إلى د. بلة موسى في ( نقائه )

قال عزيزنا - ونديدنا - بلة موسى في بوست للأنصاري ( العلماني ) محمد عادل

Quote: صديق جميل ونقى وانجليزيتو على أدو مرة بحكى عن السيوبرفايزر بتاعتو وأنها متلحاهو وعندما زهج منها خالص وهو نادرا مايزعل قال: والله زهجتنى لحدى ماقلت ليها: نوبروبليم (no problem ) عديل وهو فى قرارة نفسه يعتقد أنه رد عليها بطريقة مفحمة تتساوى مع زعله البالغ والنادر!

وحيث أن النقاء بالنقاء يذكر
فصديقنا ( م ) قد تم توزيعه بعد السنة الأولى بكلية الهندسة تم توزيعه لدراسة الهندسة المدنية شريطة إجتيازه لملحق مادة ( الكهرباء ) الذي كان ضمن مقرر السنة الأولى

دخل صديقنا لإمتحان الملحق ووجده أصعب من الإمتحان الرئيسي الذي رسب فيه
نادى على أستاذ المادة الذي كان مراقباً وأخبره أنه قد تم توزيعه لدراسة الهندسة المدنية وأنه لن يلاقى ( مسألة كهرباء ) مرة أخرى في حياته
لذلك هو يرجوه أن يساعده بـ Hint أو ( هنتتين ) يحل بيهم مسألة مسألتين يخارجوه
رفض الدكتور رفضاً قاطعاً
نادى صديقنا الدكتور مرة أخرى واستخدم لغة أخرى

" يا دكتور إمتحانك دا ما Fair ، مامكن تدي زوول عندو ملحق إمتحان أصعب من الإمتحان الرئيسي "

رد عليه الدكتور بغضب

If you have such complain , You can take it to The DEAN of the Faculty

هنا أفرغ صاحبنا جام غضبه على الدكتور

" يا دكتور أنا إمتحانك ما عاوز أنجح فيهو بس أوعك تسب لى الدين

فقعتونا بالضحك مع الـ 75 ديل

-
سلامات عمرنا

عاطف عمر ياهندسة
ياخى بوستك دا غايتو حايحلنى من نذر

وغايتو انت زول صاحبى واتحمل

فى عبارتين منتظر مناسبة منذ 2004 لاستعمالهما ولم تحدث المصادفة..

والمصادفة هى أن يفتح زول بوست باسمى..

ندخل فى الأولى:

ياخى شفت إسمى فى الصفحة الأولى وفى عنوان بوست ( خفت وقلت الليلة انا هببت شنو)..

المقصودة هى الجملة المقوسة والتى يقارب تقويسها أن يمسحها بالأرض..

طبعا دى معناها الود أو البت قبل كدا اسلو اسلو ماغلط ولا بالغلط!!

التانية أبيض وأظرط عشان كدا نعملا فى مداخلة منفصلة.

لحدى ماتصحى قلنا تلقاهم مع بعض

التانية ياعاطف:

كاتب بوست بإسمى (عايز تشتهر على حسابى)

المقصودة العبارة البين قوزين, ولما تفحص بين القوزين جيدا تلقى حسابو جفاف وتصحر!

بعد داك نجى لموضوع البوست

سلام ياحنين

ياعاطف
نخش فى الموضوع

واحد أخونا من النوع التقول عليه حار وأبو الدقيق

ماشى يعمل تريننق مع خواجية من النوع قليل الأدب داك

الجماعة كانوا قلقانين الزول دا حايتشاكل معاها ويشتما
أنا قلت ليهم لو لقا الذخيرة اللغوية البشتم بيها فليفعل
ولكنه لن يجدها

وصاحبنا اتبستف ورجع يشتم بالعربى بعد ماوصل البيت!

مراحب حيدر

يلا أرمي معانا

أول عمل إلتحقت به في مكتب المهندس عبدالمنعم مصطفى وشركاه
مساعد للمهندس المقيم للإشراف على تنفيذ مشروع بنك الخرطوم وبنك الوحدة بالسوق العربي الخرطوم ( عمارة الضرائب حالياً )
المهندس المقيم للمشروع كان صديقنا عثمان إبراهيم عبود ( ود الريس ) .... خريج جامعة الخرطوم ( زمااان) ثم عمل في إنجلترا لمدة خمسة سنوات ..... النتيجة ( إنجليزي ما خمج )
المقاول شركة مصر لأعمال الأسمنت المسلح ... ( إنجليزي مصري خمج مؤصل )


