كذلك ... هذه الأنثى الطافية على سطح الماء اراها بلا جذور تتبع التيار فيشدها حيث المنتهى واللانهاية .. ثم تعلق هنا وهناك ... ودوما تدور فهي رمز لعدم الاستقرار ... كحالنا نحنا ... والظروف التي جعلتنا بلا جذور ولا مأوى ننأي بأنفسنا ونرتحل من قطر لآخر ... ببلوة تسمى الاغتراب ... طائر النورس يدعوها لبناء العش والوكر... وهو طائر اليف يحب العيش في جماعات ... حبات المطر تصاعدت فتبخرت من وسط مالح دبغ فسقطت عذبة فنبتت منها الخضرة .. وده الأمل الوحيد الكنت حاسيه في الرسمة ...
ناس علم النفس والاجتماع متشددين في حتة أنا مغشوشة في نفس دي ... ويلا نقرأ كلامهم ...
Quote:
فى احدى قصص الآنجيل, يروى انه كان هناك انسان وحشى يهدد الشعب. ولما قابله المسيح عرفت الارواح التى كانت تتلبسه أنها ستغادره لامحالة.
صرخت خائفة: "اسمح لنا ان نتركه, على ان نتلبس تلك الخنازير الموجودة عند الجرف." فلما سمح لها خرجت تتلبس الخنازير. لم تتحمل الخنازير الارواح الشريرة فانتحرت ملقية بنفسها من أعلى الجرف.
كيف نسمح للمشاعر والأفكار السلبية (التى ليس لها اساس فى الواقع) ان تتملكنا وتتلبسنا. كيف نسمح ان تظل مسببة معاناتنا التى لاتنتهى الا بإنتهائها ونحن قادرون على التخلص منها ولا نفعل بإرادتنا ومسئوليتنا؟ يقضى عمره يلعن السجائر ويدخنها. مريض الوسواس القهرى يعى زيف الفكرة التى تسيطر عليه ولا يستطيع التخلص منها.
لو افترضنا وجود الذات الحقيقية للإنسان فإننا لا بد وان نفترض ونتحدث عن اربعة ذوات أخرى على الأقل فى نفس الوقت. الذات الحقيقية والذات التى يراها صاحبها والذات التى يعرضها صاحبها للآخر فردا فردا, والذات التى يراها الآخر فيك, كذات حقيقية او إدعائية, حسب وجهة نظره. والذات التى تعتقد انه يراها وتحاول تدعيمها أو تغيير وجهة نظره, و لا يراها هو. وهلم جر. وترى انت ايضا الآخر كذلك.
ببساطة ذاتك ما تعتقده عن ذاتك. وذاتى هى ما اعتقده انا عن ذاتى. وتقترب وجهات النظر فيتغير مفهومنا عن ذواتنا.
أحيانا ما نعامل الذات كمملكة خاصة ونحاول توسيع المملكة و توسيع هذا المفهوم العبودى للذات. فنمارس العبودية على الذات ألا ثم الآخر. نستعبد ونستعمل ذواتنا ولا نمارسها كما نراها, بحرية وإنطلاق, بل نهرب منها أحيانا. أنت شغال لحساب من؟ ولصالح أى ذات؟!!
ومن أحب قرأءة هذا الموضوع مصدره أدناه:
http://www.ahewar.org/debat/show.art.asp?aid=80923
|
|
|