في بداية المشروع كتب الباشمهندس عبود كتاباً باللغة الإنجليزية للمقاول يوضح فيه خطة العمل والإسلوب الذي سوف نتبعه في فحص ومتابعة الأعمال .. ( هو لكن قالو ليك كتاب نصاح ؟؟ نوع أصغر كلمة فيهو 8 أحرف )
جمع مدير المشروع المصري المهندس عبدالرحمن المغربي مهندسيه جميعاً للرد على خطاب عبود
في أحد مداولاتهم قال الباشمهندس مغرب نأوولو.......... We Does
قاطعه زميلنا الباشمهندس أبو صالح الذي كان يعمل بالشركة يا باشمهندس لا يصح لغوياً أن نقول We Does الصحيح أن نقول We Do

بسرعة رد عليه المهندس مغربي

لأاا.... نأولو We Does ...... تبأا أأوا ( تبقى أقوى )

Quote: ياخى شفت إسمى فى الصفحة الأولى وفى عنوان بوست ( خفت وقلت الليلة انا هببت شنو)..

....
...

Quote: كاتب بوست بإسمى (عايز تشتهر على حسابى)

____________________

رزق أحد أصدقائي بثلاث بنات .. كان فرحاً بهن
حملت زوجته للمرة الرابعة .. أحضر والدتها لتكون بقربها أثناء الوضوع وأيام النفاس
رزقا هذه المرة بـ ( ولد )
كانت فرحته ( جنونية )
بوس ( رجالي ) من طرف ... وهو صاحب الرأى الواضح في ( ليونته )
مقالدة ( نسائية ) من طرف .... وهو المتبني للرأى الفقهي بعدم جواز مصافحة الأجنبية
خرفان تذبح يومياً ... وهو الذي يحسب الدرهم ويعمل له ( حفلة وداع ) قبل صرفه

لاحظت نسيبته ( كما لاحظنا ) كل ذلك ... لكنها تكلمت ( حيث صمتنا )

" كرررررر على يا ولد أمي .... عمرك كلو كنت مخبي شوقك دا كوووولو للولد "


فيا صديقي

إنفشى ولا عليك

سلام ياعاطف

مادام دخلت فى المصريين نكون خرجنا من مرحلة النقاء

فنديك القصة دى من الواقع المرير

كنا فى الجامعة وفى العطلة
عمك (على) سواق البرينسة بين حلتنا وسوق شندى
مشهور بأنه يعرف كل شى

راكبين معاه قدام أنا وصاحبى وشايلين جريدة الأيام فيها خبر عن وجود بترول فى حلايب
علقنا وهو سامعنا

فدخل فى الموضوع قائلا:
الكلام دا صحيح( ودى دايما بتكون الكوبلى الأول بتاعو لما يكون عايز يحلق)
نحنا زمان لما كنا فى الجيش
كنا معسكرين فى منطقة حلايب
لما ننتهى من الأكل والواحد يدور يغسل يدينو لازم يحفر حفيرة بيدو عشان الله يكرم السامعين الضبان مايتلم
فأنا حفرت حفرة وغسلت يدى بعد الغدا
لما شميت يدى لقيت ريحتا بنزين

صاحبى قال:
الحمد لله بترول مصفى و جاهز للبيع!

ومن الواقع ( اللطيف )

يحلو لعمنا الرفاعي ( ... ) أن يتواجد في أى تجمع يناقش أى شئ
كيف لا وهو تماماً مثل سائق برنستكم ( يفهم في كل شئ )
الفرق بينهما أنه يحلي ( مداخلاته ) - على قول أهل الأسافير - يحليها بلغة إنجليزية يقول أنه تعلمها في معسكرات جيش الإنجليز لكنها تأتي كما إنجليزية ( حمودة ) الجامعي
إجتمع ذات مرة مجلس آباء أحد مدارس رفاعة وكان عمنا ( ... ) كالعهد به حاضراً رغم أنه لم يكن له أبناء يدرسون في تلك المدرسة
كان الإجتماع يناقش خطط وإحتياجات المدرسة
في ذاك الإجتماع أعلن رجل الأعمال المرحوم الطيب التوم بتبرعه ببناء 3 فصول جديدة في المدرسة
من بين التصفيق الحاد فوجئ الجميع بصوت عمنا ( ... ) الذي لا يغباهم هاتفاً فرحاً جزلاً

" داون داون الطيب التوم "